| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[187] 7. சதுமட்ட²ஜாதகவண்ணனா
[187] 7. Catumaṭṭhajātakavaṇṇanā
உச்சே விடபி⁴மாருய்ஹாதி இத³ங் ஸத்தா² ஜேதவனே விஹரந்தோ அஞ்ஞதரங் மஹல்லகபி⁴க்கு²ங் ஆரப்³ப⁴ கதே²ஸி. ஏகதி³வஸங் கிர த்³வீஸு அக்³க³ஸாவகேஸு அஞ்ஞமஞ்ஞங் பஞ்ஹபுச்ச²னவிஸ்ஸஜ்ஜனகதா²ய நிஸின்னேஸு ஏகோ மஹல்லகோ பி⁴க்கு² தேஸங் ஸந்திகங் க³ந்த்வா ததியோ ஹுத்வா நிஸீதி³த்வா ‘‘ப⁴ந்தே, மயம்பி தும்ஹே பஞ்ஹங் புச்சி²ஸ்ஸாம, தும்ஹேபி அத்தனோ கங்க²ங் அம்ஹே புச்ச²தா²’’தி ஆஹ. தே²ரா தங் ஜிகு³ச்சி²த்வா உட்டா²ய பக்கமிங்ஸு. தே²ரானங் த⁴ம்மங் ஸோதுங் நிஸின்னபரிஸா ஸமாக³மஸ்ஸ பி⁴ன்னகாலே ஸத்து² ஸந்திகங் க³ந்த்வா ‘‘கிங் அகாலே ஆக³தத்தா²’’தி வுத்தே தங் காரணங் ஆரோசயிங்ஸு. ஸத்தா² ‘‘ந, பி⁴க்க²வே, இதா³னேவ ஸாரிபுத்தமொக்³க³ல்லானா ஏதங் ஜிகு³ச்சி²த்வா அகதெ²த்வா பக்கமந்தி, புப்³பே³பி பக்கமிங்ஸூ’’தி வத்வா அதீதங் ஆஹரி.
Ucceviṭabhimāruyhāti idaṃ satthā jetavane viharanto aññataraṃ mahallakabhikkhuṃ ārabbha kathesi. Ekadivasaṃ kira dvīsu aggasāvakesu aññamaññaṃ pañhapucchanavissajjanakathāya nisinnesu eko mahallako bhikkhu tesaṃ santikaṃ gantvā tatiyo hutvā nisīditvā ‘‘bhante, mayampi tumhe pañhaṃ pucchissāma, tumhepi attano kaṅkhaṃ amhe pucchathā’’ti āha. Therā taṃ jigucchitvā uṭṭhāya pakkamiṃsu. Therānaṃ dhammaṃ sotuṃ nisinnaparisā samāgamassa bhinnakāle satthu santikaṃ gantvā ‘‘kiṃ akāle āgatatthā’’ti vutte taṃ kāraṇaṃ ārocayiṃsu. Satthā ‘‘na, bhikkhave, idāneva sāriputtamoggallānā etaṃ jigucchitvā akathetvā pakkamanti, pubbepi pakkamiṃsū’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ அரஞ்ஞாயதனே ருக்க²தே³வதா அஹோஸி. அத² த்³வே ஹங்ஸபோதகா சித்தகூடபப்³ப³தா நிக்க²மித்வா தஸ்மிங் ருக்கே² நிஸீதி³த்வா கோ³சராய க³ந்த்வா நிவத்தந்தாபி தஸ்மிங்யேவ விஸ்ஸமித்வா சித்தகூடங் க³ச்ச²ந்தி. க³ச்ச²ந்தே க³ச்ச²ந்தே காலே தேஸங் போ³தி⁴ஸத்தேன ஸத்³தி⁴ங் விஸ்ஸாஸோ அஹோஸி. க³ச்ச²ந்தா ச ஆக³ச்ச²ந்தா ச அஞ்ஞமஞ்ஞங் ஸம்மோதி³த்வா த⁴ம்மகத²ங் கதெ²த்வா பக்கமிங்ஸு. அதே²கதி³வஸங் தேஸு ருக்க²க்³கே³ நிஸீதி³த்வா போ³தி⁴ஸத்தேன ஸத்³தி⁴ங் கதெ²ந்தேஸு ஏகோ ஸிங்கா³லோ தஸ்ஸ ருக்க²ஸ்ஸ ஹெட்டா² ட²த்வா தேஹி ஹங்ஸபோதகேஹி ஸத்³தி⁴ங் மந்தெந்தோ பட²மங் கா³த²மாஹ –
Atīte bārāṇasiyaṃ brahmadatte rajjaṃ kārente bodhisatto araññāyatane rukkhadevatā ahosi. Atha dve haṃsapotakā cittakūṭapabbatā nikkhamitvā tasmiṃ rukkhe nisīditvā gocarāya gantvā nivattantāpi tasmiṃyeva vissamitvā cittakūṭaṃ gacchanti. Gacchante gacchante kāle tesaṃ bodhisattena saddhiṃ vissāso ahosi. Gacchantā ca āgacchantā ca aññamaññaṃ sammoditvā dhammakathaṃ kathetvā pakkamiṃsu. Athekadivasaṃ tesu rukkhagge nisīditvā bodhisattena saddhiṃ kathentesu eko siṅgālo tassa rukkhassa heṭṭhā ṭhatvā tehi haṃsapotakehi saddhiṃ mantento paṭhamaṃ gāthamāha –
73.
