| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
7. жад̇умахаарааж̇асуд̇д̇аван̣н̣анаа
7. Catumahārājasuttavaṇṇanā
37. сад̇д̇амз амажжаа баарисаж̇ж̇аад̇и барижааригад̣̇звад̇аа. имам̣ логам̣ анувижаранд̇ийд̇и адтамийд̣̇ивасз гира сагго д̣̇зварааж̇аа жад̇д̇ааро махаарааж̇аано аан̣аабзд̇и – ‘‘д̇аад̇аа, аж̇ж̇а адтамийд̣̇ивасз мануссалогам̣ анувижарид̇ваа бун̃н̃аани гаронд̇аанам̣ наамаг̇од̇д̇ам̣ уг̇г̇ан̣хид̇ваа ааг̇ажчат̇аа’’д̇и. д̇з г̇анд̇ваа ад̇д̇ано барижаарагз бзсзнд̇и – ‘‘г̇ажчат̇а, д̇аад̇аа, мануссалогам̣ вижарид̇ваа бун̃н̃агаарагаанам̣ наамаг̇од̇д̇аани суван̣н̣абаддз ликид̇ваа аанзт̇аа’’д̇и. д̇з д̇ат̇аа гаронд̇и. д̇зна вуд̇д̇ам̣ – ‘‘имам̣ логам̣ анувижаранд̇ий’’д̇и. гажжи б̣ахууд̇иаад̣̇и д̇зсам̣ убабаригкаагаарад̣̇ассанад̇т̇ам̣ вуд̇д̇ам̣. звам̣ убабаригканд̇аа хи д̇з анувижаранд̇и. д̇ад̇т̇а убосат̇ам̣ убавасанд̇ийд̇и маасасса адтаваарз убосат̇ан̇г̇аани ад̇хидтаханд̇и. бадиж̇ааг̇аронд̇ийд̇и бадиж̇ааг̇араубосат̇агаммам̣ наама гаронд̇и. д̇ам̣ гаронд̇аа згасмим̣ ад̣̇д̇хамаасз жад̇уннам̣ убосат̇ад̣̇ивасаанам̣ бажжуг̇г̇аманаануг̇г̇аманавасзна гаронд̇и. бан̃жамийубосат̇ам̣ бажжуг̇г̇ажчанд̇аа жад̇уд̇т̇ияам̣ убосат̇игаа хонд̇и, ануг̇ажчанд̇аа чадтияам̣. адтамийубосат̇ам̣ бажжуг̇г̇ажчанд̇аа сад̇д̇амияам̣, ануг̇ажчанд̇аа навамияам̣. жаад̇уд̣̇д̣̇асим̣ бажжуг̇г̇ажчанд̇аа д̇зрасияам̣, баннарасийубосат̇ам̣ ануг̇ажчанд̇аа баадибад̣̇з убосат̇игаа хонд̇и. бун̃н̃аани гаронд̇ийд̇и саран̣аг̇амананижжасийлабубпабууж̇аад̇хаммассаванабад̣̇ийбасахассаааробанавихаарагаран̣аад̣̇ийни наанаббагаараани бун̃н̃аани гаронд̇и. д̇з звам̣ анувижарид̇ваа бун̃н̃агаммагаарагаанам̣ наамаг̇од̇д̇аани сован̣н̣амаяз баддз ликид̇ваа аахарид̇ваа жад̇уннам̣ махаарааж̇аанам̣ д̣̇знд̇и. буд̇д̇аа имам̣ логам̣ анувижаранд̇ийд̇и жад̇уухи махаарааж̇зхи буриманаязнзва бахид̇ад̇д̇аа анувижаранд̇и. д̇ад̣̇ахууд̇и д̇ам̣д̣̇ивасам̣. убосат̇зд̇и убосат̇ад̣̇ивасз.
