| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
சதுத்த²ஜ்ஜா²னங்
Catutthajjhānaṃ
165. சதுத்த²ஜ்ஜா²னநித்³தே³ஸே ஸுக²ஸ்ஸ ச பஹானா து³க்க²ஸ்ஸ ச பஹானாதி காயிகஸுக²ஸ்ஸ ச காயிகது³க்க²ஸ்ஸ ச பஹானா. புப்³பே³வாதி தஞ்ச கோ² புப்³பே³வ ந சதுத்த²ஜ்ஜா²னக்க²ணே. ஸோமனஸ்ஸதோ³மனஸ்ஸானங் அத்த²ங்க³மாதி சேதஸிகஸுக²ஸ்ஸ ச சேதஸிகது³க்க²ஸ்ஸ சாதி இமேஸம்பி த்³வின்னங் புப்³பே³வ அத்த²ங்க³மா; பஹானா இச்சேவ வுத்தங் ஹோதி. கதா³ பன நேஸங் பஹானங் ஹோதி? சதுன்னங் ஜா²னானங் உபசாரக்க²ணே. ஸோமனஸ்ஸஞ்ஹி சதுத்த²ஜ்ஜா²னஸ்ஸ உபசாரக்க²ணேயேவ பஹீயதி. து³க்க²தோ³மனஸ்ஸஸுகா²னி பட²மது³தியததியஜ்ஜா²னானங் உபசாரக்க²ணேஸு. ஏவமேதேஸங் பஹானக்கமேன அவுத்தானங் இந்த்³ரியவிப⁴ங்கே³ பன இந்த்³ரியானங் உத்³தே³ஸக்கமேனேவ இதா⁴பி வுத்தானங் ஸுக²து³க்க²ஸோமனஸ்ஸதோ³மனஸ்ஸானங் பஹானங் வேதி³தப்³ப³ங்.
165. Catutthajjhānaniddese sukhassa ca pahānā dukkhassa ca pahānāti kāyikasukhassa ca kāyikadukkhassa ca pahānā. Pubbevāti tañca kho pubbeva na catutthajjhānakkhaṇe. Somanassadomanassānaṃ atthaṅgamāti cetasikasukhassa ca cetasikadukkhassa cāti imesampi dvinnaṃ pubbeva atthaṅgamā; pahānā icceva vuttaṃ hoti. Kadā pana nesaṃ pahānaṃ hoti? Catunnaṃ jhānānaṃ upacārakkhaṇe. Somanassañhi catutthajjhānassa upacārakkhaṇeyeva pahīyati. Dukkhadomanassasukhāni paṭhamadutiyatatiyajjhānānaṃ upacārakkhaṇesu. Evametesaṃ pahānakkamena avuttānaṃ indriyavibhaṅge pana indriyānaṃ uddesakkameneva idhāpi vuttānaṃ sukhadukkhasomanassadomanassānaṃ pahānaṃ veditabbaṃ.
