| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
சதுத்த²பாராஜிககதா²வண்ணனா
Catutthapārājikakathāvaṇṇanā
306-7. ஏவங் நாதிஸங்கே²பவித்தா²ரனயேன ததியபாராஜிகவினிச்ச²யங் த³ஸ்ஸெத்வா இதா³னி சதுத்த²பாராஜிகவினிச்ச²யங் த³ஸ்ஸேதுமாஹ ‘‘அஸந்த’’ந்திஆதி³. தத்த² ‘‘அஸந்த’’ந்தி அபெக்கி²த்வா ‘‘அத்தனீ’’தி ச ‘‘ஜா²னாதி³பே⁴த³’’ந்தி அபெக்கி²த்வா ‘‘உத்தரிமனுஸ்ஸத⁴ம்ம’’ந்தி ச ‘‘ஸமுதா³சரெய்யா’’தி அபெக்கி²த்வா ‘‘யோ பி⁴க்கூ²’’தி ச ஸாமத்தி²யா லப்³ப⁴தீதி அஜ்ஜா²ஹரித்வா ‘‘அத்தனி அஸந்த’’ந்திஆதி³னா நயேன யோஜேதப்³ப³ங்.
306-7. Evaṃ nātisaṅkhepavitthāranayena tatiyapārājikavinicchayaṃ dassetvā idāni catutthapārājikavinicchayaṃ dassetumāha ‘‘asanta’’ntiādi. Tattha ‘‘asanta’’nti apekkhitvā ‘‘attanī’’ti ca ‘‘jhānādibheda’’nti apekkhitvā ‘‘uttarimanussadhamma’’nti ca ‘‘samudācareyyā’’ti apekkhitvā ‘‘yo bhikkhū’’ti ca sāmatthiyā labbhatīti ajjhāharitvā ‘‘attani asanta’’ntiādinā nayena yojetabbaṃ.
அத்தனி அஸந்தந்தி தஸ்மிங் அத்தபா⁴வே அத்தனோ ஸந்தானே அனுப்பாதி³ததாய அவிஜ்ஜமானங். அத்தஸ்ஸிதமேவ கத்வாதி அத்துபனாயிகங் கத்வா அத்தனி விஜ்ஜமானங் விய கத்வா தங் உபனெத்வா . ப⁴வங் அதி⁴ட்டா²ய ச வத்தமானந்தி படிஸந்தி⁴தோ பட்டா²ய ச வத்தந்தங் ப⁴வங் சித்தேன அதி⁴ட்ட²ஹித்வா தக்கெத்வா, சித்தே ட²பெத்வாதி வுத்தங் ஹோதி. அஞ்ஞாபதே³ஸஞ்ச வினாதி ‘‘யோ தே விஹாரே வஸதீத⁴ பி⁴க்கூ²’’திஆதி³னா நயேன வக்க²மானங் பரியாயகத²ங் ட²பெத்வா. அதி⁴மானஞ்ச வினாதி அதி³ட்டே² தி³ட்ட²ஸஞ்ஞிதாதி³ஸபா⁴வங் அதி⁴க³தமானஸங்கா²தங் ‘‘அதி⁴க³தஉத்தரிமனுஸ்ஸத⁴ம்மோ அஹம்ஹீ’’தி அதி⁴மானஞ்ச ட²பெத்வா. ஜா²னாதி³பே⁴த³ந்தி ஜா²னாத³யோ பே⁴தா³ விஸேஸா யஸ்ஸ தங் ஜா²னாதி³பே⁴த³ங், ‘‘உத்தரிமனுஸ்ஸத⁴ம்மோ நாம ஜா²னங் விமொக்கோ² ஸமாதி⁴ ஸமாபத்தி ஞாணத³ஸ்ஸனங் மக்³க³பா⁴வனா ப²லஸச்சி² கிரியா கிலேஸப்பஹானங் வினீவரணதா சித்தஸ்ஸ ஸுஞ்ஞாகா³ரே அபி⁴ரதீ’’தி (பாரா॰ 198, 199) பத³பா⁴ஜனே வுத்தங் ஜா²னாதி³த⁴ம்மவிஸேஸந்தி அத்தோ². ‘‘உத்தரிமனுஸ்ஸத⁴ம்மந்தி உத்தரிமனுஸ்ஸானங் ஜா²யீனஞ்சேவ அரியானஞ்ச த⁴ம்ம’’ந்தி (பாரா॰ அட்ட²॰ 2.197) அட்ட²கதா²ய வுத்தங் ஜா²னலாபீ⁴ஹி சேவ அட்ட²ஹி அரியபுக்³க³லேஹி ச அதி⁴க³தத்தா தேஸங் ஸந்தகந்தி ஸங்க்²யங் க³தங் உத்தரிமனுஸ்ஸத⁴ம்மங்.
Attaniasantanti tasmiṃ attabhāve attano santāne anuppāditatāya avijjamānaṃ. Attassitameva katvāti attupanāyikaṃ katvā attani vijjamānaṃ viya katvā taṃ upanetvā . Bhavaṃ adhiṭṭhāya ca vattamānanti paṭisandhito paṭṭhāya ca vattantaṃ bhavaṃ cittena adhiṭṭhahitvā takketvā, citte ṭhapetvāti vuttaṃ hoti. Aññāpadesañca vināti ‘‘yo te vihāre vasatīdha bhikkhū’’tiādinā nayena vakkhamānaṃ pariyāyakathaṃ ṭhapetvā. Adhimānañca vināti adiṭṭhe diṭṭhasaññitādisabhāvaṃ adhigatamānasaṅkhātaṃ ‘‘adhigatauttarimanussadhammo ahamhī’’ti adhimānañca ṭhapetvā. Jhānādibhedanti jhānādayo bhedā visesā yassa taṃ jhānādibhedaṃ, ‘‘uttarimanussadhammo nāma jhānaṃ vimokkho samādhi samāpatti ñāṇadassanaṃ maggabhāvanā phalasacchi kiriyā kilesappahānaṃ vinīvaraṇatā cittassa suññāgāre abhiratī’’ti (pārā. 198, 199) padabhājane vuttaṃ jhānādidhammavisesanti attho. ‘‘Uttarimanussadhammanti uttarimanussānaṃ jhāyīnañceva ariyānañca dhamma’’nti (pārā. aṭṭha. 2.197) aṭṭhakathāya vuttaṃ jhānalābhīhi ceva aṭṭhahi ariyapuggalehi ca adhigatattā tesaṃ santakanti saṅkhyaṃ gataṃ uttarimanussadhammaṃ.
விஞ்ஞத்திபதே² டி²தஸ்ஸ காயேன வா வாசாய வா யோ பி⁴க்கு² ஸமுதா³சரெய்யாதி அஜ்ஜா²ஹரித்வா யோஜேதப்³ப³ங். விஞ்ஞத்திபதே² டி²தஸ்ஸாதி த்³வாத³ஸஹத்த²ப்³ப⁴ந்தரே பதே³ஸே டி²தஸ்ஸ ‘‘இத்தி²யா வா புரிஸஸ்ஸ வா க³ஹட்ட²ஸ்ஸ வா பப்³ப³ஜிதஸ்ஸ வா’’தி (பாரா॰ 198) பத³பா⁴ஜனே வுத்தஸ்ஸ யஸ்ஸ கஸ்ஸசி. காயேன வாதி ஹத்த²முத்³தா³தி³வஸேன காயேன வா. ‘‘ஸிக்கா²பச்சக்கா²னங் ஹத்த²முத்³தா³ய ஸீஸங் ந ஓதரதி, இத³ங் அபூ⁴தாரோசனங் ஹத்த²முத்³தா³யபி ஓதரதீ’’தி (பாரா॰ அட்ட²॰ 2.215) அட்ட²கதா²யங் வுத்தத்தா இத⁴ ஹத்த²முத்³தா³தி³ஹத்த²விகாரோ ச அங்க³பச்சங்க³சோபனஞ்ச ‘‘காயேனா’’தி இமினா க³ஹேதப்³ப³ங். வாசாய வாதி யோ ஸவனூபசாரே டி²தோ தேன விஞ்ஞாதுங் ஸக்குணெய்யேன யேன கேனசி வோஹாரேன வா. யோ பி⁴க்கூ²தி யோ உபஸம்பன்னோ தே²ரோ வா நவோ வா மஜ்ஜி²மோ வா. ஸமுதா³சரெய்யாதி ‘‘பட²மங் ஜா²னங் ஸமாபஜ்ஜாமீ’’திஆதி³வசனப்பகாரேஸு யங் கஞ்சி பகாரங் வதெ³ய்ய. தத³த்தே²தி தேன வுத்தவாக்யஸ்ஸ அத்தே². ஞாதேவாதி ஞாதே ஏவ. மாதுகா³மங் வா புரிஸங் வா யங் கிஞ்சி உத்³தி³ஸ்ஸ வுத்தே, தேனேவ வா அனுத்³தி³ஸ்ஸ வுத்தே ஸவனூபசாரே டி²தேன யேன கேனசி மனுஸ்ஸபூ⁴தேன வசனஸமனந்தரமேவ ‘‘அயங் பட²மஜ்ஜா²னலாபீ⁴’’திஆதி³கே யதா²வுத்தே அத்த²ப்பகாரே ஞாதேயேவ. ‘‘ஸோ’’தி அஜ்ஜா²ஹரித்வா ‘‘ஸோ புன ருள்ஹிபா⁴வே அப⁴ப்³போ³’’தி யோஜேதப்³ப³ங், அத்தனி அவிஜ்ஜமானகு³ணங் ஸந்தங் விய கத்வா இச்சா²சாரே ட²த்வா ஏவங் கதி²தபுக்³க³லோ ஸீலே பதிட்டா²ய உபரூபரி லப்³ப⁴மானலோகியலோகுத்தரகு³ணேஹி பு³த்³தி⁴ஸங்கா²தங் ஸாஸனே பு³த்³தி⁴மதி⁴க³ந்துங் அனரஹோதி அத்தோ² . கிங் வியாதி ஆஹ ‘‘யதே²வ…பே॰… ருளிபா⁴வே’’தி. ‘‘யதா²’’தி ஏதேன ஸம்ப³ந்தோ⁴ ‘‘ததா²’’தி, யதா² தாலோ மத்த²கச்சி²ன்னோ அப⁴ப்³போ³ புன விருள்ஹியா, ஸோபி பாராஜிகங் ஆபன்னோ ததே²வ த³ட்ட²ப்³போ³தி அத்தோ².
