| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৪. চতুত্থনযো সঙ্গহিতেনসঙ্গহিতপদৰণ্ণনা
4. Catutthanayo saṅgahitenasaṅgahitapadavaṇṇanā
১৯১. ইদানি সঙ্গহিতেনসঙ্গহিতপদং ভাজেতুং সমুদযসচ্চেনাতিআদি আরদ্ধং। তত্থ যং খন্ধাদীহি সঙ্গহিতেন খন্ধাদিৰসেন সঙ্গহিতং, পুন তস্সেৰ খন্ধাদীহি সঙ্গহং পুচ্ছিত্ৰা ৰিস্সজ্জনং কতং। তং খন্ধাযতনধাতূসু একম্পি সকলকোট্ঠাসং গহেত্ৰা ঠিতপদেসু ন যুজ্জতি। সকলেন হি খন্ধাদিপদেন অঞ্ঞং খন্ধাদিৰসেন সঙ্গহিতং নাম নত্থি, যং অত্তনো সঙ্গাহকং সঙ্গণ্হিত্ৰা পুন তেনেৰ সঙ্গহং গচ্ছেয্য। তস্মা তথারূপানি পদানি ইমস্মিং ৰারে ন গহিতানি। যানি পন পদানি সঙ্খারেকদেসং ৰা অঞ্ঞেন অসম্মিস্সং দীপেন্তি – ৰেদনেকদেসং ৰা সুখুমরূপং ৰা সদ্দেকদেসং ৰা, তানি ইধ গহিতানি। তেসং ইদমুদ্দানং –
191. Idāni saṅgahitenasaṅgahitapadaṃ bhājetuṃ samudayasaccenātiādi āraddhaṃ. Tattha yaṃ khandhādīhi saṅgahitena khandhādivasena saṅgahitaṃ, puna tasseva khandhādīhi saṅgahaṃ pucchitvā vissajjanaṃ kataṃ. Taṃ khandhāyatanadhātūsu ekampi sakalakoṭṭhāsaṃ gahetvā ṭhitapadesu na yujjati. Sakalena hi khandhādipadena aññaṃ khandhādivasena saṅgahitaṃ nāma natthi, yaṃ attano saṅgāhakaṃ saṅgaṇhitvā puna teneva saṅgahaṃ gaccheyya. Tasmā tathārūpāni padāni imasmiṃ vāre na gahitāni. Yāni pana padāni saṅkhārekadesaṃ vā aññena asammissaṃ dīpenti – vedanekadesaṃ vā sukhumarūpaṃ vā saddekadesaṃ vā, tāni idha gahitāni. Tesaṃ idamuddānaṃ –
‘‘দ্ৰে সচ্চা পন্নরসিন্দ্রিযা, একাদস পটিচ্চপদা।
‘‘Dve saccā pannarasindriyā, ekādasa paṭiccapadā;
উদ্ধং পুন একাদস, গোচ্ছকপদমেত্থ তিংসৰিধ’’ন্তি॥
Uddhaṃ puna ekādasa, gocchakapadamettha tiṃsavidha’’nti.
পঞ্হা পনেত্থ দ্ৰেযেৰ হোন্তি। তত্থ যং পুচ্ছায উদ্ধটং পদং, তদেৰ যেহি ধম্মেহি খন্ধাদিৰসেন সঙ্গহিতং, তে ধম্মে সন্ধায সব্বত্থ একেন খন্ধেনাতিআদি ৰুত্তং। তত্রাযং নযো – সমুদযসচ্চেন হি তণ্হাৰজ্জা সেসা সঙ্খারা খন্ধাদিসঙ্গহেন সঙ্গহিতা। পুন তেহি তণ্হাৰ সঙ্গহিতা। সা তণ্হা পুন সঙ্খারেহেৰ খন্ধাদিসঙ্গহেন সঙ্গহিতাতি। এসেৰ নযো সব্বত্থ। অরূপধম্মপুচ্ছাসু পনেত্থ সঙ্খারক্খন্ধো ৰা ৰেদনাক্খন্ধো ৰা একো খন্ধো নাম। রূপধম্মপুচ্ছাসু রূপক্খন্ধো। পরিদেৰপুচ্ছায সদ্দাযতনং একং আযতনং নাম। সদ্দধাতু একা ধাতু নাম, সেসট্ঠানেসু ধম্মাযতনধম্মধাতুৰসেনেৰ অত্থো ৰেদিতব্বোতি।
Pañhā panettha dveyeva honti. Tattha yaṃ pucchāya uddhaṭaṃ padaṃ, tadeva yehi dhammehi khandhādivasena saṅgahitaṃ, te dhamme sandhāya sabbattha ekena khandhenātiādi vuttaṃ. Tatrāyaṃ nayo – samudayasaccena hi taṇhāvajjā sesā saṅkhārā khandhādisaṅgahena saṅgahitā. Puna tehi taṇhāva saṅgahitā. Sā taṇhā puna saṅkhāreheva khandhādisaṅgahena saṅgahitāti. Eseva nayo sabbattha. Arūpadhammapucchāsu panettha saṅkhārakkhandho vā vedanākkhandho vā eko khandho nāma. Rūpadhammapucchāsu rūpakkhandho. Paridevapucchāya saddāyatanaṃ ekaṃ āyatanaṃ nāma. Saddadhātu ekā dhātu nāma, sesaṭṭhānesu dhammāyatanadhammadhātuvaseneva attho veditabboti.
সঙ্গহিতেনসঙ্গহিতপদৰণ্ণনা।
Saṅgahitenasaṅgahitapadavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ধাতুকথাপাল়ি • Dhātukathāpāḷi / ৪. সঙ্গহিতেনসঙ্গহিতপদনিদ্দেসো • 4. Saṅgahitenasaṅgahitapadaniddeso
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৪. চতুত্থনযো সঙ্গহিতেনসঙ্গহিতপদৰণ্ণনা • 4. Catutthanayo saṅgahitenasaṅgahitapadavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৪. চতুত্থনযো সঙ্গহিতেনসঙ্গহিতপদৰণ্ণনা • 4. Catutthanayo saṅgahitenasaṅgahitapadavaṇṇanā
