| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. சதுத்த²அனாக³தப⁴யஸுத்தவண்ணனா
10. Catutthaanāgatabhayasuttavaṇṇanā
80. த³ஸமே பஞ்சவிதே⁴ன ஸங்ஸக்³கே³னாதி ‘‘ஸவனஸங்ஸக்³கோ³, த³ஸ்ஸனஸங்ஸக்³கோ³, ஸமுல்லாபஸங்ஸக்³கோ³, ஸம்போ⁴க³ஸங்ஸக்³கோ³, காயஸங்ஸக்³கோ³’’தி ஏவங் வுத்தேன பஞ்சவிதே⁴ன ஸங்ஸக்³கே³ன. ஸங்ஸஜ்ஜதி ஏதேனாதி ஸங்ஸக்³கோ³, ராகோ³. ஸவனஹேதுகோ, ஸவனவஸேன வா பவத்தோ ஸங்ஸக்³கோ³ ஸவனஸங்ஸக்³கோ³. ஏஸ நயோ ஸேஸேஸுபி. காயஸங்ஸக்³கோ³ பன காயபராமாஸோ. தேஸு பரேஹி வா கதி²யமானங் ரூபாதி³ஸம்பத்திங் அத்தனா வா ஸிதலபிதகீ³தஸத்³த³ங் ஸுணந்தஸ்ஸ ஸோதவிஞ்ஞாணவீதி²வஸேன உப்பன்னோ ராகோ³ ஸவனஸங்ஸக்³கோ³ நாம. விஸபா⁴க³ரூபங் ஓலோகெந்தஸ்ஸ பன சக்கு²விஞ்ஞாணவீதி²வஸேன உப்பன்னோ ராகோ³ த³ஸ்ஸனஸங்ஸக்³கோ³ நாம. அஞ்ஞமஞ்ஞஆலாபஸல்லாபவஸேன உப்பன்னராகோ³ ஸமுல்லாபஸங்ஸக்³கோ³ நாம. பி⁴க்கு²னோ பி⁴க்கு²னியா ஸந்தகங், பி⁴க்கு²னியா பி⁴க்கு²ஸ்ஸ ஸந்தகங் க³ஹெத்வா பரிபோ⁴க³கரணவஸேன உப்பன்னராகோ³ ஸம்போ⁴க³ஸங்ஸக்³கோ³ நாம. ஹத்த²க்³கா³ஹாதி³வஸேன உப்பன்னோ ராகோ³ காயஸங்ஸக்³கோ³ நாம.
80. Dasame pañcavidhena saṃsaggenāti ‘‘savanasaṃsaggo, dassanasaṃsaggo, samullāpasaṃsaggo, sambhogasaṃsaggo, kāyasaṃsaggo’’ti evaṃ vuttena pañcavidhena saṃsaggena. Saṃsajjati etenāti saṃsaggo, rāgo. Savanahetuko, savanavasena vā pavatto saṃsaggo savanasaṃsaggo. Esa nayo sesesupi. Kāyasaṃsaggo pana kāyaparāmāso. Tesu parehi vā kathiyamānaṃ rūpādisampattiṃ attanā vā sitalapitagītasaddaṃ suṇantassa sotaviññāṇavīthivasena uppanno rāgo savanasaṃsaggo nāma. Visabhāgarūpaṃ olokentassa pana cakkhuviññāṇavīthivasena uppanno rāgo dassanasaṃsaggo nāma. Aññamaññaālāpasallāpavasena uppannarāgo samullāpasaṃsaggo nāma. Bhikkhuno bhikkhuniyā santakaṃ, bhikkhuniyā bhikkhussa santakaṃ gahetvā paribhogakaraṇavasena uppannarāgo sambhogasaṃsaggo nāma. Hatthaggāhādivasena uppanno rāgo kāyasaṃsaggo nāma.
