| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
10. චතුත්‌ථඅනාගතභයසුත්‌තං
10. Catutthaanāgatabhayasuttaṃ
80. ‘‘පඤ්‌චිමානි, භික්‌ඛවෙ, අනාගතභයානි එතරහි අසමුප්‌පන්‌නානි ආයතිං සමුප්‌පජ්‌ජිස්‌සන්‌ති. තානි වො පටිබුජ්‌ඣිතබ්‌බානි; පටිබුජ්‌ඣිත්‌වා ච තෙසං පහානාය වායමිතබ්‌බං.
80. ‘‘Pañcimāni, bhikkhave, anāgatabhayāni etarahi asamuppannāni āyatiṃ samuppajjissanti. Tāni vo paṭibujjhitabbāni; paṭibujjhitvā ca tesaṃ pahānāya vāyamitabbaṃ.
‘‘කතමානි පඤ්‌ච? භවිස්‌සන්‌ති, භික්‌ඛවෙ, භික්‌ඛූ අනාගතමද්‌ධානං චීවරෙ කල්‍යාණකාමා. තෙ චීවරෙ කල්‍යාණකාමා සමානා රිඤ්‌චිස්‌සන්‌ති පංසුකූලිකත්‌තං, රිඤ්‌චිස්‌සන්‌ති අරඤ්‌ඤවනපත්‌ථානි පන්‌තානි සෙනාසනානි; ගාමනිගමරාජධානීසු ඔසරිත්‌වා වාසං කප්‌පෙස්‌සන්‌ති, චීවරහෙතු ච අනෙකවිහිතං අනෙසනං අප්‌පතිරූපං ආපජ්‌ජිස්‌සන්‌ති. ඉදං, භික්‌ඛවෙ, පඨමං අනාගතභයං එතරහි අසමුප්‌පන්‌නං ආයතිං සමුප්‌පජ්‌ජිස්‌සති. තං වො පටිබුජ්‌ඣිතබ්‌බං; පටිබුජ්‌ඣිත්‌වා ච තස්‌ස පහානාය වායමිතබ්‌බං.
‘‘Katamāni pañca? Bhavissanti, bhikkhave, bhikkhū anāgatamaddhānaṃ cīvare kalyāṇakāmā. Te cīvare kalyāṇakāmā samānā riñcissanti paṃsukūlikattaṃ, riñcissanti araññavanapatthāni pantāni senāsanāni; gāmanigamarājadhānīsu osaritvā vāsaṃ kappessanti, cīvarahetu ca anekavihitaṃ anesanaṃ appatirūpaṃ āpajjissanti. Idaṃ, bhikkhave, paṭhamaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘පුන චපරං, භික්‌ඛවෙ, භවිස්‌සන්‌ති භික්‌ඛූ අනාගතමද්‌ධානං පිණ්‌ඩපාතෙ කල්‍යාණකාමා. තෙ පිණ්‌ඩපාතෙ කල්‍යාණකාමා සමානා රිඤ්‌චිස්‌සන්‌ති පිණ්‌ඩපාතිකත්‌තං , රිඤ්‌චිස්‌සන්‌ති අරඤ්‌ඤවනපත්‌ථානි පන්‌තානි සෙනාසනානි; ගාමනිගමරාජධානීසු ඔසරිත්‌වා වාසං කප්‌පෙස්‌සන්‌ති ජිව්‌හග්‌ගෙන රසග්‌ගානි පරියෙසමානා, පිණ්‌ඩපාතහෙතු ච අනෙකවිහිතං අනෙසනං අප්‌පතිරූපං ආපජ්‌ජිස්‌සන්‌ති. ඉදං, භික්‌ඛවෙ, දුතියං අනාගතභයං එතරහි අසමුප්‌පන්‌නං ආයතිං සමුප්‌පජ්‌ජිස්‌සති. තං වො පටිබුජ්‌ඣිතබ්‌බං; පටිබුජ්‌ඣිත්‌වා ච තස්‌ස පහානාය වායමිතබ්‌බං.
