Library / Tipiṭaka / ཏིཔིཊཀ • Tipiṭaka / ཝིནཡཱལངྐཱར-ཊཱིཀཱ • Vinayālaṅkāra-ṭīkā

    ༢༨. ཙཏུཔཙྩཡབྷཱཛནཱིཡཝིནིཙྪཡཀཐཱ

    28. Catupaccayabhājanīyavinicchayakathā

    ཙཱིཝརབྷཱཛནཀཐཱཝཎྞནཱ

    Cīvarabhājanakathāvaṇṇanā

    ༡༩༤. ཨེཝཾ ཨུཔཛ྄ཛྷཱཡཱདིཝཏྟསངྑཱཏཱནི ཙུདྡས ཁནྡྷཀཝཏྟཱནི ཀཐེཏྭཱ ཨིདཱནི ཙཏུནྣཾ པཙྩཡཱནཾ བྷཱཛནཾ ཀཐེནྟོ ‘‘ཙཏུཔཙྩཡབྷཱཛན’’ནྟིཨཱདིམཱཧ། ཏཏྠ ཙཏཱུཏི སངྑྱཱསབྦནཱམཔདཾ། པཊིཙྩ ཨེཏི སཱིཏཔཊིགྷཱཏཱདིཀཾ ཕལཾ ཨེཏསྨཱཏི པཙྩཡོ, ཙཱིཝརཱདི, པཙྩཡོ ཙ པཙྩཡོ ཙ པཙྩཡཱ, ཙཏྟཱརོ པཙྩཡཱ ཙཏུཔཙྩཡཾ, བྷཱཛཱིཡཏེ ཝིབྷཱཛཱིཡཏེ བྷཱཛནཾ། ཙཏུཔཙྩཡསྶ བྷཱཛནཾ ཙཏུཔཙྩཡབྷཱཛནཾ། ཏེནཱཧ ‘‘ཙཱིཝརཱདཱིནཾ ཙཏུནྣཾ པཙྩཡཱནཾ བྷཱཛན’’ནྟི། ཏཏྠ ཏསྨིཾ ཙཏུཔཙྩཡབྷཱཛནེ སམབྷིནིཝིཊྛེ ཙཱིཝརབྷཱཛནེ ཏཱཝ པཋམཾ ཙཱིཝརཔཊིགྒཱཧཀོ…པེ॰… ཝེདིཏབྦོ། ཀསྨཱ? སངྒྷིཀཙཱིཝརསྶ དུཀྐརབྷཱཛནཏྟཱཏི སམྦནྡྷོ། ཏཏྠ ཨཱགཏཱགཏཾ ཙཱིཝརཾ པཊིགྒཎྷཱཏི, པཊིགྒཧཎམཏྟམེཝསྶ བྷཱརོཏི ཙཱིཝརཔཊིགྒཱཧཀོ། ཙཱིཝརཔཊིགྒཱཧཀེན པཊིགྒཧིཏཾ ཙཱིཝརཾ ནིདཧཏི, ནིདཧནམཏྟམེཝསྶ བྷཱརོཏི ཙཱིཝརནིདཧཀོ། བྷཎྜཱགཱརེ ནིཡུཏྟོ བྷཎྜཱགཱརིཀོ། ཙཱིཝརཱདིཀསྶ བྷཎྜསྶ ཋཔནཊྛཱནབྷཱུཏཾ ཨགཱརཾ བྷཎྜཱགཱརཾ། ཙཱིཝརཾ བྷཱཛེཏི བྷཱགཾ ཀརོཏཱིཏི ཙཱིཝརབྷཱཛཀོ། ཙཱིཝརསྶ བྷཱཛནཾ ཝིབྷཱགཀརཎཾ ཙཱིཝརབྷཱཛནཾ, ཝིབྷཛནཀིརིཡཱ།

    194. Evaṃ upajjhāyādivattasaṅkhātāni cuddasa khandhakavattāni kathetvā idāni catunnaṃ paccayānaṃ bhājanaṃ kathento ‘‘catupaccayabhājana’’ntiādimāha. Tattha catūti saṅkhyāsabbanāmapadaṃ. Paṭicca eti sītapaṭighātādikaṃ phalaṃ etasmāti paccayo, cīvarādi, paccayo ca paccayo ca paccayā, cattāro paccayā catupaccayaṃ, bhājīyate vibhājīyate bhājanaṃ. Catupaccayassa bhājanaṃ catupaccayabhājanaṃ. Tenāha ‘‘cīvarādīnaṃ catunnaṃ paccayānaṃ bhājana’’nti. Tattha tasmiṃ catupaccayabhājane samabhiniviṭṭhe cīvarabhājane tāva paṭhamaṃ cīvarapaṭiggāhako…pe… veditabbo. Kasmā? Saṅghikacīvarassa dukkarabhājanattāti sambandho. Tattha āgatāgataṃ cīvaraṃ paṭiggaṇhāti, paṭiggahaṇamattamevassa bhāroti cīvarapaṭiggāhako. Cīvarapaṭiggāhakena paṭiggahitaṃ cīvaraṃ nidahati, nidahanamattamevassa bhāroti cīvaranidahako. Bhaṇḍāgāre niyutto bhaṇḍāgāriko. Cīvarādikassa bhaṇḍassa ṭhapanaṭṭhānabhūtaṃ agāraṃ bhaṇḍāgāraṃ. Cīvaraṃ bhājeti bhāgaṃ karotīti cīvarabhājako. Cīvarassa bhājanaṃ vibhāgakaraṇaṃ cīvarabhājanaṃ, vibhajanakiriyā.

    ཏཏྠ ‘‘ཙཱིཝརཔཊིགྒཱཧཀོ ཝེདིཏབྦོ’’ཏི ཝུཏྟོ, སོ ཀུཏོ ལབྦྷཏེཏི ཨཱཧ ‘‘པཉྩཧངྒེཧི…པེ॰… སམྨནྣིཏབྦོ’’ཏི། ཀཐཾ ཝིཉྙཱཡཏཱིཏི ཨཱཧ ‘‘ཨནུཛཱནཱམི…པེ॰… ཝཙནཏོ’’ཏི། ཚནྡནཾ ཚནྡོ, ཨིཙྪནཾ པིཧནནྟི ཨཏྠོ། གམནཾ ཀརཎཾ གཏི, ཀིརིཡཱ། གཱརེཡ྄ཧཱ གཏི ཨགཏི, ཚནྡེན ཨགཏི ཚནྡཱགཏི། སེསེསུཔི ཨེསེཝ ནཡོ། ཀཐཾ ཚནྡཱགཏིཾ གཙྪཏཱིཏི ཨཱཧ ‘‘ཏཏྠ པཙྪཱ ཨཱགཏཱནམྤཱི’’ཏིཨཱདི། ཨེཝམིཏརེསུཔི། པཉྩམངྒཾ པན སཏིསམྤཛཉྙཡུཏྟཱབྷཱཝཾ དསྶེཏི། སུཀྐཔཀྑེཔི ཨིཏོ པཊིཔཀྑཝསེན ཝེདིཏབྦོ། ཏེནཱཧ ‘‘ཏསྨཱ’’ཏིཨཱདི།

    Tattha ‘‘cīvarapaṭiggāhako veditabbo’’ti vutto, so kuto labbhateti āha ‘‘pañcahaṅgehi…pe… sammannitabbo’’ti. Kathaṃ viññāyatīti āha ‘‘anujānāmi…pe… vacanato’’ti. Chandanaṃ chando, icchanaṃ pihananti attho. Gamanaṃ karaṇaṃ gati, kiriyā. Gāreyhā gati agati, chandena agati chandāgati. Sesesupi eseva nayo. Kathaṃ chandāgatiṃ gacchatīti āha ‘‘tattha pacchā āgatānampī’’tiādi. Evamitaresupi. Pañcamaṅgaṃ pana satisampajaññayuttābhāvaṃ dasseti. Sukkapakkhepi ito paṭipakkhavasena veditabbo. Tenāha ‘‘tasmā’’tiādi.

    ཨིམཱཡ ཀམྨཝཱཙཱཡ ཝཱ ཨཔལོཀནེན ཝཱཏི ཨིདཾ ཨིམསྶ སམྨུཏིཀམྨསྶ ལཧུཀཀམྨཏྟཱ ཝུཏྟཾ། ཏཐཱ ཧི ཝུཏྟཾ པརིཝཱརཊྛཀཐཱཡཾ (པརི॰ ཨཊྛ॰ ༤༨༢) ‘‘ཨཝསེསཱ ཏེརས སམྨུཏིཡོ སེནཱསནགྒཱཧམཏཀཙཱིཝརདཱནཱདིསམྨུཏིཡོ ཙཱཏི ཨེཏཱནི ལཧུཀཀམྨཱནི ཨཔལོཀེཏྭཱཔི ཀཱཏུཾ ཝཊྚནྟཱི’’ཏི། ཨནྟོཝིཧཱརེ སབྦསངྒྷམཛ྄ཛྷེཔི ཁཎྜསཱིམཱཡམྤི སམྨནྣིཏུཾ ཝཊྚཏཱིཏི ཨེཏྠ ཨནྟོཝིཧཱརེཏི བདྡྷསཱིམཝིཧཱརཾ སནྡྷཱཡ ཝུཏྟཾ། ན ཧི ཨབདྡྷསཱིམཝིཧཱརེ ཨཔལོཀནཱདིཙཏུབྦིདྷཀམྨཾ ཀཱཏུཾ ཝཊྚཏི དུབྦིསོདྷནཏྟཱ། དྷུརཝིཧཱརཊྛཱནེཏི ཝིཧཱརདྭཱརསྶ སམྨུཁཊྛཱནེ།

    Imāya kammavācāya vā apalokanena vāti idaṃ imassa sammutikammassa lahukakammattā vuttaṃ. Tathā hi vuttaṃ parivāraṭṭhakathāyaṃ (pari. aṭṭha. 482) ‘‘avasesā terasa sammutiyo senāsanaggāhamatakacīvaradānādisammutiyo cāti etāni lahukakammāni apaloketvāpi kātuṃ vaṭṭantī’’ti. Antovihāre sabbasaṅghamajjhepi khaṇḍasīmāyampi sammannituṃ vaṭṭatīti ettha antovihāreti baddhasīmavihāraṃ sandhāya vuttaṃ. Na hi abaddhasīmavihāre apalokanādicatubbidhakammaṃ kātuṃ vaṭṭati dubbisodhanattā. Dhuravihāraṭṭhāneti vihāradvārassa sammukhaṭṭhāne.

    ༡༩༧. བྷཎྜཱགཱརསམྨུཏིཡཾ ཝིཧཱརམཛ྄ཛྷེཡེཝཱཏི ཨཝིཔྤཝཱསསཱིམཱསངྑཱཏམཧཱསཱིམཱ ཝིཧཱརསྶ མཛ྄ཛྷེཡེཝ སམྨནྣིཏབྦཱ། ཨིམསྨིཾ པན ཋཱནེ ཨིམཾ པན བྷཎྜཱགཱརཾ ཁཎྜསཱིམཾ གནྟྭཱ ཁཎྜསཱིམཱཡཾ ནིསིནྣེཧི སམྨནྣིཏུཾ ན ཝཊྚཏི, ཝིཧཱརམཛ྄ཛྷེཡེཝ ‘‘སུཎཱཏུ མེ, བྷནྟེ, སངྒྷོ, ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམཾ ཝིཧཱརཾ བྷཎྜཱགཱརཾ སམྨནྣེཡྻཱ’’ཏིཨཱདིནཱ ནཡེན ‘‘ཀམྨཝཱཙཱཡ ཝཱ ཨཔལོཀནེན ཝཱ སམྨནྣིཏབྦ’’ནྟི ཝཙནཾ ནིསྶཱཡ ཉཏྟིདུཏིཡཀམྨཾ ཨུཔཙཱརསཱིམཱཡཾ ཀཱཏུཾ ཝཊྚཏཱིཏི གཧེཏྭཱ ཀཐིནདཱནཀམྨམྤི ཨབདྡྷསཱིམཱབྷཱུཏེ ཝིཧཱརེ ཨུཔཙཱརསཱིམཱཡཾ ཀརོནྟི, ཨེཀཙྩེ ཉཏྟིཀམྨམྤི ཏཐེཝ གཧེཏྭཱ ཨབདྡྷསཱིམཝིཧཱརེ ཨུཔཙཱརསཱིམཱམཏྟེཡེཝ ཨུཔོསཐཔཝཱརཎཾ ཀརོནྟི, ཏདཡུཏྟཾ, ཀཱརཎཾ པནེཏྠ ཀཐིནཝིནིཙྪཡཀཐཱཡཾ (ཝི॰ སངྒ॰ ཨཊྛ॰ ༢༢༦) ཨཱཝི བྷཝིསྶཏི།

    197. Bhaṇḍāgārasammutiyaṃ vihāramajjheyevāti avippavāsasīmāsaṅkhātamahāsīmā vihārassa majjheyeva sammannitabbā. Imasmiṃ pana ṭhāne imaṃ pana bhaṇḍāgāraṃ khaṇḍasīmaṃ gantvā khaṇḍasīmāyaṃ nisinnehi sammannituṃ na vaṭṭati, vihāramajjheyeva ‘‘suṇātu me, bhante, saṅgho, yadi saṅghassa pattakallaṃ, saṅgho itthannāmaṃ vihāraṃ bhaṇḍāgāraṃ sammanneyyā’’tiādinā nayena ‘‘kammavācāya vā apalokanena vā sammannitabba’’nti vacanaṃ nissāya ñattidutiyakammaṃ upacārasīmāyaṃ kātuṃ vaṭṭatīti gahetvā kathinadānakammampi abaddhasīmābhūte vihāre upacārasīmāyaṃ karonti, ekacce ñattikammampi tatheva gahetvā abaddhasīmavihāre upacārasīmāmatteyeva uposathapavāraṇaṃ karonti, tadayuttaṃ, kāraṇaṃ panettha kathinavinicchayakathāyaṃ (vi. saṅga. aṭṭha. 226) āvi bhavissati.

    ༡༩༨. ཏུལཱབྷཱུཏོཏི ཏུལཱསདིསོ། ཨིདནྟི སཱམཎེརཱནཾ ཨུཔཌྜྷཔཊིཝཱིསདཱནཾ། ཨིམཾ ཀིར པཱཋཾ ཨམནསིཀརོནྟཱ ཨིདཱནི ཀཱལཙཱིཝརམྤི སཱམཎེརཱནཾ ཨུཔཌྜྷཔཊིཝཱིསཾ དེནྟི། ཕཱཏིཀམྨནྟི པཧོནཀཀམྨཾ, ཡཏྟཀེན ཝིནཡཱགཏེན སམྨུཉྫནཱིབནྡྷནཱདིཧཏྠཀམྨེན ཝིཧཱརསྶ ཨཱུནཏཱ ན ཧོཏི, ཏཏྟཀཾ ཀཏྭཱཏི ཨཏྠོ། སབྦེསནྟི ཏཏྲུཔྤཱདཝསྶཱཝཱསིཀཾ གཎྷནྟཱནཾ སབྦེསཾ བྷིཀྑཱུནཾ སཱམཎེརཱནཉྩ། བྷཎྜཱགཱརཙཱིཝརེཔཱིཏི ཨཀཱལཙཱིཝརཾ སནྡྷཱཡ ཝུཏྟཾ། ཨུཀྐུཊྛིཾ ཀརོནྟཱིཏི མཧཱསདྡཾ ཀརོནྟི། ཨེཏནྟི ཨུཀྐུཊྛིཡཱ ཀཏཱཡ སམབྷཱགདཱནཾ། ཝིརཛ྄ཛྷིཏྭཱ ཀརོནྟཱིཏི ཀཏྟབྦཀཱལེསུ ཨཀཏྭཱ ཡཐཱརུཙིཏཀྑཎེ ཀརོནྟི། སམཔཊིཝཱིསོ དཱཏབྦོཏི ཀརིསྶཱམཱཏི ཡཱཙནྟཱནཾ པཊིཉྙཱམཏྟེནཔི སམཀོ ཀོཊྛཱསོ དཱཏབྦོ།

    198.Tulābhūtoti tulāsadiso. Idanti sāmaṇerānaṃ upaḍḍhapaṭivīsadānaṃ. Imaṃ kira pāṭhaṃ amanasikarontā idāni kālacīvarampi sāmaṇerānaṃ upaḍḍhapaṭivīsaṃ denti. Phātikammanti pahonakakammaṃ, yattakena vinayāgatena sammuñjanībandhanādihatthakammena vihārassa ūnatā na hoti, tattakaṃ katvāti attho. Sabbesanti tatruppādavassāvāsikaṃ gaṇhantānaṃ sabbesaṃ bhikkhūnaṃ sāmaṇerānañca. Bhaṇḍāgāracīvarepīti akālacīvaraṃ sandhāya vuttaṃ. Ukkuṭṭhiṃ karontīti mahāsaddaṃ karonti. Etanti ukkuṭṭhiyā katāya samabhāgadānaṃ. Virajjhitvā karontīti kattabbakālesu akatvā yathārucitakkhaṇe karonti. Samapaṭivīso dātabboti karissāmāti yācantānaṃ paṭiññāmattenapi samako koṭṭhāso dātabbo.

    ཨཏིརེཀབྷཱགེནཱཏི དས བྷིཀྑཱུ ཧོནྟི, སཱཊཀཱཔི དསེཝ, ཏེསུ ཨེཀོ དྭཱདས ཨགྒྷཏི, སེསཱ དསགྒྷནཀཱ། སབྦེསུ དསགྒྷནཀཝསེན ཀུསེ པཱཏིཏེ ཡསྶ བྷིཀྑུནོ དྭཱདསགྒྷནཀོ ཀུསོ པཱཏིཏོ, སོ ‘‘ཨེཏྟཀེན མམ ཙཱིཝརཾ པཧོཏཱི’’ཏི ཏེན ཨཏིརེཀབྷཱགེན གནྟུཀཱམོ ཧོཏི། ཨེཏྠ ཙ ཨེཏྟཀེན མམ ཙཱིཝརཾ པཧོཏཱིཏི དྭཱདསགྒྷནཀེན མམ ཙཱིཝརཾ པརིཔུཎྞཾ ཧོཏི, ན ཏཏོ ཨཱུནེནཱཏི སབྦཾ གཧེཏུཀཱམོཏི ཨཏྠོ། བྷིཀྑཱུ ‘‘ཨཏིརེཀཾ ཨཱཝུསོ སངྒྷསྶ སནྟཀ’’ནྟི ཝདནྟི, ཏཾ སུཏྭཱ བྷགཝཱ ‘‘སངྒྷིཀེ ཙ གཎསནྟཀེ ཙ ཨཔྤཀཾ ནཱམ ནཏྠི, སབྦཏྠ སཾཡམོ ཀཱཏབྦོ, གཎྷནྟེནཔི ཀུཀྐུཙྩཱཡིཏབྦ’’ནྟི དསྶེཏུཾ ‘‘ཨནུཛཱནཱམི, བྷིཀྑཝེ, ཨནུཀྑེཔེ དིནྣེ’’ཏི ཨཱཧ། ཏཏྠ ཨནུཀྑེཔོ ནཱམ ཡཾ ཀིཉྩི ཨནུཀྑིཔིཏབྦཾ ཨནུཔྤདཱཏབྦཾ ཀཔྤིཡབྷཎྜཾ, ཡཏྟཀཾ ཏསྶ པཊིཝཱིསེ ཨདྷིཀཾ, ཏཏྟཀེ ཨགྒྷནཀེ ཡསྨིཾ ཀིསྨིཉྩི ཀཔྤིཡབྷཎྜེ དིནྣེཏི ཨཏྠོཏི ཨིམམཏྠཾ སངྑེཔེན དསྶེཏུཾ ‘‘སཙེ དས བྷིཀྑཱུ ཧོནྟི’’ཏྱཱདི ཝུཏྟཾ།

    Atirekabhāgenāti dasa bhikkhū honti, sāṭakāpi daseva, tesu eko dvādasa agghati, sesā dasagghanakā. Sabbesu dasagghanakavasena kuse pātite yassa bhikkhuno dvādasagghanako kuso pātito, so ‘‘ettakena mama cīvaraṃ pahotī’’ti tena atirekabhāgena gantukāmo hoti. Ettha ca ettakena mama cīvaraṃ pahotīti dvādasagghanakena mama cīvaraṃ paripuṇṇaṃ hoti, na tato ūnenāti sabbaṃ gahetukāmoti attho. Bhikkhū ‘‘atirekaṃ āvuso saṅghassa santaka’’nti vadanti, taṃ sutvā bhagavā ‘‘saṅghike ca gaṇasantake ca appakaṃ nāma natthi, sabbattha saṃyamo kātabbo, gaṇhantenapi kukkuccāyitabba’’nti dassetuṃ ‘‘anujānāmi, bhikkhave, anukkhepe dinne’’ti āha. Tattha anukkhepo nāma yaṃ kiñci anukkhipitabbaṃ anuppadātabbaṃ kappiyabhaṇḍaṃ, yattakaṃ tassa paṭivīse adhikaṃ, tattake agghanake yasmiṃ kismiñci kappiyabhaṇḍe dinneti atthoti imamatthaṃ saṅkhepena dassetuṃ ‘‘sace dasa bhikkhū honti’’tyādi vuttaṃ.

    ཝིཀལཀེ ཏོསེཏྭཱཏི ཨེཏྠ ཙཱིཝརཝིཀལཀཾ པུགྒལཝིཀལཀནྟི དྭེ ཝིཀལཀཱ། ཏཏྠ ཙཱིཝརཝིཀལཀཾ ནཱམ སབྦེསཾ པཉྩ པཉྩ ཝཏྠཱནི པཏྟཱནི, སེསཱནིཔི ཨཏྠི, ཨེཀེཀཾ པན ན པཱཔུཎཱཏི, ཚིནྡིཏྭཱ དཱཏབྦཱནི། ཚིནྡནྟེཧི ཙ ཨཌྜྷམཎྜལཱདཱིནཾ ཝཱ ཨུཔཱཧནཐཝིཀཱདཱིནཾ ཝཱ པཧོནཀཱནི ཁཎྜཱནི ཀཏྭཱ དཱཏབྦཱནི, ཧེཊྛིམཔརིཙྪེདེན ཙཏུརངྒུལཝིཏྠཱརམྤི ཨནུཝཱཏཔྤཧོནཀཱཡཱམཾ ཁཎྜཾ ཀཏྭཱ དཱཏུཾ ཝཊྚཏི། ཨཔརིབྷོགཾ པན ན ཀཱཏབྦནྟི ཨེཝམེཏྠ ཙཱིཝརསྶ ཨཔྤཧོནཀབྷཱཝོ ཙཱིཝརཝིཀལཀཾ། ཚིནྡིཏྭཱ དིནྣེ པནེཏཾ ཏོསིཏཾ ཧོཏི། ཨཐ ཀུསཔཱཏོ ཀཱཏབྦོ, སཙེཔི ཨེཀསྶ བྷིཀྑུནོ ཀོཊྛཱསེ ཨེཀཾ ཝཱ དྭེ ཝཱ ཝཏྠཱནི ནཔྤཧོནྟི, ཏཏྠ ཨཉྙཾ སཱམཎཀཾ པརིཀྑཱརཾ ཋཔེཏྭཱ ཡོ ཏེན ཏུསྶཏི, ཏསྶ ཏཾ བྷཱགཾ དཏྭཱ པཙྪཱ ཀུསཔཱཏོ ཀཱཏབྦོ། ཨིདམྤི ཙཱིཝརཝིཀལཀནྟི ཨནྡྷཊྛཀཐཱཡཾ ཝུཏྟཾ།

    Vikalake tosetvāti ettha cīvaravikalakaṃ puggalavikalakanti dve vikalakā. Tattha cīvaravikalakaṃ nāma sabbesaṃ pañca pañca vatthāni pattāni, sesānipi atthi, ekekaṃ pana na pāpuṇāti, chinditvā dātabbāni. Chindantehi ca aḍḍhamaṇḍalādīnaṃ vā upāhanathavikādīnaṃ vā pahonakāni khaṇḍāni katvā dātabbāni, heṭṭhimaparicchedena caturaṅgulavitthārampi anuvātappahonakāyāmaṃ khaṇḍaṃ katvā dātuṃ vaṭṭati. Aparibhogaṃ pana na kātabbanti evamettha cīvarassa appahonakabhāvo cīvaravikalakaṃ. Chinditvā dinne panetaṃ tositaṃ hoti. Atha kusapāto kātabbo, sacepi ekassa bhikkhuno koṭṭhāse ekaṃ vā dve vā vatthāni nappahonti, tattha aññaṃ sāmaṇakaṃ parikkhāraṃ ṭhapetvā yo tena tussati, tassa taṃ bhāgaṃ datvā pacchā kusapāto kātabbo. Idampi cīvaravikalakanti andhaṭṭhakathāyaṃ vuttaṃ.

    པུགྒལཝིཀལཀཾ ནཱམ དས དས བྷིཀྑཱུ གཎེཏྭཱ ཝགྒཾ ཀརོནྟཱནཾ ཨེཀོ ཝགྒོ ན པཱུརཏི, ཨཊྛ ཝཱ ནཝ ཝཱ ཧོནྟི, ཏེསཾ ཨཊྛ ཝཱ ནཝ ཝཱ ཀོཊྛཱསཱ ‘‘ཏུམྷེ ཨིམེ གཧེཏྭཱ ཝིསུཾ བྷཱཛེཐཱ’’ཏི དཱཏབྦཱ། ཨེཝམཡཾ པུགྒལཱནཾ ཨཔྤཧོནཀབྷཱཝོ པུགྒལཝིཀལཀཾ ནཱམ། ཝིསུཾ དིནྣེ པན ཏཾ ཏོསིཏཾ ཧོཏི, ཨེཝཾ ཏོསེཏྭཱ ཀུསཔཱཏོ ཀཱཏབྦོཏི། ཨཐ ཝཱ ཝིཀལཀེ ཏོསེཏྭཱཏི ཡོ ཙཱིཝརཝིབྷཱགོ ཨཱུནཀོ, ཏཾ ཨཉྙེན པརིཀྑཱརེན སམཾ ཀཏྭཱ ཀུསཔཱཏོ ཀཱཏབྦོཏི ཨིམམཏྠཾ དསྶེཏི ‘‘སཙེ སབྦེསཾ པཉྩ པཉྩ ཝཏྠཱནཱི’’ཏིཨཱདིནཱ།

    Puggalavikalakaṃ nāma dasa dasa bhikkhū gaṇetvā vaggaṃ karontānaṃ eko vaggo na pūrati, aṭṭha vā nava vā honti, tesaṃ aṭṭha vā nava vā koṭṭhāsā ‘‘tumhe ime gahetvā visuṃ bhājethā’’ti dātabbā. Evamayaṃ puggalānaṃ appahonakabhāvo puggalavikalakaṃ nāma. Visuṃ dinne pana taṃ tositaṃ hoti, evaṃ tosetvā kusapāto kātabboti. Atha vā vikalake tosetvāti yo cīvaravibhāgo ūnako, taṃ aññena parikkhārena samaṃ katvā kusapāto kātabboti imamatthaṃ dasseti ‘‘sace sabbesaṃ pañca pañca vatthānī’’tiādinā.

    ༡༩༩. ཨིཏོ པརཾ ཏེསུ ཏེསུ ཝཏྠཱུསུ ཨཱགཏཝསེན ཨཊྛཀཐཱཡཾ ཝུཏྟེསུ ཝིནིཙྪཡེསུ སནྟེསུཔི ཏེསཾ ཝིནིཙྪཡཱནཾ ཨཊྛམཱཏིཀཱཝིནིཙྪཡཏོ ཨཝིམུཏྟཏྟཱ ཨཊྛམཱཏིཀཱཝིནིཙྪཡེསྭེཝ པཀྑིཔིཏྭཱ དསྶེཏུཾ ‘‘ཨིདཱནི ཨཊྛིམཱ, བྷིཀྑཝེ’’ཏིཨཱདིམཱཧ། ཡཱ ཏཱ ཨཊྛ མཱཏིཀཱ བྷགཝཏཱ ཝུཏྟཱ, ཏཱསཾ ཨཊྛནྣཾ མཱཏིཀཱནཾ ཝསེན ཝིནིཙྪཡོ ཨིདཱནི ཝེདིཏབྦོཏི ཡོཛནཱ། པརིཀྑེཔཱརཧཊྛཱནེན པརིཙྪིནྣཱཏི ཨིམིནཱ ཨཔརིཀྑིཏྟསྶ ཝིཧཱརསྶ དྷུཝསནྣིཔཱཏཊྛཱནཱདིཏོ པཋམལེཌྜུཔཱཏསྶ ཨནྟོ ཨུཔཙཱརསཱིམཱཏི དསྶེཏི། ཨིདཱནི དུཏིཡལེཌྜུཔཱཏསྶ ཨནྟོཔི ཨུཔཙཱརསཱིམཱཡེཝཱཏི དསྶེཏུཾ ‘‘ཨཔིཙཱ’’ཏིཨཱདི ཨཱརདྡྷཾ། དྷུཝསནྣིཔཱཏཊྛཱནམྤི པརིཡནྟགཏམེཝ གཧེཏབྦཾ། ‘‘ཨེཝཾ སནྟེ ཏིཡོཛནེ ཋིཏཱ ལཱབྷཾ གཎྷིསྶནྟཱི’’ཏིཨཱདིནཱ ཨིམེ ལཱབྷགྒཧཎཱདཡོ ཨུཔཙཱརསཱིམཱཝསེནེཝ ཧོཏི, ན ཨཝིཔྤཝཱསསཱིམཱཝསེནཱཏི དསྶེཏི, ཏེན ཙ ཨིམཱནི ལཱབྷགྒཧཎཱདཱིནིཡེཝ ཨུཔཙཱརསཱིམཱཡཾ ཀཏྟབྦཱནི, ན ཨཔལོཀནཀམྨཱདཱིནི ཙཏྟཱརི ཀམྨཱནི, ཏཱནི པན ཨཝིཔྤཝཱསསཱིམཱདཱིསུཡེཝ ཀཏྟབྦཱནཱིཏི པཀཱསེཏི། ཏཐཱ ཧི ཝུཏྟཾ སཱརཏྠདཱིཔནིཡཾ (སཱརཏྠ॰ ཊཱི॰ མཧཱཝགྒ ༣.༣༧༩) ‘‘བྷིཀྑུནཱིནཾ ཨཱརཱམཔྤཝེསནསེནཱསནཔུཙྪནཱདི པརིཝཱསམཱནཏྟཱརོཙནཝསྶཙྪེདནིསྶཡསེནཱསནགྒཱཧཱདི ཝིདྷཱནནྟི ཨིདཾ སབྦཾ ཨིམིསྶཱཡེཝ ཨུཔཙཱརསཱིམཱཡ ཝསེན ཝེདིཏབྦ’’ནྟི།

    199. Ito paraṃ tesu tesu vatthūsu āgatavasena aṭṭhakathāyaṃ vuttesu vinicchayesu santesupi tesaṃ vinicchayānaṃ aṭṭhamātikāvinicchayato avimuttattā aṭṭhamātikāvinicchayesveva pakkhipitvā dassetuṃ ‘‘idāni aṭṭhimā, bhikkhave’’tiādimāha. Yā tā aṭṭha mātikā bhagavatā vuttā, tāsaṃ aṭṭhannaṃ mātikānaṃ vasena vinicchayo idāni veditabboti yojanā. Parikkhepārahaṭṭhānena paricchinnāti iminā aparikkhittassa vihārassa dhuvasannipātaṭṭhānādito paṭhamaleḍḍupātassa anto upacārasīmāti dasseti. Idāni dutiyaleḍḍupātassa antopi upacārasīmāyevāti dassetuṃ ‘‘apicā’’tiādi āraddhaṃ. Dhuvasannipātaṭṭhānampi pariyantagatameva gahetabbaṃ. ‘‘Evaṃ sante tiyojane ṭhitā lābhaṃ gaṇhissantī’’tiādinā ime lābhaggahaṇādayo upacārasīmāvaseneva hoti, na avippavāsasīmāvasenāti dasseti, tena ca imāni lābhaggahaṇādīniyeva upacārasīmāyaṃ kattabbāni, na apalokanakammādīni cattāri kammāni, tāni pana avippavāsasīmādīsuyeva kattabbānīti pakāseti. Tathā hi vuttaṃ sāratthadīpaniyaṃ (sārattha. ṭī. mahāvagga 3.379) ‘‘bhikkhunīnaṃ ārāmappavesanasenāsanapucchanādi parivāsamānattārocanavassacchedanissayasenāsanaggāhādi vidhānanti idaṃ sabbaṃ imissāyeva upacārasīmāya vasena veditabba’’nti.

    ལཱབྷཏྠཱཡ ཋཔིཏཱ སཱིམཱ ལཱབྷསཱིམཱ། ལོཀེ གཱམསཱིམཱདཡོ ཝིཡ ལཱབྷསཱིམཱ ནཱམ ཝིསུཾ པསིདྡྷཱ ནཏྠི, ཀེནཱཡཾ ཨནུཉྙཱཏཱཏི ཨཱཧ ‘‘ནེཝ སམྨཱསམྦུདྡྷེནཱ’’ཏིཨཱདི། ཨེཏེན ནཱཡཾ སཱསནཝོཧཱརསིདྡྷཱ, ལོཀཝོཧཱརསིདྡྷཱ ཨེཝཱཏི དསྶེཏི། ཛནཔདཔརིཙྪེདོཏི ཨིདཾ ལོཀཔསིདྡྷསཱིམཱསདྡཏྠཝསེན ཝུཏྟཾ, པརིཙྪེདབྦྷནྟརམྤི སབྦཾ ཛནཔདསཱིམཱཏི གཧེཏབྦཾ། ཛནཔདོ ཨེཝ ཛནཔདསཱིམཱ, ཨེཝཾ རཊྛསཱིམཱདཱིསུཔི། ཏེནཱཧ ‘‘ཨཱཎཱཔཝཏྟིཊྛཱན’’ནྟིཨཱདི། པཐཝཱིཝེམཛ྄ཛྷགཏསྶཱཏི ཡཱཝ ཨུདཀཔརིཡནྟཱ ཁཎྜསཱིམཏྟཱ ཝུཏྟཾ། ཨུཔཙཱརསཱིམཱདཱིསུ པན ཨབདྡྷསཱིམཱསུ ཧེཊྛཱཔཐཝིཡཾ སབྦཏྠ ཋིཏཱནཾ ན པཱཔུཎཱཏི, ཀཱུཔཱདིཔཝེསཱརཧཊྛཱནེ ཋིཏཱནཉྙེཝ པཱཔུཎཱཏཱིཏི ཧེཊྛཱ སཱིམཀཐཱཡཾ ཝུཏྟནཡེནེཝ ཏཾཏཾསཱིམཊྛབྷཱཝོ ཝེདིཏབྦོ། ཙཀྐཝཱལ༹སཱིམཱཡ དིནྣཾ པཐཝཱིསནྡྷཱརཀཨུདཀཊྛཱནེཔི ཋིཏཱནཾ པཱཔུཎཱཏི སབྦཏྠ ཙཀྐཝཱལ༹ཝོཧཱརཏྟཱཏི། སམཱནསཾཝཱསཨཝིཔྤཝཱསསཱིམཱསུ དིནྣསྶ ཨིདཾ ནཱནཏྟཾ – ‘‘ཨཝིཔྤཝཱསསཱིམཱཡ དམྨཱི’’ཏི དིནྣཾ གཱམཊྛཱནཾ ན པཱཔུཎཱཏི། ཀསྨཱ? ‘‘ཋཔེཏྭཱ གཱམཉྩ གཱམཱུཔཙཱརཉྩཱ’’ཏི (མཧཱཝ॰ ༡༤༤) ཝུཏྟཏྟཱ། ‘‘སམཱནསཾཝཱསཀསཱིམཱཡདམྨཱི’’ཏི དིནྣཾ པན གཱམེ ཋིཏཱནམྤི པཱཔུཎཱཏཱིཏི།

    Lābhatthāya ṭhapitā sīmā lābhasīmā. Loke gāmasīmādayo viya lābhasīmā nāma visuṃ pasiddhā natthi, kenāyaṃ anuññātāti āha ‘‘neva sammāsambuddhenā’’tiādi. Etena nāyaṃ sāsanavohārasiddhā, lokavohārasiddhā evāti dasseti. Janapadaparicchedoti idaṃ lokapasiddhasīmāsaddatthavasena vuttaṃ, paricchedabbhantarampi sabbaṃ janapadasīmāti gahetabbaṃ. Janapado eva janapadasīmā, evaṃ raṭṭhasīmādīsupi. Tenāha ‘‘āṇāpavattiṭṭhāna’’ntiādi. Pathavīvemajjhagatassāti yāva udakapariyantā khaṇḍasīmattā vuttaṃ. Upacārasīmādīsu pana abaddhasīmāsu heṭṭhāpathaviyaṃ sabbattha ṭhitānaṃ na pāpuṇāti, kūpādipavesārahaṭṭhāne ṭhitānaññeva pāpuṇātīti heṭṭhā sīmakathāyaṃ vuttanayeneva taṃtaṃsīmaṭṭhabhāvo veditabbo. Cakkavāḷasīmāya dinnaṃ pathavīsandhārakaudakaṭṭhānepi ṭhitānaṃ pāpuṇāti sabbattha cakkavāḷavohārattāti. Samānasaṃvāsaavippavāsasīmāsu dinnassa idaṃ nānattaṃ – ‘‘avippavāsasīmāya dammī’’ti dinnaṃ gāmaṭṭhānaṃ na pāpuṇāti. Kasmā? ‘‘Ṭhapetvā gāmañca gāmūpacārañcā’’ti (mahāva. 144) vuttattā. ‘‘Samānasaṃvāsakasīmāyadammī’’ti dinnaṃ pana gāme ṭhitānampi pāpuṇātīti.

    ༢༠༠-༡. བུདྡྷཱདྷིཝུཏྠོཏི བུདྡྷེན བྷགཝཏཱ ཨདྷིཝུཏྠོ། ཨེཀསྨིནྟི ཨེཀསྨིཾ ཝིཧཱརེ། པཱཀཝཏྟནྟི ནིབདྡྷདཱནཾ། ཝཏྟཏཱིཏི པཝཏྟཏི། ཏེཧི ཝཏྟབྦནྟི ཡེསཾ སམྨུཁེ ཨེས དེཏི, ཏེཧི བྷིཀྑཱུཧི ཝཏྟབྦཾ།

    200-1.Buddhādhivutthoti buddhena bhagavatā adhivuttho. Ekasminti ekasmiṃ vihāre. Pākavattanti nibaddhadānaṃ. Vattatīti pavattati. Tehi vattabbanti yesaṃ sammukhe esa deti, tehi bhikkhūhi vattabbaṃ.

    ༢༠༢. དུཏིཡབྷཱགེ པན ཐེརཱསནཾ ཨཱརུལ༹ྷེཏི ཡཱཝ སངྒྷནཝཀཾ ཨེཀཝཱརཾ སབྦེསཾ བྷཱགཾ དཏྭཱ ཙཱིཝརེ ཨཔརིཀྑཱིཎེ པུན སབྦེསཾ དཱཏུཾ དུཏིཡབྷཱགེ ཐེརསྶ དིནྣེཏི ཨཏྠོ། པུབྦེ ཝུཏྟནཡེནཱཏི ‘‘ཏུཡ྄ཧེཝ བྷིཀྑུ ཏཱནི ཙཱིཝརཱནཱི’’ཏི (མཧཱཝ॰ ༣༦༣) བྷགཝཏཱ ཝུཏྟནཡེན། པཾསུཀཱུལིཀཱནམྤི ཝཊྚཏཱིཏི ‘‘ཏུཡ྄ཧཾ དེམཱ’’ཏི ཨཝཏྭཱ, ‘བྷིཀྑཱུནཾ དེམ, ཐེརཱནཾ དེམཱ’’ཏི ཝུཏྟཏྟཱ ‘‘པཾསུཀཱུལིཀཱནམྤི ཝཊྚཏཱི’’ཏི སཱརཏྠདཱིཔནིཡཾ (སཱརཏྠ॰ ཊཱི॰ མཧཱཝགྒ ༣.༣༧༩) ཝུཏྟཾ། ཝིམཏིཝིནོདནིཡཾ (ཝི॰ ཝི॰ ཊཱི॰ མཧཱཝགྒ ༢.༣༧༩) པན པཾསུཀཱུལིཀཱནམྤི ཝཊྚཏཱིཏི ཨེཏྠ ‘‘ཏུཡ྄ཧཾ དེམཱ’’ཏི ཨཝུཏྟཏྟཱཏི ཀཱརཎཾ ཝདནྟི། ཡདི ཨེཝཾ ‘‘སངྒྷསྶ དེམཱ’’ཏི ཝུཏྟེཔི ཝཊྚེཡྻ, ‘‘བྷིཀྑཱུནཾ དེམ, ཐེརཱནཾ དེམ, སངྒྷསྶ དེམཱ’’ཏི ཝཙནཏོ བྷེདོ ན དིསྶཏི, ཝཱིམཾསིཏབྦམེཏྠ ཀཱརཎནྟི། པཱརུཔིཏུཾ ཝཊྚཏཱིཏི པཾསུཀཱུལིཀཱནཾ ཝཊྚཏི། སཱམིཀེཧི ཝིཙཱརིཏམེཝཱཏི ཨུཔཱཧནཏྠཝིཀཱདཱིནམཏྠཱཡ ཝིཙཱརིཏམེཝ།

    202.Dutiyabhāge pana therāsanaṃ āruḷheti yāva saṅghanavakaṃ ekavāraṃ sabbesaṃ bhāgaṃ datvā cīvare aparikkhīṇe puna sabbesaṃ dātuṃ dutiyabhāge therassa dinneti attho. Pubbe vuttanayenāti ‘‘tuyheva bhikkhu tāni cīvarānī’’ti (mahāva. 363) bhagavatā vuttanayena. Paṃsukūlikānampi vaṭṭatīti ‘‘tuyhaṃ demā’’ti avatvā, ‘bhikkhūnaṃ dema, therānaṃ demā’’ti vuttattā ‘‘paṃsukūlikānampi vaṭṭatī’’ti sāratthadīpaniyaṃ (sārattha. ṭī. mahāvagga 3.379) vuttaṃ. Vimativinodaniyaṃ (vi. vi. ṭī. mahāvagga 2.379) pana paṃsukūlikānampi vaṭṭatīti ettha ‘‘tuyhaṃ demā’’ti avuttattāti kāraṇaṃ vadanti. Yadi evaṃ ‘‘saṅghassa demā’’ti vuttepi vaṭṭeyya, ‘‘bhikkhūnaṃ dema, therānaṃ dema, saṅghassa demā’’ti vacanato bhedo na dissati, vīmaṃsitabbamettha kāraṇanti. Pārupituṃ vaṭṭatīti paṃsukūlikānaṃ vaṭṭati. Sāmikehi vicāritamevāti upāhanatthavikādīnamatthāya vicāritameva.

    ༢༠༣. ཨུཔཌྜྷཾ དཱཏབྦནྟི ཡཾ ཨུབྷཏོསངྒྷསྶ དིནྣཾ, ཏཏོ ཨུཔཌྜྷཾ བྷིཀྑཱུནཾ ཨུཔཌྜྷཾ བྷིཀྑུནཱིནཾ དཱཏབྦཾ། སཙེཔི ཨེཀོ བྷིཀྑུ ཧོཏི, ཨེཀཱ ཝཱ བྷིཀྑུནཱི, ཨནྟམསོ ཨནུཔསམྤནྣསྶཔི ཨུཔཌྜྷམེཝ དཱཏབྦཾ། ‘‘བྷིཀྑུསངྒྷསྶ ཙ བྷིཀྑུནཱིནཉྩ དམྨཱི’’ཏི ཝུཏྟེ པན ན མཛ྄ཛྷེ བྷིནྡིཏྭཱ དཱཏབྦནྟི ཨེཏྠ ཡསྨཱ བྷིཀྑུནིཔཀྑེ སངྒྷསྶ པཙྩེཀཾ ཨཔརཱམཊྛཏྟཱ བྷིཀྑུནཱིནཾ གཎནཱཡ བྷཱགོ དཱཏབྦོཏི དཱཡཀསྶ ཨདྷིཔྤཱཡོཏི སིཛ྄ཛྷཏི, ཏཐཱ དཱནཉྩ བྷིཀྑཱུཔི གཎེཏྭཱ དིནྣེ ཨེཝ ཡུཛྫཏི། ཨིཏརཐཱ ཧི ‘‘ཀིཏྟཀཾ བྷིཀྑཱུནཾ དཱཏབྦཾ, ཀིཏྟཀཾ བྷིཀྑུནཱིན’’ནྟི ན ཝིཉྙཱཡཏི, ཏསྨཱ ‘‘བྷིཀྑུསངྒྷསྶཱ’’ཏི ཝུཏྟཝཙནམྤི ‘‘བྷིཀྑཱུན’’ནྟི ཝུཏྟཝཙནསདིསམེཝཱཏི ཨཱཧ ‘‘བྷིཀྑཱུ ཙ བྷིཀྑུནིཡོ ཙ གཎེཏྭཱ དཱཏབྦ’’ནྟི། ཏེནཱཧ ‘‘པུགྒལོ…པེ॰… བྷིཀྑུསངྒྷགྒཧཎེན གཧིཏཏྟཱ’’ཏི། ‘‘བྷིཀྑུསངྒྷསྶ ཙ བྷིཀྑུནཱིནཉྩ ཏུཡ྄ཧཉྩཱ’’ཏི ཝུཏྟེ པན པུགྒལོ ཝིསུཾ ན ལབྷཏཱིཏི ཨིདཾ ཨཊྛཀཐཱཔམཱཎེནེཝ གཧེཏབྦཾ, ན ཧེཏྠ ཝིསེསཀཱརཎཾ ཨུཔལབྦྷཏི། ཏཐཱ ཧི ‘‘ཨུབྷཏོསངྒྷསྶ ཙ ཏུཡ྄ཧཉྩ དམྨཱི’’ཏི ཝུཏྟེ སཱམཉྙཝིསེསཝཙནེཧི སངྒཧིཏཏྟཱ ཡཐཱ པུགྒལོ ཝིསུཾ ལབྷཏི, ཨེཝམིདྷཱཔི ‘‘བྷིཀྑུསངྒྷསྶ ཙ ཏུཡ྄ཧཉྩཱ’’ཏི སཱམཉྙཝིསེསཝཙནསབྦྷཱཝཏོ བྷཝིཏབྦམེཝ ཝིསུཾ པུགྒལཔཊིཝཱིསེནཱཏི ཝིཉྙཱཡཏི, ཏསྨཱ ཨཊྛཀཐཱཝཙནམེཝེཏྠ པམཱཎཾ། པཱཔུཎནཊྛཱནཏོ ཨེཀམེཝ ལབྷཏཱིཏི ཨཏྟནོ ཝསྶགྒེན པཏྟཊྛཱནཏོ ཨེཀམེཝ ཀོཊྛཱསཾ ལབྷཏི། ཏཏྠ ཀཱརཎམཱཧ ‘‘ཀསྨཱ? བྷིཀྑུསངྒྷགྒཧཎེན གཧིཏཏྟཱ’’ཏི, བྷིཀྑུསངྒྷགྒཧཎེནེཝ པུགྒལསྶཔི གཧིཏཏྟཱཏི ཨདྷིཔྤཱཡོཏི སཱརཏྠདཱིཔནིཡཾ (སཱརཏྠ॰ ཊཱི॰ མཧཱཝགྒ ༣.༣༧༩) ཝུཏྟཾ།

    203.Upaḍḍhaṃ dātabbanti yaṃ ubhatosaṅghassa dinnaṃ, tato upaḍḍhaṃ bhikkhūnaṃ upaḍḍhaṃ bhikkhunīnaṃ dātabbaṃ. Sacepi eko bhikkhu hoti, ekā vā bhikkhunī, antamaso anupasampannassapi upaḍḍhameva dātabbaṃ. ‘‘Bhikkhusaṅghassa ca bhikkhunīnañca dammī’’ti vutte pana na majjhe bhinditvā dātabbanti ettha yasmā bhikkhunipakkhe saṅghassa paccekaṃ aparāmaṭṭhattā bhikkhunīnaṃ gaṇanāya bhāgo dātabboti dāyakassa adhippāyoti sijjhati, tathā dānañca bhikkhūpi gaṇetvā dinne eva yujjati. Itarathā hi ‘‘kittakaṃ bhikkhūnaṃ dātabbaṃ, kittakaṃ bhikkhunīna’’nti na viññāyati, tasmā ‘‘bhikkhusaṅghassā’’ti vuttavacanampi ‘‘bhikkhūna’’nti vuttavacanasadisamevāti āha ‘‘bhikkhū ca bhikkhuniyo ca gaṇetvā dātabba’’nti. Tenāha ‘‘puggalo…pe… bhikkhusaṅghaggahaṇena gahitattā’’ti. ‘‘Bhikkhusaṅghassa ca bhikkhunīnañca tuyhañcā’’ti vutte pana puggalo visuṃ na labhatīti idaṃ aṭṭhakathāpamāṇeneva gahetabbaṃ, na hettha visesakāraṇaṃ upalabbhati. Tathā hi ‘‘ubhatosaṅghassa ca tuyhañca dammī’’ti vutte sāmaññavisesavacanehi saṅgahitattā yathā puggalo visuṃ labhati, evamidhāpi ‘‘bhikkhusaṅghassa ca tuyhañcā’’ti sāmaññavisesavacanasabbhāvato bhavitabbameva visuṃ puggalapaṭivīsenāti viññāyati, tasmā aṭṭhakathāvacanamevettha pamāṇaṃ. Pāpuṇanaṭṭhānato ekameva labhatīti attano vassaggena pattaṭṭhānato ekameva koṭṭhāsaṃ labhati. Tattha kāraṇamāha ‘‘kasmā? Bhikkhusaṅghaggahaṇena gahitattā’’ti, bhikkhusaṅghaggahaṇeneva puggalassapi gahitattāti adhippāyoti sāratthadīpaniyaṃ (sārattha. ṭī. mahāvagga 3.379) vuttaṃ.

    ཝིམཏིཝིནོདནིཡཾ (ཝི॰ ཝི॰ ཊཱི॰ མཧཱཝགྒ ༢.༣༧༩) པན བྷིཀྑུསངྒྷསདྡེན བྷིཀྑཱུནཉྙེཝ གཧིཏཏྟཱ, པུགྒལསྶ པན ‘‘ཏུཡ྄ཧཉྩཱ’’ཏི ཝིསུཾ གཧིཏཏྟཱ ཙ ཏཏྠསྶ ཨགྒཧིཏཏྟཱ དཊྛབྦཱ, ‘‘བྷིཀྑཱུནཉྩ བྷིཀྑུནཱིནཉྩ ཏུཡ྄ཧཉྩཱ’’ཏི ཝུཏྟཊྛཱནསདིསཏྟཱཏི ཨདྷིཔྤཱཡོ། པུགྒལཔྤདྷཱནོ ཧེཏྠ སངྒྷ-སདྡོ དཊྛབྦོ། ཀེཙི པན ‘‘བྷིཀྑུསངྒྷགྒཧཎེན གཧིཏཏྟཱ’’ཏི པཱཋཾ ལིཁནྟི, ཏཾ ན སུནྡརཾ ཏསྶ ཝིསུཾ ལཱབྷགྒཧཎེ ཀཱརཎཝཙནཏྟཱ། ཏཐཱ ཧི ‘‘ཝིསུཾ སངྒྷགྒཧཎེན གཧིཏཏྟཱ’’ཏི ཝིསུཾ པུགྒལསྶཔི བྷཱགགྒཧཎེ ཀཱརཎཾ ཝུཏྟཾ། ཡཐཱ ཙེཏྠ པུགྒལསྶ ཨགྒཧཎཾ, ཨེཝཾ ཨུཔརི ‘‘བྷིཀྑུསངྒྷསྶ ཙ ཏུཡ྄ཧཉྩཱ’’ཏིཨཱདཱིསུཔི ཝིསུཾ སངྒྷཱདིསདྡེཧི པུགྒལསྶ ཨགྒཧཎཾ དཊྛབྦཾ། ཡདི ཧི གཧཎཾ སིཡཱ, སངྒྷཏོཔི ཝིསུམྤཱིཏི བྷཱགདྭཡཾ ལབྷེཡྻ ཨུབྷཡཏྠ གཧིཏཏྟཱཏི ཝུཏྟཾ། པཱུཛེཏབྦནྟིཨཱདི གིཧིཀམྨཾ ན ཧོཏཱིཏི དསྶནཏྠཾ ཝུཏྟཾ། བྷིཀྑུསངྒྷསྶ ཧརཱཏི ཨིདཾ པིཎྜཔཱཏཧརཎཾ སནྡྷཱཡ ཝུཏྟཾ། ཏེནཱཧ ‘‘བྷུཉྫིཏུཾ ཝཊྚཏཱི’’ཏི། ‘‘བྷིཀྑུསངྒྷསྶ ཧརཱ’’ཏི ཝུཏྟེཔི ཧརིཏབྦནྟི ཨཱིདིསཾ གིཧིཝེཡྻཱཝཙྩཾ ན ཧོཏཱིཏི ཀཏྭཱ ཝུཏྟཾ།

    Vimativinodaniyaṃ (vi. vi. ṭī. mahāvagga 2.379) pana bhikkhusaṅghasaddena bhikkhūnaññeva gahitattā, puggalassa pana ‘‘tuyhañcā’’ti visuṃ gahitattā ca tatthassa aggahitattā daṭṭhabbā, ‘‘bhikkhūnañca bhikkhunīnañca tuyhañcā’’ti vuttaṭṭhānasadisattāti adhippāyo. Puggalappadhāno hettha saṅgha-saddo daṭṭhabbo. Keci pana ‘‘bhikkhusaṅghaggahaṇena gahitattā’’ti pāṭhaṃ likhanti, taṃ na sundaraṃ tassa visuṃ lābhaggahaṇe kāraṇavacanattā. Tathā hi ‘‘visuṃ saṅghaggahaṇena gahitattā’’ti visuṃ puggalassapi bhāgaggahaṇe kāraṇaṃ vuttaṃ. Yathā cettha puggalassa aggahaṇaṃ, evaṃ upari ‘‘bhikkhusaṅghassa ca tuyhañcā’’tiādīsupi visuṃ saṅghādisaddehi puggalassa aggahaṇaṃ daṭṭhabbaṃ. Yadi hi gahaṇaṃ siyā, saṅghatopi visumpīti bhāgadvayaṃ labheyya ubhayattha gahitattāti vuttaṃ. Pūjetabbantiādi gihikammaṃ na hotīti dassanatthaṃ vuttaṃ. Bhikkhusaṅghassa harāti idaṃ piṇḍapātaharaṇaṃ sandhāya vuttaṃ. Tenāha ‘‘bhuñjituṃ vaṭṭatī’’ti. ‘‘Bhikkhusaṅghassa harā’’ti vuttepi haritabbanti īdisaṃ gihiveyyāvaccaṃ na hotīti katvā vuttaṃ.

