| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
চতুত্থপারাজিককথাৰণ্ণনা
Catutthapārājikakathāvaṇṇanā
৩০৬-৭. এৰং নাতিসঙ্খেপৰিত্থারনযেন ততিযপারাজিকৰিনিচ্ছযং দস্সেত্ৰা ইদানি চতুত্থপারাজিকৰিনিচ্ছযং দস্সেতুমাহ ‘‘অসন্ত’’ন্তিআদি। তত্থ ‘‘অসন্ত’’ন্তি অপেক্খিত্ৰা ‘‘অত্তনী’’তি চ ‘‘ঝানাদিভেদ’’ন্তি অপেক্খিত্ৰা ‘‘উত্তরিমনুস্সধম্ম’’ন্তি চ ‘‘সমুদাচরেয্যা’’তি অপেক্খিত্ৰা ‘‘যো ভিক্খূ’’তি চ সামত্থিযা লব্ভতীতি অজ্ঝাহরিত্ৰা ‘‘অত্তনি অসন্ত’’ন্তিআদিনা নযেন যোজেতব্বং।
306-7. Evaṃ nātisaṅkhepavitthāranayena tatiyapārājikavinicchayaṃ dassetvā idāni catutthapārājikavinicchayaṃ dassetumāha ‘‘asanta’’ntiādi. Tattha ‘‘asanta’’nti apekkhitvā ‘‘attanī’’ti ca ‘‘jhānādibheda’’nti apekkhitvā ‘‘uttarimanussadhamma’’nti ca ‘‘samudācareyyā’’ti apekkhitvā ‘‘yo bhikkhū’’ti ca sāmatthiyā labbhatīti ajjhāharitvā ‘‘attani asanta’’ntiādinā nayena yojetabbaṃ.
অত্তনি অসন্তন্তি তস্মিং অত্তভাৰে অত্তনো সন্তানে অনুপ্পাদিততায অৰিজ্জমানং। অত্তস্সিতমেৰ কত্ৰাতি অত্তুপনাযিকং কত্ৰা অত্তনি ৰিজ্জমানং ৰিয কত্ৰা তং উপনেত্ৰা । ভৰং অধিট্ঠায চ ৰত্তমানন্তি পটিসন্ধিতো পট্ঠায চ ৰত্তন্তং ভৰং চিত্তেন অধিট্ঠহিত্ৰা তক্কেত্ৰা, চিত্তে ঠপেত্ৰাতি ৰুত্তং হোতি। অঞ্ঞাপদেসঞ্চ ৰিনাতি ‘‘যো তে ৰিহারে ৰসতীধ ভিক্খূ’’তিআদিনা নযেন ৰক্খমানং পরিযাযকথং ঠপেত্ৰা। অধিমানঞ্চ ৰিনাতি অদিট্ঠে দিট্ঠসঞ্ঞিতাদিসভাৰং অধিগতমানসঙ্খাতং ‘‘অধিগতউত্তরিমনুস্সধম্মো অহম্হী’’তি অধিমানঞ্চ ঠপেত্ৰা। ঝানাদিভেদন্তি ঝানাদযো ভেদা ৰিসেসা যস্স তং ঝানাদিভেদং, ‘‘উত্তরিমনুস্সধম্মো নাম ঝানং ৰিমোক্খো সমাধি সমাপত্তি ঞাণদস্সনং মগ্গভাৰনা ফলসচ্ছি কিরিযা কিলেসপ্পহানং ৰিনীৰরণতা চিত্তস্স সুঞ্ঞাগারে অভিরতী’’তি (পারা॰ ১৯৮, ১৯৯) পদভাজনে ৰুত্তং ঝানাদিধম্মৰিসেসন্তি অত্থো। ‘‘উত্তরিমনুস্সধম্মন্তি উত্তরিমনুস্সানং ঝাযীনঞ্চেৰ অরিযানঞ্চ ধম্ম’’ন্তি (পারা॰ অট্ঠ॰ ২.১৯৭) অট্ঠকথায ৰুত্তং ঝানলাভীহি চেৰ অট্ঠহি অরিযপুগ্গলেহি চ অধিগতত্তা তেসং সন্তকন্তি সঙ্খ্যং গতং উত্তরিমনুস্সধম্মং।
Attaniasantanti tasmiṃ attabhāve attano santāne anuppāditatāya avijjamānaṃ. Attassitameva katvāti attupanāyikaṃ katvā attani vijjamānaṃ viya katvā taṃ upanetvā . Bhavaṃ adhiṭṭhāya ca vattamānanti paṭisandhito paṭṭhāya ca vattantaṃ bhavaṃ cittena adhiṭṭhahitvā takketvā, citte ṭhapetvāti vuttaṃ hoti. Aññāpadesañca vināti ‘‘yo te vihāre vasatīdha bhikkhū’’tiādinā nayena vakkhamānaṃ pariyāyakathaṃ ṭhapetvā. Adhimānañca vināti adiṭṭhe diṭṭhasaññitādisabhāvaṃ adhigatamānasaṅkhātaṃ ‘‘adhigatauttarimanussadhammo ahamhī’’ti adhimānañca ṭhapetvā. Jhānādibhedanti jhānādayo bhedā visesā yassa taṃ jhānādibhedaṃ, ‘‘uttarimanussadhammo nāma jhānaṃ vimokkho samādhi samāpatti ñāṇadassanaṃ maggabhāvanā phalasacchi kiriyā kilesappahānaṃ vinīvaraṇatā cittassa suññāgāre abhiratī’’ti (pārā. 198, 199) padabhājane vuttaṃ jhānādidhammavisesanti attho. ‘‘Uttarimanussadhammanti uttarimanussānaṃ jhāyīnañceva ariyānañca dhamma’’nti (pārā. aṭṭha. 2.197) aṭṭhakathāya vuttaṃ jhānalābhīhi ceva aṭṭhahi ariyapuggalehi ca adhigatattā tesaṃ santakanti saṅkhyaṃ gataṃ uttarimanussadhammaṃ.