Viññattipathe ṭhitassa kāyena vā vācāya vā yo bhikkhu samudācareyyāti ajjhāharitvā yojetabbaṃ. Viññattipathe ṭhitassāti dvādasahatthabbhantare padese ṭhitassa ‘‘itthiyā vā purisassa vā gahaṭṭhassa vā pabbajitassa vā’’ti (pārā. 198) padabhājane vuttassa yassa kassaci. Kāyena vāti hatthamuddādivasena kāyena vā. ‘‘Sikkhāpaccakkhānaṃ hatthamuddāya sīsaṃ na otarati, idaṃ abhūtārocanaṃ hatthamuddāyapi otaratī’’ti (pārā. aṭṭha. 2.215) aṭṭhakathāyaṃ vuttattā idha hatthamuddādihatthavikāro ca aṅgapaccaṅgacopanañca ‘‘kāyenā’’ti iminā gahetabbaṃ. Vācāya vāti yo savanūpacāre ṭhito tena viññātuṃ sakkuṇeyyena yena kenaci vohārena vā. Yo bhikkhūti yo upasampanno thero vā navo vā majjhimo vā. Samudācareyyāti ‘‘paṭhamaṃ jhānaṃ samāpajjāmī’’tiādivacanappakāresu yaṃ kañci pakāraṃ vadeyya. Tadattheti tena vuttavākyassa atthe. Ñātevāti ñāte eva. Mātugāmaṃ vā purisaṃ vā yaṃ kiñci uddissa vutte, teneva vā anuddissa vutte savanūpacāre ṭhitena yena kenaci manussabhūtena vacanasamanantarameva ‘‘ayaṃ paṭhamajjhānalābhī’’tiādike yathāvutte atthappakāre ñāteyeva. ‘‘So’’ti ajjhāharitvā ‘‘so puna ruḷhibhāve abhabbo’’ti yojetabbaṃ, attani avijjamānaguṇaṃ santaṃ viya katvā icchācāre ṭhatvā evaṃ kathitapuggalo sīle patiṭṭhāya uparūpari labbhamānalokiyalokuttaraguṇehi buddhisaṅkhātaṃ sāsane buddhimadhigantuṃ anarahoti attho . Kiṃ viyāti āha ‘‘yatheva…pe… ruḷibhāve’’ti. ‘‘Yathā’’ti etena sambandho ‘‘tathā’’ti, yathā tālo matthakacchinno abhabbo puna viruḷhiyā, sopi pārājikaṃ āpanno tatheva daṭṭhabboti attho.
308-9. இதா³னி ‘‘ஞாதேவ அப⁴ப்³போ³’’தி ச ‘‘அஞ்ஞாபதே³ஸஞ்ச வினா’’தி ச ஏதஸ்மிங் வாக்யத்³வயே ப்³யதிரேகத்த²வஸேன ஸம்ப⁴வந்தங் ஆபத்திபே⁴த³ங் த³ஸ்ஸேதுமாஹ ‘‘அஸந்தமேவா’’திஆதி³.
308-9. Idāni ‘‘ñāteva abhabbo’’ti ca ‘‘aññāpadesañca vinā’’ti ca etasmiṃ vākyadvaye byatirekatthavasena sambhavantaṃ āpattibhedaṃ dassetumāha ‘‘asantamevā’’tiādi.
அனந்தரந்தி ‘‘பட²மங் ஜா²னங் ஸமாபஜ்ஜாமீ’’திஆதி³வசனஸமனந்தரமேவ. ஸோதி த்³வாத³ஸஹத்த²ப்³ப⁴ந்தரே ட²த்வா யேன தங் வசனங் ஸுதங், ஸோ பரோ புக்³க³லோ. ஜானாதி சேதி ‘‘அயங் பட²மஜ்ஜா²னலாபீ⁴’’திஆதி³வஸேன தேன வுத்தவசனப்பகாரேன அத்த²ங் அவிராதெ⁴த்வா அசிரேனேவ ஸசே ஜானாதீதி அத்தோ². யோ பன ஜா²னாதீ³னங் அத்தனா அலத்³த⁴பா⁴வேன வா ஆக³மே உக்³க³ஹபரிபுச்சா²தி³வஸேன அபரிசிதத்தா வா ஜா²னாதி³ஸரூபங் அஜானந்தோபி கேவலங் ‘‘ஜா²னங் விமொக்கோ² ஸமாதி⁴ ஸமாபத்தீ’’திஆதி³வசனானங் ஸுதபுப்³ப³த்தா தேன ‘‘பட²மங் ஜா²னங் ஸமாபஜ்ஜாமீ’’திஆதி³வசனே வுத்தே ‘‘ஜா²னங் கிர ஏஸ ஸமாபஜ்ஜதீ’’தி யதி³ எத்தகமத்த²ம்பி ஜானாதி, ஸோபி ‘‘ஜானாதி’’ச்சேவ அட்ட²கதா²யங் (பாரா॰ அட்ட²॰ 2.215) வுத்தோதி க³ஹேதப்³போ³. சுதோ ஹீதி ஹி-ஸத்³தோ³ அவதா⁴ரணே, அத்தனா வுத்தே தேன தத்தகேயேவ ஞாதே ஸோ அஸந்தகு³ணதீ³பகோ பாபபுக்³க³லோ ப²லஸம்பத்திஸம்பன்னங் இமங் ஸாஸனாமதமஹாபாத³பங் ஆருய்ஹாபி ப²லங் அபரிபு⁴ஞ்ஜித்வா விராதெ⁴த்வா பதித்வா மதோ நாம ஹோதீதி வுத்தங் ஹோதி. இமஸ்ஸேவத்த²ஸ்ஸ ‘‘அஸந்த’’மிச்சாதி³னா பட²மங் வுத்தஸ்ஸபி ப்³யதிரேகத்த²ங் த³ஸ்ஸேதுங் அனுவாத³வஸேன வுத்தத்தா புனருத்திதோ³ஸோ ந ஹோதீதி த³ட்ட²ப்³ப³ங்.
Anantaranti ‘‘paṭhamaṃ jhānaṃ samāpajjāmī’’tiādivacanasamanantarameva. Soti dvādasahatthabbhantare ṭhatvā yena taṃ vacanaṃ sutaṃ, so paro puggalo. Jānāti ceti ‘‘ayaṃ paṭhamajjhānalābhī’’tiādivasena tena vuttavacanappakārena atthaṃ avirādhetvā acireneva sace jānātīti attho. Yo pana jhānādīnaṃ attanā aladdhabhāvena vā āgame uggahaparipucchādivasena aparicitattā vā jhānādisarūpaṃ ajānantopi kevalaṃ ‘‘jhānaṃ vimokkho samādhi samāpattī’’tiādivacanānaṃ sutapubbattā tena ‘‘paṭhamaṃ jhānaṃ samāpajjāmī’’tiādivacane vutte ‘‘jhānaṃ kira esa samāpajjatī’’ti yadi ettakamatthampi jānāti, sopi ‘‘jānāti’’cceva aṭṭhakathāyaṃ (pārā. aṭṭha. 2.215) vuttoti gahetabbo. Cuto hīti hi-saddo avadhāraṇe, attanā vutte tena tattakeyeva ñāte so asantaguṇadīpako pāpapuggalo phalasampattisampannaṃ imaṃ sāsanāmatamahāpādapaṃ āruyhāpi phalaṃ aparibhuñjitvā virādhetvā patitvā mato nāma hotīti vuttaṃ hoti. Imassevatthassa ‘‘asanta’’miccādinā paṭhamaṃ vuttassapi byatirekatthaṃ dassetuṃ anuvādavasena vuttattā punaruttidoso na hotīti daṭṭhabbaṃ.
இதா³னி தங் ப்³யதிரேகத்த²ங் த³ஸ்ஸேதுமாஹ ‘‘நோ சே…பே॰… ஹோதீ’’தி. யஸ்ஸ ஸோ ஆரோசேதி, ஸோ சே ந ஜானாதி, அஸ்ஸ அஸந்தகு³ணதீ³பகஸ்ஸ முஸாவாதி³னோ.
Idāni taṃ byatirekatthaṃ dassetumāha ‘‘no ce…pe… hotī’’ti. Yassa so āroceti, so ce na jānāti, assa asantaguṇadīpakassa musāvādino.