    ༢༠༤. ཨནྟོཧེམནྟེཏི ཨིམིནཱ ཨནཏྠཏེ ཀཐིནེ ཝསྶཱནཾ པཙྪིམེ མཱསེ དིནྣཾ པུརིམཝསྶཾཝུཏྠཱནཉྙེཝ པཱཔུཎཱཏི, ཏཏོ པརཾ ཧེམནྟེ དིནྣཾ པཙྪིམཝསྶཾཝུཏྠཱནམྤི ཝུཏྠཝསྶཏྟཱ པཱཔུཎཱཏི, ཧེམནྟཏོ པན པརཾ པིཊྛིསམཡེ ‘‘ཝསྶཾཝུཏྠསངྒྷསྶཱ’’ཏི ཨེཝཾ པརིཙྪིནྡིཏྭཱ དིནྣཾ ཨནནྟརེ ཝསྶེ ཝཱ ཏཏོ པརེསུ ཝཱ ཡཏྠ ཀཏྠཙི ཏསྨིཾ བྷིཀྑུབྷཱཝེ ཝུཏྠཝསྶཱནཾ སབྦེསཾ པཱཔུཎཱཏི། ཡེ པན སབྦཐཱ ཨཝུཏྠཝསྶཱ, ཏེསཾ ན པཱཔུཎཱཏཱིཏི དསྶེཏི། ལཀྑཎཉྙཱུ ཝདནྟཱིཏི ཝིནཡལཀྑཎཉྙུནོ ཨཱཙརིཡཱ ཝདནྟི། ལཀྑཎཉྙཱུ ཝདནྟཱིཏི ཨིདཾ སནྣིཊྛཱནཝཙནཾ, ཨཊྛཀཐཱསུ ཨནཱགཏཏྟཱ པན ཨེཝཾ ཝུཏྟཾ། བཧིཨུཔཙཱརསཱིམཱཡཾ…པེ॰… སབྦེསཾ པཱཔུཎཱཏཱིཏི ཡཏྠ ཀཏྠཙི ཝུཏྠཝསྶཱནཾ སབྦེསཾ པཱཔུཎཱཏཱིཏི ཨདྷིཔྤཱཡོ། ཏེནེཝ མཱཏིཀཱཊྛཀཐཱཡམྤི (ཀངྑ॰ ཨཊྛ॰ ཨཀཱལཙཱིཝརསིཀྑཱཔདཝཎྞནཱ) ‘‘སཙེ པན བཧིཨུཔཙཱརསཱིམཱཡཾ ཋིཏོ ‘ཝསྶཾཝུཏྠསངྒྷསྶ དམྨཱི’ཏི ཝདཏི, ཡཏྠ ཀཏྠཙི ཝུཏྠཝསྶཱནཾ སབྦེསཾ སམྤཏྟཱནཾ པཱཔུཎཱཏཱི’’ཏི ཝུཏྟཾ། གཎྛིཔདེསུ པན ‘‘ཝསྶཱཝཱསསྶ ཨནནུརཱུཔེ པདེསེ ཋཏྭཱ ཝུཏྟཏྟཱ ཝསྶཾཝུཏྠཱནཉྩ ཨཝུཏྠཱནཉྩ སབྦེསཾ པཱཔུཎཱཏཱི’’ཏི ཝུཏྟཾ, ཏཾ ན གཧེཏབྦཾ། ན ཧི ‘‘ཝསྶཾཝུཏྠསངྒྷསྶ དམྨཱི’’ཏི ཝུཏྟེ ཨཝུཏྠཝསྶཱནཾ པཱཔུཎཱཏི། སབྦེསམྤཱིཏི ཏསྨིཾ བྷིཀྑུབྷཱཝེ ཝུཏྠཝསྶཱནཾ སབྦེསམྤཱིཏི ཨཏྠོ དཊྛབྦོ ‘‘ཝསྶཾཝུཏྠསངྒྷསྶཱ’’ཏི ཝུཏྟཏྟཱ། སམྨུཁཱིབྷཱུཏཱནཾ སབྦེསམྤཱིཏི ཨེཏྠཱཔི ཨེསེཝ ནཡོ། ཨེཝཾ ཝདཏཱིཏི ཝསྶཾཝུཏྠསངྒྷསྶ དམྨཱིཏི ཝདཏི། ཨཏཱིཏཝསྶནྟི ཨནནྟརཱཏཱིཏཝསྶཾ།

    204.Antohemanteti iminā anatthate kathine vassānaṃ pacchime māse dinnaṃ purimavassaṃvutthānaññeva pāpuṇāti, tato paraṃ hemante dinnaṃ pacchimavassaṃvutthānampi vutthavassattā pāpuṇāti, hemantato pana paraṃ piṭṭhisamaye ‘‘vassaṃvutthasaṅghassā’’ti evaṃ paricchinditvā dinnaṃ anantare vasse vā tato paresu vā yattha katthaci tasmiṃ bhikkhubhāve vutthavassānaṃ sabbesaṃ pāpuṇāti. Ye pana sabbathā avutthavassā, tesaṃ na pāpuṇātīti dasseti. Lakkhaṇaññū vadantīti vinayalakkhaṇaññuno ācariyā vadanti. Lakkhaṇaññū vadantīti idaṃ sanniṭṭhānavacanaṃ, aṭṭhakathāsu anāgatattā pana evaṃ vuttaṃ. Bahiupacārasīmāyaṃ…pe… sabbesaṃ pāpuṇātīti yattha katthaci vutthavassānaṃ sabbesaṃ pāpuṇātīti adhippāyo. Teneva mātikāṭṭhakathāyampi (kaṅkha. aṭṭha. akālacīvarasikkhāpadavaṇṇanā) ‘‘sace pana bahiupacārasīmāyaṃ ṭhito ‘vassaṃvutthasaṅghassa dammī’ti vadati, yattha katthaci vutthavassānaṃ sabbesaṃ sampattānaṃ pāpuṇātī’’ti vuttaṃ. Gaṇṭhipadesu pana ‘‘vassāvāsassa ananurūpe padese ṭhatvā vuttattā vassaṃvutthānañca avutthānañca sabbesaṃ pāpuṇātī’’ti vuttaṃ, taṃ na gahetabbaṃ. Na hi ‘‘vassaṃvutthasaṅghassa dammī’’ti vutte avutthavassānaṃ pāpuṇāti. Sabbesampīti tasmiṃ bhikkhubhāve vutthavassānaṃ sabbesampīti attho daṭṭhabbo ‘‘vassaṃvutthasaṅghassā’’ti vuttattā. Sammukhībhūtānaṃ sabbesampīti etthāpi eseva nayo. Evaṃ vadatīti vassaṃvutthasaṅghassa dammīti vadati. Atītavassanti anantarātītavassaṃ.

    ༢༠༥. ཨིདཱནི ‘‘ཨཱདིསྶ དེཏཱི’’ཏི པདཾ ཝིབྷཛནྟོ ‘‘ཨཱདིསྶ དེཏཱིཏི ཨེཏྠཱ’’ཏིཨཱདིམཱཧ། ཏཏྠ ཡཱགུཡཱ ཝཱ…པེ॰… བྷེསཛྫེ ཝཱ ཨཱདིསིཏྭཱ པརིཙྪིནྡིཏྭཱ དེནྟོ དཱཡཀོ ཨཱདིསྶ དེཏི ནཱམཱཏི ཡོཛནཱ། སེསཾ པཱཀཊམེཝ།

    205. Idāni ‘‘ādissa detī’’ti padaṃ vibhajanto ‘‘ādissa detīti etthā’’tiādimāha. Tattha yāguyā vā…pe… bhesajje vā ādisitvā paricchinditvā dento dāyako ādissa deti nāmāti yojanā. Sesaṃ pākaṭameva.

    ༢༠༦. ཨིདཱནི ‘‘པུགྒལསྶ དེཏཱི’’ཏི པདཾ ཝིབྷཛནྟོ ཨཱཧ ‘‘པུགྒལསྶ དེཏི ཨེཏྠཱ’’ཏིཨཱདི། སངྒྷཏོ ཙ གཎཏོ ཙ ཝིནིམུཏྟསྶ ཨཏྟནོ ཀུལཱུཔཀཱདིཔུགྒལསྶ དེནྟོ དཱཡཀོ པུགྒལསྶ དེཏི ནཱམ། ཏཾ པན པུགྒལིཀདཱནཾ པརམྨུཁཱ ཝཱ ཧོཏི སམྨུཁཱ ཝཱ། ཏཏྠ པརམྨུཁཱ དེནྟོ ‘‘ཨིདཾ ཙཱིཝརཾ ཨིཏྠནྣཱམསྶ དམྨཱི’’ཏི ནཱམཾ ཨུདྡྷརིཏྭཱ དེཏི, སམྨུཁཱ དེནྟོ ཙ བྷིཀྑུནོ པཱདམཱུལེ ཙཱིཝརཾ ཋཔེཏྭཱ ‘‘ཨིདཾ, བྷནྟེ, ཏུམྷཱཀཾ དམྨཱི’’ཏི ཝཏྭཱ དེཏི, ཏདུབྷཡཐཱཔི དེནྟོ པུགྒལསྶ དེཏི ནཱམཱཏི ཨཏྠོ། ན ཀེཝལཾ ཨེཀསྶེཝ དེནྟོ པུགྒལསྶ དེཏི ནཱམ, ཨཐ ཁོ ཨནྟེཝཱསིཀཱདཱིཧི སདྡྷིཾ དེནྟོཔི པུགྒལསྶ དེཏི ནཱམཱཏི དསྶེཏུཾ ‘‘སཙེ པནཱ’’ཏིཨཱདིམཱཧ། ཏཏྠ ཨུདྡེསཾ གཧེཏུཾ ཨཱགཏོཏི ཏསྶ སནྟིཀེ ཨུདྡེསཾ ཨགྒཧིཏཔུབྦསྶཔི ཨུདྡེསཾ གཎྷིསྶཱམཱིཏི ཨཱགཏཀཱལཏོ པཊྛཱཡ ཨནྟེཝཱསིཀབྷཱཝཱུཔགམནཏོ ཝུཏྟཾ། གཧེཏྭཱ གཙྪནྟོཏི པརིནིཊྛིཏཨུདྡེསོ ཧུཏྭཱ གཙྪནྟོ། ཝཏྟཾ ཀཏྭཱ ཨུདྡེསཔརིཔུཙྪཱདཱིནི གཧེཏྭཱ ཝིཙརནྟཱནནྟི ཨིདཾ ‘‘ཨུདྡེསནྟེཝཱསིཀཱན’’ནྟི ཨིམསྶེཝ ཝིསེསནཾ། ཏེན ཨུདྡེསཀཱལེ ཨཱགནྟྭཱ ཨུདྡེསཾ གཧེཏྭཱ གནྟྭཱ ཨཉྙཏྠ ནིཝསནྟེ ཨནིབདྡྷཙཱརིཀེ ནིཝཏྟེཏི།

    206. Idāni ‘‘puggalassa detī’’ti padaṃ vibhajanto āha ‘‘puggalassa deti etthā’’tiādi. Saṅghato ca gaṇato ca vinimuttassa attano kulūpakādipuggalassa dento dāyako puggalassa deti nāma. Taṃ pana puggalikadānaṃ parammukhā vā hoti sammukhā vā. Tattha parammukhā dento ‘‘idaṃ cīvaraṃ itthannāmassa dammī’’ti nāmaṃ uddharitvā deti, sammukhā dento ca bhikkhuno pādamūle cīvaraṃ ṭhapetvā ‘‘idaṃ, bhante, tumhākaṃ dammī’’ti vatvā deti, tadubhayathāpi dento puggalassa deti nāmāti attho. Na kevalaṃ ekasseva dento puggalassa deti nāma, atha kho antevāsikādīhi saddhiṃ dentopi puggalassa deti nāmāti dassetuṃ ‘‘sace panā’’tiādimāha. Tattha uddesaṃ gahetuṃ āgatoti tassa santike uddesaṃ aggahitapubbassapi uddesaṃ gaṇhissāmīti āgatakālato paṭṭhāya antevāsikabhāvūpagamanato vuttaṃ. Gahetvā gacchantoti pariniṭṭhitauddeso hutvā gacchanto. Vattaṃ katvā uddesaparipucchādīni gahetvā vicarantānanti idaṃ ‘‘uddesantevāsikāna’’nti imasseva visesanaṃ. Tena uddesakāle āgantvā uddesaṃ gahetvā gantvā aññattha nivasante anibaddhacārike nivatteti.

    ཨེཝཾ ཙཱིཝརཀྑནྡྷཀེ (མཧཱཝ॰ ༣༧༩) ཨཱགཏཨཊྛམཱཏིཀཱཝསེན ཙཱིཝརཝིབྷཛནཾ དསྶེཏྭཱ ཨིདཱནི ཏསྨིཾཡེཝ ཙཱིཝརཀྑནྡྷཀེ མཛ྄ཛྷེ ཨཱགཏེསུ ཝཏྠཱུསུ ཨཱགཏནཡཾ ནིཝཏྟེཏྭཱ དསྶེནྟོ ‘‘སཙེ ཀོཙི བྷིཀྑཱུ’’ཏིཨཱདིམཱཧ། ཏཏྠ ཀིཾ ཀཱཏབྦནྟི པུཙྪཱཡ ཏསྶེཝ ཏཱནི ཙཱིཝརཱནཱིཏི ཝིསྶཛྫནཱ, སེསཱནི ཉཱཔཀཱདིཝསེན ཝུཏྟཱནི། པཉྩ མཱསེཏི ཨཙྩནྟསཾཡོགེ ཨུཔཡོགཝཙནཾ། ཝཌྜྷིཾ པཡོཛེཏྭཱ ཋཔིཏཨུཔནིཀྑེཔཏོཏི ཝསྶཱཝཱསིཀཏྠཱཡ ཝེཡྻཱཝཙྩཀརེཧི ཝཌྜྷིཾ པཡོཛེཏྭཱ ཋཔིཏཨུཔནིཀྑེཔཏོ། ཏཏྲུཔྤཱདཏོཏི ནཱལི༹ཀེརཱརཱམཱདིཏཏྲུཔྤཱདཏོ། ཨཊྛཀཐཱཡཾ པན ‘‘ཨིདཾ ཨིདྷ ཝསྶཾཝུཏྠསངྒྷསྶ དེམཱཏི ཝཱ ཝསྶཱཝཱསིཀཾ དེམཱཏི ཝཱ ཝཏྭཱ དིནྣཾ ཏཾ ཨནཏྠཏཀཐིནསྶཔི པཉྩ མཱསེ པཱཔུཎཱཏཱི’’ཏི ཝུཏྟཾ, ཏཾ ཝསྶཱཝཱསིཀལཱབྷཝསེན ཨུཔྤནྣེ ལབྦྷམཱནཝིསེསཾ དསྶེཏུཾ ཝུཏྟཾ། ཏཏྠ ཨིདྷཱཏི ཨབྷིལཱཔམཏྟམེཝེཏཾ, ཨིདྷ-སདྡཾ ཝིནཱ ‘‘ཝསྶཾཝུཏྠསངྒྷསྶ དེམཱ’’ཏི ཝུཏྟེཔི སོ ཨེཝ ནཡོ། ཨནཏྠཏཀཐིནསྶཔི པཉྩ མཱསེ པཱཔུཎཱཏཱིཏི ཝསྶཱཝཱསིཀལཱབྷཝསེན ཨུཔྤནྣཏྟཱ ཨནཏྠཏཀཐིནསྶཔི ཝུཏྠཝསྶསྶ པཉྩ མཱསེ པཱཔུཎཱཏི, ཏཏོ པརཾ པན ཨུཔྤནྣཝསྶཱཝཱསིཀཾ པུཙྪིཏབྦཾ ‘‘ཀིཾ ཨཏཱིཏཝསྶེ ཨིདཾ ཝསྶཱཝཱསིཀཾ, ཨུདཱཧུ ཨནཱགཏཝསྶེ’’ཏི། ཏཏྠ ཏཏོ པརནྟི པཉྩམཱསཏོ པརཾ, གིམྷཱནསྶ པཋམདིཝསཏོ པཊྛཱཡཱཏི ཨཏྠོ།

    Evaṃ cīvarakkhandhake (mahāva. 379) āgataaṭṭhamātikāvasena cīvaravibhajanaṃ dassetvā idāni tasmiṃyeva cīvarakkhandhake majjhe āgatesu vatthūsu āgatanayaṃ nivattetvā dassento ‘‘sace koci bhikkhū’’tiādimāha. Tattha kiṃ kātabbanti pucchāya tasseva tāni cīvarānīti vissajjanā, sesāni ñāpakādivasena vuttāni. Pañca māseti accantasaṃyoge upayogavacanaṃ. Vaḍḍhiṃ payojetvā ṭhapitaupanikkhepatoti vassāvāsikatthāya veyyāvaccakarehi vaḍḍhiṃ payojetvā ṭhapitaupanikkhepato. Tatruppādatoti nāḷikerārāmāditatruppādato. Aṭṭhakathāyaṃ pana ‘‘idaṃ idha vassaṃvutthasaṅghassa demāti vā vassāvāsikaṃ demāti vā vatvā dinnaṃ taṃ anatthatakathinassapi pañca māse pāpuṇātī’’ti vuttaṃ, taṃ vassāvāsikalābhavasena uppanne labbhamānavisesaṃ dassetuṃ vuttaṃ. Tattha idhāti abhilāpamattamevetaṃ, idha-saddaṃ vinā ‘‘vassaṃvutthasaṅghassa demā’’ti vuttepi so eva nayo. Anatthatakathinassapi pañca māse pāpuṇātīti vassāvāsikalābhavasena uppannattā anatthatakathinassapi vutthavassassa pañca māse pāpuṇāti, tato paraṃ pana uppannavassāvāsikaṃ pucchitabbaṃ ‘‘kiṃ atītavasse idaṃ vassāvāsikaṃ, udāhu anāgatavasse’’ti. Tattha tato paranti pañcamāsato paraṃ, gimhānassa paṭhamadivasato paṭṭhāyāti attho.

    ཋིཏིཀཱ པན ན ཏིཊྛཏཱིཏི ཨེཏྠ ཨཊྛིཏཱཡ ཋིཏིཀཱཡ པུན ཨཉྙསྨིཾ ཙཱིཝརེ ཨུཔྤནྣེ སཙེ ཨེཀོ བྷིཀྑུ ཨཱགཙྪཏི, མཛ྄ཛྷེ ཚིནྡིཏྭཱ དྭཱིཧིཔི གཧེཏབྦཾ། ཋིཏཱཡ པན ཋིཏིཀཱཡ པུན ཨཉྙསྨིཾ ཙཱིཝརེ ཨུཔྤནྣེ སཙེ ནཝཀཏརོ ཨཱགཙྪཏི, ཋིཏིཀཱ ཧེཊྛཱ གཙྪཏི། སཙེ ཝུཌྜྷཏརོ ཨཱགཙྪཏི, ཋིཏིཀཱ ཨུདྡྷཾ ཨཱརོཧཏི། ཨཐ ཨཉྙོ ནཏྠི, པུན ཨཏྟནོ པཱཔེཏྭཱ གཧེཏབྦཾ། དུགྒཧིཏཱནཱིཏི ཨགྒཧིཏཱནི, སངྒྷིཀཱནེཝ ཧོནྟཱིཏི ཨཏྠོ། ‘‘པཱཏིཏེ ཀུསེ’’ཏི ཨེཀཀོཊྛཱསེ ཀུསདཎྜཀེ པཱཏིཏམཏྟེ སཙེཔི བྷིཀྑུསཧསྶཾ ཧོཏི, གཧིཏམེཝ ནཱམ ཙཱིཝརཾ། ‘‘ནཱཀཱམཱ བྷཱགོ དཱཏབྦོ’’ཏི ཨཊྛཀཐཱཝཙནཾ (མཧཱཝ॰ ཨཊྛ॰ ༣༦༣), ཏཏྠ གཧིཏམེཝ ནཱམཱཏི ‘‘ཨིམསྶ ཨིདཾ པཏྟ’’ནྟི ཀིཉྩཱཔི ན ཝིདིཏཾ, ཏེ པན བྷཱགཱ ཨཏྠཏོ ཏེསཾ པཏྟཱཡེཝཱཏི ཨདྷིཔྤཱཡོ།

    Ṭhitikā pana na tiṭṭhatīti ettha aṭṭhitāya ṭhitikāya puna aññasmiṃ cīvare uppanne sace eko bhikkhu āgacchati, majjhe chinditvā dvīhipi gahetabbaṃ. Ṭhitāya pana ṭhitikāya puna aññasmiṃ cīvare uppanne sace navakataro āgacchati, ṭhitikā heṭṭhā gacchati. Sace vuḍḍhataro āgacchati, ṭhitikā uddhaṃ ārohati. Atha añño natthi, puna attano pāpetvā gahetabbaṃ. Duggahitānīti aggahitāni, saṅghikāneva hontīti attho. ‘‘Pātite kuse’’ti ekakoṭṭhāse kusadaṇḍake pātitamatte sacepi bhikkhusahassaṃ hoti, gahitameva nāma cīvaraṃ. ‘‘Nākāmā bhāgo dātabbo’’ti aṭṭhakathāvacanaṃ (mahāva. aṭṭha. 363), tattha gahitameva nāmāti ‘‘imassa idaṃ patta’’nti kiñcāpi na viditaṃ, te pana bhāgā atthato tesaṃ pattāyevāti adhippāyo.

    སཏྟཱཧཝཱརེན ཨརུཎམེཝ ཨུཊྛཱཔེཏཱིཏི ཨིདཾ ནཱནཱསཱིམཝིཧཱརེསུ ཀཏྟབྦནཡེན ཨེཀསྨིམྤི ཝིཧཱརེ དྭཱིསུ སེནཱསནེསུ ནིཝུཏྠབྷཱཝདསྶནཏྠཾ ཝུཏྟཾ, ཨརུཎུཊྛཱཔནེནེཝ ཏཏྠ ཝུཏྠོ ཧོཏི, ན པན ཝསྶཙྪེདཔརིཧཱརཱཡ། ཨནྟོཨུཔཙཱརསཱིམཱཡ ཧི ཡཏྠ ཀཏྠཙི ཨརུཎཾ ཨུཊྛཱཔེནྟོ ཨཏྟནཱ གཧིཏསེནཱསནཾ ཨཔྤཝིཊྛོཔི ཝུཏྠཝསྶོ ཨེཝ ཧོཏི། གཧིཏསེནཱསནེ པན ནིཝུཏྠོ ནཱམ ན ཧོཏི, ཏཏྠ ཨརུཎུཊྛཱཔནེ སཏི ཧོཏི། ཏེནཱཧ ‘‘པུརིམསྨིཾ བཧུཏརཾ ནིཝསཏི ནཱམཱ’’ཏི། ཨེཏེན ཙ ཨིཏརསྨིཾ སཏྟཱཧཝཱརེནཔི ཨརུཎུཊྛཱཔནེ སཏི ཨེཝ ཨཔྤཏརཾ ནིཝསཏི ནཱམ ཧོཏི, ནཱསཏཱིཏི དཱིཔིཏཾ ཧོཏི། ཨིདནྟི ཨེཀཱདྷིཔྤཱཡདཱནཾ། ནཱནཱལཱབྷེཧཱིཏིཨཱདཱིསུ ནཱནཱ ཝིསུཾ ཝིསུཾ ལཱབྷོ ཨེཏེསཱུཏི ནཱནཱལཱབྷཱ, དྭེ ཝིཧཱརཱ, ཏེཧི ནཱནཱལཱབྷེཧི། ནཱནཱ ཝིསུཾ ཝིསུཾ པཱཀཱརཱདཱིཧི པརིཙྪིནྣོ ཨུཔཙཱརོ ཨེཏེསནྟི ནཱནཱུཔཙཱརཱ, ཏེཧི ནཱནཱུཔཙཱརེཧི། ཨེཀསཱིམཝིཧཱརེཧཱིཏི ཨེཀསཱིམཱཡཾ དྭཱིཧི ཝིཧཱརེཧཱིཏི སཱརཏྠདཱིཔནིཡཾ (སཱརཏྠ॰ ཊཱི॰ མཧཱཝགྒ ༣.༣༦༤) ཝུཏྟཾ། ནཱནཱལཱབྷེཧཱིཏི ཝིསུཾ ཝིསུཾ ནིབདྡྷཝསྶཱཝཱསིཀལཱབྷེཧི། ནཱནཱུཔཙཱརེཧཱིཏི ནཱནཱཔརིཀྑེཔནཱནཱདྭཱརེཧི། ཨེཀསཱིམཝིཧཱརེཧཱིཏི དྭིནྣཾ ཝིཧཱརཱནཾ ཨེཀེན པཱཀཱརེན པརིཀྑིཏྟཏྟཱ ཨེཀཱཡ ཨུཔཙཱརསཱིམཱཡ ཨནྟོགཏེཧི དྭཱིཧི ཝིཧཱརེཧཱིཏི ཝིམཏིཝིནོདནིཡཾ (ཝི॰ ཝི॰ ཊཱི॰ མཧཱཝགྒ ༢.༣༦༤)། སེནཱསནགྒཱཧོ པཊིཔྤསྶམྦྷཏཱིཏི པཋམཾ གཧིཏོ པཊིཔྤསྶམྦྷཏི། ཏཏྠཱཏི ཡཏྠ སེནཱསནགྒཱཧོ པཊིཔྤསྶམྦྷཏི, ཏཏྠ།

    Sattāhavārena aruṇameva uṭṭhāpetīti idaṃ nānāsīmavihāresu kattabbanayena ekasmimpi vihāre dvīsu senāsanesu nivutthabhāvadassanatthaṃ vuttaṃ, aruṇuṭṭhāpaneneva tattha vuttho hoti, na pana vassacchedaparihārāya. Antoupacārasīmāya hi yattha katthaci aruṇaṃ uṭṭhāpento attanā gahitasenāsanaṃ appaviṭṭhopi vutthavasso eva hoti. Gahitasenāsane pana nivuttho nāma na hoti, tattha aruṇuṭṭhāpane sati hoti. Tenāha ‘‘purimasmiṃ bahutaraṃ nivasati nāmā’’ti. Etena ca itarasmiṃ sattāhavārenapi aruṇuṭṭhāpane sati eva appataraṃ nivasati nāma hoti, nāsatīti dīpitaṃ hoti. Idanti ekādhippāyadānaṃ. Nānālābhehītiādīsu nānā visuṃ visuṃ lābho etesūti nānālābhā, dve vihārā, tehi nānālābhehi. Nānā visuṃ visuṃ pākārādīhi paricchinno upacāro etesanti nānūpacārā, tehi nānūpacārehi. Ekasīmavihārehīti ekasīmāyaṃ dvīhi vihārehīti sāratthadīpaniyaṃ (sārattha. ṭī. mahāvagga 3.364) vuttaṃ. Nānālābhehīti visuṃ visuṃ nibaddhavassāvāsikalābhehi. Nānūpacārehīti nānāparikkhepanānādvārehi. Ekasīmavihārehīti dvinnaṃ vihārānaṃ ekena pākārena parikkhittattā ekāya upacārasīmāya antogatehi dvīhi vihārehīti vimativinodaniyaṃ (vi. vi. ṭī. mahāvagga 2.364). Senāsanaggāho paṭippassambhatīti paṭhamaṃ gahito paṭippassambhati. Tatthāti yattha senāsanaggāho paṭippassambhati, tattha.

    ༢༠༧. བྷིཀྑུསྶ ཀཱལཀཏེཏི ཨེཏྠ ཀཱལཀཏ-སདྡོ བྷཱཝསཱདྷནོཏི ཨཱཧ ‘‘ཀཱལཀིརིཡཱཡཱ’’ཏི། པཱལི༹ཡཾ གིལཱནུཔཊྛཱཀཱནཾ ཙཱིཝརདཱནེ སཱམཎེརཱནཾ ཏིཙཱིཝརཱདྷིཊྛཱནཱབྷཱཝཱ ‘‘ཙཱིཝརཉྩ པཏྟཉྩཱ’’ཏིཨཱདི སབྦཏྠ ཝུཏྟཾ།

    207.Bhikkhussakālakateti ettha kālakata-saddo bhāvasādhanoti āha ‘‘kālakiriyāyā’’ti. Pāḷiyaṃ gilānupaṭṭhākānaṃ cīvaradāne sāmaṇerānaṃ ticīvarādhiṭṭhānābhāvā ‘‘cīvarañca pattañcā’’tiādi sabbattha vuttaṃ.

    ༢༠༨. སཙེཔི སཧསྶཾ ཨགྒྷཏི, གིལཱནུཔཊྛཱཀཱནཉྙེཝ དཱཏབྦནྟི སམྦནྡྷོ། ཨཉྙནྟི ཏིཙཱིཝརཔཏྟཏོ ཨཉྙཾ། ཨཔྤགྒྷནྟི ཨཏིཛིཎྞཱདིབྷཱཝེན ནིཧཱིནཾ། ཏཏོཏི ཨཝསེསཔརིཀྑཱརཏོ། སབྦནྟི པཏྟཾ ཙཱིཝརཉྩ། ཏཏྠ ཏཏྠ སངྒྷསྶེཝཱཏི ཏསྨིཾ ཏསྨིཾ ཝིཧཱརེ སངྒྷསྶེཝ། བྷིཀྑུནོ ཀཱལཀཏཊྛཱནཾ སནྡྷཱཡ ‘‘ཨིདྷཱ’’ཏི ཝཏྟབྦེ ‘‘ཏཏྠཱ’’ཏི ཝུཏྟཏྟཱ ཝིཙྪཱཝཙནཏྟཱ ཙ པརིཀྑཱརསྶ ཋཔིཏཊྛཱནཾ ཝུཏྟནྟི ཝིཉྙཱཡཏི། པཱལི༹ཡཾ ཨཝིསྶཛྫིཀཾ ཨཝེབྷངྒིཀནྟི ཨཱགཏཱནཱགཏསྶ ཙཱཏུདྡིསསྶ སངྒྷསྶེཝ སནྟཀཾ ཧུཏྭཱ ཀསྶཙི ཨཝིསྶཛྫིཀཾ ཨཝེབྷངྒིཀཉྩ བྷཝིཏུཾ ཨནུཛཱནཱམཱིཏི ཨཏྠོ། ‘‘སནྟེ པཏིརཱུཔེ གཱཧཀེ’’ཏི ཝུཏྟཏྟཱ གཱཧཀེ ཨསཏི ཨདཏྭཱ བྷཱཛིཏེཔི སུབྷཱཛིཏམེཝཱཏི དཊྛབྦཾ། དཀྑིཎོདཀཾ པམཱཎནྟི ཨེཏྠ སཱརཏྠདཱིཔནིཡཾ (སཱརཏྠ॰ ཊཱི॰ མཧཱཝགྒ ༣.༣༧༦) ཏཱཝ ‘‘ཡཏྠ པན དཀྑིཎོདཀཾ པམཱཎནྟི བྷིཀྑཱུ ཡསྨིཾ རཊྛེ དཀྑིཎོདཀཔཊིགྒཧཎམཏྟེནཔི དེཡྻདྷམྨསྶ སཱམིནོ ཧོནྟཱིཏི ཨདྷིཔྤཱཡོ’’ཏི ཝུཏྟཾ། ཝིམཏིཝིནོདནིཡཾ (ཝི॰ ཝི॰ ཊཱི॰ མཧཱཝགྒ ༢.༣༧༦) པན ‘‘དཀྑིཎོདཀཾ པམཱཎནྟི ཨེཏྟཀཱནི ཙཱིཝརཱནི དསྶཱམཱིཏི པཋམཾ ཨུདཀཾ པཱཏེཏྭཱ པཙྪཱ དེནྟི, ཏཾ ཡེཧི གཧིཏཾ, ཏེ བྷཱགིནོཝ ཧོནྟཱིཏི ཨདྷིཔྤཱཡོ’’ཏི ཝུཏྟཾ། པརསམུདྡེཏི ཛམྦུདཱིཔེ། ཏམྦཔཎྞིདཱིཔཉྷི ཨུཔཱདཱཡེས ཨེཝཾ ཝུཏྟོ།

    208. Sacepi sahassaṃ agghati, gilānupaṭṭhākānaññeva dātabbanti sambandho. Aññanti ticīvarapattato aññaṃ. Appagghanti atijiṇṇādibhāvena nihīnaṃ. Tatoti avasesaparikkhārato. Sabbanti pattaṃ cīvarañca. Tattha tattha saṅghassevāti tasmiṃ tasmiṃ vihāre saṅghasseva. Bhikkhuno kālakataṭṭhānaṃ sandhāya ‘‘idhā’’ti vattabbe ‘‘tatthā’’ti vuttattā vicchāvacanattā ca parikkhārassa ṭhapitaṭṭhānaṃ vuttanti viññāyati. Pāḷiyaṃ avissajjikaṃ avebhaṅgikanti āgatānāgatassa cātuddisassa saṅghasseva santakaṃ hutvā kassaci avissajjikaṃ avebhaṅgikañca bhavituṃ anujānāmīti attho. ‘‘Sante patirūpe gāhake’’ti vuttattā gāhake asati adatvā bhājitepi subhājitamevāti daṭṭhabbaṃ. Dakkhiṇodakaṃ pamāṇanti ettha sāratthadīpaniyaṃ (sārattha. ṭī. mahāvagga 3.376) tāva ‘‘yattha pana dakkhiṇodakaṃ pamāṇanti bhikkhū yasmiṃ raṭṭhe dakkhiṇodakapaṭiggahaṇamattenapi deyyadhammassa sāmino hontīti adhippāyo’’ti vuttaṃ. Vimativinodaniyaṃ (vi. vi. ṭī. mahāvagga 2.376) pana ‘‘dakkhiṇodakaṃ pamāṇanti ettakāni cīvarāni dassāmīti paṭhamaṃ udakaṃ pātetvā pacchā denti, taṃ yehi gahitaṃ, te bhāginova hontīti adhippāyo’’ti vuttaṃ. Parasamuddeti jambudīpe. Tambapaṇṇidīpañhi upādāyesa evaṃ vutto.

    ‘‘མཏཀཙཱིཝརཾ ཨདྷིཊྛཱཏཱི’’ཏི ཨེཏྠ མགྒཾ གཙྪནྟོ ཏསྶ ཀཱལཀིརིཡཾ སུཏྭཱ ཨཝིཧཱརཊྛཱནེ ཙེ དྭཱདསཧཏྠབྦྷནྟརེ ཨཉྙེསཾ བྷིཀྑཱུནཾ ཨབྷཱཝཾ ཉཏྭཱ ‘‘ཨིདཾ ཙཱིཝརཾ མཡ྄ཧཾ པཱཔུཎཱཏཱི’’ཏི ཨདྷིཊྛཱཏི, སྭཱདྷིཊྛིཏཾ། ཏེན ཁོ པན སམཡེན ཨཉྙཏརོ བྷིཀྑུ བཧུབྷཎྜོ བཧུཔརིཀྑཱརོ ཀཱལཀཏོ ཧོཏི། བྷགཝཏོ ཨེཏམཏྠཾ ཨཱརོཙེསུཾ, ‘‘བྷིཀྑུསྶ, བྷིཀྑཝེ, ཀཱལཀཏེ སངྒྷོ སཱམཱི པཏྟཙཱིཝརེ། ཨཔིཙ གིལཱནུཔཊྛཱཀཱ བཧུཔཀཱརཱ, ཨནུཛཱནཱམི, བྷིཀྑཝེ, ཏིཙཱིཝརཉྩ པཏྟཉྩ གིལཱནུཔཊྛཱཀཱནཾ དཱཏུཾ། ཡཾ ཏཏྠ ལཧུབྷཎྜཾ ལཧུཔརིཀྑཱརཾ, ཏཾ སམྨུཁཱིབྷཱུཏེན སངྒྷེན བྷཱཛེཏུཾ། ཡཾ ཏཏྠ གརུབྷཎྜཾ གརུཔརིཀྑཱརཾ, ཏཾ ཨཱགཏཱནཱགཏསྶ ཙཱཏུདྡིསསྶ སངྒྷསྶ ཨཝིསྶཛྫིཀཾ ཨཝེབྷངྒིཀ’’ནྟི (མཧཱཝ॰ ༣༦༩) ཨིམིནཱ པཱཋེན བྷགཝཱ སབྦཉྙཱུ བྷིཀྑཱུནཾ ཨཱམིསདཱཡཛྫཾ ཝིཙཱརེསི།

    ‘‘Matakacīvaraṃ adhiṭṭhātī’’ti ettha maggaṃ gacchanto tassa kālakiriyaṃ sutvā avihāraṭṭhāne ce dvādasahatthabbhantare aññesaṃ bhikkhūnaṃ abhāvaṃ ñatvā ‘‘idaṃ cīvaraṃ mayhaṃ pāpuṇātī’’ti adhiṭṭhāti, svādhiṭṭhitaṃ. Tena kho pana samayena aññataro bhikkhu bahubhaṇḍo bahuparikkhāro kālakato hoti. Bhagavato etamatthaṃ ārocesuṃ, ‘‘bhikkhussa, bhikkhave, kālakate saṅgho sāmī pattacīvare. Apica gilānupaṭṭhākā bahupakārā, anujānāmi, bhikkhave, ticīvarañca pattañca gilānupaṭṭhākānaṃ dātuṃ. Yaṃ tattha lahubhaṇḍaṃ lahuparikkhāraṃ, taṃ sammukhībhūtena saṅghena bhājetuṃ. Yaṃ tattha garubhaṇḍaṃ garuparikkhāraṃ, taṃ āgatānāgatassa cātuddisassa saṅghassa avissajjikaṃ avebhaṅgika’’nti (mahāva. 369) iminā pāṭhena bhagavā sabbaññū bhikkhūnaṃ āmisadāyajjaṃ vicāresi.

    ཏཏྠ ཏིཙཱིཝརཔཏྟཨཝསེསལཧུབྷཎྜགརུབྷཎྜཝསེན ཨཱམིསདཱཡཛྫཾ ཏིཝིདྷཾ ཧོཏི། ཏེསུ ཏིཙཱིཝརཔཏྟཾ གིལཱནུཔཊྛཱཀསྶ བྷཱགོ ཧོཏི, ཨཝསེསལཧུབྷཎྜཾ སམྨུཁཱིབྷཱུཏསངྒྷསྶ, པཉྩཝཱིསཏིཝིདྷ གརུབྷཎྜཾ ཙཱཏུདྡིསསངྒྷསྶ། ཨིམིནཱ ཨིཏོ ཏིཝིདྷབྷཎྜཏོ ཨཉྙཾ བྷིཀྑུབྷཎྜཾ ནཱམ ནཏྠི, ཨིམེཧི ཏིཝིདྷེཧི པུགྒལེཧི ཨཉྙོ དཱཡཱདོ ནཱམ ནཏྠཱིཏི དསྶེཏི། ཨིདཱནི པན ཝིནཡདྷརཱ ‘‘བྷིཀྑཱུནཾ ཨཀཔྤིཡབྷཎྜཾ གིཧིབྷཱུཏཱ ཉཱཏཀཱ ལབྷནྟཱི’’ཏི ཝདནྟི, ཏཾ ཀསྨཱཏི ཙེ? ‘‘ཡེ ཏསྶ དྷནེ ཨིསྶརཱ གཧཊྛཱ ཝཱ པབྦཛིཏཱ ཝཱ, ཏེསཾ དཱཏབྦ’’ནྟི ཨཊྛཀཐཱཡཾ ཨཱགཏཏྟཱཏི། སཙྩཾ ཨཱགཏོ, སོ པན པཱཋོ ཝིསྶཱསགྒཱཧཝིསཡེ ཨཱགཏོ, ན དཱཡཛྫགཧཎཊྛཱནེ། ‘‘གཧཊྛཱ ཝཱ པབྦཛིཏཱ ཝཱ’’ཨིཙྩེཝ ཨཱགཏོ, ན ‘‘ཉཱཏཀཱ ཨཉྙཱཏཀཱ ཝཱ’’ཏི, ཏསྨཱ ཉཱཏཀཱ ཝཱ ཧོནྟུ ཨཉྙཱཏཀཱ ཝཱ, ཡེ ཏཾ གིལཱནཾ ཨུཔཊྛཧནྟི, ཏེ གིལཱནུཔཊྛཱཀབྷཱགབྷཱུཏསྶ དྷནསྶ ཨིསྶརཱ གཧཊྛཔབྦཛིཏཱ, ཨནྟམསོ མཱཏུགཱམཱཔི། ཏེ སནྡྷཱཡ ‘‘ཏེསཾ དཱཏབྦ’’ནྟི ཝུཏྟཾ, ན པན ཡེ གིལཱནཾ ནུཔཊྛཧནྟི, ཏེ སནྡྷཱཡ། ཝུཏྟཉྷི ཨཊྛཀཐཱཡཾ (མཧཱཝ॰ ཨཊྛ॰ ༣༦༩) ‘‘གིལཱནུཔཊྛཱཀོ ནཱམ གིཧཱི ཝཱ ཧོཏུ པབྦཛིཏོ ཝཱ, ཨནྟམསོ མཱཏུགཱམོཔི, སབྦེ བྷཱགཾ ལབྷནྟཱི’’ཏི།

    Tattha ticīvarapattaavasesalahubhaṇḍagarubhaṇḍavasena āmisadāyajjaṃ tividhaṃ hoti. Tesu ticīvarapattaṃ gilānupaṭṭhākassa bhāgo hoti, avasesalahubhaṇḍaṃ sammukhībhūtasaṅghassa, pañcavīsatividha garubhaṇḍaṃ cātuddisasaṅghassa. Iminā ito tividhabhaṇḍato aññaṃ bhikkhubhaṇḍaṃ nāma natthi, imehi tividhehi puggalehi añño dāyādo nāma natthīti dasseti. Idāni pana vinayadharā ‘‘bhikkhūnaṃ akappiyabhaṇḍaṃ gihibhūtā ñātakā labhantī’’ti vadanti, taṃ kasmāti ce? ‘‘Ye tassa dhane issarā gahaṭṭhā vā pabbajitā vā, tesaṃ dātabba’’nti aṭṭhakathāyaṃ āgatattāti. Saccaṃ āgato, so pana pāṭho vissāsaggāhavisaye āgato, na dāyajjagahaṇaṭṭhāne. ‘‘Gahaṭṭhā vā pabbajitā vā’’icceva āgato, na ‘‘ñātakā aññātakā vā’’ti, tasmā ñātakā vā hontu aññātakā vā, ye taṃ gilānaṃ upaṭṭhahanti, te gilānupaṭṭhākabhāgabhūtassa dhanassa issarā gahaṭṭhapabbajitā, antamaso mātugāmāpi. Te sandhāya ‘‘tesaṃ dātabba’’nti vuttaṃ, na pana ye gilānaṃ nupaṭṭhahanti, te sandhāya. Vuttañhi aṭṭhakathāyaṃ (mahāva. aṭṭha. 369) ‘‘gilānupaṭṭhāko nāma gihī vā hotu pabbajito vā, antamaso mātugāmopi, sabbe bhāgaṃ labhantī’’ti.

    ཨཐ ཝཱ ཡོ བྷིཀྑུ ཨཏྟནོ ཛཱིཝམཱནཀཱལེཡེཝ སབྦཾ ཨཏྟནོ པརིཀྑཱརཾ ནིསྶཛྫིཏྭཱ ཀསྶཙི ཉཱཏཀསྶ ཝཱ ཨཉྙཱཏཀསྶ ཝཱ གཧཊྛསྶ ཝཱ པབྦཛིཏསྶ ཝཱ ཨདཱསི, ཀོཙི ཙ ཉཱཏཀོ ཝཱ ཨཉྙཱཏཀོ ཝཱ གཧཊྛོ ཝཱ པབྦཛིཏོ ཝཱ ཝིསྶཱསཾ ཨགྒཧེསི, ཏཱདིསེ སནྡྷཱཡ ‘‘ཡེ ཏསྶ དྷནསྶ ཨིསྶརཱ གཧཊྛཱ ཝཱ པབྦཛིཏཱ ཝཱ, ཏེསཾ དཱཏབྦ’’ནྟི ཝུཏྟཾ, ན པན ཨཏཱདིསེ ཉཱཏཀེ། ཝུཏྟཉྷི ཨཊྛཀཐཱཡཾ (མཧཱཝ॰ ཨཊྛ॰ ༣༦༩) ‘‘སཙེ པན སོ ཛཱིཝམཱནོཡེཝ སབྦཾ ཨཏྟནོ པརིཀྑཱརཾ ནིསྶཛྫིཏྭཱ ཀསྶཙི ཨདཱསི, ཀོཙི ཝཱ ཝིསྶཱསཾ ཨགྒཧེསི, ཡསྶ དིནྣཾ, ཡེན ཙ གཧིཏཾ, ཏསྶེཝ ཧོཏི, ཏསྶ རུཙིཡཱ ཨེཝ གིལཱནུཔཊྛཱཀཱ ལབྷནྟཱི’’ཏི། ཨེཝཾ ཧོཏུ, ཀཔྤིཡབྷཎྜེ པན ཀཐནྟི? ཏམྤི ‘‘གིཧིཉཱཏཀཱནཾ དཱཏབྦ’’ནྟི པཱལི༹ཡཾ ཝཱ ཨཊྛཀཐཱཡཾ ཝཱ ཊཱིཀཱསུ ཝཱ ནཏྠི, ཏསྨཱ ཝིཙཱརེཏབྦམེཏཾ།

    Atha vā yo bhikkhu attano jīvamānakāleyeva sabbaṃ attano parikkhāraṃ nissajjitvā kassaci ñātakassa vā aññātakassa vā gahaṭṭhassa vā pabbajitassa vā adāsi, koci ca ñātako vā aññātako vā gahaṭṭho vā pabbajito vā vissāsaṃ aggahesi, tādise sandhāya ‘‘ye tassa dhanassa issarā gahaṭṭhā vā pabbajitā vā, tesaṃ dātabba’’nti vuttaṃ, na pana atādise ñātake. Vuttañhi aṭṭhakathāyaṃ (mahāva. aṭṭha. 369) ‘‘sace pana so jīvamānoyeva sabbaṃ attano parikkhāraṃ nissajjitvā kassaci adāsi, koci vā vissāsaṃ aggahesi, yassa dinnaṃ, yena ca gahitaṃ, tasseva hoti, tassa ruciyā eva gilānupaṭṭhākā labhantī’’ti. Evaṃ hotu, kappiyabhaṇḍe pana kathanti? Tampi ‘‘gihiñātakānaṃ dātabba’’nti pāḷiyaṃ vā aṭṭhakathāyaṃ vā ṭīkāsu vā natthi, tasmā vicāretabbametaṃ.

    ཙཱིཝརབྷཱཛནཀཐཱཝཎྞནཱ ནིཊྛིཏཱ།

    Cīvarabhājanakathāvaṇṇanā niṭṭhitā.

    པིཎྜཔཱཏབྷཱཛནཀཐཱཝཎྞནཱ

    Piṇḍapātabhājanakathāvaṇṇanā

    ༢༠༩. ཨིདཱནི པིཎྜཔཱཏབྷཱཛནཝིནིཙྪཡཾ ཀཐེཏུཾ ‘‘པིཎྜཔཱཏབྷཱཛནེ པནཱ’’ཏིཨཱདིམཱཧ། ཏཏྠ སེནཱསནཀྑནྡྷཀེ སེནཱསནབྷཱཛནེཡེཝ པཋམཾ ཨཱགཏེཔི ཙཏུཔཙྩཡབྷཱཛནཝིནིཙྪཡཏྟཱ པཙྩཡཱནུཀྐམེན པིཎྜཔཱཏབྷཱཛནཾ པཋམཾ དསྶེཏི། པིཎྜཔཱཏབྷཱཛནེ པན སངྒྷབྷཏྟཱདཱིསུ ཨཡཾ ཝིནིཙྪཡོཏི སམྦནྡྷོ། ཀཐཾ ཨེཏཱནི སངྒྷབྷཏྟཱདཱིནི བྷགཝཏཱ ཨནུཉྙཱཏཱནཱིཏི ཨཱཧ ‘‘ཨནུཛཱནཱམི…པེ॰… ཨནུཉྙཱཏེསཱུ’’ཏི། སངྒྷསྶ ཨཏྠཱཡ ཨཱབྷཏཾ བྷཏྟཾ སངྒྷབྷཏྟཾ ཡཐཱ ‘‘ཨཱགནྟུཀསྶ ཨཱབྷཏཾ བྷཏྟཾ ཨཱགནྟུཀབྷཏྟ’’ནྟི། སངྒྷཏོ ཨུདྡིསྶ ཨུདྡིསིཏྭཱ དཱཏབྦཾ བྷཏྟཾ ཨུདྡེསབྷཏྟཾ། ནིམནྟེཏྭཱ དཱཏབྦཾ བྷཏྟཾ ནིམནྟནབྷཏྟཾ། སལཱཀཾ པཱཏེཏྭཱ གཱཧེཏབྦཾ བྷཏྟཾ སལཱཀབྷཏྟཾ། པཀྑེ པཀྑདིཝསེ དཱཏབྦཾ བྷཏྟཾ པཀྑབྷཏྟཾ། ཨུཔོསཐེ ཨུཔོསཐདིཝསེ དཱཏབྦཾ བྷཏྟཾ ཨུཔོསཐབྷཏྟཾ། པཱཊིཔདེ ཨུཔོསཐདིཝསཏོ དུཏིཡདིཝསེ དཱཏབྦཾ བྷཏྟཾ པཱཊིཔདབྷཏྟནྟི ཝིགྒཧོ། ཋིཏིཀཱ ནཱམ ནཏྠཱིཏི སངྒྷཏྠེརཏོ པཊྛཱཡ ཝསྶགྒེན གཱཧཎཾ ཋིཏིཀཱ ནཱམ།

    209. Idāni piṇḍapātabhājanavinicchayaṃ kathetuṃ ‘‘piṇḍapātabhājane panā’’tiādimāha. Tattha senāsanakkhandhake senāsanabhājaneyeva paṭhamaṃ āgatepi catupaccayabhājanavinicchayattā paccayānukkamena piṇḍapātabhājanaṃ paṭhamaṃ dasseti. Piṇḍapātabhājane pana saṅghabhattādīsu ayaṃ vinicchayoti sambandho. Kathaṃ etāni saṅghabhattādīni bhagavatā anuññātānīti āha ‘‘anujānāmi…pe… anuññātesū’’ti. Saṅghassa atthāya ābhataṃ bhattaṃ saṅghabhattaṃ yathā ‘‘āgantukassa ābhataṃ bhattaṃ āgantukabhatta’’nti. Saṅghato uddissa uddisitvā dātabbaṃ bhattaṃ uddesabhattaṃ. Nimantetvā dātabbaṃ bhattaṃ nimantanabhattaṃ. Salākaṃ pātetvā gāhetabbaṃ bhattaṃ salākabhattaṃ. Pakkhe pakkhadivase dātabbaṃ bhattaṃ pakkhabhattaṃ. Uposathe uposathadivase dātabbaṃ bhattaṃ uposathabhattaṃ. Pāṭipade uposathadivasato dutiyadivase dātabbaṃ bhattaṃ pāṭipadabhattanti viggaho. Ṭhitikā nāma natthīti saṅghattherato paṭṭhāya vassaggena gāhaṇaṃ ṭhitikā nāma.

    ཨཏྟནོ ཝིཧཱརདྭཱརེཏི ཝིཧཱརསྶ དྭཱརཀོཊྛཀསམཱིཔཾ སནྡྷཱཡ ཝུཏྟཾ། བྷོཛནསཱལཱཡཱཏི བྷཏྟུདྡེསཊྛཱནབྷཱུཏཱཡ བྷོཛནསཱལཱཡཾ། ཝསྶགྒེནཱཏི ཝསྶཀོཊྛཱསེན། དིནྣཾ པནཱཏི ཝཏྭཱ ཡཐཱ སོ དཱཡཀོ ཝདཏི, ཏཾ ཝིདྷིཾ དསྶེཏུཾ ‘‘སངྒྷཏོ བྷནྟེ’’ཏིཨཱདིམཱཧ། ཨནྟརགྷརེཏི ཨནྟོགེཧེ། ཨནྟོཨུཔཙཱརགཏཱནནྟི ཨེཏྠ གཱམདྭཱརཝཱིཐིཙཏུཀྐེསུ དྭཱདསཧཏྠབྦྷནྟརཾ ཨུཔཙཱརོ ནཱམ།

    Attanovihāradvāreti vihārassa dvārakoṭṭhakasamīpaṃ sandhāya vuttaṃ. Bhojanasālāyāti bhattuddesaṭṭhānabhūtāya bhojanasālāyaṃ. Vassaggenāti vassakoṭṭhāsena. Dinnaṃ panāti vatvā yathā so dāyako vadati, taṃ vidhiṃ dassetuṃ ‘‘saṅghato bhante’’tiādimāha. Antaraghareti antogehe. Antoupacāragatānanti ettha gāmadvāravīthicatukkesu dvādasahatthabbhantaraṃ upacāro nāma.

    ཨནྟརགྷརསྶ ཨུཔཙཱརེ པན ལབྦྷམཱནཝིསེསཾ དསྶེཏུཾ ‘‘གྷརཱུཔཙཱརོ ཙེཏྠཱ’’ཏིཨཱདིམཱཧ། ཨེཀཝལ༹ཉྫནྟི ཨེཀེན དྭཱརེན ཝལ༹ཉྫིཏབྦཾ། ནཱནཱནིཝེསནེསཱུཏི ནཱནཱཀུལསྶ ནཱནཱུཔཙཱརེསུ ནིཝེསནེསུ། ལཛྫཱི པེསལོ ཨགཏིགམནཾ ཝཛྫེཏྭཱ མེདྷཱཝཱི ཙ ཨུཔཔརིཀྑིཏྭཱ ཨུདྡིསཏཱིཏི ཨཱཧ ‘‘པེསལོ ལཛྫཱི མེདྷཱཝཱི ཨིཙྪིཏབྦོ’’ཏི། ནིསིནྣསྶཔི ནིདྡཱཡནྟསྶཔཱིཏི ཨནཱདརེ སཱམིཝཙནཾ, ཝུཌྜྷཏརེ ནིདྡཱཡནྟེ ནཝཀསྶ གཱཧིཏཾ སུགྒཱཧིཏནྟི ཨཏྠོ། ཏིཙཱིཝརཔརིཝཱརཾ ཝཱཏི ཨེཏྠ ‘‘ཨུདཀམཏྟལཱབྷཱི ཝིཡ ཨཉྙོཔི ཨུདྡེསབྷཏྟཾ ཨལབྷིཏྭཱ ཝཏྠཱདིཨནེཀཔྤཀཱརཀཾ ལབྷཏི ཙེ, ཏསྶེཝ ཏ’’ནྟི གཎྛིཔདེསུ ཝུཏྟཾ། ཨཏྟནོ རུཙིཝསེན ཡཾ ཀིཉྩི ཝཏྭཱ ཨཱཧརིཏུཾ ཝིསྶཛྫིཏཏྟཱ ཝིསྶཊྛདཱུཏོ ནཱམ། ཡཾ ཨིཙྪཏཱིཏི ‘‘ཨུདྡེསབྷཏྟཾ དེཐཱ’’ཏིཨཱདཱིནི ཝདནྟོ ཡཾ ཨིཙྪཏི། པུཙྪཱསབྷཱགེནཱཏི པུཙྪཱསདིསེན།

    Antaragharassa upacāre pana labbhamānavisesaṃ dassetuṃ ‘‘gharūpacāro cetthā’’tiādimāha. Ekavaḷañjanti ekena dvārena vaḷañjitabbaṃ. Nānānivesanesūti nānākulassa nānūpacāresu nivesanesu. Lajjī pesalo agatigamanaṃ vajjetvā medhāvī ca upaparikkhitvā uddisatīti āha ‘‘pesalo lajjī medhāvī icchitabbo’’ti. Nisinnassapi niddāyantassapīti anādare sāmivacanaṃ, vuḍḍhatare niddāyante navakassa gāhitaṃ suggāhitanti attho. Ticīvaraparivāraṃ vāti ettha ‘‘udakamattalābhī viya aññopi uddesabhattaṃ alabhitvā vatthādianekappakārakaṃ labhati ce, tasseva ta’’nti gaṇṭhipadesu vuttaṃ. Attano rucivasena yaṃ kiñci vatvā āharituṃ vissajjitattā vissaṭṭhadūto nāma. Yaṃ icchatīti ‘‘uddesabhattaṃ dethā’’tiādīni vadanto yaṃ icchati. Pucchāsabhāgenāti pucchāsadisena.

    ‘‘ཨེཀཱ ཀཱུཊཊྛིཏིཀཱ ནཱམ ཧོཏཱི’’ཏི ཝཏྭཱ ཏམེཝ ཋིཏིཀཾ ཝིབྷཱཝེནྟོ ‘‘རཉྙོ ཝཱ ཧཱི’’ཏིཨཱདིམཱཧ། ཨཉྙེཧི ཨུདྡེསབྷཏྟཱདཱིཧི ཨམིསྶེཏྭཱ ཝིསུཾཡེཝ ཋིཏིཀཱཡ གཧེཏབྦཏྟཱ ‘‘ཨེཀཙཱརིཀབྷཏྟཱནཱི’’ཏི ཝུཏྟཾ། ཐེཡྻཱཡ ཧརནྟཱིཏི པཏྟཧཱརཀཱ ཧརནྟི། གཱིཝཱ ཧོཏཱིཏི ཨཱཎཱཔཀསྶ གཱིཝཱ ཧོཏི། སབྦཾ པཏྟསྶཱམིཀསྶ ཧོཏཱིཏི ཙཱིཝརཱདིཀམྤི སབྦཾ པཏྟསྶཱམིཀསྶེཝ ཧོཏི, ‘‘མཡཱ བྷཏྟམེཝ སནྡྷཱཡ ཝུཏྟཾ, ན ཙཱིཝརཱདི’’ནྟི ཝཏྭཱ གཧེཏུཾ ཝཊྚཏཱིཏི ཨཏྠོ། མནུསྶཱནཾ ཝཙནཾ ཀཱཏུཾ ཝཊྚཏཱིཏི ཝུཏྟཱ གཙྪནྟཱིཏི མནུསྶཱནཾ ཝཙནཾ ཀཱཏུཾ ཝཊྚཏཱིཏི ཏེན བྷིཀྑུནཱ ཝུཏྟཱ གཙྪནྟི། ཨཀཏབྷཱགོ ནཱམཱཏི ཨཱགནྟུཀབྷཱགོ ནཱམ, ཨདིནྣཔུབྦབྷཱགོཏི ཨཏྠོ། སབྦོ སངྒྷོ པརིབྷཱུཉྫཏཱུཏི ཝུཏྟེཏི ཨེཏྠ ‘‘པཋམམེཝ ‘སབྦསངྒྷིཀབྷཏྟཾ དེཐཱ’ཏི ཝཏྭཱ པཙྪཱ ‘སབྦོ སངྒྷོ པརིབྷུཉྫཏཱུ’ཏི ཨཝུཏྟེཔི བྷཱཛེཏྭཱ པརིབྷུཉྫིཏབྦ’’ནྟི གཎྛིཔདེསུ ཝུཏྟཾ། ཀིཾ ཨཱཧརཱིཡཏཱིཏི ཨཝཏྭཱཏི ‘‘ཀཏརབྷཏྟཾ ཏཡཱ ཨཱཧརཱིཡཏཱི’’ཏི དཱཡཀཾ ཨཔུཙྪིཏྭཱ། པཀཏིཋིཏིཀཱཡཱཏི ཨུདྡེསབྷཏྟཋིཏིཀཱཡ།

    ‘‘Ekākūṭaṭṭhitikā nāma hotī’’ti vatvā tameva ṭhitikaṃ vibhāvento ‘‘rañño vā hī’’tiādimāha. Aññehi uddesabhattādīhi amissetvā visuṃyeva ṭhitikāya gahetabbattā ‘‘ekacārikabhattānī’’ti vuttaṃ. Theyyāya harantīti pattahārakā haranti. Gīvā hotīti āṇāpakassa gīvā hoti. Sabbaṃ pattassāmikassa hotīti cīvarādikampi sabbaṃ pattassāmikasseva hoti, ‘‘mayā bhattameva sandhāya vuttaṃ, na cīvarādi’’nti vatvā gahetuṃ vaṭṭatīti attho. Manussānaṃ vacanaṃ kātuṃ vaṭṭatīti vuttā gacchantīti manussānaṃ vacanaṃ kātuṃ vaṭṭatīti tena bhikkhunā vuttā gacchanti. Akatabhāgo nāmāti āgantukabhāgo nāma, adinnapubbabhāgoti attho. Sabbo saṅgho paribhūñjatūti vutteti ettha ‘‘paṭhamameva ‘sabbasaṅghikabhattaṃ dethā’ti vatvā pacchā ‘sabbo saṅgho paribhuñjatū’ti avuttepi bhājetvā paribhuñjitabba’’nti gaṇṭhipadesu vuttaṃ. Kiṃ āharīyatīti avatvāti ‘‘katarabhattaṃ tayā āharīyatī’’ti dāyakaṃ apucchitvā. Pakatiṭhitikāyāti uddesabhattaṭhitikāya.