ৰিঞ্ঞত্তিপথে ঠিতস্স কাযেন ৰা ৰাচায ৰা যো ভিক্খু সমুদাচরেয্যাতি অজ্ঝাহরিত্ৰা যোজেতব্বং। ৰিঞ্ঞত্তিপথে ঠিতস্সাতি দ্ৰাদসহত্থব্ভন্তরে পদেসে ঠিতস্স ‘‘ইত্থিযা ৰা পুরিসস্স ৰা গহট্ঠস্স ৰা পব্বজিতস্স ৰা’’তি (পারা॰ ১৯৮) পদভাজনে ৰুত্তস্স যস্স কস্সচি। কাযেন ৰাতি হত্থমুদ্দাদিৰসেন কাযেন ৰা। ‘‘সিক্খাপচ্চক্খানং হত্থমুদ্দায সীসং ন ওতরতি, ইদং অভূতারোচনং হত্থমুদ্দাযপি ওতরতী’’তি (পারা॰ অট্ঠ॰ ২.২১৫) অট্ঠকথাযং ৰুত্তত্তা ইধ হত্থমুদ্দাদিহত্থৰিকারো চ অঙ্গপচ্চঙ্গচোপনঞ্চ ‘‘কাযেনা’’তি ইমিনা গহেতব্বং। ৰাচায ৰাতি যো সৰনূপচারে ঠিতো তেন ৰিঞ্ঞাতুং সক্কুণেয্যেন যেন কেনচি ৰোহারেন ৰা। যো ভিক্খূতি যো উপসম্পন্নো থেরো ৰা নৰো ৰা মজ্ঝিমো ৰা। সমুদাচরেয্যাতি ‘‘পঠমং ঝানং সমাপজ্জামী’’তিআদিৰচনপ্পকারেসু যং কঞ্চি পকারং ৰদেয্য। তদত্থেতি তেন ৰুত্তৰাক্যস্স অত্থে। ঞাতেৰাতি ঞাতে এৰ। মাতুগামং ৰা পুরিসং ৰা যং কিঞ্চি উদ্দিস্স ৰুত্তে, তেনেৰ ৰা অনুদ্দিস্স ৰুত্তে সৰনূপচারে ঠিতেন যেন কেনচি মনুস্সভূতেন ৰচনসমনন্তরমেৰ ‘‘অযং পঠমজ্ঝানলাভী’’তিআদিকে যথাৰুত্তে অত্থপ্পকারে ঞাতেযেৰ। ‘‘সো’’তি অজ্ঝাহরিত্ৰা ‘‘সো পুন রুল়্হিভাৰে অভব্বো’’তি যোজেতব্বং, অত্তনি অৰিজ্জমানগুণং সন্তং ৰিয কত্ৰা ইচ্ছাচারে ঠত্ৰা এৰং কথিতপুগ্গলো সীলে পতিট্ঠায উপরূপরি লব্ভমানলোকিযলোকুত্তরগুণেহি বুদ্ধিসঙ্খাতং সাসনে বুদ্ধিমধিগন্তুং অনরহোতি অত্থো । কিং ৰিযাতি আহ ‘‘যথেৰ…পে॰… রুল়িভাৰে’’তি। ‘‘যথা’’তি এতেন সম্বন্ধো ‘‘তথা’’তি, যথা তালো মত্থকচ্ছিন্নো অভব্বো পুন ৰিরুল়্হিযা, সোপি পারাজিকং আপন্নো তথেৰ দট্ঠব্বোতি অত্থো।
Viññattipathe ṭhitassa kāyena vā vācāya vā yo bhikkhu samudācareyyāti ajjhāharitvā yojetabbaṃ. Viññattipathe ṭhitassāti dvādasahatthabbhantare padese ṭhitassa ‘‘itthiyā vā purisassa vā gahaṭṭhassa vā pabbajitassa vā’’ti (pārā. 198) padabhājane vuttassa yassa kassaci. Kāyena vāti hatthamuddādivasena kāyena vā. ‘‘Sikkhāpaccakkhānaṃ hatthamuddāya sīsaṃ na otarati, idaṃ abhūtārocanaṃ hatthamuddāyapi otaratī’’ti (pārā. aṭṭha. 2.215) aṭṭhakathāyaṃ vuttattā idha hatthamuddādihatthavikāro ca aṅgapaccaṅgacopanañca ‘‘kāyenā’’ti iminā gahetabbaṃ. Vācāya vāti yo savanūpacāre ṭhito tena viññātuṃ sakkuṇeyyena yena kenaci vohārena vā. Yo bhikkhūti yo upasampanno thero vā navo vā majjhimo vā. Samudācareyyāti ‘‘paṭhamaṃ jhānaṃ samāpajjāmī’’tiādivacanappakāresu yaṃ kañci pakāraṃ vadeyya. Tadattheti tena vuttavākyassa atthe. Ñātevāti ñāte eva. Mātugāmaṃ vā purisaṃ vā yaṃ kiñci uddissa vutte, teneva vā anuddissa vutte savanūpacāre ṭhitena yena kenaci manussabhūtena vacanasamanantarameva ‘‘ayaṃ paṭhamajjhānalābhī’’tiādike yathāvutte atthappakāre ñāteyeva. ‘‘So’’ti ajjhāharitvā ‘‘so puna ruḷhibhāve abhabbo’’ti yojetabbaṃ, attani avijjamānaguṇaṃ santaṃ viya katvā icchācāre ṭhatvā evaṃ kathitapuggalo sīle patiṭṭhāya uparūpari labbhamānalokiyalokuttaraguṇehi buddhisaṅkhātaṃ sāsane buddhimadhigantuṃ anarahoti attho . Kiṃ viyāti āha ‘‘yatheva…pe… ruḷibhāve’’ti. ‘‘Yathā’’ti etena sambandho ‘‘tathā’’ti, yathā tālo matthakacchinno abhabbo puna viruḷhiyā, sopi pārājikaṃ āpanno tatheva daṭṭhabboti attho.
৩০৮-৯. ইদানি ‘‘ঞাতেৰ অভব্বো’’তি চ ‘‘অঞ্ঞাপদেসঞ্চ ৰিনা’’তি চ এতস্মিং ৰাক্যদ্ৰযে ব্যতিরেকত্থৰসেন সম্ভৰন্তং আপত্তিভেদং দস্সেতুমাহ ‘‘অসন্তমেৰা’’তিআদি।
308-9. Idāni ‘‘ñāteva abhabbo’’ti ca ‘‘aññāpadesañca vinā’’ti ca etasmiṃ vākyadvaye byatirekatthavasena sambhavantaṃ āpattibhedaṃ dassetumāha ‘‘asantamevā’’tiādi.