‘‘அஞ்ஞாபதே³ஸஞ்ச வினா’’தி இமினா த³ஸ்ஸிதப்³யதிரேகத்த²ஸ்ஸ பா⁴வாபா⁴வே ஸம்ப⁴வந்தங் ஆபத்திபே⁴த³ங் த³ஸ்ஸேதுமாஹ ‘‘யோ தே’’திஆதி³. யோ பி⁴க்கு² தே தவ இத⁴ இமஸ்மிங் விஹாரே வஸதீதி யோஜனா. தீ³பிதேதி அத்தனோ அதி⁴ப்பாயே பகாஸிதே. ஜானாதி சேதி யோ ததா² வுத்தவசனங் அஸ்ஸோஸி, ஸோ ‘‘ஏஸ அஞ்ஞாபதே³ஸேன அத்தனோ ஜா²னலாபி⁴தங் தீ³பேதீ’’தி வா ‘‘ஏஸோ ஜா²னலாபீ⁴’’தி வா வசனஸமனந்தரமேவ ஸசே ஜானாதி. அஸ்ஸாதி ஏவங் கதி²தவசனவதோ தஸ்ஸ பி⁴க்கு²னோ. தங் தேன வுத்தவசனங். து³க்கடமேவ ஹோதி, ந து²ல்லச்சயந்தி அத்தோ². அத்தனோ ஆவாஸகாரானங் தா³யகானங் அஞ்ஞஸ்ஸ பவத்திங் கதெ²ந்தஸ்ஸ விய அத்தனோயேவ அஸந்தகு³ணங் ஸந்தமிவ கத்வா கத²னாகாரோ இமாய கா³தா²ய அத்த²தோ வுத்தோதி த³ட்ட²ப்³போ³.
‘‘Aññāpadesañca vinā’’ti iminā dassitabyatirekatthassa bhāvābhāve sambhavantaṃ āpattibhedaṃ dassetumāha ‘‘yo te’’tiādi. Yo bhikkhu te tava idha imasmiṃ vihāre vasatīti yojanā. Dīpiteti attano adhippāye pakāsite. Jānāti ceti yo tathā vuttavacanaṃ assosi, so ‘‘esa aññāpadesena attano jhānalābhitaṃ dīpetī’’ti vā ‘‘eso jhānalābhī’’ti vā vacanasamanantarameva sace jānāti. Assāti evaṃ kathitavacanavato tassa bhikkhuno. Taṃ tena vuttavacanaṃ. Dukkaṭameva hoti, na thullaccayanti attho. Attano āvāsakārānaṃ dāyakānaṃ aññassa pavattiṃ kathentassa viya attanoyeva asantaguṇaṃ santamiva katvā kathanākāro imāya gāthāya atthato vuttoti daṭṭhabbo.
எத்த² ச ஜா²னலாபீ⁴தி சாதி அவுத்தஸமுச்சயத்தே²ன ச-ஸத்³தே³ன பாளியங் (பாரா॰ 220) ஆக³தா அவஸேஸபரியாயவாரா ச ஸங்க³ஹிதாதி த³ட்ட²ப்³ப³ங். ததா² ஜா²னலாபீ⁴தி எத்த² ஜா²னக்³க³ஹணேன விமொக்கா²தீ³னஞ்ச உபலக்கி²தத்தா ஜா²னாதி³த³ஸவித⁴உத்தரிமனுஸ்ஸத⁴ம்மவிஸயபரியாயகத²ங் ஸுதவதா தங்க²ணே தத³த்தே² ஞாதே பரியாயஸமுல்லாபகேன ஆபஜ்ஜிதப்³ப³ங் து²ல்லச்சயஞ்ச அவிஞ்ஞாதே வா சிரேன விஞ்ஞாதே வா ஆபஜ்ஜிதப்³ப³ங் து³க்கடஞ்ச இமாய கா³தா²ய அத்த²தோ த³ஸ்ஸிதமேவாதி த³ட்ட²ப்³ப³ங்.
Ettha ca jhānalābhīti cāti avuttasamuccayatthena ca-saddena pāḷiyaṃ (pārā. 220) āgatā avasesapariyāyavārā ca saṅgahitāti daṭṭhabbaṃ. Tathā jhānalābhīti ettha jhānaggahaṇena vimokkhādīnañca upalakkhitattā jhānādidasavidhauttarimanussadhammavisayapariyāyakathaṃ sutavatā taṅkhaṇe tadatthe ñāte pariyāyasamullāpakena āpajjitabbaṃ thullaccayañca aviññāte vā cirena viññāte vā āpajjitabbaṃ dukkaṭañca imāya gāthāya atthato dassitamevāti daṭṭhabbaṃ.
310. ஏதந்தி யதா²வுத்தப்பகாரங் ஜா²னாதி³பே⁴த³ங் உத்தரிமனுஸ்ஸத⁴ம்மங். அதி⁴மானாதி ‘‘அதி⁴க³தோஹ’’ந்தி ஏவங் உப்பன்னமானா, அதி⁴கமானாதி அத்தோ², ‘‘அயங் த⁴ம்மோ மயா அதி⁴க³தோ’’தி த³ள்ஹமுப்பன்னேன மானேன கதெ²ந்தஸ்ஸாதி வுத்தங் ஹோதி. வுத்தோ அனாபத்தினயோதி ஆபத்தியா அபா⁴வோ அனாபத்தி, ஸா ஏவ நயோ நேதப்³போ³ பு³ஜ்ஜி²தப்³போ³தி கத்வா, அனாபத்தீதி வுத்தங் ஹோதி. ‘‘அதி⁴மானேனா’’தி ஏவங் வுத்தோ ப⁴க³வதாதி அத்தோ², ‘‘அதி⁴க³தத⁴ம்மோஹ’’ந்தி அதி⁴மானேன ‘‘அஹங் பட²மஜ்ஜா²னலாபீ⁴’’திஆதீ³னி வத³ந்தஸ்ஸ அனாபத்தீதி வுத்தங் ஹோதி.
310.Etanti yathāvuttappakāraṃ jhānādibhedaṃ uttarimanussadhammaṃ. Adhimānāti ‘‘adhigatoha’’nti evaṃ uppannamānā, adhikamānāti attho, ‘‘ayaṃ dhammo mayā adhigato’’ti daḷhamuppannena mānena kathentassāti vuttaṃ hoti. Vutto anāpattinayoti āpattiyā abhāvo anāpatti, sā eva nayo netabbo bujjhitabboti katvā, anāpattīti vuttaṃ hoti. ‘‘Adhimānenā’’ti evaṃ vutto bhagavatāti attho, ‘‘adhigatadhammoha’’nti adhimānena ‘‘ahaṃ paṭhamajjhānalābhī’’tiādīni vadantassa anāpattīti vuttaṃ hoti.
அயமதி⁴மானோ கஸ்ஸ ஹோதி, கஸ்ஸ ந ஹோதீதி சே? அரியானங் ந ஹோதி மக்³க³பச்சவெக்க²ணாதீ³ஹி பஞ்சஹி பச்சவெக்க²ணாஹி ஸஞ்ஜாதஸோமனஸ்ஸானங் விதிண்ணகங்க²த்தா. து³ஸ்ஸீலஸ்ஸாபி ந ஹோதி தஸ்ஸ அரியகு³ணாதி⁴க³மே நிருஸ்ஸாஹத்தா. ஸுஸீலஸ்ஸாபி கம்மட்டா²னானுயோக³ரஹிதஸ்ஸ நித்³தா³ராமதாதி³மனுயுத்தஸ்ஸ ந ஹோதி விஸ்ஸட்ட²பா⁴வனாபி⁴யோக³த்தா. ஸுபரிஸுத்³தா⁴ய ஸீலஸம்பத்தியா பதிட்டா²ய ஸமத²பா⁴வனாமனுயுத்தஸ்ஸ ரூபாரூபஸமாபத்தியங் பத்தாஸினோ வா விபஸ்ஸனாபி⁴யுத்தஸ்ஸ ஸோபக்கிலேஸோத³யப்³ப³யஞாணலாபி⁴னோ வா உப்பஜ்ஜதி. ஸோ ஸமத²விபஸ்ஸனாபா⁴வனாஹி கிலேஸஸமுதா³சாரஸ்ஸ அபா⁴வே உப்பன்னே தே விஸேஸபா⁴கி³னோ ப⁴விதுங் அத³த்வா டி²திபா⁴கி³னோ கத்வா ட²பேதீதி வேதி³தப்³போ³.
Ayamadhimāno kassa hoti, kassa na hotīti ce? Ariyānaṃ na hoti maggapaccavekkhaṇādīhi pañcahi paccavekkhaṇāhi sañjātasomanassānaṃ vitiṇṇakaṅkhattā. Dussīlassāpi na hoti tassa ariyaguṇādhigame nirussāhattā. Susīlassāpi kammaṭṭhānānuyogarahitassa niddārāmatādimanuyuttassa na hoti vissaṭṭhabhāvanābhiyogattā. Suparisuddhāya sīlasampattiyā patiṭṭhāya samathabhāvanāmanuyuttassa rūpārūpasamāpattiyaṃ pattāsino vā vipassanābhiyuttassa sopakkilesodayabbayañāṇalābhino vā uppajjati. So samathavipassanābhāvanāhi kilesasamudācārassa abhāve uppanne te visesabhāgino bhavituṃ adatvā ṭhitibhāgino katvā ṭhapetīti veditabbo.
