| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၇. စတုမဟာရာဇသုတ္တဝဏ္ဏနာ
7. Catumahārājasuttavaṇṇanā
၃၇. သတ္တမေ အမာ သဟ ဝတ္တန္တိ တသ္မိံ တသ္မိံ ကိစ္စေတိ အမစ္စာ, သဟိတာ။ ပရိသတိ ဘဝာတိ ပာရိသဇ္ဇာ, ပရိဝာရဋ္ဌာနိယာ ပရိသာပရိယာပန္နာ။ တေနာဟ ‘‘ပရိစာရိကဒေဝတာ’’တိ။ တာတာတိ အာလပနံ။ ဧဝန္တိ ‘‘ကစ္စိ ဗဟူ မနုသ္သာ’’တိအာဒိနာ ဝုတ္တာကာရေန။ အဋ္ဌ ဝာရေတိ ဧကသ္မိံ အဍ္ဎမာသေ စတုက္ခတ္တုံ တထာ ဣတရသ္မိန္တိ ဧဝံ အဋ္ဌ ဝာရေ။ အဓိဋ္ဌဟန္တီတိ အဓိတိဋ္ဌန္တိ။ ပဋိဇာဂရောန္တီတိ ပဋိ ပဋိ ဇာဂရောန္တိ။ ပုညံ ကရောန္တာ ဟိ သတ္တာ ဇာဂရောန္တိ နာမ ကာတဗ္ဗကိစ္စပ္ပသုတတ္တာ, ဣတရေ ပန သုပန္တိ နာမ သဟိတပရဟိတဝိမုတ္တတ္တာ။ စာတုဒ္ဒသိဥပောသထသ္သ အနုဂမနံ ဝိယ ပန္နရသိဥပောသထသ္သ ပစ္စုဂ္ဂမနံ န လဗ္ဘတိ ဒိဝသာဘာဝတော။
37. Sattame amā saha vattanti tasmiṃ tasmiṃ kicceti amaccā, sahitā. Parisati bhavāti pārisajjā, parivāraṭṭhāniyā parisāpariyāpannā. Tenāha ‘‘paricārikadevatā’’ti. Tātāti ālapanaṃ. Evanti ‘‘kacci bahū manussā’’tiādinā vuttākārena. Aṭṭha vāreti ekasmiṃ aḍḍhamāse catukkhattuṃ tathā itarasminti evaṃ aṭṭha vāre. Adhiṭṭhahantīti adhitiṭṭhanti. Paṭijāgarontīti paṭi paṭi jāgaronti. Puññaṃ karontā hi sattā jāgaronti nāma kātabbakiccappasutattā, itare pana supanti nāma sahitaparahitavimuttattā. Cātuddasiuposathassa anugamanaṃ viya pannarasiuposathassa paccuggamanaṃ na labbhati divasābhāvato.
တတောတိ တတော တတော။ တံ ဥပနိသ္သာယာတိ တာ တာ ဂာမနိဂမရာဇဓာနိယော ဥပနိသ္သာယ။ အဓိဝတ္ထာတိ အာရာမဝနရုက္ခာဒီသု အဓိဝတ္ထာ ဒေဝတာ။ တေတိ တေ ဒေဝာ။ သန္ဓာယ ကထေတီတိ ဘဂဝာ ကထေတိ။ ဝုတ္တန္တိ အဋ္ဌကထာယံ ဝုတ္တံ။
Tatoti tato tato. Taṃ upanissāyāti tā tā gāmanigamarājadhāniyo upanissāya. Adhivatthāti ārāmavanarukkhādīsu adhivatthā devatā. Teti te devā. Sandhāya kathetīti bhagavā katheti. Vuttanti aṭṭhakathāyaṃ vuttaṃ.
နိစ္စံ နိဗဒ္ဓံ ဥပောသထော သံဝစ္ဆရေ သံဝစ္ဆရေ ပဋိ ပဋိ ဟရိတဗ္ဗတော ပဝတ္တေတဗ္ဗတော ပာဋိဟာရိယပက္ခော နာမ။ ဂုဏင္ဂေဟီတိ ဥပောသထင္ဂေဟိ။
Niccaṃ nibaddhaṃ uposatho saṃvacchare saṃvacchare paṭi paṭi haritabbato pavattetabbato pāṭihāriyapakkho nāma. Guṇaṅgehīti uposathaṅgehi.
ဝုတ္ထဝာသောတိ ဝုသိတဗ္ရဟ္မစရိယဝာသော။ ကတ္တဗ္ဗကိစ္စန္တိ ဒုက္ခာဒီသု ပရိညာတာဒိကိစ္စံ။ ဩတာရေတ္ဝာတိ ဆဍ္ဍေတ္ဝာ။ ပရိက္ခီဏဘဝသံယောဇနောတိ သဗ္ဗသော ခီဏဘဝဗန္ဓနော။ ကာရဏေန ဇာနိတ္ဝာတိ ဝိပသ္သနာပညာသဟိတာယ မဂ္ဂပညာယ စတ္တာရိ အရိယသစ္စာနိ ဇာနိတ္ဝာ။
Vutthavāsoti vusitabrahmacariyavāso. Kattabbakiccanti dukkhādīsu pariññātādikiccaṃ. Otāretvāti chaḍḍetvā. Parikkhīṇabhavasaṃyojanoti sabbaso khīṇabhavabandhano. Kāraṇena jānitvāti vipassanāpaññāsahitāya maggapaññāya cattāri ariyasaccāni jānitvā.
ဇာနန္တောတိ ‘‘အရဟန္တာနံ အနုကရဏပ္ပဋိပတ္တိ ဧသာ, ယဒိဒံ သမ္မဒေဝ ဥပောသထာနုဋ္ဌာန’’န္တိ ဧဝံ ဥပောသထကမ္မသ္သ ဂုဏံ ဇာနန္တော။ ဧဝရူပေနာတိ ယာဒိသော ဘဂဝတော ဥပောသထဘာဝော ဝိဟိတော, ဧဝရူပေန အရဟန္တာနုကရဏေန ဥပောသထကမ္မေန။ သက္ကာ ပဟိတတ္တော ဝိပသ္သနံ ဥသ္သုက္ကာပေတ္ဝာ ခီဏာသဝသမ္ပတ္တိံ ပာပုဏိတုံ။ အဋ္ဌမံ ဥတ္တာနတ္ထမေဝ သတ္တမေ ဝုတ္တနယတ္တာ။
Jānantoti ‘‘arahantānaṃ anukaraṇappaṭipatti esā, yadidaṃ sammadeva uposathānuṭṭhāna’’nti evaṃ uposathakammassa guṇaṃ jānanto. Evarūpenāti yādiso bhagavato uposathabhāvo vihito, evarūpena arahantānukaraṇena uposathakammena. Sakkā pahitatto vipassanaṃ ussukkāpetvā khīṇāsavasampattiṃ pāpuṇituṃ. Aṭṭhamaṃ uttānatthameva sattame vuttanayattā.
စတုမဟာရာဇသုတ္တဝဏ္ဏနာ နိဋ္ဌိတာ။
Catumahārājasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၇. စတုမဟာရာဇသုတ္တံ • 7. Catumahārājasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၇. စတုမဟာရာဇသုတ္တဝဏ္ဏနာ • 7. Catumahārājasuttavaṇṇanā
