| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
4. சதுத்த²னயோ ஸங்க³ஹிதேனஸங்க³ஹிதபத³வண்ணனா
4. Catutthanayo saṅgahitenasaṅgahitapadavaṇṇanā
191. ஸங்க³ஹிதேனஸங்க³ஹிதபத³னித்³தே³ஸே யஸ்மா யதா² து³தியததியனயா திண்ணங் ஸங்க³ஹானங் ஸங்க³ஹணாஸங்க³ஹணப்பவத்திவிஸேஸேன ‘‘ஸங்க³ஹிதேன அஸங்க³ஹிதங், அஸங்க³ஹிதேன ஸங்க³ஹித’’ந்தி ச உத்³தி³ட்டா², நேவங் சதுத்த²பஞ்சமா. ஸங்க³ஹணப்பவத்தியா ஏவ ஹி ஸங்க³ஹிதேன ஸங்க³ஹிதங் உத்³தி³ட்ட²ங், அஸங்க³ஹணப்பவத்தியா ஏவ ச அஸங்க³ஹிதேன அஸங்க³ஹிதந்தி, தஸ்மா ஸங்க³ஹணப்பவத்திவிஸேஸவிரஹே ஸங்க³ஹிதத⁴ம்மாஸங்க³ஹிதத⁴ம்மவிஸேஸே நிஸ்ஸிதா ஏதே த்³வே நயாதி எத்த² கேனசி ஸங்க³ஹிதேன த⁴ம்மவிஸேஸேன புன ஸங்க³ஹிதோ த⁴ம்மவிஸேஸோ ஸங்க³ஹிதேன ஸங்க³ஹிதோ ஸங்க³ஹிததாய புச்சி²தப்³போ³ விஸ்ஸஜ்ஜிதப்³போ³ ச, தமேவ தாவ யதா²னித்³தா⁴ரிதங் த³ஸ்ஸெந்தோ ‘‘ஸமுத³யஸச்சேன யே த⁴ம்மா க²ந்த⁴…பே॰… ஸங்க³ஹிதா, தேஹி த⁴ம்மேஹி யே த⁴ம்மா க²ந்த⁴…பே॰… ஸங்க³ஹிதா’’தி ஆஹ. எத்த² ச யே தீஹிபி ஸங்க³ஹேஹி ந ஸங்கா³ஹகா ரூபக்க²ந்த⁴விஞ்ஞாணக்க²ந்த⁴த⁴ம்மாயதனது³க்க²ஸச்சாதீ³னி விய, யே ச த்³வீஹாயதனதா⁴துஸங்க³ஹேஹி அஸங்கா³ஹகா சக்கா²யதனாதீ³னி விய, யே ச ஏகேன க²ந்த⁴ஸங்க³ஹேனேவ தா⁴துஸங்க³ஹேனேவ ச ந ஸங்கா³ஹகா வேத³னாதி³க்க²ந்த⁴னிரோத⁴ஸச்சஜீவிதிந்த்³ரியாதீ³னி விய சக்கு²விஞ்ஞாணதா⁴தாத³யோ விய ச, தே த⁴ம்மா ஸங்கா³ஹகத்தாபா⁴வஸப்³பா⁴வா ஸங்கா³ஹகபா⁴வேன ந உத்³த⁴டா, தீஹிபி பன ஸங்க³ஹேஹி யே ஸங்கா³ஹகா, தே ஸங்கா³ஹகத்தாபா⁴வாபா⁴வதோ இத⁴ உத்³த⁴டா. தேஹி ஸங்க³ஹிதாபி ஹி ஏகந்தேன அத்தனோ ஸங்கா³ஹகஸ்ஸ ஸங்கா³ஹகா ஹொந்தி, யஸ்ஸ புன ஸங்க³ஹோ புச்சி²தப்³போ³ விஸ்ஸஜ்ஜிதப்³போ³ சாதி.
191. Saṅgahitenasaṅgahitapadaniddese yasmā yathā dutiyatatiyanayā tiṇṇaṃ saṅgahānaṃ saṅgahaṇāsaṅgahaṇappavattivisesena ‘‘saṅgahitena asaṅgahitaṃ, asaṅgahitena saṅgahita’’nti ca uddiṭṭhā, nevaṃ catutthapañcamā. Saṅgahaṇappavattiyā eva hi saṅgahitena saṅgahitaṃ uddiṭṭhaṃ, asaṅgahaṇappavattiyā eva ca asaṅgahitena asaṅgahitanti, tasmā saṅgahaṇappavattivisesavirahe saṅgahitadhammāsaṅgahitadhammavisese nissitā ete dve nayāti ettha kenaci saṅgahitena dhammavisesena puna saṅgahito dhammaviseso saṅgahitena saṅgahito saṅgahitatāya pucchitabbo vissajjitabbo ca, tameva tāva yathāniddhāritaṃ dassento ‘‘samudayasaccena ye dhammā khandha…pe… saṅgahitā, tehi dhammehi ye dhammā khandha…pe… saṅgahitā’’ti āha. Ettha ca ye tīhipi saṅgahehi na saṅgāhakā rūpakkhandhaviññāṇakkhandhadhammāyatanadukkhasaccādīni viya, ye ca dvīhāyatanadhātusaṅgahehi asaṅgāhakā cakkhāyatanādīni viya, ye ca ekena khandhasaṅgaheneva dhātusaṅgaheneva ca na saṅgāhakā vedanādikkhandhanirodhasaccajīvitindriyādīni viya cakkhuviññāṇadhātādayo viya ca, te dhammā saṅgāhakattābhāvasabbhāvā saṅgāhakabhāvena na uddhaṭā, tīhipi pana saṅgahehi ye saṅgāhakā, te saṅgāhakattābhāvābhāvato idha uddhaṭā. Tehi saṅgahitāpi hi ekantena attano saṅgāhakassa saṅgāhakā honti, yassa puna saṅgaho pucchitabbo vissajjitabbo cāti.