யதி³ பனேதானி தஸ்ஸ தஸ்ஸ ஜா²னஸ்ஸ உபசாரக்க²ணேயேவ பஹீயந்தி, அத² கஸ்மா ‘‘கத்த² சுப்பன்னங் து³க்கி²ந்த்³ரியங் அபரிஸேஸங் நிருஜ்ஜ²தி? இத⁴, பி⁴க்க²வே, பி⁴க்கு² விவிச்சேவ காமேஹி…பே॰… பட²மங் ஜா²னங் உபஸம்பஜ்ஜ விஹரதி, எத்து²ப்பன்னங் து³க்கி²ந்த்³ரியங் அபரிஸேஸங் நிருஜ்ஜ²தி. கத்த² சுப்பன்னங் தோ³மனஸ்ஸிந்த்³ரியங்… ஸுகி²ந்த்³ரியங்… ஸோமனஸ்ஸிந்த்³ரியங் அபரிஸேஸங் நிருஜ்ஜ²தி? இத⁴, பி⁴க்க²வே, பி⁴க்கு² ஸுக²ஸ்ஸ ச பஹானா…பே॰… சதுத்த²ங் ஜா²னங் உபஸம்பஜ்ஜ விஹரதி. எத்து²ப்பன்னங் ஸோமனஸ்ஸிந்த்³ரியங் அபரிஸேஸங் நிருஜ்ஜ²தீ’’தி (ஸங்॰ நி॰ 5.510) ஏவங் ஜா²னெஸ்வேவ நிரோதோ⁴ வுத்தோதி? அதிஸயனிரோத⁴த்தா. அதிஸயனிரோதோ⁴ ஹி தேஸங் பட²மஜ்ஜா²னாதீ³ஸு, ந நிரோதோ⁴யேவ. நிரோதோ⁴யேவ பன உபசாரக்க²ணே, நாதிஸயனிரோதோ⁴. ததா² ஹி நானாவஜ்ஜனே பட²மஜ்ஜா²னுபசாரே நிருத்³த⁴ஸ்ஸாபி து³க்கி²ந்த்³ரியஸ்ஸ ட³ங்ஸமகஸாதி³ஸம்ப²ஸ்ஸேன வா, விஸமாஸனுபதாபேன வா ஸியா உப்பத்தி, நத்வேவ அந்தோஅப்பனாயங். உபசாரே வா நிருத்³த⁴ம்பேதங் ந ஸுட்டு² நிருத்³த⁴ங் ஹோதி, படிபக்கே²ன அவிஹதத்தா. அந்தோஅப்பனாயங் பன பீதிப²ரணேன ஸப்³போ³ காயோ ஸுகோ²க்கந்தோ ஹோதி. ஸுகோ²க்கந்தகாயஸ்ஸ ச ஸுட்டு² நிருத்³த⁴ங் ஹோதி து³க்கி²ந்த்³ரியங், படிபக்கே²ன விஹதத்தா. நானாவஜ்ஜனேயேவ ச து³தியஜ்ஜா²னுபசாரே பஹீனஸ்ஸ தோ³மனஸ்ஸிந்த்³ரியஸ்ஸ யஸ்மா ஏதங் விதக்கவிசாரபச்சயேபி காயகிலமதே² சித்துபகா⁴தே ச ஸதி உப்பஜ்ஜதி, விதக்கவிசாராபா⁴வே நேவ உப்பஜ்ஜதி; யத்த² பன உப்பஜ்ஜதி தத்த² விதக்கவிசாரபா⁴வே; அப்பஹீனா ஏவ ச து³தியஜ்ஜா²னுபசாரே விதக்கவிசாராதி தத்த²ஸ்ஸ ஸியா உப்பத்தி, நத்வேவ து³தியஜ்ஜா²னே, பஹீனபச்சயத்தா. ததா² ததியஜ்ஜா²னுபசாரே பஹீனஸ்ஸாபி ஸுகி²ந்த்³ரியஸ்ஸ பீதிஸமுட்டா²னபணீதரூபபு²டகாயஸ்ஸ ஸியா உப்பத்தி, நத்வேவ ததியஜ்ஜா²னே. ததியஜ்ஜா²னே ஹி ஸுக²ஸ்ஸ பச்சயபூ⁴தா பீதி ஸப்³ப³ஸோ நிருத்³தா⁴தி. ததா² சதுத்த²ஜ்ஜா²னுபசாரே பஹீனஸ்ஸாபி ஸோமனஸ்ஸிந்த்³ரியஸ்ஸ ஆஸன்னத்தா, அப்பனாப்பத்தாய உபெக்கா²ய அபா⁴வேன ஸம்மா அனதிக்கந்தத்தா ச, ஸியா உப்பத்தி, நத்வேவ சதுத்த²ஜ்ஜா²னே. தஸ்மா ஏவ ச ‘எத்து²ப்பன்னங் து³க்கி²ந்த்³ரியங் அபரிஸேஸங் நிருஜ்ஜ²தீ’தி தத்த² தத்த² அபரிஸேஸக்³க³ஹணங் கதந்தி.
