| Library / Tipiṭaka / តិបិដក • Tipiṭaka / ជាតកបាឡិ • Jātakapāḷi |
៤៤១. ចតុបោសថិយជាតកំ (៣)
441. Catuposathiyajātakaṃ (3)
២៤.
24.
យោ កោបនេយ្យេ ន ករោតិ កោបំ, ន កុជ្ឈតិ សប្បុរិសោ កទាចិ;
Yo kopaneyye na karoti kopaṃ, na kujjhati sappuriso kadāci;
កុទ្ធោបិ សោ នាវិករោតិ កោបំ, តំ វេ នរំ សមណមាហុ 1 លោកេ។
Kuddhopi so nāvikaroti kopaṃ, taṃ ve naraṃ samaṇamāhu 2 loke.
២៥.
25.
ឩនូទរោ យោ សហតេ ជិឃច្ឆំ, ទន្តោ តបស្សី មិតបានភោជនោ;
Ūnūdaro yo sahate jighacchaṃ, danto tapassī mitapānabhojano;
អាហារហេតុ ន ករោតិ បាបំ, តំ វេ នរំ សមណមាហុ លោកេ។
Āhārahetu na karoti pāpaṃ, taṃ ve naraṃ samaṇamāhu loke.
២៦.
26.
ខិឌ្ឌំ រតិំ វិប្បជហិត្វាន សព្ពំ, ន ចាលិកំ ភាសសិ កិញ្ចិ លោកេ;
Khiḍḍaṃ ratiṃ vippajahitvāna sabbaṃ, na cālikaṃ bhāsasi kiñci loke;
វិភូសដ្ឋានា វិរតោ មេថុនស្មា, តំ វេ នរំ សមណមាហុ លោកេ។
Vibhūsaṭṭhānā virato methunasmā, taṃ ve naraṃ samaṇamāhu loke.
២៧.
27.
បរិគ្គហំ លោភធម្មញ្ច សព្ពំ, យោ វេ បរិញ្ញាយ បរិច្ចជេតិ;
Pariggahaṃ lobhadhammañca sabbaṃ, yo ve pariññāya pariccajeti;
ទន្តំ ឋិតត្តំ អមមំ និរាសំ, តំ វេ នរំ សមណមាហុ លោកេ។
Dantaṃ ṭhitattaṃ amamaṃ nirāsaṃ, taṃ ve naraṃ samaṇamāhu loke.
២៨.
28.
បុច្ឆាម កត្តារមនោមបញ្ញំ 3, កថាសុ នោ វិគ្គហោ អត្ថិ ជាតោ;
Pucchāma kattāramanomapaññaṃ 4, kathāsu no viggaho atthi jāto;
ឆិន្ទជ្ជ កង្ខំ វិចិកិច្ឆិតានិ, តទជ្ជ 5 កង្ខំ វិតរេមុ សព្ពេ។
Chindajja kaṅkhaṃ vicikicchitāni, tadajja 6 kaṅkhaṃ vitaremu sabbe.
២៩.
29.
យេ បណ្ឌិតា អត្ថទសា ភវន្តិ, ភាសន្តិ តេ យោនិសោ តត្ថ កាលេ;
Ye paṇḍitā atthadasā bhavanti, bhāsanti te yoniso tattha kāle;
កថំ នុ កថានំ អភាសិតានំ, អត្ថំ នយេយ្យុំ កុសលា ជនិន្ទា។
Kathaṃ nu kathānaṃ abhāsitānaṃ, atthaṃ nayeyyuṃ kusalā janindā.
៣០.
30.
កថំ ហវេ ភាសតិ នាគរាជា, គរុឡោ បន វេនតេយ្យោ កិមាហ;
Kathaṃ have bhāsati nāgarājā, garuḷo pana venateyyo kimāha;
គន្ធព្ពរាជា បន កិំ វទេសិ, កថំ បន កុរូនំ រាជសេដ្ឋោ។
Gandhabbarājā pana kiṃ vadesi, kathaṃ pana kurūnaṃ rājaseṭṭho.
៣១.
31.
ខន្តិំ ហវេ ភាសតិ នាគរាជា, អប្បាហារំ គរុឡោ វេនតេយ្យោ;
Khantiṃ have bhāsati nāgarājā, appāhāraṃ garuḷo venateyyo;
គន្ធព្ពរាជា រតិវិប្បហានំ, អកិញ្ចនំ កុរូនំ រាជសេដ្ឋោ។
Gandhabbarājā rativippahānaṃ, akiñcanaṃ kurūnaṃ rājaseṭṭho.
៣២.
32.
