| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya |
੧੦. ਚਤੁਤ੍ਥਅਨਾਗਤਭਯਸੁਤ੍ਤਂ
10. Catutthaanāgatabhayasuttaṃ
੮੦. ‘‘ਪਞ੍ਚਿਮਾਨਿ, ਭਿਕ੍ਖવੇ, ਅਨਾਗਤਭਯਾਨਿ ਏਤਰਹਿ ਅਸਮੁਪ੍ਪਨ੍ਨਾਨਿ ਆਯਤਿਂ ਸਮੁਪ੍ਪਜ੍ਜਿਸ੍ਸਨ੍ਤਿ। ਤਾਨਿ વੋ ਪਟਿਬੁਜ੍ਝਿਤਬ੍ਬਾਨਿ; ਪਟਿਬੁਜ੍ਝਿਤ੍વਾ ਚ ਤੇਸਂ ਪਹਾਨਾਯ વਾਯਮਿਤਬ੍ਬਂ।
80. ‘‘Pañcimāni, bhikkhave, anāgatabhayāni etarahi asamuppannāni āyatiṃ samuppajjissanti. Tāni vo paṭibujjhitabbāni; paṭibujjhitvā ca tesaṃ pahānāya vāyamitabbaṃ.
‘‘ਕਤਮਾਨਿ ਪਞ੍ਚ? ਭવਿਸ੍ਸਨ੍ਤਿ, ਭਿਕ੍ਖવੇ, ਭਿਕ੍ਖੂ ਅਨਾਗਤਮਦ੍ਧਾਨਂ ਚੀવਰੇ ਕਲ੍ਯਾਣਕਾਮਾ। ਤੇ ਚੀવਰੇ ਕਲ੍ਯਾਣਕਾਮਾ ਸਮਾਨਾ ਰਿਞ੍ਚਿਸ੍ਸਨ੍ਤਿ ਪਂਸੁਕੂਲਿਕਤ੍ਤਂ, ਰਿਞ੍ਚਿਸ੍ਸਨ੍ਤਿ ਅਰਞ੍ਞવਨਪਤ੍ਥਾਨਿ ਪਨ੍ਤਾਨਿ ਸੇਨਾਸਨਾਨਿ; ਗਾਮਨਿਗਮਰਾਜਧਾਨੀਸੁ ਓਸਰਿਤ੍વਾ વਾਸਂ ਕਪ੍ਪੇਸ੍ਸਨ੍ਤਿ, ਚੀવਰਹੇਤੁ ਚ ਅਨੇਕવਿਹਿਤਂ ਅਨੇਸਨਂ ਅਪ੍ਪਤਿਰੂਪਂ ਆਪਜ੍ਜਿਸ੍ਸਨ੍ਤਿ। ਇਦਂ, ਭਿਕ੍ਖવੇ, ਪਠਮਂ ਅਨਾਗਤਭਯਂ ਏਤਰਹਿ ਅਸਮੁਪ੍ਪਨ੍ਨਂ ਆਯਤਿਂ ਸਮੁਪ੍ਪਜ੍ਜਿਸ੍ਸਤਿ। ਤਂ વੋ ਪਟਿਬੁਜ੍ਝਿਤਬ੍ਬਂ; ਪਟਿਬੁਜ੍ਝਿਤ੍વਾ ਚ ਤਸ੍ਸ ਪਹਾਨਾਯ વਾਯਮਿਤਬ੍ਬਂ।
‘‘Katamāni pañca? Bhavissanti, bhikkhave, bhikkhū anāgatamaddhānaṃ cīvare kalyāṇakāmā. Te cīvare kalyāṇakāmā samānā riñcissanti paṃsukūlikattaṃ, riñcissanti araññavanapatthāni pantāni senāsanāni; gāmanigamarājadhānīsu osaritvā vāsaṃ kappessanti, cīvarahetu ca anekavihitaṃ anesanaṃ appatirūpaṃ āpajjissanti. Idaṃ, bhikkhave, paṭhamaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘ਪੁਨ ਚਪਰਂ, ਭਿਕ੍ਖવੇ, ਭવਿਸ੍ਸਨ੍ਤਿ ਭਿਕ੍ਖੂ ਅਨਾਗਤਮਦ੍ਧਾਨਂ ਪਿਣ੍ਡਪਾਤੇ ਕਲ੍ਯਾਣਕਾਮਾ। ਤੇ ਪਿਣ੍ਡਪਾਤੇ ਕਲ੍ਯਾਣਕਾਮਾ ਸਮਾਨਾ ਰਿਞ੍ਚਿਸ੍ਸਨ੍ਤਿ ਪਿਣ੍ਡਪਾਤਿਕਤ੍ਤਂ , ਰਿਞ੍ਚਿਸ੍ਸਨ੍ਤਿ ਅਰਞ੍ਞવਨਪਤ੍ਥਾਨਿ ਪਨ੍ਤਾਨਿ ਸੇਨਾਸਨਾਨਿ; ਗਾਮਨਿਗਮਰਾਜਧਾਨੀਸੁ ਓਸਰਿਤ੍વਾ વਾਸਂ ਕਪ੍ਪੇਸ੍ਸਨ੍ਤਿ ਜਿવ੍ਹਗ੍ਗੇਨ ਰਸਗ੍ਗਾਨਿ ਪਰਿਯੇਸਮਾਨਾ, ਪਿਣ੍ਡਪਾਤਹੇਤੁ ਚ ਅਨੇਕવਿਹਿਤਂ ਅਨੇਸਨਂ ਅਪ੍ਪਤਿਰੂਪਂ ਆਪਜ੍ਜਿਸ੍ਸਨ੍ਤਿ। ਇਦਂ, ਭਿਕ੍ਖવੇ, ਦੁਤਿਯਂ ਅਨਾਗਤਭਯਂ ਏਤਰਹਿ ਅਸਮੁਪ੍ਪਨ੍ਨਂ ਆਯਤਿਂ ਸਮੁਪ੍ਪਜ੍ਜਿਸ੍ਸਤਿ। ਤਂ વੋ ਪਟਿਬੁਜ੍ਝਿਤਬ੍ਬਂ; ਪਟਿਬੁਜ੍ਝਿਤ੍વਾ ਚ ਤਸ੍ਸ ਪਹਾਨਾਯ વਾਯਮਿਤਬ੍ਬਂ।
‘‘Puna caparaṃ, bhikkhave, bhavissanti bhikkhū anāgatamaddhānaṃ piṇḍapāte kalyāṇakāmā. Te piṇḍapāte kalyāṇakāmā samānā riñcissanti piṇḍapātikattaṃ , riñcissanti araññavanapatthāni pantāni senāsanāni; gāmanigamarājadhānīsu osaritvā vāsaṃ kappessanti jivhaggena rasaggāni pariyesamānā, piṇḍapātahetu ca anekavihitaṃ anesanaṃ appatirūpaṃ āpajjissanti. Idaṃ, bhikkhave, dutiyaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘ਪੁਨ ਚਪਰਂ, ਭਿਕ੍ਖવੇ, ਭવਿਸ੍ਸਨ੍ਤਿ ਭਿਕ੍ਖੂ ਅਨਾਗਤਮਦ੍ਧਾਨਂ ਸੇਨਾਸਨੇ ਕਲ੍ਯਾਣਕਾਮਾ। ਤੇ ਸੇਨਾਸਨੇ ਕਲ੍ਯਾਣਕਾਮਾ ਸਮਾਨਾ ਰਿਞ੍ਚਿਸ੍ਸਨ੍ਤਿ ਰੁਕ੍ਖਮੂਲਿਕਤ੍ਤਂ 1, ਰਿਞ੍ਚਿਸ੍ਸਨ੍ਤਿ ਅਰਞ੍ਞવਨਪਤ੍ਥਾਨਿ ਪਨ੍ਤਾਨਿ ਸੇਨਾਸਨਾਨਿ; ਗਾਮਨਿਗਮਰਾਜਧਾਨੀਸੁ ਓਸਰਿਤ੍વਾ વਾਸਂ ਕਪ੍ਪੇਸ੍ਸਨ੍ਤਿ, ਸੇਨਾਸਨਹੇਤੁ ਚ ਅਨੇਕવਿਹਿਤਂ ਅਨੇਸਨਂ ਅਪ੍ਪਤਿਰੂਪਂ ਆਪਜ੍ਜਿਸ੍ਸਨ੍ਤਿ। ਇਦਂ, ਭਿਕ੍ਖવੇ, ਤਤਿਯਂ ਅਨਾਗਤਭਯਂ ਏਤਰਹਿ ਅਸਮੁਪ੍ਪਨ੍ਨਂ ਆਯਤਿਂ ਸਮੁਪ੍ਪਜ੍ਜਿਸ੍ਸਤਿ। ਤਂ વੋ ਪਟਿਬੁਜ੍ਝਿਤਬ੍ਬਂ; ਪਟਿਬੁਜ੍ਝਿਤ੍વਾ ਚ ਤਸ੍ਸ ਪਹਾਨਾਯ વਾਯਮਿਤਬ੍ਬਂ।