অনন্তরন্তি ‘‘পঠমং ঝানং সমাপজ্জামী’’তিআদিৰচনসমনন্তরমেৰ। সোতি দ্ৰাদসহত্থব্ভন্তরে ঠত্ৰা যেন তং ৰচনং সুতং, সো পরো পুগ্গলো। জানাতি চেতি ‘‘অযং পঠমজ্ঝানলাভী’’তিআদিৰসেন তেন ৰুত্তৰচনপ্পকারেন অত্থং অৰিরাধেত্ৰা অচিরেনেৰ সচে জানাতীতি অত্থো। যো পন ঝানাদীনং অত্তনা অলদ্ধভাৰেন ৰা আগমে উগ্গহপরিপুচ্ছাদিৰসেন অপরিচিতত্তা ৰা ঝানাদিসরূপং অজানন্তোপি কেৰলং ‘‘ঝানং ৰিমোক্খো সমাধি সমাপত্তী’’তিআদিৰচনানং সুতপুব্বত্তা তেন ‘‘পঠমং ঝানং সমাপজ্জামী’’তিআদিৰচনে ৰুত্তে ‘‘ঝানং কির এস সমাপজ্জতী’’তি যদি এত্তকমত্থম্পি জানাতি, সোপি ‘‘জানাতি’’চ্চেৰ অট্ঠকথাযং (পারা॰ অট্ঠ॰ ২.২১৫) ৰুত্তোতি গহেতব্বো। চুতো হীতি হি-সদ্দো অৰধারণে, অত্তনা ৰুত্তে তেন তত্তকেযেৰ ঞাতে সো অসন্তগুণদীপকো পাপপুগ্গলো ফলসম্পত্তিসম্পন্নং ইমং সাসনামতমহাপাদপং আরুয্হাপি ফলং অপরিভুঞ্জিত্ৰা ৰিরাধেত্ৰা পতিত্ৰা মতো নাম হোতীতি ৰুত্তং হোতি। ইমস্সেৰত্থস্স ‘‘অসন্ত’’মিচ্চাদিনা পঠমং ৰুত্তস্সপি ব্যতিরেকত্থং দস্সেতুং অনুৰাদৰসেন ৰুত্তত্তা পুনরুত্তিদোসো ন হোতীতি দট্ঠব্বং।
Anantaranti ‘‘paṭhamaṃ jhānaṃ samāpajjāmī’’tiādivacanasamanantarameva. Soti dvādasahatthabbhantare ṭhatvā yena taṃ vacanaṃ sutaṃ, so paro puggalo. Jānāti ceti ‘‘ayaṃ paṭhamajjhānalābhī’’tiādivasena tena vuttavacanappakārena atthaṃ avirādhetvā acireneva sace jānātīti attho. Yo pana jhānādīnaṃ attanā aladdhabhāvena vā āgame uggahaparipucchādivasena aparicitattā vā jhānādisarūpaṃ ajānantopi kevalaṃ ‘‘jhānaṃ vimokkho samādhi samāpattī’’tiādivacanānaṃ sutapubbattā tena ‘‘paṭhamaṃ jhānaṃ samāpajjāmī’’tiādivacane vutte ‘‘jhānaṃ kira esa samāpajjatī’’ti yadi ettakamatthampi jānāti, sopi ‘‘jānāti’’cceva aṭṭhakathāyaṃ (pārā. aṭṭha. 2.215) vuttoti gahetabbo. Cuto hīti hi-saddo avadhāraṇe, attanā vutte tena tattakeyeva ñāte so asantaguṇadīpako pāpapuggalo phalasampattisampannaṃ imaṃ sāsanāmatamahāpādapaṃ āruyhāpi phalaṃ aparibhuñjitvā virādhetvā patitvā mato nāma hotīti vuttaṃ hoti. Imassevatthassa ‘‘asanta’’miccādinā paṭhamaṃ vuttassapi byatirekatthaṃ dassetuṃ anuvādavasena vuttattā punaruttidoso na hotīti daṭṭhabbaṃ.
ইদানি তং ব্যতিরেকত্থং দস্সেতুমাহ ‘‘নো চে…পে॰… হোতী’’তি। যস্স সো আরোচেতি, সো চে ন জানাতি, অস্স অসন্তগুণদীপকস্স মুসাৰাদিনো।
Idāni taṃ byatirekatthaṃ dassetumāha ‘‘no ce…pe… hotī’’ti. Yassa so āroceti, so ce na jānāti, assa asantaguṇadīpakassa musāvādino.
‘‘অঞ্ঞাপদেসঞ্চ ৰিনা’’তি ইমিনা দস্সিতব্যতিরেকত্থস্স ভাৰাভাৰে সম্ভৰন্তং আপত্তিভেদং দস্সেতুমাহ ‘‘যো তে’’তিআদি। যো ভিক্খু তে তৰ ইধ ইমস্মিং ৰিহারে ৰসতীতি যোজনা। দীপিতেতি অত্তনো অধিপ্পাযে পকাসিতে। জানাতি চেতি যো তথা ৰুত্তৰচনং অস্সোসি, সো ‘‘এস অঞ্ঞাপদেসেন অত্তনো ঝানলাভিতং দীপেতী’’তি ৰা ‘‘এসো ঝানলাভী’’তি ৰা ৰচনসমনন্তরমেৰ সচে জানাতি। অস্সাতি এৰং কথিতৰচনৰতো তস্স ভিক্খুনো। তং তেন ৰুত্তৰচনং। দুক্কটমেৰ হোতি, ন থুল্লচ্চযন্তি অত্থো। অত্তনো আৰাসকারানং দাযকানং অঞ্ঞস্স পৰত্তিং কথেন্তস্স ৰিয অত্তনোযেৰ অসন্তগুণং সন্তমিৰ কত্ৰা কথনাকারো ইমায গাথায অত্থতো ৰুত্তোতি দট্ঠব্বো।
‘‘Aññāpadesañca vinā’’ti iminā dassitabyatirekatthassa bhāvābhāve sambhavantaṃ āpattibhedaṃ dassetumāha ‘‘yo te’’tiādi. Yo bhikkhu te tava idha imasmiṃ vihāre vasatīti yojanā. Dīpiteti attano adhippāye pakāsite. Jānāti ceti yo tathā vuttavacanaṃ assosi, so ‘‘esa aññāpadesena attano jhānalābhitaṃ dīpetī’’ti vā ‘‘eso jhānalābhī’’ti vā vacanasamanantarameva sace jānāti. Assāti evaṃ kathitavacanavato tassa bhikkhuno. Taṃ tena vuttavacanaṃ. Dukkaṭameva hoti, na thullaccayanti attho. Attano āvāsakārānaṃ dāyakānaṃ aññassa pavattiṃ kathentassa viya attanoyeva asantaguṇaṃ santamiva katvā kathanākāro imāya gāthāya atthato vuttoti daṭṭhabbo.
এত্থ চ ঝানলাভীতি চাতি অৰুত্তসমুচ্চযত্থেন চ-সদ্দেন পাল়িযং (পারা॰ ২২০) আগতা অৰসেসপরিযাযৰারা চ সঙ্গহিতাতি দট্ঠব্বং। তথা ঝানলাভীতি এত্থ ঝানগ্গহণেন ৰিমোক্খাদীনঞ্চ উপলক্খিতত্তা ঝানাদিদসৰিধউত্তরিমনুস্সধম্মৰিসযপরিযাযকথং সুতৰতা তঙ্খণে তদত্থে ঞাতে পরিযাযসমুল্লাপকেন আপজ্জিতব্বং থুল্লচ্চযঞ্চ অৰিঞ্ঞাতে ৰা চিরেন ৰিঞ্ঞাতে ৰা আপজ্জিতব্বং দুক্কটঞ্চ ইমায গাথায অত্থতো দস্সিতমেৰাতি দট্ঠব্বং।
Ettha ca jhānalābhīti cāti avuttasamuccayatthena ca-saddena pāḷiyaṃ (pārā. 220) āgatā avasesapariyāyavārā ca saṅgahitāti daṭṭhabbaṃ. Tathā jhānalābhīti ettha jhānaggahaṇena vimokkhādīnañca upalakkhitattā jhānādidasavidhauttarimanussadhammavisayapariyāyakathaṃ sutavatā taṅkhaṇe tadatthe ñāte pariyāyasamullāpakena āpajjitabbaṃ thullaccayañca aviññāte vā cirena viññāte vā āpajjitabbaṃ dukkaṭañca imāya gāthāya atthato dassitamevāti daṭṭhabbaṃ.