    པིཎྜཔཱཏབྷཱཛནཀཐཱཝཎྞནཱ ནིཊྛིཏཱ།

    Piṇḍapātabhājanakathāvaṇṇanā niṭṭhitā.

    ནིམནྟནབྷཏྟཀཐཱཝཎྞནཱ

    Nimantanabhattakathāvaṇṇanā

    ༢༡༠. ‘‘ཨེཏྟཀེ བྷིཀྑཱུ སངྒྷཏོ ཨུདྡིསིཏྭཱ དེཐཱ’’ཏིཨཱདཱིནི ཨཝཏྭཱ ‘‘ཨེཏྟཀཱནཾ བྷིཀྑཱུནཾ བྷཏྟཾ དེཐཱ’’ཏི ཝཏྭཱ དིནྣཾ སངྒྷིཀཾ ནིམནྟནཾ ནཱམ། པིཎྜཔཱཏིཀཱནམྤི ཝཊྚཏཱིཏི བྷིཀྑཱཔརིཡཱཡེན ཝུཏྟཏྟཱ ཝཊྚཏི། པཊིཔཱཊིཡཱཏི ལདྡྷཔཊིཔཱཊིཡཱ། ཝིཙྪིནྡིཏྭཱཏི ‘‘བྷཏྟཾ གཎྷཐཱ’’ཏི པདཾ ཨཝཏྭཱ། ཏེནེཝཱཧ ‘‘བྷཏྟནྟི ཨཝདནྟེནཱ’’ཏི། ཨཱལོཔསངྑེཔེནཱཏི ཨེཀེཀཔིཎྜཝསེན། ཨཡཉྩ ནཡོ ནིམནྟནེཡེཝ, ན ཨུདྡེསབྷཏྟེ། ཏསྶ ཧི ཨེཀསྶ པཧོནཀཔྤམཱཎཾཡེཝ བྷཱཛེཏབྦཾ, ཏསྨཱ ཨུདྡེསབྷཏྟེ ཨཱལོཔཊྛིཏིཀཱ ནཱམ ནཏྠི།

    210. ‘‘Ettake bhikkhū saṅghato uddisitvā dethā’’tiādīni avatvā ‘‘ettakānaṃ bhikkhūnaṃ bhattaṃ dethā’’ti vatvā dinnaṃ saṅghikaṃ nimantanaṃ nāma. Piṇḍapātikānampi vaṭṭatīti bhikkhāpariyāyena vuttattā vaṭṭati. Paṭipāṭiyāti laddhapaṭipāṭiyā. Vicchinditvāti ‘‘bhattaṃ gaṇhathā’’ti padaṃ avatvā. Tenevāha ‘‘bhattanti avadantenā’’ti. Ālopasaṅkhepenāti ekekapiṇḍavasena. Ayañca nayo nimantaneyeva, na uddesabhatte. Tassa hi ekassa pahonakappamāṇaṃyeva bhājetabbaṃ, tasmā uddesabhatte ālopaṭṭhitikā nāma natthi.

    ཨཱརུལ༹ྷཱཡེཝ མཱཏིཀཾ། སངྒྷཏོ ཨཊྛ བྷིཀྑཱུཏི ཨེཏྠ ཡེ མཱཏིཀཾ ཨཱརུལ༹ྷཱ, ཏེ ཨཊྛ བྷིཀྑཱུཏི ཡོཛེཏབྦཾ། ཨུདྡེསབྷཏྟནིམནྟནབྷཏྟཱདིསངྒྷིཀབྷཏྟམཱཏིཀཱསུ ནིམནྟནབྷཏྟམཱཏིཀཱཡ ཋིཏིཀཱཝསེན ཨཱརུལ༹ྷེ བྷཏྟུདྡེསཀེན ཝཱ སཡཾ ཝཱ སངྒྷཏོ ཨུདྡིསཱཔེཏྭཱ གཧེཏྭཱ གནྟབྦཾ, ན ཨཏྟནཱ རུཙིཏེ གཧེཏྭཱཏི ཨདྷིཔྤཱཡོ། མཱཏིཀཾ ཨཱརོཔེཏྭཱཏི ‘‘སངྒྷཏོ གཎྷཱམཱི’’ཏིཨཱདིནཱ ཝུཏྟམཱཏིཀཱབྷེདཾ དཱཡཀསྶ ཝིཉྙཱཔེཏྭཱཏི ཨཏྠོ། ‘‘ཨེཀཝཱརནྟི ཡཱཝ ཏསྨིཾ ཨཱཝཱསེ ཝསནྟི བྷིཀྑཱུ , སབྦེ ལབྷནྟཱི’’ཏི གཎྛིཔདེསུ ཝུཏྟཾ། ཨཡཾ པནེཏྠ ཨདྷིཔྤཱཡོ – ཨེཀཝཱརནྟི ན ཨེཀདིཝསཾ སནྡྷཱཡ ཝུཏྟཾ, ཡཏྟཀཱ པན བྷིཀྑཱུ ཏསྨིཾ ཨཱཝཱསེ ཝསནྟི, ཏེ སབྦེ། ཨེཀསྨིཾ དིཝསེ གཧིཏབྷིཀྑཱུ ཨཉྙདཱ ཨགྒཧེཏྭཱ ཡཱཝ ཨེཀཝཱརཾ སབྦེ བྷིཀྑཱུ བྷོཛིཏཱ ཧོནྟཱིཏི ཛཱནཱཏི ཙེ, ཡེ ཛཱནནྟི, ཏེ གཧེཏྭཱ གནྟབྦནྟི། པཊིབདྡྷཀཱལཏོ པཊྛཱཡཱཏི ཏཏྠེཝ ཝཱསསྶ ནིབདྡྷཀཱལཏོ པཊྛཱཡ།

    Āruḷhāyeva mātikaṃ. Saṅghato aṭṭha bhikkhūti ettha ye mātikaṃ āruḷhā, te aṭṭha bhikkhūti yojetabbaṃ. Uddesabhattanimantanabhattādisaṅghikabhattamātikāsu nimantanabhattamātikāya ṭhitikāvasena āruḷhe bhattuddesakena vā sayaṃ vā saṅghato uddisāpetvā gahetvā gantabbaṃ, na attanā rucite gahetvāti adhippāyo. Mātikaṃ āropetvāti ‘‘saṅghato gaṇhāmī’’tiādinā vuttamātikābhedaṃ dāyakassa viññāpetvāti attho. ‘‘Ekavāranti yāva tasmiṃ āvāse vasanti bhikkhū , sabbe labhantī’’ti gaṇṭhipadesu vuttaṃ. Ayaṃ panettha adhippāyo – ekavāranti na ekadivasaṃ sandhāya vuttaṃ, yattakā pana bhikkhū tasmiṃ āvāse vasanti, te sabbe. Ekasmiṃ divase gahitabhikkhū aññadā aggahetvā yāva ekavāraṃ sabbe bhikkhū bhojitā hontīti jānāti ce, ye jānanti, te gahetvā gantabbanti. Paṭibaddhakālato paṭṭhāyāti tattheva vāsassa nibaddhakālato paṭṭhāya.

    ནིམནྟནབྷཏྟཀཐཱཝཎྞནཱ ནིཊྛིཏཱ།

    Nimantanabhattakathāvaṇṇanā niṭṭhitā.

    སལཱཀབྷཏྟཀཐཱཝཎྞནཱ

    Salākabhattakathāvaṇṇanā

    ༢༡༡. ཨུཔནིབནྡྷིཏྭཱཏི ལིཁིཏྭཱ། གཱམཝསེནཔཱིཏི ཡེབྷུཡྻེན སམལཱབྷགཱམཝསེནཔི། བཧཱུནི སལཱཀབྷཏྟཱནཱིཏི ཏིཾསཾ ཝཱ ཙཏྟཱརཱིསཾ ཝཱ བྷཏྟཱནི། སཙེ ཧོནྟཱིཏི ཨཛ྄ཛྷཱཧརིཏྭཱ ཡོཛེཏབྦཾ། སལླཀྑེཏྭཱཏི ཏཱནི བྷཏྟཱནི པམཱཎཝསེན སལླཀྑེཏྭཱ། ནིགྒཧེན དཏྭཱཏི དཱུརཾ གནྟུཾ ཨནིཙྪནྟསྶ ནིགྒཧེན སམྤཊིཙྪཱཔེཏྭཱ། པུན ཝིཧཱརཾ ཨཱགནྟྭཱཏི ཨེཏྠ ཝིཧཱརཾ ཨནཱགནྟྭཱ བྷཏྟཾ གཧེཏྭཱ པཙྪཱ ཝིཧཱརེ ཨཏྟནོ པཱཔེཏྭཱ བྷུཉྫིཏུམྤི ཝཊྚཏི། ཨེཀགེཧཝསེནཱཏི ཝཱིཐིཡམྤི ཨེཀཔསྶེ གྷརཔཱལི༹ཡཱ ཝསེན། ཨུདྡིསིཏྭཱཔཱིཏི ‘‘ཨསུཀཀུལེ སལཱཀབྷཏྟཱནི ཏུཡ྄ཧཾ པཱཔུཎནྟཱི’’ཏི ཝཏྭཱ།

    211.Upanibandhitvāti likhitvā. Gāmavasenapīti yebhuyyena samalābhagāmavasenapi. Bahūni salākabhattānīti tiṃsaṃ vā cattārīsaṃ vā bhattāni. Sace hontīti ajjhāharitvā yojetabbaṃ. Sallakkhetvāti tāni bhattāni pamāṇavasena sallakkhetvā. Niggahena datvāti dūraṃ gantuṃ anicchantassa niggahena sampaṭicchāpetvā. Puna vihāraṃ āgantvāti ettha vihāraṃ anāgantvā bhattaṃ gahetvā pacchā vihāre attano pāpetvā bhuñjitumpi vaṭṭati. Ekagehavasenāti vīthiyampi ekapasse gharapāḷiyā vasena. Uddisitvāpīti ‘‘asukakule salākabhattāni tuyhaṃ pāpuṇantī’’ti vatvā.

    ༢༡༢. ཝཱརགཱམེཏི ཨཏིདཱུརཏྟཱ ཝཱརེན གནྟབྦགཱམེ། སཊྛིཏོ ཝཱ པཎྞཱསཏོ ཝཱཏི དཎྜཀམྨཏྠཱཡ ཨུདཀགྷཊཾ སནྡྷཱཡ ཝུཏྟཾ། ཝིཧཱརཝཱརོཏི སབྦབྷིཀྑཱུསུ བྷིཀྑཱཡ གཏེསུ ཝིཧཱརརཀྑཎཝཱརོ། ནེསནྟི ཝིཧཱརཝཱརིཀཱནཾ། ཕཱཏིཀམྨམེཝཱཏི ཝིཧཱརརཀྑཎཀིཙྩསྶ པཧོནཀཔཊིཔཱདནམེཝ། དཱུརཏྟཱ ནིགྒཧེཏྭཱཔི ཝཱརེན གཧེཏབྦོ གཱམོ ཝཱརགཱམོ། ཝིཧཱརཝཱརེ ནིཡུཏྟཱ ཝིཧཱརཝཱརིཀཱ, ཝཱརེན ཝིཧཱརརཀྑཎཀཱ། ཨཉྙཐཏྟནྟི པསཱདཉྙཐཏྟཾ། ཕཱཏིཀམྨམེཝ བྷཝནྟཱིཏི ཝིཧཱརརཀྑཎཏྠཱཡ སངྒྷེན དཱཏབྦཱ ཨཏིརེཀལཱབྷཱ ཧོནྟི། ཨེཀསྶེཝ པཱཔུཎནྟཱིཏི དིཝསེ དིཝསེ ཨེཀེཀསྶེཝ པཱཔིཏཱནཱིཏི ཨཏྠོ། སངྒྷནཝཀེན ལདྡྷཀཱལེཏི དིཝསེ དིཝསེ ཨེཀེཀསྶ པཱཔིཏཱནི དྭེ ཏཱིཎི ཨེཀཙཱརིཀབྷཏྟཱནི ཏེནེཝ ནིཡཱམེན ཨཏྟནོ པཱཔུཎནཊྛཱནེ སངྒྷནཝཀེན ལདྡྷཀཱལེ།

    212.Vāragāmeti atidūrattā vārena gantabbagāme. Saṭṭhito vā paṇṇāsato vāti daṇḍakammatthāya udakaghaṭaṃ sandhāya vuttaṃ. Vihāravāroti sabbabhikkhūsu bhikkhāya gatesu vihārarakkhaṇavāro. Nesanti vihāravārikānaṃ. Phātikammamevāti vihārarakkhaṇakiccassa pahonakapaṭipādanameva. Dūrattā niggahetvāpi vārena gahetabbo gāmo vāragāmo. Vihāravāre niyuttā vihāravārikā, vārena vihārarakkhaṇakā. Aññathattanti pasādaññathattaṃ. Phātikammameva bhavantīti vihārarakkhaṇatthāya saṅghena dātabbā atirekalābhā honti. Ekasseva pāpuṇantīti divase divase ekekasseva pāpitānīti attho. Saṅghanavakena laddhakāleti divase divase ekekassa pāpitāni dve tīṇi ekacārikabhattāni teneva niyāmena attano pāpuṇanaṭṭhāne saṅghanavakena laddhakāle.

    ཡསྶ ཀསྶཙི སམྨུཁཱིབྷཱུཏསྶ པཱཔེཏྭཱཏི ཨེཏྠ ‘‘ཡེབྷུཡྻེན ཙེ བྷིཀྑཱུ བཧིསཱིམགཏཱ ཧོནྟི, སམྨུཁཱིབྷཱུཏསྶ ཡསྶ ཀསྶཙི པཱཔེཏབྦཾ སབྷཱགཏྟཱ ཨེཀེན ལདྡྷཾ སབྦེསཾ ཧོཏི, ཏསྨིམྤི ཨསཏི ཨཏྟནོ པཱཔེཏྭཱ དཱཏབྦ’’ནྟི གཎྛིཔདེསུ ཝུཏྟཾ། རསསལཱཀནྟི ཨུཙྪུརསསལཱཀཾ། སལཱཀཝསེན པན གཱཧིཏཏྟཱ ན སཱདིཏབྦཱཏི ཨིདཾ ཨསཱརུཔྤཝསེན ཝུཏྟཾ, ན དྷུཏངྒབྷེདཝསེན། ‘‘སངྒྷཏོ ནིརཱམིསསལཱཀཱ…པེ॰… ཝཊྚཏིཡེཝཱ’’ཏི ཧི ཝིསུདྡྷིམགྒེ (ཝིསུདྡྷི॰ ༡.༢༦) ཝུཏྟཾ། སཱརཏྠདཱིཔནིཡམྤི (སཱརཏྠ॰ ཊཱི॰ ཙཱུལ༹ཝགྒ ༣.༣༢༥) – སངྒྷཏོ ནིརཱམིསསལཱཀཱཔི ཝིཧཱརེ པཀྐབྷཏྟམྤི ཝཊྚཏིཡེཝཱཏི སཱདྷཱརཎཾ ཀཏྭཱ ཝིསུདྡྷིམགྒེ (ཝིསུདྡྷི॰ ༡.༢༦) ཝུཏྟཏྟཱ, ‘‘ཨེཝཾ གཱཧིཏེ སཱདིཏབྦཾ, ཨེཝཾ ན སཱདིཏབྦ’’ནྟི ཝིསེསེཏྭཱ ཨཝུཏྟཏྟཱ ཙ ‘‘བྷེསཛྫཱདིསལཱཀཱཡོ ཙེཏྠ ཀིཉྩཱཔི པིཎྜཔཱཏིཀཱནམྤི ཝཊྚནྟི, སལཱཀཝསེན པན གཱཧིཏཏྟཱ ན སཱདིཏབྦཱ’’ཏི ཨེཏྠ ཨདྷིཔྤཱཡོ ཝཱིམཾསིཏབྦོ། ཡདི ཧི བྷེསཛྫཱདིསལཱཀཱ སལཱཀཝསེན གཱཧིཏཱ ན སཱདིཏབྦཱ སིཡཱ, ‘‘སངྒྷཏོ ནིརཱམིསསལཱཀཱ ཝཊྚཏིཡེཝཱ’’ཏི ན ཝདེཡྻ, ‘‘ཨཏིརེཀལཱབྷོ སངྒྷབྷཏྟཾ ཨུདྡེསབྷཏྟ’’ནྟིཨཱདིཝཙནཏོ (མཧཱཝ॰ ༡༢༨) ཙ ‘‘ཨཏིརེཀལཱབྷཾ པཊིཀྑིཔཱམཱི’’ཏི སལཱཀཝསེན གཱཧེཏབྦཾ བྷཏྟམེཝ པཊིཀྑིཏྟཾ, ན བྷེསཛྫཾ། སངྒྷབྷཏྟཱདཱིནི ཧི ཙུདྡས བྷཏྟཱནིཡེཝ ཏེན ན སཱདིཏབྦཱནཱིཏི ཝུཏྟཱནི། ཁནྡྷཀབྷཱཎཀཱནཾ ཝཱ མཏེན ཨིདྷ ཨེཝཾ ཝུཏྟནྟི གཧེཏབྦནྟི ཝུཏྟཾ། ཨགྒཏོ དཱཏབྦཱ བྷིཀྑཱ ཨགྒབྷིཀྑཱ། ཨགྒབྷིཀྑཱམཏྟནྟི ཨེཀཀཊཙྪུབྷིཀྑཱམཏྟཾ། ལདྡྷཱ ཝཱ ཨལདྡྷཱ ཝཱ སྭེཔི གཎྷེཡྻཱསཱིཏི ལདྡྷེཔི ཨཔྤམཏྟཏཱཡ ཝུཏྟཾ། ཏེནཱཧ ‘‘ཡཱཝདཏྠཾ ལབྷཏི…པེ॰… ཨལབྷིཏྭཱ སྭེ གཎྷེཡྻཱསཱིཏི ཝཏྟབྦོ’’ཏི། ཨགྒབྷིཀྑམཏྟནྟི ཧི ཨེཏྠ མཏྟ-སདྡོ བཧུབྷཱཝཾ ནིཝཏྟེཏི།

    Yassakassaci sammukhībhūtassa pāpetvāti ettha ‘‘yebhuyyena ce bhikkhū bahisīmagatā honti, sammukhībhūtassa yassa kassaci pāpetabbaṃ sabhāgattā ekena laddhaṃ sabbesaṃ hoti, tasmimpi asati attano pāpetvā dātabba’’nti gaṇṭhipadesu vuttaṃ. Rasasalākanti ucchurasasalākaṃ. Salākavasena pana gāhitattā na sāditabbāti idaṃ asāruppavasena vuttaṃ, na dhutaṅgabhedavasena. ‘‘Saṅghato nirāmisasalākā…pe… vaṭṭatiyevā’’ti hi visuddhimagge (visuddhi. 1.26) vuttaṃ. Sāratthadīpaniyampi (sārattha. ṭī. cūḷavagga 3.325) – saṅghato nirāmisasalākāpi vihāre pakkabhattampi vaṭṭatiyevāti sādhāraṇaṃ katvā visuddhimagge (visuddhi. 1.26) vuttattā, ‘‘evaṃ gāhite sāditabbaṃ, evaṃ na sāditabba’’nti visesetvā avuttattā ca ‘‘bhesajjādisalākāyo cettha kiñcāpi piṇḍapātikānampi vaṭṭanti, salākavasena pana gāhitattā na sāditabbā’’ti ettha adhippāyo vīmaṃsitabbo. Yadi hi bhesajjādisalākā salākavasena gāhitā na sāditabbā siyā, ‘‘saṅghato nirāmisasalākā vaṭṭatiyevā’’ti na vadeyya, ‘‘atirekalābho saṅghabhattaṃ uddesabhatta’’ntiādivacanato (mahāva. 128) ca ‘‘atirekalābhaṃ paṭikkhipāmī’’ti salākavasena gāhetabbaṃ bhattameva paṭikkhittaṃ, na bhesajjaṃ. Saṅghabhattādīni hi cuddasa bhattāniyeva tena na sāditabbānīti vuttāni. Khandhakabhāṇakānaṃ vā matena idha evaṃ vuttanti gahetabbanti vuttaṃ. Aggato dātabbā bhikkhā aggabhikkhā. Aggabhikkhāmattanti ekakaṭacchubhikkhāmattaṃ. Laddhā vā aladdhā vā svepi gaṇheyyāsīti laddhepi appamattatāya vuttaṃ. Tenāha ‘‘yāvadatthaṃ labhati…pe… alabhitvā sve gaṇheyyāsīti vattabbo’’ti. Aggabhikkhamattanti hi ettha matta-saddo bahubhāvaṃ nivatteti.

    སལཱཀབྷཏྟཾ ནཱམ ཝིཧཱརེཡེཝ ཨུདྡིསཱིཡཏི ཝིཧཱརམེཝ སནྡྷཱཡ དཱིཡམཱནཏྟཱཏི ཨཱཧ ‘‘ཝིཧཱརེ ཨཔཱཔིཏཾ པནཱ’’ཏིཨཱདི། ཏཏྲ ཨཱསནསཱལཱཡཱཏི ཏསྨིཾ གཱམེ ཨཱསནསཱལཱཡ། ཝིཧཱརཾ ཨཱནེཏྭཱ གཱཧེཏབྦནྟི ཏཐཱ ཝཏྭཱ ཏསྨིཾ དིཝསེ དིནྣབྷཏྟཾ ཝིཧཱརམེཝ ཨཱནེཏྭཱ ཋིཏིཀཱཡ གཱཧེཏབྦཾ། ཏཏྠཱཏི ཏསྨིཾ དིསཱབྷཱགེ། ཏཾ གཧེཏྭཱཏི ཏཾ ཝཱརགཱམསལཱཀཾ ཨཏྟནཱ གཧེཏྭཱ། ཏེནཱཏི ཡོ ཨཏྟནོ པཏྟཝཱརགཱམེ སལཱཀཾ དིསཱགམིཀསྶ ཨདཱསི, ཏེན། ཨནཏིཀྐམནྟེཡེཝ ཏསྨིཾ ཏསྶ སལཱཀཱ གཱཧེཏབྦཱཏི ཡསྨཱ ཨུཔཙཱརསཱིམཊྛསྶེཝ སལཱཀཱ པཱཔུཎཱཏི, ཏསྨཱ ཏསྨིཾ དིསཾགམིཀེ ཨུཔཙཱརསཱིམཾ ཨནཏིཀྐནྟེཡེཝ ཏསྶ དིསཾགམིཀསྶ པཏྟསལཱཀཱ ཨཏྟནོ པཱཔེཏྭཱ གཱཧེཏབྦཱ།

    Salākabhattaṃ nāma vihāreyeva uddisīyati vihārameva sandhāya dīyamānattāti āha ‘‘vihāre apāpitaṃ panā’’tiādi. Tatra āsanasālāyāti tasmiṃ gāme āsanasālāya. Vihāraṃ ānetvā gāhetabbanti tathā vatvā tasmiṃ divase dinnabhattaṃ vihārameva ānetvā ṭhitikāya gāhetabbaṃ. Tatthāti tasmiṃ disābhāge. Taṃ gahetvāti taṃ vāragāmasalākaṃ attanā gahetvā. Tenāti yo attano pattavāragāme salākaṃ disāgamikassa adāsi, tena. Anatikkamanteyeva tasmiṃ tassa salākā gāhetabbāti yasmā upacārasīmaṭṭhasseva salākā pāpuṇāti, tasmā tasmiṃ disaṃgamike upacārasīmaṃ anatikkanteyeva tassa disaṃgamikassa pattasalākā attano pāpetvā gāhetabbā.

    དེཝསིཀཾ པཱཔེཏབྦཱཏི ཨུཔཙཱརསཱིམཱཡཾ ཋིཏསྶ ཡསྶ ཀསྶཙི ཝསྶགྒེན པཱཔེཏབྦཱ། ཨེཝཾ ཨེཏེསུ ཨནཱགཏེསུ ཨཱསནྣཝིཧཱརེ བྷིཀྑཱུནཾ བྷུཉྫིཏུཾ ཝཊྚཏི, ཨིཏརཐཱ སངྒྷིཀཾ ཧོཏི། ཨནཱགཏདིཝསེཏི ཨེཏྠ ཀཐཾ ཏེསཾ བྷིཀྑཱུནཾ ཨཱགཏཱནཱགཏབྷཱཝོ ཝིཉྙཱཡཏཱིཏི ཙེ? ཡསྨཱ ཏཏོ ཏཏོ ཨཱགཏཱ བྷིཀྑཱུ ཏསྨིཾ གཱམེ ཨཱསནསཱལཱཡ སནྣིཔཏནྟི, ཏསྨཱ ཏེསཾ ཨཱགཏཱནཱགཏབྷཱཝོ སཀྐཱ ཝིཉྙཱཏུཾ། ཨམྷཱཀཾ གོཙརགཱམེཏི སལཱཀབྷཏྟདཱཡཀཱནཾ གཱམེ། བྷུཉྫིཏུཾ ཨཱགཙྪནྟཱིཏི ‘‘མཧཱཐེརོ ཨེཀཀོཝ ཝིཧཱརེ ཨོཧཱིནོ ཨཝསྶཾ སབྦསལཱཀཱ ཨཏྟནོ པཱཔེཏྭཱ ཋིཏོ’’ཏི མཉྙམཱནཱ ཨཱགཙྪནྟི།

    Devasikaṃpāpetabbāti upacārasīmāyaṃ ṭhitassa yassa kassaci vassaggena pāpetabbā. Evaṃ etesu anāgatesu āsannavihāre bhikkhūnaṃ bhuñjituṃ vaṭṭati, itarathā saṅghikaṃ hoti. Anāgatadivaseti ettha kathaṃ tesaṃ bhikkhūnaṃ āgatānāgatabhāvo viññāyatīti ce? Yasmā tato tato āgatā bhikkhū tasmiṃ gāme āsanasālāya sannipatanti, tasmā tesaṃ āgatānāgatabhāvo sakkā viññātuṃ. Amhākaṃ gocaragāmeti salākabhattadāyakānaṃ gāme. Bhuñjituṃ āgacchantīti ‘‘mahāthero ekakova vihāre ohīno avassaṃ sabbasalākā attano pāpetvā ṭhito’’ti maññamānā āgacchanti.

    སལཱཀབྷཏྟཀཐཱཝཎྞནཱ ནིཊྛིཏཱ།

    Salākabhattakathāvaṇṇanā niṭṭhitā.

    པཀྑིཀབྷཏྟཱདིཀཐཱཝཎྞནཱ

    Pakkhikabhattādikathāvaṇṇanā

    ༢༡༣. ཨབྷིལཀྑིཏེསུ ཙཏཱུསུ པཀྑདིཝསེསུ དཱཏབྦཾ བྷཏྟཾ པཀྑིཀཾ། ཨབྷིལཀྑིཏེསཱུཏི ཨེཏྠ ཨབྷཱིཏི ཨུཔསཱརམཏྟཾ, ལཀྑཎིཡེསུཨིཙྩེཝཏྠོ, ཨུཔོསཐསམཱདཱནདྷམྨསྶཝནཔཱུཛཱསཀྐཱརཱདིཀརཎཏྠཾ ལཀྑིཏབྦེསུ སལླཀྑེཏབྦེསུ ཨུཔལཀྑེཏབྦེསཱུཏི ཝུཏྟཾ ཧོཏི། སྭེ པཀྑོཏི ཨཛྫཔཀྑིཀཾ ན གཱཧེཏབྦནྟི ཨཊྛམིཡཱ བྷུཉྫིཏབྦཾ, སཏྟམིཡཱ བྷུཉྫནཏྠཱཡ ན གཱཧེཏབྦཾ, དཱཡཀེཧི ནིཡམིཏདིཝསེནེཝ གཱཧེཏབྦནྟི ཨཏྠོ། ཏེནཱཧ ‘‘སཙེ པནཱ’’ཏིཨཱདི། སྭེ ལཱུཁནྟི ཨཛྫ ཨཱཝཱཧམངྒལཱདིཀརཎཏོ ཨཏིཔཎཱིཏཾ བྷོཛནཾ ཀརཱིཡཏི, སྭེ ཏཐཱ ན བྷཝིསྶཏི, ཨཛྫེཝ བྷིཀྑཱུ བྷོཛེསྶཱམཱཏི ཨདྷིཔྤཱཡོ། སཱརཏྠདཱིཔནིཡཾ (སཱརཏྠ॰ ཊཱི॰ ཙཱུལ༹ཝགྒ ༣.༣༢༥) པན ཨཉྙཐཱ ཝུཏྟཾ། པཀྑིཀབྷཏྟཏོ ཨུཔོསཐིཀབྷཏྟསྶ བྷེདཾ དསྶེནྟོ ཨཱཧ ‘‘ཨུཔོསཐངྒཱནི སམཱདིཡིཏྭཱ’’ཏིཨཱདི། ཨུཔོསཐེ དཱཏབྦཾ བྷཏྟཾ ཨུཔོསཐིཀཾ།

    213. Abhilakkhitesu catūsu pakkhadivasesu dātabbaṃ bhattaṃ pakkhikaṃ. Abhilakkhitesūti ettha abhīti upasāramattaṃ, lakkhaṇiyesuiccevattho, uposathasamādānadhammassavanapūjāsakkārādikaraṇatthaṃ lakkhitabbesu sallakkhetabbesu upalakkhetabbesūti vuttaṃ hoti. Sve pakkhoti ajjapakkhikaṃ na gāhetabbanti aṭṭhamiyā bhuñjitabbaṃ, sattamiyā bhuñjanatthāya na gāhetabbaṃ, dāyakehi niyamitadivaseneva gāhetabbanti attho. Tenāha ‘‘sace panā’’tiādi. Sve lūkhanti ajja āvāhamaṅgalādikaraṇato atipaṇītaṃ bhojanaṃ karīyati, sve tathā na bhavissati, ajjeva bhikkhū bhojessāmāti adhippāyo. Sāratthadīpaniyaṃ (sārattha. ṭī. cūḷavagga 3.325) pana aññathā vuttaṃ. Pakkhikabhattato uposathikabhattassa bhedaṃ dassento āha ‘‘uposathaṅgāni samādiyitvā’’tiādi. Uposathe dātabbaṃ bhattaṃ uposathikaṃ.

    པཀྑིཀབྷཏྟཱདིཀཐཱཝཎྞནཱ ནིཊྛིཏཱ།

    Pakkhikabhattādikathāvaṇṇanā niṭṭhitā.

    ཨཱགནྟུཀབྷཏྟཱདིཀཐཱཝཎྞནཱ

    Āgantukabhattādikathāvaṇṇanā

    ༢༡༤. ནིབནྡྷཱཔིཏནྟི ‘‘ཨསུཀཝིཧཱརེ ཨཱགནྟུཀཱ བྷུཉྫནྟཱུ’’ཏི ནིཡམིཏཾ། གམིཀོ ཨཱགནྟུཀབྷཏྟམྤཱིཏི གཱམནྟརཏོ ཨཱགནྟྭཱ ཨཝཱུཔསནྟེན གམིཀཙིཏྟེན ཝསིཏྭཱ པུན ཨཉྙཏྠ གཙྪནྟཾ སནྡྷཱཡ ཝུཏྟཾ, ཨཱཝཱསིཀསྶ པན གནྟུཀཱམསྶ གམིཀབྷཏྟམེཝ ལབྦྷཏི། ‘‘ལེསཾ ཨོཌྜེཏྭཱ’’ཏི ཝུཏྟཏྟཱ ལེསཱབྷཱཝེན ཡཱཝ གམནཔརིབནྡྷོ ཝིགཙྪཏི, ཏཱཝ བྷུཉྫིཏུཾ ཝཊྚཏཱིཏི ཉཱཔིཏནྟི དཊྛབྦཾ།

    214.Nibandhāpitanti ‘‘asukavihāre āgantukā bhuñjantū’’ti niyamitaṃ. Gamiko āgantukabhattampīti gāmantarato āgantvā avūpasantena gamikacittena vasitvā puna aññattha gacchantaṃ sandhāya vuttaṃ, āvāsikassa pana gantukāmassa gamikabhattameva labbhati. ‘‘Lesaṃ oḍḍetvā’’ti vuttattā lesābhāvena yāva gamanaparibandho vigacchati, tāva bhuñjituṃ vaṭṭatīti ñāpitanti daṭṭhabbaṃ.

    དྷུརབྷཏྟཱདིཀཐཱཝཎྞནཱ

    Dhurabhattādikathāvaṇṇanā

    ༢༡༥. ཏཎྜུལཱདཱིནི པེསེནྟི…པེ॰… ཝཊྚཏཱིཏི ཨབྷིཧཊབྷིཀྑཏྟཱ ཝཊྚཏི།

    215.Taṇḍulādīni pesenti…pe… vaṭṭatīti abhihaṭabhikkhattā vaṭṭati.

    ༢༡༦. ཏཐཱ པཊིགྒཧིཏཏྟཱཏི བྷིཀྑཱནཱམེན པཊིགྒཧིཏཏྟཱ། པཏྟཾ པཱུརེཏྭཱ ཐཀེཏྭཱ དིནྣནྟི ‘‘གུལ༹ཀབྷཏྟཾ དེམཱ’’ཏི དིནྣཾ། སེསཾ སུཝིཉྙེཡྻམེཝ།

    216.Tathā paṭiggahitattāti bhikkhānāmena paṭiggahitattā. Pattaṃ pūretvā thaketvā dinnanti ‘‘guḷakabhattaṃ demā’’ti dinnaṃ. Sesaṃ suviññeyyameva.

    པིཎྜཔཱཏབྷཱཛནཀཐཱཝཎྞནཱ ནིཊྛིཏཱ།

    Piṇḍapātabhājanakathāvaṇṇanā niṭṭhitā.

    གིལཱནཔཙྩཡབྷཱཛནཀཐཱཝཎྞནཱ

    Gilānapaccayabhājanakathāvaṇṇanā

    ༢༡༧. ཨིཏོ པརཾ པཙྩཡཱནུཀྐམེན སེནཱསནབྷཱཛནཀཐཱཡ ཝཏྟབྦཱཡཔི ཏསྶཱ མཧཱཝིསཡཏྟཱ, གིལཱནཔཙྩཡབྷཱཛནཱིཡཀཐཱཡ པན ཨཔྤཝིསཡཏྟཱ, པིཎྜཔཱཏབྷཱཛནཱིཡཀཐཱཡ ཨནུལོམཏྟཱ ཙ ཏདནནྟརཾ ཏཾ དསྶེཏུམཱཧ ‘‘གིལཱནཔཙྩཡབྷཱཛནཱིཡཾ པནཱ’’ཏིཨཱདི། ཏཏྠ རཱཛརཱཛམཧཱམཏྟཱཏི ཨུཔལཀྑཎམཏྟམེཝེཏཾ། བྲཱཧྨཎམཧཱསཱལགཧཔཏིམཧཱསཱལཱདཡོཔི ཨེཝཾ ཀརོནྟིཡེཝ། གྷཎྚིཾ པཧརིཏྭཱཏིཨཱདི ཧེཊྛཱ ཝུཏྟནཡཏྟཱ ཙ པཱཀཊཏྟཱ ཙ སུཝིཉྙེཡྻམེཝ། ཨུཔཙཱརསཱིམཾ…པེ॰… བྷཱཛེཏབྦནྟི ཨིདཾ སངྒྷཾ ཨུདྡིསྶ དིནྣཏྟཱ ཝུཏྟཾ། ཀུམྦྷཾ པན ཨཱཝཛྫེཏྭཱཏི ཀུམྦྷཾ དིསཱམུཁཾ ཀཏྭཱ། སཙེ ཐིནཾ སཔྤི ཧོཏཱིཏི ཀཀྑལ༹ཾ སཔྤི ཧོཏི། ཐོཀཾ ཐོཀམྤི པཱཔེཏུཾ ཝཊྚཏཱིཏི ཨེཝཾ ཀཏེ ཋིཏིཀཱཔི ཏིཊྛཏི། སིངྒིཝེརམརིཙཱདིབྷེསཛྫམྤི ཨཝསེསཔཏྟཐཱལཀཱདིསམཎཔརིཀྑཱརོཔཱིཏི ཨིམིནཱ ན ཀེཝལཾ བྷེསཛྫམེཝ གིལཱནཔཙྩཡོ ཧོཏི, ཨཐ ཁོ ཨཝསེསཔརིཀྑཱརོཔི གིལཱནཔཙྩཡེ ཨནྟོགདྷོཡེཝཱཏི དསྶེཏི།

    217. Ito paraṃ paccayānukkamena senāsanabhājanakathāya vattabbāyapi tassā mahāvisayattā, gilānapaccayabhājanīyakathāya pana appavisayattā, piṇḍapātabhājanīyakathāya anulomattā ca tadanantaraṃ taṃ dassetumāha ‘‘gilānapaccayabhājanīyaṃ panā’’tiādi. Tattha rājarājamahāmattāti upalakkhaṇamattamevetaṃ. Brāhmaṇamahāsālagahapatimahāsālādayopi evaṃ karontiyeva. Ghaṇṭiṃ paharitvātiādi heṭṭhā vuttanayattā ca pākaṭattā ca suviññeyyameva. Upacārasīmaṃ…pe… bhājetabbanti idaṃ saṅghaṃ uddissa dinnattā vuttaṃ. Kumbhaṃ pana āvajjetvāti kumbhaṃ disāmukhaṃ katvā. Sace thinaṃ sappi hotīti kakkhaḷaṃ sappi hoti. Thokaṃ thokampi pāpetuṃ vaṭṭatīti evaṃ kate ṭhitikāpi tiṭṭhati. Siṅgiveramaricādibhesajjampi avasesapattathālakādisamaṇaparikkhāropīti iminā na kevalaṃ bhesajjameva gilānapaccayo hoti, atha kho avasesaparikkhāropi gilānapaccaye antogadhoyevāti dasseti.

    གིལཱནཔཙྩཡབྷཱཛནཀཐཱཝཎྞནཱ ནིཊྛིཏཱ།

    Gilānapaccayabhājanakathāvaṇṇanā niṭṭhitā.

    སེནཱསནགྒཱཧཀཐཱཝཎྞནཱ

    Senāsanaggāhakathāvaṇṇanā

    ༢༡༨. སེནཱསནབྷཱཛནཀཐཱཡཾ སེནཱསནགྒཱཧེ ཝིནིཙྪཡོཏི སེནཱསནབྷཱཛནམེཝཱཧ། ཏཏྠ ཨུཏུཀཱལེ སེནཱསནགྒཱཧོ ཙ ཝསྶཱཝཱསེ སེནཱསནགྒཱཧོ ཙཱཏི ཀཱལཝསེན སེནཱསནགྒཱཧོ ནཱམ དུཝིདྷོ ཧོཏཱིཏི ཡོཛནཱ། ཏཏྠ ཨུཏུཀཱལེཏི ཧེམནྟགིམྷཱནཨུཏུཀཱལེ། ཝསྶཱཝཱསེཏི ཝསྶཱནཀཱལེ། བྷིཀྑུཾ ཨུཊྛཱཔེཏྭཱ སེནཱསནཾ དཱཏབྦཾ, ཨཀཱལོ ནཱམ ནཏྠི དཱཡཀེཧི ‘‘ཨཱགཏཱནཱགཏསྶ ཙཱཏུདྡིསསྶ སངྒྷསྶ དམྨཱི’’ཏི དིནྣསངྒྷིཀསེནཱསནཏྟཱ། ཨེཀེཀཾ པརིཝེཎནྟི ཨེཀེཀསྶ བྷིཀྑུསྶ ཨེཀེཀཾ པརིཝེཎཾ། ཏཏྠཱཏི ཏསྨིཾ ལདྡྷཔརིཝེཎེ། དཱིགྷསཱལཱཏི ཙངྐམནསཱལཱ། མཎྜལམཱལོ༹ཏི ཨུཔཊྛཱནསཱལཱ། ཨནུདཧཏཱིཏི པཱིལེ༹ཏི། ཨདཱཏུཾ ན ལབྷཏཱིཏི ཨིམིནཱ སཉྩིཙྩ ཨདེནྟསྶ པཊིབཱཧནེ པཝིསནཏོ དུཀྐཊནྟི དཱིཔེཏི། ཛམྦུདཱིཔེ པནཱཏི ཨརིཡདེསེ བྷིཀྑཱུ སནྡྷཱཡ ཝུཏྟཾ། ཏེ ཀིར ཏཐཱ པཉྙཱཔེནྟི།

    218. Senāsanabhājanakathāyaṃ senāsanaggāhe vinicchayoti senāsanabhājanamevāha. Tattha utukāle senāsanaggāho ca vassāvāse senāsanaggāho cāti kālavasena senāsanaggāho nāma duvidho hotīti yojanā. Tattha utukāleti hemantagimhānautukāle. Vassāvāseti vassānakāle. Bhikkhuṃ uṭṭhāpetvā senāsanaṃ dātabbaṃ, akālo nāma natthi dāyakehi ‘‘āgatānāgatassa cātuddisassa saṅghassa dammī’’ti dinnasaṅghikasenāsanattā. Ekekaṃ pariveṇanti ekekassa bhikkhussa ekekaṃ pariveṇaṃ. Tatthāti tasmiṃ laddhapariveṇe. Dīghasālāti caṅkamanasālā. Maṇḍalamāḷoti upaṭṭhānasālā. Anudahatīti pīḷeti. Adātuṃ na labhatīti iminā sañcicca adentassa paṭibāhane pavisanato dukkaṭanti dīpeti. Jambudīpe panāti ariyadese bhikkhū sandhāya vuttaṃ. Te kira tathā paññāpenti.

    ༢༡༩. ན གོཙརགཱམོ གྷཊྚེཏབྦོཏི ཝུཏྟམེཝཏྠཾ ཝིབྷཱཝེཏི ‘‘ན ཏཏྠ མནུསྶཱ ཝཏྟབྦཱ’’ཏིཨཱདིནཱ། ཝིཏཀྐཾ ཚིནྡིཏྭཱཏི ‘‘ཨིམིནཱ ནཱིཧཱརེན གཙྪནྟཾ དིསྭཱ ནིཝཱརེཏྭཱ པཙྩཡེ དསྶནྟཱི’’ཏི ཨེཝརཱུཔཾ ཝིཏཀྐཾ ཨནུཔྤཱདེཏྭཱ། ཏེསུ ཙེ ཨེཀོཏི ཏེསུ མནུསྶེསུ ཨེཀོ པཎྜིཏཔུརིསོ། བྷཎྜཔཊིཙྪཱདནནྟི པཊིཙྪཱདནབྷཎྜཾ, སརཱིརཔཊིཙྪཱདནཾ ཙཱིཝརནྟི ཨཏྠོ། སུདྡྷཙིཏྟཏྟཱཝ ཨནཝཛྫནྟི ཨིདཾ པུཙྪིཏཀྑཎེ ཀཱརཎཱཙིཀྑཎཾ སནྡྷཱཡ ཝུཏྟཾ ན ཧོཏི ཨསུདྡྷཙིཏྟསྶཔི པུཙྪིཏཔཉྷཝིསྶཛྫནེ དོསཱབྷཱཝཱ། ཨེཝཾ པན གཏེ མཾ པུཙྪིསྶནྟཱིཏི སཉྙཱཡ ཨགམནཾ སནྡྷཱཡ ཝུཏྟནྟི དཊྛབྦཾ།

    219.Nagocaragāmo ghaṭṭetabboti vuttamevatthaṃ vibhāveti ‘‘na tattha manussā vattabbā’’tiādinā. Vitakkaṃ chinditvāti ‘‘iminā nīhārena gacchantaṃ disvā nivāretvā paccaye dassantī’’ti evarūpaṃ vitakkaṃ anuppādetvā. Tesu ce ekoti tesu manussesu eko paṇḍitapuriso. Bhaṇḍapaṭicchādananti paṭicchādanabhaṇḍaṃ, sarīrapaṭicchādanaṃ cīvaranti attho. Suddhacittattāva anavajjanti idaṃ pucchitakkhaṇe kāraṇācikkhaṇaṃ sandhāya vuttaṃ na hoti asuddhacittassapi pucchitapañhavissajjane dosābhāvā. Evaṃ pana gate maṃ pucchissantīti saññāya agamanaṃ sandhāya vuttanti daṭṭhabbaṃ.

    པཊིཛགྒིཏབྦཱནཱིཏི ཁཎྜཕུལླཱབྷིསངྑརཎསམྨཛྫནཱདཱིཧི པཊིཛགྒིཏབྦཱནི། མུཎྜཝེདིཀཱཡཱཏི ཙེཏིཡསྶ ཧམྨིཡཝེདིཀཱཡ གྷཊཱཀཱརསྶ ཨུཔརི ཙཏུརསྶཝེདིཀཱཡ། ཀཏྠ པུཙྪིཏབྦནྟི པུཙྪཱཡ ཡཏོ པཀཏིཡཱ ལབྦྷཏི, ཏཏྠ པུཙྪིཏབྦནྟི ཝིསྶཛྫནཱ། ཀསྨཱ པུཙྪིཏབྦནྟིཨཱདི ཡཏོ པཀཏིཡཱ ལབྦྷཏི, ཏཏྠཱཔི པུཙྪནསྶ ཀཱརཎསནྡསྶནཏྠཾ ཝུཏྟཾ། པཊིཀྐམྨཱཏི ཝིཧཱརཏོ ཨཔསཀྐིཏྭཱ། ཏམཏྠཾ དསྶེནྟོ ‘‘ཡོཛནདྭིཡོཛནནྟརེ ཧོཏཱི’’ཏི ཨཱཧ། ཨུཔནིཀྑེཔནྟི ཁེཏྟཾ ཝཱ ནཱལི༹ཀེརཱདིཨཱརཱམཾ ཝཱ ཀཧཱཔཎཱདཱིནི ཝཱ ཨཱརཱམིཀཱནཾ ནིཡྻཱཏེཏྭཱ ‘‘ཨིཏོ ཨུཔྤནྣཱ ཝཌྜྷི ཝསྶཱཝཱསིཀཏྠཱཡ ཧོཏཱུ’’ཏི དིནྣཾ། ཝཏྟཾ ཀཏྭཱཏི ཏསྨིཾ སེནཱསནེ ཀཏྟབྦཝཏྟཾ ཀཏྭཱ། ཨིཏི སདྡྷཱདེཡྻེཏི ཨེཝཾ ཧེཊྛཱ ཝུཏྟནཡེན སདྡྷཱཡ དཱཏབྦེ ཝསྶཱཝཱསིཀལཱབྷཝིསཡེཏི ཨཏྠོ།

    Paṭijaggitabbānīti khaṇḍaphullābhisaṅkharaṇasammajjanādīhi paṭijaggitabbāni. Muṇḍavedikāyāti cetiyassa hammiyavedikāya ghaṭākārassa upari caturassavedikāya. Kattha pucchitabbanti pucchāya yato pakatiyā labbhati, tattha pucchitabbanti vissajjanā. Kasmā pucchitabbantiādi yato pakatiyā labbhati, tatthāpi pucchanassa kāraṇasandassanatthaṃ vuttaṃ. Paṭikkammāti vihārato apasakkitvā. Tamatthaṃ dassento ‘‘yojanadviyojanantare hotī’’ti āha. Upanikkhepanti khettaṃ vā nāḷikerādiārāmaṃ vā kahāpaṇādīni vā ārāmikānaṃ niyyātetvā ‘‘ito uppannā vaḍḍhi vassāvāsikatthāya hotū’’ti dinnaṃ. Vattaṃ katvāti tasmiṃ senāsane kattabbavattaṃ katvā. Iti saddhādeyyeti evaṃ heṭṭhā vuttanayena saddhāya dātabbe vassāvāsikalābhavisayeti attho.

    ཝཏྠུ པནཱཏི ཏཏྲུཔྤཱདེ ཨུཔྤནྣརཱུཔིཡཾ, ཏཉྩ ‘‘ཏཏོ ཙཏུཔཙྩཡཾ པརིབྷུཉྫཐཱ’’ཏི དིནྣཁེཏྟཱདིཏོ ཨུཔྤནྣཏྟཱ ཀཔྤིཡཀཱརཀཱནཾ ཧཏྠེ ‘‘ཀཔྤིཡབྷཎྜཾ པརིབྷུཉྫཐཱ’’ཏི དཱཡཀེཧི དིནྣཝཏྠུསདིསཾ ཧོཏཱིཏི ཨཱཧ ‘‘ཀཔྤིཡཀཱརཀཱནཉྷཱི’’ཏིཨཱདི། སངྒྷསུཊྛུཏཱཡཱཏི སངྒྷསྶ ཧིཏཱཡ ། པུགྒལཝསེནེཝ ཀཱཏབྦནྟི པརཏོ ཝཀྑམཱནནཡེན བྷིཀྑཱུ ཙཱིཝརེན ཀིལམནྟི, ཨེཏྟཀཾ ནཱམ ཏཎྜུལབྷཱགཾ བྷིཀྑཱུནཾ ཙཱིཝརཾ ཀཱཏུཾ རུཙྩཏཱིཏིཨཱདིནཱ པུགྒལཔརཱམཱསཝསེནེཝ ཀཱཏབྦཾ, ‘‘སངྒྷོ ཙཱིཝརེན ཀིལམཏཱི’’ཏིཨཱདིནཱ པན སངྒྷཔརཱམཱསཝསེན ན ཀཱཏབྦཾ། ཀཔྤིཡབྷཎྜཝསེནཱཏི སཱམཉྙཏོ ཝུཏྟམེཝཏྠཾ ཝིབྷཱཝེཏུཾ ‘‘ཙཱིཝརཏཎྜུལཱདིཝསེནེཝ ཙཱ’’ཏི ཝུཏྟཾ། ཙ-ཀཱརོ ཙེཏྠ པནསདྡཏྠེ ཝཏྟཏི, ན སམུཙྩཡཏྠེཏི དཊྛབྦཾ། པུགྒལཝསེནེཝ ཀཔྤིཡབྷཎྜཝསེན ཙ ཨཔལོཀནཔྤཀཱརཾ དསྶེཏུཾ ‘‘ཏཾ པན ཨེཝཾ ཀཏྟབྦ’’ནྟིཨཱདི ཝུཏྟཾ།

    Vatthu panāti tatruppāde uppannarūpiyaṃ, tañca ‘‘tato catupaccayaṃ paribhuñjathā’’ti dinnakhettādito uppannattā kappiyakārakānaṃ hatthe ‘‘kappiyabhaṇḍaṃ paribhuñjathā’’ti dāyakehi dinnavatthusadisaṃ hotīti āha ‘‘kappiyakārakānañhī’’tiādi. Saṅghasuṭṭhutāyāti saṅghassa hitāya . Puggalavaseneva kātabbanti parato vakkhamānanayena bhikkhū cīvarena kilamanti, ettakaṃ nāma taṇḍulabhāgaṃ bhikkhūnaṃ cīvaraṃ kātuṃ ruccatītiādinā puggalaparāmāsavaseneva kātabbaṃ, ‘‘saṅgho cīvarena kilamatī’’tiādinā pana saṅghaparāmāsavasena na kātabbaṃ. Kappiyabhaṇḍavasenāti sāmaññato vuttamevatthaṃ vibhāvetuṃ ‘‘cīvarataṇḍulādivaseneva cā’’ti vuttaṃ. Ca-kāro cettha panasaddatthe vattati, na samuccayattheti daṭṭhabbaṃ. Puggalavaseneva kappiyabhaṇḍavasena ca apalokanappakāraṃ dassetuṃ ‘‘taṃ pana evaṃ kattabba’’ntiādi vuttaṃ.

    ཙཱིཝརཔཙྩཡཾ སལླཀྑེཏྭཱཏི སདྡྷཱདེཡྻཏཏྲུཔྤཱདཝསེན ཏསྨིཾ ཝསྶཱཝཱསེ ལབྦྷམཱནཙཱིཝརསངྑཱཏཾ པཙྩཡཾ ‘‘ཨེཏྟཀ’’ནྟི པརིཙྪིནྡིཏྭཱ། སེནཱསནསྶཱཏི སེནཱསནགྒཱཧཱཔཎསྶ། ཝུཏྟནྟི མཧཱཨཊྛཀཐཱཡཾ ཝུཏྟཾ། ཀསྨཱ ཨེཝཾ ཝུཏྟནྟི ཨཱཧ ‘‘ཨེཝཉྷཱི’’ཏིཨཱདི, སེནཱསནགྒཱཧཱཔཀསྶ ཨཏྟནཱཝ ཨཏྟནོ གཧཎཾ ཨསཱརུཔྤཾ, ཏསྨཱ ཨུབྷོ ཨཉྙམཉྙཾ གཱཧེསྶནྟཱིཏི ཨདྷིཔྤཱཡོ། སམྨཏསེནཱསནགྒཱཧཱཔཀསྶ ཨཱཎཏྟིཡཱ ཨཉྙེན གཧིཏོཔི གཱཧོ རུཧཏིཡེཝཱཏི ཝེདིཏབྦཾ། ཨཊྛཔི སོལ༹སཔི ཛནེ སམྨནྣིཏུཾ ཝཊྚཏཱིཏི ཝིསུཾ ཝིསུཾ སམྨནྣིཏུཾ ཝཊྚཏི, ཨུདཱཧུ ཨེཀཏོཏི? ཨེཀཏོཔི ཝཊྚཏི། ཨེཀཀམྨཝཱཙཱཡ སབྦེཔི ཨེཀཏོ སམྨནྣིཏུཾ ཝཊྚཏི། ནིགྒཧཀམྨམེཝ ཧི སངྒྷོ སངྒྷསྶ ན ཀརོཏི། སམྨུཏིདཱནཾ པན བཧཱུནམྤི ཨེཀཏོ ཀཱཏུཾ ཝཊྚཏི། ཏེནེཝ སཏྟསཏིཀཀྑནྡྷཀེ ཨུབྦཱཧིཀསམྨུཏིཡཾ ཨཊྛཔི ཛནཱ ཨེཀཏོ སམྨཏཱཏི། ཨཱསནགྷརནྟི པཊིམཱགྷརཾ། མགྒོཏི ཨུཔཙཱརསཱིམབྦྷནྟརགཏེ གཱམཱབྷིམུཁམགྒེ ཀཏསཱལཱ ཝུཙྩཏི, ཨེཝཾ པོཀྑརཎིརུཀྑམཱུལཱདཱིསུཔི། རུཀྑམཱུལཱདཡོ ཚནྣཱ ཀཝཱཊབདྡྷཱཝ སེནཱསནཾ། ཨིཏོ པརཱནི སུཝིཉྙེཡྻཱནི།

    Cīvarapaccayaṃ sallakkhetvāti saddhādeyyatatruppādavasena tasmiṃ vassāvāse labbhamānacīvarasaṅkhātaṃ paccayaṃ ‘‘ettaka’’nti paricchinditvā. Senāsanassāti senāsanaggāhāpaṇassa. Vuttanti mahāaṭṭhakathāyaṃ vuttaṃ. Kasmā evaṃ vuttanti āha ‘‘evañhī’’tiādi, senāsanaggāhāpakassa attanāva attano gahaṇaṃ asāruppaṃ, tasmā ubho aññamaññaṃ gāhessantīti adhippāyo. Sammatasenāsanaggāhāpakassa āṇattiyā aññena gahitopi gāho ruhatiyevāti veditabbaṃ. Aṭṭhapi soḷasapi jane sammannituṃ vaṭṭatīti visuṃ visuṃ sammannituṃ vaṭṭati, udāhu ekatoti? Ekatopi vaṭṭati. Ekakammavācāya sabbepi ekato sammannituṃ vaṭṭati. Niggahakammameva hi saṅgho saṅghassa na karoti. Sammutidānaṃ pana bahūnampi ekato kātuṃ vaṭṭati. Teneva sattasatikakkhandhake ubbāhikasammutiyaṃ aṭṭhapi janā ekato sammatāti. Āsanagharanti paṭimāgharaṃ. Maggoti upacārasīmabbhantaragate gāmābhimukhamagge katasālā vuccati, evaṃ pokkharaṇirukkhamūlādīsupi. Rukkhamūlādayo channā kavāṭabaddhāva senāsanaṃ. Ito parāni suviññeyyāni.