பனாதி அபி-ஸத்³த³த்தோ². ‘‘ஏவ’’ந்தி இமினா ‘‘அனாபத்தினயோ வுத்தோ’’தி பச்சாமஸதி. ‘‘அவத்துகாமஸ்ஸா’’தி இத³ஞ்ச பாளியங் ஆக³தங் ‘‘அனுல்லபனாதி⁴ப்பாயஸ்ஸா’’தி (பாரா॰ 222, 225) இத³ஞ்ச அனத்த²ந்தரங். அவத்துகாமஸ்ஸாதி ஏவங் வுத்தோதி யோஜனா. கோஹஞ்ஞேன பாபிச்சா²பகதஸ்ஸ ‘‘ஜா²னாதீ³னங் லாபி⁴ம்ஹீ’’தி வத³ந்தஸ்ஸ அஜ்ஜா²ஸயோ உல்லபனாதி⁴ப்பாயோ நாம, ததா² அஹுத்வா ஸப்³ரஹ்மசாரீஸு அஞ்ஞங் ப்³யாகரொந்தஸ்ஸ ஏவமேவ அனாபத்திபா⁴வோ வுத்தோ ப⁴க³வதாதி அத்தோ². ஆதி³கஸ்ஸாபி ஏவங் வுத்தோதி யோஜனா. ‘‘அனாபத்தி ஆதி³கம்மிகஸ்ஸா’’தி (பாரா॰ 222) ஆதி³கம்மிகஸ்ஸாபி அனாபத்திபா⁴வோ வுத்தோ ப⁴க³வதாதி அத்தோ². இமஸ்மிங் ஸிக்கா²பதே³ வக்³கு³முதா³தீரியா பி⁴க்கூ² ஆதி³கம்மிகா. அவுத்தஸமுச்சயத்தே²ன ததா²-ஸத்³தே³ன இத⁴ அவுத்தஉம்மத்தககி²த்தசித்தவேத³னட்டா க³ஹிதா.
Panāti api-saddattho. ‘‘Eva’’nti iminā ‘‘anāpattinayo vutto’’ti paccāmasati. ‘‘Avattukāmassā’’ti idañca pāḷiyaṃ āgataṃ ‘‘anullapanādhippāyassā’’ti (pārā. 222, 225) idañca anatthantaraṃ. Avattukāmassāti evaṃ vuttoti yojanā. Kohaññena pāpicchāpakatassa ‘‘jhānādīnaṃ lābhimhī’’ti vadantassa ajjhāsayo ullapanādhippāyo nāma, tathā ahutvā sabrahmacārīsu aññaṃ byākarontassa evameva anāpattibhāvo vutto bhagavatāti attho. Ādikassāpi evaṃ vuttoti yojanā. ‘‘Anāpatti ādikammikassā’’ti (pārā. 222) ādikammikassāpi anāpattibhāvo vutto bhagavatāti attho. Imasmiṃ sikkhāpade vaggumudātīriyā bhikkhū ādikammikā. Avuttasamuccayatthena tathā-saddena idha avuttaummattakakhittacittavedanaṭṭā gahitā.
311. பாபிச்ச²தாதி ‘‘ஏவங் மங் ஜனோ ஸம்பா⁴வெஸ்ஸதீ’’தி ஜா²னலாபி⁴தாதி³ஹேதுகாய ஸம்பா⁴வனாய ஸம்பா⁴வனானிமித்தஸ்ஸ பச்சயபடிலாப⁴ஸ்ஸ பத்த²னாஸங்கா²தாய பாபிகாய லாமிகாய இச்சா²ய ஸமன்னாக³தபா⁴வோ ச. தஸ்ஸாதி யங் ஜா²னாதி³பே⁴த³பி⁴ன்னங் உத்தரிமனுஸ்ஸத⁴ம்மங் ஸமுல்லபி, தஸ்ஸ த⁴ம்மஸ்ஸ. அஸந்தபா⁴வோதி அத்தஸந்தானே பச்சுப்பன்னஜாதியங் அனுப்பாதி³தபா⁴வேன அவிஜ்ஜமானபா⁴வோ. மனுஸ்ஸகஸ்ஸ ஆரோசனஞ்சேவாதி வுத்தவசனஸ்ஸ அத்த²ங் தங்க²ணே ஜானநகஸ்ஸ மனுஸ்ஸஜாதிகஸ்ஸ ‘‘பட²மங் ஜா²னங் ஸமாபஜ்ஜி’’ந்திஆதி³னா நயேன ஸவனூபசாரே ட²த்வா ஆரோசனஞ்ச. நஞ்ஞாபதே³ஸேன ஆரோசனஞ்சாதி ஸம்ப³ந்தோ⁴. ‘‘யோ தே விஹாரே வஸதி, ஸோ பி⁴க்கு² பட²மங் ஜா²னங் ஸமாபஜ்ஜீ’’திஆதி³னா (பாரா॰ 220) நயேன பவத்தஅஞ்ஞாபதே³ஸங் வினா உஜுகமேவ ஆரோசனஞ்ச. ததே³வ ஞாணந்தி ததா³ ஏவ ஞாணங், அசிராயித்வா வுத்தக்க²ணேயேவ ஜானநந்தி அத்தோ². எத்தா²தி இமஸ்மிங் சதுத்த²பாராஜிகாபத்தியங். தீ⁴ரா வினயத⁴ரா.
311.Pāpicchatāti ‘‘evaṃ maṃ jano sambhāvessatī’’ti jhānalābhitādihetukāya sambhāvanāya sambhāvanānimittassa paccayapaṭilābhassa patthanāsaṅkhātāya pāpikāya lāmikāya icchāya samannāgatabhāvo ca. Tassāti yaṃ jhānādibhedabhinnaṃ uttarimanussadhammaṃ samullapi, tassa dhammassa. Asantabhāvoti attasantāne paccuppannajātiyaṃ anuppāditabhāvena avijjamānabhāvo. Manussakassa ārocanañcevāti vuttavacanassa atthaṃ taṅkhaṇe jānanakassa manussajātikassa ‘‘paṭhamaṃ jhānaṃ samāpajji’’ntiādinā nayena savanūpacāre ṭhatvā ārocanañca. Naññāpadesena ārocanañcāti sambandho. ‘‘Yo te vihāre vasati, so bhikkhu paṭhamaṃ jhānaṃ samāpajjī’’tiādinā (pārā. 220) nayena pavattaaññāpadesaṃ vinā ujukameva ārocanañca. Tadeva ñāṇanti tadā eva ñāṇaṃ, acirāyitvā vuttakkhaṇeyeva jānananti attho. Etthāti imasmiṃ catutthapārājikāpattiyaṃ. Dhīrā vinayadharā.
312. பட²மே து³தியே சந்தேதி மனுஸ்ஸவிக்³க³ஹபாராஜிகவஜ்ஜிதே யதா²வுத்தபாராஜிகத்தயே. பரியாயோ ந விஜ்ஜதீதி பாராஜிகாபத்திபத²ங் பரியாயவசனங் ந லப⁴தி. ‘‘ந பனேதரே’’தி இத³ங் எத்தா²பி யோஜேதப்³ப³ங், இதரே பன ததியபாராஜிகே பரியாயோ ந விஜ்ஜதீதி அத்தோ². ‘‘மரணவண்ணங் வா ஸங்வண்ணெய்யா’’தி (பாரா॰ 172) ச ‘‘அம்போ⁴ புரிஸ கிங் துய்ஹிமினா’’திஆதி³னா (பாரா॰ 171) ச ‘‘யோ ஏவங் மரதி, ஸோ த⁴னங் வா லப⁴தீ’’திஆதி³னா (பாரா॰ 175) ச பரியாயேன வத³ந்தஸ்ஸ பாராஜிகமேவாதி வுத்தங் ஹோதி. ஆணத்தி பாராஜிகஹேதுஆணத்திகப்பயோகோ³. ந பனேதரேதி பட²மசதுத்த²பாராஜிகத்³வயே பன பாராஜிகஹேதுபூ⁴தா ஆணத்தி ந லப⁴தீதி அத்தோ².
312.Paṭhame dutiye canteti manussaviggahapārājikavajjite yathāvuttapārājikattaye. Pariyāyo na vijjatīti pārājikāpattipathaṃ pariyāyavacanaṃ na labhati. ‘‘Na panetare’’ti idaṃ etthāpi yojetabbaṃ, itare pana tatiyapārājike pariyāyo na vijjatīti attho. ‘‘Maraṇavaṇṇaṃ vā saṃvaṇṇeyyā’’ti (pārā. 172) ca ‘‘ambho purisa kiṃ tuyhiminā’’tiādinā (pārā. 171) ca ‘‘yo evaṃ marati, so dhanaṃ vā labhatī’’tiādinā (pārā. 175) ca pariyāyena vadantassa pārājikamevāti vuttaṃ hoti. Āṇatti pārājikahetuāṇattikappayogo. Na panetareti paṭhamacatutthapārājikadvaye pana pārājikahetubhūtā āṇatti na labhatīti attho.