৩১০. এতন্তি যথাৰুত্তপ্পকারং ঝানাদিভেদং উত্তরিমনুস্সধম্মং। অধিমানাতি ‘‘অধিগতোহ’’ন্তি এৰং উপ্পন্নমানা, অধিকমানাতি অত্থো, ‘‘অযং ধম্মো মযা অধিগতো’’তি দল়্হমুপ্পন্নেন মানেন কথেন্তস্সাতি ৰুত্তং হোতি। ৰুত্তো অনাপত্তিনযোতি আপত্তিযা অভাৰো অনাপত্তি, সা এৰ নযো নেতব্বো বুজ্ঝিতব্বোতি কত্ৰা, অনাপত্তীতি ৰুত্তং হোতি। ‘‘অধিমানেনা’’তি এৰং ৰুত্তো ভগৰতাতি অত্থো, ‘‘অধিগতধম্মোহ’’ন্তি অধিমানেন ‘‘অহং পঠমজ্ঝানলাভী’’তিআদীনি ৰদন্তস্স অনাপত্তীতি ৰুত্তং হোতি।
310.Etanti yathāvuttappakāraṃ jhānādibhedaṃ uttarimanussadhammaṃ. Adhimānāti ‘‘adhigatoha’’nti evaṃ uppannamānā, adhikamānāti attho, ‘‘ayaṃ dhammo mayā adhigato’’ti daḷhamuppannena mānena kathentassāti vuttaṃ hoti. Vutto anāpattinayoti āpattiyā abhāvo anāpatti, sā eva nayo netabbo bujjhitabboti katvā, anāpattīti vuttaṃ hoti. ‘‘Adhimānenā’’ti evaṃ vutto bhagavatāti attho, ‘‘adhigatadhammoha’’nti adhimānena ‘‘ahaṃ paṭhamajjhānalābhī’’tiādīni vadantassa anāpattīti vuttaṃ hoti.
অযমধিমানো কস্স হোতি, কস্স ন হোতীতি চে? অরিযানং ন হোতি মগ্গপচ্চৰেক্খণাদীহি পঞ্চহি পচ্চৰেক্খণাহি সঞ্জাতসোমনস্সানং ৰিতিণ্ণকঙ্খত্তা। দুস্সীলস্সাপি ন হোতি তস্স অরিযগুণাধিগমে নিরুস্সাহত্তা। সুসীলস্সাপি কম্মট্ঠানানুযোগরহিতস্স নিদ্দারামতাদিমনুযুত্তস্স ন হোতি ৰিস্সট্ঠভাৰনাভিযোগত্তা। সুপরিসুদ্ধায সীলসম্পত্তিযা পতিট্ঠায সমথভাৰনামনুযুত্তস্স রূপারূপসমাপত্তিযং পত্তাসিনো ৰা ৰিপস্সনাভিযুত্তস্স সোপক্কিলেসোদযব্বযঞাণলাভিনো ৰা উপ্পজ্জতি। সো সমথৰিপস্সনাভাৰনাহি কিলেসসমুদাচারস্স অভাৰে উপ্পন্নে তে ৰিসেসভাগিনো ভৰিতুং অদত্ৰা ঠিতিভাগিনো কত্ৰা ঠপেতীতি ৰেদিতব্বো।
Ayamadhimāno kassa hoti, kassa na hotīti ce? Ariyānaṃ na hoti maggapaccavekkhaṇādīhi pañcahi paccavekkhaṇāhi sañjātasomanassānaṃ vitiṇṇakaṅkhattā. Dussīlassāpi na hoti tassa ariyaguṇādhigame nirussāhattā. Susīlassāpi kammaṭṭhānānuyogarahitassa niddārāmatādimanuyuttassa na hoti vissaṭṭhabhāvanābhiyogattā. Suparisuddhāya sīlasampattiyā patiṭṭhāya samathabhāvanāmanuyuttassa rūpārūpasamāpattiyaṃ pattāsino vā vipassanābhiyuttassa sopakkilesodayabbayañāṇalābhino vā uppajjati. So samathavipassanābhāvanāhi kilesasamudācārassa abhāve uppanne te visesabhāgino bhavituṃ adatvā ṭhitibhāgino katvā ṭhapetīti veditabbo.
পনাতি অপি-সদ্দত্থো। ‘‘এৰ’’ন্তি ইমিনা ‘‘অনাপত্তিনযো ৰুত্তো’’তি পচ্চামসতি। ‘‘অৰত্তুকামস্সা’’তি ইদঞ্চ পাল়িযং আগতং ‘‘অনুল্লপনাধিপ্পাযস্সা’’তি (পারা॰ ২২২, ২২৫) ইদঞ্চ অনত্থন্তরং। অৰত্তুকামস্সাতি এৰং ৰুত্তোতি যোজনা। কোহঞ্ঞেন পাপিচ্ছাপকতস্স ‘‘ঝানাদীনং লাভিম্হী’’তি ৰদন্তস্স অজ্ঝাসযো উল্লপনাধিপ্পাযো নাম, তথা অহুত্ৰা সব্রহ্মচারীসু অঞ্ঞং ব্যাকরোন্তস্স এৰমেৰ অনাপত্তিভাৰো ৰুত্তো ভগৰতাতি অত্থো। আদিকস্সাপি এৰং ৰুত্তোতি যোজনা। ‘‘অনাপত্তি আদিকম্মিকস্সা’’তি (পারা॰ ২২২) আদিকম্মিকস্সাপি অনাপত্তিভাৰো ৰুত্তো ভগৰতাতি অত্থো। ইমস্মিং সিক্খাপদে ৰগ্গুমুদাতীরিযা ভিক্খূ আদিকম্মিকা। অৰুত্তসমুচ্চযত্থেন তথা-সদ্দেন ইধ অৰুত্তউম্মত্তকখিত্তচিত্তৰেদনট্টা গহিতা।
Panāti api-saddattho. ‘‘Eva’’nti iminā ‘‘anāpattinayo vutto’’ti paccāmasati. ‘‘Avattukāmassā’’ti idañca pāḷiyaṃ āgataṃ ‘‘anullapanādhippāyassā’’ti (pārā. 222, 225) idañca anatthantaraṃ. Avattukāmassāti evaṃ vuttoti yojanā. Kohaññena pāpicchāpakatassa ‘‘jhānādīnaṃ lābhimhī’’ti vadantassa ajjhāsayo ullapanādhippāyo nāma, tathā ahutvā sabrahmacārīsu aññaṃ byākarontassa evameva anāpattibhāvo vutto bhagavatāti attho. Ādikassāpi evaṃ vuttoti yojanā. ‘‘Anāpatti ādikammikassā’’ti (pārā. 222) ādikammikassāpi anāpattibhāvo vutto bhagavatāti attho. Imasmiṃ sikkhāpade vaggumudātīriyā bhikkhū ādikammikā. Avuttasamuccayatthena tathā-saddena idha avuttaummattakakhittacittavedanaṭṭā gahitā.