அனேகவிஹிதந்தி அன்னஸன்னிதி⁴பானஸன்னிதி⁴வத்த²ஸன்னிதி⁴யானஸன்னிதி⁴ஸயனஸன்னிதி⁴க³ந்த⁴ஸன்னிதி⁴- ஆமிஸஸன்னிதி⁴வஸேன அனேகப்பகாரங். ஸன்னிதி⁴கதஸ்ஸாதி ஏதேன ‘‘ஸன்னிதி⁴காரபரிபோ⁴க³’’ந்தி (த⁴॰ ஸ॰ திகமாதிகா 10) எத்த² கார-ஸத்³த³ஸ்ஸ கம்மத்த²தங் த³ஸ்ஸேதி. யதா² வா ‘‘ஆசயங் கா³மினோ’’தி வத்தப்³பே³ அனுனாஸிகலோபேன ‘‘ஆசயகா³மினோ’’தி நித்³தே³ஸோ கதோ, ஏவங் ‘‘ஸன்னிதி⁴காரங் பரிபோ⁴க³’’ந்தி வத்தப்³பே³ அனுனாஸிகலோபேன ‘‘ஸன்னிதி⁴காரபரிபோ⁴க³’’ந்தி வுத்தங், ஸன்னிதி⁴ங் கத்வா பரிபோ⁴க³ந்தி அத்தோ².
Anekavihitanti annasannidhipānasannidhivatthasannidhiyānasannidhisayanasannidhigandhasannidhi- āmisasannidhivasena anekappakāraṃ. Sannidhikatassāti etena ‘‘sannidhikāraparibhoga’’nti (dha. sa. tikamātikā 10) ettha kāra-saddassa kammatthataṃ dasseti. Yathā vā ‘‘ācayaṃ gāmino’’ti vattabbe anunāsikalopena ‘‘ācayagāmino’’ti niddeso kato, evaṃ ‘‘sannidhikāraṃ paribhoga’’nti vattabbe anunāsikalopena ‘‘sannidhikāraparibhoga’’nti vuttaṃ, sannidhiṃ katvā paribhoganti attho.
‘‘ஸன்னிதி⁴கதஸ்ஸ பரிபோ⁴க³’’ந்தி எத்த² (தீ³॰ நி॰ அட்ட²॰ 1.12) பன து³விதா⁴ கதா² வினயவஸேன ஸல்லேக²வஸேன ச. வினயவஸேன தாவ யங் கிஞ்சி அன்னங் அஜ்ஜ படிக்³க³ஹிதங் அபரஜ்ஜு ஸன்னிதி⁴காரங் ஹோதி, தஸ்ஸ பரிபோ⁴கே³ பாசித்தியங். அத்தனா லத்³த⁴ங் பன ஸாமணேரானங் த³த்வா தேஹி லத்³த⁴ங் வா பாபெத்வா து³தியதி³வஸே பு⁴ஞ்ஜிதுங் வட்டதி, ஸல்லேகோ² பன ந ஹோதி. பானஸன்னிதி⁴ம்ஹிபி ஏஸேவ நயோ. வத்த²ஸன்னிதி⁴ம்ஹி அனதி⁴ட்டி²தாவிகப்பிதங் ஸன்னிதி⁴ ச ஹோதி, ஸல்லேக²ஞ்ச கோபேதி. அயங் நிப்பரியாயகதா². பரியாயதோ பன திசீவரஸந்துட்டே²ன ப⁴விதப்³ப³ங், சதுத்த²ங் லபி⁴த்வா அஞ்ஞஸ்ஸ தா³தப்³ப³ங். ஸசே யஸ்ஸ கஸ்ஸசி தா³துங் ந ஸக்கோதி, யஸ்ஸ பன தா³துகாமோ ஹோதி, ஸோ உத்³தே³ஸத்தா²ய வா பரிபுச்ச²த்தா²ய வா க³தோ, ஆக³தமத்தே தா³தப்³ப³ங், அதா³துங் ந வட்டதி. சீவரே பன அப்பஹொந்தே, ஸதியா வா பச்சாஸாய அனுஞ்ஞாதகாலங் ட²பேதுங் வட்டதி. ஸூசிஸுத்தசீவரகாரகானங் அலாபே⁴ ததோபி வினயகம்மங் கத்வா ட²பேதுங் வட்டதி ‘‘இமஸ்மிங் ஜிண்ணே புன ஈதி³ஸங் குதோ லபி⁴ஸ்ஸாமீ’’தி பன ட²பேதுங் ந வட்டதி, ஸன்னிதி⁴ ச ஹோதி, ஸல்லேக²ஞ்ச கோபேதி.