அட்ட²கதா²யங் பன ஸகலேன ஹி க²ந்தா⁴தி³பதே³னாதி ஸகலவாசகேன ரூபக்க²ந்தா⁴தி³பதே³னாதி அத்தோ². யங் பனேதங் வுத்தங் ‘‘யங் அத்தனோ ஸங்கா³ஹகங் ஸங்க³ண்ஹித்வா புன தேனேவ ஸங்க³ஹங் க³ச்செ²ய்யா’’தி, தங் தேன க²ந்தா⁴தி³பதே³னாதி ஏவங் அயோஜெத்வா தங் அஞ்ஞங் ஸங்க³ஹிதங் நாம நத்தீ²தி ஏவங் ந ஸக்கா வத்துங். ந ஹி யேன யங் ஸங்க³ஹிதங், தேனேவ தஸ்ஸ ஸங்க³ஹோ புச்சி²தோ விஸ்ஸஜ்ஜிதோ, ந ச தஸ்ஸேவ, அத² கோ² தேன ஸங்க³ஹிதஸ்ஸாதி. யதா² வேத³னா ஸத்³தோ³ ச க²ந்தோ⁴ ஆயதனஞ்ச, ந ஏவங் ஸுகு²மரூபங், தங் பன க²ந்தா⁴யதனானங் ஏகதே³ஸோவ, தஸ்மா ‘‘ஸுகு²மரூபேகதே³ஸங் வா’’தி அவத்வா ‘‘ஸுகு²மரூபங் வா’’தி வுத்தங். ஸப்³ப³த்த² ச அஞ்ஞேன அஸம்மிஸ்ஸந்தி யோஜேதப்³ப³ங். யம்பி சேதங் வுத்தங் ‘‘ததே³வ யேஹி த⁴ம்மேஹி க²ந்தா⁴தி³வஸேன ஸங்க³ஹிதங், தே த⁴ம்மே ஸந்தா⁴யா’’தி, தம்பி ததா² ந ஸக்கா வத்துங். ந ஹி ஸங்க³ஹிதேன ஸங்க³ஹிதஸ்ஸ ஸங்க³ஹிதேன ஸங்க³ஹோ எத்த² புச்சி²தோ விஸ்ஸஜ்ஜிதோ ச, அத² கோ² ஸங்க³ஹோவ, தஸ்மா ஏகேன க²ந்தே⁴னாதி ஏகேன க²ந்த⁴க³ணனேனாதி அயமேவெத்த² அத்தோ², ந ஸங்கா³ஹகேனாதி. ந ஹி ஏகோ க²ந்தோ⁴ அத்தனோ ஏகதே³ஸஸ்ஸ ஸங்கா³ஹகோதி.
Aṭṭhakathāyaṃ pana sakalena hi khandhādipadenāti sakalavācakena rūpakkhandhādipadenāti attho. Yaṃ panetaṃ vuttaṃ ‘‘yaṃ attano saṅgāhakaṃ saṅgaṇhitvā puna teneva saṅgahaṃ gaccheyyā’’ti, taṃ tena khandhādipadenāti evaṃ ayojetvā taṃ aññaṃ saṅgahitaṃ nāma natthīti evaṃ na sakkā vattuṃ. Na hi yena yaṃ saṅgahitaṃ, teneva tassa saṅgaho pucchito vissajjito, na ca tasseva, atha kho tena saṅgahitassāti. Yathā vedanā saddo ca khandho āyatanañca, na evaṃ sukhumarūpaṃ, taṃ pana khandhāyatanānaṃ ekadesova, tasmā ‘‘sukhumarūpekadesaṃ vā’’ti avatvā ‘‘sukhumarūpaṃ vā’’ti vuttaṃ. Sabbattha ca aññena asammissanti yojetabbaṃ. Yampi cetaṃ vuttaṃ ‘‘tadeva yehi dhammehi khandhādivasena saṅgahitaṃ, te dhamme sandhāyā’’ti, tampi tathā na sakkā vattuṃ. Na hi saṅgahitena saṅgahitassa saṅgahitena saṅgaho ettha pucchito vissajjito ca, atha kho saṅgahova, tasmā ekena khandhenāti ekena khandhagaṇanenāti ayamevettha attho, na saṅgāhakenāti. Na hi eko khandho attano ekadesassa saṅgāhakoti.
சதுத்த²னயஸங்க³ஹிதேனஸங்க³ஹிதபத³வண்ணனா நிட்டி²தா.
Catutthanayasaṅgahitenasaṅgahitapadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / தா⁴துகதா²பாளி • Dhātukathāpāḷi / 4. ஸங்க³ஹிதேனஸங்க³ஹிதபத³னித்³தே³ஸோ • 4. Saṅgahitenasaṅgahitapadaniddeso
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 4. சதுத்த²னயோ ஸங்க³ஹிதேனஸங்க³ஹிதபத³வண்ணனா • 4. Catutthanayo saṅgahitenasaṅgahitapadavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 4. சதுத்த²னயோ ஸங்க³ஹிதேனஸங்க³ஹிதபத³வண்ணனா • 4. Catutthanayo saṅgahitenasaṅgahitapadavaṇṇanā