‘‘Puna caparaṃ, bhikkhave, bhavissanti bhikkhū anāgatamaddhānaṃ senāsane kalyāṇakāmā. Te senāsane kalyāṇakāmā samānā riñcissanti rukkhamūlikattaṃ 2, riñcissanti araññavanapatthāni pantāni senāsanāni; gāmanigamarājadhānīsu osaritvā vāsaṃ kappessanti, senāsanahetu ca anekavihitaṃ anesanaṃ appatirūpaṃ āpajjissanti. Idaṃ, bhikkhave, tatiyaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘ਪੁਨ ਚਪਰਂ, ਭਿਕ੍ਖવੇ, ਭવਿਸ੍ਸਨ੍ਤਿ ਭਿਕ੍ਖੂ ਅਨਾਗਤਮਦ੍ਧਾਨਂ ਭਿਕ੍ਖੁਨੀਸਿਕ੍ਖਮਾਨਾਸਮਣੁਦ੍ਦੇਸੇਹਿ ਸਂਸਟ੍ਠਾ વਿਹਰਿਸ੍ਸਨ੍ਤਿ। ਭਿਕ੍ਖੁਨੀਸਿਕ੍ਖਮਾਨਾਸਮਣੁਦ੍ਦੇਸੇਹਿ ਸਂਸਗ੍ਗੇ ਖੋ ਪਨ, ਭਿਕ੍ਖવੇ, ਸਤਿ ਏਤਂ ਪਾਟਿਕਙ੍ਖਂ – ‘ਅਨਭਿਰਤਾ વਾ ਬ੍ਰਹ੍ਮਚਰਿਯਂ ਚਰਿਸ੍ਸਨ੍ਤਿ, ਅਞ੍ਞਤਰਂ વਾ ਸਂਕਿਲਿਟ੍ਠਂ ਆਪਤ੍ਤਿਂ ਆਪਜ੍ਜਿਸ੍ਸਨ੍ਤਿ, ਸਿਕ੍ਖਂ વਾ ਪਚ੍ਚਕ੍ਖਾਯ ਹੀਨਾਯਾવਤ੍ਤਿਸ੍ਸਨ੍ਤਿ’। ਇਦਂ, ਭਿਕ੍ਖવੇ, ਚਤੁਤ੍ਥਂ ਅਨਾਗਤਭਯਂ ਏਤਰਹਿ ਅਸਮੁਪ੍ਪਨ੍ਨਂ ਆਯਤਿਂ ਸਮੁਪ੍ਪਜ੍ਜਿਸ੍ਸਤਿ। ਤਂ વੋ ਪਟਿਬੁਜ੍ਝਿਤਬ੍ਬਂ; ਪਟਿਬੁਜ੍ਝਿਤ੍વਾ ਚ ਤਸ੍ਸ ਪਹਾਨਾਯ વਾਯਮਿਤਬ੍ਬਂ।
‘‘Puna caparaṃ, bhikkhave, bhavissanti bhikkhū anāgatamaddhānaṃ bhikkhunīsikkhamānāsamaṇuddesehi saṃsaṭṭhā viharissanti. Bhikkhunīsikkhamānāsamaṇuddesehi saṃsagge kho pana, bhikkhave, sati etaṃ pāṭikaṅkhaṃ – ‘anabhiratā vā brahmacariyaṃ carissanti, aññataraṃ vā saṃkiliṭṭhaṃ āpattiṃ āpajjissanti, sikkhaṃ vā paccakkhāya hīnāyāvattissanti’. Idaṃ, bhikkhave, catutthaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘ਪੁਨ ਚਪਰਂ, ਭਿਕ੍ਖવੇ, ਭવਿਸ੍ਸਨ੍ਤਿ ਭਿਕ੍ਖੂ ਅਨਾਗਤਮਦ੍ਧਾਨਂ ਆਰਾਮਿਕਸਮਣੁਦ੍ਦੇਸੇਹਿ ਸਂਸਟ੍ਠਾ વਿਹਰਿਸ੍ਸਨ੍ਤਿ। ਆਰਾਮਿਕਸਮਣੁਦ੍ਦੇਸੇਹਿ ਸਂਸਗ੍ਗੇ ਖੋ ਪਨ, ਭਿਕ੍ਖવੇ, ਸਤਿ ਏਤਂ ਪਾਟਿਕਙ੍ਖਂ – ‘ਅਨੇਕવਿਹਿਤਂ ਸਨ੍ਨਿਧਿਕਾਰਪਰਿਭੋਗਂ ਅਨੁਯੁਤ੍ਤਾ વਿਹਰਿਸ੍ਸਨ੍ਤਿ, ਓਲ਼ਾਰਿਕਮ੍ਪਿ ਨਿਮਿਤ੍ਤਂ ਕਰਿਸ੍ਸਨ੍ਤਿ, ਪਥવਿਯਾਪਿ ਹਰਿਤਗ੍ਗੇਪਿ’। ਇਦਂ, ਭਿਕ੍ਖવੇ, ਪਞ੍ਚਮਂ ਅਨਾਗਤਭਯਂ ਏਤਰਹਿ ਅਸਮੁਪ੍ਪਨ੍ਨਂ ਆਯਤਿਂ ਸਮੁਪ੍ਪਜ੍ਜਿਸ੍ਸਤਿ। ਤਂ વੋ ਪਟਿਬੁਜ੍ਝਿਤਬ੍ਬਂ; ਪਟਿਬੁਜ੍ਝਿਤ੍વਾ ਚ ਤਸ੍ਸ ਪਹਾਨਾਯ વਾਯਮਿਤਬ੍ਬਂ।