37. Sattame amaccā pārisajjāti paricārikadevatā. Imaṃ lokaṃ anuvicarantīti aṭṭhamīdivase kira sakko devarājā cattāro mahārājāno āṇāpeti – ‘‘tātā, ajja aṭṭhamīdivase manussalokaṃ anuvicaritvā puññāni karontānaṃ nāmagottaṃ uggaṇhitvā āgacchathā’’ti. Te gantvā attano paricārake pesenti – ‘‘gacchatha, tātā, manussalokaṃ vicaritvā puññakārakānaṃ nāmagottāni suvaṇṇapaṭṭe likhitvā ānethā’’ti. Te tathā karonti. Tena vuttaṃ – ‘‘imaṃ lokaṃ anuvicarantī’’ti. Kaccibahūtiādi tesaṃ upaparikkhākāradassanatthaṃ vuttaṃ. Evaṃ upaparikkhantā hi te anuvicaranti. Tattha uposathaṃ upavasantīti māsassa aṭṭhavāre uposathaṅgāni adhiṭṭhahanti. Paṭijāgarontīti paṭijāgarauposathakammaṃ nāma karonti. Taṃ karontā ekasmiṃ addhamāse catunnaṃ uposathadivasānaṃ paccuggamanānuggamanavasena karonti. Pañcamīuposathaṃ paccuggacchantā catutthiyaṃ uposathikā honti, anugacchantā chaṭṭhiyaṃ. Aṭṭhamīuposathaṃ paccuggacchantā sattamiyaṃ, anugacchantā navamiyaṃ. Cātuddasiṃ paccuggacchantā terasiyaṃ, pannarasīuposathaṃ anugacchantā pāṭipade uposathikā honti. Puññāni karontīti saraṇagamananiccasīlapupphapūjādhammassavanapadīpasahassaāropanavihārakaraṇādīni nānappakārāni puññāni karonti. Te evaṃ anuvicaritvā puññakammakārakānaṃ nāmagottāni sovaṇṇamaye paṭṭe likhitvā āharitvā catunnaṃ mahārājānaṃ denti. Puttā imaṃ lokaṃ anuvicarantīti catūhi mahārājehi purimanayeneva pahitattā anuvicaranti. Tadahūti taṃdivasaṃ. Uposatheti uposathadivase.
сажз, бхигкавз, аббагаа хонд̇ийд̇и жад̇уннам̣ махаарааж̇аанам̣ амажжаа баарисаж̇ж̇аа д̇аа д̇аа г̇ааманиг̇амарааж̇ад̇хаанияо убасан̇гаманд̇и, д̇ад̇о д̇ам̣ убаниссааяа ад̇хивад̇т̇аа д̣̇звад̇аа ‘‘махаарааж̇аанам̣ амажжаа ааг̇ад̇аа’’д̇и бан̣н̣аагаарам̣ г̇ахзд̇ваа д̇зсам̣ санд̇игам̣ г̇ажчанд̇и. д̇з бан̣н̣аагаарам̣ г̇ахзд̇ваа ‘‘гажжи ну ко маарисаа б̣ахуу мануссаа мад̇д̇зяяаа’’д̇и вуд̇д̇анаязна мануссаанам̣ бун̃н̃абадибад̇д̇им̣ бужчид̇ваа ‘‘аама, маариса, имасмим̣ г̇аамз асуго жа асуго жа бун̃н̃аани гаронд̇ий’’д̇и вуд̇д̇з д̇зсам̣ наамаг̇од̇д̇ам̣ ликид̇ваа ан̃н̃ад̇т̇а г̇ажчанд̇и. ат̇а жаад̇уд̣̇д̣̇асияам̣ жад̇уннам̣ махаарааж̇аанам̣ буд̇д̇ааби д̇амзва суван̣н̣абаддам̣ г̇ахзд̇ваа д̇знзва наязна анувижаранд̇аа наамаг̇од̇д̇аани ликанд̇и. д̇ад̣̇ахубосат̇з баннарасз жад̇д̇аароби махаарааж̇аано д̇знзва наязна д̇асмим̣язва суван̣н̣абаддз наамаг̇од̇д̇аани ликанд̇и. д̇з суван̣н̣абаддабаримаан̣знзва – ‘‘имасмим̣ гаалз мануссаа