| Library / Tipiṭaka / д̇ибидага • Tipiṭaka / вимаанавад̇т̇у-адтагат̇аа • Vimānavatthu-aṭṭhakathā |
7. жад̇урид̇т̇ивимаанаван̣н̣анаа
7. Caturitthivimānavaṇṇanā
абхигганд̇зна ван̣н̣знаад̇и жад̇урид̇т̇ивимаанам̣. д̇асса гаа уббад̇д̇и? бхаг̇авад̇и саавад̇т̇ияам̣ вихаранд̇з ааяасмаа махаамог̇г̇аллаано хздтаа вуд̇д̇анаязна д̣̇зважааригам̣ жаранд̇о д̇аавад̇им̣сабхаванам̣ г̇ад̇о. со д̇ад̇т̇а бадибаадияаа тид̇зсу жад̇уусу вимаанзсу жад̇ассо д̣̇звад̇хийд̇аро бажжзгам̣ ажчараасахассабариваараа д̣̇иб̣б̣асамбад̇д̇им̣ анубхаванд̇ияо д̣̇исваа д̇аахи буб̣б̣з гад̇агаммам̣ бужчанд̇о –
Abhikkantenavaṇṇenāti caturitthivimānaṃ. Tassa kā uppatti? Bhagavati sāvatthiyaṃ viharante āyasmā mahāmoggallāno heṭṭhā vuttanayena devacārikaṃ caranto tāvatiṃsabhavanaṃ gato. So tattha paṭipāṭiyā ṭhitesu catūsu vimānesu catasso devadhītaro paccekaṃ accharāsahassaparivārā dibbasampattiṃ anubhavantiyo disvā tāhi pubbe katakammaṃ pucchanto –
755. ‘‘абхигганд̇зна ван̣н̣зна…бз…ван̣н̣о жа д̇з саб̣б̣ад̣̇исаа бабхаасад̇ий’’д̇и. –
755. ‘‘Abhikkantena vaṇṇena…pe…vaṇṇo ca te sabbadisā pabhāsatī’’ti. –
имаахи г̇аат̇аахи бадибаадияаа бужчи. д̇ааби д̇асса бужчаананд̇арам̣ бадибаадияаа б̣яаагарим̣су. д̇ам̣ д̣̇ассзд̇ум̣ –
Imāhi gāthāhi paṭipāṭiyā pucchi. Tāpi tassa pucchānantaraṃ paṭipāṭiyā byākariṃsu. Taṃ dassetuṃ –
758. ‘‘саа д̣̇звад̇аа ад̇д̇аманаа…бз…яасса гаммассид̣̇ам̣ пала’’нд̇и. –
758. ‘‘Sā devatā attamanā…pe…yassa kammassidaṃ phala’’nti. –
аяам̣ г̇аат̇аа вуд̇д̇аа.
Ayaṃ gāthā vuttā.
д̇аа гира гассабасса бхаг̇авад̇о гаалз зсигаанаамагз радтз бан̣н̣агад̇з наама наг̇арз гулаг̇зхз ниб̣б̣ад̇д̇аа ваяаббад̇д̇аа д̇асмим̣язва наг̇арз бад̇игулам̣ г̇ад̇аа самаг̇г̇аваасам̣ васанд̇и. д̇аасу згаа ан̃н̃ад̇арам̣ бин̣д̣ажааригам̣ бхигкум̣ д̣̇исваа басаннажид̇д̇аа инд̣̇ийварагалаабам̣ ад̣̇ааси, абараа ан̃н̃асса нийлуббалахад̇т̇агам̣ ад̣̇ааси, абараа бад̣̇умахад̇т̇агам̣ ад̣̇ааси, абараа суманамагул̣аани ад̣̇ааси. д̇аа абарзна самаязна гаалам̣ гад̇ваа д̇аавад̇им̣сабхаванз ниб̣б̣ад̇д̇им̣су, д̇аасам̣ ажчараасахассам̣ баривааро ахоси. д̇аа д̇ад̇т̇а яаавад̇ааяугам̣ д̣̇иб̣б̣асамбад̇д̇им̣ анубхавид̇ваа д̇ад̇о жуд̇аа д̇ассзва гаммасса вибаагаавасзсзна абараабарам̣ д̇ад̇т̇зва сам̣саранд̇ияо имасмим̣ б̣уд̣̇д̇хуббаад̣̇з д̇ад̇т̇зва уббаннаа вуд̇д̇анаязна ааяасмад̇аа махаамог̇г̇аллаанзна бужчид̇аа. д̇аасу згаа ад̇д̇анаа гад̇ам̣ буб̣б̣агаммам̣ т̇зрасса гат̇знд̇ий –
Tā kira kassapassa bhagavato kāle esikānāmake raṭṭhe paṇṇakate nāma nagare kulagehe nibbattā vayappattā tasmiṃyeva nagare patikulaṃ gatā samaggavāsaṃ vasanti. Tāsu ekā aññataraṃ piṇḍacārikaṃ bhikkhuṃ disvā pasannacittā indīvarakalāpaṃ adāsi, aparā aññassa nīluppalahatthakaṃ adāsi, aparā padumahatthakaṃ adāsi, aparā sumanamakuḷāni adāsi. Tā aparena samayena kālaṃ katvā tāvatiṃsabhavane nibbattiṃsu, tāsaṃ accharāsahassaṃ parivāro ahosi. Tā tattha yāvatāyukaṃ dibbasampattiṃ anubhavitvā tato cutā tasseva kammassa vipākāvasesena aparāparaṃ tattheva saṃsarantiyo imasmiṃ buddhuppāde tattheva uppannā vuttanayena āyasmatā mahāmoggallānena pucchitā. Tāsu ekā attanā kataṃ pubbakammaṃ therassa kathentī –
759.