‘‘Puna caparaṃ, bhikkhave, bhavissanti bhikkhū anāgatamaddhānaṃ piṇḍapāte kalyāṇakāmā. Te piṇḍapāte kalyāṇakāmā samānā riñcissanti piṇḍapātikattaṃ , riñcissanti araññavanapatthāni pantāni senāsanāni; gāmanigamarājadhānīsu osaritvā vāsaṃ kappessanti jivhaggena rasaggāni pariyesamānā, piṇḍapātahetu ca anekavihitaṃ anesanaṃ appatirūpaṃ āpajjissanti. Idaṃ, bhikkhave, dutiyaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘පුන චපරං, භික්‌ඛවෙ, භවිස්‌සන්‌ති භික්‌ඛූ අනාගතමද්‌ධානං සෙනාසනෙ කල්‍යාණකාමා. තෙ සෙනාසනෙ කල්‍යාණකාමා සමානා රිඤ්‌චිස්‌සන්‌ති රුක්‌ඛමූලිකත්‌තං 1, රිඤ්‌චිස්‌සන්‌ති අරඤ්‌ඤවනපත්‌ථානි පන්‌තානි සෙනාසනානි; ගාමනිගමරාජධානීසු ඔසරිත්‌වා වාසං කප්‌පෙස්‌සන්‌ති, සෙනාසනහෙතු ච අනෙකවිහිතං අනෙසනං අප්‌පතිරූපං ආපජ්‌ජිස්‌සන්‌ති. ඉදං, භික්‌ඛවෙ, තතියං අනාගතභයං එතරහි අසමුප්‌පන්‌නං ආයතිං සමුප්‌පජ්‌ජිස්‌සති. තං වො පටිබුජ්‌ඣිතබ්‌බං; පටිබුජ්‌ඣිත්‌වා ච තස්‌ස පහානාය වායමිතබ්‌බං.
‘‘Puna caparaṃ, bhikkhave, bhavissanti bhikkhū anāgatamaddhānaṃ senāsane kalyāṇakāmā. Te senāsane kalyāṇakāmā samānā riñcissanti rukkhamūlikattaṃ 2, riñcissanti araññavanapatthāni pantāni senāsanāni; gāmanigamarājadhānīsu osaritvā vāsaṃ kappessanti, senāsanahetu ca anekavihitaṃ anesanaṃ appatirūpaṃ āpajjissanti. Idaṃ, bhikkhave, tatiyaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘පුන චපරං, භික්‌ඛවෙ, භවිස්‌සන්‌ති භික්‌ඛූ අනාගතමද්‌ධානං භික්‌ඛුනීසික්‌ඛමානාසමණුද්‌දෙසෙහි සංසට්‌ඨා විහරිස්‌සන්‌ති. භික්‌ඛුනීසික්‌ඛමානාසමණුද්‌දෙසෙහි සංසග්‌ගෙ ඛො පන, භික්‌ඛවෙ, සති එතං පාටිකඞ්‌ඛං – ‘අනභිරතා වා බ්‍රහ්‌මචරියං චරිස්‌සන්‌ති, අඤ්‌ඤතරං වා සංකිලිට්‌ඨං ආපත්‌තිං ආපජ්‌ජිස්‌සන්‌ති, සික්‌ඛං වා පච්‌චක්‌ඛාය හීනායාවත්‌තිස්‌සන්‌ති’. ඉදං, භික්‌ඛවෙ, චතුත්‌ථං අනාගතභයං එතරහි අසමුප්‌පන්‌නං ආයතිං සමුප්‌පජ්‌ජිස්‌සති. තං වො පටිබුජ්‌ඣිතබ්‌බං; පටිබුජ්‌ඣිත්‌වා ච තස්‌ස පහානාය වායමිතබ්‌බං.
