| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
စတုတ္ထဇ္ဈာနကထာဝဏ္ဏနာ
Catutthajjhānakathāvaṇṇanā
ကတ္ထ စုပ္ပန္နန္တိ ဧတ္ထ ကတ္ထာတိ ဟေတုမ္ဟိ ဘုမ္မံ, ကသ္မိံ ဟေတုမ္ဟိ သတီတိ အတ္ထော။ နာနာဝဇ္ဇနေတိ အပ္ပနာဝီထိအာဝဇ္ဇနတော နာနာ ဘိန္နံ ပုရိမဝီထီသု အာဝဇ္ဇနံ ယသ္သ ဥပစာရသ္သ, တသ္မိံ နာနာဝဇ္ဇနေ။ ဝိသမနိသဇ္ဇာယ ဥပ္ပန္နကိလမထော ဝိသမာသနုပတာပော။ ဥပစာရေ ဝာတိအာဒိ ပက္ခန္တရဒသ္သနံ ဧကာဝဇ္ဇနူပစာရေပိ ဝာတိ အတ္ထော။ ပီတိဖရဏေနာတိ ဣမိနာ အပ္ပနာဝီထိယာ ဝိယ ဧကဝီထိယမ္ပိ ကာမာဝစရပီတိယာ ဖရဏမတ္တသ္သ အဘာဝံ ဒသ္သေတိ။ ဒောမနသ္သိန္ဒ္ရိယသ္သ အသ္သ သိယာ ဥပ္ပတ္တီတိ သမ္ဗန္ဓော။ ဧတန္တိ ဒောမနသ္သိန္ဒ္ရိယံ ဥပ္ပဇ္ဇတီတိ သမ္ဗန္ဓော။ ဝိတက္ကဝိစာရပ္ပစ္စယေပီတိ ပိ-သဒ္ဒော အဋ္ဌာနပ္ပယုတ္တော။ သော ‘‘ပဟီနသ္သာ’’တိ ဟေဋ္ဌာ ဝုတ္တပဒာနန္တရံ ယောဇေတဗ္ဗော ‘‘ပဟီနသ္သာပိ ဒောမနသ္သိန္ဒ္ရိယသ္သာ’’တိ။ ဝိတက္ကဝိစာရဘာဝေတိ ဧတ္ထ ‘‘ဥပ္ပဇ္ဇတိ ဒောမနသ္သိန္ဒ္ရိယ’’န္တိ အာနေတ္ဝာ သမ္ဗန္ဓိတဗ္ဗံ။ နိမိတ္တတ္ထေ စေတံ ဘုမ္မံ, ဝိတက္ကဝိစာရဘာဝဟေတူတိ အတ္ထော။ ဝိတက္ကဝိစာရာတိ ဧတ္ထ ဣတိ-သဒ္ဒော တသ္မာတိ ဧတသ္မိံ အတ္ထေ ဒဋ္ဌဗ္ဗော, တေန ယသ္မာ ဧတံ ဒောမနသ္သိန္ဒ္ရိယံ ဝိတက္ကဝိစာရပစ္စယေ။ပေ.။ နေဝ ဥပ္ပဇ္ဇတိ, ယတ္ထ ပန ဥပ္ပဇ္ဇတိ, တတ္ထ ဝိတက္ကဝိစာရဘာဝေယေဝ ဥပ္ပဇ္ဇတိ။ ယသ္မာ စ အပ္ပဟီနာယေဝ ဒုတိယဇ္ဈာနူပစာရေ ဝိတက္ကဝိစာရာ, တသ္မာ တတ္ထသ္သ သိယာ ဥပ္ပတ္တီတိ ဧဝမေတ္ထ ယောဇနာ ဝေဒိတဗ္ဗာ။
Kattha cuppannanti ettha katthāti hetumhi bhummaṃ, kasmiṃ hetumhi satīti attho. Nānāvajjaneti appanāvīthiāvajjanato nānā bhinnaṃ purimavīthīsu āvajjanaṃ yassa upacārassa, tasmiṃ nānāvajjane. Visamanisajjāya uppannakilamatho visamāsanupatāpo. Upacāre vātiādi pakkhantaradassanaṃ ekāvajjanūpacārepi vāti attho. Pītipharaṇenāti iminā appanāvīthiyā viya ekavīthiyampi kāmāvacarapītiyā pharaṇamattassa abhāvaṃ dasseti. Domanassindriyassa assa siyā uppattīti sambandho. Etanti domanassindriyaṃ uppajjatīti sambandho. Vitakkavicārappaccayepīti pi-saddo aṭṭhānappayutto. So ‘‘pahīnassā’’ti heṭṭhā vuttapadānantaraṃ yojetabbo ‘‘pahīnassāpi domanassindriyassā’’ti. Vitakkavicārabhāveti ettha ‘‘uppajjati domanassindriya’’nti ānetvā sambandhitabbaṃ. Nimittatthe cetaṃ bhummaṃ, vitakkavicārabhāvahetūti attho. Vitakkavicārāti ettha iti-saddo tasmāti etasmiṃ atthe daṭṭhabbo, tena yasmā etaṃ domanassindriyaṃ vitakkavicārapaccaye…pe… neva uppajjati, yattha pana uppajjati, tattha vitakkavicārabhāveyeva uppajjati. Yasmā ca appahīnāyeva dutiyajjhānūpacāre vitakkavicārā, tasmā tatthassa siyā uppattīti evamettha yojanā veditabbā.