    ༢༢༠. མཧཱལཱབྷཔརིཝེཎཀཐཱཡཾ ལབྷནྟཱིཏི ཏཏྲ ཝཱསིནོ བྷིཀྑཱུ ལབྷནྟི། ཝིཛཊེཏྭཱཏི ཨེཀེཀསྶ པཧོནཀཔྤམཱཎེན ཝིཡོཛེཏྭཱ། ཨཱཝཱསེསཱུཏི སེནཱསནེསུ། པཀྑིཔིཏྭཱཏི ཨེཏྠ པཀྑིཔནཾ ནཱམ ཏེསུ ཝསནྟཱནཾ ཨིཏོ ཨུཔྤནྣཝསྶཱཝཱསིཀདཱནཾ། པཝིསིཏབྦནྟི ཨཉྙེཧི བྷིཀྑཱུཧི ཏསྨིཾ མཧཱལཱབྷེ པརིཝེཎེ ཝསིཏྭཱ ཙེཏིཡེ ཝཏྟཾ ཀཏྭཱཝ ལཱབྷོ གཧེཏབྦོཏི ཨདྷིཔྤཱཡོ།

    220. Mahālābhapariveṇakathāyaṃ labhantīti tatra vāsino bhikkhū labhanti. Vijaṭetvāti ekekassa pahonakappamāṇena viyojetvā. Āvāsesūti senāsanesu. Pakkhipitvāti ettha pakkhipanaṃ nāma tesu vasantānaṃ ito uppannavassāvāsikadānaṃ. Pavisitabbanti aññehi bhikkhūhi tasmiṃ mahālābhe pariveṇe vasitvā cetiye vattaṃ katvāva lābho gahetabboti adhippāyo.

    ༢༢༡. པཙྩཡཾ ཝིསྶཛྫེཏཱིཏི ཙཱིཝརཔཙྩཡཾ ནཱདྷིཝཱསེཏི། ཨཡམྤཱིཏི ཏེན ཝིསྶཛྫིཏཔཙྩཡོཔི། པཱདམཱུལེ ཋཔེཏྭཱ སཱཊཀཾ དེནྟཱིཏི པཙྩཡདཱཡཀཱ དེནྟི། ཨེཏེན གཧཊྛེཧི པཱདམཱུལེ ཋཔེཏྭཱ དིནྣམྤི པཾསུཀཱུལིཀཱནམྤི ཝཊྚཏཱིཏི དསྶེཏི། ཨཐ ཝསྶཱཝཱསིཀཾ དེམཱཏི ཝདནྟཱིཏི ཨེཏྠ ‘‘པཾསུཀཱུལིཀཱནཾ ན ཝཊྚཏཱི’’ཏི ཨཛ྄ཛྷཱཧརིཏྭཱ ཡོཛེཏབྦཾ། ཝསྶཾ ཝུཏྠབྷིཀྑཱུནནྟི པཾསུཀཱུལིཀཏོ ཨཉྙེསཾ བྷིཀྑཱུནཾ། ཨུཔནིབནྡྷིཏྭཱ གཱཧེཏབྦནྟི ‘‘ཨིམསྨིཾ རུཀྑེ ཝཱ མཎྜཔེ ཝཱ ཝསིཏྭཱ ཙེཏིཡེ ཝཏྟཾ ཀཏྭཱ གཎྷཐཱ’’ཏི ཨེཝཾ ཨུཔནིབནྡྷིཏྭཱ གཱཧེཏབྦཾ།

    221.Paccayaṃ vissajjetīti cīvarapaccayaṃ nādhivāseti. Ayampīti tena vissajjitapaccayopi. Pādamūle ṭhapetvā sāṭakaṃ dentīti paccayadāyakā denti. Etena gahaṭṭhehi pādamūle ṭhapetvā dinnampi paṃsukūlikānampi vaṭṭatīti dasseti. Atha vassāvāsikaṃ demāti vadantīti ettha ‘‘paṃsukūlikānaṃ na vaṭṭatī’’ti ajjhāharitvā yojetabbaṃ. Vassaṃ vutthabhikkhūnanti paṃsukūlikato aññesaṃ bhikkhūnaṃ. Upanibandhitvā gāhetabbanti ‘‘imasmiṃ rukkhe vā maṇḍape vā vasitvā cetiye vattaṃ katvā gaṇhathā’’ti evaṃ upanibandhitvā gāhetabbaṃ.

    པཱཊིཔདཨརུཎཏོཏིཨཱདི ཝསྶཱུཔནཱཡིཀདིཝསཾ སནྡྷཱཡ ཝུཏྟཾ། ཨནྟརཱམུཏྟཀཾ པན པཱཊིཔདཾ ཨཏིཀྐམིཏྭཱཔི གཱཧེཏུཾ ཝཊྚཏི། ‘‘ཀཏྠ ནུ ཁོ ཝསིསྶཱམི, ཀཏྠ ཝསནྟསྶ ཕཱསུ བྷཝིསྶཏི, ཀཏྠ ཝཱ པཙྩཡེ ལབྷིསྶཱམཱི’’ཏི ཨེཝཾ ཨུཔྤནྣེན ཝིཏཀྐེན ཙརཏཱིཏི ཝིཏཀྐཙཱརིཀོ། ཨིདཱནི ཡཾ དཱཡཀཱ པཙྪིམཝསྶཾཝུཏྠཱནཾ ཝསྶཱཝཱསིཀཾ དེཏི, ཏཏྠ པཊིཔཛྫནཝིདྷིཾ དསྶེཏུཾ ‘‘པཙྪིམཝསྶཱུཔནཱཡིཀདིཝསེ པནཱ’’ཏིཨཱདི ཨཱརདྡྷཾ། ཨཱགནྟུཀོ ཙེ བྷིཀྑཱུཏི ཙཱིཝརེ གཱཧིཏེ པཙྪཱ ཨཱགཏོ ཨཱགནྟུཀོ བྷིཀྑུ། པཏྟཊྛཱནེཏི ཝསྶགྒེན ཨཱགནྟུཀབྷིཀྑུནོ པཏྟཊྛཱནེ། པཋམཝསྶཱུཔགཏཱཏི ཨཱགནྟུཀསྶ ཨཱགམནཏོ པུརེཏརམེཝ པཙྪིམིཀཱཡ ཝསྶཱུཔནཱཡིཀཱཡ ཝསྶཱུཔགཏཱ། ལདྡྷཾ ལདྡྷནྟི པུནཔྤུནཾ དཱཡཀཱནཾ སནྟིཀཱ ཨཱགཏཱགཏསཱཊཀཾ།

    Pāṭipadaaruṇatotiādi vassūpanāyikadivasaṃ sandhāya vuttaṃ. Antarāmuttakaṃ pana pāṭipadaṃ atikkamitvāpi gāhetuṃ vaṭṭati. ‘‘Kattha nu kho vasissāmi, kattha vasantassa phāsu bhavissati, kattha vā paccaye labhissāmī’’ti evaṃ uppannena vitakkena caratīti vitakkacāriko. Idāni yaṃ dāyakā pacchimavassaṃvutthānaṃ vassāvāsikaṃ deti, tattha paṭipajjanavidhiṃ dassetuṃ ‘‘pacchimavassūpanāyikadivase panā’’tiādi āraddhaṃ. Āgantuko ce bhikkhūti cīvare gāhite pacchā āgato āgantuko bhikkhu. Pattaṭṭhāneti vassaggena āgantukabhikkhuno pattaṭṭhāne. Paṭhamavassūpagatāti āgantukassa āgamanato puretarameva pacchimikāya vassūpanāyikāya vassūpagatā. Laddhaṃ laddhanti punappunaṃ dāyakānaṃ santikā āgatāgatasāṭakaṃ.

    སཱདིཡནྟཱཔི ཧི ཏེནེཝ ཝསྶཱཝཱསིཀསྶ སཱམིནོཏི ཚིནྣཝསྶཏྟཱ ཝུཏྟཾ། པཋམམེཝ ཀཏིཀཱཡ ཀཏཏྟཱ ‘‘ནེཝ ཨདཱཏུཾ ལབྷནྟཱི’’ཏི ཝུཏྟཾ, དཱཏབྦཾ ཝཱརེནྟཱནཾ གཱིཝཱ ཧོཏཱིཏི ཨདྷིཔྤཱཡོ། ཏེསམེཝ དཱཏབྦནྟི ཝསྶཱུཔགཏེསུ ཨལདྡྷཝསྶཱཝཱསིཀཱནཾ ཨེཀཙྩཱནམེཝ དཱཏབྦཾ། བྷཏིནིཝིཊྛནྟི བྷཏིཾ ཀཏྭཱ ཝིཡ ནིཝིཊྛཾ པརིཡིཊྛཾ། བྷཏིནིཝིཊྛནྟི ཝཱ པཱནཱིཡུཔཊྛཱནཱདིབྷཏིཾ ཀཏྭཱ ལདྡྷཾ། སངྒྷིཀཾ པནཱཏིཨཱདི ཀེསཉྩི ཝཱདདསྶནཾ། ཏཏྠ སངྒྷིཀཾ པན ཨཔལོཀནཀམྨཾ ཀཏྭཱ གཱཧིཏནྟི ཏཏྲུཔྤཱདཾ སནྡྷཱཡ ཝུཏྟཾ། ཏཏྠ ཨཔལོཀནཀམྨཾ ཀཏྭཱ གཱཧིཏནྟི ‘‘ཚིནྣཝསྶཱཝཱསིཀཉྩ ཨིདཱནི ཨུཔྤཛྫནཀཝསྶཱཝཱསིཀཉྩ ཨིམེསཾ དཱཏུཾ རུཙྩཏཱི’’ཏི ཨནནྟརེ ཝུཏྟནཡེན ཨཔལོཀནཾ ཀཏྭཱ གཱཧིཏཾ སངྒྷེན དིནྣཏྟཱ ཝིབྦྷནྟོཔི ལབྷཏེཝ, པགེཝ ཚིནྣཝསྶོ། པཙྩཡཝསེན གཱཧིཏཾ པན ཏེམཱསཾ ཝསིཏྭཱ གཧེཏུཾ ཨཏྟནཱ དཱཡཀེཧི ཙ ཨནུམཏཏྟཱ བྷཏིནིཝིཊྛམྤི ཚིནྣཝསྶོཔི ཝིབྦྷནྟོཔི ན ལབྷཏཱིཏི ཀེཙི ཨཱཙརིཡཱ ཝདནྟི། ཨིདཉྩ པཙྪཱ ཝུཏྟཏྟཱ པམཱཎཾ, ཏེནེཝ ཝསྶཱུཔནཱཡིཀདིཝསེ ཨེཝཾ དཱཡཀེཧི དིནྣཾ ཝསྶཱཝཱསིཀཾ གཧིཏབྷིཀྑུནོ ཝསྶཙྪེདཾ ཨཀཏྭཱ ཝཱསོཝ ཧེཊྛཱ ཝིཧིཏོ, ན པཱནཱིཡུཔཊྛཱནཱདིབྷཏིཀརཎམཏྟཾ། ཡདི ཧི ཏཾ བྷཏིནིཝིཊྛམེཝ སིཡཱ, བྷཏིཀརཎམེཝ ཝིདྷཱཏབྦཾ, ཏསྨཱ ཝསྶགྒེན གཱཧིཏཾ ཚིནྣཝསྶཱདཡོ ན ལབྷནྟཱིཏི ཝེདིཏབྦཾ།

    Sādiyantāpi hi teneva vassāvāsikassa sāminoti chinnavassattā vuttaṃ. Paṭhamameva katikāya katattā ‘‘neva adātuṃ labhantī’’ti vuttaṃ, dātabbaṃ vārentānaṃ gīvā hotīti adhippāyo. Tesameva dātabbanti vassūpagatesu aladdhavassāvāsikānaṃ ekaccānameva dātabbaṃ. Bhatiniviṭṭhanti bhatiṃ katvā viya niviṭṭhaṃ pariyiṭṭhaṃ. Bhatiniviṭṭhanti vā pānīyupaṭṭhānādibhatiṃ katvā laddhaṃ. Saṅghikaṃ panātiādi kesañci vādadassanaṃ. Tattha saṅghikaṃ pana apalokanakammaṃ katvā gāhitanti tatruppādaṃ sandhāya vuttaṃ. Tattha apalokanakammaṃ katvā gāhitanti ‘‘chinnavassāvāsikañca idāni uppajjanakavassāvāsikañca imesaṃ dātuṃ ruccatī’’ti anantare vuttanayena apalokanaṃ katvā gāhitaṃ saṅghena dinnattā vibbhantopi labhateva, pageva chinnavasso. Paccayavasena gāhitaṃ pana temāsaṃ vasitvā gahetuṃ attanā dāyakehi ca anumatattā bhatiniviṭṭhampi chinnavassopi vibbhantopi na labhatīti keci ācariyā vadanti. Idañca pacchā vuttattā pamāṇaṃ, teneva vassūpanāyikadivase evaṃ dāyakehi dinnaṃ vassāvāsikaṃ gahitabhikkhuno vassacchedaṃ akatvā vāsova heṭṭhā vihito, na pānīyupaṭṭhānādibhatikaraṇamattaṃ. Yadi hi taṃ bhatiniviṭṭhameva siyā, bhatikaraṇameva vidhātabbaṃ, tasmā vassaggena gāhitaṃ chinnavassādayo na labhantīti veditabbaṃ.

    ‘‘ཨིདྷ, བྷིཀྑཝེ, ཝསྶཾཝུཏྠོ བྷིཀྑུ ཝིབྦྷམཏི, སངྒྷསྶེཝ ཏ’’ནྟི (མཧཱཝ॰ ༣༧༤-༣༧༥) ཝཙནཏོ ‘‘ཝཏཊྛཱནེ…པེ॰… སངྒྷིཀཾ ཧོཏཱི’’ཏི ཝུཏྟཾ ། སངྒྷིཀཾ ཧོཏཱིཏི ཨེཏེན ཝུཏྠཝསྶཱནམྤི ཝསྶཱཝཱསིཀབྷཱགོ སངྒྷིཀཏོ ཨམོཙིཏོ ཏེསཾ ཝིབྦྷམེན སངྒྷིཀོ ཧོཏཱིཏི དསྶེཏི། མནུསྶེཏི དཱཡཀམནུསྶེ། ལབྷཏཱིཏི ‘‘མམ པཏྟབྷཱཝཾ ཨེཏསྶ དེཐཱ’’ཏི དཱཡཀེ སམྤཊིཙྪཱཔེནྟེནེཝ སངྒྷིཀཏོ ཝིཡོཛིཏཾ ཧོཏཱིཏི ཝུཏྟཾ། ཝརབྷཱགཾ སཱམཎེརསྶཱཏི ཏསྶ པཋམགཱཧཏྟཱ, ཐེརེན པུབྦེ པཋམབྷཱགསྶ གཧིཏཏྟཱ, ཨིདཱནི གཡ྄ཧམཱནསྶ དུཏིཡབྷཱགཏྟཱ ཙ ཝུཏྟཾ།

    ‘‘Idha, bhikkhave, vassaṃvuttho bhikkhu vibbhamati, saṅghasseva ta’’nti (mahāva. 374-375) vacanato ‘‘vataṭṭhāne…pe… saṅghikaṃ hotī’’ti vuttaṃ . Saṅghikaṃ hotīti etena vutthavassānampi vassāvāsikabhāgo saṅghikato amocito tesaṃ vibbhamena saṅghiko hotīti dasseti. Manusseti dāyakamanusse. Labhatīti ‘‘mama pattabhāvaṃ etassa dethā’’ti dāyake sampaṭicchāpenteneva saṅghikato viyojitaṃ hotīti vuttaṃ. Varabhāgaṃ sāmaṇerassāti tassa paṭhamagāhattā, therena pubbe paṭhamabhāgassa gahitattā, idāni gayhamānassa dutiyabhāgattā ca vuttaṃ.

    ༢༢༢. ཨིདཱནི ཨནྟརཱམུཏྟསེནཱསནགྒཱཧཾ དསྶེཏུཾ ‘‘ཨཡམཔརོཔཱི’’ཏྱཱདིམཱཧ། ཏཏྠ ཨཔརོཔཱིཏི པུབྦེ ཝུཏྟསེནཱསནགྒཱཧདྭཡཏོ ཨཉྙོཔཱིཏི ཨཏྠོ། ནནུ ཙ ‘‘ཨཡཾ སེནཱསནགྒཱཧོ ནཱམ དུཝིདྷོ ཧོཏི ཨུཏུཀཱལེ ཙ ཝསྶཱཝཱསེ ཙཱ’’ཏི ཝུཏྟོ, ཨཐ ཀསྨཱ ‘‘ཨཡམཔརོཔཱི’’ཏྱཱདི ཝུཏྟོཏི ཙོདནཾ སནྡྷཱཡཱཧ ‘‘དིཝསཝསེན ཧཱི’’ཏིཨཱདི། ཨཔརཛྫུགཏཱཡ ཨཱསཱལ༹ྷིཡཱཏི པཋམཝསྶཱུཔནཱཡིཀདིཝསབྷཱུཏཾ ཨཱསཱལ༹ྷིཔུཎྞམིཡཱ པཱཊིཔདཾ སནྡྷཱཡ ཝུཏྟཾ, མཱསགཏཱཡ ཨཱསཱལ༹ྷིཡཱཏི དུཏིཡཝསྶཱུཔནཱཡིཀདིཝསབྷཱུཏསཱཝཎཔུཎྞམིཡཱ པཱཊིཔདཾ། ཨཔརཛྫུགཏཱཡ པཝཱརཎཱཏི ཨསྶཡུཛཔུཎྞམིཡཱ པཱཊིཔདཾ།

    222. Idāni antarāmuttasenāsanaggāhaṃ dassetuṃ ‘‘ayamaparopī’’tyādimāha. Tattha aparopīti pubbe vuttasenāsanaggāhadvayato aññopīti attho. Nanu ca ‘‘ayaṃ senāsanaggāho nāma duvidho hoti utukāle ca vassāvāse cā’’ti vutto, atha kasmā ‘‘ayamaparopī’’tyādi vuttoti codanaṃ sandhāyāha ‘‘divasavasena hī’’tiādi. Aparajjugatāya āsāḷhiyāti paṭhamavassūpanāyikadivasabhūtaṃ āsāḷhipuṇṇamiyā pāṭipadaṃ sandhāya vuttaṃ, māsagatāya āsāḷhiyāti dutiyavassūpanāyikadivasabhūtasāvaṇapuṇṇamiyā pāṭipadaṃ. Aparajjugatāya pavāraṇāti assayujapuṇṇamiyā pāṭipadaṃ.

    ༢༢༣. ཨུཏུཀཱལེ པཊིབཱཧིཏུཾ ན ལབྷཏཱིཏི ཧེམནྟགིམྷེསུ ཨཉྙེ སམྤཏྟབྷིཀྑཱུ པཊིབཱཧིཏུཾ ན ལབྷཏི། ནཝཀམྨནྟི ནཝཀམྨསམྨུཏི། ཨཀཏནྟི ཨཔརིསངྑཏཾ། ཝིཔྤཀཏནྟི ཨནིཊྛིཏཾ། ཨེཀཾ མཉྩཊྛཱནཾ དཏྭཱཏི ཨེཀཾ མཉྩཊྛཱནཾ པུགྒལིཀཾ དཏྭཱ། ཏིབྷཱགནྟི ཏཏིཡབྷཱགཾ། ཨེཝཾ ཝིསྶཛྫནམྤི ཐཱཝརེན ཐཱཝརཾ པརིཝཏྟནཊྛཱནེཡེཝ པཝིསཏི, ན ཨིཏརཐཱ སབྦསེནཱསནཝིསྶཛྫནཏོ ། སཙེ སདྡྷིཝིཧཱརིཀཱདཱིནཾ དཱཏུཀཱམོ ཧོཏཱིཏི སཙེ སོ སངྒྷསྶ བྷཎྜཋཔནཊྛཱནཾ ཝཱ ཨཉྙེསཾ བྷིཀྑཱུནཾ ཝསནཊྛཱནཾ ཝཱ དཱཏུཾ ན ཨིཙྪཏི, ཨཏྟནོ སདྡྷིཝིཧཱརིཀཱདཱིནཉྙེཝ དཱཏུཀཱམོ ཧོཏི, ཏཱདིསསྶ ‘‘ཏུཡ྄ཧཾ པུགྒལིཀམེཝ ཀཏྭཱ ཛགྒཱཧཱི’’ཏི ན སབྦཾ དཱཏབྦནྟི ཨདྷིཔྤཱཡོ། ཏཏྠསྶ ཀཏྟབྦཝིདྷིཾ དསྶེནྟོ ཨཱཧ ‘‘ཀམྨ’’ནྟིཨཱདི། ཨེཝཉྷཱིཏིཨཱདིམྷི ཙཡཱནུརཱུཔཾ ཏཏིཡབྷཱགེ ཝཱ ཨུཔཌྜྷབྷཱགེ ཝཱ གཧིཏེ ཏཾ བྷཱགཾ དཱཏུཾ ལབྷཏཱིཏི ཨཏྠོ། ཡེནཱཏི ཏེསུ དྭཱིསུ ཏཱིསུ བྷིཀྑཱུསུ ཡེན། སོ སཱམཱིཏི ཏསྶཱ བྷཱུམིཡཱ ཝིཧཱརཀརཎེ སོཝ སཱམཱི, ཏཾ པཊིབཱཧིཏྭཱ ཨིཏརེན ན ཀཱཏབྦནྟི ཨདྷིཔྤཱཡོ།

    223.Utukāle paṭibāhituṃ na labhatīti hemantagimhesu aññe sampattabhikkhū paṭibāhituṃ na labhati. Navakammanti navakammasammuti. Akatanti aparisaṅkhataṃ. Vippakatanti aniṭṭhitaṃ. Ekaṃ mañcaṭṭhānaṃ datvāti ekaṃ mañcaṭṭhānaṃ puggalikaṃ datvā. Tibhāganti tatiyabhāgaṃ. Evaṃ vissajjanampi thāvarena thāvaraṃ parivattanaṭṭhāneyeva pavisati, na itarathā sabbasenāsanavissajjanato . Sace saddhivihārikādīnaṃ dātukāmo hotīti sace so saṅghassa bhaṇḍaṭhapanaṭṭhānaṃ vā aññesaṃ bhikkhūnaṃ vasanaṭṭhānaṃ vā dātuṃ na icchati, attano saddhivihārikādīnaññeva dātukāmo hoti, tādisassa ‘‘tuyhaṃ puggalikameva katvā jaggāhī’’ti na sabbaṃ dātabbanti adhippāyo. Tatthassa kattabbavidhiṃ dassento āha ‘‘kamma’’ntiādi. Evañhītiādimhi cayānurūpaṃ tatiyabhāge vā upaḍḍhabhāge vā gahite taṃ bhāgaṃ dātuṃ labhatīti attho. Yenāti tesu dvīsu tīsu bhikkhūsu yena. So sāmīti tassā bhūmiyā vihārakaraṇe sova sāmī, taṃ paṭibāhitvā itarena na kātabbanti adhippāyo.

    ༢༢༤. ཨཀཏཊྛཱནེཏི སེནཱསནཏོ བཧི ཙཡཱདཱིནཾ ཨཀཏཊྛཱནེ། ཙཡཾ ཝཱ པམུཁཾ ཝཱཏི སངྒྷིཀསེནཱསནཾ ནིསྶཱཡ ཏཏོ བཧི བནྡྷིཏྭཱ ཨེཀཾ སེནཱསནཾ ཝཱ། བཧིཀུཊྚེཏི ཀུཊྚཏོ བཧི, ཨཏྟནོ ཀཏཊྛཱནེཏི ཨཏྠོ། སེསཾ སུཝིཉྙེཡྻམེཝ།

    224.Akataṭṭhāneti senāsanato bahi cayādīnaṃ akataṭṭhāne. Cayaṃ vā pamukhaṃ vāti saṅghikasenāsanaṃ nissāya tato bahi bandhitvā ekaṃ senāsanaṃ vā. Bahikuṭṭeti kuṭṭato bahi, attano kataṭṭhāneti attho. Sesaṃ suviññeyyameva.

    སེནཱསནགྒཱཧཀཐཱཝཎྞནཱ ནིཊྛིཏཱ།

    Senāsanaggāhakathāvaṇṇanā niṭṭhitā.

    ཙཏུཔཙྩཡསཱདྷཱརཎཀཐཱཝཎྞནཱ

    Catupaccayasādhāraṇakathāvaṇṇanā

    ༢༢༥. ཙཏུཔཙྩཡསཱདྷཱརཎཀཐཱཡཾ སམྨཏེན ཨཔྤམཏྟཀཝིསྶཛྫཀེནཱཏི ཉཏྟིདུཏིཡཀམྨཝཱཙཱཡ ཝཱ ཨཔལོཀནཀམྨེན ཝཱ སམྨཏེན ཨཔྤམཏྟཀཝིསྶཛྫཀསམྨུཏིལདྡྷེན། ཨཝིབྷཏྟཾ སངྒྷིཀབྷཎྜནྟི པུཙྪིཏབྦཀིཙྩཾ ནཏྠཱིཏི ཨེཏྠ ཨཝིབྷཏྟཾ སངྒྷིཀབྷཎྜནྟི ཀུཀྐུཙྩུཔྤཏྟིཨཱཀཱརདསྶནཾ, ཨེཝཾ ཀུཀྐུཙྩཾ ཀཏྭཱ པུཙྪིཏབྦཀིཙྩཾ ནཏྠི, ཨཔུཙྪིཏྭཱཝ དཱཏབྦནྟི ཨདྷིཔྤཱཡོ། ཀསྨཱཏི ཙེ? ཨེཏྟཀསྶ སངྒྷིཀབྷཎྜསྶ ཝིསྶཛྫནཏྠཱཡེཝ སམགྒསྶ སངྒྷསྶ ཨནུམཏིཡཱ ཀཏསམྨུཏིཀམྨཏྟཱ། གུལ༹པིཎྜེ…པེ॰… དཱཏབྦོཏི ཨེཏྠ གུལ༹པིཎྜཾ ཏཱལཔཀྐཔྤམཱཎནྟི ཝེདིཏབྦཾ། པིཎྜཱཡ པཝིཊྛསྶཔཱིཏི ཨིདཾ ཨུཔལཀྑཎམཏྟཾ། ཨཉྙེན ཀཱརཎེན བཧིསཱིམགཏསྶཔི ཨེསེཝ ནཡོ། ཨོདནཔཊིཝཱིསོཏི སངྒྷབྷཏྟཱདིསངྒྷིཀཨོདནཔཊིཝཱིསོ། ཨནྟོཨུཔཙཱརསཱིམཱཡཾ ཋིཏསྶཱཏི ཨནཱདརེ སཱམིཝཙནཾ, ཨནྟོཨུཔཙཱརསཱིམཱཡཾ ཋིཏསྶེཝ གཱཧེཏུཾ ཝཊྚཏི, ན བཧིཨུཔཙཱརསཱིམཾ པཏྟསྶཱཏི ཨཏྠོ། ཝུཏྟཉྷེཏཾ ཨཊྛཀཐཱཡཾ (ཙཱུལ༹ཝ॰ ཨཊྛ॰ ༣༢༥) ‘‘བཧིཨུཔཙཱརསཱིམཱཡ ཋིཏཱནཾ གཱཧེཐཱཏི ཝདནྟི, ན གཱཧེཏབྦ’’ནྟི། ཨནྟོགཱམཊྛཱནམྤཱིཏི ཨེཏྠ པི-སདྡོ ཨཝུཏྟསམྤིཎྜནཏྠོ, ཨནྟོགཱམཊྛཱནམྤི བཧིགཱམཊྛཱནམྤི གཱཧེཏུཾ ཝཊྚཏཱིཏི ཨཏྠོ། སམྦྷཱཝནཏྠོ ཝཱ, ཏེན ཨནྟོགཱམཊྛཱནམྤི གཱཧེཏུཾ ཝཊྚཏི, པགེཝ བཧིགཱམཊྛཱནནྟི།

    225. Catupaccayasādhāraṇakathāyaṃ sammatena appamattakavissajjakenāti ñattidutiyakammavācāya vā apalokanakammena vā sammatena appamattakavissajjakasammutiladdhena. Avibhattaṃ saṅghikabhaṇḍanti pucchitabbakiccaṃ natthīti ettha avibhattaṃ saṅghikabhaṇḍanti kukkuccuppattiākāradassanaṃ, evaṃ kukkuccaṃ katvā pucchitabbakiccaṃ natthi, apucchitvāva dātabbanti adhippāyo. Kasmāti ce? Ettakassa saṅghikabhaṇḍassa vissajjanatthāyeva samaggassa saṅghassa anumatiyā katasammutikammattā. Guḷapiṇḍe…pe… dātabboti ettha guḷapiṇḍaṃ tālapakkappamāṇanti veditabbaṃ. Piṇḍāya paviṭṭhassapīti idaṃ upalakkhaṇamattaṃ. Aññena kāraṇena bahisīmagatassapi eseva nayo. Odanapaṭivīsoti saṅghabhattādisaṅghikaodanapaṭivīso. Antoupacārasīmāyaṃ ṭhitassāti anādare sāmivacanaṃ, antoupacārasīmāyaṃ ṭhitasseva gāhetuṃ vaṭṭati, na bahiupacārasīmaṃ pattassāti attho. Vuttañhetaṃ aṭṭhakathāyaṃ (cūḷava. aṭṭha. 325) ‘‘bahiupacārasīmāya ṭhitānaṃ gāhethāti vadanti, na gāhetabba’’nti. Antogāmaṭṭhānampīti ettha pi-saddo avuttasampiṇḍanattho, antogāmaṭṭhānampi bahigāmaṭṭhānampi gāhetuṃ vaṭṭatīti attho. Sambhāvanattho vā, tena antogāmaṭṭhānampi gāhetuṃ vaṭṭati, pageva bahigāmaṭṭhānanti.

    ཙཏུཔཙྩཡསཱདྷཱརཎཀཐཱཝཎྞནཱ ནིཊྛིཏཱ།

    Catupaccayasādhāraṇakathāvaṇṇanā niṭṭhitā.

    ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

    Iti vinayasaṅgahasaṃvaṇṇanābhūte vinayālaṅkāre

    ཙཏུཔཙྩཡབྷཱཛནཱིཡཝིནིཙྪཡཀཐཱལངྐཱརོ ནཱམ

    Catupaccayabhājanīyavinicchayakathālaṅkāro nāma

    ཨཊྛཝཱིསཏིམོ པརིཙྪེདོ།

    Aṭṭhavīsatimo paricchedo.

    ཝིཧཱརཝིནིཙྪཡཀཐཱཝཎྞནཱ

    Vihāravinicchayakathāvaṇṇanā

    ཨིདཱནི ཙཏུཔཙྩཡནྟོགདྷཏྟཱ ཝིཧཱརསྶ ཙཏུཔཙྩཡབྷཱཛནཀཐཱནནྟརཾ ཝིཧཱརཝིནིཙྪཡཀཐཱ ཨཱརབྷཱིཡཏེ། ཏཏྲིདཾ ཝུཙྩཏི –

    Idāni catupaccayantogadhattā vihārassa catupaccayabhājanakathānantaraṃ vihāravinicchayakathā ārabhīyate. Tatridaṃ vuccati –

    ‘‘ཀོ ཝིཧཱརོ ཀེནཊྛེན།

    ‘‘Ko vihāro kenaṭṭhena;

    ཝིཧཱརོ སོ ཀཏིཝིདྷོ།

    Vihāro so katividho;

    ཀེན སོ ཀསྶ དཱཏབྦོ།

    Kena so kassa dātabbo;

    ཀཐཾ ཀོ ཏསྶ ཨིསྶརོ༎

    Kathaṃ ko tassa issaro.

    ‘‘ཀེན སོ གཱཧིཏོ ཀསྶ།

    ‘‘Kena so gāhito kassa;

    ཨནུཊྛཱཔནིཡཱ ཀཏི།

    Anuṭṭhāpaniyā kati;

    ཀཏིཧངྒེཧི ཡུཏྟསྶ།

    Katihaṅgehi yuttassa;

    དྷུཝཝཱསཱཡ དཱིཡཏེ’’ཏི༎

    Dhuvavāsāya dīyate’’ti.

    ཏཏྠ ཀོ ཝིཧཱརོཏི ཙཏཱུསུ པཙྩཡེསུ སེནཱསནསངྑཱཏོ ཙཏཱུསུ སེནཱསནེསུ ཝིཧཱརསེནཱསནསངྑཱཏོ བྷིཀྑཱུནཾ ནིཝཱསབྷཱུཏོ པཏིསྶཡཝིསེསོ། ཀེནཊྛེན ཝིཧཱརོཏི ཝིཧརནྟི ཨེཏྠཱཏི ཝིཧཱརོ, ཨིརིཡཱཔཐདིབྦབྲཧྨཨརིཡསངྑཱཏེཧི ཙཏཱུཧི ཝིཧཱརེཧི ཨརིཡཱ ཨེཏྠ ཝིཧརནྟཱིཏྱཏྠོ། སོ ཀཏིཝིདྷོཏི སངྒྷིཀཝིཧཱརགཎསནྟཀཝིཧཱརཔུགྒལིཀཝིཧཱརཝསེན ཏིབྦིདྷོ། ཝུཏྟཉྷེཏཾ སམནྟཔཱསཱདིཀཱཡཾ ‘‘ཙཱཏུདྡིསཾ སངྒྷཾ ཨུདྡིསྶ བྷིཀྑཱུནཾ དིནྣཾ ཝིཧཱརཾ ཝཱ པརིཝེཎཾ ཝཱ ཨཱཝཱསཾ ཝཱ མཧནྟམྤི ཁུདྡཀམྤི ཨབྷིཡུཉྫཏོ ཨབྷིཡོགོ ན རུཧཏི, ཨཙྪིནྡིཏྭཱ གཎྷིཏུམྤི ན སཀྐོཏི། ཀསྨཱ? སབྦེསཾ དྷུརནིཀྑེཔཱབྷཱཝཏོ། ན ཧེཏྠ སབྦེ ཙཱཏུདྡིསཱ བྷིཀྑཱུ དྷུརནིཀྑེཔཾ ཀརོནྟཱིཏི། དཱིགྷབྷཱཎཀཱདིབྷེདསྶ པན གཎསྶ, ཨེཀཔུགྒལསྶ ཝཱ སནྟཀཾ ཨབྷིཡུཉྫིཏྭཱ གཎྷནྟོ སཀྐོཏི ཏེ དྷུརཾ ནིཀྑིཔཱཔེཏུཾ, ཏསྨཱ ཏཏྠ ཨཱརཱམེ ཝུཏྟནཡེནེཝ ཝིནིཙྪཡོ ཝེདིཏབྦོ’’ཏི། ཨིམིནཱ དཱཡཀསནྟཀོ ཝིཧཱརོ ནཱམ ནཏྠཱིཏི དཱིཔེཏི།

    Tattha ko vihāroti catūsu paccayesu senāsanasaṅkhāto catūsu senāsanesu vihārasenāsanasaṅkhāto bhikkhūnaṃ nivāsabhūto patissayaviseso. Kenaṭṭhena vihāroti viharanti etthāti vihāro, iriyāpathadibbabrahmaariyasaṅkhātehi catūhi vihārehi ariyā ettha viharantītyattho. So katividhoti saṅghikavihāragaṇasantakavihārapuggalikavihāravasena tibbidho. Vuttañhetaṃ samantapāsādikāyaṃ ‘‘cātuddisaṃ saṅghaṃ uddissa bhikkhūnaṃ dinnaṃ vihāraṃ vā pariveṇaṃ vā āvāsaṃ vā mahantampi khuddakampi abhiyuñjato abhiyogo na ruhati, acchinditvā gaṇhitumpi na sakkoti. Kasmā? Sabbesaṃ dhuranikkhepābhāvato. Na hettha sabbe cātuddisā bhikkhū dhuranikkhepaṃ karontīti. Dīghabhāṇakādibhedassa pana gaṇassa, ekapuggalassa vā santakaṃ abhiyuñjitvā gaṇhanto sakkoti te dhuraṃ nikkhipāpetuṃ, tasmā tattha ārāme vuttanayeneva vinicchayo veditabbo’’ti. Iminā dāyakasantako vihāro nāma natthīti dīpeti.

    ཀེན སོ དཱཏབྦོཏི ཁཏྟིཡེན ཝཱ བྲཱཧྨཎེན ཝཱ ཡེན ཀེནཙི སོ ཝིཧཱརོ དཱཏབྦོ། ཀསྶ དཱཏབྦོཏི སངྒྷསྶ ཝཱ གཎསྶ ཝཱ པུགྒལསྶ ཝཱ དཱཏབྦོ། ཀཐཾ དཱཏབྦོཏི ཡདི སངྒྷསྶ དེཏི, ‘‘ཨིམཾ ཝིཧཱརཾ ཨཱགཏཱནཱགཏསྶ ཙཱཏུདྡིསསྶ སངྒྷསྶ དམྨཱི’’ཏི, ཡདི གཎསྶ, ‘‘ཨིམཾ ཝིཧཱརཾ ཨཱཡསྨནྟཱནཾ དམྨཱི’’ཏི, ཡདི པུགྒལསྶ, ‘‘ཨིམཾ ཝིཧཱརཾ ཨཱཡསྨཏོ དམྨཱི’’ཏི དཱཏབྦོ། ཀོ ཏསྶ ཨིསྶརོཏི ཡདི སངྒྷསྶ དེཏི, སངྒྷོ ཏསྶ ཝིཧཱརསྶ ཨིསྶརོ། ཡདི གཎསྶ དེཏི, གཎོ ཏསྶ ཨིསྶརོ། ཡདི པུགྒལསྶ དེཏི, པུགྒལོ ཏསྶ ཨིསྶརོཏི། ཏཐཱ ཧི ཝུཏྟཾ ཨཊྛཀཐཱཡཾ ‘‘དཱིགྷབྷཱཎཀཱདིཀསྶ པན གཎསྶ ཨེཀཔུགྒལསྶ ཝཱ སནྟཀ’’ནྟི།

    Kena so dātabboti khattiyena vā brāhmaṇena vā yena kenaci so vihāro dātabbo. Kassa dātabboti saṅghassa vā gaṇassa vā puggalassa vā dātabbo. Kathaṃ dātabboti yadi saṅghassa deti, ‘‘imaṃ vihāraṃ āgatānāgatassa cātuddisassa saṅghassa dammī’’ti, yadi gaṇassa, ‘‘imaṃ vihāraṃ āyasmantānaṃ dammī’’ti, yadi puggalassa, ‘‘imaṃ vihāraṃ āyasmato dammī’’ti dātabbo. Ko tassa issaroti yadi saṅghassa deti, saṅgho tassa vihārassa issaro. Yadi gaṇassa deti, gaṇo tassa issaro. Yadi puggalassa deti, puggalo tassa issaroti. Tathā hi vuttaṃ aṭṭhakathāyaṃ ‘‘dīghabhāṇakādikassa pana gaṇassa ekapuggalassa vā santaka’’nti.

    ཀེན སོ གཱཧིཏོཏི སེནཱསནགྒཱཧཱཔཀེན སོ ཝིཧཱརོ གཱཧིཏོ། ཝུཏྟཉྷེཏཾ བྷགཝཏཱ ‘‘ཨནུཛཱནཱམི, བྷིཀྑཝེ, པཉྩཧངྒེཧི སམནྣཱགཏཾ སེནཱསནགྒཱཧཱཔཀཾ སམྨནྣིཏུཾ, ཡོ ན ཚནྡཱགཏིཾ གཙྪེཡྻ, ན དོསཱགཏིཾ གཙྪེཡྻ, ན མོཧཱགཏིཾ གཙྪེཡྻ, ཨེཝཉྩ, བྷིཀྑཝེ, སམྨནྣིཏབྦོ, པཋམཾ བྷིཀྑུ ཡཱཙིཏབྦོ, ཡཱཙིཏྭཱ བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –

    Kena so gāhitoti senāsanaggāhāpakena so vihāro gāhito. Vuttañhetaṃ bhagavatā ‘‘anujānāmi, bhikkhave, pañcahaṅgehi samannāgataṃ senāsanaggāhāpakaṃ sammannituṃ, yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, evañca, bhikkhave, sammannitabbo, paṭhamaṃ bhikkhu yācitabbo, yācitvā byattena bhikkhunā paṭibalena saṅgho ñāpetabbo –

    ‘‘སུཎཱཏུ མེ, བྷནྟེ, སངྒྷོ, ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམཾ བྷིཀྑུཾ སེནཱསནགྒཱཧཱཔཀཾ སམྨནྣེཡྻ, ཨེསཱ ཉཏྟི།

    ‘‘Suṇātu me, bhante, saṅgho, yadi saṅghassa pattakallaṃ, saṅgho itthannāmaṃ bhikkhuṃ senāsanaggāhāpakaṃ sammanneyya, esā ñatti.

    ‘‘སུཎཱཏུ མེ, བྷནྟེ, སངྒྷོ, སངྒྷོ ཨིཏྠནྣཱམཾ བྷིཀྑུཾ སེནཱསནགྒཱཧཱཔཀཾ སམྨནྣཏི། ཡསྶཱཡསྨཏོ ཁམཏི ཨིཏྠནྣཱམསྶ བྷིཀྑུནོ སེནཱསནགྒཱཧཱཔཀསྶ སམྨུཏི, སོ ཏུཎྷསྶ། ཡསྶ ནཀྑམཏི, སོ བྷཱསེཡྻ།

    ‘‘Suṇātu me, bhante, saṅgho, saṅgho itthannāmaṃ bhikkhuṃ senāsanaggāhāpakaṃ sammannati. Yassāyasmato khamati itthannāmassa bhikkhuno senāsanaggāhāpakassa sammuti, so tuṇhassa. Yassa nakkhamati, so bhāseyya.

    ‘‘སམྨཏོ སངྒྷེན ཨིཏྠནྣཱམོ བྷིཀྑུ སེནཱསནགྒཱཧཱཔཀོ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི (ཙཱུལ༹ཝ॰ ༣༡༧)།

    ‘‘Sammato saṅghena itthannāmo bhikkhu senāsanaggāhāpako, khamati saṅghassa, tasmā tuṇhī, evametaṃ dhārayāmī’’ti (cūḷava. 317).

    ཀསྶ སོ གཱཧིཏོཏི བྷིཀྑཱུནཾ སོ ཝིཧཱརོ གཱཧིཏོ། ཝུཏྟཉྷེཏཾ བྷགཝཏཱ ‘‘ཨནུཛཱནཱམི, བྷིཀྑཝེ, པཋམཾ བྷིཀྑཱུ གཎེཏུཾ, བྷིཀྑཱུ གཎེཏྭཱ སེཡྻཱ གཎེཏུཾ, སེཡྻཱ གཎེཏྭཱ སེཡྻགྒེན གཱཧེཏུ’’ནྟི (ཙཱུལ༹ཝ॰ ༣༡༨)། ཨནུཊྛཱཔནིཡཱ ཀཏཱིཏི ཙཏྟཱརོ ཨནུཊྛཱཔནཱིཡཱ ཝུཌྜྷཏརོ གིལཱནོ བྷཎྜཱགཱརིཀོ སངྒྷཏོ ལདྡྷསེནཱསནོཏི། ཝུཏྟཉྷེཏཾ ཀངྑཱཝིཏརཎིཡཾ (ཀངཁཱ॰ ཨཊྛ॰ ཨནུཔཁཛྫསིཀྑཱཔདཝཎྞནཱ) ‘‘ཝུཌྜྷོ ཧི ཨཏྟནོ ཝུཌྜྷཏཱཡ ཨནུཊྛཱཔནཱིཡོ , གིལཱནོ གིལཱནཏཱཡ, སངྒྷོ པན བྷཎྜཱགཱརིཀསྶ ཝཱ དྷམྨཀཐིཀཝིནཡདྷརགཎཝཱཙཀཱཙརིཡཱནཾ ཝཱ བཧཱུཔཀཱརཏཾ གུཎཝིསིཊྛཏཉྩ སལླཀྑེཏྭཱ དྷུཝཝཱསཏྠཱཡ ཝིཧཱརཾ སལླཀྑེཏྭཱ སམྨནྣིཏྭཱ དེཏི, ཏསྨཱ ཡསྶ སངྒྷེན དིནྣོ, སོཔི ཨནུཊྛཱཔནཱིཡོ’’ཏི།

    Kassa so gāhitoti bhikkhūnaṃ so vihāro gāhito. Vuttañhetaṃ bhagavatā ‘‘anujānāmi, bhikkhave, paṭhamaṃ bhikkhū gaṇetuṃ, bhikkhū gaṇetvā seyyā gaṇetuṃ, seyyā gaṇetvā seyyaggena gāhetu’’nti (cūḷava. 318). Anuṭṭhāpaniyā katīti cattāro anuṭṭhāpanīyā vuḍḍhataro gilāno bhaṇḍāgāriko saṅghato laddhasenāsanoti. Vuttañhetaṃ kaṅkhāvitaraṇiyaṃ (kaṅakhā. aṭṭha. anupakhajjasikkhāpadavaṇṇanā) ‘‘vuḍḍho hi attano vuḍḍhatāya anuṭṭhāpanīyo , gilāno gilānatāya, saṅgho pana bhaṇḍāgārikassa vā dhammakathikavinayadharagaṇavācakācariyānaṃ vā bahūpakārataṃ guṇavisiṭṭhatañca sallakkhetvā dhuvavāsatthāya vihāraṃ sallakkhetvā sammannitvā deti, tasmā yassa saṅghena dinno, sopi anuṭṭhāpanīyo’’ti.

    ཀཏིཧངྒེཧི ཡུཏྟསྶ དྷུཝཝཱསཱཡ དཱིཡཏེཏི ཨུཀྐཊྛཔརིཙྪེདེན དྭཱིཧི ཨངྒེཧི ཡུཏྟསྶ དྷུཝཝཱསཏྠཱཡ ཝིཧཱརོ དཱིཡཏེ། ཀཏམེཧི དྭཱིཧི? བཧཱུཔཀཱརཏཱཡ གུཎཝིསིཊྛཏཱཡ ཙེཏི། ཀཐཾ ཝིཉྙཱཡཏཱིཏི ཙེ? ‘‘བཧཱུཔཀཱརཏནྟི བྷཎྜཱགཱརིཀཏཱདིབཧུཨུཔཀཱརབྷཱཝཾ, ན ཀེཝལཾ ཨིདམེཝཱཏི ཨཱཧ ‘གུཎཝིསིཊྛཏཉྩཱ’ཏི། ཏེན བཧཱུཔཀཱརཏྟེཔི གུཎཝིསིཊྛཏྟཱབྷཱཝེ གུཎཝིསིཊྛཏྟེཔི བཧཱུཔཀཱརཏྟཱབྷཱཝེ དཱཏུཾ ཝཊྚཏཱིཏི དསྶེཏཱི’’ཏི ཝིནཡཏྠམཉྫཱུསཱཡཾ (ཀངཁཱ॰ ཨབྷི॰ ཊཱི॰ ཨནུཔཁཛྫསིཀྑཱཔདཝཎྞནཱ) ཝཙནཏོ། ཨོམཀཔརིཙྪེདེན ཨེཀེན ཨངྒེན ཡུཏྟསྶཔི། ཀཏམེན ཨེཀེན ཨངྒེན? བཧཱུཔཀཱརཏཱཡ ཝཱ གུཎཝིསིཊྛཏཱཡ ཝཱ། ཀཐཾ ཝིཉྙཱཡཏཱིཏི ཙེ? ‘‘བཧཱུཔཀཱརཏཾ གུཎཝིསིཊྛཏཉྩ སལླཀྑེནྟོཏི བྷཎྜཱགཱརིཀསྶ བཧཱུཔཀཱརཏཾ, དྷམྨཀཐིཀཱདཱིནཾ གུཎཝིསིཊྛཏཉྩ སལླཀྑེནྟོ’’ཏི སཱརཏྠདཱིཔནིཡཾ (སཱརཏྠ॰ ཊཱི॰ པཱཙིཏྟིཡ ༣.༡༡༩-༡༢༡) ཝཙནཏོ།

    Katihaṅgehi yuttassa dhuvavāsāya dīyateti ukkaṭṭhaparicchedena dvīhi aṅgehi yuttassa dhuvavāsatthāya vihāro dīyate. Katamehi dvīhi? Bahūpakāratāya guṇavisiṭṭhatāya ceti. Kathaṃ viññāyatīti ce? ‘‘Bahūpakāratanti bhaṇḍāgārikatādibahuupakārabhāvaṃ, na kevalaṃ idamevāti āha ‘guṇavisiṭṭhatañcā’ti. Tena bahūpakārattepi guṇavisiṭṭhattābhāve guṇavisiṭṭhattepi bahūpakārattābhāve dātuṃ vaṭṭatīti dassetī’’ti vinayatthamañjūsāyaṃ (kaṅakhā. abhi. ṭī. anupakhajjasikkhāpadavaṇṇanā) vacanato. Omakaparicchedena ekena aṅgena yuttassapi. Katamena ekena aṅgena? Bahūpakāratāya vā guṇavisiṭṭhatāya vā. Kathaṃ viññāyatīti ce? ‘‘Bahūpakārataṃ guṇavisiṭṭhatañca sallakkhentoti bhaṇḍāgārikassa bahūpakārataṃ, dhammakathikādīnaṃ guṇavisiṭṭhatañca sallakkhento’’ti sāratthadīpaniyaṃ (sārattha. ṭī. pācittiya 3.119-121) vacanato.

    སེནཱསནགྒཱཧོ པན དུཝིདྷོ ཨུཏུཀཱལེ ཙ ཝསྶཱཝཱསེ ཙཱཏི ཀཱལཝསེན། ཨཐ ཝཱ ཏཡོ སེནཱསནགྒཱཧཱ པུརིམཀོ པཙྪིམཀོ ཨནྟརཱམུཏྟཀོཏི། ཏེསཾ ཝིསེསོ ཧེཊྛཱ ཝུཏྟོཝ། ‘‘ཨུཏུཀཱལེ སེནཱསནགྒཱཧོ ཨནྟརཱམུཏྟཀོ ཙ ཏངྑཎཔཊིསལླཱནོ ཙཱཏི དུབྦིདྷོ། ཝསྶཱཝཱསེ སེནཱསནགྒཱཧོ པུརིམཀོ ཙ པཙྪིམཀོ ཙཱཏི དུབྦིདྷོཏི ཙཏྟཱརོ སེནཱསནགྒཱཧཱ’’ཏི ཨཱཙརིཡཱ ཝདནྟི, ཏཾ ཝཙནཾ པཱལི༹ཡམྤི ཨཊྛཀཐཱཡམྤི ན ཨཱགཏཾ ། པཱལི༹ཡཾ (ཙཱུལ༹ཝ॰ ༣༡༨) པན ‘‘ཏཡོམེ, བྷིཀྑཝེ, སེནཱསནགྒཱཧཱ པུརིམཀོ པཙྪིམཀོ ཨནྟརཱམུཏྟཀོ’’ཨིཙྩེཝ ཨཱགཏོ, ཨཊྛཀཐཱཡམྤི (ཙཱུལ༹ཝ॰ ཨཊྛ॰ ༣༡༨) ‘‘ཏཱིསུ སེནཱསནགྒཱཧེསུ པུརིམཀོ ཙ པཙྪིམཀོ ཙཱཏི ཨིམེ དྭེ གཱཧཱ ཐཱཝརཱ, ཨནྟརཱམུཏྟཀེ ཨཡཾ ཝིནིཙྪཡོ’’ཏི ཨཱགཏོ།

    Senāsanaggāho pana duvidho utukāle ca vassāvāse cāti kālavasena. Atha vā tayo senāsanaggāhā purimako pacchimako antarāmuttakoti. Tesaṃ viseso heṭṭhā vuttova. ‘‘Utukāle senāsanaggāho antarāmuttako ca taṅkhaṇapaṭisallāno cāti dubbidho. Vassāvāse senāsanaggāho purimako ca pacchimako cāti dubbidhoti cattāro senāsanaggāhā’’ti ācariyā vadanti, taṃ vacanaṃ pāḷiyampi aṭṭhakathāyampi na āgataṃ . Pāḷiyaṃ (cūḷava. 318) pana ‘‘tayome, bhikkhave, senāsanaggāhā purimako pacchimako antarāmuttako’’icceva āgato, aṭṭhakathāyampi (cūḷava. aṭṭha. 318) ‘‘tīsu senāsanaggāhesu purimako ca pacchimako cāti ime dve gāhā thāvarā, antarāmuttake ayaṃ vinicchayo’’ti āgato.

    ཨིདཱནི པན ཨེཀཙྩེ ཨཱཙརིཡཱ ‘‘ཨིམསྨིཾ ཀཱལེ སབྦེ ཝིཧཱརཱ སངྒྷིཀཱཝ, པུགྒལིཀཝིཧཱརོ ནཱམ ནཏྠི། ཀསྨཱ? ཝིཧཱརདཱཡཀཱནཾ ཝིཧཱརདཱནཀཱལེ ཀུལཱུཔཀཱ ‘ཨིམཾ ཝིཧཱརཾ ཨཱགཏཱནཱགཏསྶ ཙཱཏུདྡིསསྶ སངྒྷསྶ དེམཱ’ཏི ཝཙཱིབྷེདཾ ཀཱརཱཔེནྟི, ཏསྨཱ ནཝཝིཧཱརཱཔི སངྒྷིཀཱ ཨེཝ། ཨེཀཙྩེསུ ཝིཧཱརེསུ ཨེཝཾ ཨཝཏྭཱ དེནྟེསུཔི ‘ཏསྨིཾ ཛཱིཝནྟེ པུགྒལིཀོ ཧོཏི, མཏེ སངྒྷིཀོཡེཝཱ’ཏི ཝུཏྟཏྟཱ པོརཱཎཀཝིཧཱརཱཔི སངྒྷིཀཱཝ ཧོནྟཱི’’ཏི ཝདནྟི། ཏཏྲེཝཾ ཝིཙཱརེཏབྦོ – ཝཙཱིབྷེདཾ ཀཱརཱཔེཏྭཱ དིནྣཝིཧཱརེསུཔི དཱཡཀཱ སངྒྷཾ ཨུདྡིསྶ ཀརོནྟཱ ནཱམ ཨཔྤཀཱ, ‘‘ཨིམཾ ནཱམ བྷིཀྑུཾ ཨིམཾ ནཱམ ཐེརཾ ཝསཱཔེསྶཱམཱི’’ཏི ཙིནྟེཏྭཱ པུཏྟདཱརམིཏྟཱམཙྩཱདཱིཧི སམྨནྟེཏྭཱ པཏིཊྛཱཔེནྟི, པཏིཊྛཱནཀཱལེ ཨཝདནྟཱཔི དཱནཀཱལེ ཡེབྷུཡྻེན ཝདནྟི། ཨཐ པན ཀུལཱུཔཀཱ དཱནཀཱལེ སིཀྑཱཔེཏྭཱ ཝདཱཔེནྟི, ཨེཝཾ ཝདནྟཱཔི དཱཡཀཱ ཨཔྤཀཱ སངྒྷཾ ཨུདྡིསྶ དེནྟི, བཧུཏརཱ ཨཏྟནོ ཀུལཱུཔཀམེཝ ཨུདྡིསྶ དེནྟི། ཨེཝཾ སནྟེ ཀུལཱུཔཀཱནཾ ཝཙནཾ ནཝསུ ཨདྷམྨིཀདཱནེསུ ‘‘པུགྒལསྶ པརིཎཏཾ སངྒྷསྶ པརིཎཱམེཏཱི’’ཏི (པཱརཱ॰ ༦༦༠; པཱཙི॰ ༤༩༢) ཝུཏྟཾ ཨེཀཾ ཨདྷམྨིཀདཱནཾ ཨཱཔཛྫཏི། ‘‘ཏསྨིཾ ཛཱིཝནྟེ པུགྒལིཀོ, མཏེ སངྒྷིཀོ’’ཏི ཨཡཾ པཱཋོ མཱུལཔུགྒལིཀཝིསཡེ ན ཨཱགཏོ, མཱུལསངྒྷིཀཝིཧཱརཾ ཛགྒཱཔེཏུཾ པུགྒལིཀཀཱརཱཔནཊྛཱནེ ཨཱགཏོ, ཏསྨཱ ནཝཝིཧཱརཱཔི པུགྒལཾ ཨུདྡིསྶ དིནྣཱ སནྟིཡེཝ། པོརཱཎཀཝིཧཱརཱཔི མཱུལེ པུགྒལིཀཝསེན དིནྣཱ སདྡྷིཝིཧཱརིཀཱདཱིནཾ པུགྒལིཀཝསེནེཝ དཱིཡམཱནཱཔི ཏསྨིཾ ཛཱིཝནྟེཡེཝ ཝིསྶཱསཝསེན གཡ྄ཧམཱནཱཔི པུགྒལིཀཱ ཧོནྟིཡེཝ, ཏསྨཱ སབྦསོ པུགྒལིཀཝིཧཱརསྶ ཨབྷཱཝཝཱདོ ཝིཙཱརེཏབྦོཝ།

    Idāni pana ekacce ācariyā ‘‘imasmiṃ kāle sabbe vihārā saṅghikāva, puggalikavihāro nāma natthi. Kasmā? Vihāradāyakānaṃ vihāradānakāle kulūpakā ‘imaṃ vihāraṃ āgatānāgatassa cātuddisassa saṅghassa demā’ti vacībhedaṃ kārāpenti, tasmā navavihārāpi saṅghikā eva. Ekaccesu vihāresu evaṃ avatvā dentesupi ‘tasmiṃ jīvante puggaliko hoti, mate saṅghikoyevā’ti vuttattā porāṇakavihārāpi saṅghikāva hontī’’ti vadanti. Tatrevaṃ vicāretabbo – vacībhedaṃ kārāpetvā dinnavihāresupi dāyakā saṅghaṃ uddissa karontā nāma appakā, ‘‘imaṃ nāma bhikkhuṃ imaṃ nāma theraṃ vasāpessāmī’’ti cintetvā puttadāramittāmaccādīhi sammantetvā patiṭṭhāpenti, patiṭṭhānakāle avadantāpi dānakāle yebhuyyena vadanti. Atha pana kulūpakā dānakāle sikkhāpetvā vadāpenti, evaṃ vadantāpi dāyakā appakā saṅghaṃ uddissa denti, bahutarā attano kulūpakameva uddissa denti. Evaṃ sante kulūpakānaṃ vacanaṃ navasu adhammikadānesu ‘‘puggalassa pariṇataṃ saṅghassa pariṇāmetī’’ti (pārā. 660; pāci. 492) vuttaṃ ekaṃ adhammikadānaṃ āpajjati. ‘‘Tasmiṃ jīvante puggaliko, mate saṅghiko’’ti ayaṃ pāṭho mūlapuggalikavisaye na āgato, mūlasaṅghikavihāraṃ jaggāpetuṃ puggalikakārāpanaṭṭhāne āgato, tasmā navavihārāpi puggalaṃ uddissa dinnā santiyeva. Porāṇakavihārāpi mūle puggalikavasena dinnā saddhivihārikādīnaṃ puggalikavaseneva dīyamānāpi tasmiṃ jīvanteyeva vissāsavasena gayhamānāpi puggalikā hontiyeva, tasmā sabbaso puggalikavihārassa abhāvavādo vicāretabbova.