৩১১. পাপিচ্ছতাতি ‘‘এৰং মং জনো সম্ভাৰেস্সতী’’তি ঝানলাভিতাদিহেতুকায সম্ভাৰনায সম্ভাৰনানিমিত্তস্স পচ্চযপটিলাভস্স পত্থনাসঙ্খাতায পাপিকায লামিকায ইচ্ছায সমন্নাগতভাৰো চ। তস্সাতি যং ঝানাদিভেদভিন্নং উত্তরিমনুস্সধম্মং সমুল্লপি, তস্স ধম্মস্স। অসন্তভাৰোতি অত্তসন্তানে পচ্চুপ্পন্নজাতিযং অনুপ্পাদিতভাৰেন অৰিজ্জমানভাৰো। মনুস্সকস্স আরোচনঞ্চেৰাতি ৰুত্তৰচনস্স অত্থং তঙ্খণে জাননকস্স মনুস্সজাতিকস্স ‘‘পঠমং ঝানং সমাপজ্জি’’ন্তিআদিনা নযেন সৰনূপচারে ঠত্ৰা আরোচনঞ্চ। নঞ্ঞাপদেসেন আরোচনঞ্চাতি সম্বন্ধো। ‘‘যো তে ৰিহারে ৰসতি, সো ভিক্খু পঠমং ঝানং সমাপজ্জী’’তিআদিনা (পারা॰ ২২০) নযেন পৰত্তঅঞ্ঞাপদেসং ৰিনা উজুকমেৰ আরোচনঞ্চ। তদেৰ ঞাণন্তি তদা এৰ ঞাণং, অচিরাযিত্ৰা ৰুত্তক্খণেযেৰ জাননন্তি অত্থো। এত্থাতি ইমস্মিং চতুত্থপারাজিকাপত্তিযং। ধীরা ৰিনযধরা।
311.Pāpicchatāti ‘‘evaṃ maṃ jano sambhāvessatī’’ti jhānalābhitādihetukāya sambhāvanāya sambhāvanānimittassa paccayapaṭilābhassa patthanāsaṅkhātāya pāpikāya lāmikāya icchāya samannāgatabhāvo ca. Tassāti yaṃ jhānādibhedabhinnaṃ uttarimanussadhammaṃ samullapi, tassa dhammassa. Asantabhāvoti attasantāne paccuppannajātiyaṃ anuppāditabhāvena avijjamānabhāvo. Manussakassa ārocanañcevāti vuttavacanassa atthaṃ taṅkhaṇe jānanakassa manussajātikassa ‘‘paṭhamaṃ jhānaṃ samāpajji’’ntiādinā nayena savanūpacāre ṭhatvā ārocanañca. Naññāpadesena ārocanañcāti sambandho. ‘‘Yo te vihāre vasati, so bhikkhu paṭhamaṃ jhānaṃ samāpajjī’’tiādinā (pārā. 220) nayena pavattaaññāpadesaṃ vinā ujukameva ārocanañca. Tadeva ñāṇanti tadā eva ñāṇaṃ, acirāyitvā vuttakkhaṇeyeva jānananti attho. Etthāti imasmiṃ catutthapārājikāpattiyaṃ. Dhīrā vinayadharā.
৩১২. পঠমে দুতিযে চন্তেতি মনুস্সৰিগ্গহপারাজিকৰজ্জিতে যথাৰুত্তপারাজিকত্তযে। পরিযাযো ন ৰিজ্জতীতি পারাজিকাপত্তিপথং পরিযাযৰচনং ন লভতি। ‘‘ন পনেতরে’’তি ইদং এত্থাপি যোজেতব্বং, ইতরে পন ততিযপারাজিকে পরিযাযো ন ৰিজ্জতীতি অত্থো। ‘‘মরণৰণ্ণং ৰা সংৰণ্ণেয্যা’’তি (পারা॰ ১৭২) চ ‘‘অম্ভো পুরিস কিং তুয্হিমিনা’’তিআদিনা (পারা॰ ১৭১) চ ‘‘যো এৰং মরতি, সো ধনং ৰা লভতী’’তিআদিনা (পারা॰ ১৭৫) চ পরিযাযেন ৰদন্তস্স পারাজিকমেৰাতি ৰুত্তং হোতি। আণত্তি পারাজিকহেতুআণত্তিকপ্পযোগো। ন পনেতরেতি পঠমচতুত্থপারাজিকদ্ৰযে পন পারাজিকহেতুভূতা আণত্তি ন লভতীতি অত্থো।
312.Paṭhame dutiye canteti manussaviggahapārājikavajjite yathāvuttapārājikattaye. Pariyāyo na vijjatīti pārājikāpattipathaṃ pariyāyavacanaṃ na labhati. ‘‘Na panetare’’ti idaṃ etthāpi yojetabbaṃ, itare pana tatiyapārājike pariyāyo na vijjatīti attho. ‘‘Maraṇavaṇṇaṃ vā saṃvaṇṇeyyā’’ti (pārā. 172) ca ‘‘ambho purisa kiṃ tuyhiminā’’tiādinā (pārā. 171) ca ‘‘yo evaṃ marati, so dhanaṃ vā labhatī’’tiādinā (pārā. 175) ca pariyāyena vadantassa pārājikamevāti vuttaṃ hoti. Āṇatti pārājikahetuāṇattikappayogo. Na panetareti paṭhamacatutthapārājikadvaye pana pārājikahetubhūtā āṇatti na labhatīti attho.
