| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༡༡. ཙཏུཏྠཨབྷབྦཊྛཱནསུཏྟཾ
11. Catutthaabhabbaṭṭhānasuttaṃ
༩༥. ‘‘ཚཡིམཱནི , བྷིཀྑཝེ, ཨབྷབྦཊྛཱནཱནི། ཀཏམཱནི ཚ? ཨབྷབྦོ དིཊྛིསམྤནྣོ པུགྒལོ སཡཾཀཏཾ སུཁདུཀྑཾ པཙྩཱགནྟུཾ, ཨབྷབྦོ དིཊྛིསམྤནྣོ པུགྒལོ པརཾཀཏཾ 1 སུཁདུཀྑཾ པཙྩཱགནྟུཾ, ཨབྷབྦོ དིཊྛིསམྤནྣོ པུགྒལོ སཡཾཀཏཉྩ པརཾཀཏཉྩ སུཁདུཀྑཾ པཙྩཱགནྟུཾ, ཨབྷབྦོ དིཊྛིསམྤནྣོ པུགྒལོ ཨསཡཾཀཱརཾ ཨདྷིཙྩསམུཔྤནྣཾ སུཁདུཀྑཾ པཙྩཱགནྟུཾ, ཨབྷབྦོ དིཊྛིསམྤནྣོ པུགྒལོ ཨཔརཾཀཱརཾ ཨདྷིཙྩསམུཔྤནྣཾ སུཁདུཀྑཾ པཙྩཱགནྟུཾ, ཨབྷབྦོ དིཊྛིསམྤནྣོ པུགྒལོ ཨསཡཾཀཱརཉྩ ཨཔརཾཀཱརཉྩ ཨདྷིཙྩསམུཔྤནྣཾ སུཁདུཀྑཾ པཙྩཱགནྟུཾ། ཏཾ ཀིསྶ ཧེཏུ? ཏཐཱ ཧིསྶ, བྷིཀྑཝེ, དིཊྛིསམྤནྣསྶ པུགྒལསྶ ཧེཏུ ཙ སུདིཊྛོ ཧེཏུསམུཔྤནྣཱ ཙ དྷམྨཱ། ཨིམཱནི ཁོ, བྷིཀྑཝེ, ཚ ཨབྷབྦཊྛཱནཱནཱི’’ཏི། ཨེཀཱདསམཾ།
95. ‘‘Chayimāni , bhikkhave, abhabbaṭṭhānāni. Katamāni cha? Abhabbo diṭṭhisampanno puggalo sayaṃkataṃ sukhadukkhaṃ paccāgantuṃ, abhabbo diṭṭhisampanno puggalo paraṃkataṃ 2 sukhadukkhaṃ paccāgantuṃ, abhabbo diṭṭhisampanno puggalo sayaṃkatañca paraṃkatañca sukhadukkhaṃ paccāgantuṃ, abhabbo diṭṭhisampanno puggalo asayaṃkāraṃ adhiccasamuppannaṃ sukhadukkhaṃ paccāgantuṃ, abhabbo diṭṭhisampanno puggalo aparaṃkāraṃ adhiccasamuppannaṃ sukhadukkhaṃ paccāgantuṃ, abhabbo diṭṭhisampanno puggalo asayaṃkārañca aparaṃkārañca adhiccasamuppannaṃ sukhadukkhaṃ paccāgantuṃ. Taṃ kissa hetu? Tathā hissa, bhikkhave, diṭṭhisampannassa puggalassa hetu ca sudiṭṭho hetusamuppannā ca dhammā. Imāni kho, bhikkhave, cha abhabbaṭṭhānānī’’ti. Ekādasamaṃ.
ཏསྶུདྡཱནཾ –
Tassuddānaṃ –
སཱིཏིབྷཱཝཾ ཨཱཝརཎཾ, ཝོརོཔིཏཱ སུསྶཱུསཏི།
Sītibhāvaṃ āvaraṇaṃ, voropitā sussūsati;
ཨཔྤཧཱཡ པཧཱིནཱབྷབྦོ, ཏཊྛཱནཱ ཙཏུརོཔི ཙཱཏི༎
Appahāya pahīnābhabbo, taṭṭhānā caturopi cāti.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༨-༡༡. ཨབྷབྦཊྛཱནསུཏྟཙཏུཀྐཝཎྞནཱ • 8-11. Abhabbaṭṭhānasuttacatukkavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༢-༡༡. ཨཱཝརཎསུཏྟཱདིཝཎྞནཱ • 2-11. Āvaraṇasuttādivaṇṇanā