    ཨཉྙེ པན ཨཱཙརིཡཱ ‘‘ཨིམསྨིཾ ཀཱལེ སངྒྷིཀཝིཧཱརཱ ནཱམ ན སནྟི, སབྦེ པུགྒལིཀཱཝ། ཀསྨཱ? ནཝཝིཧཱརཱཔི པཏིཊྛཱཔནཀཱལེ དཱནཀཱལེ ཙ ཀུལཱུཔཀབྷིཀྑུཾཡེཝ ཨུདྡིསྶ ཀཏཏྟཱ པུགྒལིཀཱཝ, པོརཱཎཀཝིཧཱརཱཔི སིསྶཱནུསིསྶེཧི ཝཱ ཨཉྙེཧི ཝཱ པུགྒལེཧི ཨེཝ པརིགྒཧིཏཏྟཱ, ན ཀདཱཙི སངྒྷེན པརིགྒཧིཏཏྟཱ པུགྒལིཀཱཝ ཧོནྟི, ན སངྒྷིཀཱ’’ཏི ཝདནྟི། ཏཏྲཱཔྱེཝཾ ཝིཙཱརེཏབྦཾ – ནཝཝིཧཱརེཔི པཏིཊྛཱནཀཱལེཔི དཱནཀཱལེཔི ཨེཀཙྩེ སངྒྷཾ ཨུདྡིསྶ ཀརོནྟི, ཨེཀཙྩེ པུགྒལཾ། པུབྦེཝ པུགྒལཾ ཨུདྡིསྶ ཀཏེཔི ཨཏྠཀཱམཱནཾ པཎྜིཏཱནཾ ཝཙནཾ སུཏྭཱ པུགྒལིཀདཱནཏོ སངྒྷིཀདཱནམེཝ མཧཔྥལཏརནྟི སདྡཧིཏྭཱ སངྒྷིཀེ ཀརོནྟཱཔི དཱཡཀཱ སནྟི, པུགྒལིཀཝསེན པཊིགྒཧིཏེ པོརཱཎཀཝིཧཱརེཔི ཀེཙི བྷིཀྑཱུ མརཎཀཱལེ སངྒྷསྶ ནིཡྻཱཏེནྟི། ཀེཙི ཀསྶཙི ཨདཏྭཱ མརནྟི, ཏདཱ སོ ཝིཧཱརོ སངྒྷིཀོ ཧོཏི། སཝཏྠུཀམཧཱཝིཧཱརེ པན ཀརོནྟཱ རཱཛརཱཛམཧཱམཏྟཱདཡོ ‘‘པཉྩཝསྶསཧསྶཔརིམཱཎཾ སཱསནཾ ཡཱཝ ཏིཊྛཏི, ཏཱཝ མམ ཝིཧཱརེ ཝསིཏྭཱ སངྒྷོ ཙཏྟཱརོ པཙྩཡེ པརིབྷུཉྫཏཱུ’’ཏི པཎིདྷཱཡ ཙིརཀཱལཾ སངྒྷསྶ པཙྩཡུཔྤཱདཀརཾ གཱམཁེཏྟཱདིཀཾ ‘‘ཨམྷཱཀཾ ཝིཧཱརསྶ དེམཱ’’ཏི དེནྟི, ཝིཧཱརསྶཱཏི ཙ ཝིཧཱརེ ཝསནཀསངྒྷསྶ ཨུདྡིསྶ དེནྟི, ན ཀུལཱུཔཀབྷཱུཏསྶ ཨེཀཔུགྒལསྶ ཨེཝ, ཏསྨཱ ཡེབྷུཡྻེན སངྒྷིཀཱ དིསྶནྟི, པཱསཱཎེསུ ཨཀྑརཾ ལིཁིཏྭཱཔི ཋཔེནྟི, ཏསྨཱ སབྦསོ སངྒྷིཀཝིཧཱརཱབྷཱཝཝཱདོཔི ཝིཙཱརེཏབྦོཝ།

    Aññe pana ācariyā ‘‘imasmiṃ kāle saṅghikavihārā nāma na santi, sabbe puggalikāva. Kasmā? Navavihārāpi patiṭṭhāpanakāle dānakāle ca kulūpakabhikkhuṃyeva uddissa katattā puggalikāva, porāṇakavihārāpi sissānusissehi vā aññehi vā puggalehi eva pariggahitattā, na kadāci saṅghena pariggahitattā puggalikāva honti, na saṅghikā’’ti vadanti. Tatrāpyevaṃ vicāretabbaṃ – navavihārepi patiṭṭhānakālepi dānakālepi ekacce saṅghaṃ uddissa karonti, ekacce puggalaṃ. Pubbeva puggalaṃ uddissa katepi atthakāmānaṃ paṇḍitānaṃ vacanaṃ sutvā puggalikadānato saṅghikadānameva mahapphalataranti saddahitvā saṅghike karontāpi dāyakā santi, puggalikavasena paṭiggahite porāṇakavihārepi keci bhikkhū maraṇakāle saṅghassa niyyātenti. Keci kassaci adatvā maranti, tadā so vihāro saṅghiko hoti. Savatthukamahāvihāre pana karontā rājarājamahāmattādayo ‘‘pañcavassasahassaparimāṇaṃ sāsanaṃ yāva tiṭṭhati, tāva mama vihāre vasitvā saṅgho cattāro paccaye paribhuñjatū’’ti paṇidhāya cirakālaṃ saṅghassa paccayuppādakaraṃ gāmakhettādikaṃ ‘‘amhākaṃ vihārassa demā’’ti denti, vihārassāti ca vihāre vasanakasaṅghassa uddissa denti, na kulūpakabhūtassa ekapuggalassa eva, tasmā yebhuyyena saṅghikā dissanti, pāsāṇesu akkharaṃ likhitvāpi ṭhapenti, tasmā sabbaso saṅghikavihārābhāvavādopi vicāretabbova.

    ཨཔརེ པན ཨཱཙརིཡཱ ‘‘ཨིམསྨིཾ ཀཱལེ ཝིཧཱརདཱཡཀསནྟཀཱཝ, ཏསྨཱ དཱཡཀཱཡེཝ ཝིཙཱརེཏུཾ ཨིསྶརཱ, ན སངྒྷོ, ན པུགྒལོ། ཝིཧཱརདཱཡཀེ ཨསནྟེཔི ཏསྶ པུཏྟདྷཱིཏུནཏྟཔནཏྟཱདཡོ ཡཱཝ ཀུལཔརམྤརཱ ཏསྶ ཝིཧཱརསྶ ཨིསྶརཱཝ ཧོནྟི། ཀསྨཱཏི ཙེ? ‘ཡེན ཝིཧཱརོ ཀཱརིཏོ, སོ ཝིཧཱརསཱམིཀོ’ཏི (པཱཙི॰ ཨཊྛ॰ ༡༡༦) ཨཱགཏཏྟཱ ཙ ‘ཏསྶ ཝཱ ཀུལེ ཡོ ཀོཙི ཨཱཔུཙྪིཏབྦོ’ཏི (པཱཙི॰ ཨཊྛ॰ ༡༡༦) ཙ ཝཙནཏོ ཝིཧཱརསྶཱམིབྷཱུཏོ དཱཡཀོ ཝཱ ཏསྶ ཝཾསེ ཨུཔྤནྣོ ཝཱ ཝིཙཱརེཏུཾ ཨིསྶརོ། ‘པཙྪིནྣེ ཀུལཝཾསེ ཡོ ཏསྶ ཛནཔདསྶ སཱམིཀོ, སོ ཨཙྪིནྡིཏྭཱ པུན དེཏི ཙིཏྟལཔབྦཏེ བྷིཀྑུནཱ ནཱིཧཊཾ ཨུདཀཝཱཧཀཾ ཨལ༹ནཱགརཱཛམཧེསཱི ཝིཡ, ཨེཝམྤི ཝཊྚཏཱི’ཏི ཨཊྛཀཐཱཡཾ (པཱརཱ॰ ཨཊྛ॰ ༢.༥༣༨-༥༣༩) ཝཙནཏོ ཝིཧཱརདཱཡཀསྶ ཀུལཝཾསེ པཙྪིནྣེཔི ཏསྶ ཛནཔདསྶ ཨིསྶརོ རཱཛཱ ཝཱ རཱཛམཧཱམཏྟོ ཝཱ ཡོ ཀོཙི ཨིསྶརོ ཝཱ ཝིཧཱརཾ ཝིཙཱརེཏུཾ ཡཐཱཛ྄ཛྷཱསཡཾ དཱཏུཾ ཝཊྚཏཱི’’ཏི ཝདནྟི, ཏམྤི ཨཉྙེ པཎྜིཏཱ ནཱནུཛཱནནྟི།

    Apare pana ācariyā ‘‘imasmiṃ kāle vihāradāyakasantakāva, tasmā dāyakāyeva vicāretuṃ issarā, na saṅgho, na puggalo. Vihāradāyake asantepi tassa puttadhītunattapanattādayo yāva kulaparamparā tassa vihārassa issarāva honti. Kasmāti ce? ‘Yena vihāro kārito, so vihārasāmiko’ti (pāci. aṭṭha. 116) āgatattā ca ‘tassa vā kule yo koci āpucchitabbo’ti (pāci. aṭṭha. 116) ca vacanato vihārassāmibhūto dāyako vā tassa vaṃse uppanno vā vicāretuṃ issaro. ‘Pacchinne kulavaṃse yo tassa janapadassa sāmiko, so acchinditvā puna deti cittalapabbate bhikkhunā nīhaṭaṃ udakavāhakaṃ aḷanāgarājamahesī viya, evampi vaṭṭatī’ti aṭṭhakathāyaṃ (pārā. aṭṭha. 2.538-539) vacanato vihāradāyakassa kulavaṃse pacchinnepi tassa janapadassa issaro rājā vā rājamahāmatto vā yo koci issaro vā vihāraṃ vicāretuṃ yathājjhāsayaṃ dātuṃ vaṭṭatī’’ti vadanti, tampi aññe paṇḍitā nānujānanti.

    ཀཐཾ? ‘‘ཡེན ཝིཧཱརོ ཀཱརིཏོ, སོ ཝིཧཱརསཱམིཀོ’’ཏི ཝཙནཾ པུབྦཝོཧཱརཝསེན ཝུཏྟཾ, ན ཨིདཱནི ཨིསྶརཝསེན ཡཐཱ ཛེཏཝནཾ, པཏྟསྶཱམིཀོཏྱཱདི། ཡཐཱ ཧི ཛེཏསྶ རཱཛཀུམཱརསྶ ཝནཾ ཨུཡྻཱནཾ ཛེཏཝནནྟི ཝིགྒཧེ ཀཏེ ཡདིཔི ཨནཱཐཔིཎྜིཀེན ཀིཎིཏྭཱ ཝིཧཱརཔཏིཊྛཱཔནཀཱལཏོ པཊྛཱཡ རཱཛཀུམཱརོ ཏསྶ ཨུཡྻཱནསྶ ཨིསྶརོ ན ཧོཏི, ཏཐཱཔི ཨནཱཐཔིཎྜིཀེན ཀིཎིཏཀཱལཏོ པུབྦེ ཨིསྶརབྷཱུཏཔུབྦཏྟཱ པུབྦཝོཧཱརཝསེན སབྦདཱཔི ཛེཏཝནནྟྭེཝ ཝོཧརཱིཡཏི། ཡཐཱ ཙ པཏྟསྶ སཱམིཀོ པཏྟསྶཱམིཀོཏི ཝིགྒཧེ ཀཏེ ཡདིཔི དཱཡཀེཧི ཀིཎིཏྭཱ བྷིཀྑུསྶ དིནྣཀཱལཏོ པཊྛཱཡ ཀམྨཱརོ པཏྟསྶ ཨིསྶརོ ན ཧོཏི, ཏཐཱཔི དཱཡཀེན ཀིཎིཏཀཱལཏོ པུབྦེ ཨིསྶརབྷཱུཏཔུབྦཏྟཱ པུབྦཝོཧཱརཝསེན པཏྟསྶཱམིཀོཏྭེཝ ཝོཧརཱིཡཏི, ཨེཝཾ ཡདིཔི བྷིཀྑུསྶ དིནྣཀཱལཏོ པཊྛཱཡ དཱཡཀོ ཝིཧཱརསྶ ཨིསྶརོ ན ཧོཏི ཝཏྠུཔརིཙྩཱགལཀྑཎཏྟཱ དཱནསྶ, ཏཐཱཔི དཱནཀཱལཏོ པུབྦེ ཨིསྶརབྷཱུཏཔུབྦཏྟཱ པུབྦཝོཧཱརཝསེན ཝིཧཱརསྶཱམིཀོཏྭེཝ ཝོཧརཱིཡཏི, ན མུཁྱཏོ ཨིསྶརབྷཱཝཏོཏི ཝིཉྙཱཡཏི, ཏསྨཱ སངྒྷསྶ ཝཱ གཎསྶ ཝཱ པུགྒལསྶ ཝཱ དིནྣཀཱལཏོ པཊྛཱཡ སངྒྷཱདཡོ པཊིགྒཱཧཀཱ ཨེཝ ཝིཙཱརེཏུཾ ཨིསྶརཱ, ན དཱཡཀོ།

    Kathaṃ? ‘‘Yena vihāro kārito, so vihārasāmiko’’ti vacanaṃ pubbavohāravasena vuttaṃ, na idāni issaravasena yathā jetavanaṃ, pattassāmikotyādi. Yathā hi jetassa rājakumārassa vanaṃ uyyānaṃ jetavananti viggahe kate yadipi anāthapiṇḍikena kiṇitvā vihārapatiṭṭhāpanakālato paṭṭhāya rājakumāro tassa uyyānassa issaro na hoti, tathāpi anāthapiṇḍikena kiṇitakālato pubbe issarabhūtapubbattā pubbavohāravasena sabbadāpi jetavanantveva voharīyati. Yathā ca pattassa sāmiko pattassāmikoti viggahe kate yadipi dāyakehi kiṇitvā bhikkhussa dinnakālato paṭṭhāya kammāro pattassa issaro na hoti, tathāpi dāyakena kiṇitakālato pubbe issarabhūtapubbattā pubbavohāravasena pattassāmikotveva voharīyati, evaṃ yadipi bhikkhussa dinnakālato paṭṭhāya dāyako vihārassa issaro na hoti vatthupariccāgalakkhaṇattā dānassa, tathāpi dānakālato pubbe issarabhūtapubbattā pubbavohāravasena vihārassāmikotveva voharīyati, na mukhyato issarabhāvatoti viññāyati, tasmā saṅghassa vā gaṇassa vā puggalassa vā dinnakālato paṭṭhāya saṅghādayo paṭiggāhakā eva vicāretuṃ issarā, na dāyako.

    ཀཐཾ ཝིཉྙཱཡཏཱིཏི ཙེ? སནྟེསུཔི ཨནཱཐཔིཎྜིཀཱདཱིསུ ཝིཧཱརདཱཡཀེསུ ‘‘ཨནུཛཱནཱམི, བྷིཀྑཝེ, པཉྩཧངྒེཧི སམནྣཱགཏཾ བྷིཀྑུཾ སེནཱསནགྒཱཧཱཔཀཾ སམྨནྣིཏུ’’ནྟིཨཱདིནཱ (ཙཱུལ༹ཝ॰ ༣༡༧) སངྒྷེན སམྨཏཾ སེནཱསནགྒཱཧཱཔཀཾ ཨནུཛཱནིཏྭཱ, ‘‘ཨནུཛཱནཱམི, བྷིཀྑཝེ…པེ॰… སེཡྻགྒེན གཱཧེཏུ’’ནྟིཨཱདིནཱ (ཙཱུལ༹ཝ॰ ༣༡༨) སེནཱསནགྒཱཧཱཔཀསྶེཝ ཝིཙཱརེཏུཾ ཨིསྶརབྷཱཝསྶ ཝཙནཏོ ཙ ‘‘དྭེ བྷིཀྑཱུ སངྒྷིཀཾ བྷཱུམིཾ གཧེཏྭཱ སོདྷེཏྭཱ སངྒྷིཀཾ སེནཱསནཾ ཀརོནྟི, ཡེན སཱ བྷཱུམི པཋམཾ གཧིཏཱ, སོ སཱམཱི’’ཏི ཙ ‘‘ཨུབྷོཔི པུགྒལིཀཾ ཀརོནྟི, སོཡེཝ སཱམཱི’’ཏི ཙ ‘‘ཡོ པན སངྒྷིཀཾ ཝལླིམཏྟམྤི ཨགྒཧེཏྭཱ ཨཱཧརིམེན ཨུཔཀརཎེན སངྒྷིཀཱཡ བྷཱུམིཡཱ པུགྒལིཀཝིཧཱརཾ ཀཱརེཏི, ཨུཔཌྜྷཾ སངྒྷིཀཾ ཨུཔཌྜྷཾ པུགྒལིཀ’’ནྟི ཙ སངྒྷཔུགྒལཱནཾཡེཝ སཱམིབྷཱཝསྶ ཨཊྛཀཐཱཡཾ ཝུཏྟཏྟཱ ཙ ཝིཉྙཱཡཏི།

    Kathaṃ viññāyatīti ce? Santesupi anāthapiṇḍikādīsu vihāradāyakesu ‘‘anujānāmi, bhikkhave, pañcahaṅgehi samannāgataṃ bhikkhuṃ senāsanaggāhāpakaṃ sammannitu’’ntiādinā (cūḷava. 317) saṅghena sammataṃ senāsanaggāhāpakaṃ anujānitvā, ‘‘anujānāmi, bhikkhave…pe… seyyaggena gāhetu’’ntiādinā (cūḷava. 318) senāsanaggāhāpakasseva vicāretuṃ issarabhāvassa vacanato ca ‘‘dve bhikkhū saṅghikaṃ bhūmiṃ gahetvā sodhetvā saṅghikaṃ senāsanaṃ karonti, yena sā bhūmi paṭhamaṃ gahitā, so sāmī’’ti ca ‘‘ubhopi puggalikaṃ karonti, soyeva sāmī’’ti ca ‘‘yo pana saṅghikaṃ vallimattampi aggahetvā āharimena upakaraṇena saṅghikāya bhūmiyā puggalikavihāraṃ kāreti, upaḍḍhaṃ saṅghikaṃ upaḍḍhaṃ puggalika’’nti ca saṅghapuggalānaṃyeva sāmibhāvassa aṭṭhakathāyaṃ vuttattā ca viññāyati.

    ‘‘ཏསྶ ཝཱ ཀུལེ ཡོ ཀོཙི ཨཱཔུཙྪིཏབྦོ’’ཏི ཨཊྛཀཐཱཝཙནམྤི ཏེསཾ ཝིཧཱརསྶ ཨིསྶརབྷཱཝདཱིཔཀཾ ན ཧོཏི, ཨཐ ཁོ གམིཀོ བྷིཀྑུ དིསཾ གནྟུཀཱམོ ཝིཧཱརེ ཨཱཔུཙྪིཏབྦབྷིཀྑུསཱམཎེརཨཱརཱམིཀེསུ ཨསནྟེསུ ཏེ ཨཱཔུཙྪིཏྭཱ གནྟབྦབྷཱཝམེཝ དཱིཔེཏི། ཝུཏྟཉྷེཏཾ ཨཊྛཀཐཱཡཾ ‘‘ཨིམཾ པན དསཝིདྷམྤི སེཡྻཾ སངྒྷིཀེ ཝིཧཱརེ སནྠརིཏྭཱ ཝཱ སནྠརཱཔེཏྭཱ ཝཱ པཀྐམནྟེན ཨཱཔུཙྪིཏྭཱ པཀྐམིཏབྦཾ, ཨཱཔུཙྪནྟེན ཙ བྷིཀྑུམྷི སཏི བྷིཀྑུ ཨཱཔུཙྪིཏབྦོ…པེ॰… ཏསྨིཾ ཨསཏི ཨཱརཱམིཀོ, ཏསྨིམྤི ཨསཏི ཡེན ཝིཧཱརོ ཀཱརིཏོ, སོ ཝིཧཱརསྶཱམིཀོ, ཏསྶ ཝཱ ཀུལེ ཡོ ཀོཙི ཨཱཔུཙྪིཏབྦོ’’ཏི། ཨེཝཾ ཨཱརཱམིཀསྶཔི ཨཱཔུཙྪིཏབྦཏོ ཨོལོཀནཏྠཱཡ ཝཏྟསཱིསེནེཝ ཨཱཔུཙྪིཏབྦོ, ན ཏེསཾ སངྒྷིཀསེནཱསནསྶ ཨིསྶརབྷཱཝཏོཏི དཊྛབྦཾ།

    ‘‘Tassa vā kule yo koci āpucchitabbo’’ti aṭṭhakathāvacanampi tesaṃ vihārassa issarabhāvadīpakaṃ na hoti, atha kho gamiko bhikkhu disaṃ gantukāmo vihāre āpucchitabbabhikkhusāmaṇeraārāmikesu asantesu te āpucchitvā gantabbabhāvameva dīpeti. Vuttañhetaṃ aṭṭhakathāyaṃ ‘‘imaṃ pana dasavidhampi seyyaṃ saṅghike vihāre santharitvā vā santharāpetvā vā pakkamantena āpucchitvā pakkamitabbaṃ, āpucchantena ca bhikkhumhi sati bhikkhu āpucchitabbo…pe… tasmiṃ asati ārāmiko, tasmimpi asati yena vihāro kārito, so vihārassāmiko, tassa vā kule yo koci āpucchitabbo’’ti. Evaṃ ārāmikassapi āpucchitabbato olokanatthāya vattasīseneva āpucchitabbo, na tesaṃ saṅghikasenāsanassa issarabhāvatoti daṭṭhabbaṃ.

    ‘‘པཙྪིནྣེ ཀུལཝཾསེ’’ཏྱཱདིཝཙནཉྩ ཨཀཔྤིཡཝསེན ཀཏཱནཾ ཨཀཔྤིཡཝོཧཱརེན པཊིགྒཧིཏཱནཾ ཁེཏྟཝཏྠུཏལཱ༹ཀཱདཱིནཾ ཨཀཔྤིཡཏྟཱ བྷིཀྑཱུཧི པརིཙྩཏྟཱནཾ ཀཔྤིཡཀརཎཏྠཱཡ རཱཛཱདཱིཧི གཧེཏྭཱ པུན ཏེསཾཡེཝ བྷིཀྑཱུནཾ དཱནམེཝ དཱིཔེཏི, ན ཏེསཾ རཱཛཱདཱིནཾ ཏེཧི བྷིཀྑཱུཧི ཨཉྙེསཾ སངྒྷགཎཔུགྒལཙེཏིཡཱནཾ དཱནཾ། ཡདི དདེཡྻུཾ, ཨདྷམྨིཀདཱནཨདྷམྨིཀཔཨགྒཧཨདྷམྨིཀཔརིབྷོགཱ སིཡུཾ། ཝུཏྟཉྷེཏཾ པརིཝཱརེ (པརི॰ ཨཊྛ॰ ༣༢༩) ‘‘ནཝ ཨདྷམྨིཀཱནི དཱནཱནི སངྒྷསྶ པརིཎཏཾ ཨཉྙསངྒྷསྶ ཝཱ ཙེཏིཡསྶ ཝཱ པུགྒལསྶ ཝཱ པརིཎཱམེཏི, ཙེཏིཡསྶ པརིཎཏཾ ཨཉྙཙེཏིཡསྶ ཝཱ སངྒྷསྶ ཝཱ པུགྒལསྶ ཝཱ པརིཎཱམེཏི, པུགྒལསྶ པརིཎཏཾ ཨཉྙཔུགྒལསྶ ཝཱ སངྒྷསྶ ཝཱ ཙེཏིཡསྶ ཝཱ པརིཎཱམེཏཱི’’ཏི། ཨཊྛཀཐཱཡཉྩ (པརི॰ ཨཊྛ॰ ༣༢༩) ‘‘ནཝ ཨདྷམྨིཀཱནི དཱནཱནཱིཏི…པེ॰… ཨེཝཾ ཝུཏྟཱནི། ནཝ པཊིགྒཧཔརིབྷོགཱཏི ཨེཏེསཾཡེཝ དཱནཱནཾ པཊིགྒཧཱ ཙ པརིབྷོགཱ ཙཱ’’ཏི ཝུཏྟཾ། ཏསྨཱ ཡདི རཱཛཱདཡོ ཨིསྶརཱཏི གཧེཏྭཱ ཨཉྙསྶ དེཡྻུཾ, ཏམྤི དཱནཾ ཨདྷམྨིཀདཱནཾ ཧོཏི, ཏཾ དཱནཾ པཊིགྒཧཱ ཙ ཨདྷམྨིཀཔཊིགྒཧཱ ཧོནྟི, ཏཾ དཱནཾ པརིབྷུཉྫནྟཱ ཙ ཨདྷམྨིཀཔརིབྷོགཱ ཧོནྟཱིཏི དཊྛབྦཾ།

    ‘‘Pacchinne kulavaṃse’’tyādivacanañca akappiyavasena katānaṃ akappiyavohārena paṭiggahitānaṃ khettavatthutaḷākādīnaṃ akappiyattā bhikkhūhi pariccattānaṃ kappiyakaraṇatthāya rājādīhi gahetvā puna tesaṃyeva bhikkhūnaṃ dānameva dīpeti, na tesaṃ rājādīnaṃ tehi bhikkhūhi aññesaṃ saṅghagaṇapuggalacetiyānaṃ dānaṃ. Yadi dadeyyuṃ, adhammikadānaadhammikapaaggahaadhammikaparibhogā siyuṃ. Vuttañhetaṃ parivāre (pari. aṭṭha. 329) ‘‘nava adhammikāni dānāni saṅghassa pariṇataṃ aññasaṅghassa vā cetiyassa vā puggalassa vā pariṇāmeti, cetiyassa pariṇataṃ aññacetiyassa vā saṅghassa vā puggalassa vā pariṇāmeti, puggalassa pariṇataṃ aññapuggalassa vā saṅghassa vā cetiyassa vā pariṇāmetī’’ti. Aṭṭhakathāyañca (pari. aṭṭha. 329) ‘‘nava adhammikāni dānānīti…pe… evaṃ vuttāni. Nava paṭiggahaparibhogāti etesaṃyeva dānānaṃ paṭiggahā ca paribhogā cā’’ti vuttaṃ. Tasmā yadi rājādayo issarāti gahetvā aññassa deyyuṃ, tampi dānaṃ adhammikadānaṃ hoti, taṃ dānaṃ paṭiggahā ca adhammikapaṭiggahā honti, taṃ dānaṃ paribhuñjantā ca adhammikaparibhogā hontīti daṭṭhabbaṃ.

    ཨཐཱཔི ཨེཝཾ ཝདེཡྻུཾ ‘‘ཝིཧཱརདཱནཾ སངྒྷསྶ, ཨགྒཾ བུདྡྷེན ཝཎྞིཏནྟིཨཱདཱིསུ (ཙཱུལ༹ཝ॰ ༢༩༥, ༣༡༥) ‘སངྒྷསྶཱ’ཏི ཨཡཾ སདྡོ ‘དཱན’ནྟི ཨེཏྠ སཱམིསམྦནྡྷོ ན ཧོཏི, ཨཐ ཁོ སམྤདཱནམེཝ, ‘དཱཡཀསྶཱ’ཏི པན སཱམིསམྦནྡྷོ ཨཛ྄ཛྷཱཧརིཏབྦོ, ཏསྨཱ སཱམིབྷཱུཏོ དཱཡཀོཝ ཨིསྶརོ, ན སམྤདཱནབྷཱུཏོ སངྒྷོ’’ཏི། ཏེ ཨེཝཾ ཝཏྟབྦཱ – ‘‘ཝིཧཱརདཱནཾ སངྒྷསྶཱ’’ཏི ཨིདཾ དཱནསམཡེ པཝཏྟཝསེན ཝུཏྟཾ, ན དིནྣསམཡེ པཝཏྟཝསེན། དཱནཀཱལེ ཧི དཱཡཀོ ཨཏྟནོ ཝཏྠུབྷཱུཏཾ ཝིཧཱརཾ སངྒྷསྶ པརིཙྩཛིཏྭཱ དེཏི, ཏསྨཱ ཏསྨིཾ སམཡེ དཱཡཀོ སཱམཱི ཧོཏི, སངྒྷོ སམྤདཱནཾ, དིནྣཀཱལེ པན སངྒྷོཝ སཱམཱི ཧོཏི ཝིཧཱརསྶ པཊིགྒཧིཏཏྟཱ, ན དཱཡཀོ པརིཙྩཏྟཏྟཱ, ཏསྨཱ སངྒྷོ ཝིཙཱརེཏུཾ ཨིསྶརོ། ཏེནཱཧ བྷགཝཱ ‘‘པརིཙྩཏྟཾ ཏཾ, བྷིཀྑཝེ, དཱཡཀེཧཱི’’ཏི (ཙཱུལ༹ཝ॰ ༢༧༣)། ཨིདཾ པན སདྡལཀྑཎགརུཀཱ སདྡཧིསྶནྟཱིཏི ཝུཏྟཾ, ཨཏྠཏོ པན ཙཱིཝརཱདཱིནཾ ཙཏུནྣཾ པཙྩཡཱནཾ དཱནཀཱལེཡེཝ དཱཡཀསནྟཀབྷཱཝོ དིནྣཀཱལཏོ པཊྛཱཡ པཊིགྒཱཧཀསནྟཀབྷཱཝོ སབྦེསཾ པཱཀཊོ, ཏསྨཱ ཨིདམྤི ཝཙནཾ དཱཡཀསནྟཀབྷཱཝསཱདྷཀཾ ན ཧོཏཱིཏི དཊྛབྦཾ།

    Athāpi evaṃ vadeyyuṃ ‘‘vihāradānaṃ saṅghassa, aggaṃ buddhena vaṇṇitantiādīsu (cūḷava. 295, 315) ‘saṅghassā’ti ayaṃ saddo ‘dāna’nti ettha sāmisambandho na hoti, atha kho sampadānameva, ‘dāyakassā’ti pana sāmisambandho ajjhāharitabbo, tasmā sāmibhūto dāyakova issaro, na sampadānabhūto saṅgho’’ti. Te evaṃ vattabbā – ‘‘vihāradānaṃ saṅghassā’’ti idaṃ dānasamaye pavattavasena vuttaṃ, na dinnasamaye pavattavasena. Dānakāle hi dāyako attano vatthubhūtaṃ vihāraṃ saṅghassa pariccajitvā deti, tasmā tasmiṃ samaye dāyako sāmī hoti, saṅgho sampadānaṃ, dinnakāle pana saṅghova sāmī hoti vihārassa paṭiggahitattā, na dāyako pariccattattā, tasmā saṅgho vicāretuṃ issaro. Tenāha bhagavā ‘‘pariccattaṃ taṃ, bhikkhave, dāyakehī’’ti (cūḷava. 273). Idaṃ pana saddalakkhaṇagarukā saddahissantīti vuttaṃ, atthato pana cīvarādīnaṃ catunnaṃ paccayānaṃ dānakāleyeva dāyakasantakabhāvo dinnakālato paṭṭhāya paṭiggāhakasantakabhāvo sabbesaṃ pākaṭo, tasmā idampi vacanaṃ dāyakasantakabhāvasādhakaṃ na hotīti daṭṭhabbaṃ.

    ཨེཝཾ ཧོཏུ, ཏཐཱཔི ‘‘སཙེ བྷིཀྑཱུཧི པརིཙྩཏྟབྷཱཝཾ ཉཏྭཱ སཱམིཀོ ཝཱ ཏསྶ པུཏྟདྷཱིཏརོ ཝཱ ཨཉྙོ ཝཱ ཀོཙི ཝཾསེ ཨུཔྤནྣོ པུན ཀཔྤིཡཝོཧཱརེན དེཏི, ཝཊྚཏཱི’’ཏི ཨཊྛཀཐཱཡཾ (པཱརཱ॰ ཨཊྛ॰ ༢.༥༣༨-༥༣༩) ཝུཏྟཏྟཱ ཝིཧཱརསྶཱམིཀབྷཱུཏདཱཡཀསྶ ཝཱ ཏསྶ པུཏྟདྷཱིཏཱདཱིནཾ ཝཾསེ ཨུཔྤནྣཱནཾ ཝཱ དཱཏུཾ ཨིསྶརབྷཱཝོ སིདྡྷོཡེཝཱཏི། ན སིདྡྷོ། ཀསྨཱཏི ཙེ? ནནུ ཝུཏྟཾ ‘‘བྷིཀྑཱུཧི པརིཙྩཏྟབྷཱཝཾ ཉཏྭཱ’’ཏི, ཏསྨཱ ཨཀཔྤིཡཏྟཱ བྷིཀྑཱུཧི པརིཙྩཏྟམེཝ ཀཔྤིཡཀརཎཏྠཱཡ དཱཡཀཱདཱིཧི པུན ཀཔྤིཡཝོཧཱརེན དེཏི, ཝཊྚཏི། ཡཐཱ ཨཔྤཊིགྒཧིཏཏྟཱ བྷིཀྑཱུཧི ཨཔརིབྷུཏྟམེཝ ཁཱདནཱིཡབྷོཛནཱིཡཾ བྷིཀྑུསནྟཀཾཡེཝ ཨཱཔཏྟིམོཙནཏྠཾ དཱཡཀཱདཡོ པཊིགྒཧཱཔེཏི, ན པརིབྷུཏྟཾ, ཡཐཱ ཙ བཱིཛགཱམཔརིཡཱཔནྣཾཡེཝ བྷིཀྑུསནྟཀཾ བཱིཛགཱམབྷཱུཏགཱམབྷཱཝཏོ པརིམོཙནཏྠཾ ཀཔྤིཡཀཱརཀཱདཡོ ཀཔྤིཡཾ ཀརོནྟི, ན ཨཔརིཡཱཔནྣཾ, ཨེཝཾ ཨཀཔྤིཡཾ བྷིཀྑཱུཧི པརིཙྩཏྟཾཡེཝ ཏལཱ༹ཀཱདིཀཾ ཀཔྤིཡཀརཎཏྠཾ དཱཡཀཱདཡོ པུན དེནྟི, ན ཨཔརིཙྩཏྟཾ, ཏསྨཱ ཨིདམྤི ཝཙནཾ ཀཔྤིཡཀརཎཏྟཾཡེཝ སཱདྷེཏི, ན ཨིསྶརཏྟནྟི ཝིཉྙཱཡཏི།

    Evaṃ hotu, tathāpi ‘‘sace bhikkhūhi pariccattabhāvaṃ ñatvā sāmiko vā tassa puttadhītaro vā añño vā koci vaṃse uppanno puna kappiyavohārena deti, vaṭṭatī’’ti aṭṭhakathāyaṃ (pārā. aṭṭha. 2.538-539) vuttattā vihārassāmikabhūtadāyakassa vā tassa puttadhītādīnaṃ vaṃse uppannānaṃ vā dātuṃ issarabhāvo siddhoyevāti. Na siddho. Kasmāti ce? Nanu vuttaṃ ‘‘bhikkhūhi pariccattabhāvaṃ ñatvā’’ti, tasmā akappiyattā bhikkhūhi pariccattameva kappiyakaraṇatthāya dāyakādīhi puna kappiyavohārena deti, vaṭṭati. Yathā appaṭiggahitattā bhikkhūhi aparibhuttameva khādanīyabhojanīyaṃ bhikkhusantakaṃyeva āpattimocanatthaṃ dāyakādayo paṭiggahāpeti, na paribhuttaṃ, yathā ca bījagāmapariyāpannaṃyeva bhikkhusantakaṃ bījagāmabhūtagāmabhāvato parimocanatthaṃ kappiyakārakādayo kappiyaṃ karonti, na apariyāpannaṃ, evaṃ akappiyaṃ bhikkhūhi pariccattaṃyeva taḷākādikaṃ kappiyakaraṇatthaṃ dāyakādayo puna denti, na apariccattaṃ, tasmā idampi vacanaṃ kappiyakaraṇattaṃyeva sādheti, na issarattanti viññāyati.

    ཏཐཱཔི ཨེཝཾ ཝདེཡྻུཾ ‘‘ཛཱཏིབྷཱུམིཡཾ ཛཱཏིབྷཱུམིཀཱ ཨུཔཱསཀཱ ཨཱཡསྨནྟཾ དྷམྨིཀཏྠེརཾ སཏྟཧི ཛཱཏིབྷཱུམིཀཝིཧཱརེཧི པབྦཱཛཡིཾསཱུཏི ཝཙནཏོ དཱཡཀོ ཝིཧཱརསྶ ཨིསྶརོཏི ཝིཉྙཱཡཏི། ཨིསྶརཏྟཱཡེཝ ཧི ཏེ ཐེརཾ པབྦཱཛེཏུཾ སཀྐཱ, ནོ ཨནིསྶརཱ’’ཏི, ན ཁོ པནེཝཾ དཊྛབྦཾ། ཀསྨཱ? ‘‘ཛཱཏིབྷཱུམིཀཱ ཨུཔཱསཀཱ’’ཨིཙྩེཝ ཧི ཝུཏྟཾ, ན ‘‘ཝིཧཱརདཱཡཀཱ’’ཏི, ཏསྨཱ ཏསྨིཾ དེསེ ཝསནྟཱ བཧཝོ ཨུཔཱསཀཱ ཨཱཡསྨནྟཾ དྷམྨིཀཏྠེརཾ ཨཡུཏྟཙཱརིཏྟཱ སཀལསཏྟཝིཧཱརཏོ པབྦཱཛཡིཾསུ, ན ཨཏྟནོ ཝིཧཱརདཱཡཀབྷཱཝེན ཨིསྶརཏྟཱ, ཏསྨཱ ཨིདམྤི ཨུདཱཧརཎཾ ན ཨིསྶརབྷཱཝདཱིཔཀཾ, ཨཐ ཁོ ཨཔརཱདྷཱནུརཱུཔཀརཎབྷཱཝདཱིཔཀནྟི དཊྛབྦཾ། ཨེཝཾ ཡདཱ དཱཡཀོ ཝིཧཱརཾ པཏིཊྛཱཔེཏྭཱ དེཏི, ཏསྶ མུཉྩཙེཏནཾ པཏྭཱ དིནྣཀཱལཏོ པཊྛཱཡ སོ ཝཱ ཏསྶ ཝཾསེ ཨུཔྤནྣོ ཝཱ ཛནཔདསྶཱམིཀརཱཛཱདཡོ ཝཱ ཨིསྶརཱ བྷཝིཏུཾ ཝཱ ཝིཙཱརེཏུཾ ཝཱ ན ལབྷནྟི, པཊིགྒཱཧཀབྷཱུཏོ སངྒྷོ ཝཱ གཎོ ཝཱ པུགྒལོ ཝཱ སོཡེཝ ཨིསྶརོ བྷཝིཏུཾ ཝཱ ཝིཙཱརེཏུཾ ཝཱ ལབྷཏཱིཏི དཊྛབྦཾ།

    Tathāpi evaṃ vadeyyuṃ ‘‘jātibhūmiyaṃ jātibhūmikā upāsakā āyasmantaṃ dhammikattheraṃ sattahi jātibhūmikavihārehi pabbājayiṃsūti vacanato dāyako vihārassa issaroti viññāyati. Issarattāyeva hi te theraṃ pabbājetuṃ sakkā, no anissarā’’ti, na kho panevaṃ daṭṭhabbaṃ. Kasmā? ‘‘Jātibhūmikā upāsakā’’icceva hi vuttaṃ, na ‘‘vihāradāyakā’’ti, tasmā tasmiṃ dese vasantā bahavo upāsakā āyasmantaṃ dhammikattheraṃ ayuttacārittā sakalasattavihārato pabbājayiṃsu, na attano vihāradāyakabhāvena issarattā, tasmā idampi udāharaṇaṃ na issarabhāvadīpakaṃ, atha kho aparādhānurūpakaraṇabhāvadīpakanti daṭṭhabbaṃ. Evaṃ yadā dāyako vihāraṃ patiṭṭhāpetvā deti, tassa muñcacetanaṃ patvā dinnakālato paṭṭhāya so vā tassa vaṃse uppanno vā janapadassāmikarājādayo vā issarā bhavituṃ vā vicāretuṃ vā na labhanti, paṭiggāhakabhūto saṅgho vā gaṇo vā puggalo vā soyeva issaro bhavituṃ vā vicāretuṃ vā labhatīti daṭṭhabbaṃ.

    ཏཏྠ དཱཡཀཱདཱིནཾ ཨིསྶརོ བྷཝིཏུཾ ཨལབྷནབྷཱཝོ ཀཐཾ ཝིཉྙཱཡཏཱིཏི ཙེ? ‘‘ཝཏྠུཔརིཙྩཱགལཀྑཎཏྟཱ དཱནསྶ, པཐཝཱདིཝཏྠུཔརིཙྩཱགེན ཙ པུན གཧཎསྶ ཨཡུཏྟཏྟཱ’’ཏི ཝིམཏིཝིནོདནིཡཾ ཝཙནཏོ ‘‘ཨནུཛཱནཱམི, བྷིཀྑཝེ, ཡཾ དཱིཡམཱནཾ པཏཏི, ཏཾ སཱམཾ གཧེཏྭཱ པརིབྷུཉྫིཏུཾ, པརིཙྩཏྟཾ ཏཾ, བྷིཀྑཝེ, དཱཡཀེཧཱི’’ཏི (ཙཱུལ༹ཝ॰ ༢༧༣) བྷགཝཏཱ ཝུཏྟཏྟཱ ཙ ‘‘པརིཙྩཏྟཾ ཏཾ, བྷིཀྑཝེ, དཱཡཀེཧཱིཏི ཝཙནེན པནེཏྠ པརསནྟཀཱབྷཱཝོ དཱིཔིཏོ’’ཏི ཨཊྛཀཐཱཡཾ ཝུཏྟཏྟཱ ཙ ཝིཉྙཱཡཏི། སངྒྷཱདཱིནཾ ཨིསྶརོ བྷཝིཏུཾ ལབྷནབྷཱཝོ ཀཐཾ ཉཱཏབྦོཏི ཙེ? སངྒྷིཀོ ནཱམ ཝིཧཱརོ སངྒྷསྶ དིནྣོ ཧོཏི པརིཙྩཏྟོ, ‘‘པུགྒལིཀེ པུགྒལིཀསཉྙཱི ཨཉྙསྶ པུགྒལིཀེ ཨཱཔཏྟི དུཀྐཊསྶ, ཨཏྟནོ པུགྒལིཀེ ཨནཱཔཏྟཱི’’ཏི པཱཙིཏྟིཡཔཱལི༹ཡཾ (པཱཙི॰ ༡༡༧, ༡༢༧) ཨཱགམནཏོ ཙ ‘‘ཨནྟམསོ ཙཏུརངྒུལཔཱདཀཾ གཱམདཱརཀེཧི པཾསྭཱགཱརཀེསུ ཀཱིལ༹ནྟེཧི ཀཏམྤི སངྒྷསྶ དིནྣཏོ པཊྛཱཡ གརུབྷཎྜཾ ཧོཏཱི’’ཏི (ཙཱུལ༹ཝ॰ ཨཊྛ॰ ༣༢༡) སམནྟཔཱསཱདིཀཱཡཾ ཝཙནཏོ ཙ ‘‘ཨབྷིཡོགེཔི ཙེཏྠ ཙཱཏུདྡིསཾ སངྒྷཾ ཨུདྡིསྶ བྷིཀྑཱུནཾ དིནྣཾ ཝིཧཱརཾ ཝཱ པརིཝེཎཾ ཝཱ ཨཱཝཱསཾ ཝཱ མཧནྟམྤི ཁུདྡཀམྤི ཨབྷིཡུཉྫཏོ ཨབྷིཡོགོ ན རུཧཏི, ཨཙྪིནྡིཏྭཱ གཎྷིཏུམྤི ན སཀྐོཏི། ཀསྨཱ? སབྦེསཾ དྷུརནིཀྑེཔཱབྷཱཝཏོ། ན ཧེཏྠ སབྦེ ཙཱཏུདྡིསཱ བྷིཀྑཱུ དྷུརནིཀྑེཔཾ ཀརོནྟཱིཏི། དཱིགྷབྷཱཎཀཱདིབྷེདསྶ པན གཎསྶ ཨེཀཔུགྒལསྶ ཝཱ སནྟཀཾ ཨབྷིཡུཉྫིཏྭཱ གཎྷནྟོ སཀྐོཏི ཏེ དྷུརཾ ནིཀྑིཔཱཔེཏུ’’ནྟི དུཏིཡཔཱརཱཛིཀཝཎྞནཱཡཾ (པཱརཱ॰ ཨཊྛ॰ ༡.༡༠༢) ཝཙནཏོ ཙ ཝིཉྙཱཡཏི།

    Tattha dāyakādīnaṃ issaro bhavituṃ alabhanabhāvo kathaṃ viññāyatīti ce? ‘‘Vatthupariccāgalakkhaṇattā dānassa, pathavādivatthupariccāgena ca puna gahaṇassa ayuttattā’’ti vimativinodaniyaṃ vacanato ‘‘anujānāmi, bhikkhave, yaṃ dīyamānaṃ patati, taṃ sāmaṃ gahetvā paribhuñjituṃ, pariccattaṃ taṃ, bhikkhave, dāyakehī’’ti (cūḷava. 273) bhagavatā vuttattā ca ‘‘pariccattaṃ taṃ, bhikkhave, dāyakehīti vacanena panettha parasantakābhāvo dīpito’’ti aṭṭhakathāyaṃ vuttattā ca viññāyati. Saṅghādīnaṃ issaro bhavituṃ labhanabhāvo kathaṃ ñātabboti ce? Saṅghiko nāma vihāro saṅghassa dinno hoti pariccatto, ‘‘puggalike puggalikasaññī aññassa puggalike āpatti dukkaṭassa, attano puggalike anāpattī’’ti pācittiyapāḷiyaṃ (pāci. 117, 127) āgamanato ca ‘‘antamaso caturaṅgulapādakaṃ gāmadārakehi paṃsvāgārakesu kīḷantehi katampi saṅghassa dinnato paṭṭhāya garubhaṇḍaṃ hotī’’ti (cūḷava. aṭṭha. 321) samantapāsādikāyaṃ vacanato ca ‘‘abhiyogepi cettha cātuddisaṃ saṅghaṃ uddissa bhikkhūnaṃ dinnaṃ vihāraṃ vā pariveṇaṃ vā āvāsaṃ vā mahantampi khuddakampi abhiyuñjato abhiyogo na ruhati, acchinditvā gaṇhitumpi na sakkoti. Kasmā? Sabbesaṃ dhuranikkhepābhāvato. Na hettha sabbe cātuddisā bhikkhū dhuranikkhepaṃ karontīti. Dīghabhāṇakādibhedassa pana gaṇassa ekapuggalassa vā santakaṃ abhiyuñjitvā gaṇhanto sakkoti te dhuraṃ nikkhipāpetu’’nti dutiyapārājikavaṇṇanāyaṃ (pārā. aṭṭha. 1.102) vacanato ca viññāyati.

    ཀཐཾ དཱཡཀཱདཱིནཾ ཝིཙཱརེཏུཾ ཨལབྷནབྷཱཝོ ཝིཉྙཱཡཏཱིཏི ཙེ? སནྟེསུཔི ཝེལུ༹ཝནཝིཧཱརཱདིདཱཡཀེསུ ཏེསཾ ཝིཙཱརཎཾ ཨནནུཛཱནིཏྭཱ ‘‘ཨནུཛཱནཱམི, བྷིཀྑཝེ, པཉྩཧངྒེཧི སམནྣཱགཏཾ བྷིཀྑུཾ སེནཱསནགྒཱཧཱཔཀཾ སམྨནྣིཏུ’’ནྟི བྷིཀྑུསྶེཝ སེནཱསནགྒཱཧཱཔཀསམྨུཏིཨནུཛཱནཏོ ཙ བྷཎྜནཀཱརཀེསུ ཀོསམྦཀབྷིཀྑཱུསུ སཱཝཏྠིཾ ཨཱགཏེསུ ཨནཱཐཔིཎྜིཀེན ཙ ཝིསཱཁཱཡ མཧཱཨུཔཱསིཀཱཡ ཙ ‘‘ཀཐཱཧཾ, བྷནྟེ, ཏེསུ བྷིཀྑཱུསུ པཊིཔཛྫཱམཱི’’ཏི (མཧཱཝ॰ ༤༦༨) ཨེཝཾ ཛེཏཝནཝིཧཱརདཱཡཀཔུབྦཱརཱམཝིཧཱརདཱཡཀབྷཱུཏེསུ ཨཱརོཙིཏེསུཔི ཏེསཾ སེནཱསནཝིཙཱརཎཾ ཨཝཏྭཱ ཨཱཡསྨཏཱ སཱརིཔུཏྟཏྠེརེན ‘‘ཀཐཾ ནུ ཁོ, བྷནྟེ, ཏེསུ བྷིཀྑཱུསུ སེནཱསནེ པཊིཔཛྫིཏབྦ’’ནྟི ཨཱརོཙིཏེ ‘‘ཏེན ཧི, སཱརིཔུཏྟ, ཝིཝིཏྟཾ སེནཱསནཾ དཱཏབྦ’’ནྟི ཝཏྭཱ ‘‘སཙེ པན, བྷནྟེ, ཝིཝིཏྟཾ ན ཧོཏི, ཀཐཾ པཊིཔཛྫིཏབྦ’’ནྟི ཝུཏྟེ ‘‘ཏེན ཧི ཝིཝིཏྟཾ ཀཏྭཱཔི དཱཏབྦཾ, ན ཏྭེཝཱཧཾ, སཱརིཔུཏྟ, ཀེནཙི པརིཡཱཡེན ཝུཌྜྷཏརསྶ བྷིཀྑུནོ སེནཱསནཾ པཊིབཱཧིཏབྦནྟི ཝདཱམི, ཡོ པཊིབཱཧེཡྻ, ཨཱཔཏྟི དུཀྐཊསྶཱ’’ཏི (མཧཱཝ॰ ༤༧༣) ཐེརསྶེཝ སེནཱསནསྶ ཝིཙཱརཎསྶ ཨནུཉྙཱཏཏྟཱ ཙ ཝིཉྙཱཡཏི།

    Kathaṃ dāyakādīnaṃ vicāretuṃ alabhanabhāvo viññāyatīti ce? Santesupi veḷuvanavihārādidāyakesu tesaṃ vicāraṇaṃ ananujānitvā ‘‘anujānāmi, bhikkhave, pañcahaṅgehi samannāgataṃ bhikkhuṃ senāsanaggāhāpakaṃ sammannitu’’nti bhikkhusseva senāsanaggāhāpakasammutianujānato ca bhaṇḍanakārakesu kosambakabhikkhūsu sāvatthiṃ āgatesu anāthapiṇḍikena ca visākhāya mahāupāsikāya ca ‘‘kathāhaṃ, bhante, tesu bhikkhūsu paṭipajjāmī’’ti (mahāva. 468) evaṃ jetavanavihāradāyakapubbārāmavihāradāyakabhūtesu ārocitesupi tesaṃ senāsanavicāraṇaṃ avatvā āyasmatā sāriputtattherena ‘‘kathaṃ nu kho, bhante, tesu bhikkhūsu senāsane paṭipajjitabba’’nti ārocite ‘‘tena hi, sāriputta, vivittaṃ senāsanaṃ dātabba’’nti vatvā ‘‘sace pana, bhante, vivittaṃ na hoti, kathaṃ paṭipajjitabba’’nti vutte ‘‘tena hi vivittaṃ katvāpi dātabbaṃ, na tvevāhaṃ, sāriputta, kenaci pariyāyena vuḍḍhatarassa bhikkhuno senāsanaṃ paṭibāhitabbanti vadāmi, yo paṭibāheyya, āpatti dukkaṭassā’’ti (mahāva. 473) therasseva senāsanassa vicāraṇassa anuññātattā ca viññāyati.

    ཀཐཾ པན སངྒྷཱདཱིནཾ སེནཱསནཾ ཝིཙཱརེཏུཾ ལབྷནབྷཱཝོ ཝིཉྙཱཡཏཱིཏི? ‘‘ཨེཝཉྩ, བྷིཀྑཝེ, སམྨནྣིཏབྦོ – པཋམཾ བྷིཀྑུ ཡཱཙིཏབྦོ, ཡཱཙིཏྭཱ བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –

    Kathaṃ pana saṅghādīnaṃ senāsanaṃ vicāretuṃ labhanabhāvo viññāyatīti? ‘‘Evañca, bhikkhave, sammannitabbo – paṭhamaṃ bhikkhu yācitabbo, yācitvā byattena bhikkhunā paṭibalena saṅgho ñāpetabbo –

    སུཎཱཏུ མེ, བྷནྟེ, སངྒྷོ…པེ॰… སམྨཏོ སངྒྷེན ཨིཏྠནྣཱམོ བྷིཀྑུ སེནཱསནགྒཱཧཱཔཀོ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི (ཙཱུལ༹ཝ॰ ༣༡༧)།

    Suṇātu me, bhante, saṅgho…pe… sammato saṅghena itthannāmo bhikkhu senāsanaggāhāpako, khamati saṅghassa, tasmā tuṇhī, evametaṃ dhārayāmīti (cūḷava. 317).

    ཨེཝཾ སངྒྷེན སེནཱསནགྒཱཧཱཔཀཾ སམྨནྣཱཔེཏྭཱ པུན ཏེན སངྒྷསམྨཏེན སེནཱསནགྒཱཧཱཔཀེན སེནཱསནགྒཱཧཀཝིདྷཱནཾ ཨནུཛཱནིཏུཾ ཨནུཛཱནཱམི, བྷིཀྑཝེ, པཋམཾ བྷིཀྑཱུ གཎེཏུཾ, བྷིཀྑཱུ གཎེཏྭཱ སེཡྻཱ གཎེཏུཾ, སེཡྻཱ གཎེཏྭཱ སེཡྻགྒེན གཱཧེཏུ’’ནྟི ཝཙནཏོ སངྒྷིཀསེནཱསནསྶ སངྒྷེན ཝིཙཱརེཏུཾ ལབྷནབྷཱཝོ ཝིཉྙཱཡཏི།

    Evaṃ saṅghena senāsanaggāhāpakaṃ sammannāpetvā puna tena saṅghasammatena senāsanaggāhāpakena senāsanaggāhakavidhānaṃ anujānituṃ anujānāmi, bhikkhave, paṭhamaṃ bhikkhū gaṇetuṃ, bhikkhū gaṇetvā seyyā gaṇetuṃ, seyyā gaṇetvā seyyaggena gāhetu’’nti vacanato saṅghikasenāsanassa saṅghena vicāretuṃ labhanabhāvo viññāyati.