৩১৩. আদীতি পঠমপারাজিকং। একসমুট্ঠানন্তি এককারণং। সমুট্ঠাতি আপত্তি এতস্মাতি সমুট্ঠানং, কারণং কাযাদি। তং পন ছব্বিধং কাযো, ৰাচা, কাযৰাচা, কাযচিত্তং, ৰাচাচিত্তং, কাযৰাচাচিত্তন্তি। তেসং ৰিনিচ্ছযং উত্তরে (উ॰ ৰি॰ ৩২৫ আদযো) যথাগতট্ঠানেযেৰ চ ৰণ্ণযিস্সাম। তত্রিদং একসমুট্ঠানং একং কাযচিত্তং সমুট্ঠানং এতস্সাতি কত্ৰা। তেনাহ ‘‘দুৰঙ্গং কাযচিত্ততো’’তি। ‘‘তং সমুট্ঠান’’ন্তি অজ্ঝাহারো। যেন সমুট্ঠানেন পঠমপারাজিকাপত্তি উপ্পজ্জতি, তংসমুট্ঠানসঙ্খাতং কারণং। অঙ্গজাতসঙ্খাতং কাযঞ্চ সেৰনচিত্তঞ্চাতি দ্ৰযং অঙ্গং অৰযৰং এতস্সাতি দুৰঙ্গং, তদুভযসভাৰন্তি অত্থো যথা ‘‘দুৰঙ্গং চতুত্থজ্ঝান’’ন্তি। সেসাতি অৰসিট্ঠানি তীণি পারাজিকানি। তিসমুট্ঠানাতি কাযচিত্তং, ৰাচাচিত্তং, কাযৰাচাচিত্তন্তি তিসমুট্ঠানা তীণি সমুট্ঠানানি এতেসন্তি কত্ৰা। তেসন্তি তেসং তিণ্ণং সমুট্ঠানানং। অঙ্গানীতি অৰযৰানি। সত্ত কাযো, চিত্তং, ৰাচা, চিত্তং, কাযো, ৰাচা, চিত্তন্তি, তংসভাৰাতি ৰুত্তং হোতি।
313.Ādīti paṭhamapārājikaṃ. Ekasamuṭṭhānanti ekakāraṇaṃ. Samuṭṭhāti āpatti etasmāti samuṭṭhānaṃ, kāraṇaṃ kāyādi. Taṃ pana chabbidhaṃ kāyo, vācā, kāyavācā, kāyacittaṃ, vācācittaṃ, kāyavācācittanti. Tesaṃ vinicchayaṃ uttare (u. vi. 325 ādayo) yathāgataṭṭhāneyeva ca vaṇṇayissāma. Tatridaṃ ekasamuṭṭhānaṃ ekaṃ kāyacittaṃ samuṭṭhānaṃ etassāti katvā. Tenāha ‘‘duvaṅgaṃ kāyacittato’’ti. ‘‘Taṃ samuṭṭhāna’’nti ajjhāhāro. Yena samuṭṭhānena paṭhamapārājikāpatti uppajjati, taṃsamuṭṭhānasaṅkhātaṃ kāraṇaṃ. Aṅgajātasaṅkhātaṃ kāyañca sevanacittañcāti dvayaṃ aṅgaṃ avayavaṃ etassāti duvaṅgaṃ, tadubhayasabhāvanti attho yathā ‘‘duvaṅgaṃ catutthajjhāna’’nti. Sesāti avasiṭṭhāni tīṇi pārājikāni. Tisamuṭṭhānāti kāyacittaṃ, vācācittaṃ, kāyavācācittanti tisamuṭṭhānā tīṇi samuṭṭhānāni etesanti katvā. Tesanti tesaṃ tiṇṇaṃ samuṭṭhānānaṃ. Aṅgānīti avayavāni. Satta kāyo, cittaṃ, vācā, cittaṃ, kāyo, vācā, cittanti, taṃsabhāvāti vuttaṃ hoti.
৩১৪. আদীতি মেথুনধম্মপটিসেৰনচিত্তসম্পযুত্তচেতনাসভাৰং পঠমপারাজিকং। সুখোপেক্খাযুতং উদীরিতন্তি যোজনা। ইট্ঠালম্বণপটিলাভাদিসোমনস্সহেতুম্হি সতি সুখৰেদনাসম্পযুত্তং হোতি, তস্মিং অসতি উপেক্খাৰেদনায সম্পযুত্তং হোতীতি ৰুত্তন্তি অত্থো।
314.Ādīti methunadhammapaṭisevanacittasampayuttacetanāsabhāvaṃ paṭhamapārājikaṃ. Sukhopekkhāyutaṃ udīritanti yojanā. Iṭṭhālambaṇapaṭilābhādisomanassahetumhi sati sukhavedanāsampayuttaṃ hoti, tasmiṃ asati upekkhāvedanāya sampayuttaṃ hotīti vuttanti attho.
ততিযং দুক্খৰেদনন্তি ততিযং মনুস্সৰিগ্গহপারাজিকং দোসচিত্তসম্পযুত্তচেতনাসভাৰত্তা দুক্খৰেদনায সম্পযুত্তন্তি অত্থো।
Tatiyaṃ dukkhavedananti tatiyaṃ manussaviggahapārājikaṃ dosacittasampayuttacetanāsabhāvattā dukkhavedanāya sampayuttanti attho.
দুতিযন্তি অদিন্নাদানচেতনালক্খণং দুতিযপারাজিকং। লোভেন পরসন্তকং চোরিকায গণ্হন্তস্স সোমনস্সসম্পযুত্তং হোতি, কোধেন অভিভূতস্স ৰিলুম্পিত্ৰা ৰা ৰিলুম্পাপেত্ৰা ৰা গণ্হতো দোমনস্সসম্পযুত্তং হোতি, সোমনস্সং, দোমনস্সঞ্চ ৰিনা অগ্গহেতুকামো ৰিয হুত্ৰা উদাসীনস্স গণ্হতো উপেক্খাসম্পযুত্তং হোতীতি ‘‘তিৰেদনমুদীরিত’’ন্তি আহ।
Dutiyanti adinnādānacetanālakkhaṇaṃ dutiyapārājikaṃ. Lobhena parasantakaṃ corikāya gaṇhantassa somanassasampayuttaṃ hoti, kodhena abhibhūtassa vilumpitvā vā vilumpāpetvā vā gaṇhato domanassasampayuttaṃ hoti, somanassaṃ, domanassañca vinā aggahetukāmo viya hutvā udāsīnassa gaṇhato upekkhāsampayuttaṃ hotīti ‘‘tivedanamudīrita’’nti āha.
চতুত্থঞ্চাতি উত্তরিমনুস্সধম্মসমুল্লপনচেতনালক্খণং চতুত্থপারাজিকঞ্চ। সম্ভাৰনিচ্ছায পচ্চযাসায ৰা তুট্ঠতুট্ঠস্সেৰ ‘‘অহং পঠমং ঝানং সমাপজ্জামী’’তিআদিনা নযেন অত্তনো উত্তরিমনুস্সধম্মলাভিতং ৰদন্তস্স সোমনস্সসম্পযুত্তং হোতি, অঞ্ঞপুগ্গলেসু পটিহতচিত্তস্স কলহপুরেক্খারতায ৰদতো দোমনস্সসম্পযুত্তং হোতি, পচ্চযালাভেন জিঘচ্ছাদিদুক্খং সহিতুমসক্কুণেয্যতায উদাসীনস্স ৰদতো উপেক্খাসম্পযুত্তং হোতীতি ‘‘তিৰেদনমুদীরিত’’ন্তি আহ।
Catutthañcāti uttarimanussadhammasamullapanacetanālakkhaṇaṃ catutthapārājikañca. Sambhāvanicchāya paccayāsāya vā tuṭṭhatuṭṭhasseva ‘‘ahaṃ paṭhamaṃ jhānaṃ samāpajjāmī’’tiādinā nayena attano uttarimanussadhammalābhitaṃ vadantassa somanassasampayuttaṃ hoti, aññapuggalesu paṭihatacittassa kalahapurekkhāratāya vadato domanassasampayuttaṃ hoti, paccayālābhena jighacchādidukkhaṃ sahitumasakkuṇeyyatāya udāsīnassa vadato upekkhāsampayuttaṃ hotīti ‘‘tivedanamudīrita’’nti āha.