‘‘Puna caparaṃ, bhikkhave, bhavissanti bhikkhū anāgatamaddhānaṃ ārāmikasamaṇuddesehi saṃsaṭṭhā viharissanti. Ārāmikasamaṇuddesehi saṃsagge kho pana, bhikkhave, sati etaṃ pāṭikaṅkhaṃ – ‘anekavihitaṃ sannidhikāraparibhogaṃ anuyuttā viharissanti, oḷārikampi nimittaṃ karissanti, pathaviyāpi haritaggepi’. Idaṃ, bhikkhave, pañcamaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘ਇਮਾਨਿ ਖੋ, ਭਿਕ੍ਖવੇ, ਪਞ੍ਚ ਅਨਾਗਤਭਯਾਨਿ ਏਤਰਹਿ ਅਸਮੁਪ੍ਪਨ੍ਨਾਨਿ ਆਯਤਿਂ ਸਮੁਪ੍ਪਜ੍ਜਿਸ੍ਸਨ੍ਤਿ। ਤਾਨਿ વੋ ਪਟਿਬੁਜ੍ਝਿਤਬ੍ਬਾਨਿ; ਪਟਿਬੁਜ੍ਝਿਤ੍વਾ ਚ ਤੇਸਂ ਪਹਾਨਾਯ વਾਯਮਿਤਬ੍ਬ’’ਨ੍ਤਿ। ਦਸਮਂ।
‘‘Imāni kho, bhikkhave, pañca anāgatabhayāni etarahi asamuppannāni āyatiṃ samuppajjissanti. Tāni vo paṭibujjhitabbāni; paṭibujjhitvā ca tesaṃ pahānāya vāyamitabba’’nti. Dasamaṃ.
ਯੋਧਾਜੀવવਗ੍ਗੋ ਤਤਿਯੋ।
Yodhājīvavaggo tatiyo.
ਤਸ੍ਸੁਦ੍ਦਾਨਂ –
Tassuddānaṃ –
ਦ੍વੇ ਚੇਤੋવਿਮੁਤ੍ਤਿਫਲਾ, ਦ੍વੇ ਚ ਧਮ੍ਮવਿਹਾਰਿਨੋ।
Dve cetovimuttiphalā, dve ca dhammavihārino;
ਯੋਧਾਜੀવਾ ਚ ਦ੍વੇ વੁਤ੍ਤਾ, ਚਤ੍ਤਾਰੋ ਚ ਅਨਾਗਤਾਤਿ॥
Yodhājīvā ca dve vuttā, cattāro ca anāgatāti.
Footnotes:
Related texts:
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) / ੧੦. ਚਤੁਤ੍ਥਅਨਾਗਤਭਯਸੁਤ੍ਤવਣ੍ਣਨਾ • 10. Catutthaanāgatabhayasuttavaṇṇanā
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੧੦. ਚਤੁਤ੍ਥਅਨਾਗਤਭਯਸੁਤ੍ਤવਣ੍ਣਨਾ • 10. Catutthaanāgatabhayasuttavaṇṇanā