    ‘‘དཱིགྷབྷཱཎཀཱདིབྷེདསྶ པན གཎསྶ ཨེཀཔུགྒལསྶ ཝཱ དིནྣཝིཧཱརཱདིཾ ཨཙྪིནྡིཏྭཱ གཎྷནྟེ དྷུརནིཀྑེཔསམྦྷཝཱ པཱརཱཛིཀ’’ནྟི ཨཊྛཀཐཱཡཾ (པཱརཱ॰ ཨཊྛ॰ ༡.༡༠༢) ཨཱགམནཏོ ཙ ‘‘ཨཏྟནོ པུགྒལིཀེ ཨནཱཔཏྟཱི’’ཏི པཱལི༹ཡཾ (པཱཙི॰ ༡༡༧) ཨཱགམནཏོ ཙ ‘‘ཡསྨིཾ པན ཝིསྶཱསོ རུཧཏི, ཏསྶ སནྟཀཾ ཨཏྟནོ པུགྒལིཀམིཝ ཧོཏཱིཏི མཧཱཔཙྩརིཨཱདཱིསུ ཝུཏྟ’’ནྟི ཨཊྛཀཐཱཡཾ (པཱཙི॰ ཨཊྛ॰ ༡༡༢) ཝཙནཏོ ཙ གཎསྶ དིནྣོ གཎསནྟཀཝིཧཱརོ གཎེནེཝ ཝིཙཱརཱིཡཏེ, ནོ དཱཡཀཱདཱིཧི། པུགྒལསྶ དིནྣོ པུགྒལིཀཝིཧཱརོཔི པཊིགྒཱཧཀཔུགྒལེནེཝ ཝིཙཱརཱིཡཏེ, ནོ དཱཡཀཱདཱིཧཱིཏི ཝིཉྙཱཡཏི། ཨེཝཾ ཝིནཡཔཱལི༹ཡཾ ཨཊྛཀཐཱཊཱིཀཱསུ ཙ ཝིཧཱརསྶ སངྒྷིཀགཎསནྟཀཔུགྒལིཀཝསེན ཏིཝིདྷསྶེཝ ཝཙནཏོ ཙ ཏེསཾཡེཝ སངྒྷགཎཔུགྒལཱནཾ ཝིཧཱརཝིཙཱརཎསྶ ཨནུཉྙཱཏཏྟཱ ཙ དཱཡཀསནྟཀསྶ ཝིཧཱརསྶ ཝིསུཾ ཨཝུཏྟཏྟཱ ཙ དཱཡཀཱནཾ ཝིཧཱརཝིཙཱརཎསྶ ཨནནུཉྙཱཏཏྟཱ ཙ སངྒྷཱདཡོ ཨེཝ ཝིཧཱརསྶ ཨིསྶརཱ ཧོནྟི, ཏེཡེཝ ཙ ཝིཙཱརེཏུཾ ལབྷནྟཱིཏི དཊྛབྦཾ།

    ‘‘Dīghabhāṇakādibhedassa pana gaṇassa ekapuggalassa vā dinnavihārādiṃ acchinditvā gaṇhante dhuranikkhepasambhavā pārājika’’nti aṭṭhakathāyaṃ (pārā. aṭṭha. 1.102) āgamanato ca ‘‘attano puggalike anāpattī’’ti pāḷiyaṃ (pāci. 117) āgamanato ca ‘‘yasmiṃ pana vissāso ruhati, tassa santakaṃ attano puggalikamiva hotīti mahāpaccariādīsu vutta’’nti aṭṭhakathāyaṃ (pāci. aṭṭha. 112) vacanato ca gaṇassa dinno gaṇasantakavihāro gaṇeneva vicārīyate, no dāyakādīhi. Puggalassa dinno puggalikavihāropi paṭiggāhakapuggaleneva vicārīyate, no dāyakādīhīti viññāyati. Evaṃ vinayapāḷiyaṃ aṭṭhakathāṭīkāsu ca vihārassa saṅghikagaṇasantakapuggalikavasena tividhasseva vacanato ca tesaṃyeva saṅghagaṇapuggalānaṃ vihāravicāraṇassa anuññātattā ca dāyakasantakassa vihārassa visuṃ avuttattā ca dāyakānaṃ vihāravicāraṇassa ananuññātattā ca saṅghādayo eva vihārassa issarā honti, teyeva ca vicāretuṃ labhantīti daṭṭhabbaṃ.

    ཨེཝཾ ཧོཏུ, ཏེསུ པཊིགྒཱཧཀབྷཱུཏེསུ སངྒྷགཎཔུགྒལེསུ སོ ཝིཧཱརོ ཀསྶ སནྟཀོ ཧོཏི, ཀེན ཙ ཝིཙཱརེཏབྦོཏི? ཝུཙྩཏེ – སངྒྷིཀཝིཧཱརེ ཏཱཝ ‘‘ཨཱགཏཱནཱགཏསྶ ཙཱཏུདྡིསསྶ སངྒྷསྶ དམྨཱི’’ཏི དིནྣཏྟཱ པཊིགྒཱཧཀེསུ ཀཱལཀཏེསུཔི ཏདཉྙོ ཙཱཏུདྡིསསངྒྷོ ཙ ཨནཱགཏསངྒྷོ ཙ ཨིསྶརོ, ཏསྶ སནྟཀོ, ཏེན ཝིཙཱརེཏབྦོ། གཎསནྟཀེ པན ཏསྨིཾ གཎེ ཡཱཝ ཨེཀོཔི ཨཏྠི, ཏཱཝ གཎསནྟཀོཝ, ཏེན ཨཝསིཊྛེན བྷིཀྑུནཱ ཝིཙཱརེཏབྦོ། སབྦེསུ ཀཱལཀཏེསུ ཡདི སཀལགཎོ ཝཱ ཏཾགཎཔརིཡཱཔནྣཨཝསིཊྛཔུགྒལོ ཝཱ ཛཱིཝམཱནཀཱལེཡེཝ ཡསྶ ཀསྶཙི དིནྣོ, ཡེན ཙ ཝིསྶཱསགྒཱཧཝསེན གཧིཏོ, སོ ཨིསྶརོ། སཙེཔི སཀལགཎོ ཛཱིཝམཱནཀཱལེཡེཝ ཨཉྙགཎསྶ ཝཱ སངྒྷསྶ ཝཱ པུགྒལསྶ ཝཱ དེཏི, ཏེ ཨཉྙགཎསངྒྷཔུགྒལཱ ཨིསྶརཱ ཧོནྟི། པུགྒལིཀཝིཧཱརེ པན སོ ཝིཧཱརསྶཱམིཀོ ཨཏྟནོ ཛཱིཝམཱནཀཱལེཡེཝ སངྒྷསྶ ཝཱ གཎསྶ ཝཱ པུགྒལསྶ ཝཱ དེཏི, ཏེ ཨིསྶརཱ ཧོནྟི། ཡོ ཝཱ པན ཏསྶ ཛཱིཝམཱནསྶེཝ ཝིསྶཱསགྒཱཧཝསེན གཎྷཱཏི, སོཝ ཨིསྶརོ ཧོཏཱིཏི དཊྛབྦོ།

    Evaṃ hotu, tesu paṭiggāhakabhūtesu saṅghagaṇapuggalesu so vihāro kassa santako hoti, kena ca vicāretabboti? Vuccate – saṅghikavihāre tāva ‘‘āgatānāgatassa cātuddisassa saṅghassa dammī’’ti dinnattā paṭiggāhakesu kālakatesupi tadañño cātuddisasaṅgho ca anāgatasaṅgho ca issaro, tassa santako, tena vicāretabbo. Gaṇasantake pana tasmiṃ gaṇe yāva ekopi atthi, tāva gaṇasantakova, tena avasiṭṭhena bhikkhunā vicāretabbo. Sabbesu kālakatesu yadi sakalagaṇo vā taṃgaṇapariyāpannaavasiṭṭhapuggalo vā jīvamānakāleyeva yassa kassaci dinno, yena ca vissāsaggāhavasena gahito, so issaro. Sacepi sakalagaṇo jīvamānakāleyeva aññagaṇassa vā saṅghassa vā puggalassa vā deti, te aññagaṇasaṅghapuggalā issarā honti. Puggalikavihāre pana so vihārassāmiko attano jīvamānakāleyeva saṅghassa vā gaṇassa vā puggalassa vā deti, te issarā honti. Yo vā pana tassa jīvamānasseva vissāsaggāhavasena gaṇhāti, sova issaro hotīti daṭṭhabbo.

    ཀཐཾ ཝིཉྙཱཡཏཱིཏི ཙེ? སངྒྷིཀེ ཝིཧཱརསྶ གརུབྷཎྜཏྟཱ ཨཝིསྶཛྫིཡཾ ཨཝེབྷངྒིཀཾ ཧོཏི, ན ཀསྶཙི དཱཏབྦཾ། གཎསནྟཀཔུགྒལིཀེསུ པན ཏེསཾ སཱམིཀཏྟཱ དཱནཝིསྶཱསགྒཱཧཱ རུཧནྟི, ‘‘ཏསྨཱ སོ ཛཱིཝམཱནོཡེཝ སབྦཾ ཨཏྟནོ པརིཀྑཱརཾ ནིསྶཛྫིཏྭཱ ཀསྶཙི ཨདཱསི, ཀོཙི ཝཱ ཝིསྶཱསཾ ཨགྒཧེསི། ཡསྶ དིནྣཾ, ཡེན ཙ གཧིཏཾ, ཏསྶེཝ ཧོཏཱི’’ཏི ཙ ‘‘དྭིནྣཾ སནྟཀཾ ཧོཏི ཨཝིབྷཏྟཾ, ཨེཀསྨིཾ ཀཱལཀཏེ ཨིཏརོ སཱམཱི, བཧཱུནམྤི སནྟཀེ ཨེསེཝ ནཡོ’’ཏི (མཧཱཝ॰ ཨཊྛ॰ ༣༦༩) ཙ ཨཊྛཀཐཱཡཾ ཝུཏྟཏྟཱ ཝིཉྙཱཡཏི།

    Kathaṃ viññāyatīti ce? Saṅghike vihārassa garubhaṇḍattā avissajjiyaṃ avebhaṅgikaṃ hoti, na kassaci dātabbaṃ. Gaṇasantakapuggalikesu pana tesaṃ sāmikattā dānavissāsaggāhā ruhanti, ‘‘tasmā so jīvamānoyeva sabbaṃ attano parikkhāraṃ nissajjitvā kassaci adāsi, koci vā vissāsaṃ aggahesi. Yassa dinnaṃ, yena ca gahitaṃ, tasseva hotī’’ti ca ‘‘dvinnaṃ santakaṃ hoti avibhattaṃ, ekasmiṃ kālakate itaro sāmī, bahūnampi santake eseva nayo’’ti (mahāva. aṭṭha. 369) ca aṭṭhakathāyaṃ vuttattā viññāyati.

    ཨེཝཾ པན ཝིསྶཛྫེཏྭཱ ཨདིནྣཾ ‘‘མམཙྩཡེན ཨསུཀསྶ ཧོཏཱུ’’ཏི དཱནཾ ཨཙྩཡདཱནཏྟཱ ན རུཧཏི། ཝུཏྟཉྷེཏཾ ཨཊྛཀཐཱཡཾ (ཙཱུལ༹ཝ॰ ཨཊྛ॰ ༤༡༩) ‘‘སཙེ ཧི པཉྩསུ སཧདྷམྨིཀེསུ ཡོ ཀོཙི ཀཱལཾ ཀརོནྟོ ‘མམཙྩཡེན མཡ྄ཧཾ པརིཀྑཱརོ ཨུཔཛ྄ཛྷཱཡསྶ ཧོཏུ, ཨཱཙརིཡསྶ ཧོཏུ, སདྡྷིཝིཧཱརིཀསྶ ཧོཏུ, ཨནྟེཝཱསིཀསྶ ཧོཏུ, མཱཏུ ཧོཏུ, པིཏུ ཧོཏུ, ཨཉྙསྶ ཝཱ ཀསྶཙི ཧོཏཱུ’ཏི ཝདཏི, ཏེསཾ ན ཧོཏི, སངྒྷསྶེཝ ཧོཏི། ན ཧི པཉྩནྣཾ སཧདྷམྨིཀཱནཾ ཨཙྩཡདཱནཾ རུཧཏི, གིཧཱིནཾ པན རུཧཏཱི’’ཏི། ཨེཏྠ ཙ ཨེཀཙྩེ པན ཝིནཡདྷརཱ ‘‘གིཧཱིནནྟི པདཾ སམྤདཱནནྟི གཧེཏྭཱ བྷིཀྑཱུནཾ སནྟཀཾ ཨཙྩཡདཱནཝསེན གིཧཱིནཾ དདནྟེ རུཧཏི, པཉྩནྣཾ པན སཧདྷམྨིཀཱནཾ དེནྟོ ན རུཧཏཱི’’ཏི ཝདནྟི། ཨེཝཾ སནྟེ མཱཏཱཔིཏཱུནཾ དདནྟོཔི རུཧེཡྻ ཏེསཾ གིཧིབྷཱུཏཏྟཱ། ‘‘ཨཐ ཙ པན ‘མཱཏུ ཧོཏུ, པིཏུ ཧོཏུ, ཨཉྙསྶ ཝཱ ཀསྶཙི ཧོཏཱུ’ཏི ཝདཏི, ཏེསཾ ན ཧོཏཱི’’ཏི ཝཙནཏོ ན རུཧཏཱིཏི ཝིཉྙཱཡཏི, ཏསྨཱ ‘‘གིཧཱིནཾ པནཱ’’ཏི ཨིདཾ ན སམྤདཱནཝཙནཾ, ཨཐ ཁོ སཱམིཝཙནམེཝཱཏི དཊྛབྦཾ། ཏེན གིཧཱིནཾ པན སནྟཀཾ ཨཙྩཡདཱནཾ རུཧཏཱིཏི སམྦནྡྷོ ཀཱཏབྦོ།

    Evaṃ pana vissajjetvā adinnaṃ ‘‘mamaccayena asukassa hotū’’ti dānaṃ accayadānattā na ruhati. Vuttañhetaṃ aṭṭhakathāyaṃ (cūḷava. aṭṭha. 419) ‘‘sace hi pañcasu sahadhammikesu yo koci kālaṃ karonto ‘mamaccayena mayhaṃ parikkhāro upajjhāyassa hotu, ācariyassa hotu, saddhivihārikassa hotu, antevāsikassa hotu, mātu hotu, pitu hotu, aññassa vā kassaci hotū’ti vadati, tesaṃ na hoti, saṅghasseva hoti. Na hi pañcannaṃ sahadhammikānaṃ accayadānaṃ ruhati, gihīnaṃ pana ruhatī’’ti. Ettha ca ekacce pana vinayadharā ‘‘gihīnanti padaṃ sampadānanti gahetvā bhikkhūnaṃ santakaṃ accayadānavasena gihīnaṃ dadante ruhati, pañcannaṃ pana sahadhammikānaṃ dento na ruhatī’’ti vadanti. Evaṃ sante mātāpitūnaṃ dadantopi ruheyya tesaṃ gihibhūtattā. ‘‘Atha ca pana ‘mātu hotu, pitu hotu, aññassa vā kassaci hotū’ti vadati, tesaṃ na hotī’’ti vacanato na ruhatīti viññāyati, tasmā ‘‘gihīnaṃ panā’’ti idaṃ na sampadānavacanaṃ, atha kho sāmivacanamevāti daṭṭhabbaṃ. Tena gihīnaṃ pana santakaṃ accayadānaṃ ruhatīti sambandho kātabbo.

    ཀིཉྩ བྷིཡྻོ – ‘‘སཙེ ཧི པཉྩསུ སཧདྷམྨིཀེསུ ཡོ ཀོཙི ཀཱལཾ ཀརོནྟོ མམཙྩཡེན མཡ྄ཧཾ པརིཀྑཱརོ’’ཏི ཨཱརབྷིཏྭཱ ‘‘ན ཧི པཉྩནྣཾ སཧདྷམྨིཀཱནཾ ཨཙྩཡདཱནཾ རུཧཏི, གིཧཱིནཾ པན རུཧཏཱི’’ཏི ཝུཏྟཏྟཱ སཱམྱཏྠེ ཚཊྛཱིབཧུཝཙནཾ སམཏྠིཏཾ བྷཝཏི། ཡདི ཨེཝཾ ‘‘གིཧཱིན’’ནྟི པདསྶ ཨསམྤདཱནཏྟེ སཏི ཀཏམཾ སམྤདཱནཾ ཧོཏཱིཏི? ‘‘ཡསྶ ཀསྶཙཱི’’ཏི པདཾ། ཝུཏྟཉྷི ཨཊྛཀཐཱཡཾ (ཙཱུལ༹ཝ॰ ཨཊྛ॰ ༤༡༩) ‘‘མཱཏུ ཧོཏུ, པིཏུ ཧོཏུ, ཨཉྙསྶ ཝཱ ཀསྶཙི ཧོཏཱུ’’ཏི། ཨཡམཏྠོ ཨཛྫུཀཝཏྠུནཱ (པཱརཱ॰ ༡༥༨) དཱིཔེཏབྦོ། ཨེཝཾ ཛཱིཝམཱནཀཱལེཡེཝ དཏྭཱ མཏེསུ ཝིནིཙྪཡོ ཨམྷེཧི ཉཱཏོ, ཀསྶཙི ཨདཏྭཱ མཏེསུ ཝིནིཙྪཡོ ཀཐཾ ཉཱཏབྦོཏི? ཏཏྠཱཔི སངྒྷིཀེ ཏཱཝ ཧེཊྛཱ ཝུཏྟནཡེན སངྒྷོཝ ཨིསྶརོ, གཎསནྟཀེ པན ཨེཀཙྩེསུ ཨཝསེསཱ ཨིསྶརཱ, སབྦེསུ མཏེསུ སངྒྷོཝ ཨིསྶརོ། ཝུཏྟཉྷི ཨཊྛཀཐཱཡཾ (མཧཱཝ॰ ཨཊྛ॰ ༣༦༩) ‘‘སབྦེསུ མཏེསུ སངྒྷིཀཾ ཧོཏཱི’’ཏི། པུགྒལིཀེ པན ཝིཧཱརསྶ གརུབྷཎྜཏྟཱ ཨཝིསྶཛྫིཡཾ ཨཝེབྷངྒིཀཾ སངྒྷིཀམེཝ ཧོཏི།

    Kiñca bhiyyo – ‘‘sace hi pañcasu sahadhammikesu yo koci kālaṃ karonto mamaccayena mayhaṃ parikkhāro’’ti ārabhitvā ‘‘na hi pañcannaṃ sahadhammikānaṃ accayadānaṃ ruhati, gihīnaṃ pana ruhatī’’ti vuttattā sāmyatthe chaṭṭhībahuvacanaṃ samatthitaṃ bhavati. Yadi evaṃ ‘‘gihīna’’nti padassa asampadānatte sati katamaṃ sampadānaṃ hotīti? ‘‘Yassa kassacī’’ti padaṃ. Vuttañhi aṭṭhakathāyaṃ (cūḷava. aṭṭha. 419) ‘‘mātu hotu, pitu hotu, aññassa vā kassaci hotū’’ti. Ayamattho ajjukavatthunā (pārā. 158) dīpetabbo. Evaṃ jīvamānakāleyeva datvā matesu vinicchayo amhehi ñāto, kassaci adatvā matesu vinicchayo kathaṃ ñātabboti? Tatthāpi saṅghike tāva heṭṭhā vuttanayena saṅghova issaro, gaṇasantake pana ekaccesu avasesā issarā, sabbesu matesu saṅghova issaro. Vuttañhi aṭṭhakathāyaṃ (mahāva. aṭṭha. 369) ‘‘sabbesu matesu saṅghikaṃ hotī’’ti. Puggalike pana vihārassa garubhaṇḍattā avissajjiyaṃ avebhaṅgikaṃ saṅghikameva hoti.

    ཀཐཾ ཝིཉྙཱཡཏཱིཏི ཙེ? ‘‘བྷིཀྑུསྶ, བྷིཀྑཝེ, ཀཱལཀཏེ སངྒྷོ སཱམཱི པཏྟཙཱིཝརེ, ཨཔིཙ གིལཱནུཔཊྛཱཀཱ བཧཱུཔཀཱརཱ, ཨནུཛཱནཱམི , བྷིཀྑཝེ, སངྒྷེན ཏིཙཱིཝརཉྩ པཏྟཉྩ གིལཱནུཔཊྛཱཀཱནཾ དཱཏུཾ། ཡཾ ཏཏྠ ལཧུབྷཎྜཾ ལཧུཔརིཀྑཱརཾ, ཏཾ སམྨུཁཱིབྷཱུཏེན སངྒྷེན བྷཱཛེཏུཾ། ཡཾ ཏཏྠ གརུབྷཎྜཾ གརུཔརིཀྑཱརཾ, ཏཾ ཨཱགཏཱནཱགཏསྶ ཙཱཏུདྡིསསྶ སངྒྷསྶ ཨཝིསྶཛྫིཡཾ ཨཝེབྷངྒིཀ’’ནྟི (མཧཱཝ॰ ༣༦༩) ཏེན བྷགཝཏཱ ཛཱནཏཱ པསྶཏཱ ཨརཧཏཱ སམྨཱསམྦུདྡྷེན ཝུཏྟཏྟཱ ཝིཉྙཱཡཏི། ཨེཝམྤི ‘‘གརུབྷཎྜཾ གརུཔརིཀྑཱརཾ’’ཨིཙྩེཝ བྷགཝཏཱ ཝུཏྟཾ, ན ‘‘ཝིཧཱར’’ནྟི, ཏསྨཱ ཀཐཾ ཝིཧཱརསྶ གརུབྷཎྜབྷཱཝོཏི ཝིཉྙཱཡཏཱིཏི? ‘‘ཝིཧཱརོ ཝིཧཱརཝཏྠུ, ཨིདཾ དུཏིཡཾ ཨཝེབྷངྒིཀ’’ནྟི པཱལི༹ཡཾ,

    Kathaṃ viññāyatīti ce? ‘‘Bhikkhussa, bhikkhave, kālakate saṅgho sāmī pattacīvare, apica gilānupaṭṭhākā bahūpakārā, anujānāmi , bhikkhave, saṅghena ticīvarañca pattañca gilānupaṭṭhākānaṃ dātuṃ. Yaṃ tattha lahubhaṇḍaṃ lahuparikkhāraṃ, taṃ sammukhībhūtena saṅghena bhājetuṃ. Yaṃ tattha garubhaṇḍaṃ garuparikkhāraṃ, taṃ āgatānāgatassa cātuddisassa saṅghassa avissajjiyaṃ avebhaṅgika’’nti (mahāva. 369) tena bhagavatā jānatā passatā arahatā sammāsambuddhena vuttattā viññāyati. Evampi ‘‘garubhaṇḍaṃ garuparikkhāraṃ’’icceva bhagavatā vuttaṃ, na ‘‘vihāra’’nti, tasmā kathaṃ vihārassa garubhaṇḍabhāvoti viññāyatīti? ‘‘Vihāro vihāravatthu, idaṃ dutiyaṃ avebhaṅgika’’nti pāḷiyaṃ,

    ‘‘དྭིསངྒཧཱནི དྭེ ཧོནྟི, ཏཏིཡཾ ཙཏུསངྒཧཾ།

    ‘‘Dvisaṅgahāni dve honti, tatiyaṃ catusaṅgahaṃ;

    ཙཏུཏྠཾ ནཝཀོཊྛཱསཾ, པཉྩམཾ ཨཊྛབྷེདནཾ༎

    Catutthaṃ navakoṭṭhāsaṃ, pañcamaṃ aṭṭhabhedanaṃ.

    ‘‘ཨིཏི པཉྩཧི རཱསཱིཧི, པཉྩནིམྨལལོཙནོ།

    ‘‘Iti pañcahi rāsīhi, pañcanimmalalocano;

    པཉྩཝཱིསཝིདྷཾ ནཱཐོ, གརུབྷཎྜཾ པཀཱསཡཱི’’ཏི༎ (ཙཱུལ༹ཝ॰ ཨཊྛ॰ ༣༢༡) –

    Pañcavīsavidhaṃ nātho, garubhaṇḍaṃ pakāsayī’’ti. (cūḷava. aṭṭha. 321) –

    ཨཊྛཀཐཱཡཉྩ ཝུཏྟཏྟཱ ཝིཉྙཱཡཏི།

    Aṭṭhakathāyañca vuttattā viññāyati.

    ཨིཏི དཱཡཀོ ཝིཧཱརཾ ཀཏྭཱ ཀུལཱུཔཀབྷིཀྑུསྶ དེཏི, ཏསྶ མུཉྩཙེཏནུཔྤཏྟིཏོ པུབྦཀཱལེ དཱཡཀོ ཝིཧཱརསྶཱམིཀོ ཧོཏི, དཱཏུཾ ཝཱ ཝིཙཱརེཏུཾ ཝཱ ཨིསྶརོ, མུཉྩཙེཏནུཔྤཏྟིཏོ པཊྛཱཡ པཊིགྒཱཧཀབྷིཀྑུ སཱམིཀོ ཧོཏི, པརིབྷུཉྫིཏུཾ ཝཱ ཨཉྙེསཾ དཱཏུཾ ཝཱ ཨིསྶརོ། སོ པུགྒལོ ཨཏྟནོ ཛཱིཝམཱནཀྑཎེཡེཝ སདྡྷིཝིཧཱརིཀཱདཱིནཾ ནིསྶཛྫིཏྭཱ དེཏི, ཏདཱ ཏེ སདྡྷིཝིཧཱརིཀཱདཡོ སཱམིཀཱ ཧོནྟི, པརིབྷུཉྫིཏུཾ ཝཱ ཨཉྙསྶ ཝཱ དཱཏུཾ ཨིསྶརཱ། ཡདི པན ཀསྶཙི ཨདཏྭཱཝ ཀཱལཾ ཀརོཏི, ཏདཱ སངྒྷོཝ ཏསྶ ཝིཧཱརསྶ སཱམིཀོ ཧོཏི, ན དཱཡཀོ ཝཱ པུགྒལོ ཝཱ, སངྒྷཱནུམཏིཡཱ ཨེཝ པུགྒལོ པརིབྷུཉྫིཏུཾ ལབྷཏི, ན ཨཏྟནོ ཨིསྶརཝཏཱཡཱཏི དཊྛབྦོ།

    Iti dāyako vihāraṃ katvā kulūpakabhikkhussa deti, tassa muñcacetanuppattito pubbakāle dāyako vihārassāmiko hoti, dātuṃ vā vicāretuṃ vā issaro, muñcacetanuppattito paṭṭhāya paṭiggāhakabhikkhu sāmiko hoti, paribhuñjituṃ vā aññesaṃ dātuṃ vā issaro. So puggalo attano jīvamānakkhaṇeyeva saddhivihārikādīnaṃ nissajjitvā deti, tadā te saddhivihārikādayo sāmikā honti, paribhuñjituṃ vā aññassa vā dātuṃ issarā. Yadi pana kassaci adatvāva kālaṃ karoti, tadā saṅghova tassa vihārassa sāmiko hoti, na dāyako vā puggalo vā, saṅghānumatiyā eva puggalo paribhuñjituṃ labhati, na attano issaravatāyāti daṭṭhabbo.

    ཨེཝཾ མཱུལཏོཡེཝ སངྒྷསྶ དིནྣཏྟཱ སངྒྷིཀབྷཱུཏཝིཧཱརོ ཝཱ མཱུལེ གཎཔུགྒལཱནཾ དིནྣཏྟཱ གཎསནྟཀཔུགྒལིཀབྷཱུཏོཔི ཏེསཾ གཎཔུགྒལཱནཾ ཨཉྙསྶ ནིསྶཛྫནཝསེན ཨདཏྭཱ ཀཱལཀཏཏྟཱ པཙྪཱ སངྒྷིཀབྷཱཝཾ པཏྟཝིཧཱརོ ཝཱ སངྒྷེན ཝིཙཱརེཏབྦོ ཧོཏི། སངྒྷེནཔི བྷགཝཏོ ཨནུམཏིཡཱ སེནཱསནགྒཱཧཱཔཀཾ སམྨནྣིཏྭཱ གཱཧཱཔེཏབྦོ། ཝུཏྟཉྷེཏཾ སེནཱསནཀྑནྡྷཀེ (ཙཱུལ༹ཝ॰ ༣༡༧) ‘‘ཨཐ ཁོ བྷིཀྑཱུནཾ ཨེཏདཧོསི ‘ཀེན ནུ ཁོ སེནཱསནཾ གཱཧེཏབྦ’ནྟི། བྷགཝཏོ ཨེཏམཏྠཾ ཨཱརོཙེསུཾ – ‘ཨནུཛཱནཱམི, བྷིཀྑཝེ, པཉྩཧངྒེཧི སམནྣཱགཏཾ བྷིཀྑུཾ སེནཱསནགྒཱཧཱཔཀཾ སམྨནྣིཏུ’ནྟི’’ཨཱདི།

    Evaṃ mūlatoyeva saṅghassa dinnattā saṅghikabhūtavihāro vā mūle gaṇapuggalānaṃ dinnattā gaṇasantakapuggalikabhūtopi tesaṃ gaṇapuggalānaṃ aññassa nissajjanavasena adatvā kālakatattā pacchā saṅghikabhāvaṃ pattavihāro vā saṅghena vicāretabbo hoti. Saṅghenapi bhagavato anumatiyā senāsanaggāhāpakaṃ sammannitvā gāhāpetabbo. Vuttañhetaṃ senāsanakkhandhake (cūḷava. 317) ‘‘atha kho bhikkhūnaṃ etadahosi ‘kena nu kho senāsanaṃ gāhetabba’nti. Bhagavato etamatthaṃ ārocesuṃ – ‘anujānāmi, bhikkhave, pañcahaṅgehi samannāgataṃ bhikkhuṃ senāsanaggāhāpakaṃ sammannitu’nti’’ādi.

    ཨིམསྨིཾ ཋཱནེ ‘‘སེནཱསནགྒཱཧོ ནཱམ ཝསྶཀཱལཝསེན སེནཱསནགྒཱཧོ, ཨུཏུཀཱལཝསེན སེནཱསནགྒཱཧོ, དྷུཝཝཱསཝསེན སེནཱསནགྒཱཧོཏི ཏིཝིདྷོ ཧོཏི། ཏེསུ ཝསྶཀཱལཝསེན སེནཱསནགྒཱཧོ པུརིམཝསྶཝསེན སེནཱསནགྒཱཧོ, པཙྪིམཝསྶཝསེན སེནཱསནགྒཱཧོཏི དུཝིདྷོ། ཨུཏུཀཱལཝསེན སེནཱསནགྒཱཧོཔི ཨནྟརཱམུཏྟཀཝསེན སེནཱསནགྒཱཧོ, ཏངྑཎཔཊིསལླཱནཝསེན སེནཱསནགྒཱཧོཏི དུཝིདྷོ’’ཏི ཨཱཙརིཡཱ ཝདནྟི, ཨེཏཾ པཱལི༹ཡཱ ཙ ཨཊྛཀཐཱཡ ཙ ཨསམེནྟཾ ཝིཡ དིསྶཏི། པཱལི༹ཡཉྷི (ཙཱུལ༹ཝ॰ ༣༡༨) ‘‘ཨཐ ཁོ བྷིཀྑཱུནཾ ཨེཏདཧོསི ‘ཀཏི ནུ ཁོ སེནཱསནགྒཱཧོ’ཏི། བྷགཝཏོ ཨེཏམཏྠཾ ཨཱརོཙེསུཾ – ཏཡོམེ, བྷིཀྑཝེ, སེནཱསནགྒཱཧཱ པུརིམཀོ པཙྪིམཀོ ཨནྟརཱམུཏྟཀོ། ཨཔརཛྫུགཏཱཡ ཨཱསཱལ༹ྷིཡཱ པུརིམཀོ གཱཧེཏབྦོ, མཱསགཏཱཡ ཨཱསཱལ༹ྷིཡཱ པཙྪིམཀོ གཱཧེཏབྦོ, ཨཔརཛྫུགཏཱཡ པཝཱརཎཱཡ ཨཱཡཏིཾ ཝསྶཱཝཱསཏྠཱཡ ཨནྟརཱམུཏྟཀོ གཱཧེཏབྦོ། ཨིམེ ཁོ, བྷིཀྑཝེ, ཏཡོ སེནཱསནགྒཱཧཱ’’ཏི ཨེཝཾ ཨཱགཏོ, ཨཊྛཀཐཱཡམྤི (ཙཱུལ༹ཝ॰ ཨཊྛ॰ ༣༡༨) ‘‘ཏཱིསུ སེནཱསནགྒཱཧེསུ པུརིམཀོ ཙ པཙྪིམཀོ ཙཱཏི ཨིམེ དྭེ གཱཧཱ ཐཱཝརཱ། ཨནྟརཱམུཏྟཀེ ཨཡཾ ཝིནིཙྪཡོ…པེ॰… ཨཡཾ ཏཱཝ ཨནྟོཝསྶེ ཝསྶཱུཔནཱཡིཀཱདིཝསེན པཱལི༹ཡཾ ཨཱགཏསེནཱསནགྒཱཧཀཐཱ, ཨཡཾ པན སེནཱསནགྒཱཧོ ནཱམ དུཝིདྷོ ཧོཏི ཨུཏུཀཱལེ ཙ ཝསྶཱཝཱསེ ཙཱ’’ཏི ཨེཝཾ ཨཱགཏོ, ཏསྨཱ སངྒྷེན སམྨཏསེནཱསནགྒཱཧཱཔཀེན ཝིཙཱརེཏབྦཱ།

    Imasmiṃ ṭhāne ‘‘senāsanaggāho nāma vassakālavasena senāsanaggāho, utukālavasena senāsanaggāho, dhuvavāsavasena senāsanaggāhoti tividho hoti. Tesu vassakālavasena senāsanaggāho purimavassavasena senāsanaggāho, pacchimavassavasena senāsanaggāhoti duvidho. Utukālavasena senāsanaggāhopi antarāmuttakavasena senāsanaggāho, taṅkhaṇapaṭisallānavasena senāsanaggāhoti duvidho’’ti ācariyā vadanti, etaṃ pāḷiyā ca aṭṭhakathāya ca asamentaṃ viya dissati. Pāḷiyañhi (cūḷava. 318) ‘‘atha kho bhikkhūnaṃ etadahosi ‘kati nu kho senāsanaggāho’ti. Bhagavato etamatthaṃ ārocesuṃ – tayome, bhikkhave, senāsanaggāhā purimako pacchimako antarāmuttako. Aparajjugatāya āsāḷhiyā purimako gāhetabbo, māsagatāya āsāḷhiyā pacchimako gāhetabbo, aparajjugatāya pavāraṇāya āyatiṃ vassāvāsatthāya antarāmuttako gāhetabbo. Ime kho, bhikkhave, tayo senāsanaggāhā’’ti evaṃ āgato, aṭṭhakathāyampi (cūḷava. aṭṭha. 318) ‘‘tīsu senāsanaggāhesu purimako ca pacchimako cāti ime dve gāhā thāvarā. Antarāmuttake ayaṃ vinicchayo…pe… ayaṃ tāva antovasse vassūpanāyikādivasena pāḷiyaṃ āgatasenāsanaggāhakathā, ayaṃ pana senāsanaggāho nāma duvidho hoti utukāle ca vassāvāse cā’’ti evaṃ āgato, tasmā saṅghena sammatasenāsanaggāhāpakena vicāretabbā.

    སེནཱསནགྒཱཧོ ནཱམ ཨུཏུཀཱལེ སེནཱསནགྒཱཧོ, ཝསྶཱཝཱསེ སེནཱསནགྒཱཧོཏི དུཝིདྷོ། ཏཏྠ ཨུཏུཀཱལོ ནཱམ ཧེམནྟཨུཏུགིམྷཨུཏུཝསེན ཨཊྛ མཱསཱ, ཏསྨིཾ ཀཱལེ བྷིཀྑཱུ ཨནིཡཏཱཝཱསཱ ཧོནྟི, ཏསྨཱ ཡེ ཡདཱ ཨཱགཙྪནྟི, ཏེསཾ ཏདཱ བྷིཀྑཱུ ཨུཊྛཱཔེཏྭཱ སེནཱསནཾ དཱཏབྦཾ, ཨཀཱལོ ནཱམ ནཏྠི། ཨཡཾ ཨུཏུཀཱལེ སེནཱསནགྒཱཧོ ནཱམ། ཝསྶཱཝཱསེ སེནཱསནགྒཱཧོ པན ‘‘པུརིམཀོ པཙྪིམཀོ ཨནྟརཱམུཏྟཀོ’’ཏི པཱལི༹ཡཾ ཨཱགཏནཡེན ཏིཝིདྷོ ཧོཏི། ཨནྟརཱམུཏྟཀོཔི ཧི ཨཱཡཏིཾ ཝསྶཱཝཱསཏྠཱཡ གཱཧིཏཏྟཱ ཝསྶཱཝཱསེ སེནཱསནགྒཱཧམེཝ པཝིསཏི, ན ཨུཏུཀཱལེ སེནཱསནགྒཱཧོ། ཝུཏྟཉྷི བྷགཝཏཱ ‘‘ཨཔརཛྫུགཏཱཡ པཝཱརཎཱཡ ཨཱཡཏིཾ ཝསྶཱཝཱསཏྠཱཡ ཨནྟརཱམུཏྟཀོ གཱཧེཏབྦོ’’ཏི། ཏངྑཎཔཊིསལླཱནཝསེན སེནཱསནགྒཱཧོཏི ཙ ནེཝ པཱལི༹ཡཾ ན ཨཊྛཀཐཱཡཾ ཝིསུཾ ཨཱགཏོ, ཨུཏུཀཱལེ སེནཱསནགྒཱཧོཡེཝ ཏདངྒསེནཱསནགྒཱཧོཏིཔི ཏངྑཎཔཊིསལླཱནཝསེན སེནཱསནགྒཱཧོཏིཔི ཝདནྟི, ཏསྨཱ ཨུཏུཀཱལཝསེན སེནཱསནགྒཱཧོཔི ‘‘ཨནྟརཱམུཏྟཀཝསེན སེནཱསནགྒཱཧོ ཏངྑཎཔཊིསལླཱནཝསེན སེནཱསནགྒཱཧོཏི དུབྦིདྷོ’’ཏི ན ཝཏྟབྦོ།

    Senāsanaggāho nāma utukāle senāsanaggāho, vassāvāse senāsanaggāhoti duvidho. Tattha utukālo nāma hemantautugimhautuvasena aṭṭha māsā, tasmiṃ kāle bhikkhū aniyatāvāsā honti, tasmā ye yadā āgacchanti, tesaṃ tadā bhikkhū uṭṭhāpetvā senāsanaṃ dātabbaṃ, akālo nāma natthi. Ayaṃ utukāle senāsanaggāho nāma. Vassāvāse senāsanaggāho pana ‘‘purimako pacchimako antarāmuttako’’ti pāḷiyaṃ āgatanayena tividho hoti. Antarāmuttakopi hi āyatiṃ vassāvāsatthāya gāhitattā vassāvāse senāsanaggāhameva pavisati, na utukāle senāsanaggāho. Vuttañhi bhagavatā ‘‘aparajjugatāya pavāraṇāya āyatiṃ vassāvāsatthāya antarāmuttako gāhetabbo’’ti. Taṅkhaṇapaṭisallānavasena senāsanaggāhoti ca neva pāḷiyaṃ na aṭṭhakathāyaṃ visuṃ āgato, utukāle senāsanaggāhoyeva tadaṅgasenāsanaggāhotipi taṅkhaṇapaṭisallānavasena senāsanaggāhotipi vadanti, tasmā utukālavasena senāsanaggāhopi ‘‘antarāmuttakavasena senāsanaggāho taṅkhaṇapaṭisallānavasena senāsanaggāhoti dubbidho’’ti na vattabbo.

    ཨཐཱཔི ཝདནྟི ‘‘ཡཐཱཝུཏྟེསུ པཉྩསུ སེནཱསནགྒཱཧེསུ ཙཏྟཱརོ སེནཱསནགྒཱཧཱ པཉྩངྒསམནྣཱགཏེན སེནཱསནགྒཱཧཱཔཀསམྨུཏིལདྡྷེན བྷིཀྑུནཱ ཨནྟོཨུཔཙཱརསཱིམཊྛེན ཧུཏྭཱ ཨནྟོསཱིམཊྛཱནཾ བྷིཀྑཱུནཾ ཡཐཱཝིནཡཾ ཝིཙཱརེཏབྦཱ ཧོནྟི, ཏེ པན ཝིཙཱརཎཱ ཡཱཝཛྫཀཱལཱ ཐཱཝརཱ ཧུཏྭཱ ན ཏིཊྛནྟི, དྷུཝཝཱསཝསེན ཝིཙཱརཎམེཝ ཡཱཝཛྫཀཱལཱ ཐཱཝརཾ ཧུཏྭཱ ཏིཊྛཏཱི’’ཏི, ཏམྤི ཏཐཱ ན སཀྐཱ ཝཏྟུཾ། ཀསྨཱ? སེནཱསནགྒཱཧཱཔཀབྷེདེ ‘‘དྷུཝཝཱསཝསེན སེནཱསནགྒཱཧོ’’ཏི པཱལི༹ཡཾ ཨཊྛཀཐཱཡཉྩ ནཏྠི། དྷུཝཝཱསཝསེན ཝིཙཱརཎཉྩ སམྨུཏིལདྡྷེན སེནཱསནགྒཱཧཱཔཀེན ཝིཙཱརེཏབྦཾ ན ཧོཏི, ཨཐ ཁོ སམགྒེན སངྒྷེན ཨཔལོཀནཀམྨཝསེན དུཝངྒསམནྣཱགཏསྶ བྷིཀྑུསྶ ཨནུཊྛཱཔནཱིཡཾ ཀཏྭཱ དཱནམེཝ, ཏསྨཱ སམགྒོ སངྒྷོ བཧཱུཔཀཱརཏཱགུཎཝིསིཊྛཏཱསངྑཱཏེཧི དྭཱིཧི ཨངྒེཧི སམནྣཱགཏཾ བྷིཀྑུཾ ཨཔལོཀནཀམྨཝསེན སམྨནྣིཏྭཱ ཏསྶ ཕཱསུཀཾ ཨཱཝཱསཾ དྷུཝཝཱསཝསེན ཨནུཊྛཱཔནཱིཡཾ ཀཏྭཱ དེཏི, ཏཾ ཡཱཝཛྫཀཱལཱ ཐཱཝརཾ ཧུཏྭཱ ཏིཊྛཏཱིཏི ཝཏྟབྦཾ།

    Athāpi vadanti ‘‘yathāvuttesu pañcasu senāsanaggāhesu cattāro senāsanaggāhā pañcaṅgasamannāgatena senāsanaggāhāpakasammutiladdhena bhikkhunā antoupacārasīmaṭṭhena hutvā antosīmaṭṭhānaṃ bhikkhūnaṃ yathāvinayaṃ vicāretabbā honti, te pana vicāraṇā yāvajjakālā thāvarā hutvā na tiṭṭhanti, dhuvavāsavasena vicāraṇameva yāvajjakālā thāvaraṃ hutvā tiṭṭhatī’’ti, tampi tathā na sakkā vattuṃ. Kasmā? Senāsanaggāhāpakabhede ‘‘dhuvavāsavasena senāsanaggāho’’ti pāḷiyaṃ aṭṭhakathāyañca natthi. Dhuvavāsavasena vicāraṇañca sammutiladdhena senāsanaggāhāpakena vicāretabbaṃ na hoti, atha kho samaggena saṅghena apalokanakammavasena duvaṅgasamannāgatassa bhikkhussa anuṭṭhāpanīyaṃ katvā dānameva, tasmā samaggo saṅgho bahūpakāratāguṇavisiṭṭhatāsaṅkhātehi dvīhi aṅgehi samannāgataṃ bhikkhuṃ apalokanakammavasena sammannitvā tassa phāsukaṃ āvāsaṃ dhuvavāsavasena anuṭṭhāpanīyaṃ katvā deti, taṃ yāvajjakālā thāvaraṃ hutvā tiṭṭhatīti vattabbaṃ.

    སམགྒོ སངྒྷོཝ དྷུཝཝཱསཝསེན དེཏི, ན སེནཱསནགྒཱཧཱཔཀོཏི ཨཡམཏྠོ ཀཐཾ ཉཱཏབྦོཏི ཙེ? ‘‘སངྒྷོ པན བྷཎྜཱགཱརིཀསྶ ཝཱ དྷམྨཀཐིཀཝིནཡདྷརཱདཱིནཾ ཝཱ གཎཝཱཙཀཨཱཙརིཡསྶ ཝཱ བཧཱུཔཀཱརཏཾ གུཎཝིསིཊྛཏཉྩ སལླཀྑེནྟོ དྷུཝཝཱསཏྠཱཡ ཝིཧཱརཾ སམྨནྣིཏྭཱ དེཏཱི’’ཏི (པཱཙི॰ ཨཊྛ॰ ༡༢༠; ཀངྑཱ॰ ཨཊྛ॰ ཨནུཔཁཛྫསིཀྑཱཔདཝཎྞནཱ) ‘‘སངྒྷོ པན བཧུསྶུཏསྶ ཨུདྡེསཔརིཔུཙྪཱདཱིཧི བཧཱུཔཀཱརསྶ བྷཱརནིཏྠཱརཀསྶ ཕཱསུཀཾ ཨཱཝཱསཾ ཨནུཊྛཱཔནཱིཡཾ ཀཏྭཱ དེཏཱི’’ཏི ཙ ‘‘སངྒྷོ པན བྷཎྜཱགཱརིཀསྶ ཝཱ དྷམྨཀཐིཀཝིནཡདྷརགཎཝཱཙཀཱཙརིཡཱནཾ ཝཱ བཧཱུཔཀཱརཏཾ གུཎཝིསིཊྛཏཉྩ སལླཀྑེཏྭཱ དྷུཝཝཱསཏྠཱཡ ཝིཧཱརཾ སལླཀྑེཏྭཱ སམྨནྣིཏྭཱ དེཏཱི’’ཏི ཙ ‘‘བཧུསྶུཏསྶ སངྒྷབྷཱརནིཏྠཱརཀསྶ བྷིཀྑུནོ ཨནུཊྛཱཔནཱིཡསེནཱསནམྤཱི’’ཏི (པརི॰ ཨཊྛ॰ ༤༩༥-༤༩༦) ཙ ‘‘ཨཔལོཀནཀམྨཾ ནཱམ སཱིམཊྛཀཾ སངྒྷཾ སོདྷེཏྭཱ ཚནྡཱརཧཱནཾ ཚནྡཾ ཨཱཧརིཏྭཱ སམགྒསྶ སངྒྷསྶ ཨནུམཏིཡཱ ཏིཀྑཏྟུཾ སཱཝེཏྭཱ ཀཏྟབྦཾ ཀམྨ’’ནྟི ཙ ཨཊྛཀཐཱསུ (པརི॰ ཨཊྛ॰ ༤༨༢) ཝཙནཏོ སཱདྷུཀཾ ནིསྶཾསཡེན ཉཱཏབྦོཏི།

    Samaggo saṅghova dhuvavāsavasena deti, na senāsanaggāhāpakoti ayamattho kathaṃ ñātabboti ce? ‘‘Saṅgho pana bhaṇḍāgārikassa vā dhammakathikavinayadharādīnaṃ vā gaṇavācakaācariyassa vā bahūpakārataṃ guṇavisiṭṭhatañca sallakkhento dhuvavāsatthāya vihāraṃ sammannitvā detī’’ti (pāci. aṭṭha. 120; kaṅkhā. aṭṭha. anupakhajjasikkhāpadavaṇṇanā) ‘‘saṅgho pana bahussutassa uddesaparipucchādīhi bahūpakārassa bhāranitthārakassa phāsukaṃ āvāsaṃ anuṭṭhāpanīyaṃ katvā detī’’ti ca ‘‘saṅgho pana bhaṇḍāgārikassa vā dhammakathikavinayadharagaṇavācakācariyānaṃ vā bahūpakārataṃ guṇavisiṭṭhatañca sallakkhetvā dhuvavāsatthāya vihāraṃ sallakkhetvā sammannitvā detī’’ti ca ‘‘bahussutassa saṅghabhāranitthārakassa bhikkhuno anuṭṭhāpanīyasenāsanampī’’ti (pari. aṭṭha. 495-496) ca ‘‘apalokanakammaṃ nāma sīmaṭṭhakaṃ saṅghaṃ sodhetvā chandārahānaṃ chandaṃ āharitvā samaggassa saṅghassa anumatiyā tikkhattuṃ sāvetvā kattabbaṃ kamma’’nti ca aṭṭhakathāsu (pari. aṭṭha. 482) vacanato sādhukaṃ nissaṃsayena ñātabboti.

    ཀཐཾ པན ཨཔལོཀནཀམྨེན དཱཏབྦབྷཱཝོ ཝིཉྙཱཡཏཱིཏི? ‘‘བཧུསྶུཏསྶ སངྒྷབྷཱརནིཏྠཱརཀསྶ བྷིཀྑུནོ ཨནུཊྛཱཔནཱིཡསེནཱསནམྤི སངྒྷཀིཙྩཾ ཀརོནྟཱནཾ ཀཔྤིཡཀཱརཀཱདཱིནཾ བྷཏྟཝེཏནམྤི ཨཔལོཀནཀམྨེན དཱཏུཾ ཝཊྚཏཱི’’ཏི པརིཝཱརཊྛཀཐཱཡཾ (པརི॰ ཨཊྛ॰ ༤༩༥-༤༩༦) ཀམྨཝགྒེ ཨཱགཏཏྟཱ ཝིཉྙཱཡཏི། ཀཐཾ པན དུཝངྒསམནྣཱགཏསྶ བྷིཀྑུནོཡེཝ དཱཏབྦབྷཱཝོ ཝིཉྙཱཡཏཱིཏི? ‘‘བཧཱུཔཀཱརཏནྟི བྷཎྜཱགཱརིཀཏཱདིབཧཨུཨུཔཀཱརབྷཱཝཾ། ན ཀེཝལཾ ཨིདམེཝཱཏི ཨཱཧ ‘གུཎཝིསིཊྛཏཉྩཱ’ཏིཨཱདི། ཏེན བཧཱུཔཀཱརཏྟེཔི གུཎཝིསིཊྛཏྟཱབྷཱཝེ, གུཎཝིསིཊྛཏྟེཔི བཧཱུཔཀཱརཏྟཱབྷཱཝེ དཱཏུཾ ན ཝཊྚཏཱིཏི དསྶེཏཱི’’ཏི ཝིནཡཏྠམཉྫཱུསཱཡཾ (ཀངྑཱ॰ ཨཊྛ॰ ཊཱི॰ ཨནུཔཁཛྫསིཀྑཱཔདཝཎྞནཱ) ཝུཏྟཏྟཱ ཝིཉྙཱཡཏི།

    Kathaṃ pana apalokanakammena dātabbabhāvo viññāyatīti? ‘‘Bahussutassa saṅghabhāranitthārakassa bhikkhuno anuṭṭhāpanīyasenāsanampi saṅghakiccaṃ karontānaṃ kappiyakārakādīnaṃ bhattavetanampi apalokanakammena dātuṃ vaṭṭatī’’ti parivāraṭṭhakathāyaṃ (pari. aṭṭha. 495-496) kammavagge āgatattā viññāyati. Kathaṃ pana duvaṅgasamannāgatassa bhikkhunoyeva dātabbabhāvo viññāyatīti? ‘‘Bahūpakāratanti bhaṇḍāgārikatādibahauupakārabhāvaṃ. Na kevalaṃ idamevāti āha ‘guṇavisiṭṭhatañcā’tiādi. Tena bahūpakārattepi guṇavisiṭṭhattābhāve, guṇavisiṭṭhattepi bahūpakārattābhāve dātuṃ na vaṭṭatīti dassetī’’ti vinayatthamañjūsāyaṃ (kaṅkhā. aṭṭha. ṭī. anupakhajjasikkhāpadavaṇṇanā) vuttattā viññāyati.

    ཀསྨཱ པན སེནཱསནགྒཱཧཱཔཀེན ཝིཙཱརེཏབྦོ སེནཱསནགྒཱཧོ ཡཱཝཛྫཀཱལཱ ན ཏིཊྛཏཱིཏི? པཉྩངྒསམནྣཱགཏསྶ སེནཱསནགྒཱཧཱཔཀསྶ བྷིཀྑུནོ དུལླབྷཏྟཱ, ནཱནཱདེསཝཱསཱིནཾ ནཱནཱཙརིཡཀུལསམྦྷཝཱནཾ བྷིཀྑཱུནཾ ཨེཀསམྦྷོགཔརིབྷོགསྶ དུཀྐརཏྟཱ ཙ ཨིམེཧི དྭཱིཧི ཀཱརཎེཧི ན ཏིཊྛཏི། ཝུཏྟཉྷེཏཾ བྷགཝཏཱ ‘‘ཨནུཛཱནཱམི, བྷིཀྑཝེ, པཉྩཧངྒེཧི སམནྣཱགཏཾ བྷིཀྑུཾ སེནཱསནགྒཱཧཱཔཀཾ སམྨནྣིཏུཾ, ཡོ ན ཚནྡཱགཏིཾ གཙྪེཡྻ, ན དོསཱགཏིཾ གཙྪེཡྻ, ན མོཧཱགཏིཾ གཙྪེཡྻ, ན བྷཡཱགཏིཾ གཙྪེཡྻ , གཧིཏཱགཧིཏཉྩ ཛཱནེཡྻཱ’’ཏི (ཙཱུལ༹ཝ॰ ༣༡༧)། ཨཊྛཀཐཱཡམྤི (པཱཙི॰ ཨཊྛ॰ ༡༢༢) ‘‘ཨེཝརཱུཔེན ཧི སབྷཱགཔུགྒལེན ཨེཀཝིཧཱརེ ཝཱ ཨེཀཔརིཝེཎེ ཝཱ ཝསནྟེན ཨཏྠོ ནཏྠཱི’’ཏི ཝུཏྟཾ། ཀསྨཱ པན དྷུཝཝཱསཏྠཱཡ དཱནཝིཙཱརོ ཡཱཝཛྫཀཱལཱ ཏིཊྛཏཱིཏི? པཉྩངྒསམནྣཱགཏཱབྷཱཝེཔི སཱིམཊྛཀསྶ སམགྒསྶ སངྒྷསྶ ཨནུམཏིཡཱ ཀཏྟབྦཏྟཱ། ཝུཏྟཉྷི ‘‘ཨཔལོཀནཀམྨཾ ནཱམ སཱིམཊྛཀཾ སངྒྷཾ སོདྷེཏྭཱ ཚནྡཱརཧཱནཾ ཚནྡཾ ཨཱཧརིཏྭཱ སམགྒསྶ སངྒྷསྶ ཨནུམཏིཡཱ ཏིཀྑཏྟུཾ སཱཝེཏྭཱ ཀཏྟབྦཾ ཀམྨ’’ནྟི (པརི॰ ཨཊྛ॰ ༤༨༢)།

    Kasmā pana senāsanaggāhāpakena vicāretabbo senāsanaggāho yāvajjakālā na tiṭṭhatīti? Pañcaṅgasamannāgatassa senāsanaggāhāpakassa bhikkhuno dullabhattā, nānādesavāsīnaṃ nānācariyakulasambhavānaṃ bhikkhūnaṃ ekasambhogaparibhogassa dukkarattā ca imehi dvīhi kāraṇehi na tiṭṭhati. Vuttañhetaṃ bhagavatā ‘‘anujānāmi, bhikkhave, pañcahaṅgehi samannāgataṃ bhikkhuṃ senāsanaggāhāpakaṃ sammannituṃ, yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, na bhayāgatiṃ gaccheyya , gahitāgahitañca jāneyyā’’ti (cūḷava. 317). Aṭṭhakathāyampi (pāci. aṭṭha. 122) ‘‘evarūpena hi sabhāgapuggalena ekavihāre vā ekapariveṇe vā vasantena attho natthī’’ti vuttaṃ. Kasmā pana dhuvavāsatthāya dānavicāro yāvajjakālā tiṭṭhatīti? Pañcaṅgasamannāgatābhāvepi sīmaṭṭhakassa samaggassa saṅghassa anumatiyā kattabbattā. Vuttañhi ‘‘apalokanakammaṃ nāma sīmaṭṭhakaṃ saṅghaṃ sodhetvā chandārahānaṃ chandaṃ āharitvā samaggassa saṅghassa anumatiyā tikkhattuṃ sāvetvā kattabbaṃ kamma’’nti (pari. aṭṭha. 482).