Yadi panetāni tassa tassa jhānassa upacārakkhaṇeyeva pahīyanti, atha kasmā ‘‘kattha cuppannaṃ dukkhindriyaṃ aparisesaṃ nirujjhati? Idha, bhikkhave, bhikkhu vivicceva kāmehi…pe… paṭhamaṃ jhānaṃ upasampajja viharati, etthuppannaṃ dukkhindriyaṃ aparisesaṃ nirujjhati. Kattha cuppannaṃ domanassindriyaṃ… sukhindriyaṃ… somanassindriyaṃ aparisesaṃ nirujjhati? Idha, bhikkhave, bhikkhu sukhassa ca pahānā…pe… catutthaṃ jhānaṃ upasampajja viharati. Etthuppannaṃ somanassindriyaṃ aparisesaṃ nirujjhatī’’ti (saṃ. ni. 5.510) evaṃ jhānesveva nirodho vuttoti? Atisayanirodhattā. Atisayanirodho hi tesaṃ paṭhamajjhānādīsu, na nirodhoyeva. Nirodhoyeva pana upacārakkhaṇe, nātisayanirodho. Tathā hi nānāvajjane paṭhamajjhānupacāre niruddhassāpi dukkhindriyassa ḍaṃsamakasādisamphassena vā, visamāsanupatāpena vā siyā uppatti, natveva antoappanāyaṃ. Upacāre vā niruddhampetaṃ na suṭṭhu niruddhaṃ hoti, paṭipakkhena avihatattā. Antoappanāyaṃ pana pītipharaṇena sabbo kāyo sukhokkanto hoti. Sukhokkantakāyassa ca suṭṭhu niruddhaṃ hoti dukkhindriyaṃ, paṭipakkhena vihatattā. Nānāvajjaneyeva ca dutiyajjhānupacāre pahīnassa domanassindriyassa yasmā etaṃ vitakkavicārapaccayepi kāyakilamathe cittupaghāte ca sati uppajjati, vitakkavicārābhāve neva uppajjati; yattha pana uppajjati tattha vitakkavicārabhāve; appahīnā eva ca dutiyajjhānupacāre vitakkavicārāti tatthassa siyā uppatti, natveva dutiyajjhāne, pahīnapaccayattā. Tathā tatiyajjhānupacāre pahīnassāpi sukhindriyassa pītisamuṭṭhānapaṇītarūpaphuṭakāyassa siyā uppatti, natveva tatiyajjhāne. Tatiyajjhāne hi sukhassa paccayabhūtā pīti sabbaso niruddhāti. Tathā catutthajjhānupacāre pahīnassāpi somanassindriyassa āsannattā, appanāppattāya upekkhāya abhāvena sammā anatikkantattā ca, siyā uppatti, natveva catutthajjhāne. Tasmā eva ca ‘etthuppannaṃ dukkhindriyaṃ aparisesaṃ nirujjhatī’ti tattha tattha aparisesaggahaṇaṃ katanti.
எத்தா²ஹ – ‘அதே²வங் தஸ்ஸ தஸ்ஸ ஜா²னஸ்ஸுபசாரே பஹீனாபி ஏதா வேத³னா இத⁴ கஸ்மா ஸமாஹடா’தி? ‘ஸுக²க்³க³ஹணத்த²ங்’. யா ஹி அயங் ‘அது³க்க²மஸுக²’ந்தி எத்த² அது³க்க²மஸுகா² வேத³னா வுத்தா, ஸா ஸுகு²மா, து³ப்³பி³ஞ்ஞெய்யா, ந ஸக்கா ஸுகே²ன க³ஹேதுங். தஸ்மா யதா² நாம து³ட்ட²ஸ்ஸ யதா² ததா² வா உபஸங்கமித்வா க³ஹேதுங் அஸக்குணெய்யஸ்ஸ கோ³ணஸ்ஸ க³ஹணத்த²ங் கோ³போ ஏகஸ்மிங் வஜே ஸப்³பா³ கா³வோ ஸமாஹரதி, அதே²கேகங் நீஹரந்தோ படிபாடியா ஆக³தங் ‘அயங் ஸோ, க³ண்ஹத² ந’ந்தி தம்பி கா³ஹாபயதி; ஏவமேவ ப⁴க³வா ஸுக²க³ஹணத்த²ங் ஸப்³பா³பி ஏதா ஸமாஹரீதி. ஏவஞ்ஹி ஸமாஹடா ஏதா த³ஸ்ஸெத்வா யங் நேவ ஸுக²ங் ந து³க்க²ங், ந ஸோமனஸ்ஸங் ந தோ³மனஸ்ஸங், அயங் அது³க்க²மஸுகா²வேத³னாதி ஸக்கா ஹோதி ஏஸா கா³ஹயிதுங்.
Etthāha – ‘athevaṃ tassa tassa jhānassupacāre pahīnāpi etā vedanā idha kasmā samāhaṭā’ti? ‘Sukhaggahaṇatthaṃ’. Yā hi ayaṃ ‘adukkhamasukha’nti ettha adukkhamasukhā vedanā vuttā, sā sukhumā, dubbiññeyyā, na sakkā sukhena gahetuṃ. Tasmā yathā nāma duṭṭhassa yathā tathā vā upasaṅkamitvā gahetuṃ asakkuṇeyyassa goṇassa gahaṇatthaṃ gopo ekasmiṃ vaje sabbā gāvo samāharati, athekekaṃ nīharanto paṭipāṭiyā āgataṃ ‘ayaṃ so, gaṇhatha na’nti tampi gāhāpayati; evameva bhagavā sukhagahaṇatthaṃ sabbāpi etā samāharīti. Evañhi samāhaṭā etā dassetvā yaṃ neva sukhaṃ na dukkhaṃ, na somanassaṃ na domanassaṃ, ayaṃ adukkhamasukhāvedanāti sakkā hoti esā gāhayituṃ.