аббагаа, имасмим̣ гаалз б̣ахугаа’’д̇и ж̇аананд̇и. д̇ам̣ санд̇хааяа ‘‘сажз, бхигкавз, аббагаа хонд̇и мануссаа’’д̇иаад̣̇и вуд̇д̇ам̣. д̣̇зваанам̣ д̇аавад̇им̣саананд̇и батамам̣ абхиниб̣б̣ад̇д̇з д̇зд̇д̇им̣са д̣̇звабуд̇д̇з убаад̣̇ааяа звам̣лад̣̇д̇ханаамаанам̣. д̇зсам̣ бана уббад̇д̇игат̇аа д̣̇ийгханигааяз саггабан̃хасуд̇д̇аван̣н̣анааяа вид̇т̇аарид̇аа. д̇знаад̇и д̇зна аарожанзна, д̇зна ваа бун̃н̃агаарагаанам̣ аббагабхаавзна. д̣̇иб̣б̣аа вад̇а, бхо, гааяаа барихааяиссанд̇ийд̇и наванаваанам̣ д̣̇звабуд̇д̇аанам̣ абаад̇убхаавзна д̣̇звагааяаа барихааяиссанд̇и, раман̣ийяам̣ д̣̇асаяож̇анасахассам̣ д̣̇званаг̇арам̣ сун̃н̃ам̣ бхависсад̇и. барибууриссанд̇и асурагааяаад̇и жад̇д̇ааро абааяаа барибууриссанд̇и. иминаа ‘‘маяам̣ барибун̣н̣з д̣̇званаг̇арз д̣̇звасан̇гхамаж̇жхз нагкад̇д̇ам̣ гийл̣ид̇ум̣ на лабхиссаамаа’’д̇и анад̇д̇аманаа хонд̇и. суггабагкзби иминаава убааязна ад̇т̇о взд̣̇ид̇аб̣б̣о.
Sace, bhikkhave, appakā hontīti catunnaṃ mahārājānaṃ amaccā pārisajjā tā tā gāmanigamarājadhāniyo upasaṅkamanti, tato taṃ upanissāya adhivatthā devatā ‘‘mahārājānaṃ amaccā āgatā’’ti paṇṇākāraṃ gahetvā tesaṃ santikaṃ gacchanti. Te paṇṇākāraṃ gahetvā ‘‘kacci nu kho mārisā bahū manussā matteyyā’’ti vuttanayena manussānaṃ puññapaṭipattiṃ pucchitvā ‘‘āma, mārisa, imasmiṃ gāme asuko ca asuko ca puññāni karontī’’ti vutte tesaṃ nāmagottaṃ likhitvā aññattha gacchanti. Atha cātuddasiyaṃ catunnaṃ mahārājānaṃ puttāpi tameva suvaṇṇapaṭṭaṃ gahetvā teneva nayena anuvicarantā nāmagottāni likhanti. Tadahuposathe pannarase cattāropi mahārājāno teneva nayena tasmiṃyeva suvaṇṇapaṭṭe nāmagottāni likhanti. Te suvaṇṇapaṭṭaparimāṇeneva – ‘‘imasmiṃ kāle manussā appakā, imasmiṃ kāle bahukā’’ti jānanti. Taṃ sandhāya ‘‘sace, bhikkhave, appakā honti manussā’’tiādi vuttaṃ. Devānaṃ tāvatiṃsānanti paṭhamaṃ abhinibbatte tettiṃsa devaputte upādāya evaṃladdhanāmānaṃ. Tesaṃ pana uppattikathā dīghanikāye sakkapañhasuttavaṇṇanāya vitthāritā. Tenāti tena ārocanena, tena vā puññakārakānaṃ appakabhāvena. Dibbā vata, bho, kāyā parihāyissantīti navanavānaṃ devaputtānaṃ apātubhāvena devakāyā parihāyissanti, ramaṇīyaṃ dasayojanasahassaṃ devanagaraṃ suññaṃ bhavissati. Paripūrissanti asurakāyāti cattāro apāyā paripūrissanti. Iminā ‘‘mayaṃ paripuṇṇe devanagare devasaṅghamajjhe nakkhattaṃ kīḷituṃ na labhissāmā’’ti anattamanā honti. Sukkapakkhepi imināva upāyena attho veditabbo.