313. ஆதீ³தி பட²மபாராஜிகங். ஏகஸமுட்டா²னந்தி ஏககாரணங். ஸமுட்டா²தி ஆபத்தி ஏதஸ்மாதி ஸமுட்டா²னங், காரணங் காயாதி³. தங் பன ச²ப்³பி³த⁴ங் காயோ, வாசா, காயவாசா, காயசித்தங், வாசாசித்தங், காயவாசாசித்தந்தி. தேஸங் வினிச்ச²யங் உத்தரே (உ॰ வி॰ 325 ஆத³யோ) யதா²க³தட்டா²னேயேவ ச வண்ணயிஸ்ஸாம. தத்ரித³ங் ஏகஸமுட்டா²னங் ஏகங் காயசித்தங் ஸமுட்டா²னங் ஏதஸ்ஸாதி கத்வா. தேனாஹ ‘‘து³வங்க³ங் காயசித்ததோ’’தி. ‘‘தங் ஸமுட்டா²ன’’ந்தி அஜ்ஜா²ஹாரோ. யேன ஸமுட்டா²னேன பட²மபாராஜிகாபத்தி உப்பஜ்ஜதி, தங்ஸமுட்டா²னஸங்கா²தங் காரணங். அங்க³ஜாதஸங்கா²தங் காயஞ்ச ஸேவனசித்தஞ்சாதி த்³வயங் அங்க³ங் அவயவங் ஏதஸ்ஸாதி து³வங்க³ங், தது³ப⁴யஸபா⁴வந்தி அத்தோ² யதா² ‘‘து³வங்க³ங் சதுத்த²ஜ்ஜா²ன’’ந்தி. ஸேஸாதி அவஸிட்டா²னி தீணி பாராஜிகானி. திஸமுட்டா²னாதி காயசித்தங், வாசாசித்தங், காயவாசாசித்தந்தி திஸமுட்டா²னா தீணி ஸமுட்டா²னானி ஏதேஸந்தி கத்வா. தேஸந்தி தேஸங் திண்ணங் ஸமுட்டா²னானங். அங்கா³னீதி அவயவானி. ஸத்த காயோ, சித்தங், வாசா, சித்தங், காயோ, வாசா, சித்தந்தி, தங்ஸபா⁴வாதி வுத்தங் ஹோதி.
313.Ādīti paṭhamapārājikaṃ. Ekasamuṭṭhānanti ekakāraṇaṃ. Samuṭṭhāti āpatti etasmāti samuṭṭhānaṃ, kāraṇaṃ kāyādi. Taṃ pana chabbidhaṃ kāyo, vācā, kāyavācā, kāyacittaṃ, vācācittaṃ, kāyavācācittanti. Tesaṃ vinicchayaṃ uttare (u. vi. 325 ādayo) yathāgataṭṭhāneyeva ca vaṇṇayissāma. Tatridaṃ ekasamuṭṭhānaṃ ekaṃ kāyacittaṃ samuṭṭhānaṃ etassāti katvā. Tenāha ‘‘duvaṅgaṃ kāyacittato’’ti. ‘‘Taṃ samuṭṭhāna’’nti ajjhāhāro. Yena samuṭṭhānena paṭhamapārājikāpatti uppajjati, taṃsamuṭṭhānasaṅkhātaṃ kāraṇaṃ. Aṅgajātasaṅkhātaṃ kāyañca sevanacittañcāti dvayaṃ aṅgaṃ avayavaṃ etassāti duvaṅgaṃ, tadubhayasabhāvanti attho yathā ‘‘duvaṅgaṃ catutthajjhāna’’nti. Sesāti avasiṭṭhāni tīṇi pārājikāni. Tisamuṭṭhānāti kāyacittaṃ, vācācittaṃ, kāyavācācittanti tisamuṭṭhānā tīṇi samuṭṭhānāni etesanti katvā. Tesanti tesaṃ tiṇṇaṃ samuṭṭhānānaṃ. Aṅgānīti avayavāni. Satta kāyo, cittaṃ, vācā, cittaṃ, kāyo, vācā, cittanti, taṃsabhāvāti vuttaṃ hoti.
314. ஆதீ³தி மேது²னத⁴ம்மபடிஸேவனசித்தஸம்பயுத்தசேதனாஸபா⁴வங் பட²மபாராஜிகங். ஸுகோ²பெக்கா²யுதங் உதீ³ரிதந்தி யோஜனா. இட்டா²லம்ப³ணபடிலாபா⁴தி³ஸோமனஸ்ஸஹேதும்ஹி ஸதி ஸுக²வேத³னாஸம்பயுத்தங் ஹோதி, தஸ்மிங் அஸதி உபெக்கா²வேத³னாய ஸம்பயுத்தங் ஹோதீதி வுத்தந்தி அத்தோ².
314.Ādīti methunadhammapaṭisevanacittasampayuttacetanāsabhāvaṃ paṭhamapārājikaṃ. Sukhopekkhāyutaṃ udīritanti yojanā. Iṭṭhālambaṇapaṭilābhādisomanassahetumhi sati sukhavedanāsampayuttaṃ hoti, tasmiṃ asati upekkhāvedanāya sampayuttaṃ hotīti vuttanti attho.
ததியங் து³க்க²வேத³னந்தி ததியங் மனுஸ்ஸவிக்³க³ஹபாராஜிகங் தோ³ஸசித்தஸம்பயுத்தசேதனாஸபா⁴வத்தா து³க்க²வேத³னாய ஸம்பயுத்தந்தி அத்தோ².
Tatiyaṃ dukkhavedananti tatiyaṃ manussaviggahapārājikaṃ dosacittasampayuttacetanāsabhāvattā dukkhavedanāya sampayuttanti attho.
து³தியந்தி அதி³ன்னாதா³னசேதனாலக்க²ணங் து³தியபாராஜிகங். லோபே⁴ன பரஸந்தகங் சோரிகாய க³ண்ஹந்தஸ்ஸ ஸோமனஸ்ஸஸம்பயுத்தங் ஹோதி, கோதே⁴ன அபி⁴பூ⁴தஸ்ஸ விலும்பித்வா வா விலும்பாபெத்வா வா க³ண்ஹதோ தோ³மனஸ்ஸஸம்பயுத்தங் ஹோதி, ஸோமனஸ்ஸங், தோ³மனஸ்ஸஞ்ச வினா அக்³க³ஹேதுகாமோ விய ஹுத்வா உதா³ஸீனஸ்ஸ க³ண்ஹதோ உபெக்கா²ஸம்பயுத்தங் ஹோதீதி ‘‘திவேத³னமுதீ³ரித’’ந்தி ஆஹ.
Dutiyanti adinnādānacetanālakkhaṇaṃ dutiyapārājikaṃ. Lobhena parasantakaṃ corikāya gaṇhantassa somanassasampayuttaṃ hoti, kodhena abhibhūtassa vilumpitvā vā vilumpāpetvā vā gaṇhato domanassasampayuttaṃ hoti, somanassaṃ, domanassañca vinā aggahetukāmo viya hutvā udāsīnassa gaṇhato upekkhāsampayuttaṃ hotīti ‘‘tivedanamudīrita’’nti āha.
சதுத்த²ஞ்சாதி உத்தரிமனுஸ்ஸத⁴ம்மஸமுல்லபனசேதனாலக்க²ணங் சதுத்த²பாராஜிகஞ்ச. ஸம்பா⁴வனிச்சா²ய பச்சயாஸாய வா துட்ட²துட்ட²ஸ்ஸேவ ‘‘அஹங் பட²மங் ஜா²னங் ஸமாபஜ்ஜாமீ’’திஆதி³னா நயேன அத்தனோ உத்தரிமனுஸ்ஸத⁴ம்மலாபி⁴தங் வத³ந்தஸ்ஸ ஸோமனஸ்ஸஸம்பயுத்தங் ஹோதி, அஞ்ஞபுக்³க³லேஸு படிஹதசித்தஸ்ஸ கலஹபுரெக்கா²ரதாய வத³தோ தோ³மனஸ்ஸஸம்பயுத்தங் ஹோதி, பச்சயாலாபே⁴ன ஜிக⁴ச்சா²தி³து³க்க²ங் ஸஹிதுமஸக்குணெய்யதாய உதா³ஸீனஸ்ஸ வத³தோ உபெக்கா²ஸம்பயுத்தங் ஹோதீதி ‘‘திவேத³னமுதீ³ரித’’ந்தி ஆஹ.
Catutthañcāti uttarimanussadhammasamullapanacetanālakkhaṇaṃ catutthapārājikañca. Sambhāvanicchāya paccayāsāya vā tuṭṭhatuṭṭhasseva ‘‘ahaṃ paṭhamaṃ jhānaṃ samāpajjāmī’’tiādinā nayena attano uttarimanussadhammalābhitaṃ vadantassa somanassasampayuttaṃ hoti, aññapuggalesu paṭihatacittassa kalahapurekkhāratāya vadato domanassasampayuttaṃ hoti, paccayālābhena jighacchādidukkhaṃ sahitumasakkuṇeyyatāya udāsīnassa vadato upekkhāsampayuttaṃ hotīti ‘‘tivedanamudīrita’’nti āha.
315. அட்ட² சித்தானீதி லோப⁴ஸஹக³தானி அட்ட² சித்தானி லப்³ப⁴ரேதி யோஜனா, லப்³ப⁴ந்தீதி அத்தோ², சேதனாஸபா⁴வேன பட²மபாராஜிகேன ஸம்பயுத்தானீதி வுத்தங் ஹோதி. ஏவமுபரிபி. து³வேதி படிக⁴ஸம்பயுத்தானி த்³வே சித்தானி. த³ஸ சித்தானீதி லோப⁴ஸஹக³தானி அட்ட², த்³வே படிக⁴ஸம்பயுத்தானீதி. லப்³ப⁴ரேதி ஸம்பயுத்தபா⁴வேன லப்³ப⁴ந்தி.
