| Library / Tipiṭaka / തിപിടക • Tipiṭaka / അങ്ഗുത്തരനികായ • Aṅguttaranikāya |
൧൧. ചതുത്ഥഅഭബ്ബട്ഠാനസുത്തം
11. Catutthaabhabbaṭṭhānasuttaṃ
൯൫. ‘‘ഛയിമാനി , ഭിക്ഖവേ, അഭബ്ബട്ഠാനാനി. കതമാനി ഛ? അഭബ്ബോ ദിട്ഠിസമ്പന്നോ പുഗ്ഗലോ സയംകതം സുഖദുക്ഖം പച്ചാഗന്തും, അഭബ്ബോ ദിട്ഠിസമ്പന്നോ പുഗ്ഗലോ പരംകതം 1 സുഖദുക്ഖം പച്ചാഗന്തും, അഭബ്ബോ ദിട്ഠിസമ്പന്നോ പുഗ്ഗലോ സയംകതഞ്ച പരംകതഞ്ച സുഖദുക്ഖം പച്ചാഗന്തും, അഭബ്ബോ ദിട്ഠിസമ്പന്നോ പുഗ്ഗലോ അസയംകാരം അധിച്ചസമുപ്പന്നം സുഖദുക്ഖം പച്ചാഗന്തും, അഭബ്ബോ ദിട്ഠിസമ്പന്നോ പുഗ്ഗലോ അപരംകാരം അധിച്ചസമുപ്പന്നം സുഖദുക്ഖം പച്ചാഗന്തും, അഭബ്ബോ ദിട്ഠിസമ്പന്നോ പുഗ്ഗലോ അസയംകാരഞ്ച അപരംകാരഞ്ച അധിച്ചസമുപ്പന്നം സുഖദുക്ഖം പച്ചാഗന്തും. തം കിസ്സ ഹേതു? തഥാ ഹിസ്സ, ഭിക്ഖവേ, ദിട്ഠിസമ്പന്നസ്സ പുഗ്ഗലസ്സ ഹേതു ച സുദിട്ഠോ ഹേതുസമുപ്പന്നാ ച ധമ്മാ. ഇമാനി ഖോ, ഭിക്ഖവേ, ഛ അഭബ്ബട്ഠാനാനീ’’തി. ഏകാദസമം.
95. ‘‘Chayimāni , bhikkhave, abhabbaṭṭhānāni. Katamāni cha? Abhabbo diṭṭhisampanno puggalo sayaṃkataṃ sukhadukkhaṃ paccāgantuṃ, abhabbo diṭṭhisampanno puggalo paraṃkataṃ 2 sukhadukkhaṃ paccāgantuṃ, abhabbo diṭṭhisampanno puggalo sayaṃkatañca paraṃkatañca sukhadukkhaṃ paccāgantuṃ, abhabbo diṭṭhisampanno puggalo asayaṃkāraṃ adhiccasamuppannaṃ sukhadukkhaṃ paccāgantuṃ, abhabbo diṭṭhisampanno puggalo aparaṃkāraṃ adhiccasamuppannaṃ sukhadukkhaṃ paccāgantuṃ, abhabbo diṭṭhisampanno puggalo asayaṃkārañca aparaṃkārañca adhiccasamuppannaṃ sukhadukkhaṃ paccāgantuṃ. Taṃ kissa hetu? Tathā hissa, bhikkhave, diṭṭhisampannassa puggalassa hetu ca sudiṭṭho hetusamuppannā ca dhammā. Imāni kho, bhikkhave, cha abhabbaṭṭhānānī’’ti. Ekādasamaṃ.
തസ്സുദ്ദാനം –
Tassuddānaṃ –
സീതിഭാവം ആവരണം, വോരോപിതാ സുസ്സൂസതി;
Sītibhāvaṃ āvaraṇaṃ, voropitā sussūsati;
അപ്പഹായ പഹീനാഭബ്ബോ, തട്ഠാനാ ചതുരോപി ചാതി.
Appahāya pahīnābhabbo, taṭṭhānā caturopi cāti.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൮-൧൧. അഭബ്ബട്ഠാനസുത്തചതുക്കവണ്ണനാ • 8-11. Abhabbaṭṭhānasuttacatukkavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൨-൧൧. ആവരണസുത്താദിവണ്ണനാ • 2-11. Āvaraṇasuttādivaṇṇanā