அபிச அது³க்க²மஸுகா²ய சேதோவிமுத்தியா பச்சயத³ஸ்ஸனத்த²ஞ்சாபி ஏதா வுத்தாதி வேதி³தப்³பா³. ஸுக²து³க்க²ப்பஹானாத³யோ ஹி தஸ்ஸா பச்சயா. யதா²ஹ – ‘‘சத்தாரோ கோ², ஆவுஸோ, பச்சயா அது³க்க²மஸுகா²ய சேதோவிமுத்தியா ஸமாபத்தியா. இதா⁴வுஸோ பி⁴க்கு², ஸுக²ஸ்ஸ ச பஹானா…பே॰… சதுத்த²ங் ஜா²னங் உபஸம்பஜ்ஜ விஹரதி, இமே கோ², ஆவுஸோ, சத்தாரோ பச்சயா அது³க்க²மஸுகா²ய சேதோவிமுத்தியா ஸமாபத்தியா’’தி (ம॰ நி॰ 1.458). யதா² வா அஞ்ஞத்த² பஹீனாபி ஸக்காயதி³ட்டி²ஆத³யோ ததியமக்³க³ஸ்ஸ வண்ணப⁴ணனத்த²ங் தத்த² பஹீனாதி வுத்தா, ஏவங் வண்ணப⁴ணனத்த²ம்பேதஸ்ஸ ஜா²னஸ்ஸேதா இத⁴ வுத்தாதி வேதி³தப்³பா³. பச்சயகா⁴தேன வா எத்த² ராக³தோ³ஸானங் அதிதூ³ரபா⁴வங் த³ஸ்ஸேதும்பேதா வுத்தாதி வேதி³தப்³பா³. ஏதாஸு ஹி ஸுக²ங் ஸோமனஸ்ஸஸ்ஸ பச்சயோ, ஸோமனஸ்ஸங் ராக³ஸ்ஸ; து³க்க²ங் தோ³மனஸ்ஸஸ்ஸ, தோ³மனஸ்ஸங் தோ³ஸஸ்ஸ. ஸுகா²தி³கா⁴தேன ச ஸப்பச்சயா ராக³தோ³ஸா ஹதாதி அதிதூ³ரே ஹொந்தீதி.
Apica adukkhamasukhāya cetovimuttiyā paccayadassanatthañcāpi etā vuttāti veditabbā. Sukhadukkhappahānādayo hi tassā paccayā. Yathāha – ‘‘cattāro kho, āvuso, paccayā adukkhamasukhāya cetovimuttiyā samāpattiyā. Idhāvuso bhikkhu, sukhassa ca pahānā…pe… catutthaṃ jhānaṃ upasampajja viharati, ime kho, āvuso, cattāro paccayā adukkhamasukhāya cetovimuttiyā samāpattiyā’’ti (ma. ni. 1.458). Yathā vā aññattha pahīnāpi sakkāyadiṭṭhiādayo tatiyamaggassa vaṇṇabhaṇanatthaṃ tattha pahīnāti vuttā, evaṃ vaṇṇabhaṇanatthampetassa jhānassetā idha vuttāti veditabbā. Paccayaghātena vā ettha rāgadosānaṃ atidūrabhāvaṃ dassetumpetā vuttāti veditabbā. Etāsu hi sukhaṃ somanassassa paccayo, somanassaṃ rāgassa; dukkhaṃ domanassassa, domanassaṃ dosassa. Sukhādighātena ca sappaccayā rāgadosā hatāti atidūre hontīti.
அது³க்க²மஸுக²ந்தி து³க்கா²பா⁴வேன அது³க்க²ங், ஸுகா²பா⁴வேன அஸுக²ங். ஏதேனெத்த² து³க்க²ஸுக²ப்படிபக்க²பூ⁴தங் ததியவேத³னங் தீ³பேதி, ந து³க்க²ஸுகா²பா⁴வமத்தங். ததியவேத³னா நாம அது³க்க²மஸுகா². உபெக்கா²திபி வுச்சதி. ஸா இட்டா²னிட்ட²விபரீதானுப⁴வனலக்க²ணா, மஜ்ஜ²த்தரஸா, அவிபூ⁴தபச்சுபட்டா²னா, ஸுக²னிரோத⁴பத³ட்டா²னாதி வேதி³தப்³பா³.