бхууд̇абуб̣б̣ам̣, бхигкавз, сагго д̣̇зваанаминд̣̇од̇и ад̇д̇ано саггад̣̇зварааж̇агаалам̣ санд̇хааяа гат̇зд̇и. згасса ваа саггасса аж̇жхаасаяам̣ г̇ахзд̇ваа гат̇зд̇ийд̇и вуд̇д̇ам̣. анунаяамаанод̇и ануб̣од̇хаяамаано. д̇ааяам̣ взлааяанд̇и д̇асмим̣ гаалз.
Bhūtapubbaṃ, bhikkhave, sakko devānamindoti attano sakkadevarājakālaṃ sandhāya katheti. Ekassa vā sakkassa ajjhāsayaṃ gahetvā kathetīti vuttaṃ. Anunayamānoti anubodhayamāno. Tāyaṃ velāyanti tasmiṃ kāle.
баадихаарияабагкан̃жаад̇и зд̇т̇а баадихаарияабагко наама анд̇овассз д̇змаасам̣ ниб̣ад̣̇д̇хубосат̇о, д̇ам̣ асаггонд̇асса д̣̇виннам̣ бавааран̣аанам̣ анд̇арз згамаасам̣ ниб̣ад̣̇д̇хубосат̇о, д̇амби асаггонд̇асса батамабавааран̣ад̇о бадтааяа зго ад̣̇д̇хамаасо баадихаарияабагкоязва наама. адтан̇г̇асусамааг̇ад̇анд̇и адтахи г̇ун̣ан̇г̇зхи саманнааг̇ад̇ам̣. яобисса маад̣̇исо народ̇и яоби сад̇д̇о маад̣̇исо бхавзяяа. саггоби гира вуд̇д̇аббагаарасса убосат̇агаммасса г̇ун̣ам̣ ж̇аанид̇ваа д̣̇вз д̣̇звалогасамбад̇д̇ияо бахааяа маасасса адта ваарз убосат̇ам̣ убавасад̇и. д̇асмаа звамааха. абаро наяо – яобисса маад̣̇исо народ̇и яоби сад̇д̇о маад̣̇исо асса, маяаа бад̇д̇ам̣ самбад̇д̇им̣ баабун̣ид̇ум̣ ижчзяяаад̇и ад̇т̇о. саггаа хи зваруубзна убосат̇агаммзна саггасамбад̇д̇им̣ баабун̣ид̇унд̇и аяамзд̇т̇а ад̇хиббааяо.
Pāṭihāriyapakkhañcāti ettha pāṭihāriyapakkho nāma antovasse temāsaṃ nibaddhuposatho, taṃ asakkontassa dvinnaṃ pavāraṇānaṃ antare ekamāsaṃ nibaddhuposatho, tampi asakkontassa paṭhamapavāraṇato paṭṭhāya eko addhamāso pāṭihāriyapakkhoyeva nāma. Aṭṭhaṅgasusamāgatanti aṭṭhahi guṇaṅgehi samannāgataṃ. Yopissamādiso naroti yopi satto mādiso bhaveyya. Sakkopi kira vuttappakārassa uposathakammassa guṇaṃ jānitvā dve devalokasampattiyo pahāya māsassa aṭṭha vāre uposathaṃ upavasati. Tasmā evamāha. Aparo nayo – yopissa mādiso naroti yopi satto mādiso assa, mayā pattaṃ sampattiṃ pāpuṇituṃ iccheyyāti attho. Sakkā hi evarūpena uposathakammena sakkasampattiṃ pāpuṇitunti ayamettha adhippāyo.
