| Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya |
๑๐. จตุตฺถปาปธมฺมสุตฺตํ
10. Catutthapāpadhammasuttaṃ
๒๑๐. ‘‘ปาปธมฺมญฺจ โว, ภิกฺขเว, เทเสสฺสามิ, ปาปธเมฺมน ปาปธมฺมตรญฺจ; กลฺยาณธมฺมญฺจ, กลฺยาณธเมฺมน กลฺยาณธมฺมตรญฺจฯ ตํ สุณาถ…เป.…ฯ
210. ‘‘Pāpadhammañca vo, bhikkhave, desessāmi, pāpadhammena pāpadhammatarañca; kalyāṇadhammañca, kalyāṇadhammena kalyāṇadhammatarañca. Taṃ suṇātha…pe….
‘‘กตโม จ, ภิกฺขเว, ปาปธโมฺม? อิธ, ภิกฺขเว, เอกโจฺจ มิจฺฉาทิฎฺฐิโก โหติ…เป.… มิจฺฉาญาณี โหติ, มิจฺฉาวิมุตฺติ โหติฯ อยํ วุจฺจติ, ภิกฺขเว, ปาปธโมฺมฯ
‘‘Katamo ca, bhikkhave, pāpadhammo? Idha, bhikkhave, ekacco micchādiṭṭhiko hoti…pe… micchāñāṇī hoti, micchāvimutti hoti. Ayaṃ vuccati, bhikkhave, pāpadhammo.
‘‘กตโม จ, ภิกฺขเว, ปาปธเมฺมน ปาปธมฺมตโร? อิธ, ภิกฺขเว, เอกโจฺจ อตฺตนา จ มิจฺฉาทิฎฺฐิโก โหติ, ปรญฺจ มิจฺฉาทิฎฺฐิยา สมาทเปติ…เป.… อตฺตนา จ มิจฺฉาญาณี โหติ, ปรญฺจ มิจฺฉาญาเณ สมาทเปติ; อตฺตนา จ มิจฺฉาวิมุตฺติ โหติ, ปรญฺจ มิจฺฉาวิมุตฺติยา สมาทเปติฯ อยํ วุจฺจติ, ภิกฺขเว, ปาปธเมฺมน ปาปธมฺมตโรฯ
‘‘Katamo ca, bhikkhave, pāpadhammena pāpadhammataro? Idha, bhikkhave, ekacco attanā ca micchādiṭṭhiko hoti, parañca micchādiṭṭhiyā samādapeti…pe… attanā ca micchāñāṇī hoti, parañca micchāñāṇe samādapeti; attanā ca micchāvimutti hoti, parañca micchāvimuttiyā samādapeti. Ayaṃ vuccati, bhikkhave, pāpadhammena pāpadhammataro.
‘‘กตโม จ, ภิกฺขเว, กลฺยาณธโมฺม? อิธ, ภิกฺขเว, เอกโจฺจ สมฺมาทิฎฺฐิโก โหติ…เป.… สมฺมาญาณี โหติ, สมฺมาวิมุตฺติ โหติฯ อยํ วุจฺจติ, ภิกฺขเว, กลฺยาณธโมฺมฯ
‘‘Katamo ca, bhikkhave, kalyāṇadhammo? Idha, bhikkhave, ekacco sammādiṭṭhiko hoti…pe… sammāñāṇī hoti, sammāvimutti hoti. Ayaṃ vuccati, bhikkhave, kalyāṇadhammo.
‘‘กตโม จ, ภิกฺขเว, กลฺยาณธเมฺมน กลฺยาณธมฺมตโร? อิธ, ภิกฺขเว, เอกโจฺจ อตฺตนา จ สมฺมาทิฎฺฐิโก โหติ, ปรญฺจ สมฺมาทิฎฺฐิยา สมาทเปติ…เป.… อตฺตนา จ สมฺมาญาณี โหติ, ปรญฺจ สมฺมาญาเณ สมาทเปติ; อตฺตนา จ สมฺมาวิมุตฺติ โหติ, ปรญฺจ สมฺมาวิมุตฺติยา สมาทเปติฯ อยํ วุจฺจติ, ภิกฺขเว, กลฺยาณธเมฺมน กลฺยาณธมฺมตโร’’ติฯ ทสมํฯ
‘‘Katamo ca, bhikkhave, kalyāṇadhammena kalyāṇadhammataro? Idha, bhikkhave, ekacco attanā ca sammādiṭṭhiko hoti, parañca sammādiṭṭhiyā samādapeti…pe… attanā ca sammāñāṇī hoti, parañca sammāñāṇe samādapeti; attanā ca sammāvimutti hoti, parañca sammāvimuttiyā samādapeti. Ayaṃ vuccati, bhikkhave, kalyāṇadhammena kalyāṇadhammataro’’ti. Dasamaṃ.
สปฺปุริสวโคฺค ปฐโมฯ
Sappurisavaggo paṭhamo.
ตสฺสุทฺทานํ –
Tassuddānaṃ –
สิกฺขาปทญฺจ อสฺสทฺธํ, สตฺตกมฺมํ อโถ จ ทสกมฺมํ;
Sikkhāpadañca assaddhaṃ, sattakammaṃ atho ca dasakammaṃ;
อฎฺฐงฺคิกญฺจ ทสมคฺคํ, เทฺว ปาปธมฺมา อปเร เทฺวติฯ
Aṭṭhaṅgikañca dasamaggaṃ, dve pāpadhammā apare dveti.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๗-๑๐. ปาปธมฺมสุตฺตจตุกฺกวณฺณนา • 7-10. Pāpadhammasuttacatukkavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๑-๑๐. สิกฺขาปทสุตฺตาทิวณฺณนา • 1-10. Sikkhāpadasuttādivaṇṇanā