759.
‘‘инд̣̇ийвараанам̣ хад̇т̇агам̣ ахамад̣̇аасим̣, бхигкуно бин̣д̣ааяа жаранд̇асса;
‘‘Indīvarānaṃ hatthakaṃ ahamadāsiṃ, bhikkhuno piṇḍāya carantassa;
зсигаанам̣ ун̣н̣ад̇асмим̣, наг̇араварз бан̣н̣агад̇з раммз.
Esikānaṃ uṇṇatasmiṃ, nagaravare paṇṇakate ramme.
760.
760.
‘‘д̇зна мзд̇аад̣̇исо ван̣н̣о…бз…ван̣н̣о жа мз саб̣б̣ад̣̇исаа бабхаасад̇ий’’д̇и. –
‘‘Tena metādiso vaṇṇo…pe…vaṇṇo ca me sabbadisā pabhāsatī’’ti. –
ааха. абараа –
Āha. Aparā –
766.
766.
‘‘нийлуббалахад̇т̇агам̣ ахамад̣̇аасим̣, бхигкуно бин̣д̣ааяа жаранд̇асса;
‘‘Nīluppalahatthakaṃ ahamadāsiṃ, bhikkhuno piṇḍāya carantassa;
зсигаанам̣ ун̣н̣ад̇асмим̣, наг̇араварз бан̣н̣агад̇з раммз.
Esikānaṃ uṇṇatasmiṃ, nagaravare paṇṇakate ramme.
767. ‘‘д̇зна мзд̇аад̣̇исо ван̣н̣о…бз…ван̣н̣о жа мз саб̣б̣ад̣̇исаа бабхаасад̇ий’’д̇и. –
767. ‘‘Tena metādiso vaṇṇo…pe…vaṇṇo ca me sabbadisā pabhāsatī’’ti. –
ааха. абараа –
Āha. Aparā –
773.
773.
‘‘од̣̇аад̇амуулагам̣ харид̇абад̇д̇ам̣, уд̣̇агасмим̣ сарз ж̇аад̇ам̣ ахамад̣̇аасим̣;
‘‘Odātamūlakaṃ haritapattaṃ, udakasmiṃ sare jātaṃ ahamadāsiṃ;
бхигкуно бин̣д̣ааяа жаранд̇асса, зсигаанам̣ ун̣н̣ад̇асмим̣;
Bhikkhuno piṇḍāya carantassa, esikānaṃ uṇṇatasmiṃ;
наг̇араварз бан̣н̣агад̇з раммз.
Nagaravare paṇṇakate ramme.
774. ‘‘д̇зна мзд̇аад̣̇исо ван̣н̣о…бз…ван̣н̣о жа мз саб̣б̣ад̣̇исаа бабхаасад̇ий’’д̇и. –
774. ‘‘Tena metādiso vaṇṇo…pe…vaṇṇo ca me sabbadisā pabhāsatī’’ti. –
ааха. абараа –
Āha. Aparā –
780.
780.
‘‘ахам̣ суманаа суманасса суманамагул̣аани, д̣̇анд̇аван̣н̣аани ахамад̣̇аасим̣;
‘‘Ahaṃ sumanā sumanassa sumanamakuḷāni, dantavaṇṇāni ahamadāsiṃ;
бхигкуно бин̣д̣ааяа жаранд̇асса, зсигаанам̣ ун̣н̣ад̇асмим̣;
Bhikkhuno piṇḍāya carantassa, esikānaṃ uṇṇatasmiṃ;
наг̇араварз бан̣н̣агад̇з раммз.
Nagaravare paṇṇakate ramme.
781. ‘‘д̇зна мзд̇аад̣̇исо ван̣н̣о…бз…ван̣н̣о жа мз саб̣б̣ад̣̇исаа бабхаасад̇ий’’д̇и. –
781. ‘‘Tena metādiso vaṇṇo…pe…vaṇṇo ca me sabbadisā pabhāsatī’’ti. –
ааха.
Āha.