‘‘Sannidhikatassa paribhoga’’nti ettha (dī. ni. aṭṭha. 1.12) pana duvidhā kathā vinayavasena sallekhavasena ca. Vinayavasena tāva yaṃ kiñci annaṃ ajja paṭiggahitaṃ aparajju sannidhikāraṃ hoti, tassa paribhoge pācittiyaṃ. Attanā laddhaṃ pana sāmaṇerānaṃ datvā tehi laddhaṃ vā pāpetvā dutiyadivase bhuñjituṃ vaṭṭati, sallekho pana na hoti. Pānasannidhimhipi eseva nayo. Vatthasannidhimhi anadhiṭṭhitāvikappitaṃ sannidhi ca hoti, sallekhañca kopeti. Ayaṃ nippariyāyakathā. Pariyāyato pana ticīvarasantuṭṭhena bhavitabbaṃ, catutthaṃ labhitvā aññassa dātabbaṃ. Sace yassa kassaci dātuṃ na sakkoti, yassa pana dātukāmo hoti, so uddesatthāya vā paripucchatthāya vā gato, āgatamatte dātabbaṃ, adātuṃ na vaṭṭati. Cīvare pana appahonte, satiyā vā paccāsāya anuññātakālaṃ ṭhapetuṃ vaṭṭati. Sūcisuttacīvarakārakānaṃ alābhe tatopi vinayakammaṃ katvā ṭhapetuṃ vaṭṭati ‘‘imasmiṃ jiṇṇe puna īdisaṃ kuto labhissāmī’’ti pana ṭhapetuṃ na vaṭṭati, sannidhi ca hoti, sallekhañca kopeti.
யானஸன்னிதி⁴ம்ஹி யானங் நாம வய்ஹங் ரதோ² ஸகடங் ஸந்த³மானிகா பாடங்கீதி. ந பனேதங் பப்³ப³ஜிதஸ்ஸ யானங், உபாஹனங் பன யானங். ஏகபி⁴க்கு²ஸ்ஸ ஹி ஏகோ அரஞ்ஞவாஸத்தா²ய, ஏகோ தோ⁴தபாத³கத்தா²யாதி உக்கங்ஸதோ த்³வே உபாஹனஸங்கா⁴டகா வட்டந்தி, ததியங் லபி⁴த்வா அஞ்ஞஸ்ஸ தா³தப்³போ³. ‘‘இமஸ்மிங் ஜிண்ணே அஞ்ஞங் குதோ லபி⁴ஸ்ஸாமீ’’தி ட²பேதுங் ந வட்டதி, ஸன்னிதி⁴ ச ஹோதி, ஸல்லேக²ஞ்ச கோபேதி. ஸயனஸன்னிதி⁴ம்ஹி ஸயனந்தி மஞ்சோ. ஏகஸ்ஸ பி⁴க்கு²னோ ஏகோ ஸயனக³ப்³பே⁴, ஏகோ தி³வாட்டா²னேதி உக்கங்ஸதோ த்³வே மஞ்சா வட்டந்தி. ததோ உத்தரிங் லபி⁴த்வா அஞ்ஞஸ்ஸ பி⁴க்கு²னோ, க³ணஸ்ஸ வா தா³தப்³போ³, அதா³துங் ந வட்டதி, ஸன்னிதி⁴ சேவ ஹோதி, ஸல்லேகோ² ச குப்பதி. க³ந்த⁴ஸன்னிதி⁴ம்ஹி பி⁴க்கு²னோ கண்டு³கச்சு²ச²விதோ³ஸாதி³ஆபா³தே⁴ ஸதி க³ந்தா⁴ வட்டந்தி. க³ந்த⁴த்தி²கேன க³ந்த⁴ஞ்ச ஆஹராபெத்வா தஸ்மிங் ரோகே³ வூபஸந்தே அஞ்ஞேஸங் வா ஆபா³தி⁴கானங் தா³தப்³ப³ங், த்³வாரே பஞ்சங்கு³லிக⁴ரதூ⁴பனாதீ³ஸு வா உபனேதப்³ப³ங். ‘‘புன ரோகே³ ஸதி ப⁴விஸ்ஸதீ’’தி ட²பேதுங் ந வட்டதி, க³ந்த⁴ஸன்னிதி⁴ ச ஹோதி, ஸல்லேக²ஞ்ச கோபேதி.
Yānasannidhimhi yānaṃ nāma vayhaṃ ratho sakaṭaṃ sandamānikā pāṭaṅkīti. Na panetaṃ pabbajitassa yānaṃ, upāhanaṃ pana yānaṃ. Ekabhikkhussa hi eko araññavāsatthāya, eko dhotapādakatthāyāti ukkaṃsato dve upāhanasaṅghāṭakā vaṭṭanti, tatiyaṃ labhitvā aññassa dātabbo. ‘‘Imasmiṃ jiṇṇe aññaṃ kuto labhissāmī’’ti ṭhapetuṃ na vaṭṭati, sannidhi ca hoti, sallekhañca kopeti. Sayanasannidhimhi sayananti mañco. Ekassa bhikkhuno eko sayanagabbhe, eko divāṭṭhāneti ukkaṃsato dve mañcā vaṭṭanti. Tato uttariṃ labhitvā aññassa bhikkhuno, gaṇassa vā dātabbo, adātuṃ na vaṭṭati, sannidhi ceva hoti, sallekho ca kuppati. Gandhasannidhimhi bhikkhuno kaṇḍukacchuchavidosādiābādhe sati gandhā vaṭṭanti. Gandhatthikena gandhañca āharāpetvā tasmiṃ roge vūpasante aññesaṃ vā ābādhikānaṃ dātabbaṃ, dvāre pañcaṅguligharadhūpanādīsu vā upanetabbaṃ. ‘‘Puna roge sati bhavissatī’’ti ṭhapetuṃ na vaṭṭati, gandhasannidhi ca hoti, sallekhañca kopeti.
ஆமிஸந்தி வுத்தாவஸேஸங் த³ட்ட²ப்³ப³ங். ஸெய்யதி²த³ங் – இதே⁴கச்சோ பி⁴க்கு² ‘‘ததா²ரூபே காலே உபகாராய ப⁴விஸ்ஸந்தீ’’தி திலதண்டு³லமுக்³க³மாஸனாளிகேரலோணமச்ச²ஸப்பிதேலகுலாலபா⁴ஜனாதீ³னி ஆஹராபெத்வா ட²பேதி. ஸோ வஸ்ஸகாலே காலஸ்ஸேவ ஸாமணேரேஹி யாகு³ங் பசாபெத்வா பரிபு⁴ஞ்ஜித்வா ‘‘ஸாமணேர உத³ககத்³த³மே து³க்க²ங் கா³மங் பவிஸிதுங், க³ச்ச² அஸுககுலங் க³ந்த்வா மய்ஹங் விஹாரே நிஸின்னபா⁴வங் ஆரோசேஹி, அஸுககுலதோ த³தி⁴ஆதீ³னி ஆஹரா’’தி பேஸேதி. பி⁴க்கூ²ஹி ‘‘கிங், ப⁴ந்தே , கா³மங் பவிஸிஸ்ஸாமா’’தி வுத்தேபி ‘‘து³ப்பவேஸோ, ஆவுஸோ, இதா³னி கா³மோ’’தி வத³தி. தே ‘‘ஹோது, ப⁴ந்தே, அச்ச²த² தும்ஹே, மயங் பி⁴க்க²ங் பரியேஸித்வா ஆஹரிஸ்ஸாமா’’தி க³ச்ச²ந்தி. அத² ஸாமணேரோ த³தி⁴ஆதீ³னி ஆஹரித்வா ப⁴த்தஞ்ச ப்³யஞ்ஜனஞ்ச ஸம்பாதெ³த்வா உபனேதி, தங் பு⁴ஞ்ஜந்தஸ்ஸேவ உபட்டா²கா ப⁴த்தங் பஹிணந்தி, ததோபி மனாபமனாபங் பு⁴ஞ்ஜதி. அத² பி⁴க்கூ² பிண்ட³பாதங் க³ஹெத்வா ஆக³ச்ச²ந்தி, ததோபி மனாபமனாபங் பு⁴ஞ்ஜதியேவ. ஏவங் சதுமாஸம்பி வீதினாமேதி. அயங் வுச்சதி பி⁴க்கு² முண்ட³குடும்பி³கஜீவிகங் ஜீவதி, ந ஸமணஜீவிகந்தி. ஏவரூபோ ஆமிஸஸன்னிதி⁴ நாம ஹோதி. பி⁴க்கு²னோ பன வஸனட்டா²னே ஏகா தண்டு³லனாளி ஏகோ கு³ளபிண்டோ³ குடு³வமத்தங் ஸப்பீதி எத்தகங் நிதே⁴துங் வட்டதி அகாலே ஸம்பத்தசோரானங் அத்தா²ய. தே ஹி எத்தகங் ஆமிஸபடிஸந்தா²ரங் அலப⁴ந்தா ஜீவிதா வோரோபெய்யுங், தஸ்மா ஸசே ஹி எத்தகங் நத்தி², ஆஹராபெத்வாபி ட²பேதுங் வட்டதி. அபா²ஸுககாலே ச யதெ³த்த² கப்பியங், தங் அத்தனாபி பரிபு⁴ஞ்ஜிதுங் வட்டதி. கப்பியகுடியங் பன ப³ஹுங் ட²பெந்தஸ்ஸபி ஸன்னிதி⁴ நாம நத்தி².
Āmisanti vuttāvasesaṃ daṭṭhabbaṃ. Seyyathidaṃ – idhekacco bhikkhu ‘‘tathārūpe kāle upakārāya bhavissantī’’ti tilataṇḍulamuggamāsanāḷikeraloṇamacchasappitelakulālabhājanādīni āharāpetvā ṭhapeti. So vassakāle kālasseva sāmaṇerehi yāguṃ pacāpetvā paribhuñjitvā ‘‘sāmaṇera udakakaddame dukkhaṃ gāmaṃ pavisituṃ, gaccha asukakulaṃ gantvā mayhaṃ vihāre nisinnabhāvaṃ ārocehi, asukakulato dadhiādīni āharā’’ti peseti. Bhikkhūhi ‘‘kiṃ, bhante , gāmaṃ pavisissāmā’’ti vuttepi ‘‘duppaveso, āvuso, idāni gāmo’’ti vadati. Te ‘‘hotu, bhante, acchatha tumhe, mayaṃ bhikkhaṃ pariyesitvā āharissāmā’’ti gacchanti. Atha sāmaṇero dadhiādīni āharitvā bhattañca byañjanañca sampādetvā upaneti, taṃ bhuñjantasseva upaṭṭhākā bhattaṃ pahiṇanti, tatopi manāpamanāpaṃ bhuñjati. Atha bhikkhū piṇḍapātaṃ gahetvā āgacchanti, tatopi manāpamanāpaṃ bhuñjatiyeva. Evaṃ catumāsampi vītināmeti. Ayaṃ vuccati bhikkhu muṇḍakuṭumbikajīvikaṃ jīvati, na samaṇajīvikanti. Evarūpo āmisasannidhi nāma hoti. Bhikkhuno pana vasanaṭṭhāne ekā taṇḍulanāḷi eko guḷapiṇḍo kuḍuvamattaṃ sappīti ettakaṃ nidhetuṃ vaṭṭati akāle sampattacorānaṃ atthāya. Te hi ettakaṃ āmisapaṭisanthāraṃ alabhantā jīvitā voropeyyuṃ, tasmā sace hi ettakaṃ natthi, āharāpetvāpi ṭhapetuṃ vaṭṭati. Aphāsukakāle ca yadettha kappiyaṃ, taṃ attanāpi paribhuñjituṃ vaṭṭati. Kappiyakuṭiyaṃ pana bahuṃ ṭhapentassapi sannidhi nāma natthi.
சதுத்த²அனாக³தப⁴யஸுத்தவண்ணனா நிட்டி²தா.
Catutthaanāgatabhayasuttavaṇṇanā niṭṭhitā.
யோதா⁴ஜீவவக்³க³வண்ணனா நிட்டி²தா.
Yodhājīvavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. சதுத்த²அனாக³தப⁴யஸுத்தங் • 10. Catutthaanāgatabhayasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. சதுத்த²அனாக³தப⁴யஸுத்தவண்ணனா • 10. Catutthaanāgatabhayasuttavaṇṇanā