‘‘Puna caparaṃ, bhikkhave, bhavissanti bhikkhū anāgatamaddhānaṃ bhikkhunīsikkhamānāsamaṇuddesehi saṃsaṭṭhā viharissanti. Bhikkhunīsikkhamānāsamaṇuddesehi saṃsagge kho pana, bhikkhave, sati etaṃ pāṭikaṅkhaṃ – ‘anabhiratā vā brahmacariyaṃ carissanti, aññataraṃ vā saṃkiliṭṭhaṃ āpattiṃ āpajjissanti, sikkhaṃ vā paccakkhāya hīnāyāvattissanti’. Idaṃ, bhikkhave, catutthaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘පුන චපරං, භික්‌ඛවෙ, භවිස්‌සන්‌ති භික්‌ඛූ අනාගතමද්‌ධානං ආරාමිකසමණුද්‌දෙසෙහි සංසට්‌ඨා විහරිස්‌සන්‌ති. ආරාමිකසමණුද්‌දෙසෙහි සංසග්‌ගෙ ඛො පන, භික්‌ඛවෙ, සති එතං පාටිකඞ්‌ඛං – ‘අනෙකවිහිතං සන්‌නිධිකාරපරිභොගං අනුයුත්‌තා විහරිස්‌සන්‌ති, ඔළාරිකම්‌පි නිමිත්‌තං කරිස්‌සන්‌ති, පථවියාපි හරිතග්‌ගෙපි’. ඉදං, භික්‌ඛවෙ, පඤ්‌චමං අනාගතභයං එතරහි අසමුප්‌පන්‌නං ආයතිං සමුප්‌පජ්‌ජිස්‌සති. තං වො පටිබුජ්‌ඣිතබ්‌බං; පටිබුජ්‌ඣිත්‌වා ච තස්‌ස පහානාය වායමිතබ්‌බං.
‘‘Puna caparaṃ, bhikkhave, bhavissanti bhikkhū anāgatamaddhānaṃ ārāmikasamaṇuddesehi saṃsaṭṭhā viharissanti. Ārāmikasamaṇuddesehi saṃsagge kho pana, bhikkhave, sati etaṃ pāṭikaṅkhaṃ – ‘anekavihitaṃ sannidhikāraparibhogaṃ anuyuttā viharissanti, oḷārikampi nimittaṃ karissanti, pathaviyāpi haritaggepi’. Idaṃ, bhikkhave, pañcamaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘ඉමානි ඛො, භික්‌ඛවෙ, පඤ්‌ච අනාගතභයානි එතරහි අසමුප්‌පන්‌නානි ආයතිං සමුප්‌පජ්‌ජිස්‌සන්‌ති. තානි වො පටිබුජ්‌ඣිතබ්‌බානි; පටිබුජ්‌ඣිත්‌වා ච තෙසං පහානාය වායමිතබ්‌බ’’න්‌ති. දසමං.
‘‘Imāni kho, bhikkhave, pañca anāgatabhayāni etarahi asamuppannāni āyatiṃ samuppajjissanti. Tāni vo paṭibujjhitabbāni; paṭibujjhitvā ca tesaṃ pahānāya vāyamitabba’’nti. Dasamaṃ.
යොධාජීවවග්‌ගො තතියො.
Yodhājīvavaggo tatiyo.
තස්‌සුද්‌දානං –
Tassuddānaṃ –
ද්‌වෙ චෙතොවිමුත්‌තිඵලා, ද්‌වෙ ච ධම්‌මවිහාරිනො;
Dve cetovimuttiphalā, dve ca dhammavihārino;
යොධාජීවා ච ද්‌වෙ වුත්‌තා, චත්‌තාරො ච අනාගතාති.
Yodhājīvā ca dve vuttā, cattāro ca anāgatāti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 10. චතුත්‌ථඅනාගතභයසුත්‌තවණ්‌ණනා • 10. Catutthaanāgatabhayasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 10. චතුත්‌ථඅනාගතභයසුත්‌තවණ්‌ණනා • 10. Catutthaanāgatabhayasuttavaṇṇanā