вусид̇аваад̇и вуд̇т̇аваасо. гад̇агаран̣ийяод̇и жад̇уухи маг̇г̇зхи гад̇д̇аб̣б̣агижжам̣ гад̇ваа тид̇о. охид̇абхаарод̇и канд̇хабхаарагилзсабхаараабхисан̇каарабхаарз од̇аарзд̇ваа тид̇о. ануббад̇д̇асад̣̇ад̇т̇од̇и сад̣̇ад̇т̇о вужжад̇и арахад̇д̇ам̣, д̇ам̣ ануббад̇д̇о. баригкийн̣абхавасам̣яож̇анод̇и язна сам̣яож̇анзна б̣ад̣̇д̇хо бхавзсу аагад̣дхийяад̇и, д̇асса кийн̣ад̇д̇аа баригкийн̣абхавасам̣яож̇ано. саммад̣̇ан̃н̃аа вимуд̇д̇од̇и хзд̇унаа наязна гааран̣зна ж̇аанид̇ваа вимуд̇д̇о. галлам̣ важанааяаад̇и яуд̇д̇ам̣ вад̇д̇ум̣.
Vusitavāti vutthavāso. Katakaraṇīyoti catūhi maggehi kattabbakiccaṃ katvā ṭhito. Ohitabhāroti khandhabhārakilesabhāraabhisaṅkhārabhāre otāretvā ṭhito. Anuppattasadatthoti sadattho vuccati arahattaṃ, taṃ anuppatto. Parikkhīṇabhavasaṃyojanoti yena saṃyojanena baddho bhavesu ākaḍḍhīyati, tassa khīṇattā parikkhīṇabhavasaṃyojano. Sammadaññā vimuttoti hetunā nayena kāraṇena jānitvā vimutto. Kallaṃ vacanāyāti yuttaṃ vattuṃ.
яобисса маад̣̇исо народ̇и яоби маад̣̇исо кийн̣аасаво асса, соби зваруубам̣ убосат̇ам̣ убавасзяяаад̇и убосат̇агаммасса г̇ун̣ам̣ ж̇аананд̇о звам̣ вад̣̇зяяа. абаро наяо яобисса маад̣̇исо народ̇и яоби сад̇д̇о маад̣̇исо асса, маяаа бад̇д̇ам̣ самбад̇д̇им̣ баабун̣ид̇ум̣ ижчзяяаад̇и ад̇т̇о. саггаа хи зваруубзна убосат̇агаммзна кийн̣аасавасамбад̇д̇им̣ баабун̣ид̇унд̇и аяамзд̇т̇а ад̇хиббааяо. адтамам̣ уд̇д̇аанад̇т̇амзва.
Yopissa mādiso naroti yopi mādiso khīṇāsavo assa, sopi evarūpaṃ uposathaṃ upavaseyyāti uposathakammassa guṇaṃ jānanto evaṃ vadeyya. Aparo nayo yopissa mādiso naroti yopi satto mādiso assa, mayā pattaṃ sampattiṃ pāpuṇituṃ iccheyyāti attho. Sakkā hi evarūpena uposathakammena khīṇāsavasampattiṃ pāpuṇitunti ayamettha adhippāyo. Aṭṭhamaṃ uttānatthameva.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 7. жад̇умахаарааж̇асуд̇д̇ам̣ • 7. Catumahārājasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 7. жад̇умахаарааж̇асуд̇д̇аван̣н̣анаа • 7. Catumahārājasuttavaṇṇanā
