| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
4. சதுத்த²னயோ ஸங்க³ஹிதேனஸங்க³ஹிதபத³வண்ணனா
4. Catutthanayo saṅgahitenasaṅgahitapadavaṇṇanā
191. திண்ணங் ஸங்க³ஹானந்தி க²ந்தா⁴யதனதா⁴துஸங்க³ஹானங். ஸங்க³ஹணபுப்³ப³ங் அஸங்க³ஹணங், அஸங்க³ஹணபுப்³ப³ங் ஸங்க³ஹணஞ்ச வுச்சமானங் ஸங்க³ஹணாஸங்க³ஹணானங் பவத்திவிஸேஸேன வுத்தங் ஹோதீதி ஆஹ ‘‘ஸங்க³ஹணா…பே॰… உத்³தி³ட்டா²’’தி. ஸங்க³ஹாபா⁴வகதோ அஸங்க³ஹோ ஸங்க³ஹஹேதுகோ ஸங்க³ஹஸ்ஸ பவத்திவிஸேஸோயேவ நாம ஹோதீதி ஆஹ ‘‘ஸங்க³ஹணப்பவத்திவிஸேஸவிரஹே’’தி. கேனசி ஸமுத³யஸச்சாதி³னா தீஹிபி ஸங்க³ஹேஹி ஸங்க³ஹிதேன ஸங்கா²ரக்க²ந்த⁴பரியாபன்னேன த⁴ம்மவிஸேஸேன புன ததே²வ ஸங்க³ஹிதோ ஸோ ஏவ ஸமுத³யஸச்சாதி³கோ த⁴ம்மவிஸேஸோ ஸங்க³ஹிதேன ஸங்க³ஹிதோ. ஸங்கா³ஹகத்தாபா⁴வஸப்³பா⁴வா ஸங்கா³ஹகபா⁴வேன ந உத்³த⁴டா, ந அஸங்கா³ஹகத்தா ஏவ. யதா² ஹி தீஹி ஸங்க³ஹேஹி ந ஸங்கா³ஹகா, ஏவங் த்³வீஹி, ஏகேனபி ஸங்க³ஹேன ந ஸங்கா³ஹகா இத⁴ ந உத்³த⁴டா. தேஹி ஸங்க³ஹிதாதி தேஹி தீஹி ஸங்க³ஹேஹி ஸங்க³ஹிதா த⁴ம்மா. யஸ்ஸாதி யஸ்ஸ அத்தனோ ஸங்கா³ஹகஸ்ஸ.
191. Tiṇṇaṃsaṅgahānanti khandhāyatanadhātusaṅgahānaṃ. Saṅgahaṇapubbaṃ asaṅgahaṇaṃ, asaṅgahaṇapubbaṃ saṅgahaṇañca vuccamānaṃ saṅgahaṇāsaṅgahaṇānaṃ pavattivisesena vuttaṃ hotīti āha ‘‘saṅgahaṇā…pe… uddiṭṭhā’’ti. Saṅgahābhāvakato asaṅgaho saṅgahahetuko saṅgahassa pavattivisesoyeva nāma hotīti āha ‘‘saṅgahaṇappavattivisesavirahe’’ti. Kenaci samudayasaccādinā tīhipi saṅgahehi saṅgahitena saṅkhārakkhandhapariyāpannena dhammavisesena puna tatheva saṅgahito so eva samudayasaccādiko dhammaviseso saṅgahitena saṅgahito. Saṅgāhakattābhāvasabbhāvā saṅgāhakabhāvena na uddhaṭā, na asaṅgāhakattā eva. Yathā hi tīhi saṅgahehi na saṅgāhakā, evaṃ dvīhi, ekenapi saṅgahena na saṅgāhakā idha na uddhaṭā. Tehi saṅgahitāti tehi tīhi saṅgahehi saṅgahitā dhammā. Yassāti yassa attano saṅgāhakassa.