សព្ពានិ ឯតានិ សុភាសិតានិ, ន ហេត្ថ ទុព្ភាសិតមត្ថិ កិញ្ចិ;
Sabbāni etāni subhāsitāni, na hettha dubbhāsitamatthi kiñci;
យស្មិញ្ច ឯតានិ បតិដ្ឋិតានិ, អរាវ នាភ្យា សុសមោហិតានិ;
Yasmiñca etāni patiṭṭhitāni, arāva nābhyā susamohitāni;
ចតុព្ភិ ធម្មេហិ សមង្គិភូតំ, តំ វេ នរំ សមណមាហុ លោកេ។
Catubbhi dhammehi samaṅgibhūtaṃ, taṃ ve naraṃ samaṇamāhu loke.
៣៣.
33.
តុវញ្ហិ 7 សេដ្ឋោ ត្វមនុត្តរោសិ, ត្វំ ធម្មគូ ធម្មវិទូ សុមេធោ;
Tuvañhi 8 seṭṭho tvamanuttarosi, tvaṃ dhammagū dhammavidū sumedho;
បញ្ញាយ បញ្ហំ សមធិគ្គហេត្វា, អច្ឆេច្ឆិ ធីរោ វិចិកិច្ឆិតានិ;
Paññāya pañhaṃ samadhiggahetvā, acchecchi dhīro vicikicchitāni;
អច្ឆេច្ឆិ កង្ខំ វិចិកិច្ឆិតានិ, ចុន្ទោ យថា នាគទន្តំ ខរេន។
Acchecchi kaṅkhaṃ vicikicchitāni, cundo yathā nāgadantaṃ kharena.
៣៤.
34.
នីលុប្បលាភំ វិមលំ អនគ្ឃំ, វត្ថំ ឥទំ ធូមសមានវណ្ណំ;
Nīluppalābhaṃ vimalaṃ anagghaṃ, vatthaṃ idaṃ dhūmasamānavaṇṇaṃ;
បញ្ហស្ស វេយ្យាករណេន តុដ្ឋោ, ទទាមិ តេ ធម្មបូជាយ ធីរ។
Pañhassa veyyākaraṇena tuṭṭho, dadāmi te dhammapūjāya dhīra.
៣៥.
35.
សុវណ្ណមាលំ សតបត្តផុល្លិតំ, សកេសរំ រត្នសហស្សមណ្ឌិតំ;
Suvaṇṇamālaṃ satapattaphullitaṃ, sakesaraṃ ratnasahassamaṇḍitaṃ;
បញ្ហស្ស វេយ្យាករណេន តុដ្ឋោ, ទទាមិ តេ ធម្មបូជាយ ធីរ។
Pañhassa veyyākaraṇena tuṭṭho, dadāmi te dhammapūjāya dhīra.
៣៦.
36.
មណិំ អនគ្ឃំ រុចិរំ បភស្សរំ, កណ្ឋាវសត្តំ 9 មណិភូសិតំ មេ;
Maṇiṃ anagghaṃ ruciraṃ pabhassaraṃ, kaṇṭhāvasattaṃ 10 maṇibhūsitaṃ me;
បញ្ហស្ស វេយ្យាករណេន តុដ្ឋោ, ទទាមិ តេ ធម្មបូជាយ ធីរ។
Pañhassa veyyākaraṇena tuṭṭho, dadāmi te dhammapūjāya dhīra.
៣៧.
37.
គវំ សហស្សំ ឧសភញ្ច នាគំ, អាជញ្ញយុត្តេ ច រថេ ទស ឥមេ;
Gavaṃ sahassaṃ usabhañca nāgaṃ, ājaññayutte ca rathe dasa ime;
បញ្ហស្ស វេយ្យាករណេន តុដ្ឋោ, ទទាមិ តេ គាមវរានិ សោឡស។
Pañhassa veyyākaraṇena tuṭṭho, dadāmi te gāmavarāni soḷasa.
៣៨.
38.
សារិបុត្តោ តទា នាគោ, សុបណ្ណោ បន កោលិតោ;
Sāriputto tadā nāgo, supaṇṇo pana kolito;
គន្ធព្ពរាជា អនុរុទ្ធោ, រាជា អានន្ទ បណ្ឌិតោ;
Gandhabbarājā anuruddho, rājā ānanda paṇḍito;
វិធុរោ ពោធិសត្តោ ច, ឯវំ ធារេថ ជាតកន្តិ។
Vidhuro bodhisatto ca, evaṃ dhāretha jātakanti.
ចតុបោសថិយជាតកំ តតិយំ។
Catuposathiyajātakaṃ tatiyaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៤៤១] ៣. ចតុបោសថិកជាតកវណ្ណនា • [441] 3. Catuposathikajātakavaṇṇanā