759. д̇ад̇т̇а инд̣̇ийвараанам̣ хад̇т̇аганд̇и уд̣̇д̣̇аалагабубпахад̇т̇ам̣ ваад̇агхаад̇агабубпагалаабам̣. зсигаананд̇и зсигаарадтасса. ун̣н̣ад̇асмим̣ наг̇араварзд̇и ун̣н̣ад̇з бхуумибад̣̇зсз нивидтз мзгход̣̇арам̣ лиханд̇зхи вияа ажжуг̇г̇ад̇зхи баасаад̣̇агуудааг̇аараад̣̇ийхи ун̣н̣ад̇з уд̇д̇аманаг̇арз. бан̣н̣агад̇зд̇и звам̣наамагз наг̇арз.
759. Tattha indīvarānaṃ hatthakanti uddālakapupphahatthaṃ vātaghātakapupphakalāpaṃ. Esikānanti esikāraṭṭhassa. Uṇṇatasmiṃ nagaravareti uṇṇate bhūmipadese niviṭṭhe meghodaraṃ lihantehi viya accuggatehi pāsādakūṭāgārādīhi uṇṇate uttamanagare. Paṇṇakateti evaṃnāmake nagare.
766. нийлуббалахад̇т̇аганд̇и гувалаяагалаабам̣.
766.Nīluppalahatthakanti kuvalayakalāpaṃ.
773. од̣̇аад̇амуулаганд̇и сзд̇амуулам̣, бхисамуулаанам̣ д̇хавалад̇ааяа вуд̇д̇ам̣, бад̣̇умагалаабам̣ санд̇хааяа вад̣̇ад̇и. д̇знааха ‘‘харид̇абад̇д̇а’’нд̇иаад̣̇и. д̇ад̇т̇а харид̇абад̇д̇анд̇и нийлабад̇д̇ам̣. авиж̇ахид̇амагул̣абад̇д̇асса хи бад̣̇умасса б̣аахирабад̇д̇аани харид̇аван̣н̣аани зва хонд̇и. уд̣̇агасмим̣ сарз ж̇аад̇анд̇и сарз уд̣̇агамхи ж̇аад̇ам̣, сароруханд̇и ад̇т̇о.
773.Odātamūlakanti setamūlaṃ, bhisamūlānaṃ dhavalatāya vuttaṃ, padumakalāpaṃ sandhāya vadati. Tenāha ‘‘haritapatta’’ntiādi. Tattha haritapattanti nīlapattaṃ. Avijahitamakuḷapattassa hi padumassa bāhirapattāni haritavaṇṇāni eva honti. Udakasmiṃ sare jātanti sare udakamhi jātaṃ, saroruhanti attho.
780. суманаад̇и звам̣наамаа. суманассаад̇и сунд̣̇аражид̇д̇асса. суманамагул̣аанийд̇и ж̇аад̇исуманабубпамагул̣аани. д̣̇анд̇аван̣н̣аанийд̇и саж̇ж̇угам̣ улликид̇ахад̇т̇ид̣̇анд̇асад̣̇исаван̣н̣аани.
780.Sumanāti evaṃnāmā. Sumanassāti sundaracittassa. Sumanamakuḷānīti jātisumanapupphamakuḷāni. Dantavaṇṇānīti sajjukaṃ ullikhitahatthidantasadisavaṇṇāni.
звам̣ д̇аахи ад̇д̇анаа гад̇агаммз гат̇ид̇з т̇зро д̇аасам̣ анубуб̣б̣им̣ гат̇ам̣ гат̇зд̇ваа сажжаани багаасзси. сажжабарияосаанз саа саб̣б̣ааби сахабариваараа сод̇аабаннаа ахзсум̣. т̇зро д̇ам̣ бавад̇д̇им̣ мануссалогам̣ ааг̇анд̇ваа бхаг̇авад̇о аарожзси. бхаг̇аваа д̇амад̇т̇ам̣ адтуббад̇д̇им̣ гад̇ваа самбад̇д̇абарисааяа д̇хаммам̣ д̣̇зсзси. саа д̇хаммад̣̇зсанаа махааж̇анасса саад̇т̇игаа ж̇аад̇аад̇и.
Evaṃ tāhi attanā katakamme kathite thero tāsaṃ anupubbiṃ kathaṃ kathetvā saccāni pakāsesi. Saccapariyosāne sā sabbāpi sahaparivārā sotāpannā ahesuṃ. Thero taṃ pavattiṃ manussalokaṃ āgantvā bhagavato ārocesi. Bhagavā tamatthaṃ aṭṭhuppattiṃ katvā sampattaparisāya dhammaṃ desesi. Sā dhammadesanā mahājanassa sātthikā jātāti.
жад̇урид̇т̇ивимаанаван̣н̣анаа нидтид̇аа.
Caturitthivimānavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / вимаанавад̇т̇убаал̣и • Vimānavatthupāḷi / 7. жад̇урид̇т̇ивимаанавад̇т̇у • 7. Caturitthivimānavatthu