    ཨུཏུཀཱལེ སངྒྷིཀསེནཱསནེ ཝསནྟེན ཨཱགཏོ བྷིཀྑུ ན པཊིབཱཧེཏབྦོ ཨཉྙཏྲ ཨནུཊྛཱཔནཱིཡཱ། ཝུཏྟཉྷི བྷགཝཏཱ ‘‘ཨནུཛཱནཱམི, བྷིཀྑཝེ, ཝསྶཱནཾ ཏེམཱསཾ པཊིབཱཧིཏུཾ, ཨུཏུཀཱལཾ པན ན པཊིབཱཧིཏུ’’ནྟི (ཙཱུལ༹ཝ॰ ༣༡༨)། ‘‘ཨཉྙཏྲ ཨནུཊྛཱཔནཱིཡཱ’’ཏི ཝུཏྟཾ, ཀཏམེ ཨནུཊྛཱཔནཱིཡཱཏི? ཙཏྟཱརོ ཨནུཊྛཱཔནཱིཡཱ ཝུཌྜྷཏརོ, བྷཎྜཱགཱརིཀོ, གིལཱནོ, སངྒྷཏོ ལདྡྷསེནཱསནོ ཙ། ཏཏྠ ཝུཌྜྷཏརོ བྷིཀྑུ ཏསྨིཾ ཝིཧཱརེ ཨནྟོསཱིམཊྛཀབྷིཀྑཱུསུ ཨཏྟནཱ ཝུཌྜྷཏརསྶ ཨཉྙསྶ ཨབྷཱཝཱ ཡཐཱཝུཌྜྷཾ ཀེནཙི ཨནུཊྛཱཔནཱིཡོ། བྷཎྜཱགཱརིཀོ སངྒྷེན སམྨནྣིཏྭཱ བྷཎྜཱགཱརསྶ དིནྣཏཱཡ སངྒྷསྶ བྷཎྜཾ རཀྑནྟོ གོཔེནྟོ ཝསཏི, ཏསྨཱ སོ བྷཎྜཱགཱརིཀོ ཀེནཙི ཨནུཊྛཱཔནཱིཡོ། གིལཱནོ གེལཉྙཱབྷིབྷཱུཏོ ཨཏྟནོ ལདྡྷསེནཱསནེ ཝསནྟོ ཀེནཙི ཨནུཊྛཱཔནཱིཡོ། སངྒྷཏོ ལདྡྷསེནཱསནོ སམགྒེན སངྒྷེན དིནྣསེནཱསནཏྟཱ ཀེནཙི ཨནུཊྛཱཔནཱིཡོ། ཝུཏྟཉྷི ཨཊྛཀཐཱཡཾ (མཧཱཝ॰ ཨཊྛ॰ ༣༤༣) ‘‘ཙཏྟཱརོ ཧི ན ཝུཊྛཱཔེཏབྦཱ ཝུཌྜྷཏརོ, བྷཎྜཱགཱརིཀོ, གིལཱནོ, སངྒྷཏོ ལདྡྷསེནཱསནོཏི། ཏཏྠ ཝུཌྜྷཏརོ ཨཏྟནོ ཝུཌྜྷཏཱཡ ནཝཀཏརེན ན ཝུཊྛཱཔེཏབྦོ, བྷཎྜཱགཱརིཀོ སངྒྷེན སམྨནྣིཏྭཱ བྷཎྜཱགཱརསྶ དིནྣཏཱཡ, གིལཱནོ ཨཏྟནོ གིལཱནཏཱཡ, སངྒྷོ པན བཧུསྶུཏསྶ ཨུདྡེསཔརིཔུཙྪཱདཱིཧི བཧཱུཔཀཱརསྶ བྷཱརནིཏྠཱརཀསྶ ཕཱསུཀཾ ཨཱཝཱསཾ ཨནུཊྛཱཔནཱིཡཾ ཀཏྭཱ དེཏི, ཏསྨཱ སོ ཨུཔཀཱརཀཏཱཡ ཙ སངྒྷཏོ ལདྡྷཏཱཡ ཙ ན ཝུཊྛཱཔེཏབྦོ’’ཏི། ཋཔེཏྭཱ ཨིམེ ཙཏྟཱརོ ཨཝསེསཱ ཝུཊྛཱཔནཱིཡཱཝ ཧོནྟི།

    Utukāle saṅghikasenāsane vasantena āgato bhikkhu na paṭibāhetabbo aññatra anuṭṭhāpanīyā. Vuttañhi bhagavatā ‘‘anujānāmi, bhikkhave, vassānaṃ temāsaṃ paṭibāhituṃ, utukālaṃ pana na paṭibāhitu’’nti (cūḷava. 318). ‘‘Aññatra anuṭṭhāpanīyā’’ti vuttaṃ, katame anuṭṭhāpanīyāti? Cattāro anuṭṭhāpanīyā vuḍḍhataro, bhaṇḍāgāriko, gilāno, saṅghato laddhasenāsano ca. Tattha vuḍḍhataro bhikkhu tasmiṃ vihāre antosīmaṭṭhakabhikkhūsu attanā vuḍḍhatarassa aññassa abhāvā yathāvuḍḍhaṃ kenaci anuṭṭhāpanīyo. Bhaṇḍāgāriko saṅghena sammannitvā bhaṇḍāgārassa dinnatāya saṅghassa bhaṇḍaṃ rakkhanto gopento vasati, tasmā so bhaṇḍāgāriko kenaci anuṭṭhāpanīyo. Gilāno gelaññābhibhūto attano laddhasenāsane vasanto kenaci anuṭṭhāpanīyo. Saṅghato laddhasenāsano samaggena saṅghena dinnasenāsanattā kenaci anuṭṭhāpanīyo. Vuttañhi aṭṭhakathāyaṃ (mahāva. aṭṭha. 343) ‘‘cattāro hi na vuṭṭhāpetabbā vuḍḍhataro, bhaṇḍāgāriko, gilāno, saṅghato laddhasenāsanoti. Tattha vuḍḍhataro attano vuḍḍhatāya navakatarena na vuṭṭhāpetabbo, bhaṇḍāgāriko saṅghena sammannitvā bhaṇḍāgārassa dinnatāya, gilāno attano gilānatāya, saṅgho pana bahussutassa uddesaparipucchādīhi bahūpakārassa bhāranitthārakassa phāsukaṃ āvāsaṃ anuṭṭhāpanīyaṃ katvā deti, tasmā so upakārakatāya ca saṅghato laddhatāya ca na vuṭṭhāpetabbo’’ti. Ṭhapetvā ime cattāro avasesā vuṭṭhāpanīyāva honti.

    ཨཔརསྨིཾ བྷིཀྑུམྷི ཨཱགཏེ ཝུཊྛཱཔེཏྭཱ སེནཱསནཾ དཱཔེཏབྦཾ། ཝུཏྟཉྷི ཨཊྛཀཐཱཡཾ (ཙཱུལ༹ཝ॰ ཨཊྛ॰ ༣༡༨) ‘‘ཨུཏུཀཱལེ ཏཱཝ ཀེཙི ཨཱགནྟུཀཱ བྷིཀྑཱུ པུརེབྷཏྟཾ ཨཱགཙྪནྟི, ཀེཙི པཙྪཱབྷཏྟཾ པཋམཡཱམཾ ཝཱ མཛ྄ཛྷིམཡཱམཾ ཝཱ པཙྪིམཡཱམཾ ཝཱ, ཡེ ཡདཱ ཨཱགཙྪནྟི, ཏེསཾ ཏདཱཝ བྷིཀྑཱུ ཨུཊྛཱཔེཏྭཱ སེནཱསནཾ དཱཏབྦཾ, ཨཀཱལོ ནཱམ ནཏྠཱི’’ཏི། ཨེཏརཧི པན སདྡྷཱ པསནྣཱ མནུསྶཱ ཝིཧཱརཾ ཀཏྭཱ ཨཔྤེཀཙྩེ པཎྜིཏཱནཾ ཝཙནཾ སུཏྭཱ ‘‘སངྒྷེ དིནྣཾ མཧཔྥལ’’ནྟི ཉཏྭཱ ཙཱཏུདྡིསཾ སངྒྷཾ ཨཱརབྦྷ ‘‘ཨིམཾ ཝིཧཱརཾ ཨཱགཏཱནཱགཏསྶ ཙཱཏུདྡིསསྶ སངྒྷསྶ དེམཱ’’ཏི ཝཏྭཱ དེནྟི, ཨཔྤེཀཙྩེ ཨཏྟནཱ པསནྣཾ བྷིཀྑུཾ ཨཱརབྦྷ ཝིཧཱརཾ ཀཏྭཱཔི དཱནཀཱལེ ཏེན ཨུཡྻོཛིཏཱ ཧུཏྭཱ ཙཱཏུདྡིསཾ སངྒྷཾ ཨཱརབྦྷ ཝུཏྟནཡེན དེནྟི, ཨཔྤེཀཙྩེ ཀརཎཀཱལེཔི དཱནཀཱལེཔི ཨཏྟནོ ཀུལཱུཔཀབྷིཀྑུམེཝ ཨཱརབྦྷ པརིཙྩཛནྟི, ཏཐཱཔི དཀྑིཎོདཀཔཱཏནཀཱལེ ཏེན སིཀྑཱཔིཏཱ ཡཐཱཝུཏྟཔཱཋཾ ཝཙཱིབྷེདཾ ཀརོནྟི, ཙིཏྟེན པན ཀུལཱུཔཀསྶེཝ དེནྟི, ན སབྦསངྒྷསཱདྷཱརཎཏྠཾ ཨིཙྪནྟི།

    Aparasmiṃ bhikkhumhi āgate vuṭṭhāpetvā senāsanaṃ dāpetabbaṃ. Vuttañhi aṭṭhakathāyaṃ (cūḷava. aṭṭha. 318) ‘‘utukāle tāva keci āgantukā bhikkhū purebhattaṃ āgacchanti, keci pacchābhattaṃ paṭhamayāmaṃ vā majjhimayāmaṃ vā pacchimayāmaṃ vā, ye yadā āgacchanti, tesaṃ tadāva bhikkhū uṭṭhāpetvā senāsanaṃ dātabbaṃ, akālo nāma natthī’’ti. Etarahi pana saddhā pasannā manussā vihāraṃ katvā appekacce paṇḍitānaṃ vacanaṃ sutvā ‘‘saṅghe dinnaṃ mahapphala’’nti ñatvā cātuddisaṃ saṅghaṃ ārabbha ‘‘imaṃ vihāraṃ āgatānāgatassa cātuddisassa saṅghassa demā’’ti vatvā denti, appekacce attanā pasannaṃ bhikkhuṃ ārabbha vihāraṃ katvāpi dānakāle tena uyyojitā hutvā cātuddisaṃ saṅghaṃ ārabbha vuttanayena denti, appekacce karaṇakālepi dānakālepi attano kulūpakabhikkhumeva ārabbha pariccajanti, tathāpi dakkhiṇodakapātanakāle tena sikkhāpitā yathāvuttapāṭhaṃ vacībhedaṃ karonti, cittena pana kulūpakasseva denti, na sabbasaṅghasādhāraṇatthaṃ icchanti.

    ཨིམེསུ ཏཱིསུ དཱནེསུ པཋམཾ པུབྦཀཱལེཔི དཱནཀཱལེཔི སངྒྷཾ ཨུདྡིསྶ པཝཏྟཏྟཱ སབྦསངྒྷིཀཾ ཧོཏི། དུཏིཡཾ པུབྦཀཱལེ པུགྒལཾ ཨུདྡིསྶ པཝཏྟམཱནམྤི དཱནཀཱལེ སངྒྷཾ ཨུདྡིསྶ པཝཏྟཏྟཱ སངྒྷིཀམེཝ། ཏཏིཡཾ པན པུབྦཀཱལེཔི དཱནཀཱལེཔི ཀུལཱུཔཀཔུགྒལམེཝ ཨུདྡིསྶ པཝཏྟཏི, ན སངྒྷཾ, ཀེཝལཾ བྷིཀྑུནཱ ཝུཏྟཱནུསཱརེནེཝ ཝཙཱིབྷེདཾ ཀརོནྟི། ཨེཝཾ སནྟེ ‘‘ཀིཾ ཨཡཾ ཝིཧཱརོ ཙིཏྟཝསེན པུགྒལིཀོ ཧོཏི, ཝཙཱིབྷེདཝསེན སངྒྷིཀོ’’ཏི ཙིནྟཱཡཾ ཨེཀཙྩེ ཨེཝཾ ཝདེཡྻུཾ –

    Imesu tīsu dānesu paṭhamaṃ pubbakālepi dānakālepi saṅghaṃ uddissa pavattattā sabbasaṅghikaṃ hoti. Dutiyaṃ pubbakāle puggalaṃ uddissa pavattamānampi dānakāle saṅghaṃ uddissa pavattattā saṅghikameva. Tatiyaṃ pana pubbakālepi dānakālepi kulūpakapuggalameva uddissa pavattati, na saṅghaṃ, kevalaṃ bhikkhunā vuttānusāreneva vacībhedaṃ karonti. Evaṃ sante ‘‘kiṃ ayaṃ vihāro cittavasena puggaliko hoti, vacībhedavasena saṅghiko’’ti cintāyaṃ ekacce evaṃ vadeyyuṃ –

    ‘‘མནོཔུབྦངྒམཱ དྷམྨཱ, མནོསེཊྛཱ མནོམཡཱ།

    ‘‘Manopubbaṅgamā dhammā, manoseṭṭhā manomayā;

    མནསཱ ཙེ པསནྣེན, བྷཱསཏི ཝཱ ཀརོཏི ཝཱ།

    Manasā ce pasannena, bhāsati vā karoti vā;

    ཏཏོ ནཾ སུཁམནྭེཏི, ཚཱཡཱཝ ཨནཔཱཡིནཱིཏི༎ (དྷ॰ པ॰ ༢) –

    Tato naṃ sukhamanveti, chāyāva anapāyinīti. (dha. pa. 2) –

    ཝཙནཏོ ཙིཏྟཝསེན པུགྒལིཀོ ཧོཏཱི’’ཏི། ཨཉྙེ ‘‘ཡཐཱ དཱཡཀཱ ཝདནྟི, ཏཐཱ པཊིཔཛྫིཏབྦནྟི (ཙཱུལ༹ཝ॰ ཨཊྛ॰ ༣༢༥) ཝཙནཏོ ཝཙཱིབྷེདཝསེན སངྒྷིཀོ ཧོཏཱི’’ཏི།

    Vacanato cittavasena puggaliko hotī’’ti. Aññe ‘‘yathā dāyakā vadanti, tathā paṭipajjitabbanti (cūḷava. aṭṭha. 325) vacanato vacībhedavasena saṅghiko hotī’’ti.

    ཏཏྲཱཡཾ ཝིཙཱརཎཱ – ཨིདཾ དཱནཾ པུབྦེ པུགྒལསྶ པརིཎཏཾ པཙྪཱ སངྒྷསྶ པརིཎཱམིཏཾ, ཏསྨཱ ‘‘སངྒྷིཀོ’’ཏི ཝུཏྟེ ནཝསུ ཨདྷམྨིཀདཱནེསུ ‘‘པུགྒལསྶ པརིཎཏཾ སངྒྷསྶ པརིཎཱམེཏཱི’’ཏི (པཱརཱ॰ ༦༦༠) ཝུཏྟཾ ཨཊྛམཾ ཨདྷམྨིཀདཱནཾ ཧོཏི, ཏསྶ དཱནསྶ པཊིགྒཧཱཔི པརིབྷོགཱཔི ཨདྷམྨིཀཔཊིགྒཧཱ ཨདྷམྨིཀཔརིབྷོགཱ ཧོནྟི། ‘‘པུགྒལིཀོ’’ཏི ཝུཏྟེ ཏཱིསུ དྷམྨིཀདཱནེསུ ‘‘པུགྒལསྶ དིནྣཾ པུགྒལསྶེཝ དེཏཱི’’ཏི ཝུཏྟཾ ཏཏིཡདྷམྨིཀདཱནཾ ཧོཏི, ཏསྶ པཊིགྒཧཱཔི པརིབྷོགཱཔི དྷམྨིཀཔཊིགྒཧཱ དྷམྨིཀཔརིབྷོགཱ ཧོནྟི, ཏསྨཱ པུགྒལིཀཔཀྑཾ བྷཛཏི། ཨཔྤེཀཙྩེ སུཏྟནྟིཀཱདིགཎེ པསཱིདིཏྭཱ ཝིཧཱརཾ ཀཱརེཏྭཱ གཎསྶ དེནྟི ‘‘ཨིམཾ ཝིཧཱརཾ ཨཱཡསྨནྟཱནཾ དམྨཱི’’ཏི། ཨཔྤེཀཙྩེ པུགྒལེ པསཱིདིཏྭཱ ཝིཧཱརཾ ཀཏྭཱ པུགྒལསྶ དེནྟི ‘‘ཨིམཾ ཝིཧཱརཾ ཨཱཡསྨཏོ དམྨཱི’’ཏི། ཨེཏེ པན གཎསནྟཀཔུགྒལིཀཱ ཝིཧཱརཱ དཱནཀཱལཏོ པཊྛཱཡ པཊིགྒཱཧཀསནྟཀཱཝ ཧོནྟི, ན དཱཡཀསནྟཀཱ། ཏེསུ གཎསནྟཀོ ཏཱཝ ཨེཀཙྩེསུ མཏེསུ ཨཝསེསཱནཾ སནྟཀོ, ཏེསུ དྷརམཱནེསུཡེཝ ཀསྶཙི དེནྟི, ཏསྶ སནྟཀོ། ཀསྶཙི ཨདཏྭཱ སབྦེསུ མཏེསུ སངྒྷིཀོ ཧོཏི། ཝུཏྟཉྷི ཨཊྛཀཐཱཡཾ (མཧཱཝ॰ ཨཊྛ॰ ༣༦༩) ‘‘དྭིནྣཾ སནྟཀཾ ཧོཏི ཨཝིབྷཏྟཾ, ཨེཀསྨིཾ ཀཱལཀཏེ ཨིཏརོ སཱམཱི, བཧཱུནཾ སནྟཀེཔི ཨེསེཝ ནཡོ། སབྦེསུ མཏེསུ སངྒྷིཀཾཝ ཧོཏཱི’’ཏི།

    Tatrāyaṃ vicāraṇā – idaṃ dānaṃ pubbe puggalassa pariṇataṃ pacchā saṅghassa pariṇāmitaṃ, tasmā ‘‘saṅghiko’’ti vutte navasu adhammikadānesu ‘‘puggalassa pariṇataṃ saṅghassa pariṇāmetī’’ti (pārā. 660) vuttaṃ aṭṭhamaṃ adhammikadānaṃ hoti, tassa dānassa paṭiggahāpi paribhogāpi adhammikapaṭiggahā adhammikaparibhogā honti. ‘‘Puggaliko’’ti vutte tīsu dhammikadānesu ‘‘puggalassa dinnaṃ puggalasseva detī’’ti vuttaṃ tatiyadhammikadānaṃ hoti, tassa paṭiggahāpi paribhogāpi dhammikapaṭiggahā dhammikaparibhogā honti, tasmā puggalikapakkhaṃ bhajati. Appekacce suttantikādigaṇe pasīditvā vihāraṃ kāretvā gaṇassa denti ‘‘imaṃ vihāraṃ āyasmantānaṃ dammī’’ti. Appekacce puggale pasīditvā vihāraṃ katvā puggalassa denti ‘‘imaṃ vihāraṃ āyasmato dammī’’ti. Ete pana gaṇasantakapuggalikā vihārā dānakālato paṭṭhāya paṭiggāhakasantakāva honti, na dāyakasantakā. Tesu gaṇasantako tāva ekaccesu matesu avasesānaṃ santako, tesu dharamānesuyeva kassaci denti, tassa santako. Kassaci adatvā sabbesu matesu saṅghiko hoti. Vuttañhi aṭṭhakathāyaṃ (mahāva. aṭṭha. 369) ‘‘dvinnaṃ santakaṃ hoti avibhattaṃ, ekasmiṃ kālakate itaro sāmī, bahūnaṃ santakepi eseva nayo. Sabbesu matesu saṅghikaṃva hotī’’ti.

    པུགྒལིཀཝིཧཱརོཔི ཡདི སོ པཊིགྒཱཧཀཔུགྒལོ ཨཏྟནོ ཛཱིཝམཱནཀཱལེཡེཝ སདྡྷིཝིཧཱརིཀཱདཱིནཾ དེཏི, ཀོཙི ཝཱ ཏསྶ ཝིསྶཱསེན ཏཾ ཝིཧཱརཾ ཨགྒཧེསི, ཏསྶ སནྟཀོ ཧོཏི། ཀསྶཙི ཨདཏྭཱ ཀཱལཀཏེ སངྒྷིཀོ ཧོཏི། ཝུཏྟཉྷི ཨཊྛཀཐཱཡཾ ‘‘སོ ཛཱིཝམཱནོཡེཝ སབྦཾ ཨཏྟནོ པརིཀྑཱརཾ ནིསྶཛྫིཏྭཱ ཀསྶཙི ཨདཱསི, ཀོཙི ཝཱ ཝིསྶཱསཾ ཨགྒཧེསི། ཡསྶ དིནྣོ, ཡེན ཙ གཧིཏོ, ཏསྶེཝ ཧོཏཱི’’ཏི། པཱལི༹ཡཉྩ (མཧཱཝ॰ ༣༦༩) ‘‘བྷིཀྑུསྶ, བྷིཀྑཝེ, ཀཱལཀཏེ སངྒྷོ སཱམཱི པཏྟཙཱིཝརེ, ཨཔིཙ གིལཱནུཔཊྛཱཀཱ བཧཱུཔཀཱརཱ། ཨནུཛཱནཱམི, བྷིཀྑཝེ, སངྒྷེན ཏིཙཱིཝརཉྩ པཏྟཉྩ གིལཱནུཔཊྛཱཀཱནཾ དཱཏུཾ, ཡཾ ཏཏྠ ལཧུབྷཎྜཾ ལཧུཔརིཀྑཱརཾ, ཏཾ སམྨུཁཱིབྷཱུཏེན སངྒྷེན བྷཱཛེཏུཾ, ཡཾ ཏཏྠ གརུབྷཎྜཾ གརུཔརིཀྑཱརཾ, ཏཾ ཨཱགཏཱནཱགཏསྶ ཙཱཏུདྡིསསྶ སངྒྷསྶ ཨཝིསྶཛྫིཡཾ ཨཝེབྷངྒིཀ’’ནྟི (མཧཱཝ॰ ༣༦༩) ཝུཏྟཾ, ཏསྨཱ ཨིམིནཱ ནཡེན ཝིནིཙྪཡོ ཀཱཏབྦོ།

    Puggalikavihāropi yadi so paṭiggāhakapuggalo attano jīvamānakāleyeva saddhivihārikādīnaṃ deti, koci vā tassa vissāsena taṃ vihāraṃ aggahesi, tassa santako hoti. Kassaci adatvā kālakate saṅghiko hoti. Vuttañhi aṭṭhakathāyaṃ ‘‘so jīvamānoyeva sabbaṃ attano parikkhāraṃ nissajjitvā kassaci adāsi, koci vā vissāsaṃ aggahesi. Yassa dinno, yena ca gahito, tasseva hotī’’ti. Pāḷiyañca (mahāva. 369) ‘‘bhikkhussa, bhikkhave, kālakate saṅgho sāmī pattacīvare, apica gilānupaṭṭhākā bahūpakārā. Anujānāmi, bhikkhave, saṅghena ticīvarañca pattañca gilānupaṭṭhākānaṃ dātuṃ, yaṃ tattha lahubhaṇḍaṃ lahuparikkhāraṃ, taṃ sammukhībhūtena saṅghena bhājetuṃ, yaṃ tattha garubhaṇḍaṃ garuparikkhāraṃ, taṃ āgatānāgatassa cātuddisassa saṅghassa avissajjiyaṃ avebhaṅgika’’nti (mahāva. 369) vuttaṃ, tasmā iminā nayena vinicchayo kātabbo.

    སངྒྷིཀེ པན པཱལི༹ཡཾ ཨཱགཏཱནཾ ‘‘པུརིམཀོ པཙྪིམཀོ ཨནྟརཱམུཏྟཀོ ཙཱ’’ཏི (ཙཱུལ༹ཝ॰ ༣༡༨) ཝུཏྟཱནཾ ཏིཎྞཾ སེནཱསནགྒཱཧཱནཉྩ ཨཊྛཀཐཱཡཾ (ཙཱུལ༹ཝ॰ ཨཊྛ॰ ༣༡༨) ཨཱགཏཱནཾ ‘‘ཨུཏུཀཱལེ ཙ ཝསྶཱཝཱསེ ཙཱ’’ཏི ཝུཏྟཱནཾ དྭིནྣཾ སེནཱསནགྒཱཧཱནཉྩ ཨེཏརཧི ཨསམྤཛྫནཏོ ཨནུཊྛཱཔནཱིཡཔཱལི༹ཡཾ ཨཱགཏསྶ ཨཏྟནོ སབྷཱཝེན ཨནུཊྛཱཔནཱིཡསྶ དྷུཝཝཱསཏྠཱཡ སངྒྷེན དིནྣཏཱཡ ཨནུཊྛཱཔནཱིཡསྶ ཝསེནེཝ ཝིནིཙྪཡོ ཧོཏི། ཝུཌྜྷཏརགིལཱནཱ ཧི ཨཏྟནོ སབྷཱཝེན ཨནུཊྛཱཔནཱིཡཱ ཧོནྟི། ཝུཏྟཉྷེཏཾ ཨཊྛཀཐཱཡཾ (མཧཱཝ॰ ཨཊྛ॰ ༣༤༣) ‘‘ཝུཌྜྷཏརོ ཨཏྟནོ ཝུཌྜྷཏཱཡ ནཝཀཏརེན ན ཝུཊྛཱཔེཏབྦོ, གིལཱནོ ཨཏྟནོ གིལཱནཏཱཡཱ’’ཏི། བྷཎྜཱགཱརིཀདྷམྨཀཐིཀཱདཡོ དྷུཝཝཱསཏྠཱཡ སངྒྷེན དིནྣཏཱཡ ཨནུཊྛཱཔནཱིཡཱ ཧོནྟི། ཝུཏྟཉྷི ‘‘སངྒྷོ པན བྷཎྜཱགཱརིཀསྶ ཝཱ དྷམྨཀཐིཀཝིནཡདྷརཱདཱིནཾ ཝཱ…པེ॰… དྷུཝཝཱསཏྠཱཡ ཝིཧཱརཾ སམྨནྣིཏྭཱ དེཏི, ཏསྨཱ ཡསྶ སངྒྷེན དིནྣོ, སོཔི ཨནུཊྛཱཔནཱིཡོ’’ཏི (པཱཙི॰ ཨཊྛ॰ ༡༢༠; ཀངྑཱ॰ ཨཊྛ॰ ཨནུཔཁཛྫསིཀྑཱཔདཝཎྞནཱ)། སོ ཨེཝཾ ཝེདིཏབྦོ – ཨེཏརཧི སངྒྷིཀཝིཧཱརེསུ སངྒྷཏྠེརེསུ ཡཐཱཀམྨངྒཏེསུ ཏསྨིཾ ཝིཧཱརེ ཡོ བྷིཀྑུ ཝུཌྜྷཏརོ, སོཔི ‘‘ཨཡཾ ཝིཧཱརོ མཡཱ ཝསིཏབྦོ’’ཏི ཝདཏི། ཡོ ཏཏྠ བྱཏྟོ པཊིབལོ, སོཔི ཏཐེཝ ཝདཏི། ཡེན སོ ཝིཧཱརོ ཀཱརིཏོ, སོཔི ‘‘མཡཱ པསཱིདིཏཔུགྒལོ ཨཱརོཔེཏབྦོ’’ཏི ཝདཏི། སངྒྷོཔི ‘‘མཡམེཝ ཨིསྶརཱ, ཏསྨཱ ཨམྷེཧི ཨིཙྪིཏཔུགྒལོ ཨཱརོཔེཏབྦོ’’ཏི ཝདཏི། ཨེཝཾདྭིདྷཱ ཝཱ ཏིདྷཱ ཝཱ ཙཏུདྷཱ ཝཱ བྷིནྣེསུ མཧནྟཾ ཨདྷིཀརཎཾ ཧོཏི།

    Saṅghike pana pāḷiyaṃ āgatānaṃ ‘‘purimako pacchimako antarāmuttako cā’’ti (cūḷava. 318) vuttānaṃ tiṇṇaṃ senāsanaggāhānañca aṭṭhakathāyaṃ (cūḷava. aṭṭha. 318) āgatānaṃ ‘‘utukāle ca vassāvāse cā’’ti vuttānaṃ dvinnaṃ senāsanaggāhānañca etarahi asampajjanato anuṭṭhāpanīyapāḷiyaṃ āgatassa attano sabhāvena anuṭṭhāpanīyassa dhuvavāsatthāya saṅghena dinnatāya anuṭṭhāpanīyassa vaseneva vinicchayo hoti. Vuḍḍhataragilānā hi attano sabhāvena anuṭṭhāpanīyā honti. Vuttañhetaṃ aṭṭhakathāyaṃ (mahāva. aṭṭha. 343) ‘‘vuḍḍhataro attano vuḍḍhatāya navakatarena na vuṭṭhāpetabbo, gilāno attano gilānatāyā’’ti. Bhaṇḍāgārikadhammakathikādayo dhuvavāsatthāya saṅghena dinnatāya anuṭṭhāpanīyā honti. Vuttañhi ‘‘saṅgho pana bhaṇḍāgārikassa vā dhammakathikavinayadharādīnaṃ vā…pe… dhuvavāsatthāya vihāraṃ sammannitvā deti, tasmā yassa saṅghena dinno, sopi anuṭṭhāpanīyo’’ti (pāci. aṭṭha. 120; kaṅkhā. aṭṭha. anupakhajjasikkhāpadavaṇṇanā). So evaṃ veditabbo – etarahi saṅghikavihāresu saṅghattheresu yathākammaṅgatesu tasmiṃ vihāre yo bhikkhu vuḍḍhataro, sopi ‘‘ayaṃ vihāro mayā vasitabbo’’ti vadati. Yo tattha byatto paṭibalo, sopi tatheva vadati. Yena so vihāro kārito, sopi ‘‘mayā pasīditapuggalo āropetabbo’’ti vadati. Saṅghopi ‘‘mayameva issarā, tasmā amhehi icchitapuggalo āropetabbo’’ti vadati. Evaṃdvidhā vā tidhā vā catudhā vā bhinnesu mahantaṃ adhikaraṇaṃ hoti.

    ཏེསུ ཝུཌྜྷཏརོ ‘‘ན ཏྭེཝཱཧཾ, བྷིཀྑཝེ, ཀེནཙི པརིཡཱཡེན ཝུཌྜྷཏརསྶ ཨཱསནཾ པཊིབཱཧིཏབྦནྟི ཝདཱམི, ཡོ པཊིབཱཧེཡྻ, ཨཱཔཏྟི དུཀྐཊསྶཱ’’ཏི པཱལི༹པཱཋཉྩ (མཧཱཝ॰ ༤༧༣; ཙཱུལ༹ཝ॰ ༣༡༦), ‘‘ཝུཌྜྷཏརོ ཨཏྟནོ ཝུཌྜྷཏཱཡ ནཝཀཏརེན ན ཝུཊྛཱཔེཏབྦོ’’ཏི ཨཊྛཀཐཱཝཙནཉྩ (པཱཙི॰ ཨཊྛ॰ ༡༡༩ ཨཱདཡོ; ཀངྑཱ॰ ཨཊྛ॰ ཨནུཔཁཛྫསིཀྑཱཔདཝཎྞནཱ) གཧེཏྭཱ ‘‘ཨཧམེཝ ཨེཏྠ ཝུཌྜྷཏརོ, མཡཱ ཝུཌྜྷཏརོ ཨཉྙོ ནཏྠི, ཏསྨཱ ཨཧམེཝ ཨིམསྨིཾ ཝིཧཱརེ ཝསིཏུམནུཙྪཝིཀོ’’ཏི སཉྙཱི ཧོཏི། བྱཏྟོཔི ‘‘བཧུསྶུཏསྶ སངྒྷབྷཱརནིཏྠཱརཀསྶ བྷིཀྑུནོ ཨནུཊྛཱཔནཱིཡསེནཱསནམྤཱི’’ཏི པརིཝཱརཊྛཀཐཱཝཙནཉྩ (པརི॰ ཨཊྛ॰ ༤༩༥-༤༩༦), ‘‘ཨནུཛཱནཱམི, བྷིཀྑཝེ, བྱཏྟེན བྷིཀྑུནཱ པཊིབལེན དསཝསྶེན ཝཱ ཨཏིརེཀདསཝསྶེན ཝཱ ཨུཔསམྤཱདེཏུཾ, ནིསྶཡཾ དཱཏུ’’ནྟིཨཱདིཔཱལི༹ཝཙནཉྩ (མཧཱཝ॰ ༧༦, ༨༢) གཧེཏྭཱ ‘‘ཨཧམེཝ ཨེཏྠ བྱཏྟོ པཊིབལོ, ན མཡཱ ཨཉྙོ བྱཏྟཏརོ ཨཏྠི, ཏསྨཱ ཨཧམེཝ ཨིམསྶ ཝིཧཱརསྶ ཨནུཙྪཝིཀོ’’ཏི སཉྙཱི། ཝིཧཱརཀཱརཀོཔི ‘‘ཡེན ཝིཧཱརོ ཀཱརིཏོ, སོ ཝིཧཱརསཱམིཀོཏི ཝིནཡཔཱཋོ (པཱཙི॰ ཨཊྛ॰ ༡༡༦) ཨཏྠི, མཡཱ ཙ བཧུཾ དྷནཾ ཙཛིཏྭཱ ཨཡཾ ཝིཧཱརོ ཀཱརིཏོ, ཏསྨཱ མཡཱ པསནྣཔུགྒལོ ཨཱརོཔེཏབྦོ, ན ཨཉྙོ’’ཏི སཉྙཱི། སངྒྷོཔི ‘‘སངྒྷིཀོ ནཱམ ཝིཧཱརོ སངྒྷསྶ དིནྣོ ཧོཏི པརིཙྩཏྟོ’’ཏིཨཱདིཔཱལི༹ཝཙནཉྩ (པཱཙི॰ ༡༡༦, ༡༢༡, ༡༢༦, ༡༣༡), ཨནྟམསོ ཙཏུརངྒུལཔཱདཀཾ གཱམདཱརཀེཧི པཾསྭཱགཱརཀེསུ ཀཱིལ༹ནྟེཧི ཀཏམྤི སངྒྷསྶ དིནྣཀཱལཏོ པཊྛཱཡ གརུབྷཎྜཾ ཧོཏཱི’’ཏིཨཱདིཨཊྛཀཐཱཝཙནཉྩ (ཙཱུལ༹ཝ॰ ཨཊྛ॰ ༣༢༡) གཧེཏྭཱ ‘‘ཨཡཾ ཝིཧཱརོ སངྒྷིཀོ སངྒྷསནྟཀོ, ཏསྨཱ ཨམྷེཧི ཨབྷིརུཙིཏཔུགྒལོཝ ཨཱརོཔེཏབྦོ, ན ཨཉྙོ’’ཏི སཉྙཱི།

    Tesu vuḍḍhataro ‘‘na tvevāhaṃ, bhikkhave, kenaci pariyāyena vuḍḍhatarassa āsanaṃ paṭibāhitabbanti vadāmi, yo paṭibāheyya, āpatti dukkaṭassā’’ti pāḷipāṭhañca (mahāva. 473; cūḷava. 316), ‘‘vuḍḍhataro attano vuḍḍhatāya navakatarena na vuṭṭhāpetabbo’’ti aṭṭhakathāvacanañca (pāci. aṭṭha. 119 ādayo; kaṅkhā. aṭṭha. anupakhajjasikkhāpadavaṇṇanā) gahetvā ‘‘ahameva ettha vuḍḍhataro, mayā vuḍḍhataro añño natthi, tasmā ahameva imasmiṃ vihāre vasitumanucchaviko’’ti saññī hoti. Byattopi ‘‘bahussutassa saṅghabhāranitthārakassa bhikkhuno anuṭṭhāpanīyasenāsanampī’’ti parivāraṭṭhakathāvacanañca (pari. aṭṭha. 495-496), ‘‘anujānāmi, bhikkhave, byattena bhikkhunā paṭibalena dasavassena vā atirekadasavassena vā upasampādetuṃ, nissayaṃ dātu’’ntiādipāḷivacanañca (mahāva. 76, 82) gahetvā ‘‘ahameva ettha byatto paṭibalo, na mayā añño byattataro atthi, tasmā ahameva imassa vihārassa anucchaviko’’ti saññī. Vihārakārakopi ‘‘yena vihāro kārito, so vihārasāmikoti vinayapāṭho (pāci. aṭṭha. 116) atthi, mayā ca bahuṃ dhanaṃ cajitvā ayaṃ vihāro kārito, tasmā mayā pasannapuggalo āropetabbo, na añño’’ti saññī. Saṅghopi ‘‘saṅghiko nāma vihāro saṅghassa dinno hoti pariccatto’’tiādipāḷivacanañca (pāci. 116, 121, 126, 131), antamaso caturaṅgulapādakaṃ gāmadārakehi paṃsvāgārakesu kīḷantehi katampi saṅghassa dinnakālato paṭṭhāya garubhaṇḍaṃ hotī’’tiādiaṭṭhakathāvacanañca (cūḷava. aṭṭha. 321) gahetvā ‘‘ayaṃ vihāro saṅghiko saṅghasantako, tasmā amhehi abhirucitapuggalova āropetabbo, na añño’’ti saññī.

    ཏཏྠ ཝུཌྜྷཏརསྶ ཝཙནེཔི ‘‘ན ཏྭེཝཱཧཾ, བྷིཀྑཝེ’’ཏྱཱདིཝཙནཾ (ཙཱུལ༹ཝ॰ ༣༡༦) ཏེསུ ཏེསུ ཨཱསནསཱལཱདཱིསུ ཨགྒཱསནསྶ ཝུཌྜྷཏརཱརཧཏྟཱ བྷཏྟཾ བྷུཉྫིཏྭཱ ནིསིནྣོཔི བྷིཀྑུ ཝུཌྜྷཏརེ ཨཱགཏེ ཝུཊྛཱཡ ཨཱསནཾ དཱཏབྦཾ སནྡྷཱཡ བྷགཝཏཱ ཝུཏྟཾ, ན དྷུཝཝཱསཾ སནྡྷཱཡ། ‘‘ཝུཌྜྷཏརོ ཨཏྟནོ ཝུཌྜྷཏཱཡ’’ཏྱཱདིཝཙནཉྩ (པཱཙི॰ ཨཊྛ॰ ༡༢༠; ཀངྑཱ॰ ཨཊྛ॰ ཨནུཔཁཛྫསིཀྑཱཔདཝཎྞནཱ) ཡཐཱཝུཌྜྷཾ སེནཱསནེ དཱིཡམཱནེ ཝུཌྜྷཏརེ ཨཱགཏེ ནཝཀཏརོ ཝུཊྛཱཔེཏབྦོ, ཝུཊྛཱཔེཏྭཱ ཝུཌྜྷཏརསྶ སེནཱསནཾ དཱཏབྦཾ, ཝུཌྜྷཏརོ པན ནཝཀཏརེན ན ཝུཊྛཱཔེཏབྦོ། ཀསྨཱ? ‘‘ཨཏྟནོ ཝུཌྜྷཏརཏཱཡཱ’’ཏི ཨུཏུཀཱལེ ཡཐཱཝུཌྜྷཾ སེནཱསནདཱནཾ སནྡྷཱཡ ཝུཏྟཾ, ན དྷུཝཝཱསཏྠཱཡ དཱནཾ སནྡྷཱཡ , ཏསྨཱ ཨིདམྤི ཝཙནཾ ཨུཔཔརིཀྑིཏབྦཾ, ན སཱིགྷཾ ཨནུཛཱནིཏབྦཾ།

    Tattha vuḍḍhatarassa vacanepi ‘‘na tvevāhaṃ, bhikkhave’’tyādivacanaṃ (cūḷava. 316) tesu tesu āsanasālādīsu aggāsanassa vuḍḍhatarārahattā bhattaṃ bhuñjitvā nisinnopi bhikkhu vuḍḍhatare āgate vuṭṭhāya āsanaṃ dātabbaṃ sandhāya bhagavatā vuttaṃ, na dhuvavāsaṃ sandhāya. ‘‘Vuḍḍhataro attano vuḍḍhatāya’’tyādivacanañca (pāci. aṭṭha. 120; kaṅkhā. aṭṭha. anupakhajjasikkhāpadavaṇṇanā) yathāvuḍḍhaṃ senāsane dīyamāne vuḍḍhatare āgate navakataro vuṭṭhāpetabbo, vuṭṭhāpetvā vuḍḍhatarassa senāsanaṃ dātabbaṃ, vuḍḍhataro pana navakatarena na vuṭṭhāpetabbo. Kasmā? ‘‘Attano vuḍḍhataratāyā’’ti utukāle yathāvuḍḍhaṃ senāsanadānaṃ sandhāya vuttaṃ, na dhuvavāsatthāya dānaṃ sandhāya , tasmā idampi vacanaṃ upaparikkhitabbaṃ, na sīghaṃ anujānitabbaṃ.

    བྱཏྟཝཙནེཔི ‘‘བཧུསྶུཏསྶ སངྒྷབྷཱརནིཏྠཱརཀསྶ’’ཏྱཱདིཝཙནཉྩ (པརི॰ ཨཊྛ॰ ༤༤༥-༤༩༦) ན བཧུསྶུཏམཏྟེན སངྒྷིཀཝིཧཱརསྶ ཨིསྶརབྷཱཝཾ སནྡྷཱཡ ཝུཏྟཾ, ཨཐ ཁོ ཏསྶ བྷིཀྑུསྶ བཧཱུཔཀཱརཏཾ གུཎཝིསིཊྛཏཉྩ སལླཀྑེཏྭཱ སངྒྷེན ཕཱསུཀཾ ཨཱཝཱསཾ ཨནུཊྛཱཔནཱིཡཾ ཀཏྭཱ དིནྣེ སོ བྷིཀྑུ ཀེནཙི ཏམྷཱ ཝིཧཱརཱ ཨནུཊྛཱཔནཱིཡོ ཧོཏི, ཨིམམཏྠཾ སནྡྷཱཡ ཝུཏྟཾ། ‘‘ཨནུཛཱནཱམི, བྷིཀྑཝེ’’ཏྱཱདིཝཙནཉྩ (མཧཱཝ॰ ༨༢) ནིསྶཡཱཙརིཡཱནཾ ལཀྑཎཾ པཀཱསེཏུཾ བྷགཝཏཱ ཝུཏྟཾ, ན སངྒྷིཀཝིཧཱརསྶ ཨིསྶརཏྟཾ, ཏསྨཱ ཨིདམྤི ཝཙནཾ ཨུཔཔརིཀྑིཏབྦཾ, ན སཱིགྷཾ ཨནུཛཱནིཏབྦཾ།

    Byattavacanepi ‘‘bahussutassa saṅghabhāranitthārakassa’’tyādivacanañca (pari. aṭṭha. 445-496) na bahussutamattena saṅghikavihārassa issarabhāvaṃ sandhāya vuttaṃ, atha kho tassa bhikkhussa bahūpakārataṃ guṇavisiṭṭhatañca sallakkhetvā saṅghena phāsukaṃ āvāsaṃ anuṭṭhāpanīyaṃ katvā dinne so bhikkhu kenaci tamhā vihārā anuṭṭhāpanīyo hoti, imamatthaṃ sandhāya vuttaṃ. ‘‘Anujānāmi, bhikkhave’’tyādivacanañca (mahāva. 82) nissayācariyānaṃ lakkhaṇaṃ pakāsetuṃ bhagavatā vuttaṃ, na saṅghikavihārassa issarattaṃ, tasmā idampi vacanaṃ upaparikkhitabbaṃ, na sīghaṃ anujānitabbaṃ.

    དཱཡཀཝཙནཾ པན ནཱནུཛཱནིཏབྦཾ པཊིབཱཧིཏབྦཾ། ཀསྨཱ? ‘‘ཡེན ཝིཧཱརོ ཀཱརིཏོ’’ཏྱཱདིཔཱཋསྶ ཨམུཁྱཝོཧཱརཏྟཱ། ཡཐཱ ཧི པུཐུཛྫནཀཱལེ རཱུཔཱདཱིསུ སཉྫནསྶ བྷཱུཏཔུབྦཏྟཱ བྷཱུཏཔུབྦགཏིཡཱ ཨརཧཱཔི ‘‘སཏྟོ’’ཏི, ཨེཝཾ དཱནཀཱལཏོ པུབྦེ ཏསྶ ཝིཧཱརསྶ སཱམིབྷཱུཏཔུབྦཏྟཱ དཱཡཀོ ‘‘ཝིཧཱརསཱམིཀོ’’ཏི ཝུཙྩཏི, ན ཨིསྶརཏྟཱ། ན ཧི སཀལེ ཝིནཡཔིཊཀེ ཨཊྛཀཐཱཊཱིཀཱསུ ཙ ‘‘ཝིསྶཛྫེཏྭཱ དིནྣསྶ ཝིཧཱརསྶ དཱཡཀོ ཨིསྶརོ’’ཏི ཝཱ ‘‘དཱཡཀེན ཝིཙཱརེཏབྦོ’’ཏི ཝཱ ‘‘དཱཡཀསནྟཀཝིཧཱརོ’’ཏི ཝཱ པཱཋོ ཨཏྠི, ‘‘སངྒྷིཀོ, གཎསནྟཀོ, པུགྒལིཀོ’’ཨིཙྩེཝ ཨཏྠི, ཏསྨཱ ཏསྶ ཝཙནཾ ནཱནུཛཱནིཏབྦཾ།

    Dāyakavacanaṃ pana nānujānitabbaṃ paṭibāhitabbaṃ. Kasmā? ‘‘Yena vihāro kārito’’tyādipāṭhassa amukhyavohārattā. Yathā hi puthujjanakāle rūpādīsu sañjanassa bhūtapubbattā bhūtapubbagatiyā arahāpi ‘‘satto’’ti, evaṃ dānakālato pubbe tassa vihārassa sāmibhūtapubbattā dāyako ‘‘vihārasāmiko’’ti vuccati, na issarattā. Na hi sakale vinayapiṭake aṭṭhakathāṭīkāsu ca ‘‘vissajjetvā dinnassa vihārassa dāyako issaro’’ti vā ‘‘dāyakena vicāretabbo’’ti vā ‘‘dāyakasantakavihāro’’ti vā pāṭho atthi, ‘‘saṅghiko, gaṇasantako, puggaliko’’icceva atthi, tasmā tassa vacanaṃ nānujānitabbaṃ.

    སངྒྷསྶ ཝཙནེཔི ‘‘སངྒྷིཀོ ནཱམ ཝིཧཱརོ’’ཏྱཱདིཝཙནཾ (པཱཙི॰ ༡༡༦, ༡༢༡, ༡༢༦, ༡༣༡) སངྒྷསནྟཀབྷཱཝཾ སངྒྷེན ཝིཙཱརེཏབྦབྷཱཝཾ དཱིཔེཏི, སངྒྷོ པན ཝིཙཱརེནྟོ པཉྩངྒསམནྣཱགཏཾ བྷིཀྑུཾ སེནཱསནགྒཱཧཱཔཀཾ སམྨནྣིཏྭཱ ཏེན ཡཐཱཝུཌྜྷཾ ཝིཙཱརེཏབྦོ ཝཱ ཧོཏི, སམགྒེན སངྒྷེན དུཝངྒསམནྣཱགཏསྶ བྷིཀྑུནོ ཨཔལོཀནཀམྨེན དྷུཝཝཱསཏྠཱཡ དཱཏབྦོ ཝཱ། ཏེསུ པཉྩངྒསམནྣཱགཏསྶ བྷིཀྑུནོ དུལླབྷཏྟཱ སེནཱསནགྒཱཧཱཔཀསམྨུཏིཡཱ ཨབྷཱཝེ སཏི དུཝངྒསམནྣཱགཏོ བྷིཀྑུ པརིཡེསིཏབྦོ། ཨེཝཾ པན ཨཔརིཡེསིཏྭཱ བྷཎྜཱགཱརིཀཏཱདིབཧཨཱུཔཀཱརཏཱཡུཏྟསྶ བཧུསྶུཏཏཱདིགུཎཝིསིཊྛཏཱཝིརཧསྶ བྷིཀྑུནོ ཨཱམིསགརུཀཏཱདིཝསེན སངྒྷེན ཝིཧཱརོ དཱཏབྦོ ན ཧོཏི, ཏསྨཱ སངྒྷཝཙནམྤི ཨུཔཔརིཀྑིཏབྦཾ, ན ཏཱཝ ཨནུཛཱནིཏབྦཾ།

    Saṅghassa vacanepi ‘‘saṅghiko nāma vihāro’’tyādivacanaṃ (pāci. 116, 121, 126, 131) saṅghasantakabhāvaṃ saṅghena vicāretabbabhāvaṃ dīpeti, saṅgho pana vicārento pañcaṅgasamannāgataṃ bhikkhuṃ senāsanaggāhāpakaṃ sammannitvā tena yathāvuḍḍhaṃ vicāretabbo vā hoti, samaggena saṅghena duvaṅgasamannāgatassa bhikkhuno apalokanakammena dhuvavāsatthāya dātabbo vā. Tesu pañcaṅgasamannāgatassa bhikkhuno dullabhattā senāsanaggāhāpakasammutiyā abhāve sati duvaṅgasamannāgato bhikkhu pariyesitabbo. Evaṃ pana apariyesitvā bhaṇḍāgārikatādibahaūpakāratāyuttassa bahussutatādiguṇavisiṭṭhatāvirahassa bhikkhuno āmisagarukatādivasena saṅghena vihāro dātabbo na hoti, tasmā saṅghavacanampi upaparikkhitabbaṃ, na tāva anujānitabbaṃ.

    ཨཐ ཏཱིཎིཔི ཝཙནཱནི སཾསནྡེཏབྦཱནི། ཏཏྠ སངྒྷསྶ ཨིསྶརཏྟཱ སངྒྷོ པུཙྪིཏབྦོ ‘‘ཀོ པུགྒལོ ཏུམྷེཧི ཨབྷིརུཙིཏོ’’ཏི, པུཙྪིཏྭཱ ‘‘ཨེསོ’’ཏི ཝུཏྟེ ‘‘ཀསྨཱ ཨབྷིརུཙིཏོ’’ཏི པུཙྪིཏྭཱ ‘‘ཨེསོ པུགྒལོ ཨམྷེ ཙཱིཝརཱདིཔཙྩཡེཧི ཨནུགྒཧེཏཱ, ཨམྷཱཀཾ ཉཱཏིསཱལོཧིཏོ, ཨུཔཛ྄ཛྷཱཡོ, ཨཱཙརིཡོ, སདྡྷིཝིཧཱརིཀོ, ཨནྟེཝཱསིཀོ, སམཱནུཔཛ྄ཛྷཱཡཀོ, སམཱནཱཙརིཡཀོ, པིཡསཧཱཡོ, ལཱབྷཱི, ཡསསྶཱི, ཏསྨཱ ཨམྷེཧི ཨབྷིརུཙིཏོ’’ཏི ཝུཏྟེ ‘‘ན ཨེཏྟཱཝཏཱ དྷུཝཝཱསཏྠཱཡ ཝིཧཱརོ དཱཏབྦོ’’ཏི པཊིཀྑིཔིཏབྦོ། ཨཐ ‘‘ཨེསོ པུགྒལོ སབྦེཧི ཨམྷེཧི ཝུཌྜྷཏརོ ཨགྒཱསནཾ ཨགྒོདཀཾ ཨགྒཔིཎྜཾ ཨརཧཏི, དྷུཝཝཱསཏྠཱཡ ཝིཧཱརོ པན ཏསྶ དཱཏབྦོཏི ཨཊྛཀཐཱཙརིཡེཧི ན ཝུཏྟོ’’ཏི ཝཏྭཱ པཊིཀྑིཔིཏབྦོ། ཨཐ ‘‘དྷམྨཀཐིཀོ, ཝིནཡདྷརོ, གཎཝཱཙཀཨཱཙརིཡོ’’ཏི ཝུཏྟེ ‘‘ཨེསོ དྷུཝཝཱསཏྠཱཡ དིནྣཝིཧཱརསྶ ཨནུཙྪཝིཀོ, ཨེཏསྶ དཱཏབྦོ’’ཏི ཨནུམོདིཏབྦོ། ཀཐཾ ཝིཉྙཱཡཏཱིཏི ཙེ? ‘‘སངྒྷོ པན བྷཎྜཱགཱརིཀསྶ ཝཱ དྷམྨཀཐིཀཝིནཡདྷརཱདཱིནཾ ཝཱ གཎཝཱཙཀཨཱཙརིཡསྶ ཝཱ བཧཱུཔཀཱརཏཾ གུཎཝིསིཊྛཏཉྩ སལླཀྑེནྟོ དྷུཝཝཱསཏྠཱཡ ཝིཧཱརཾ སམྨནྣིཏྭཱ དེཏཱི’’ཏི ཝཙནཏོ ཝིཉྙཱཡཏི (པཱཙི॰ ཨཊྛ॰ ༡༢༩; ཀངྑཱ॰ ཨཊྛ॰ ཨནུཔཁཛྫསིཀྑཱཔདཝཎྞནཱ)།

    Atha tīṇipi vacanāni saṃsandetabbāni. Tattha saṅghassa issarattā saṅgho pucchitabbo ‘‘ko puggalo tumhehi abhirucito’’ti, pucchitvā ‘‘eso’’ti vutte ‘‘kasmā abhirucito’’ti pucchitvā ‘‘eso puggalo amhe cīvarādipaccayehi anuggahetā, amhākaṃ ñātisālohito, upajjhāyo, ācariyo, saddhivihāriko, antevāsiko, samānupajjhāyako, samānācariyako, piyasahāyo, lābhī, yasassī, tasmā amhehi abhirucito’’ti vutte ‘‘na ettāvatā dhuvavāsatthāya vihāro dātabbo’’ti paṭikkhipitabbo. Atha ‘‘eso puggalo sabbehi amhehi vuḍḍhataro aggāsanaṃ aggodakaṃ aggapiṇḍaṃ arahati, dhuvavāsatthāya vihāro pana tassa dātabboti aṭṭhakathācariyehi na vutto’’ti vatvā paṭikkhipitabbo. Atha ‘‘dhammakathiko, vinayadharo, gaṇavācakaācariyo’’ti vutte ‘‘eso dhuvavāsatthāya dinnavihārassa anucchaviko, etassa dātabbo’’ti anumoditabbo. Kathaṃ viññāyatīti ce? ‘‘Saṅgho pana bhaṇḍāgārikassa vā dhammakathikavinayadharādīnaṃ vā gaṇavācakaācariyassa vā bahūpakārataṃ guṇavisiṭṭhatañca sallakkhento dhuvavāsatthāya vihāraṃ sammannitvā detī’’ti vacanato viññāyati (pāci. aṭṭha. 129; kaṅkhā. aṭṭha. anupakhajjasikkhāpadavaṇṇanā).

    ཨིདྷ པན སཱདྷཀཔཱཋེ ‘‘བྷཎྜཱགཱརིཀསྶ ཝཱ’’ཏི ཝིཛྫམཱནེ ཀསྨཱ སཱདྷྱཝཙནེ བྷཎྜཱགཱརིཀོ ན ཝུཏྟོཏི? ཨེཏརཧི བྷཎྜཱགཱརསྶ ཨབྷཱཝཱ། ཡདི ཀེསུཙི ཝིཧཱརེསུ བྷཎྜཱགཱརཾ སམྨནྣེཡྻ, སོ བྷཎྜཱགཱརཝིཧཱརེ ནིསིནྣོ སངྒྷསྶ པཏྟཙཱིཝརརཀྑཎཱདིཀཾ ཨུཔཀཱརཾ ཀརེཡྻ, ཏསྶ བཧཱུཔཀཱརཏཾ སལླཀྑེནྟོ སངྒྷོ བྷཎྜཱགཱརིཀསྶ ཕཱསུཀཾ ཨཱཝཱསཾ ཨེཏརཧིཔི དྷུཝཝཱསཏྠཱཡ དདེཡྻ, སོ ཏསྶ ཝིསུཾ དྷུཝཝཱསཝིཧཱརོཏི། ཨེཏྠ སཱདྷཀཔཱཋེ ‘‘དྷམྨཀཐིཀཝིནཡདྷརཱདཱིནཾ ཝཱ’’ཏིཨཱདིསདྡེན བཧུསྶུཏོ ཨཱགཏཱགམོ དྷམྨདྷརོ ཝིནཡདྷརོ མཱཏིཀཱདྷརོ པཎྜིཏོ བྱཏྟོ མེདྷཱཝཱི ལཛྫཱི ཀུཀྐུཙྩཀོ སིཀྑཱཀཱམོཏི ཝུཏྟགུཎཝནྟེ སངྒཎྷཱཏི། ཨཐཱཔི ‘‘ཨེསོ པུགྒལོ བཧུསྶུཏོ ཨུདྡེསཔརིཔུཙྪཱདཱིཧི བྷིཀྑཱུནཾ བཧཱུཔཀཱརོ སངྒྷབྷཱརནིཏྠཱརཀོ’’ཏི ཝདཏི, ‘‘སཱདྷུ ཨེསོཔི ཕཱསུཀཱཝཱསསྶ ཨརཧོ, ཨནུཊྛཱཔནཱིཡཾ ཀཏྭཱ དྷུཝཝཱསཏྠཱཡ ཝིཧཱརོ ཨེཏསྶཔི དཱཏབྦོ’’ཏི ཝཏྭཱ ཨནུམོདིཏབྦོ། ཀཐཾ ཝིཉྙཱཡཏཱིཏི ཙེ? ‘‘སངྒྷོ པན བཧུསྶུཏསྶ ཨུདྡེསཔརིཔུཙྪཱདཱིཧི བཧཱུཔཀཱརསྶ བྷཱརནིཏྠཱརཀསྶ ཕཱསུཀཾ ཨཱཝཱསཾ ཨནུཊྛཱཔནཱིཡཾ ཀཏྭཱ དེཏཱི’’ཏི (མཧཱཝ॰ ཨཊྛ॰ ༣༤༣) ཝཙནཏོ ཝིཉྙཱཡཏི།

    Idha pana sādhakapāṭhe ‘‘bhaṇḍāgārikassa vā’’ti vijjamāne kasmā sādhyavacane bhaṇḍāgāriko na vuttoti? Etarahi bhaṇḍāgārassa abhāvā. Yadi kesuci vihāresu bhaṇḍāgāraṃ sammanneyya, so bhaṇḍāgāravihāre nisinno saṅghassa pattacīvararakkhaṇādikaṃ upakāraṃ kareyya, tassa bahūpakārataṃ sallakkhento saṅgho bhaṇḍāgārikassa phāsukaṃ āvāsaṃ etarahipi dhuvavāsatthāya dadeyya, so tassa visuṃ dhuvavāsavihāroti. Ettha sādhakapāṭhe ‘‘dhammakathikavinayadharādīnaṃ vā’’tiādisaddena bahussuto āgatāgamo dhammadharo vinayadharo mātikādharo paṇḍito byatto medhāvī lajjī kukkuccako sikkhākāmoti vuttaguṇavante saṅgaṇhāti. Athāpi ‘‘eso puggalo bahussuto uddesaparipucchādīhi bhikkhūnaṃ bahūpakāro saṅghabhāranitthārako’’ti vadati, ‘‘sādhu esopi phāsukāvāsassa araho, anuṭṭhāpanīyaṃ katvā dhuvavāsatthāya vihāro etassapi dātabbo’’ti vatvā anumoditabbo. Kathaṃ viññāyatīti ce? ‘‘Saṅgho pana bahussutassa uddesaparipucchādīhi bahūpakārassa bhāranitthārakassa phāsukaṃ āvāsaṃ anuṭṭhāpanīyaṃ katvā detī’’ti (mahāva. aṭṭha. 343) vacanato viññāyati.