ஸகலவாசகேனாதி அனவஸேஸங் க²ந்தா⁴தி³அத்த²ங் வத³ந்தேன. தேன க²ந்தா⁴தி³பதே³னாதி ‘‘தேனேவ ஸங்க³ஹங் க³ச்செ²ய்யா’’தி எத்த² தேன க²ந்தா⁴தி³பதே³னாதி ஏவங் யோஜேதப்³ப³ங். ஏவங் பன அயோஜெத்வா ‘‘யங் அத்தனோ ஸங்கா³ஹகங் ஸங்க³ண்ஹித்வா புன தேனேவ ஸங்க³ஹங் க³ச்செ²ய்ய, தங் அஞ்ஞங் ஸங்க³ஹிதங் நாம நத்தீ²’’தி ஏவங் ந ஸக்கா வத்துங். கஸ்மாதி சே? ந ஹி யேன ஸமுத³யஸச்சாதி³னா யங் ஸங்கா²ரக்க²ந்த⁴பரியாபன்னங் த⁴ம்மஜாதங் க²ந்தா⁴தி³ஸங்க³ஹேஹி ஸங்க³ஹிதங், தேனேவ ஸமுத³யஸச்சாதி³னா தஸ்ஸ தத³வஸிட்ட²ஸ்ஸ ஸங்கா²ரக்க²ந்த⁴த⁴ம்மஸ்ஸ, ந ச தஸ்ஸேவ கேவலஸ்ஸ ஸமுத³யஸச்சாதி³கஸ்ஸ ஸங்க³ஹோ புச்சி²தோ விஸ்ஸஜ்ஜிதோதி யோஜனா, அத² கோ² தேன ஸங்கா²ரக்க²ந்த⁴த⁴ம்மேன ப²ஸ்ஸாதி³னா. ஸங்க³ஹிதஸ்ஸாதி ஸங்க³ஹிததாவிஸிட்ட²ஸ்ஸாதி அத்தோ². தஸ்மா அத்தனோ ஸங்கா³ஹகங் ஸகலக்க²ணாதி³ங் ஸங்க³ண்ஹித்வா புன தேன க²ந்தா⁴தி³பதே³ன யங் ஸங்க³ஹங் க³ச்செ²ய்ய, தங் தாதி³ஸங் நத்தீ²தி அத்தோ² வேதி³தப்³போ³. வேத³னா ஸத்³தோ³ ச க²ந்தோ⁴ ஆயதனஞ்சாதி வேத³னா விஸுங் க²ந்தோ⁴, ஸத்³தோ³ ச விஸுங் ஆயதனந்தி அத்தோ². அஞ்ஞேன க²ந்த⁴ந்தராதி³னா. அஸம்மிஸ்ஸந்தி அப்³யாகதது³க்க²ஸச்சாதி³ விய அமிஸ்ஸிதங். ந ஹி…பே॰… எத்தா²தி ஸங்க³ஹிததாவிஸிட்டே²ன த⁴ம்மேன யோ த⁴ம்மோ ஸங்க³ஹிதோ, தஸ்ஸ ஸங்க³ஹிததாவிஸிட்டோ²யேவ யோ ஸங்க³ஹோ, ஸோ ந எத்த² வாரே புச்சி²தோ விஸ்ஸஜ்ஜிதோ ச. ஸங்க³ஹோவாதி கேவலோ ஸங்க³ஹோ , ந கத்தாபெக்கோ²தி அத்தோ². ந ஸங்கா³ஹகேனாதி இத³ங் யதா²வுத்தேன அத்தே²ன நிவத்திதஸ்ஸ த³ஸ்ஸனங். ந ஹீதிஆதி³ தங்ஸமத்த²னங்.
Sakalavācakenāti anavasesaṃ khandhādiatthaṃ vadantena. Tena khandhādipadenāti ‘‘teneva saṅgahaṃ gaccheyyā’’ti ettha tena khandhādipadenāti evaṃ yojetabbaṃ. Evaṃ pana ayojetvā ‘‘yaṃ attano saṅgāhakaṃ saṅgaṇhitvā puna teneva saṅgahaṃ gaccheyya, taṃ aññaṃ saṅgahitaṃ nāma natthī’’ti evaṃ na sakkā vattuṃ. Kasmāti ce? Na hi yena samudayasaccādinā yaṃ saṅkhārakkhandhapariyāpannaṃ dhammajātaṃ khandhādisaṅgahehi saṅgahitaṃ, teneva samudayasaccādinā tassa tadavasiṭṭhassa saṅkhārakkhandhadhammassa, na ca tasseva kevalassa samudayasaccādikassa saṅgaho pucchito vissajjitoti yojanā, atha kho tena saṅkhārakkhandhadhammena phassādinā. Saṅgahitassāti saṅgahitatāvisiṭṭhassāti attho. Tasmā attano saṅgāhakaṃ sakalakkhaṇādiṃ saṅgaṇhitvā puna tena khandhādipadena yaṃ saṅgahaṃ gaccheyya, taṃ tādisaṃ natthīti attho veditabbo. Vedanā saddo ca khandho āyatanañcāti vedanā visuṃ khandho, saddo ca visuṃ āyatananti attho. Aññena khandhantarādinā. Asammissanti abyākatadukkhasaccādi viya amissitaṃ. Na hi…pe… etthāti saṅgahitatāvisiṭṭhena dhammena yo dhammo saṅgahito, tassa saṅgahitatāvisiṭṭhoyeva yo saṅgaho, so na ettha vāre pucchito vissajjito ca. Saṅgahovāti kevalo saṅgaho , na kattāpekkhoti attho. Na saṅgāhakenāti idaṃ yathāvuttena atthena nivattitassa dassanaṃ. Na hītiādi taṃsamatthanaṃ.
சதுத்த²னயஸங்க³ஹிதேனஸங்க³ஹிதபத³வண்ணனா நிட்டி²தா.
Catutthanayasaṅgahitenasaṅgahitapadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / தா⁴துகதா²பாளி • Dhātukathāpāḷi / 4. ஸங்க³ஹிதேனஸங்க³ஹிதபத³னித்³தே³ஸோ • 4. Saṅgahitenasaṅgahitapadaniddeso
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 4. சதுத்த²னயோ ஸங்க³ஹிதேனஸங்க³ஹிதபத³வண்ணனா • 4. Catutthanayo saṅgahitenasaṅgahitapadavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 4. சதுத்த²னயோ ஸங்க³ஹிதேனஸங்க³ஹிதபத³வண்ணனா • 4. Catutthanayo saṅgahitenasaṅgahitapadavaṇṇanā
