| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
១១. ចតុត្ថអភព្ពដ្ឋានសុត្តំ
11. Catutthaabhabbaṭṭhānasuttaṃ
៩៥. ‘‘ឆយិមានិ , ភិក្ខវេ, អភព្ពដ្ឋានានិ។ កតមានិ ឆ? អភព្ពោ ទិដ្ឋិសម្បន្នោ បុគ្គលោ សយំកតំ សុខទុក្ខំ បច្ចាគន្តុំ, អភព្ពោ ទិដ្ឋិសម្បន្នោ បុគ្គលោ បរំកតំ 1 សុខទុក្ខំ បច្ចាគន្តុំ, អភព្ពោ ទិដ្ឋិសម្បន្នោ បុគ្គលោ សយំកតញ្ច បរំកតញ្ច សុខទុក្ខំ បច្ចាគន្តុំ, អភព្ពោ ទិដ្ឋិសម្បន្នោ បុគ្គលោ អសយំការំ អធិច្ចសមុប្បន្នំ សុខទុក្ខំ បច្ចាគន្តុំ, អភព្ពោ ទិដ្ឋិសម្បន្នោ បុគ្គលោ អបរំការំ អធិច្ចសមុប្បន្នំ សុខទុក្ខំ បច្ចាគន្តុំ, អភព្ពោ ទិដ្ឋិសម្បន្នោ បុគ្គលោ អសយំការញ្ច អបរំការញ្ច អធិច្ចសមុប្បន្នំ សុខទុក្ខំ បច្ចាគន្តុំ។ តំ កិស្ស ហេតុ? តថា ហិស្ស, ភិក្ខវេ, ទិដ្ឋិសម្បន្នស្ស បុគ្គលស្ស ហេតុ ច សុទិដ្ឋោ ហេតុសមុប្បន្នា ច ធម្មា។ ឥមានិ ខោ, ភិក្ខវេ, ឆ អភព្ពដ្ឋានានី’’តិ។ ឯកាទសមំ។
95. ‘‘Chayimāni , bhikkhave, abhabbaṭṭhānāni. Katamāni cha? Abhabbo diṭṭhisampanno puggalo sayaṃkataṃ sukhadukkhaṃ paccāgantuṃ, abhabbo diṭṭhisampanno puggalo paraṃkataṃ 2 sukhadukkhaṃ paccāgantuṃ, abhabbo diṭṭhisampanno puggalo sayaṃkatañca paraṃkatañca sukhadukkhaṃ paccāgantuṃ, abhabbo diṭṭhisampanno puggalo asayaṃkāraṃ adhiccasamuppannaṃ sukhadukkhaṃ paccāgantuṃ, abhabbo diṭṭhisampanno puggalo aparaṃkāraṃ adhiccasamuppannaṃ sukhadukkhaṃ paccāgantuṃ, abhabbo diṭṭhisampanno puggalo asayaṃkārañca aparaṃkārañca adhiccasamuppannaṃ sukhadukkhaṃ paccāgantuṃ. Taṃ kissa hetu? Tathā hissa, bhikkhave, diṭṭhisampannassa puggalassa hetu ca sudiṭṭho hetusamuppannā ca dhammā. Imāni kho, bhikkhave, cha abhabbaṭṭhānānī’’ti. Ekādasamaṃ.
តស្សុទ្ទានំ –
Tassuddānaṃ –
សីតិភាវំ អាវរណំ, វោរោបិតា សុស្សូសតិ;
Sītibhāvaṃ āvaraṇaṃ, voropitā sussūsati;
អប្បហាយ បហីនាភព្ពោ, តដ្ឋានា ចតុរោបិ ចាតិ។
Appahāya pahīnābhabbo, taṭṭhānā caturopi cāti.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៨-១១. អភព្ពដ្ឋានសុត្តចតុក្កវណ្ណនា • 8-11. Abhabbaṭṭhānasuttacatukkavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ២-១១. អាវរណសុត្តាទិវណ្ណនា • 2-11. Āvaraṇasuttādivaṇṇanā