315.Aṭṭha cittānīti lobhasahagatāni aṭṭha cittāni labbhareti yojanā, labbhantīti attho, cetanāsabhāvena paṭhamapārājikena sampayuttānīti vuttaṃ hoti. Evamuparipi. Duveti paṭighasampayuttāni dve cittāni. Dasa cittānīti lobhasahagatāni aṭṭha, dve paṭighasampayuttānīti. Labbhareti sampayuttabhāvena labbhanti.
316. தஸ்மாதி யஸ்மா யதா²வுத்தசித்தேஹி ஸம்பயுத்தங், தேன ஹேதுனா. க்ரியாதி கரணேன ஆபஜ்ஜிதப்³ப³த்தா கிரியா. வீதிக்கமஸஞ்ஞாய அபா⁴வேன முச்சனதோ ஸஞ்ஞாய விமொக்கோ² ஏதஸ்ஸாதி ஸஞ்ஞாவிமொக்க²ங். லோகவஜ்ஜந்தி லோகேன அகுஸலபா⁴வதோ வஜ்ஜனீயந்தி தீ³பிதங் பகாஸிதங்.
316.Tasmāti yasmā yathāvuttacittehi sampayuttaṃ, tena hetunā. Kriyāti karaṇena āpajjitabbattā kiriyā. Vītikkamasaññāya abhāvena muccanato saññāya vimokkho etassāti saññāvimokkhaṃ. Lokavajjanti lokena akusalabhāvato vajjanīyanti dīpitaṃ pakāsitaṃ.
317. ஆபத்தியங்யேவாதி ஏவகாரேன ந ஸிக்கா²பதே³தி த³ஸ்ஸேதி. இத³ங் விதா⁴னந்தி ஸமுட்டா²னாதி³கங் இத³ங் யதா²வுத்தங் விதா⁴னங். விபா⁴வினாதி பஞ்ஞவதா வினயத⁴ரேன.
317.Āpattiyaṃyevāti evakārena na sikkhāpadeti dasseti. Idaṃ vidhānanti samuṭṭhānādikaṃ idaṃ yathāvuttaṃ vidhānaṃ. Vibhāvināti paññavatā vinayadharena.
318-9. முது³பிட்டி² சாதி லதா விய நமித்வா கரணங் த³ஸ்ஸெத்வா நச்சிதுங் ஸமவாஹித்வா முது³கதபிட்டி²கோ ச. லம்பீ³ சாதி பலம்ப³மானேன தீ³கே⁴ன அங்க³ஜாதேன யுத்தோ. லம்ப³தீதி லம்ப³ங், அங்க³ஜாதங், தங் யஸ்ஸ அத்தி² ஸோ லம்பீ³. இமே த்³வேபி காமபரிளாஹாதுரபா⁴வே ஸதி அத்தனோ அங்க³ஜாதங் அத்தனோ முக²ங், வச்சமக்³க³ஞ்ச பவேஸெத்வா வீதிக்கமிதுமரஹத்தா பாராஜிகாபன்னஸதி³ஸத்தா பரிவஜ்ஜிதா. முக²க்³கா³ஹீதி முகே²ன க³ஹணங் முக²க்³கா³ஹோ, ஸோ ஏதஸ்ஸ அத்தீ²தி முக²க்³கா³ஹீ, பரஸ்ஸ அங்க³ஜாதங் முகே²ன க³ண்ஹந்தோதி அத்தோ². நிஸீத³கோதி பரஸ்ஸ அங்க³ஜாதே அத்தனோ வச்சமக்³கே³ன நிஸீத³ந்தோ. இமே த்³வே ஸஹவாஸிகானங் ஸீலவினாஸனதோ அஞ்ஞேஹி ஸங்வஸிதுங் அனரஹாதி பாராஜிகாபன்னஸதி³ஸத்தா விவஜ்ஜிதா. தேஸந்தி அஸங்வாஸதாஸாமஞ்ஞேன சத்தாரோ பாராஜிகாபன்னே ஸங்க³ண்ஹாதி. ‘‘தேஸஞ்ச மக்³கே³னமக்³க³படிபத்திஸாமஞ்ஞேன பட²மபாராஜிகாபன்னஸ்ஸேவ அனுலோமிகாதி க³ஹேதப்³பா³’’ இச்சேவங் நிஸ்ஸந்தே³ஹே வுத்தங். இமினா ச அகதவீதிக்கமானம்பி முது³பிட்டி²ஆதீ³னங் சதுன்னங் அனுலோமபாராஜிகபா⁴வோ வுத்தோதி விஞ்ஞாயதி.
318-9.Mudupiṭṭhi cāti latā viya namitvā karaṇaṃ dassetvā naccituṃ samavāhitvā mudukatapiṭṭhiko ca. Lambī cāti palambamānena dīghena aṅgajātena yutto. Lambatīti lambaṃ, aṅgajātaṃ, taṃ yassa atthi so lambī. Ime dvepi kāmapariḷāhāturabhāve sati attano aṅgajātaṃ attano mukhaṃ, vaccamaggañca pavesetvā vītikkamitumarahattā pārājikāpannasadisattā parivajjitā. Mukhaggāhīti mukhena gahaṇaṃ mukhaggāho, so etassa atthīti mukhaggāhī, parassa aṅgajātaṃ mukhena gaṇhantoti attho. Nisīdakoti parassa aṅgajāte attano vaccamaggena nisīdanto. Ime dve sahavāsikānaṃ sīlavināsanato aññehi saṃvasituṃ anarahāti pārājikāpannasadisattā vivajjitā. Tesanti asaṃvāsatāsāmaññena cattāro pārājikāpanne saṅgaṇhāti. ‘‘Tesañca maggenamaggapaṭipattisāmaññena paṭhamapārājikāpannasseva anulomikāti gahetabbā’’ iccevaṃ nissandehe vuttaṃ. Iminā ca akatavītikkamānampi mudupiṭṭhiādīnaṃ catunnaṃ anulomapārājikabhāvo vuttoti viññāyati.
ஸமந்தபாஸாதி³காயங் பன –
Samantapāsādikāyaṃ pana –
‘‘அபரானிபி லம்பீ³, முது³பிட்டி²கோ, பரஸ்ஸ அங்க³ஜாதங் முகே²ன க³ண்ஹாதி, பரஸ்ஸ அங்க³ஜாதே அபி⁴னிஸீத³தீதி இமேஸங் சதுன்னங் வஸேன சத்தாரி அனுலோமபாராஜிகானீதி வத³ந்தி. ஏதானி ஹி யஸ்மா உபி⁴ன்னங் ராக³வஸேன ஸதி³ஸபா⁴வூபக³தானங் த⁴ம்மோ ‘மேது²னத⁴ம்மோ’தி வுச்சதி, தஸ்மா ஏதேன பரியாயேன மேது²னங் த⁴ம்மங் அப்படிஸேவித்வாயேவ கேவலங் மக்³கே³ன மக்³க³ப்பவேஸனவஸேன ஆபஜ்ஜிதப்³ப³த்தா மேது²னத⁴ம்மபாராஜிகஸ்ஸ அனுலோமெந்தீதி ‘அனுலோமபாராஜிகானீ’தி வுச்சந்தீ’’தி (பாரா॰ அட்ட²॰ 2.233) –
‘‘Aparānipi lambī, mudupiṭṭhiko, parassa aṅgajātaṃ mukhena gaṇhāti, parassa aṅgajāte abhinisīdatīti imesaṃ catunnaṃ vasena cattāri anulomapārājikānīti vadanti. Etāni hi yasmā ubhinnaṃ rāgavasena sadisabhāvūpagatānaṃ dhammo ‘methunadhammo’ti vuccati, tasmā etena pariyāyena methunaṃ dhammaṃ appaṭisevitvāyeva kevalaṃ maggena maggappavesanavasena āpajjitabbattā methunadhammapārājikassa anulomentīti ‘anulomapārājikānī’ti vuccantī’’ti (pārā. aṭṭha. 2.233) –
வுத்தத்தா ச தப்³ப³ண்ணனாய ச ஸாரத்த²தீ³பனியங் –
Vuttattā ca tabbaṇṇanāya ca sāratthadīpaniyaṃ –
‘‘லம்ப³ங்தீ³க⁴தாய பலம்ப³மானங் அங்க³ஜாதமேதஸ்ஸாதி லம்பீ³. ஸோ எத்தாவதா ந பாராஜிகோ, அத² கோ² யதா³ அனபி⁴ரதியா பீளிதோ அத்தனோ அங்க³ஜாதங் முகே² வா வச்சமக்³கே³ வா பவேஸேதி, ததா³ பாராஜிகோ ஹோதி. முது³கா பிட்டி² ஏதஸ்ஸாதி முது³பிட்டி²கோ, கதபரிகம்மாய முது³காய பிட்டி²யா ஸமன்னாக³தோ. ஸோபி யதா³ அனபி⁴ரதியா பீளிதோ அத்தனோ அங்க³ஜாதங் அத்தனோ முகே² பவேஸேதி ததா³ பாராஜிகோ ஹோதி. பரஸ்ஸ அங்க³ஜாதங் முகே²ன க³ண்ஹாதீதி யோ அனபி⁴ரதியா பீளிதோ பரஸ்ஸ ஸுத்தஸ்ஸ வா பமத்தஸ்ஸ வா அங்க³ஜாதங் அத்தனோ முகே²ன க³ண்ஹாதி. பரஸ்ஸ அங்க³ஜாதே அபி⁴னிஸீத³தீதி யோ அனபி⁴ரதியா பீளிதோ பரஸ்ஸ அங்க³ஜாதங் கம்மனியங் தி³ஸ்வா அத்தனோ வச்சமக்³கே³ன தஸ்ஸூபரி அபி⁴னிஸீத³தி, தங் அத்தனோ வச்சமக்³க³ங் பவேஸேதீதி அத்தோ². லம்பீ³ஆத³யோ சத்தாரோ கிஞ்சாபி பட²மபாராஜிகேன ஸங்க³ஹிதா, யஸ்மா பன உபி⁴ன்னங் ராக³பரியுட்டா²னஸங்கா²தேன பரியாயேன மேது²னங் த⁴ம்மங் அப்படிஸேவினோ ஹொந்தி, தஸ்மா விஸுங் வுத்தா’’தி (ஸாரத்த²॰ டீ॰ 2.233) –
‘‘Lambaṃdīghatāya palambamānaṃ aṅgajātametassāti lambī. So ettāvatā na pārājiko, atha kho yadā anabhiratiyā pīḷito attano aṅgajātaṃ mukhe vā vaccamagge vā paveseti, tadā pārājiko hoti. Mudukā piṭṭhi etassāti mudupiṭṭhiko, kataparikammāya mudukāya piṭṭhiyā samannāgato. Sopi yadā anabhiratiyā pīḷito attano aṅgajātaṃ attano mukhe paveseti tadā pārājiko hoti. Parassa aṅgajātaṃ mukhena gaṇhātīti yo anabhiratiyā pīḷito parassa suttassa vā pamattassa vā aṅgajātaṃ attano mukhena gaṇhāti. Parassa aṅgajāte abhinisīdatīti yo anabhiratiyā pīḷito parassa aṅgajātaṃ kammaniyaṃ disvā attano vaccamaggena tassūpari abhinisīdati, taṃ attano vaccamaggaṃ pavesetīti attho. Lambīādayo cattāro kiñcāpi paṭhamapārājikena saṅgahitā, yasmā pana ubhinnaṃ rāgapariyuṭṭhānasaṅkhātena pariyāyena methunaṃ dhammaṃ appaṭisevino honti, tasmā visuṃ vuttā’’ti (sārattha. ṭī. 2.233) –
வுத்தத்தா ச கதவீதிக்கமாயேவேதே ‘‘பாராஜிகா’’தி க³ஹேதப்³பா³.
