| Library / Tipiṭaka / তিপিটক • Tipiṭaka / উদান-অট্ঠকথা • Udāna-aṭṭhakathā |
৪. চতুত্থনিব্বানপটিসংযুত্তসুত্তৰণ্ণনা
4. Catutthanibbānapaṭisaṃyuttasuttavaṇṇanā
৭৪. চতুত্থে অথ খো ভগৰা এতমত্থং ৰিদিত্ৰাতি তদা কির ভগৰতা অনেকপরিযাযেন সন্দস্সনাদিৰসেন নিব্বানপটিসংযুত্তায ধম্মদেসনায কতায তেসং ভিক্খূনং এতদহোসি – ‘‘অযং তাৰ ভগৰতা অমতমহানিব্বানধাতুযা অনেকাকারৰোকারং আনিসংসং দস্সেন্তেন অনঞ্ঞসাধারণো আনুভাৰো পকাসিতো, অধিগমূপাযো পনস্সা ন ভাসিতো, কথং নু খো পটিপজ্জন্তেহি অম্হেহি অযং অধিগন্তব্বা’’তি। অথ ভগৰা তেসং ভিক্খূনং এতং যথাৰুত্তপরিৰিতক্কসঙ্খাতং অত্থং সব্বাকারতো ৰিদিত্ৰা। ইমং উদানন্তি তণ্হাৰসেন কত্থচি অনিস্সিতস্স পস্সদ্ধকাযচিত্তস্স ৰীথিপটিপন্নৰিপস্সনস্স অরিযমগ্গেন অনৰসেসতো তণ্হাপহানেন নিব্বানাধিগমৰিভাৰনং ইমং উদানং উদানেসি।
74. Catutthe atha kho bhagavā etamatthaṃ viditvāti tadā kira bhagavatā anekapariyāyena sandassanādivasena nibbānapaṭisaṃyuttāya dhammadesanāya katāya tesaṃ bhikkhūnaṃ etadahosi – ‘‘ayaṃ tāva bhagavatā amatamahānibbānadhātuyā anekākāravokāraṃ ānisaṃsaṃ dassentena anaññasādhāraṇo ānubhāvo pakāsito, adhigamūpāyo panassā na bhāsito, kathaṃ nu kho paṭipajjantehi amhehi ayaṃ adhigantabbā’’ti. Atha bhagavā tesaṃ bhikkhūnaṃ etaṃ yathāvuttaparivitakkasaṅkhātaṃ atthaṃ sabbākārato viditvā. Imaṃ udānanti taṇhāvasena katthaci anissitassa passaddhakāyacittassa vīthipaṭipannavipassanassa ariyamaggena anavasesato taṇhāpahānena nibbānādhigamavibhāvanaṃ imaṃ udānaṃ udānesi.
তত্থ নিস্সিতস্স চলিতন্তি রূপাদিসঙ্খারে তণ্হাদিট্ঠীহি নিস্সিতস্স চলিতং ‘‘এতং মম, এসো মে অত্তা’’তি তণ্হাদিট্ঠিৰিপ্ফন্দিতং হোতি। অপ্পহীনতণ্হাদিট্ঠিকস্স হি পুগ্গলস্স সুখাদীসু উপ্পন্নেসু তানি অভিভুয্য ৰিহরিতুং অসক্কোন্তস্স ‘‘মম ৰেদনা, অহং ৰেদিযামী’’তিআদিনা তণ্হাদিট্ঠিগাহৰসেন কুসলপ্পৰত্তিতো চিত্তসন্তানস্স চলনং কম্পনং, অৰক্খলিতং ৰা হোতীতি অত্থো। অনিস্সিতস্স চলিতং নত্থীতি যো পন ৰিসুদ্ধিপটিপদং পটিপজ্জন্তো সমথৰিপস্সনাহি তণ্হাদিট্ঠিযো ৰিক্খম্ভেত্ৰা অনিচ্চাদিৰসেন সঙ্খারে সম্মসন্তো ৰিহরতি, তস্স তং অনিস্সিতস্স যথাৰুত্তং চলিতং অৰক্খলিতং, ৰিপ্ফন্দিতং ৰা নত্থি কারণস্স সুৰিক্খম্ভিতত্তা।
Tattha nissitassa calitanti rūpādisaṅkhāre taṇhādiṭṭhīhi nissitassa calitaṃ ‘‘etaṃ mama, eso me attā’’ti taṇhādiṭṭhivipphanditaṃ hoti. Appahīnataṇhādiṭṭhikassa hi puggalassa sukhādīsu uppannesu tāni abhibhuyya viharituṃ asakkontassa ‘‘mama vedanā, ahaṃ vediyāmī’’tiādinā taṇhādiṭṭhigāhavasena kusalappavattito cittasantānassa calanaṃ kampanaṃ, avakkhalitaṃ vā hotīti attho. Anissitassa calitaṃ natthīti yo pana visuddhipaṭipadaṃ paṭipajjanto samathavipassanāhi taṇhādiṭṭhiyo vikkhambhetvā aniccādivasena saṅkhāre sammasanto viharati, tassa taṃ anissitassa yathāvuttaṃ calitaṃ avakkhalitaṃ, vipphanditaṃ vā natthi kāraṇassa suvikkhambhitattā.