73.
‘‘உச்சே விடபி⁴மாருய்ஹ, மந்தயவ்ஹோ ரஹோக³தா;
‘‘Ucce viṭabhimāruyha, mantayavho rahogatā;
நீசே ஓருய்ஹ மந்தவ்ஹோ, மிக³ராஜாபி ஸொஸ்ஸதீ’’தி.
Nīce oruyha mantavho, migarājāpi sossatī’’ti.
தத்த² உச்சே விடபி⁴மாருய்ஹாதி பகதியா ச உச்சே இமஸ்மிங் ருக்கே² உச்சதரங் ஏகங் விடபங் அபி⁴ருஹித்வா. மந்தயவ்ஹோதி மந்தேத² கதே²த². நீசே ஓருய்ஹாதி ஓதரித்வா நீசே டா²னே ட²த்வா மந்தேத². மிக³ராஜாபி ஸொஸ்ஸதீதி அத்தானங் மிக³ராஜானங் கத்வா ஆஹ. ஹங்ஸபோதகா ஜிகு³ச்சி²த்வா உட்டா²ய சித்தகூடமேவ க³தா.
Tattha ucce viṭabhimāruyhāti pakatiyā ca ucce imasmiṃ rukkhe uccataraṃ ekaṃ viṭapaṃ abhiruhitvā. Mantayavhoti mantetha kathetha. Nīce oruyhāti otaritvā nīce ṭhāne ṭhatvā mantetha. Migarājāpi sossatīti attānaṃ migarājānaṃ katvā āha. Haṃsapotakā jigucchitvā uṭṭhāya cittakūṭameva gatā.
தேஸங் க³தகாலே போ³தி⁴ஸத்தோ ஸிங்கா³லஸ்ஸ து³தியங் கா³த²மாஹ –
Tesaṃ gatakāle bodhisatto siṅgālassa dutiyaṃ gāthamāha –
74.
74.
‘‘யங் ஸுவண்ணோ ஸுவண்ணேன, தே³வோ தே³வேன மந்தயே;
‘‘Yaṃ suvaṇṇo suvaṇṇena, devo devena mantaye;
கிங் தெத்த² சதுமட்ட²ஸ்ஸ, பி³லங் பவிஸ ஜம்பு³கா’’தி.
Kiṃ tettha catumaṭṭhassa, bilaṃ pavisa jambukā’’ti.
தத்த² ஸுவண்ணோதி ஸுந்த³ரவண்ணோ. ஸுவண்ணேனாதி து³தியேன ஹங்ஸபோதகேன. தே³வோ தே³வேனாதி தேயேவ த்³வே தே³வே கத்வா கதே²தி. சதுமட்ட²ஸ்ஸாதி ஸரீரேன ஜாதியா ஸரேன கு³ணேனாதி இமேஹி சதூஹி மட்ட²ஸ்ஸ ஸுத்³த⁴ஸ்ஸாதி அக்க²ரத்தோ². அஸுத்³த⁴ங்யேவ பன தங் பஸங்ஸாவசனேன நிந்த³ந்தோ ஏவமாஹ, சதூஹி லாமகஸ்ஸ கிங் தே எத்த² ஸிங்கா³லஸ்ஸாதி அயமெத்த² அதி⁴ப்பாயோ. ‘‘பி³லங் பவிஸா’’தி இத³ங் போ³தி⁴ஸத்தோ பே⁴ரவாரம்மணங் த³ஸ்ஸெத்வா தங் பலாபெந்தோ ஆஹ.
Tattha suvaṇṇoti sundaravaṇṇo. Suvaṇṇenāti dutiyena haṃsapotakena. Devo devenāti teyeva dve deve katvā katheti. Catumaṭṭhassāti sarīrena jātiyā sarena guṇenāti imehi catūhi maṭṭhassa suddhassāti akkharattho. Asuddhaṃyeva pana taṃ pasaṃsāvacanena nindanto evamāha, catūhi lāmakassa kiṃ te ettha siṅgālassāti ayamettha adhippāyo. ‘‘Bilaṃ pavisā’’ti idaṃ bodhisatto bheravārammaṇaṃ dassetvā taṃ palāpento āha.
ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ ஸிங்கா³லோ மஹல்லகோ அஹோஸி, த்³வே ஹங்ஸபோதகா ஸாரிபுத்தமொக்³க³ல்லானா, ருக்க²தே³வதா பன அஹமேவ அஹோஸி’’ந்தி.
Satthā imaṃ dhammadesanaṃ āharitvā jātakaṃ samodhānesi – ‘‘tadā siṅgālo mahallako ahosi, dve haṃsapotakā sāriputtamoggallānā, rukkhadevatā pana ahameva ahosi’’nti.
சதுமட்ட²ஜாதகவண்ணனா ஸத்தமா.
Catumaṭṭhajātakavaṇṇanā sattamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 187. சதுமட்ட²ஜாதகங் • 187. Catumaṭṭhajātakaṃ