Vuttattā ca katavītikkamāyevete ‘‘pārājikā’’ti gahetabbā.
பி⁴க்கு²னீனஞ்ச சத்தாரீதி எத்த² ‘‘அஸாதா⁴ரணானீ’’தி பாட²ஸேஸோ, பி⁴க்கூ²ஹி அஸாதா⁴ரணானி பி⁴க்கு²னீனமேவ நியதானி உப்³ப⁴ஜாணுமண்ட³லிகா, வஜ்ஜபடிச்சா²தி³கா, உக்கி²த்தானுவத்திகா, அட்ட²வத்து²காதி சத்தாரி பாராஜிகானி ச. விப்³ப⁴ந்தா பி⁴க்கு²னீ ஸயந்தி எத்த² ‘‘தேஸங் அனுலோமிகா’’தி ஆனெத்வா ஸம்ப³ந்தி⁴தப்³ப³ங். தேஸங் சதுன்னங் பாராஜிகானங் அனுலோமிகா ஸயங் விப்³ப⁴ந்தா பி⁴க்கு²னீ சாதி யோஜனா. சித்தவஸிகா ஹுத்வா அத்தனா நிவத்த²சீவரம்பி ஹி மாதுகா³மானங் நிவாஸனநீஹாரேன ஸயமேவ நிவாஸெத்வா கி³ஹிவேஸங் ரோசெத்வா க³ஹிதமத்தே ஸாஸனதோ சுதா பி⁴க்கு²னீ சாதி வுத்தங் ஹோதி. ஏவங்கரணேன கி³ஹிபா⁴வாபன்னதாஸாமஞ்ஞேன ஸங்வாஸாரஹா ந ஹொந்தீதி இமேஸங் சதுன்னங் பாராஜிகானங் அனுலோமிகா ஜாதா.
Bhikkhunīnañca cattārīti ettha ‘‘asādhāraṇānī’’ti pāṭhaseso, bhikkhūhi asādhāraṇāni bhikkhunīnameva niyatāni ubbhajāṇumaṇḍalikā, vajjapaṭicchādikā, ukkhittānuvattikā, aṭṭhavatthukāti cattāri pārājikāni ca. Vibbhantā bhikkhunī sayanti ettha ‘‘tesaṃ anulomikā’’ti ānetvā sambandhitabbaṃ. Tesaṃ catunnaṃ pārājikānaṃ anulomikā sayaṃ vibbhantā bhikkhunī cāti yojanā. Cittavasikā hutvā attanā nivatthacīvarampi hi mātugāmānaṃ nivāsananīhārena sayameva nivāsetvā gihivesaṃ rocetvā gahitamatte sāsanato cutā bhikkhunī cāti vuttaṃ hoti. Evaṃkaraṇena gihibhāvāpannatāsāmaññena saṃvāsārahā na hontīti imesaṃ catunnaṃ pārājikānaṃ anulomikā jātā.
ததா²தி யதா² இமே த³ஸ்ஸிதா தேன அஸங்வாஸாரஹதாய, பி⁴க்கு²பா⁴வாய அப⁴ப்³ப³தாய ச பாராஜிகாவ, ததா² ஏகாத³ஸ அப⁴ப்³ப³புக்³க³லாபி ஹொந்தீதி அத்தோ². ஏகாத³ஸாப⁴ப்³பா³தி மாதுகா⁴தகோ, பிதுகா⁴தகோ, அரஹந்தகா⁴தகோ, ஸங்க⁴பே⁴த³கோ, லோஹிதுப்பாத³கோ, பண்ட³கோ, திரச்சா²னக³தோ, உப⁴தொப்³யஞ்ஜனகோ, தெ²ய்யஸங்வாஸகோ, பி⁴க்கு²னிதூ³ஸகோ, தித்தி²யபக்கந்தகோதி ஏகாத³ஸ. ஸப்³பே³தே சதுவீஸதி ஏதே ஸப்³பே³ சதுவீஸதி புக்³க³லா ஸமோதா⁴னதோ வேதி³தப்³பா³தி அதி⁴ப்பாயோ.
Tathāti yathā ime dassitā tena asaṃvāsārahatāya, bhikkhubhāvāya abhabbatāya ca pārājikāva, tathā ekādasa abhabbapuggalāpi hontīti attho. Ekādasābhabbāti mātughātako, pitughātako, arahantaghātako, saṅghabhedako, lohituppādako, paṇḍako, tiracchānagato, ubhatobyañjanako, theyyasaṃvāsako, bhikkhunidūsako, titthiyapakkantakoti ekādasa. Sabbete catuvīsati ete sabbe catuvīsati puggalā samodhānato veditabbāti adhippāyo.
320. இமே சதுவீஸதி பாராஜிகா புக்³க³லா ஸீஸச்சி²ன்னோவ ஜீவிதுங் இத⁴ பி⁴க்கு²பா⁴வாய அப⁴ப்³பா³தி வுத்தாதி யோஜனா.
320. Ime catuvīsati pārājikā puggalā sīsacchinnova jīvituṃ idha bhikkhubhāvāya abhabbāti vuttāti yojanā.
321. இமேஸங் ஏகாத³ஸன்னங் அப⁴ப்³ப³தாய ஹேதுத³ஸ்ஸனத்த²மாஹ ‘‘பண்ட³கோ சா’’திஆதி³. பண்ட³கோ சாதி ஆஸித்தபண்ட³கோ, உஸூயபண்ட³கோ, பக்க²பண்ட³கோ, ஓபக்கமிகபண்ட³கோ, நபுங்ஸகபண்ட³கோதி வுத்தோ பஞ்சவிதோ⁴ பண்ட³கோ ச. திரச்சா²னோதி திரியங் அஞ்ச²தி க³ச்ச²தீதி ‘‘திரச்சா²னோ’’தி க³ஹிதோ நாக³ஸுபண்ணாதி³கோ ஸப்³ப³திரச்சா²னயோனிகோ ச. யக்கா²த³யோ ஸப்³பே³ அமனுஸ்ஸாபி இத⁴ திரச்சா²னேயேவ ஸங்க³ஹிதாதி வேதி³தப்³பா³. உப⁴தொப்³யஞ்ஜனோபி சாதி இத்தி²புரிஸப்³யஞ்ஜனஸாத⁴கேஹி உப⁴தோ கம்மதோ ஜாதானி த²னாதி³கானி ப்³யஞ்ஜனானி யஸ்ஸாதி நிருத்தோ இத்தி²உப⁴தொப்³யஞ்ஜனோ , புரிஸஉப⁴தொப்³யஞ்ஜனோதி து³விதோ⁴ உப⁴தொப்³யஞ்ஜனோ ச. வத்து²விபன்னாதி தப்³பா⁴வபா⁴விதாய பி⁴க்கு²பா⁴வோ வஸதி எத்தா²தி வத்து², புக்³க³லானங் பி⁴க்கு²பா⁴வாரஹதா, ஸா பன பப்³ப³ஜ்ஜாக்க²ந்த⁴காக³தஸப்³ப³தோ³ஸவிரஹிதகு³ணஸம்பயுத்ததா, தங் விபன்னங் பண்ட³கபா⁴வாதி³யோகே³ன யேஸங் தே ‘‘வத்து²விபன்னா’’தி க³ஹேதப்³பா³. ஹி-ஸத்³தோ³ ஹேதும்ஹி. யஸ்மா வத்து²விபன்னா, தஸ்மா இத⁴ அத்தபா⁴வே பப்³ப³ஜ்ஜாய அப⁴ப்³பா³தி வுத்தங் ஹோதி. ‘‘அஹேதுபடிஸந்தி⁴கா’’தி வசனேன இமேஸங் விபாகாவரணயுத்தபா⁴வமாஹ, இமினா ஏதேஸங் மக்³கா³தி⁴க³மஸ்ஸ வாரிதபா⁴வோ த³ஸ்ஸிதோதி வேதி³தப்³ப³ங்.