চলিতে অসতীতি যথাৰুত্তে চলিতে অসতি যথা তণ্হাদিট্ঠিগাহা নপ্পৰত্তন্তি, তথা ৰীথিপটিপন্নায ৰিপস্সনায তং উস্সুক্কন্তস্স। পস্সদ্ধীতি ৰিপস্সনাচিত্তসহজাতানং কাযচিত্তানং সারম্ভকরকিলেসৰূপসমিনী দুৰিধাপি পস্সদ্ধি হোতি। পস্সদ্ধিযা সতি নতি ন হোতীতি পুব্বেনাপরং ৰিসেসযুত্তায পস্সদ্ধিযা সতি অনৰজ্জসুখাধিট্ঠানং সমাধিং ৰড্ঢেত্ৰা তং পঞ্ঞায সমৰাযকরণেন সমথৰিপস্সনং যুগনদ্ধং যোজেত্ৰা মগ্গপরম্পরায কিলেসে খেপেন্তস্স কামভৰাদীসু নমনতো ‘‘নতী’’তি লদ্ধনামা তণ্হা অরহত্তমগ্গক্খণে অনৰসেসতো ন হোতি, অনুপ্পত্তিধম্মতং আপাদিতত্তা ন উপ্পজ্জতীতি অত্থো।
Calite asatīti yathāvutte calite asati yathā taṇhādiṭṭhigāhā nappavattanti, tathā vīthipaṭipannāya vipassanāya taṃ ussukkantassa. Passaddhīti vipassanācittasahajātānaṃ kāyacittānaṃ sārambhakarakilesavūpasaminī duvidhāpi passaddhi hoti. Passaddhiyā sati nati na hotīti pubbenāparaṃ visesayuttāya passaddhiyā sati anavajjasukhādhiṭṭhānaṃ samādhiṃ vaḍḍhetvā taṃ paññāya samavāyakaraṇena samathavipassanaṃ yuganaddhaṃ yojetvā maggaparamparāya kilese khepentassa kāmabhavādīsu namanato ‘‘natī’’ti laddhanāmā taṇhā arahattamaggakkhaṇe anavasesato na hoti, anuppattidhammataṃ āpāditattā na uppajjatīti attho.
নতিযা অসতীতি অরহত্তমগ্গেন তণ্হায সুপ্পহীনত্তা ভৰাদিঅত্থায আলযনিকন্তি পরিযুট্ঠানে অসতি। আগতিগতি ন হোতীতি পটিসন্ধিৰসেন ইধ আগতি আগমনং চুতিৰসেন গতি ইতো পরলোকগমনং পেচ্চভাৰো ন হোতি ন পৰত্ততি। আগতিগতিযা অসতীতি ৰুত্তনযেন আগতিযা চ গতিযা চ অসতি। চুতূপপাতো ন হোতীতি অপরাপরং চৰনুপপজ্জনং ন হোতি ন পৰত্ততি। অসতি হি কিলেসৰট্টে কম্মৰট্টং পচ্ছিন্নমেৰ, পচ্ছিন্নে চ তস্মিং কুতো ৰিপাকৰট্টস্স সম্ভৰো। তেনাহ – ‘‘চুতূপপাতে অসতি নেৰিধ ন হুর’’ন্তিআদি। তত্থ যং ৰত্তব্বং, তং হেট্ঠা বাহিযসুত্তে ৰিত্থারতো ৰুত্তমেৰ। তস্মা তত্থ ৰুত্তনযেনেৰ অত্থো ৰেদিতব্বো।
Natiyā asatīti arahattamaggena taṇhāya suppahīnattā bhavādiatthāya ālayanikanti pariyuṭṭhāne asati. Āgatigati na hotīti paṭisandhivasena idha āgati āgamanaṃ cutivasena gati ito paralokagamanaṃ peccabhāvo na hoti na pavattati. Āgatigatiyā asatīti vuttanayena āgatiyā ca gatiyā ca asati. Cutūpapāto na hotīti aparāparaṃ cavanupapajjanaṃ na hoti na pavattati. Asati hi kilesavaṭṭe kammavaṭṭaṃ pacchinnameva, pacchinne ca tasmiṃ kuto vipākavaṭṭassa sambhavo. Tenāha – ‘‘cutūpapāte asati nevidha na hura’’ntiādi. Tattha yaṃ vattabbaṃ, taṃ heṭṭhā bāhiyasutte vitthārato vuttameva. Tasmā tattha vuttanayeneva attho veditabbo.
ইতি ভগৰা ইধাপি তেসং ভিক্খূনং অনৰসেসতো ৰট্টদুক্খৰূপসমহেতুভূতং অমতমহানিব্বানস্স আনুভাৰং সম্মাপটিপত্তিযা পকাসেতি।
Iti bhagavā idhāpi tesaṃ bhikkhūnaṃ anavasesato vaṭṭadukkhavūpasamahetubhūtaṃ amatamahānibbānassa ānubhāvaṃ sammāpaṭipattiyā pakāseti.
চতুত্থসুত্তৰণ্ণনা নিট্ঠিতা।
Catutthasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / উদানপাল়ি • Udānapāḷi / ৪. চতুত্থনিব্বানপটিসংযুত্তসুত্তং • 4. Catutthanibbānapaṭisaṃyuttasuttaṃ