Adukkhamasukhanti dukkhābhāvena adukkhaṃ, sukhābhāvena asukhaṃ. Etenettha dukkhasukhappaṭipakkhabhūtaṃ tatiyavedanaṃ dīpeti, na dukkhasukhābhāvamattaṃ. Tatiyavedanā nāma adukkhamasukhā. Upekkhātipi vuccati. Sā iṭṭhāniṭṭhaviparītānubhavanalakkhaṇā, majjhattarasā, avibhūtapaccupaṭṭhānā, sukhanirodhapadaṭṭhānāti veditabbā.
உபெக்கா²ஸதிபாரிஸுத்³தி⁴ந்தி உபெக்கா²ய ஜனிதஸதிபாரிஸுத்³தி⁴ங். இமஸ்மிஞ்ஹி ஜா²னே ஸுபரிஸுத்³தா⁴ ஸதி. யா ச தஸ்ஸா ஸதியா பாரிஸுத்³தி⁴ ஸா உபெக்கா²ய கதா, ந அஞ்ஞேன. தஸ்மா ஏதங் உபெக்கா²ஸதிபாரிஸுத்³தீ⁴தி வுச்சதி. விப⁴ங்கே³பி வுத்தங் – ‘‘அயங் ஸதி இமாய உபெக்கா²ய விஸதா³ ஹோதி பரிஸுத்³தா⁴ பரியோதா³தா, தேன வுச்சதி உபெக்கா²ஸதிபாரிஸுத்³தீ⁴’’தி (விப⁴॰ 597). யாய ச உபெக்கா²ய எத்த² ஸதி பாரிஸுத்³தி⁴ ஹோதி ஸா அத்த²தோ தத்ரமஜ்ஜ²த்ததாதி வேதி³தப்³பா³. ந கேவலஞ்செத்த² தாய ஸதியேவ பரிஸுத்³தா⁴ அபிச கோ² ஸப்³பே³பி ஸம்பயுத்தத⁴ம்மா. ஸதிஸீஸேன பன தே³ஸனா வுத்தா.
Upekkhāsatipārisuddhinti upekkhāya janitasatipārisuddhiṃ. Imasmiñhi jhāne suparisuddhā sati. Yā ca tassā satiyā pārisuddhi sā upekkhāya katā, na aññena. Tasmā etaṃ upekkhāsatipārisuddhīti vuccati. Vibhaṅgepi vuttaṃ – ‘‘ayaṃ sati imāya upekkhāya visadā hoti parisuddhā pariyodātā, tena vuccati upekkhāsatipārisuddhī’’ti (vibha. 597). Yāya ca upekkhāya ettha sati pārisuddhi hoti sā atthato tatramajjhattatāti veditabbā. Na kevalañcettha tāya satiyeva parisuddhā apica kho sabbepi sampayuttadhammā. Satisīsena pana desanā vuttā.
தத்த² கிஞ்சாபி அயங் உபெக்கா² ஹெட்டா²பி தீஸு ஜா²னேஸு விஜ்ஜதி – யதா² பன தி³வா ஸூரியப்பபா⁴பி⁴ப⁴வா ஸொம்மபா⁴வேன ச அத்தனோ உபகாரகத்தேன வா ஸபா⁴கா³ய ரத்தியா அலாபா⁴ தி³வா விஜ்ஜமானாபி சந்த³லேகா² அபரிஸுத்³தா⁴ ஹோதி அபரியோதா³தா – ஏவமயம்பி தத்ரமஜ்ஜ²த்துபெக்கா²சந்த³லேகா² விதக்காதி³பச்சனீகத⁴ம்மதேஜாபி⁴ப⁴வா ஸபா⁴கா³ய ச உபெக்கா²வேத³னாரத்தியா அப்படிலாபா⁴ விஜ்ஜமானாபி பட²மாதி³ஜ்ஜா²னபே⁴தே³ஸு அபரிஸுத்³தா⁴ ஹோதி. தஸ்ஸா ச அபரிஸுத்³தா⁴ய தி³வா அபரிஸுத்³த⁴சந்த³லேகா²ய பபா⁴ விய ஸஹஜாதாபி ஸதிஆத³யோ அபரிஸுத்³தா⁴வ ஹொந்தி. தஸ்மா தேஸு ஏகம்பி ‘உபெக்கா²ஸதிபாரிஸுத்³தீ⁴’தி ந வுத்தங். இத⁴ பன விதக்காதி³பச்சனீகத⁴ம்மதேஜாபி⁴ப⁴வாபா⁴வா ஸபா⁴கா³ய ச உபெக்கா² வேத³னாரத்தியா படிலாபா⁴ அயங் தத்ரமஜ்ஜ²த்துபெக்கா²சந்த³லேகா² அதிவிய பரிஸுத்³தா⁴. தஸ்ஸா பரிஸுத்³த⁴த்தா பரிஸுத்³த⁴சந்த³லேகா²ய பபா⁴ விய ஸஹஜாதாபி ஸதிஆத³யோ பரிஸுத்³தா⁴ ஹொந்தி பரியோதா³தா. தஸ்மா இத³மேவ உபெக்கா²ஸதிபாரிஸுத்³தீ⁴தி வுத்தந்தி வேதி³தப்³ப³ங்.