৩১৫. অট্ঠ চিত্তানীতি লোভসহগতানি অট্ঠ চিত্তানি লব্ভরেতি যোজনা, লব্ভন্তীতি অত্থো, চেতনাসভাৰেন পঠমপারাজিকেন সম্পযুত্তানীতি ৰুত্তং হোতি। এৰমুপরিপি। দুৰেতি পটিঘসম্পযুত্তানি দ্ৰে চিত্তানি। দস চিত্তানীতি লোভসহগতানি অট্ঠ, দ্ৰে পটিঘসম্পযুত্তানীতি। লব্ভরেতি সম্পযুত্তভাৰেন লব্ভন্তি।
315.Aṭṭha cittānīti lobhasahagatāni aṭṭha cittāni labbhareti yojanā, labbhantīti attho, cetanāsabhāvena paṭhamapārājikena sampayuttānīti vuttaṃ hoti. Evamuparipi. Duveti paṭighasampayuttāni dve cittāni. Dasa cittānīti lobhasahagatāni aṭṭha, dve paṭighasampayuttānīti. Labbhareti sampayuttabhāvena labbhanti.
৩১৬. তস্মাতি যস্মা যথাৰুত্তচিত্তেহি সম্পযুত্তং, তেন হেতুনা। ক্রিযাতি করণেন আপজ্জিতব্বত্তা কিরিযা। ৰীতিক্কমসঞ্ঞায অভাৰেন মুচ্চনতো সঞ্ঞায ৰিমোক্খো এতস্সাতি সঞ্ঞাৰিমোক্খং। লোকৰজ্জন্তি লোকেন অকুসলভাৰতো ৰজ্জনীযন্তি দীপিতং পকাসিতং।
316.Tasmāti yasmā yathāvuttacittehi sampayuttaṃ, tena hetunā. Kriyāti karaṇena āpajjitabbattā kiriyā. Vītikkamasaññāya abhāvena muccanato saññāya vimokkho etassāti saññāvimokkhaṃ. Lokavajjanti lokena akusalabhāvato vajjanīyanti dīpitaṃ pakāsitaṃ.
৩১৭. আপত্তিযংযেৰাতি এৰকারেন ন সিক্খাপদেতি দস্সেতি। ইদং ৰিধানন্তি সমুট্ঠানাদিকং ইদং যথাৰুত্তং ৰিধানং। ৰিভাৰিনাতি পঞ্ঞৰতা ৰিনযধরেন।
317.Āpattiyaṃyevāti evakārena na sikkhāpadeti dasseti. Idaṃ vidhānanti samuṭṭhānādikaṃ idaṃ yathāvuttaṃ vidhānaṃ. Vibhāvināti paññavatā vinayadharena.
৩১৮-৯. মুদুপিট্ঠি চাতি লতা ৰিয নমিত্ৰা করণং দস্সেত্ৰা নচ্চিতুং সমৰাহিত্ৰা মুদুকতপিট্ঠিকো চ। লম্বী চাতি পলম্বমানেন দীঘেন অঙ্গজাতেন যুত্তো। লম্বতীতি লম্বং, অঙ্গজাতং, তং যস্স অত্থি সো লম্বী। ইমে দ্ৰেপি কামপরিল়াহাতুরভাৰে সতি অত্তনো অঙ্গজাতং অত্তনো মুখং, ৰচ্চমগ্গঞ্চ পৰেসেত্ৰা ৰীতিক্কমিতুমরহত্তা পারাজিকাপন্নসদিসত্তা পরিৰজ্জিতা। মুখগ্গাহীতি মুখেন গহণং মুখগ্গাহো, সো এতস্স অত্থীতি মুখগ্গাহী, পরস্স অঙ্গজাতং মুখেন গণ্হন্তোতি অত্থো। নিসীদকোতি পরস্স অঙ্গজাতে অত্তনো ৰচ্চমগ্গেন নিসীদন্তো। ইমে দ্ৰে সহৰাসিকানং সীলৰিনাসনতো অঞ্ঞেহি সংৰসিতুং অনরহাতি পারাজিকাপন্নসদিসত্তা ৰিৰজ্জিতা। তেসন্তি অসংৰাসতাসামঞ্ঞেন চত্তারো পারাজিকাপন্নে সঙ্গণ্হাতি। ‘‘তেসঞ্চ মগ্গেনমগ্গপটিপত্তিসামঞ্ঞেন পঠমপারাজিকাপন্নস্সেৰ অনুলোমিকাতি গহেতব্বা’’ ইচ্চেৰং নিস্সন্দেহে ৰুত্তং। ইমিনা চ অকতৰীতিক্কমানম্পি মুদুপিট্ঠিআদীনং চতুন্নং অনুলোমপারাজিকভাৰো ৰুত্তোতি ৰিঞ্ঞাযতি।
318-9.Mudupiṭṭhi cāti latā viya namitvā karaṇaṃ dassetvā naccituṃ samavāhitvā mudukatapiṭṭhiko ca. Lambī cāti palambamānena dīghena aṅgajātena yutto. Lambatīti lambaṃ, aṅgajātaṃ, taṃ yassa atthi so lambī. Ime dvepi kāmapariḷāhāturabhāve sati attano aṅgajātaṃ attano mukhaṃ, vaccamaggañca pavesetvā vītikkamitumarahattā pārājikāpannasadisattā parivajjitā. Mukhaggāhīti mukhena gahaṇaṃ mukhaggāho, so etassa atthīti mukhaggāhī, parassa aṅgajātaṃ mukhena gaṇhantoti attho. Nisīdakoti parassa aṅgajāte attano vaccamaggena nisīdanto. Ime dve sahavāsikānaṃ sīlavināsanato aññehi saṃvasituṃ anarahāti pārājikāpannasadisattā vivajjitā. Tesanti asaṃvāsatāsāmaññena cattāro pārājikāpanne saṅgaṇhāti. ‘‘Tesañca maggenamaggapaṭipattisāmaññena paṭhamapārājikāpannasseva anulomikāti gahetabbā’’ iccevaṃ nissandehe vuttaṃ. Iminā ca akatavītikkamānampi mudupiṭṭhiādīnaṃ catunnaṃ anulomapārājikabhāvo vuttoti viññāyati.