တတ္ထာတိ ဒုတိယဇ္ဈာနူပစာရေ။ အသ္သာတိ ဒောမနသ္သိန္ဒ္ရိယသ္သ။ သိယာ ဥပ္ပတ္တီတိ ဣဒဉ္စ ပစ္စယမတ္တဒသ္သနေန သမ္ဘာဝနမတ္တတော ဝုတ္တံ။ ဒောမနသ္သုပ္ပတ္တိသမ္ဘာဝနာပိ ဟိ ဥပစာရက္ခဏေယေဝ ကာတုံ ယုတ္တာ, ဝိတက္ကဝိစာရရဟိတေ ပန ဒုတိယဇ္ဈာနက္ခဏေ တဒုပ္ပတ္တိသမ္ဘာဝနာပိ န ယုတ္တာ ကာတုန္တိ။ ဣတရထာ ကုသလစိတ္တက္ခဏေ အကုသလဒောမနသ္သုပ္ပတ္တိယာ အသမ္ဘဝတော ‘‘တတ္ထသ္သ သိယာ ဥပ္ပတ္တီ’’တိ န ဝတ္တဗ္ဗံ သိယာ။ သမီပတ္ထေ ဝာ ဧတံ ဘုမ္မံ, ဥပစာရဇ္ဈာနာနန္တရဝီထီသူတိ အတ္ထော။ ဒုတိယဇ္ဈာနေတိ ဧတ္ထာပိ အနန္တရဝီထီသုပိ န တ္ဝေဝ ဥပ္ပဇ္ဇတီတိ အတ္ထော, ဧဝံ ဥပရိ သုခိန္ဒ္ရိယေပိ။ သောမနသ္သိန္ဒ္ရိယသ္သ ဥပ္ပတ္တီတိ သမ္ဗန္ဓော။ ပဟီနာတိ ဝုတ္တာတိ ဣဒံ ‘‘ပဉ္စန္နံ ဩရမ္ဘာဂိယာနံ သံယောဇနာနံ ပရိက္ခယာ’’တိ ဝုတ္တတ္တာ ဝုတ္တံ။ ဒုက္ခာဘာဝေနာတိ ဒုက္ခတာဘာဝေန။ ဧဝံ သုခာဘာဝေနာတိ ဧတ္ထာပိ။ ဧတေနာတိ ဒုက္ခသုခပဋိက္ခေပဝစနေန။ ဣဋ္ဌာနိဋ္ဌဝိပရီတာနုဘဝနလက္ခဏာတိ အတိဣဋ္ဌအတိအနိဋ္ဌာနံ ဝိပရီတသ္သ မဇ္ဈတ္တာရမ္မဏသ္သ အနုဘဝနလက္ခဏာ, မဇ္ဈတ္တာရမ္မဏမ္ပိ ဟိ ဣဋ္ဌာနိဋ္ဌေသု ဧဝ ပဝိဋ္ဌံ တဗ္ဗိနိမုတ္တသ္သ အဘာဝာ။
Tatthāti dutiyajjhānūpacāre. Assāti domanassindriyassa. Siyā uppattīti idañca paccayamattadassanena sambhāvanamattato vuttaṃ. Domanassuppattisambhāvanāpi hi upacārakkhaṇeyeva kātuṃ yuttā, vitakkavicārarahite pana dutiyajjhānakkhaṇe taduppattisambhāvanāpi na yuttā kātunti. Itarathā kusalacittakkhaṇe akusaladomanassuppattiyā asambhavato ‘‘tatthassa siyā uppattī’’ti na vattabbaṃ siyā. Samīpatthe vā etaṃ bhummaṃ, upacārajjhānānantaravīthīsūti attho. Dutiyajjhāneti etthāpi anantaravīthīsupi na tveva uppajjatīti attho, evaṃ upari sukhindriyepi. Somanassindriyassa uppattīti sambandho. Pahīnāti vuttāti idaṃ ‘‘pañcannaṃ orambhāgiyānaṃ saṃyojanānaṃ parikkhayā’’ti vuttattā vuttaṃ. Dukkhābhāvenāti dukkhatābhāvena. Evaṃ sukhābhāvenāti etthāpi. Etenāti dukkhasukhapaṭikkhepavacanena. Iṭṭhāniṭṭhaviparītānubhavanalakkhaṇāti atiiṭṭhaatianiṭṭhānaṃ viparītassa majjhattārammaṇassa anubhavanalakkhaṇā, majjhattārammaṇampi hi iṭṭhāniṭṭhesu eva paviṭṭhaṃ tabbinimuttassa abhāvā.
ဈာနစတုက္ကကထာဝဏ္ဏနာနယော နိဋ္ဌိတော။
Jhānacatukkakathāvaṇṇanānayo niṭṭhito.