Tattha kiñcāpi ayaṃ upekkhā heṭṭhāpi tīsu jhānesu vijjati – yathā pana divā sūriyappabhābhibhavā sommabhāvena ca attano upakārakattena vā sabhāgāya rattiyā alābhā divā vijjamānāpi candalekhā aparisuddhā hoti apariyodātā – evamayampi tatramajjhattupekkhācandalekhā vitakkādipaccanīkadhammatejābhibhavā sabhāgāya ca upekkhāvedanārattiyā appaṭilābhā vijjamānāpi paṭhamādijjhānabhedesu aparisuddhā hoti. Tassā ca aparisuddhāya divā aparisuddhacandalekhāya pabhā viya sahajātāpi satiādayo aparisuddhāva honti. Tasmā tesu ekampi ‘upekkhāsatipārisuddhī’ti na vuttaṃ. Idha pana vitakkādipaccanīkadhammatejābhibhavābhāvā sabhāgāya ca upekkhā vedanārattiyā paṭilābhā ayaṃ tatramajjhattupekkhācandalekhā ativiya parisuddhā. Tassā parisuddhattā parisuddhacandalekhāya pabhā viya sahajātāpi satiādayo parisuddhā honti pariyodātā. Tasmā idameva upekkhāsatipārisuddhīti vuttanti veditabbaṃ.
சதுத்த²ந்தி க³ணனானுபுப்³ப³தா சதுத்த²ங். இத³ங் சதுத்த²ங் ஸமாபஜ்ஜதீதிபி சதுத்த²ங். ப²ஸ்ஸோ ஹோதீதிஆதீ³ஸு ப²ஸ்ஸபஞ்சகே தாவ வேத³னாதி உபெக்கா²வேத³னா வேதி³தப்³பா³. ஜா²னபஞ்சகஇந்த்³ரியஅட்ட²கேஸு பன உபெக்கா² ஹோதி உபெக்கி²ந்த்³ரியங் ஹோதீதி (த⁴॰ ஸ॰ 165) வுத்தமேவ. ஸேஸானி ததியே பரிஹீனபதா³னி இதா⁴பி பரிஹீனானேவ. கொட்டா²ஸவாரேபி து³வங்கி³கங் ஜா²னந்தி உபெக்கா²சித்தேகக்³க³தாவஸேனேவ வேதி³தப்³ப³ங். ஸேஸங் ஸப்³ப³ங் ததியஸதி³ஸமேவாதி.
Catutthanti gaṇanānupubbatā catutthaṃ. Idaṃ catutthaṃ samāpajjatītipi catutthaṃ. Phasso hotītiādīsu phassapañcake tāva vedanāti upekkhāvedanā veditabbā. Jhānapañcakaindriyaaṭṭhakesu pana upekkhā hoti upekkhindriyaṃ hotīti (dha. sa. 165) vuttameva. Sesāni tatiye parihīnapadāni idhāpi parihīnāneva. Koṭṭhāsavārepi duvaṅgikaṃ jhānanti upekkhācittekaggatāvaseneva veditabbaṃ. Sesaṃ sabbaṃ tatiyasadisamevāti.
சதுக்கனயோ நிட்டி²தோ.
Catukkanayo niṭṭhito.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / ரூபாவசரகுஸலங் • Rūpāvacarakusalaṃ
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā / சதுத்த²ஜ்ஜா²னகதா²வண்ணனா • Catutthajjhānakathāvaṇṇanā
