| Library / Tipiṭaka / తిపిటక • Tipiṭaka / అఙ్గుత్తరనికాయ • Aṅguttaranikāya |
౧౧. చతుత్థఅభబ్బట్ఠానసుత్తం
11. Catutthaabhabbaṭṭhānasuttaṃ
౯౫. ‘‘ఛయిమాని , భిక్ఖవే, అభబ్బట్ఠానాని. కతమాని ఛ? అభబ్బో దిట్ఠిసమ్పన్నో పుగ్గలో సయంకతం సుఖదుక్ఖం పచ్చాగన్తుం, అభబ్బో దిట్ఠిసమ్పన్నో పుగ్గలో పరంకతం 1 సుఖదుక్ఖం పచ్చాగన్తుం, అభబ్బో దిట్ఠిసమ్పన్నో పుగ్గలో సయంకతఞ్చ పరంకతఞ్చ సుఖదుక్ఖం పచ్చాగన్తుం, అభబ్బో దిట్ఠిసమ్పన్నో పుగ్గలో అసయంకారం అధిచ్చసముప్పన్నం సుఖదుక్ఖం పచ్చాగన్తుం, అభబ్బో దిట్ఠిసమ్పన్నో పుగ్గలో అపరంకారం అధిచ్చసముప్పన్నం సుఖదుక్ఖం పచ్చాగన్తుం, అభబ్బో దిట్ఠిసమ్పన్నో పుగ్గలో అసయంకారఞ్చ అపరంకారఞ్చ అధిచ్చసముప్పన్నం సుఖదుక్ఖం పచ్చాగన్తుం. తం కిస్స హేతు? తథా హిస్స, భిక్ఖవే, దిట్ఠిసమ్పన్నస్స పుగ్గలస్స హేతు చ సుదిట్ఠో హేతుసముప్పన్నా చ ధమ్మా. ఇమాని ఖో, భిక్ఖవే, ఛ అభబ్బట్ఠానానీ’’తి. ఏకాదసమం.
95. ‘‘Chayimāni , bhikkhave, abhabbaṭṭhānāni. Katamāni cha? Abhabbo diṭṭhisampanno puggalo sayaṃkataṃ sukhadukkhaṃ paccāgantuṃ, abhabbo diṭṭhisampanno puggalo paraṃkataṃ 2 sukhadukkhaṃ paccāgantuṃ, abhabbo diṭṭhisampanno puggalo sayaṃkatañca paraṃkatañca sukhadukkhaṃ paccāgantuṃ, abhabbo diṭṭhisampanno puggalo asayaṃkāraṃ adhiccasamuppannaṃ sukhadukkhaṃ paccāgantuṃ, abhabbo diṭṭhisampanno puggalo aparaṃkāraṃ adhiccasamuppannaṃ sukhadukkhaṃ paccāgantuṃ, abhabbo diṭṭhisampanno puggalo asayaṃkārañca aparaṃkārañca adhiccasamuppannaṃ sukhadukkhaṃ paccāgantuṃ. Taṃ kissa hetu? Tathā hissa, bhikkhave, diṭṭhisampannassa puggalassa hetu ca sudiṭṭho hetusamuppannā ca dhammā. Imāni kho, bhikkhave, cha abhabbaṭṭhānānī’’ti. Ekādasamaṃ.
తస్సుద్దానం –
Tassuddānaṃ –
సీతిభావం ఆవరణం, వోరోపితా సుస్సూసతి;
Sītibhāvaṃ āvaraṇaṃ, voropitā sussūsati;
అప్పహాయ పహీనాభబ్బో, తట్ఠానా చతురోపి చాతి.
Appahāya pahīnābhabbo, taṭṭhānā caturopi cāti.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / అఙ్గుత్తరనికాయ (అట్ఠకథా) • Aṅguttaranikāya (aṭṭhakathā) / ౮-౧౧. అభబ్బట్ఠానసుత్తచతుక్కవణ్ణనా • 8-11. Abhabbaṭṭhānasuttacatukkavaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / అఙ్గుత్తరనికాయ (టీకా) • Aṅguttaranikāya (ṭīkā) / ౨-౧౧. ఆవరణసుత్తాదివణ్ణనా • 2-11. Āvaraṇasuttādivaṇṇanā