    ཨཐཱཔི ‘‘ཨཡཾ པུགྒལོ དྷམྨཀཐིཀོ ཝིནཡདྷརོ གཎཝཱཙཀཱཙརིཡོ སངྒྷསྶ བཧཱུཔཀཱརོ ཝིསིཊྛགུཎཡུཏྟོ’’ཏི ཝདཏི, ‘‘སཱདྷུ ཨེཏསྶཔི པུགྒལསྶ དྷུཝཝཱསཏྠཱཡ ཝིཧཱརཾ སལླཀྑེཏྭཱ སམྨནྣིཏྭཱཝ དཱཏབྦོ’’ཏི ཝཏྭཱ ཨནུམོདིཏབྦོ། ཀཐཾ ཝིཉྙཱཡཏཱིཏི ཙེ? ‘‘སངྒྷོ པན བྷཎྜཱགཱརིཀསྶ ཝཱ དྷམྨཀཐིཀཝིནཡདྷརཱདཱིནཾ ཝཱ གཎཝཱཙཀཱཙརིཡསྶ ཝཱ བཧཱུཔཀཱརཏཾ གུཎཝིསིཊྛཏཉྩ སལླཀྑེཏྭཱ དྷུཝཝཱསཏྠཱཡ ཝིཧཱརཾ སམྨནྣིཏྭཱ དེཏཱི’’ཏི (པཱཙི॰ ཨཊྛ॰ ༡༢༠; ཀངྑཱ॰ ཨཊྛ॰ ཨནུཔཁཛྫསིཀྑཱཔདཝཎྞནཱ) ཝཙནཏོ ཝིཉྙཱཡཏི།

    Athāpi ‘‘ayaṃ puggalo dhammakathiko vinayadharo gaṇavācakācariyo saṅghassa bahūpakāro visiṭṭhaguṇayutto’’ti vadati, ‘‘sādhu etassapi puggalassa dhuvavāsatthāya vihāraṃ sallakkhetvā sammannitvāva dātabbo’’ti vatvā anumoditabbo. Kathaṃ viññāyatīti ce? ‘‘Saṅgho pana bhaṇḍāgārikassa vā dhammakathikavinayadharādīnaṃ vā gaṇavācakācariyassa vā bahūpakārataṃ guṇavisiṭṭhatañca sallakkhetvā dhuvavāsatthāya vihāraṃ sammannitvā detī’’ti (pāci. aṭṭha. 120; kaṅkhā. aṭṭha. anupakhajjasikkhāpadavaṇṇanā) vacanato viññāyati.

    ཨཐཱཔི ‘‘ཨེསོ པུགྒལོ བཧུསྶུཏོ སངྒྷབྷཱརནིཏྠཱརཀོ’’ཏི ཝདཏི, ‘‘སཱདྷུ ཨེཏསྶཔི ཨནུཊྛཱཔནཱིཡཾ ཀཏྭཱ དཱཏབྦོ’’ཏི ཝཏྭཱ ཨནུམོདིཏབྦོ། ཀཐཾ ཝིཉྙཱཡཏཱིཏི ཙེ? ‘‘བཧུསྶུཏསྶ སངྒྷབྷཱརནིཏྠཱརཀསྶ བྷིཀྑུནོ ཨནུཊྛཱཔནཱིཡསེནཱསནམྤཱི’’ཏི པརིཝཱརཊྛཀཐཱཡཾ (པརི॰ ཨཊྛ॰ ༤༩༥-༤༩༦) ཝུཏྟཏྟཱ ཝིཉྙཱཡཏི། ཏཏོ ‘‘ཨེཝཾ དུཝངྒསམྤནྣོ པུགྒལོ ཨནྟོསཱིམཊྛོ ཝཱ བཧིསཱིམཊྛོ ཝཱ’’ཏི པུཙྪིཏྭཱ ‘‘ཨནྟོསཱིམཊྛོ’’ཏི ཝུཏྟེ ‘‘སཱདྷུ སུཊྛུ ཏསྶ དཱཏབྦོ’’ཏི སམྤཊིཙྪིཏབྦཾ། ‘‘བཧིསཱིམཊྛོ’’ཏི ཝུཏྟེ ‘‘ན དཱཏབྦོ’’ཏི པཊིཀྑིཔིཏབྦཾ། ཀསྨཱཏི ཙེ? ‘‘ན, བྷིཀྑཝེ, ནིསྶཱིམེ ཋིཏསྶ སེནཱསནཾ གཱཧེཏབྦཾ, ཡོ གཱཧེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ॰ ༣༡༨) ཝཙནཏོཏི།

    Athāpi ‘‘eso puggalo bahussuto saṅghabhāranitthārako’’ti vadati, ‘‘sādhu etassapi anuṭṭhāpanīyaṃ katvā dātabbo’’ti vatvā anumoditabbo. Kathaṃ viññāyatīti ce? ‘‘Bahussutassa saṅghabhāranitthārakassa bhikkhuno anuṭṭhāpanīyasenāsanampī’’ti parivāraṭṭhakathāyaṃ (pari. aṭṭha. 495-496) vuttattā viññāyati. Tato ‘‘evaṃ duvaṅgasampanno puggalo antosīmaṭṭho vā bahisīmaṭṭho vā’’ti pucchitvā ‘‘antosīmaṭṭho’’ti vutte ‘‘sādhu suṭṭhu tassa dātabbo’’ti sampaṭicchitabbaṃ. ‘‘Bahisīmaṭṭho’’ti vutte ‘‘na dātabbo’’ti paṭikkhipitabbaṃ. Kasmāti ce? ‘‘Na, bhikkhave, nissīme ṭhitassa senāsanaṃ gāhetabbaṃ, yo gāheyya, āpatti dukkaṭassā’’ti (cūḷava. 318) vacanatoti.

    ཨཐ ‘‘དུཝངྒསམནྣཱགཏེ ཨནྟོསཱིམཊྛེ ཨསཏི ཨེཀངྒསམནྣཱགཏོ ཨནྟོསཱིམཊྛོ ཨཏྠཱི’’ཏི པུཙྪིཏྭཱ ‘‘ཨཏྠཱི’’ཏི ཝུཏྟེ ‘‘སཱདྷུ སུཊྛུ ཨེཏསྶ དཱཏབྦོ’’ཏི སམྤཊིཙྪིཏབྦཾ། ཀཐཾ ཝིཉྙཱཡཏཱིཏི ཙེ? ‘‘བཧཱུཔཀཱརཏཾ གུཎཝིསིཊྛཏཉྩ སལླཀྑེནྟོཏི བྷཎྜཱགཱརིཀསྶ བཧཱུཔཀཱརཏཾ དྷམྨཀཐིཀཱདཱིནཾ གུཎཝིསིཊྛཏཉྩ སལླཀྑེནྟོ’’ཏི སཱརཏྠདཱིཔནིཡཾ (སཱརཏྠ॰ ཊཱི॰ པཱཙིཏྟིཡ ༣.༡༡༩-༡༢༡) ཨེཀེཀངྒཝསེན ཨཱགཏཏྟཱ ཝིཉྙཱཡཏི། ‘‘ཨནྟོསཱིམཊྛོ ཨེཀངྒསམནྣཱགཏོཔི ནཏྠི, བཧིསཱིམཊྛོཝ ཨཏྠཱི’’ཏི ཝུཏྟེ ‘‘ཨཱགནྟྭཱ ཨནྟོསཱིམེ ཋིཏསྶ དཱཏབྦོ’’ཏི ཝཏྟབྦོ། ཀསྨཱཏི ཙེ? ‘‘ཨསམྤཏྟཱནམྤི ཨུཔཙཱརསཱིམཾ པཝིཊྛཱནཾ ཨནྟེཝཱསིཀཱདཱིསུ གཎྷནྟེསུ དཱཏབྦམེཝཱ’’ཏི ཨཊྛཀཐཱཡཾ (མཧཱཝ॰ ཨཊྛ॰ ༣༧༩) ཝཙནཏོ ཝིཉྙཱཡཏི།

    Atha ‘‘duvaṅgasamannāgate antosīmaṭṭhe asati ekaṅgasamannāgato antosīmaṭṭho atthī’’ti pucchitvā ‘‘atthī’’ti vutte ‘‘sādhu suṭṭhu etassa dātabbo’’ti sampaṭicchitabbaṃ. Kathaṃ viññāyatīti ce? ‘‘Bahūpakārataṃ guṇavisiṭṭhatañca sallakkhentoti bhaṇḍāgārikassa bahūpakārataṃ dhammakathikādīnaṃ guṇavisiṭṭhatañca sallakkhento’’ti sāratthadīpaniyaṃ (sārattha. ṭī. pācittiya 3.119-121) ekekaṅgavasena āgatattā viññāyati. ‘‘Antosīmaṭṭho ekaṅgasamannāgatopi natthi, bahisīmaṭṭhova atthī’’ti vutte ‘‘āgantvā antosīme ṭhitassa dātabbo’’ti vattabbo. Kasmāti ce? ‘‘Asampattānampi upacārasīmaṃ paviṭṭhānaṃ antevāsikādīsu gaṇhantesu dātabbamevā’’ti aṭṭhakathāyaṃ (mahāva. aṭṭha. 379) vacanato viññāyati.

    སཙེ པན ཨེཀངྒཡུཏྟབྷཱཝེན ཝཱ དུཝངྒཡུཏྟབྷཱཝེན ཝཱ སམཱནཱ དྭེ ཏཡོ བྷིཀྑཱུ ཨནྟོསཱིམཱཡཾ ཝིཛྫམཱནཱ བྷཝེཡྻུཾ, ཀསྶ དཱཏབྦོཏི? ཝཌྜྷཏརསྶཱཏི། ཀཐཾ ཝིཉྙཱཡཏཱིཏི ཙེ? ‘‘ན ཙ, བྷིཀྑཝེ, སངྒྷིཀཾ ཡཐཱཝུཌྜྷཾ པཊིབཱཧིཏབྦཾ, ཡོ པཊིབཱཧེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ॰ ༣༡༡) ཝཙནཏོཏི། སཙེ པན ཨནྟོསཱིམཱཡཾ ཨེཀངྒཡུཏྟོ ཝཱ དུཝངྒཡུཏྟོ ཝཱ བྷིཀྑུ ནཏྠི, སབྦེཝ ཨཱཝཱསིཀཱ བཱལཱ ཨབྱཏྟཱ, ཨེཝཾ སཏི ཀསྶ དཱཏབྦོཏི? ཡོ ཏཾ ཝིཧཱརཾ ཨཱགཙྪཏི ཨཱགནྟུཀོ བྷིཀྑུ, སོ ཙེ ལཛྫཱི ཧོཏི པེསལོ བཧུསྶུཏོ སིཀྑཱཀཱམོ, སོ ཏེཧི ཨཱཝཱསིཀེཧི བྷིཀྑཱུཧི ཨཉྙཏྠ ཨགམནཏྠཾ སངྒཧཾ ཀཏྭཱ སོ ཨཱཝཱསོ དཱཏབྦོ།

    Sace pana ekaṅgayuttabhāvena vā duvaṅgayuttabhāvena vā samānā dve tayo bhikkhū antosīmāyaṃ vijjamānā bhaveyyuṃ, kassa dātabboti? Vaḍḍhatarassāti. Kathaṃ viññāyatīti ce? ‘‘Na ca, bhikkhave, saṅghikaṃ yathāvuḍḍhaṃ paṭibāhitabbaṃ, yo paṭibāheyya, āpatti dukkaṭassā’’ti (cūḷava. 311) vacanatoti. Sace pana antosīmāyaṃ ekaṅgayutto vā duvaṅgayutto vā bhikkhu natthi, sabbeva āvāsikā bālā abyattā, evaṃ sati kassa dātabboti? Yo taṃ vihāraṃ āgacchati āgantuko bhikkhu, so ce lajjī hoti pesalo bahussuto sikkhākāmo, so tehi āvāsikehi bhikkhūhi aññattha agamanatthaṃ saṅgahaṃ katvā so āvāso dātabbo.

    ཨཡམཏྠོ ཀཐཾ ཛཱནིཏབྦོཏི ཙེ? ‘‘ཨིདྷ པན, བྷིཀྑཝེ, ཨཉྙཏརསྨིཾ ཨཱཝཱསེ སམྦཧུལཱ བྷིཀྑཱུ ཝིཧརནྟི བཱལཱ ཨབྱཏྟཱ, ཏེ ན ཛཱནནྟི ཨུཔོསཐཾ ཝཱ ཨུཔོསཐཀམྨཾ ཝཱ པཱཏིམོཀྑཾ ཝཱ པཱཏིམོཀྑུདྡེསཾ ཝཱ། ཏཏྠ ཨཉྙོ བྷིཀྑུ ཨཱགཙྪཏི བཧུསྶུཏོ ཨཱགཏཱགམོ དྷམྨདྷརོ ཝིནཡདྷརོ མཱཏིཀཱདྷརོ པཎྜིཏོ བྱཏྟོ མེདྷཱཝཱི ལཛྫཱི ཀུཀྐུཙྩཀོ སིཀྑཱཀཱམོ, ཏེཧི, བྷིཀྑཝེ, བྷིཀྑཱུཧི སོ བྷིཀྑུ སངྒཧེཏབྦོ ཨནུགྒཧེཏབྦོ ཨུཔལཱཔེཏབྦོ ཨུཔཊྛཱཔེཏབྦོ ཙུཎྞེན མཏྟིཀཱཡ དནྟཀཊྛེན མུཁོདཀེན། ནོ ཙེ སངྒཎྷེཡྻུཾ ཨནུགྒཎྷེཡྻུཾ ཨུཔལཱཔེཡྻུཾ ཨུཔཊྛཱཔེཡྻུཾ ཙུཎྞེན མཏྟིཀཱཡ དནྟཀཊྛེན མུཁོདཀེན, ཨཱཔཏྟི དུཀྐཊསྶཱ’’ཏི (མཧཱཝ॰ ༡༦༣) སམྨཱསམྦུདྡྷེན པཉྙཏྟཏྟཱ, ཨཊྛཀཐཱཡཉྩ (མཧཱཝ॰ ཨཊྛ॰ ༡༦༣) ‘‘སངྒཧེཏབྦོཏི ‘སཱདྷུ, བྷནྟེ, ཨཱགཏཏྠ, ཨིདྷ བྷིཀྑཱ སུལབྷཱ སཱུཔབྱཉྫནཾ ཨཏྠི, ཝསཐ ཨནུཀྐཎྛམཱནཱ’ཏི ཨེཝཾ པིཡཝཙནེན སངྒཧེཏབྦོ, པུནཔྤུནཾ ཏཐཱཀརཎཝསེན ཨནུགྒཧེཏབྦོ, ‘ཨཱམ ཝསིསྶཱམཱི’ཏི པཊིཝཙནདཱཔནེན ཨུཔལཱཔེཏབྦོ། ཨཐ ཝཱ ཙཏཱུཧི པཙྩཡེཧི སངྒཧེཏབྦོ ཙེཝ ཨནུགྒཧེཏབྦོ ཙ, པིཡཝཙནེན ཨུཔལཱཔེཏབྦོ, ཀཎྞསུཁཾ ཨཱལཔིཏབྦོཏི ཨཏྠོ, ཙུཎྞཱདཱིཧི ཨུཔཊྛཱཔེཏབྦོ། ཨཱཔཏྟི དུཀྐཊསྶཱཏི སཙེ སཀལོཔི སངྒྷོ ན ཀརོཏི, སབྦེསཾ དུཀྐཊཾ། ཨིདྷ ནེཝ ཐེརཱ, ན དཧརཱ མུཙྩནྟི, སབྦེཧི ཝཱརེན ཨུཔཊྛཱཏབྦོ, ཨཏྟནོ ཝཱརེ ཨནུཔཊྛཧནྟསྶ ཨཱཔཏྟི། ཏེན པན མཧཱཐེརཱནཾ པརིཝེཎསམྨཛྫནདནྟཀཊྛདཱནཱདཱིནི ན སཱདིཏབྦཱནི། ཨེཝམྤི སཏི མཧཱཐེརེཧི སཱཡཾཔཱཏཾ ཨུཔཊྛཱནཾ ཨཱགནྟབྦཾ། ཏེན པན ཏེསཾ ཨཱགམནཾ ཉཏྭཱ པཋམཏརཾ མཧཱཐེརཱནཾ ཨུཔཊྛཱནཾ གནྟབྦཾ། སཙསྶ སདྡྷིཾཙརཱ བྷིཀྑཱུ ཨུཔཊྛཱཀཱ ཨཏྠི, ‘མཡ྄ཧཾ ཨུཔཊྛཱཀཱ ཨཏྠི, ཏུམྷེ ཨཔྤོསྶུཀྐཱ ཝིཧརཐཱ’ཏི ཝཏྟབྦཾ། ཨཐཱཔིསྶ སདྡྷིཾ ཙརཱ ནཏྠི, ཏསྨིཾཡེཝ པན ཝིཧཱརེ ཨེཀོ ཝཱ དྭེ ཝཱ ཝཏྟསམྤནྣཱ ཝདནྟི ‘མཡ྄ཧཾ ཐེརསྶ ཀཏྟབྦཾ ཀརིསྶཱམ, ཨཝསེསཱ ཕཱསུ ཝིཧརནྟཱུ’ཏི, སབྦེསཾ ཨནཱཔཏྟཱི’’ཏི ཝུཏྟཏྟཱ། ཨེཝཾ ཏཱདིསཾ བཧིསཱིམཏོ ཨནྟོསཱིམམཱགཏཾ ལཛྫཱིཔེསལབཧུསྶུཏསིཀྑཱཀཱམབྷཱུཏཾ བྷིཀྑུཾ ཨནྟོསཱིམཱཡ དྷུཝནིཝཱསཏྠཱཡ ཕཱསུཀཾ ཨཱཝཱསཾ ཨནུཊྛཱཔནཱིཡཾ ཀཏྭཱ དཱཏབྦོཏི ཝིཉྙཱཡཏི།

    Ayamattho kathaṃ jānitabboti ce? ‘‘Idha pana, bhikkhave, aññatarasmiṃ āvāse sambahulā bhikkhū viharanti bālā abyattā, te na jānanti uposathaṃ vā uposathakammaṃ vā pātimokkhaṃ vā pātimokkhuddesaṃ vā. Tattha añño bhikkhu āgacchati bahussuto āgatāgamo dhammadharo vinayadharo mātikādharo paṇḍito byatto medhāvī lajjī kukkuccako sikkhākāmo, tehi, bhikkhave, bhikkhūhi so bhikkhu saṅgahetabbo anuggahetabbo upalāpetabbo upaṭṭhāpetabbo cuṇṇena mattikāya dantakaṭṭhena mukhodakena. No ce saṅgaṇheyyuṃ anuggaṇheyyuṃ upalāpeyyuṃ upaṭṭhāpeyyuṃ cuṇṇena mattikāya dantakaṭṭhena mukhodakena, āpatti dukkaṭassā’’ti (mahāva. 163) sammāsambuddhena paññattattā, aṭṭhakathāyañca (mahāva. aṭṭha. 163) ‘‘saṅgahetabboti ‘sādhu, bhante, āgatattha, idha bhikkhā sulabhā sūpabyañjanaṃ atthi, vasatha anukkaṇṭhamānā’ti evaṃ piyavacanena saṅgahetabbo, punappunaṃ tathākaraṇavasena anuggahetabbo, ‘āma vasissāmī’ti paṭivacanadāpanena upalāpetabbo. Atha vā catūhi paccayehi saṅgahetabbo ceva anuggahetabbo ca, piyavacanena upalāpetabbo, kaṇṇasukhaṃ ālapitabboti attho, cuṇṇādīhi upaṭṭhāpetabbo. Āpatti dukkaṭassāti sace sakalopi saṅgho na karoti, sabbesaṃ dukkaṭaṃ. Idha neva therā, na daharā muccanti, sabbehi vārena upaṭṭhātabbo, attano vāre anupaṭṭhahantassa āpatti. Tena pana mahātherānaṃ pariveṇasammajjanadantakaṭṭhadānādīni na sāditabbāni. Evampi sati mahātherehi sāyaṃpātaṃ upaṭṭhānaṃ āgantabbaṃ. Tena pana tesaṃ āgamanaṃ ñatvā paṭhamataraṃ mahātherānaṃ upaṭṭhānaṃ gantabbaṃ. Sacassa saddhiṃcarā bhikkhū upaṭṭhākā atthi, ‘mayhaṃ upaṭṭhākā atthi, tumhe appossukkā viharathā’ti vattabbaṃ. Athāpissa saddhiṃ carā natthi, tasmiṃyeva pana vihāre eko vā dve vā vattasampannā vadanti ‘mayhaṃ therassa kattabbaṃ karissāma, avasesā phāsu viharantū’ti, sabbesaṃ anāpattī’’ti vuttattā. Evaṃ tādisaṃ bahisīmato antosīmamāgataṃ lajjīpesalabahussutasikkhākāmabhūtaṃ bhikkhuṃ antosīmāya dhuvanivāsatthāya phāsukaṃ āvāsaṃ anuṭṭhāpanīyaṃ katvā dātabboti viññāyati.

    ནནུ ཙ ‘‘ན, བྷིཀྑཝེ, ནིསྶཱིམེ ཋིཏསྶ སེནཱསནཾ གཱཧེཏབྦཾ, ཡོ གཱཧེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ॰ ༣༡༨) བྷགཝཏཱ ཝུཏྟཾ, ཨཐ ཀསྨཱ ནིསྶཱིམཏོ ཨཱགཏསྶ དྷུཝཝཱསཏྠཱཡ ཝིཧཱརོ དཱཏབྦོཏི? ཝུཙྩཏེ – ‘‘ནིསྶཱིམེ ཋིཏསྶཱ’’ཏི ཨིདཾ ཨནཱདརེ སཱམིཝཙནཾ, ཏསྨཱ ནིསྶཱིམེ ཋིཏཾཡེཝ སེནཱསནཾ ན གཱཧེཏབྦནྟི ཨཏྠོ དཊྛབྦོ, ན ནིསྶཱིམེ ཋིཏསྶ ཏསྶ བྷིཀྑུསྶ ཨནྟོསཱིམཾ པཝིཊྛསྶཔི སེནཱསནཾ ན གཱཧེཏབྦནྟི ཨཏྠོ, ཏསྨཱ པུབྦེ བཧིསཱིམཱཡཾ ཋིཏེཔི ཨིདཱནི ཨནྟོསཱིམཾ པཝིཊྛཀཱལཏོ པཊྛཱཡ ཙཏུཔཙྩཡབྷཱགོ ལབྦྷཏི། ཝུཏྟཉྷི ཨཊྛཀཐཱཡཾ (མཧཱཝ॰ ཨཊྛ॰ ༣༧༩) ‘‘ཨསུཀཝིཧཱརེ ཀིར བཧུཾ ཙཱིཝརཾ ཨུཔྤནྣནྟི སུཏྭཱ ཡོཛནནྟརིཀཝིཧཱརཏོཔི བྷིཀྑཱུ ཨཱགཙྪནྟི, སམྤཏྟསམྤཏྟཱནཾ ཋིཏཊྛཱནཏོ པཊྛཱཡ དཱཏབྦ’’ནྟི། ཨནྟོསཱིམཊྛེསུ པཱཏིམོཀྑཾ ཨུདྡིསིཏུཾ ཨསཀྐོནྟེསུ ཡཏྠ པཱཏིམོཀྑུདྡེསཀོ ཨཏྠི, སོ ཨཱཝཱསོ གནྟབྦོ ཧོཏི། ཨནྟོཝསྶེཔི པཱཏིམོཀྑུདྡེསཀེན ཝིནཱ ཝསྶཾ ཝསིཏུཾ ན ལབྷཏི། ཡཏྠ པཱཏིམོཀྑུདྡེསཀོ ཨཏྠི, ཏཏྠ གནྟྭཱ ཝསྶཾ ཝསིཏབྦཾ, ཏསྨཱ བཧིསཱིམཏོ ཨཱགཏོཔི ལཛྫཱིཔེསལབཧུསྶུཏསིཀྑཱཀཱམབྷིཀྑུ སངྒཧེཏབྦོ ཧོཏི། ཝུཏྟཉྷེཏཾ བྷགཝཏཱ –

    Nanu ca ‘‘na, bhikkhave, nissīme ṭhitassa senāsanaṃ gāhetabbaṃ, yo gāheyya, āpatti dukkaṭassā’’ti (cūḷava. 318) bhagavatā vuttaṃ, atha kasmā nissīmato āgatassa dhuvavāsatthāya vihāro dātabboti? Vuccate – ‘‘nissīme ṭhitassā’’ti idaṃ anādare sāmivacanaṃ, tasmā nissīme ṭhitaṃyeva senāsanaṃ na gāhetabbanti attho daṭṭhabbo, na nissīme ṭhitassa tassa bhikkhussa antosīmaṃ paviṭṭhassapi senāsanaṃ na gāhetabbanti attho, tasmā pubbe bahisīmāyaṃ ṭhitepi idāni antosīmaṃ paviṭṭhakālato paṭṭhāya catupaccayabhāgo labbhati. Vuttañhi aṭṭhakathāyaṃ (mahāva. aṭṭha. 379) ‘‘asukavihāre kira bahuṃ cīvaraṃ uppannanti sutvā yojanantarikavihāratopi bhikkhū āgacchanti, sampattasampattānaṃ ṭhitaṭṭhānato paṭṭhāya dātabba’’nti. Antosīmaṭṭhesu pātimokkhaṃ uddisituṃ asakkontesu yattha pātimokkhuddesako atthi, so āvāso gantabbo hoti. Antovassepi pātimokkhuddesakena vinā vassaṃ vasituṃ na labhati. Yattha pātimokkhuddesako atthi, tattha gantvā vassaṃ vasitabbaṃ, tasmā bahisīmato āgatopi lajjīpesalabahussutasikkhākāmabhikkhu saṅgahetabbo hoti. Vuttañhetaṃ bhagavatā –

    ‘‘ཨིདྷ པན, བྷིཀྑཝེ, ཨཉྙཏརསྨིཾ ཨཱཝཱསེ ཏདཧུཔོསཐེ སམྦཧུལཱ བྷིཀྑཱུ ཝིཧརནྟི བཱལཱ ཨབྱཏྟཱ, ཏེ ན ཛཱནནྟི ཨུཔོསཐཾ ཝཱ ཨུཔོསཐཀམྨཾ ཝཱ པཱཏིམོཀྑཾ ཝཱ པཱཏིམོཀྑུདྡེསཾ ཝཱ། ཏེཧི, བྷིཀྑཝེ, བྷིཀྑཱུཧི ཨེཀོ བྷིཀྑུ སཱམནྟཱ ཨཱཝཱསཱ སཛྫུཀཾ པཱཧེཏབྦོ ‘གཙྪཱཝུསོ སཾཁིཏྟེན ཝཱ ཝིཏྠཱརེན ཝཱ པཱཏིམོཀྑཾ པརིཡཱཔུཎིཏྭཱ ཨཱགཙྪཱ’ཏི། ཨེཝཉྩེཏཾ ལབྷེཐ, ཨིཙྩེཏཾ ཀུསལཾ། ནོ ཙེ ལབྷེཐ, ཏེཧི, བྷིཀྑཝེ, བྷིཀྑཱུཧི སབྦེཧེཝ ཡཏྠ ཛཱནནྟི ཨུཔོསཐཾ ཝཱ ཨུཔོསཐཀམྨཾ ཝཱ པཱཏིམོཀྑཾ ཝཱ པཱཏིམོཀྑུདྡེསཾ ཝཱ, སོ ཨཱཝཱསོ གནྟབྦོ། ནོ ཙེ གཙྪེཡྻུཾ, ཨཱཔཏྟི དུཀྐཊསྶ། ཨིདྷ པན, བྷིཀྑཝེ, ཨཉྙཏརསྨིཾ ཨཱཝཱསེ སམྦཧུལཱ བྷིཀྑཱུ ཝསྶཾ ཝསནྟི བཱལཱ ཨབྱཏྟཱ, ཏེ ན ཛཱནནྟི ཨུཔོསཐཾ ཝཱ ཨུཔོསཐཀམྨཾ ཝཱ པཱཏིམོཀྑཾ ཝཱ པཱཏིམོཀྑུདྡེསཾ ཝཱ། ཏེཧི, བྷིཀྑཝེ, བྷིཀྑཱུཧི ཨེཀོ བྷིཀྑུ སཱམནྟཱ ཨཱཝཱསཱ སཛྫུཀཾ པཱཧེཏབྦོ ‘གཙྪཱཝུསོ སཾཁིཏྟེན ཝཱ ཝིཏྠཱརེན ཝཱ པཱཏིམོཀྑཾ པརིཡཱཔུཎིཏྭཱ ཨཱགཙྪཱ’ཏི། ཨེཝཉྩེཏཾ ལབྷེཐ, ཨིཙྩེཏཾ ཀུསལཾ། ནོ ཙེ ལབྷེཐ, ཨེཀོ བྷིཀྑུ སཏྟཱཧཀཱལིཀཾ པཱཧེཏབྦོ ‘གཙྪཱཝུསོ སཾཁིཏྟེན ཝཱ ཝིཏྠཱརེན ཝཱ པཱཏིམོཀྑཾ པརིཡཱཔུཎིཏྭཱ ཨཱགཙྪཱ’ཏི། ཨེཝཉྩེཏཾ ལབྷེཐ, ཨིཙྩེཏཾ ཀུསལཾ། ནོ ཙེ ལབྷེཐ, ན, བྷིཀྑཝེ, ཏེཧི བྷིཀྑཱུཧི ཏསྨིཾ ཨཱཝཱསེ ཝསྶཾ ཝསིཏབྦཾ, ཝསེཡྻུཾ ཙེ, ཨཱཔཏྟི དུཀྐཊསྶཱཏི’’ (མཧཱཝ॰ ༡༦༣)།

    ‘‘Idha pana, bhikkhave, aññatarasmiṃ āvāse tadahuposathe sambahulā bhikkhū viharanti bālā abyattā, te na jānanti uposathaṃ vā uposathakammaṃ vā pātimokkhaṃ vā pātimokkhuddesaṃ vā. Tehi, bhikkhave, bhikkhūhi eko bhikkhu sāmantā āvāsā sajjukaṃ pāhetabbo ‘gacchāvuso saṃkhittena vā vitthārena vā pātimokkhaṃ pariyāpuṇitvā āgacchā’ti. Evañcetaṃ labhetha, iccetaṃ kusalaṃ. No ce labhetha, tehi, bhikkhave, bhikkhūhi sabbeheva yattha jānanti uposathaṃ vā uposathakammaṃ vā pātimokkhaṃ vā pātimokkhuddesaṃ vā, so āvāso gantabbo. No ce gaccheyyuṃ, āpatti dukkaṭassa. Idha pana, bhikkhave, aññatarasmiṃ āvāse sambahulā bhikkhū vassaṃ vasanti bālā abyattā, te na jānanti uposathaṃ vā uposathakammaṃ vā pātimokkhaṃ vā pātimokkhuddesaṃ vā. Tehi, bhikkhave, bhikkhūhi eko bhikkhu sāmantā āvāsā sajjukaṃ pāhetabbo ‘gacchāvuso saṃkhittena vā vitthārena vā pātimokkhaṃ pariyāpuṇitvā āgacchā’ti. Evañcetaṃ labhetha, iccetaṃ kusalaṃ. No ce labhetha, eko bhikkhu sattāhakālikaṃ pāhetabbo ‘gacchāvuso saṃkhittena vā vitthārena vā pātimokkhaṃ pariyāpuṇitvā āgacchā’ti. Evañcetaṃ labhetha, iccetaṃ kusalaṃ. No ce labhetha, na, bhikkhave, tehi bhikkhūhi tasmiṃ āvāse vassaṃ vasitabbaṃ, vaseyyuṃ ce, āpatti dukkaṭassāti’’ (mahāva. 163).

    ཨེཝཾ བཧིསཱིམཏོ ཨཱགཏསྶཔི སངྒྷསྶ ཨུཔཀཱརཾ ཀཱཏུཾ སཀྐོནྟསྶ ཝིསིཊྛགུཎཡུཏྟསྶ དཱཏབྦབྷཱཝོ ཝིཉྙཱཡཏི, ཏསྨཱ ‘‘ཨམྷཱཀཾ གཎོ ན ཧོཏི, ཨམྷཱཀཾ ཝཾསོ པཝེཎཱི ན ཧོཏི, ཨམྷཱཀཾ སནྡིཊྛསམྦྷཏྟོ ན ཧོཏཱི’’ཏིཨཱདཱིནི ཝཏྭཱ ན པཊིཀྑིཔིཏབྦོ། གཎཱདིབྷཱཝོ ཧི ཨཔྤམཱཎཾ, ཡཐཱཝུཏྟབཧཱུཔཀཱརཏཱདིབྷཱཝོཡེཝ པམཱཎཾ། སཱམགྒིཀརཎཏོ པཊྛཱཡ ཧི སམཱནགཎོ ཧོཏི། ཏཐཱ ཧི ཨུཀྑིཏྟཱནུཝཏྟཀཱནཾ ལདྡྷིནཱནཱསཾཝཱསཀཱནམྤི ལདྡྷིཝིསྶཛྫནེན ཏིཝིདྷཨུཀྑེཔནཱིཡཀམྨཀཏཱནཾ ཀམྨནཱནཱསཾཝཱསཀཱནམྤི ཨོསཱརཎཾ ཀཏྭཱ སཱམགྒིཀརཎེན སཾཝཱསོ བྷགཝཏཱ ཨནུཉྙཱཏོ། ཨལཛྫིཾ པན བཧུསྶུཏམྤི སངྒཧཾ ཀཱཏུཾ ན ཝཊྚཏི། སོ ཧི ཨལཛྫཱིཔརིསཾ ཝཌྜྷཱཔེཏི, ལཛྫཱིཔརིསཾ ཧཱཔེཏི། བྷཎྜནཀཱརཀཾ པན ཝིཧཱརཏོཔི ནིཀྐཌྜྷིཏབྦཾ། ཏཐཱ ཧི ‘‘བྷཎྜནཀཱརཀཀལཧཀཱརཀམེཝ སཀལསངྒྷཱརཱམཏོ ནིཀྐཌྜྷིཏུཾ ལབྷཏི། སོ ཧི པཀྑཾ ལབྷིཏྭཱ སངྒྷམྤི བྷིནྡེཡྻ། ཨལཛྫཱིཨཱདཡོ པན ཨཏྟནོ ཝསནཊྛཱནཏོཡེཝ ནིཀྐཌྜྷིཏབྦཱ, སཀལསངྒྷཱརཱམཏོ ནིཀྐཌྜྷིཏུཾ ན ཝཊྚཏཱི’’ཏི ཨཊྛཀཐཱཡཾ (པཱཙི॰ ཨཊྛ॰ ༡༢༨) ཝུཏྟཾ།

    Evaṃ bahisīmato āgatassapi saṅghassa upakāraṃ kātuṃ sakkontassa visiṭṭhaguṇayuttassa dātabbabhāvo viññāyati, tasmā ‘‘amhākaṃ gaṇo na hoti, amhākaṃ vaṃso paveṇī na hoti, amhākaṃ sandiṭṭhasambhatto na hotī’’tiādīni vatvā na paṭikkhipitabbo. Gaṇādibhāvo hi appamāṇaṃ, yathāvuttabahūpakāratādibhāvoyeva pamāṇaṃ. Sāmaggikaraṇato paṭṭhāya hi samānagaṇo hoti. Tathā hi ukkhittānuvattakānaṃ laddhinānāsaṃvāsakānampi laddhivissajjanena tividhaukkhepanīyakammakatānaṃ kammanānāsaṃvāsakānampi osāraṇaṃ katvā sāmaggikaraṇena saṃvāso bhagavatā anuññāto. Alajjiṃ pana bahussutampi saṅgahaṃ kātuṃ na vaṭṭati. So hi alajjīparisaṃ vaḍḍhāpeti, lajjīparisaṃ hāpeti. Bhaṇḍanakārakaṃ pana vihāratopi nikkaḍḍhitabbaṃ. Tathā hi ‘‘bhaṇḍanakārakakalahakārakameva sakalasaṅghārāmato nikkaḍḍhituṃ labhati. So hi pakkhaṃ labhitvā saṅghampi bhindeyya. Alajjīādayo pana attano vasanaṭṭhānatoyeva nikkaḍḍhitabbā, sakalasaṅghārāmato nikkaḍḍhituṃ na vaṭṭatī’’ti aṭṭhakathāyaṃ (pāci. aṭṭha. 128) vuttaṃ.

    ཝུཌྜྷཱཔཙཱཡནཱདིསཱམགྒིརསརཧིཏཾ ཝིསབྷཱགཔུགྒལམྤི སངྒཧཾ ཀཱཏུཾ ན ལབྷཏི། ཝུཏྟཉྷི ‘‘ཨེཝརཱུཔེན ཧི ཝིསབྷཱགཔུགྒལེན ཨེཀཝིཧཱརེ ཝཱ ཨེཀཔརིཝེཎེ ཝཱ ཝསནྟེན ཨཏྠོ ནཏྠི, ཏསྨཱ སབྦཏྠེཝསྶ ནིཝཱསོ ཝཱརིཏོ’’ཏི (པཱཙི॰ ཨཊྛ॰ ༡༢༢), ཏསྨཱ ཨཱཝཱསིཀོ ཝཱ ཧོཏུ ཨཱགནྟུཀོ ཝཱ, སགཎོ ཝཱ ཧོཏུ ཨཉྙགཎོ ཝཱ, བཧུསྶུཏསཱིལཝནྟབྷཱུཏོ བྷིཀྑུ སངྒཧེཏབྦོ། ཝུཏྟཉྷི བྷགཝཏཱ –

    Vuḍḍhāpacāyanādisāmaggirasarahitaṃ visabhāgapuggalampi saṅgahaṃ kātuṃ na labhati. Vuttañhi ‘‘evarūpena hi visabhāgapuggalena ekavihāre vā ekapariveṇe vā vasantena attho natthi, tasmā sabbatthevassa nivāso vārito’’ti (pāci. aṭṭha. 122), tasmā āvāsiko vā hotu āgantuko vā, sagaṇo vā hotu aññagaṇo vā, bahussutasīlavantabhūto bhikkhu saṅgahetabbo. Vuttañhi bhagavatā –

    ‘‘བཧུསྶུཏཾ དྷམྨདྷརཾ, སཔྤཉྙཾ བུདྡྷསཱཝཀཾ།

    ‘‘Bahussutaṃ dhammadharaṃ, sappaññaṃ buddhasāvakaṃ;

    ནེཀྑཾ ཛམྦོནདསྶེཝ, ཀོ ཏཾ ནནྡིཏུམརཧཏི།

    Nekkhaṃ jambonadasseva, ko taṃ nanditumarahati;

    དེཝཱཔི ནཾ པསཾསནྟི, བྲཧྨུནཱཔི པསཾསིཏོ’’ཏི༎ (ཨ॰ ནི॰ ༤.༦) –

    Devāpi naṃ pasaṃsanti, brahmunāpi pasaṃsito’’ti. (a. ni. 4.6) –

    ཨཡཾ ཨནྟོསཱིམཊྛེན སངྒྷེན བཧཱུཔཀཱརཏཱགུཎཝིསིཊྛཏཱསངྑཱཏེཧི གུཎེཧི ཡུཏྟསྶ སངྒྷབྷཱརནིཏྠཱརཀསྶ བྷིཀྑུནོ ཕཱསུཀཾ ཨཱཝཱསཾ ཨནུཊྛཱཔནཱིཡཾ ཀཏྭཱ དཱནེ ཝིནིཙྪཡོ།

    Ayaṃ antosīmaṭṭhena saṅghena bahūpakāratāguṇavisiṭṭhatāsaṅkhātehi guṇehi yuttassa saṅghabhāranitthārakassa bhikkhuno phāsukaṃ āvāsaṃ anuṭṭhāpanīyaṃ katvā dāne vinicchayo.

    ཡདཱ པན སངྒྷཏྠེརོ ཛརཱདུབྦལཏཱཡ ཝཱ རོགཔཱིལི༹ཏཏཱཡ ཝཱ ཝིཝེཀཛ྄ཛྷཱསཡཏཱཡ ཝཱ གཎཾ ཨཔརིཧརིཏུཀཱམོ ཨཉྙསྶ དཱཏུཀཱམོ, ཨཏྟནོ ཨཙྩཡེན ཝཱ ཀལཧཝིཝཱདཱབྷཱཝམིཙྪནྟོ སདྡྷིཝིཧཱརིཀཱདཱིནཾ ནིཡྻཱཏེཏུཀཱམོ ཧོཏི, ཏདཱ ན ཨཏྟནོ ཨིསྶརཝཏཱཡ དཱཏབྦཾ, ཨཡཾ ཝིཧཱརོ སངྒྷིཀོ, ཏསྨཱ སངྒྷཾ སནྣིཔཱཏཱཔེཏྭཱ ཏཾ ཀཱརཎཾ ཨཱཙིཀྑིཏྭཱ བཧཱུཔཀཱརཏཱགུཎཝིསིཊྛཏཱཡུཏྟཔུགྒལོ ཝིཙིནཱཔེཏབྦོ། ཏཏོ སངྒྷོ ཙཏྟཱརི ཨགཏིགམནཱནི ཨནུཔགནྟྭཱ བྷགཝཏོ ཨཛ྄ཛྷཱསཡཱནུརཱུཔཾ ལཛྫཱིཔེསལབཧུསྶུཏསིཀྑཱཀཱམབྷཱུཏཾ པུགྒལཾ ཝིཙིནིཏྭཱ ‘‘ཨཡཾ བྷིཀྑུ ཨིམསྶ ཝིཧཱརསྶ ཨནུཙྪཝིཀོ’’ཏི ཨཱརོཙེཏི། མཧཱཐེརསྶཔི ཏམེཝ རུཙྩཏི, ཨིཙྩེཏཾ ཀུསལཾ། ནོ ཙེ རུཙྩཏི, ཨཏྟནོ བྷཱརབྷཱུཏཾ ཝུཏྟཔྤཀཱརཨངྒཝིཡུཏྟཾ པུགྒལཾ དཱཏུཀཱམོ ཧོཏི། ཨེཝཾ སནྟེ སངྒྷོ ཚནྡཱདིཨགཏིཾ ན གཙྪཏི, པུགྒལོཝ གཙྪཏི, ཏསྨཱ སངྒྷསྶེཝ ཨནུམཏིཡཱ ཝིཧཱརོ དཱཏབྦོ།

    Yadā pana saṅghatthero jarādubbalatāya vā rogapīḷitatāya vā vivekajjhāsayatāya vā gaṇaṃ apariharitukāmo aññassa dātukāmo, attano accayena vā kalahavivādābhāvamicchanto saddhivihārikādīnaṃ niyyātetukāmo hoti, tadā na attano issaravatāya dātabbaṃ, ayaṃ vihāro saṅghiko, tasmā saṅghaṃ sannipātāpetvā taṃ kāraṇaṃ ācikkhitvā bahūpakāratāguṇavisiṭṭhatāyuttapuggalo vicināpetabbo. Tato saṅgho cattāri agatigamanāni anupagantvā bhagavato ajjhāsayānurūpaṃ lajjīpesalabahussutasikkhākāmabhūtaṃ puggalaṃ vicinitvā ‘‘ayaṃ bhikkhu imassa vihārassa anucchaviko’’ti āroceti. Mahātherassapi tameva ruccati, iccetaṃ kusalaṃ. No ce ruccati, attano bhārabhūtaṃ vuttappakāraaṅgaviyuttaṃ puggalaṃ dātukāmo hoti. Evaṃ sante saṅgho chandādiagatiṃ na gacchati, puggalova gacchati, tasmā saṅghasseva anumatiyā vihāro dātabbo.

    སཙེ པན སངྒྷོ ཡཾ ཀཉྩི ཨཱམིསཾ ལབྷིཏྭཱ ཡཐཱཝུཏྟགུཎཝིཡུཏྟསྶ བྷིཀྑུནོ དཱཏུཀཱམོ ཧོཏི, པུགྒལོ པན བྷགཝཏོ ཨཛ྄ཛྷཱསཡཱནུརཱུཔཾ ཝུཏྟཔྤཀཱརཨངྒཡུཏྟབྷཱུཏསྶེཝ བྷིཀྑུསྶ དཱཏུཀཱམོ, ཏདཱ པུགྒལོཔི སངྒྷཔརིཡཱཔནྣོཡེཝཱཏི ཀཏྭཱ དྷམྨཀམྨཀཱརཀསྶ པུགྒལསྶེཝ ཨནུམཏིཡཱ ཝིཧཱརོ དཱཏབྦོ, ན སངྒྷཱནུམཏིཡཱ། ཝུཏྟཉྷེཏཾ ཨཊྛཀཐཱཡཾ (པཱརཱ॰ ཨཊྛ॰ ༢.༥༣༨-༥༣༩) ‘‘སཙེ སངྒྷོ ཀིཉྩི ལབྷིཏྭཱ ཨཱམིསགརུཀཏཱཡ ན ནིཝཱརེཏི, ཨེཀོ བྷིཀྑུ ནིཝཱརེཏི, སོཝ བྷིཀྑུ ཨིསྶརོ། སངྒྷིཀེསུ ཧི ཀམྨེསུ ཡོ དྷམྨཀམྨཾ ཀརོཏི, སོཝ ཨིསྶརོ’’ཏི། ཝུཏྟཉྷི –

    Sace pana saṅgho yaṃ kañci āmisaṃ labhitvā yathāvuttaguṇaviyuttassa bhikkhuno dātukāmo hoti, puggalo pana bhagavato ajjhāsayānurūpaṃ vuttappakāraaṅgayuttabhūtasseva bhikkhussa dātukāmo, tadā puggalopi saṅghapariyāpannoyevāti katvā dhammakammakārakassa puggalasseva anumatiyā vihāro dātabbo, na saṅghānumatiyā. Vuttañhetaṃ aṭṭhakathāyaṃ (pārā. aṭṭha. 2.538-539) ‘‘sace saṅgho kiñci labhitvā āmisagarukatāya na nivāreti, eko bhikkhu nivāreti, sova bhikkhu issaro. Saṅghikesu hi kammesu yo dhammakammaṃ karoti, sova issaro’’ti. Vuttañhi –

    ‘‘ཚནྡཱ དོསཱ བྷཡཱ མོཧཱ།

    ‘‘Chandā dosā bhayā mohā;

    ཡོ དྷམྨཾ ཨཏིཝཏྟཏི།

    Yo dhammaṃ ativattati;

    ནིཧཱིཡཏི ཏསྶ ཡསོ།

    Nihīyati tassa yaso;

    ཀཱལ༹པཀྑེཝ ཙནྡིམཱ༎

    Kāḷapakkheva candimā.

    ‘‘ཚནྡཱ དོསཱ བྷཡཱ མོཧཱ།

    ‘‘Chandā dosā bhayā mohā;

    ཡོ དྷམྨཾ ནཱཏིཝཏྟཏི།

    Yo dhammaṃ nātivattati;

    ཨཱཔཱུརཏི ཏསྶ ཡསོ།

    Āpūrati tassa yaso;

    སུཀྐཔཀྑེཝ ཙནྡིམཱ’’ཏི༎ (དཱི॰ ནི॰ ༣.༢༤༦; ཨ॰ ནི॰ ༤.༡༧-༡༨; པཱརི॰ ༣༨༢, ༣༨༦)།

    Sukkapakkheva candimā’’ti. (dī. ni. 3.246; a. ni. 4.17-18; pāri. 382, 386);

    ཡདཱ པན ཐེརོཔི ཀིཉྩི ཨཝཏྭཱ ཡཐཱཀམྨངྒཏོ, སངྒྷོཔི ན ཀསྶཙི ཝིཙཱརེཏི, ཨེཝཾ སངྒྷིཀཝིཧཱརེ ཨབྷིཀྑུཀེ སུཉྙེ ཝཏྟམཱནེ ཏསྨིཾ དེསེ ཡེན ཀེནཙི སཱསནསྶ ཝུདྡྷིམིཙྪནྟེན ཨཱཙརིཡེན ཨནྟོསཱིམཊྛཀཱ བྷིཀྑཱུ ཨེཝཾ སམུསྶཱཧེཏབྦཱ ‘‘མཱ ཏུམྷེ ཨཱཡསྨནྟོ ཨེཝཾ ཨཀཏྠ, ཨནྟོསཱིམཊྛཀེསུ བྷིཀྑཱུསུ བཧཱུཔཀཱརཏཱདིཡུཏྟཾ པུགྒལཾ ཝིཙིནཐ, ཝིཙིནིཏྭཱ ལབྷནྟཱ ཏསྶ པུགྒལསྶ སམགྒེན སངྒྷེན དྷུཝཝཱསཏྠཱཡ ཝིཧཱརཾ ཨནུཊྛཱཔནཱིཡཾ ཀཏྭཱ དེཐ, ནོ ཙེ ཨནྟོསཱིམཊྛཀེསུ བྷིཀྑཱུསུ ཨལཏྠ, ཨཐ བཧིསཱིམཊྛཀེསུ བྷིཀྑཱུསུ ཝིཙིནཐ། བཧིསཱིམཊྛཀེསུ བྷིཀྑཱུསུ ཝིཙིནིཏྭཱ ཡཐཱཝུཏྟཨངྒཡུཏྟཔུགྒལེ ལབྦྷམཱནེ ཏཾ པུགྒལཾ ཨནྟོསཱིམཾ པཝེསེཏྭཱ ཨནྟོསཱིམཊྛཀསྶ སངྒྷསྶ ཨནུམཏིཡཱ དྷུཝཝཱསཏྠཱཡ ཝིཧཱརཾ སམྨནྣིཏྭཱ ཨནུཊྛཱཔནཱིཡཾ ཀཏྭཱ དེཐ། ཨེཝཾ ཀརོནྟཱ ཧི ཏུམྷེ ཨཱཡསྨནྟོ ཨཔྤིཙྪཀཐཱ-སནྟོསཀཐཱ-སལླེཁཀཐཱ-པཝིཝིཏྟཀཐཱཝཱིརིཡཱརམྦྷཀཐཱ-སཱིལཀཐཱ-སམཱདྷིཀཐཱ-པཉྙཱཀཐཱ-ཝིམུཏྟིཀཐཱ-ཝིམུཏྟིཉཱཎདསྶནཀཐཱསངྑཱཏདསཀཐཱཝཏྠུསམྤནྣཾ པུགྒལཾ ཨུཔནིསྶཱཡ ཨསྶུཏཔུབྦཾ དྷམྨཾ སུཎིསྶཐ, སུཏཔུབྦཾ དྷམྨཾ པརིཡོདཱཔིསྶཐ, ཀངྑཾ ཝིནོདིསྶཐ, དིཊྛིཾ ཨུཛུཾ ཀརིསྶཐ, ཙིཏྟཾ པསཱདེསྶཐ། ཡསྶ ལཛྫིནོ པེསལསྶ བཧུསྶུཏསྶ སིཀྑཱཀཱམསྶ བྷིཀྑུནོ བྷིཀྑཾ ཨནུསིཀྑམཱནཱ སདྡྷཱཡ ཝཌྜྷིསྶནྟི, སཱིལེན ཝཌྜྷིསྶནྟི, སུཏེན ཝཌྜྷིསྶནྟི, ཙཱགེན ཝཌྜྷིསྶནྟི, པཉྙཱཡ ཝཌྜྷིསྶནྟཱི’’ཏི། ཝུཏྟཉྷེཏཾ ཝིསུདྡྷིམགྒེ (ཝིསུདྡྷི॰ ༡.༡༤) ‘‘ཀཏམོ ཨུཔནིསྶཡགོཙརོ དསཀཐཱཝཏྠུགུཎསམནྣཱགཏོ ཀལྱཱཎམིཏྟོ, ཡཾ ནིསྶཱཡ ཨསྶུཏཾ སུཎཱཏི, སུཏཾ པརིཡོདཔེཏི, ཀངྑཾ ཝིཏརཏི, དིཊྛིཾ ཨུཛུཾ ཀརོཏི, ཙིཏྟཾ པསཱདེཏི། ཡསྶ ཝཱ ཨནུསིཀྑམཱནོ སདྡྷཱཡ ཝཌྜྷཏི, སཱིལེན ཝཌྜྷཏི, སུཏེན ཝཌྜྷཏི , ཙཱགེན ཝཌྜྷཏི, པཉྙཱཡ ཝཌྜྷཏི, ཨཡཾ ཝུཙྩཏི ཨུཔནིསྶཡགོཙརོ’’ཏི། ཨེཝཾ སམུསྶཱཧེཏྭཱ དྷམྨཀཐཾ ཀཏྭཱ ཨནྟོསཱིམཊྛཀསངྒྷེནེཝ དྷུཝཝཱསཝིཧཱརོ དཱཔེཏབྦོཏི།

    Yadā pana theropi kiñci avatvā yathākammaṅgato, saṅghopi na kassaci vicāreti, evaṃ saṅghikavihāre abhikkhuke suññe vattamāne tasmiṃ dese yena kenaci sāsanassa vuddhimicchantena ācariyena antosīmaṭṭhakā bhikkhū evaṃ samussāhetabbā ‘‘mā tumhe āyasmanto evaṃ akattha, antosīmaṭṭhakesu bhikkhūsu bahūpakāratādiyuttaṃ puggalaṃ vicinatha, vicinitvā labhantā tassa puggalassa samaggena saṅghena dhuvavāsatthāya vihāraṃ anuṭṭhāpanīyaṃ katvā detha, no ce antosīmaṭṭhakesu bhikkhūsu alattha, atha bahisīmaṭṭhakesu bhikkhūsu vicinatha. Bahisīmaṭṭhakesu bhikkhūsu vicinitvā yathāvuttaaṅgayuttapuggale labbhamāne taṃ puggalaṃ antosīmaṃ pavesetvā antosīmaṭṭhakassa saṅghassa anumatiyā dhuvavāsatthāya vihāraṃ sammannitvā anuṭṭhāpanīyaṃ katvā detha. Evaṃ karontā hi tumhe āyasmanto appicchakathā-santosakathā-sallekhakathā-pavivittakathāvīriyārambhakathā-sīlakathā-samādhikathā-paññākathā-vimuttikathā-vimuttiñāṇadassanakathāsaṅkhātadasakathāvatthusampannaṃ puggalaṃ upanissāya assutapubbaṃ dhammaṃ suṇissatha, sutapubbaṃ dhammaṃ pariyodāpissatha, kaṅkhaṃ vinodissatha, diṭṭhiṃ ujuṃ karissatha, cittaṃ pasādessatha. Yassa lajjino pesalassa bahussutassa sikkhākāmassa bhikkhuno bhikkhaṃ anusikkhamānā saddhāya vaḍḍhissanti, sīlena vaḍḍhissanti, sutena vaḍḍhissanti, cāgena vaḍḍhissanti, paññāya vaḍḍhissantī’’ti. Vuttañhetaṃ visuddhimagge (visuddhi. 1.14) ‘‘katamo upanissayagocaro dasakathāvatthuguṇasamannāgato kalyāṇamitto, yaṃ nissāya assutaṃ suṇāti, sutaṃ pariyodapeti, kaṅkhaṃ vitarati, diṭṭhiṃ ujuṃ karoti, cittaṃ pasādeti. Yassa vā anusikkhamāno saddhāya vaḍḍhati, sīlena vaḍḍhati, sutena vaḍḍhati , cāgena vaḍḍhati, paññāya vaḍḍhati, ayaṃ vuccati upanissayagocaro’’ti. Evaṃ samussāhetvā dhammakathaṃ katvā antosīmaṭṭhakasaṅgheneva dhuvavāsavihāro dāpetabboti.

    ཨེཝཾ ཛིནསཱསནསྶ, ཝཌྜྷིཀཱམོ སུཔེསལོ།

    Evaṃ jinasāsanassa, vaḍḍhikāmo supesalo;

    ཨཀཱསི པཉྙཝཱ བྷིཀྑུ, སུཊྛུ ཨཱཝཱསནིཙྪཡནྟི༎

    Akāsi paññavā bhikkhu, suṭṭhu āvāsanicchayanti.

    ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ

    Iti vinayasaṅgahasaṃvaṇṇanābhūte vinayālaṅkāre

    ཝིཧཱརཝིནིཙྪཡཀཐཱལངྐཱརོ།

    Vihāravinicchayakathālaṅkāro.




    Next: ༢༩. ཀཐིནཏྠཱརཝིནིཙྪཡཀཐཱ • 29. Kathinatthāravinicchayakathā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact