| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১১. চতুত্থঅভব্বট্ঠানসুত্তং
11. Catutthaabhabbaṭṭhānasuttaṃ
৯৫. ‘‘ছযিমানি , ভিক্খৰে, অভব্বট্ঠানানি। কতমানি ছ? অভব্বো দিট্ঠিসম্পন্নো পুগ্গলো সযংকতং সুখদুক্খং পচ্চাগন্তুং, অভব্বো দিট্ঠিসম্পন্নো পুগ্গলো পরংকতং 1 সুখদুক্খং পচ্চাগন্তুং, অভব্বো দিট্ঠিসম্পন্নো পুগ্গলো সযংকতঞ্চ পরংকতঞ্চ সুখদুক্খং পচ্চাগন্তুং, অভব্বো দিট্ঠিসম্পন্নো পুগ্গলো অসযংকারং অধিচ্চসমুপ্পন্নং সুখদুক্খং পচ্চাগন্তুং, অভব্বো দিট্ঠিসম্পন্নো পুগ্গলো অপরংকারং অধিচ্চসমুপ্পন্নং সুখদুক্খং পচ্চাগন্তুং, অভব্বো দিট্ঠিসম্পন্নো পুগ্গলো অসযংকারঞ্চ অপরংকারঞ্চ অধিচ্চসমুপ্পন্নং সুখদুক্খং পচ্চাগন্তুং। তং কিস্স হেতু? তথা হিস্স, ভিক্খৰে, দিট্ঠিসম্পন্নস্স পুগ্গলস্স হেতু চ সুদিট্ঠো হেতুসমুপ্পন্না চ ধম্মা। ইমানি খো, ভিক্খৰে, ছ অভব্বট্ঠানানী’’তি। একাদসমং।
95. ‘‘Chayimāni , bhikkhave, abhabbaṭṭhānāni. Katamāni cha? Abhabbo diṭṭhisampanno puggalo sayaṃkataṃ sukhadukkhaṃ paccāgantuṃ, abhabbo diṭṭhisampanno puggalo paraṃkataṃ 2 sukhadukkhaṃ paccāgantuṃ, abhabbo diṭṭhisampanno puggalo sayaṃkatañca paraṃkatañca sukhadukkhaṃ paccāgantuṃ, abhabbo diṭṭhisampanno puggalo asayaṃkāraṃ adhiccasamuppannaṃ sukhadukkhaṃ paccāgantuṃ, abhabbo diṭṭhisampanno puggalo aparaṃkāraṃ adhiccasamuppannaṃ sukhadukkhaṃ paccāgantuṃ, abhabbo diṭṭhisampanno puggalo asayaṃkārañca aparaṃkārañca adhiccasamuppannaṃ sukhadukkhaṃ paccāgantuṃ. Taṃ kissa hetu? Tathā hissa, bhikkhave, diṭṭhisampannassa puggalassa hetu ca sudiṭṭho hetusamuppannā ca dhammā. Imāni kho, bhikkhave, cha abhabbaṭṭhānānī’’ti. Ekādasamaṃ.
তস্সুদ্দানং –
Tassuddānaṃ –
সীতিভাৰং আৰরণং, ৰোরোপিতা সুস্সূসতি।
Sītibhāvaṃ āvaraṇaṃ, voropitā sussūsati;
অপ্পহায পহীনাভব্বো, তট্ঠানা চতুরোপি চাতি॥
Appahāya pahīnābhabbo, taṭṭhānā caturopi cāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৮-১১. অভব্বট্ঠানসুত্তচতুক্কৰণ্ণনা • 8-11. Abhabbaṭṭhānasuttacatukkavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ২-১১. আৰরণসুত্তাদিৰণ্ণনা • 2-11. Āvaraṇasuttādivaṇṇanā
