| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
চতুত্থজ্ঝানকথা
Catutthajjhānakathā
‘‘পুব্বেৰা’’তি ৰুত্তত্তা ‘‘কদা পন নেসং পহানং হোতী’’তি চোদনং সমুট্ঠাপেত্ৰা আহ ‘‘চতুন্নং ঝানানং উপচারক্খণে’’তি। এৰং ৰেদিতব্বন্তি সম্বন্ধো। পহানক্কমেন অৰুত্তানন্তি এত্থ পহানক্কমো নাম পহাযকধম্মানং উপ্পত্তিপটিপাটি। তেন পন ৰুচ্চমানে ‘‘দুক্খং দোমনস্সং সুখং সোমনস্স’’ন্তি ৰত্তব্বং সিযা, কস্মা ইতো অঞ্ঞথা ৰচনন্তি আহ ‘‘ইন্দ্রিযৰিভঙ্গে’’তিআদি । উদ্দেসক্কমেনাতি ‘‘সুখিন্দ্রিযং দুক্খিন্দ্রিযং সোমনস্সিন্দ্রিযং দোমনস্সিন্দ্রিয’’ন্তি এৰং পৰত্তউদ্দেসক্কমেন।
‘‘Pubbevā’’ti vuttattā ‘‘kadā pana nesaṃ pahānaṃ hotī’’ti codanaṃ samuṭṭhāpetvā āha ‘‘catunnaṃ jhānānaṃ upacārakkhaṇe’’ti. Evaṃ veditabbanti sambandho. Pahānakkamena avuttānanti ettha pahānakkamo nāma pahāyakadhammānaṃ uppattipaṭipāṭi. Tena pana vuccamāne ‘‘dukkhaṃ domanassaṃ sukhaṃ somanassa’’nti vattabbaṃ siyā, kasmā ito aññathā vacananti āha ‘‘indriyavibhaṅge’’tiādi . Uddesakkamenāti ‘‘sukhindriyaṃ dukkhindriyaṃ somanassindriyaṃ domanassindriya’’nti evaṃ pavattauddesakkamena.
অথ কস্মা ঝানেস্ৰেৰ নিরোধো ৰুত্তোতি সম্বন্ধো। কত্থ চুপ্পন্নং দুক্খিন্দ্রিযন্তি অত্তনো পচ্চযেহি উপ্পন্নং অৰিক্খম্ভিতং দুক্খিন্দ্রিযং। কত্থ চ অপরিসেসং নিরুজ্ঝতীতি নিরোধট্ঠানং নিরোধকারণং পুচ্ছতি। তেন কত্থাতি পুচ্ছায এত্থাতি ৰিস্সজ্জনেপি হেতুম্হি ভুম্মৰচনং দট্ঠব্বং। ঝানানুভাৰনিমিত্তঞ্হি অনুপ্পজ্জন্তং দুক্খিন্দ্রিযং অপরিসেসং নিরুজ্ঝতীতি ৰুত্তং। অতিসযনিরোধো সুট্ঠু পহানং উজুপটিপক্খেন ৰূপসমো। নিরোধো পহানমত্তং। নানাৰজ্জনেতি যেন আৰজ্জনেন অপ্পনাৰীথি, ততো ভিন্নাৰজ্জনে অনেকাৰজ্জনে ৰা। অপ্পনাৰীথিযঞ্হি উপচারো একাৰজ্জনো, ইতরো অনেকাৰজ্জনো অনেকক্খত্তুং পৰত্তনতো। ৰিসমনিসজ্জায উপ্পন্নকিলমথো ৰিসমাসনুপতাপো। পীতিফরণেনাতি পীতিযা ফরণরসত্তা পীতিসমুট্ঠানানং ৰা পণীতরূপানং কাযস্স ব্যাপনতো ৰুত্তং। তেনাহ ‘‘সব্বো কাযো সুখোক্কন্তো হোতী’’তি। পণীতরূপফুট্ঠসরীরস্স সুখোক্কন্তকাযত্তা কুতো দুক্খুপ্পত্তি ৰিসমাসনুপতাপাদিনাতি আহ ‘‘পটিপক্খেন অৰিহতত্তা’’তি। ৰিতক্কৰিচারপচ্চযেপীতি পি-সদ্দো অট্ঠানপ্পযুত্তো, সো ‘‘পহীনস্সা’’তি এত্থ আনেত্ৰা সম্বন্ধিতব্বো। পহীনস্সপি দোমনস্সিন্দ্রিযস্সাতি ইদঞ্চ ‘‘সিযা উপ্পত্তী’’তি ইমিনা সম্বন্ধিতব্বং। এতন্তি দোমনস্সিন্দ্রিযং। ‘‘উপ্পজ্জতী’’তি ইমিনা সম্বন্ধো। ‘‘তস্স ময্হং অতিচিরং ৰিতক্কযতো ৰিচারযতো কাযোপি কিলমি, চিত্তম্পি ঊহঞ্ঞী’’তি ৰচনতো কাযচিত্তখেদানং ৰিতক্কৰিচারপচ্চযতা ৰেদিতব্বা। ৰিতক্কৰিচারভাৰেতি এত্থ ‘‘উপ্পজ্জতি দোমনস্সিন্দ্রিয’’ন্তি আনেত্ৰা সম্বন্ধিতব্বং। তত্থস্স সিযা উপ্পত্তীতি তত্থ দুতিযজ্ঝানূপচারে অস্স পহীনস্সপি দোমনস্সিন্দ্রিযস্স উপ্পত্তি ভৰেয্য।
Atha kasmā jhānesveva nirodho vuttoti sambandho. Kattha cuppannaṃ dukkhindriyanti attano paccayehi uppannaṃ avikkhambhitaṃ dukkhindriyaṃ. Kattha ca aparisesaṃ nirujjhatīti nirodhaṭṭhānaṃ nirodhakāraṇaṃ pucchati. Tena katthāti pucchāya etthāti vissajjanepi hetumhi bhummavacanaṃ daṭṭhabbaṃ. Jhānānubhāvanimittañhi anuppajjantaṃ dukkhindriyaṃ aparisesaṃ nirujjhatīti vuttaṃ. Atisayanirodho suṭṭhu pahānaṃ ujupaṭipakkhena vūpasamo. Nirodho pahānamattaṃ. Nānāvajjaneti yena āvajjanena appanāvīthi, tato bhinnāvajjane anekāvajjane vā. Appanāvīthiyañhi upacāro ekāvajjano, itaro anekāvajjano anekakkhattuṃ pavattanato. Visamanisajjāya uppannakilamatho visamāsanupatāpo. Pītipharaṇenāti pītiyā pharaṇarasattā pītisamuṭṭhānānaṃ vā paṇītarūpānaṃ kāyassa byāpanato vuttaṃ. Tenāha ‘‘sabbo kāyo sukhokkanto hotī’’ti. Paṇītarūpaphuṭṭhasarīrassa sukhokkantakāyattā kuto dukkhuppatti visamāsanupatāpādināti āha ‘‘paṭipakkhena avihatattā’’ti. Vitakkavicārapaccayepīti pi-saddo aṭṭhānappayutto, so ‘‘pahīnassā’’ti ettha ānetvā sambandhitabbo. Pahīnassapi domanassindriyassāti idañca ‘‘siyā uppattī’’ti iminā sambandhitabbaṃ. Etanti domanassindriyaṃ. ‘‘Uppajjatī’’ti iminā sambandho. ‘‘Tassa mayhaṃ aticiraṃ vitakkayato vicārayato kāyopi kilami, cittampi ūhaññī’’ti vacanato kāyacittakhedānaṃ vitakkavicārapaccayatā veditabbā. Vitakkavicārabhāveti ettha ‘‘uppajjati domanassindriya’’nti ānetvā sambandhitabbaṃ. Tatthassa siyā uppattīti tattha dutiyajjhānūpacāre assa pahīnassapi domanassindriyassa uppatti bhaveyya.
এত্থ চ যদেকে ৰদন্তি ‘‘তত্থস্স সিযা উপ্পত্তীতি ৰদন্তেন ঝানলাভীনম্পি দোমনস্সুপ্পত্তি অত্থীতি দস্সিতং হোতি, তেন চ অনীৰরণসভাৰো লোভো ৰিয দোসোপি অত্থীতি দীপেতি। ন হি দোসেন ৰিনা দোমনস্সং পৰত্ততি, ন চেত্থ পট্ঠানপাল়িযা ৰিরোধো চিন্তেতব্বো। যস্মা তত্থ পরিহীনজ্ঝানং আরম্মণং কত্ৰা পৰত্তমানং দোমনস্সং দস্সিতং, অপরিহীনজ্ঝানং আরম্মণং কত্ৰা উপ্পজ্জমানস্স দোমনস্সস্স অসম্ভৰতো ঝানলাভীনং সব্বসো দোমনস্সং নুপ্পজ্জতীতি চ ন সক্কা ৰত্তুং অট্ঠসমাপত্তিলাভিনো অপি তস্স উপ্পন্নত্তা, ন হেৰ খো সো পরিহীনজ্ঝানো অহোসী’’তি, তং অযুত্তং অনীৰরণসভাৰস্স দোমনস্সস্স অভাৰতো। যদি সিযা, রূপারূপাৰচরসত্তানম্পি উপ্পজ্জেয্য, ন চ উপ্পজ্জতি। তথা হি আরুপ্পে কামচ্ছন্দনীৰরণং পটিচ্চ থিনমিদ্ধনীৰরণং উদ্ধচ্চনীৰরণং অৰিজ্জানীৰরণন্তিআদীসু ব্যাপাদকুক্কুচ্চনীৰরণানি অনুদ্ধটানি, ন চেত্থ অনীৰরণতাপরিযাযো কামচ্ছন্দাদীনম্পি অনীৰরণানংযেৰ নীৰরণসদিসতায নীৰরণপরিযাযস্স ৰুত্তত্তা। যং পন ৰুত্তং ‘‘অট্ঠসমাপত্তিলাভিনো অপি তস্স উপ্পন্নত্তা’’তি, তম্পি অকারণং উপ্পজ্জমানেন চ দোমনস্সেন ঝানতো পরিহাযনতো। লহুকেন পন পচ্চযেন পরিহীনং তাদিসা নং অপ্পকসিরেনেৰ পটিপাকতিকং করোন্তীতি দট্ঠব্বং। ‘‘তত্থস্স সিযা উপ্পত্তী’’তি ইদং পন পরিকপ্পনৰচনং উপচারক্খণে দোমনস্সস্স অপ্পহীনভাৰদস্সনত্থং। তথা হি ৰুত্তং ‘‘ন ত্ৰেৰ অন্তোঅপ্পনায’’ন্তি। যদি পন তদা দোমনস্সং উপ্পজ্জেয্য, পঠমজ্ঝানম্পিস্স পরিহীনমেৰাতি দট্ঠব্বং। পহীনম্পি সোমনস্সিন্দ্রিযং পীতি ৰিয ন দূরেতি কত্ৰা ‘‘আসন্নত্তা’’তি ৰুত্তং। নানাৰজ্জনূপচারে পহীনম্পি পহানঙ্গং পটিপক্খেন অৰিহতত্তা অন্তরন্তরা উপ্পজ্জেয্য ৰাতি ইমমত্থং দস্সেন্তো ‘‘অপ্পনাপ্পত্তাযা’’তিআদিমাহ। তাদিসায আসেৰনায ইচ্ছিতব্বত্তা যথা মগ্গৰীথিতো পুব্বে দ্ৰে তযো জৰনৰারা সদিসানুপস্সনাৰ পৰত্তন্তি, এৰমিধাপি অপ্পনাৰারতো পুব্বে দ্ৰে তযো জৰনৰারা উপেক্খাসহগতাৰ পৰত্তন্তীতি ৰদন্তি।
Ettha ca yadeke vadanti ‘‘tatthassa siyā uppattīti vadantena jhānalābhīnampi domanassuppatti atthīti dassitaṃ hoti, tena ca anīvaraṇasabhāvo lobho viya dosopi atthīti dīpeti. Na hi dosena vinā domanassaṃ pavattati, na cettha paṭṭhānapāḷiyā virodho cintetabbo. Yasmā tattha parihīnajjhānaṃ ārammaṇaṃ katvā pavattamānaṃ domanassaṃ dassitaṃ, aparihīnajjhānaṃ ārammaṇaṃ katvā uppajjamānassa domanassassa asambhavato jhānalābhīnaṃ sabbaso domanassaṃ nuppajjatīti ca na sakkā vattuṃ aṭṭhasamāpattilābhino api tassa uppannattā, na heva kho so parihīnajjhāno ahosī’’ti, taṃ ayuttaṃ anīvaraṇasabhāvassa domanassassa abhāvato. Yadi siyā, rūpārūpāvacarasattānampi uppajjeyya, na ca uppajjati. Tathā hi āruppe kāmacchandanīvaraṇaṃ paṭicca thinamiddhanīvaraṇaṃ uddhaccanīvaraṇaṃ avijjānīvaraṇantiādīsu byāpādakukkuccanīvaraṇāni anuddhaṭāni, na cettha anīvaraṇatāpariyāyo kāmacchandādīnampi anīvaraṇānaṃyeva nīvaraṇasadisatāya nīvaraṇapariyāyassa vuttattā. Yaṃ pana vuttaṃ ‘‘aṭṭhasamāpattilābhino api tassa uppannattā’’ti, tampi akāraṇaṃ uppajjamānena ca domanassena jhānato parihāyanato. Lahukena pana paccayena parihīnaṃ tādisā naṃ appakasireneva paṭipākatikaṃ karontīti daṭṭhabbaṃ. ‘‘Tatthassa siyā uppattī’’ti idaṃ pana parikappanavacanaṃ upacārakkhaṇe domanassassa appahīnabhāvadassanatthaṃ. Tathā hi vuttaṃ ‘‘na tveva antoappanāya’’nti. Yadi pana tadā domanassaṃ uppajjeyya, paṭhamajjhānampissa parihīnamevāti daṭṭhabbaṃ. Pahīnampi somanassindriyaṃ pīti viya na dūreti katvā ‘‘āsannattā’’ti vuttaṃ. Nānāvajjanūpacāre pahīnampi pahānaṅgaṃ paṭipakkhena avihatattā antarantarā uppajjeyya vāti imamatthaṃ dassento ‘‘appanāppattāyā’’tiādimāha. Tādisāya āsevanāya icchitabbattā yathā maggavīthito pubbe dve tayo javanavārā sadisānupassanāva pavattanti, evamidhāpi appanāvārato pubbe dve tayo javanavārā upekkhāsahagatāva pavattantīti vadanti.
সমাহরীতি সমানেসি, সঙ্গহেত্ৰা অভাসীতি অত্থো। সুখুমাতি সুখদুক্খানি ৰিয অনোল়ারিকত্তা অৰিভূততায সুখুমা, ততো এৰ অনুমিনিতব্বসভাৰত্তা দুব্বিঞ্ঞেয্যা। দুট্ঠস্সাতি দুট্ঠপযোগস্স, দুদ্দমস্সাতি অত্থো। সক্কা হোতি এসা গাহযিতুন্তি অঞ্ঞাপোহননযেন সক্কা গাহযিতুন্তি অধিপ্পাযো। অদুক্খমসুখায চেতোৰিমুত্তিযাতি ইদমেৰ চতুত্থং ঝানং দট্ঠব্বং। পচ্চযদস্সনত্থন্তি অধিগমস্স উপাযভূতপচ্চযদস্সনত্থং। তেনাহ ‘‘দুক্খপ্পহানাদযো হি তস্সা পচ্চযা’’তি। দুক্খপ্পহানাদযোতি চ সোপচারা পঠমজ্ঝানাদযোৰেত্থ অধিপ্পেতা। পহীনাতি ৰুত্তাতি ‘‘পঞ্চন্নং ওরম্ভাগিযানং সংযোজনানং পরিক্খযা’’তি (ম॰ নি॰ ৩.১৪৭; সং॰ নি॰ ৫.১০২১) ৰুত্তত্তা। এতাতি সুখাদযো ৰেদনা। সুখং সোমনস্সস্স পচ্চযোতি ৰসনগন্ধালেপনপুপ্ফাভরণসমালেপনাদিনিব্বত্তং কাযিকসুখং সোমনস্সস্স পচ্চযো। ‘‘সুখায খো, আৰুসো ৰিসাখ ৰেদনায, রাগানুসযো অনুসেতী’’তি (ম॰ নি॰ ১.৪৬৫) ৰচনতো আহ ‘‘সোমনস্সং রাগস্স পচ্চযো’’তি। ‘‘দুক্খায খো, আৰুসো ৰিসাখ, ৰেদনায পটিঘানুসযো অনুসেতী’’তি ৰচনতো ৰুত্তং ‘‘দোমনস্সং দোসস্স পচ্চযো’’তি। সুখাদিঘাতেনাতি সুখাদীনং পহানেন।
Samāharīti samānesi, saṅgahetvā abhāsīti attho. Sukhumāti sukhadukkhāni viya anoḷārikattā avibhūtatāya sukhumā, tato eva anuminitabbasabhāvattā dubbiññeyyā. Duṭṭhassāti duṭṭhapayogassa, duddamassāti attho. Sakkā hoti esā gāhayitunti aññāpohananayena sakkā gāhayitunti adhippāyo. Adukkhamasukhāya cetovimuttiyāti idameva catutthaṃ jhānaṃ daṭṭhabbaṃ. Paccayadassanatthanti adhigamassa upāyabhūtapaccayadassanatthaṃ. Tenāha ‘‘dukkhappahānādayo hi tassā paccayā’’ti. Dukkhappahānādayoti ca sopacārā paṭhamajjhānādayovettha adhippetā. Pahīnāti vuttāti ‘‘pañcannaṃ orambhāgiyānaṃ saṃyojanānaṃ parikkhayā’’ti (ma. ni. 3.147; saṃ. ni. 5.1021) vuttattā. Etāti sukhādayo vedanā. Sukhaṃsomanassassa paccayoti vasanagandhālepanapupphābharaṇasamālepanādinibbattaṃ kāyikasukhaṃ somanassassa paccayo. ‘‘Sukhāya kho, āvuso visākha vedanāya, rāgānusayo anusetī’’ti (ma. ni. 1.465) vacanato āha ‘‘somanassaṃ rāgassa paccayo’’ti. ‘‘Dukkhāya kho, āvuso visākha, vedanāya paṭighānusayo anusetī’’ti vacanato vuttaṃ ‘‘domanassaṃ dosassa paccayo’’ti. Sukhādighātenāti sukhādīnaṃ pahānena.
অদুক্খমসুখন্তি এত্থ ন দুক্খন্তি অদুক্খং, দুক্খৰিদূরং। যস্মা তত্থ দুক্খং নত্থি, তস্মা ৰুত্তং ‘‘দুক্খাভাৰেনা’’তি। অসুখন্তি এত্থাপি এসেৰ নযো। এতেনাতি দুক্খসুখপটিক্খেপৰচনেন। পটিপক্খভূতন্তি ইদং ইধ ততিযৰেদনায দুক্খাদীনং সমতিক্কমৰসেন পত্তব্বত্তা ৰুত্তং, ন কুসলাকুসলানং ৰিয উজুৰিপচ্চনীকতায। ইট্ঠানিট্ঠৰিপরীতানুভৰনলক্খণাতি ইট্ঠানিট্ঠৰিপরীতস্স মজ্ঝত্তারম্মণস্স, ইট্ঠানিট্ঠৰিপরীতং ৰা মজ্ঝত্তাকারেন অনুভৰনলক্খণা। ততো এৰ মজ্ঝত্তরসা। অৰিভূতপচ্চুপট্ঠানাতি সুখদুক্খানি ৰিয ন ৰিভূতাকারা পিট্ঠিপাসাণে মিগগতমগ্গো ৰিয তেহি অনুমাতব্বাৰিভূতাকারোপট্ঠানা। সুখনিরোধো নাম ইধ চতুত্থজ্ঝানূপচারো, সো পদট্ঠানং এতিস্সাতি সুখনিরোধপদট্ঠানা। উপেক্খাসতিপারিসুদ্ধিন্তি পুরিমপদে উত্তরপদলোপেনেতং সমাসপদন্তি আহ ‘‘উপেক্খায জনিতসতিপারিসুদ্ধি’’ন্তি। সব্বপচ্চনীকধম্মপরিসুদ্ধায পচ্চনীকসমনেপি অব্যাৰটায পারিসুদ্ধুপেক্খায ৰত্তমানায চতুত্থজ্ঝানে সতি সম্পহংসনপঞ্ঞা ৰিয সুপরিসুদ্ধা সুৰিসদা চ হোতীতি আহ ‘‘সতিযা পারিসুদ্ধি, সা উপেক্খায কতা ন অঞ্ঞেনা’’তি। যদি তত্রমজ্ঝত্ততা ইধ ‘‘উপেক্খা’’তি অধিপ্পেতা, কথং সতিযেৰ পারিসুদ্ধাতি ৰুত্তাতি আহ ‘‘ন কেৰল’’ন্তিআদি। সতিসীসেনাতি সতিং উত্তমঙ্গং কত্ৰা, পধানং কত্ৰাতি ৰুত্তং হোতি।
Adukkhamasukhanti ettha na dukkhanti adukkhaṃ, dukkhavidūraṃ. Yasmā tattha dukkhaṃ natthi, tasmā vuttaṃ ‘‘dukkhābhāvenā’’ti. Asukhanti etthāpi eseva nayo. Etenāti dukkhasukhapaṭikkhepavacanena. Paṭipakkhabhūtanti idaṃ idha tatiyavedanāya dukkhādīnaṃ samatikkamavasena pattabbattā vuttaṃ, na kusalākusalānaṃ viya ujuvipaccanīkatāya. Iṭṭhāniṭṭhaviparītānubhavanalakkhaṇāti iṭṭhāniṭṭhaviparītassa majjhattārammaṇassa, iṭṭhāniṭṭhaviparītaṃ vā majjhattākārena anubhavanalakkhaṇā. Tato eva majjhattarasā. Avibhūtapaccupaṭṭhānāti sukhadukkhāni viya na vibhūtākārā piṭṭhipāsāṇe migagatamaggo viya tehi anumātabbāvibhūtākāropaṭṭhānā. Sukhanirodho nāma idha catutthajjhānūpacāro, so padaṭṭhānaṃ etissāti sukhanirodhapadaṭṭhānā. Upekkhāsatipārisuddhinti purimapade uttarapadalopenetaṃ samāsapadanti āha ‘‘upekkhāya janitasatipārisuddhi’’nti. Sabbapaccanīkadhammaparisuddhāya paccanīkasamanepi abyāvaṭāya pārisuddhupekkhāya vattamānāya catutthajjhāne sati sampahaṃsanapaññā viya suparisuddhā suvisadā ca hotīti āha ‘‘satiyā pārisuddhi, sā upekkhāya katā na aññenā’’ti. Yadi tatramajjhattatā idha ‘‘upekkhā’’ti adhippetā, kathaṃ satiyeva pārisuddhāti vuttāti āha ‘‘na kevala’’ntiādi. Satisīsenāti satiṃ uttamaṅgaṃ katvā, padhānaṃ katvāti vuttaṃ hoti.
এৰমপি কস্মা ইধেৰ সতি ‘‘উপেক্খাসতিপারিসুদ্ধী’’তি ৰুত্তাতি অনুযোগং সন্ধায ‘‘তত্থ কিঞ্চাপী’’তিআদি ৰুত্তং। তত্থ হেট্ঠা তীসু ঝানেসু ৰিজ্জমানাযপি তত্রমজ্ঝত্ততায পচ্চনীকাভিভৰনতো সহাযপচ্চযৰেকল্লতো চ অপারিসুদ্ধি, তথা তংসম্পযুত্তানং তদভাৰতো ইধ পারিসুদ্ধীতি ইমমত্থং উপমাৰসেন দস্সেতুং ‘‘যথা পনা’’তিআদি ৰুত্তং। সূরিযপ্পভাভিভৰাতি সূরিযপ্পভায অভিভুয্যমানত্তা। অতিক্খতায চন্দলেখা ৰিয রত্তিপি সোম্মসভাৰা সভাগায রত্তিযমেৰ চ চন্দলেখা সমুজ্জলতীতি সা তস্সা সঙ্গয্হতীতি দস্সেন্তো ‘‘সোম্মভাৰেন চ অত্তনো উপকারকত্তেন ৰা সভাগায রত্তিযা’’তি আহ। সেসমেত্থ উত্তানত্থমেৰ।
Evamapi kasmā idheva sati ‘‘upekkhāsatipārisuddhī’’ti vuttāti anuyogaṃ sandhāya ‘‘tattha kiñcāpī’’tiādi vuttaṃ. Tattha heṭṭhā tīsu jhānesu vijjamānāyapi tatramajjhattatāya paccanīkābhibhavanato sahāyapaccayavekallato ca apārisuddhi, tathā taṃsampayuttānaṃ tadabhāvato idha pārisuddhīti imamatthaṃ upamāvasena dassetuṃ ‘‘yathā panā’’tiādi vuttaṃ. Sūriyappabhābhibhavāti sūriyappabhāya abhibhuyyamānattā. Atikkhatāya candalekhā viya rattipi sommasabhāvā sabhāgāya rattiyameva ca candalekhā samujjalatīti sā tassā saṅgayhatīti dassento ‘‘sommabhāvena ca attano upakārakattena vā sabhāgāya rattiyā’’ti āha. Sesamettha uttānatthameva.
চতুত্থজ্ঝানকথা নিট্ঠিতা।
Catutthajjhānakathā niṭṭhitā.