321. Imesaṃ ekādasannaṃ abhabbatāya hetudassanatthamāha ‘‘paṇḍako cā’’tiādi. Paṇḍako cāti āsittapaṇḍako, usūyapaṇḍako, pakkhapaṇḍako, opakkamikapaṇḍako, napuṃsakapaṇḍakoti vutto pañcavidho paṇḍako ca. Tiracchānoti tiriyaṃ añchati gacchatīti ‘‘tiracchāno’’ti gahito nāgasupaṇṇādiko sabbatiracchānayoniko ca. Yakkhādayo sabbe amanussāpi idha tiracchāneyeva saṅgahitāti veditabbā. Ubhatobyañjanopi cāti itthipurisabyañjanasādhakehi ubhato kammato jātāni thanādikāni byañjanāni yassāti nirutto itthiubhatobyañjano , purisaubhatobyañjanoti duvidho ubhatobyañjano ca. Vatthuvipannāti tabbhāvabhāvitāya bhikkhubhāvo vasati etthāti vatthu, puggalānaṃ bhikkhubhāvārahatā, sā pana pabbajjākkhandhakāgatasabbadosavirahitaguṇasampayuttatā, taṃ vipannaṃ paṇḍakabhāvādiyogena yesaṃ te ‘‘vatthuvipannā’’ti gahetabbā. Hi-saddo hetumhi. Yasmā vatthuvipannā, tasmā idha attabhāve pabbajjāya abhabbāti vuttaṃ hoti. ‘‘Ahetupaṭisandhikā’’ti vacanena imesaṃ vipākāvaraṇayuttabhāvamāha, iminā etesaṃ maggādhigamassa vāritabhāvo dassitoti veditabbaṃ.
322. பஞ்சானந்தரிகாதி கம்மாவரணேன யுத்ததாய ஸக்³க³மொக்க²ஸம்பத்திதோ பரிஹாயித்வா மரணானந்தரங் அபாயபடிஸந்தி⁴யங் நியதா மாதுகா⁴தகாத³யோ பஞ்சானந்தரிகா ச. தெ²ய்யஸங்வாஸோபி சாதி லிங்க³த்தே²னகோ, ஸங்வாஸத்தே²னகோ, உப⁴யத்தே²னகோதி திவிதோ⁴ தெ²ய்யஸங்வாஸகோ ச. தூ³ஸகோதி பகதத்தாய பி⁴க்கு²னியா மேது²னங் படிஸேவித்வா தஸ்ஸா தூ³ஸிதத்தா பி⁴க்கு²னிங் தூ³ஸேதீதி ‘‘பி⁴க்கு²னிதூ³ஸகோ’’தி வுத்தோ ச. தித்தி²பக்கந்தகோ சாதி தித்தி²யானங் லத்³தி⁴ங், வேஸஞ்ச ரோசெத்வா தங் க³ஹெத்வா தேஸமந்தரங் பவிட்டோ² ச. இதி அட்ட² பன கிரியானட்டா²தி யோஜனா. இதீதி இத³மத்த²த்தா இமேதி வுத்தங் ஹோதி. தே இமேதி ஸம்ப³ந்தோ⁴. தே இமே அட்ட² பன மாதுவதா⁴தி³கிரியாய இஹத்தபா⁴வே பி⁴க்கு²பா⁴வாய அனரஹா ஹுத்வா நட்டா²தி அத்தோ². எத்தாவதா ஏகாத³ஸஅப⁴ப்³பா³னங் அப⁴ப்³ப³தாய காரணங் த³ஸ்ஸிதங் ஹோதி.
322.Pañcānantarikāti kammāvaraṇena yuttatāya saggamokkhasampattito parihāyitvā maraṇānantaraṃ apāyapaṭisandhiyaṃ niyatā mātughātakādayo pañcānantarikā ca. Theyyasaṃvāsopi cāti liṅgatthenako, saṃvāsatthenako, ubhayatthenakoti tividho theyyasaṃvāsako ca. Dūsakoti pakatattāya bhikkhuniyā methunaṃ paṭisevitvā tassā dūsitattā bhikkhuniṃ dūsetīti ‘‘bhikkhunidūsako’’ti vutto ca. Titthipakkantako cāti titthiyānaṃ laddhiṃ, vesañca rocetvā taṃ gahetvā tesamantaraṃ paviṭṭho ca. Iti aṭṭha pana kiriyānaṭṭhāti yojanā. Itīti idamatthattā imeti vuttaṃ hoti. Te imeti sambandho. Te ime aṭṭha pana mātuvadhādikiriyāya ihattabhāve bhikkhubhāvāya anarahā hutvā naṭṭhāti attho. Ettāvatā ekādasaabhabbānaṃ abhabbatāya kāraṇaṃ dassitaṃ hoti.
323. மயா பாராஜிகானங் ஸாரபூ⁴தோ யோ அயங் வினிச்ச²யோ வுத்தோ, தஸ்ஸ வினிச்ச²யஸ்ஸ அனுஸாரேன அனுக³மனேன ஸேஸோபி வினிச்ச²யோ பு³தே⁴ன பண்டி³தேன அஸேஸதோவ விஞ்ஞாதுங் ஸக்காதி யோஜனா.
323. Mayā pārājikānaṃ sārabhūto yo ayaṃ vinicchayo vutto, tassa vinicchayassa anusārena anugamanena sesopi vinicchayo budhena paṇḍitena asesatova viññātuṃ sakkāti yojanā.
324. படுபா⁴வகரே பரமே விவிதே⁴ஹி நயேஹி யுத்தே வினயபிடகே பரமத்த²னயங் அபி⁴பத்த²யதா அயங் ஸததங் பரியாபுணிதப்³போ³தி யோஜனா. தத்த² விவிதே⁴ஹி நானப்பகாரேஹி. நயேஹீதி நீயந்தி வுத்தானுஸாரேன உதீ³ரியந்தீதி ‘‘நயா’’தி வுத்தேஹி சக்கபெய்யாலாதீ³ஹி நயேஹி. பரமத்த²னயந்தி பரமோ ச ஸோ அத்தோ² சாதி பரமத்தோ², பரமோ வா விஸேஸேன நிச்சி²தப்³போ³ அத்தோ² பரமத்தோ², ஸோயேவ வினிச்ச²யத்தி²கானங் பு³த்³தி⁴யா நேதப்³போ³தி பரமத்த²னயோ, வினிச்ச²யூபாயோ நீயதி ஏதேனாதி கத்வா ‘‘பரமத்த²னயோ’’தி வுச்சதி, தங் பரமத்த²னயங். அபி⁴பத்த²யதாதி வினயபிடகே வினிச்ச²யங் வா தது³பாயங் வா பத்த²யதா, இச்ச²ந்தேனாதி அத்தோ². ‘‘பரியாபுணிதப்³போ³ அய’’ந்தி பத³ச்சே²தோ³. ம-காரோ ஆக³மஸந்தி⁴ஜோ, ஓ-காரஸ்ஸ அ-காராதே³ஸோ. பரியாபுணிதப்³போ³தி படி²தப்³போ³, ஸோதப்³போ³ சிந்தேதப்³போ³ தா⁴ரேதப்³போ³தி வுத்தங் ஹோதி. அயந்தி வினயவினிச்ச²யோ.
324. Paṭubhāvakare parame vividhehi nayehi yutte vinayapiṭake paramatthanayaṃ abhipatthayatā ayaṃ satataṃ pariyāpuṇitabboti yojanā. Tattha vividhehi nānappakārehi. Nayehīti nīyanti vuttānusārena udīriyantīti ‘‘nayā’’ti vuttehi cakkapeyyālādīhi nayehi. Paramatthanayanti paramo ca so attho cāti paramattho, paramo vā visesena nicchitabbo attho paramattho, soyeva vinicchayatthikānaṃ buddhiyā netabboti paramatthanayo, vinicchayūpāyo nīyati etenāti katvā ‘‘paramatthanayo’’ti vuccati, taṃ paramatthanayaṃ. Abhipatthayatāti vinayapiṭake vinicchayaṃ vā tadupāyaṃ vā patthayatā, icchantenāti attho. ‘‘Pariyāpuṇitabbo aya’’nti padacchedo. Ma-kāro āgamasandhijo, o-kārassa a-kārādeso. Pariyāpuṇitabboti paṭhitabbo, sotabbo cintetabbo dhāretabboti vuttaṃ hoti. Ayanti vinayavinicchayo.
இதி வினயத்த²ஸாரஸந்தீ³பனியா
Iti vinayatthasārasandīpaniyā
வினயவினிச்ச²யவண்ணனாய
Vinayavinicchayavaṇṇanāya
சதுத்த²பாராஜிககதா²வண்ணனா நிட்டி²தா.
Catutthapārājikakathāvaṇṇanā niṭṭhitā.