সমন্তপাসাদিকাযং পন –
Samantapāsādikāyaṃ pana –
‘‘অপরানিপি লম্বী, মুদুপিট্ঠিকো, পরস্স অঙ্গজাতং মুখেন গণ্হাতি, পরস্স অঙ্গজাতে অভিনিসীদতীতি ইমেসং চতুন্নং ৰসেন চত্তারি অনুলোমপারাজিকানীতি ৰদন্তি। এতানি হি যস্মা উভিন্নং রাগৰসেন সদিসভাৰূপগতানং ধম্মো ‘মেথুনধম্মো’তি ৰুচ্চতি, তস্মা এতেন পরিযাযেন মেথুনং ধম্মং অপ্পটিসেৰিত্ৰাযেৰ কেৰলং মগ্গেন মগ্গপ্পৰেসনৰসেন আপজ্জিতব্বত্তা মেথুনধম্মপারাজিকস্স অনুলোমেন্তীতি ‘অনুলোমপারাজিকানী’তি ৰুচ্চন্তী’’তি (পারা॰ অট্ঠ॰ ২.২৩৩) –
‘‘Aparānipi lambī, mudupiṭṭhiko, parassa aṅgajātaṃ mukhena gaṇhāti, parassa aṅgajāte abhinisīdatīti imesaṃ catunnaṃ vasena cattāri anulomapārājikānīti vadanti. Etāni hi yasmā ubhinnaṃ rāgavasena sadisabhāvūpagatānaṃ dhammo ‘methunadhammo’ti vuccati, tasmā etena pariyāyena methunaṃ dhammaṃ appaṭisevitvāyeva kevalaṃ maggena maggappavesanavasena āpajjitabbattā methunadhammapārājikassa anulomentīti ‘anulomapārājikānī’ti vuccantī’’ti (pārā. aṭṭha. 2.233) –
ৰুত্তত্তা চ তব্বণ্ণনায চ সারত্থদীপনিযং –
Vuttattā ca tabbaṇṇanāya ca sāratthadīpaniyaṃ –
‘‘লম্বংদীঘতায পলম্বমানং অঙ্গজাতমেতস্সাতি লম্বী। সো এত্তাৰতা ন পারাজিকো, অথ খো যদা অনভিরতিযা পীল়িতো অত্তনো অঙ্গজাতং মুখে ৰা ৰচ্চমগ্গে ৰা পৰেসেতি, তদা পারাজিকো হোতি। মুদুকা পিট্ঠি এতস্সাতি মুদুপিট্ঠিকো, কতপরিকম্মায মুদুকায পিট্ঠিযা সমন্নাগতো। সোপি যদা অনভিরতিযা পীল়িতো অত্তনো অঙ্গজাতং অত্তনো মুখে পৰেসেতি তদা পারাজিকো হোতি। পরস্স অঙ্গজাতং মুখেন গণ্হাতীতি যো অনভিরতিযা পীল়িতো পরস্স সুত্তস্স ৰা পমত্তস্স ৰা অঙ্গজাতং অত্তনো মুখেন গণ্হাতি। পরস্স অঙ্গজাতে অভিনিসীদতীতি যো অনভিরতিযা পীল়িতো পরস্স অঙ্গজাতং কম্মনিযং দিস্ৰা অত্তনো ৰচ্চমগ্গেন তস্সূপরি অভিনিসীদতি, তং অত্তনো ৰচ্চমগ্গং পৰেসেতীতি অত্থো। লম্বীআদযো চত্তারো কিঞ্চাপি পঠমপারাজিকেন সঙ্গহিতা, যস্মা পন উভিন্নং রাগপরিযুট্ঠানসঙ্খাতেন পরিযাযেন মেথুনং ধম্মং অপ্পটিসেৰিনো হোন্তি, তস্মা ৰিসুং ৰুত্তা’’তি (সারত্থ॰ টী॰ ২.২৩৩) –
‘‘Lambaṃdīghatāya palambamānaṃ aṅgajātametassāti lambī. So ettāvatā na pārājiko, atha kho yadā anabhiratiyā pīḷito attano aṅgajātaṃ mukhe vā vaccamagge vā paveseti, tadā pārājiko hoti. Mudukā piṭṭhi etassāti mudupiṭṭhiko, kataparikammāya mudukāya piṭṭhiyā samannāgato. Sopi yadā anabhiratiyā pīḷito attano aṅgajātaṃ attano mukhe paveseti tadā pārājiko hoti. Parassa aṅgajātaṃ mukhena gaṇhātīti yo anabhiratiyā pīḷito parassa suttassa vā pamattassa vā aṅgajātaṃ attano mukhena gaṇhāti. Parassa aṅgajāte abhinisīdatīti yo anabhiratiyā pīḷito parassa aṅgajātaṃ kammaniyaṃ disvā attano vaccamaggena tassūpari abhinisīdati, taṃ attano vaccamaggaṃ pavesetīti attho. Lambīādayo cattāro kiñcāpi paṭhamapārājikena saṅgahitā, yasmā pana ubhinnaṃ rāgapariyuṭṭhānasaṅkhātena pariyāyena methunaṃ dhammaṃ appaṭisevino honti, tasmā visuṃ vuttā’’ti (sārattha. ṭī. 2.233) –
ৰুত্তত্তা চ কতৰীতিক্কমাযেৰেতে ‘‘পারাজিকা’’তি গহেতব্বা।
Vuttattā ca katavītikkamāyevete ‘‘pārājikā’’ti gahetabbā.
ভিক্খুনীনঞ্চ চত্তারীতি এত্থ ‘‘অসাধারণানী’’তি পাঠসেসো, ভিক্খূহি অসাধারণানি ভিক্খুনীনমেৰ নিযতানি উব্ভজাণুমণ্ডলিকা, ৰজ্জপটিচ্ছাদিকা, উক্খিত্তানুৰত্তিকা, অট্ঠৰত্থুকাতি চত্তারি পারাজিকানি চ। ৰিব্ভন্তা ভিক্খুনী সযন্তি এত্থ ‘‘তেসং অনুলোমিকা’’তি আনেত্ৰা সম্বন্ধিতব্বং। তেসং চতুন্নং পারাজিকানং অনুলোমিকা সযং ৰিব্ভন্তা ভিক্খুনী চাতি যোজনা। চিত্তৰসিকা হুত্ৰা অত্তনা নিৰত্থচীৰরম্পি হি মাতুগামানং নিৰাসননীহারেন সযমেৰ নিৰাসেত্ৰা গিহিৰেসং রোচেত্ৰা গহিতমত্তে সাসনতো চুতা ভিক্খুনী চাতি ৰুত্তং হোতি। এৰংকরণেন গিহিভাৰাপন্নতাসামঞ্ঞেন সংৰাসারহা ন হোন্তীতি ইমেসং চতুন্নং পারাজিকানং অনুলোমিকা জাতা।
Bhikkhunīnañca cattārīti ettha ‘‘asādhāraṇānī’’ti pāṭhaseso, bhikkhūhi asādhāraṇāni bhikkhunīnameva niyatāni ubbhajāṇumaṇḍalikā, vajjapaṭicchādikā, ukkhittānuvattikā, aṭṭhavatthukāti cattāri pārājikāni ca. Vibbhantā bhikkhunī sayanti ettha ‘‘tesaṃ anulomikā’’ti ānetvā sambandhitabbaṃ. Tesaṃ catunnaṃ pārājikānaṃ anulomikā sayaṃ vibbhantā bhikkhunī cāti yojanā. Cittavasikā hutvā attanā nivatthacīvarampi hi mātugāmānaṃ nivāsananīhārena sayameva nivāsetvā gihivesaṃ rocetvā gahitamatte sāsanato cutā bhikkhunī cāti vuttaṃ hoti. Evaṃkaraṇena gihibhāvāpannatāsāmaññena saṃvāsārahā na hontīti imesaṃ catunnaṃ pārājikānaṃ anulomikā jātā.
তথাতি যথা ইমে দস্সিতা তেন অসংৰাসারহতায, ভিক্খুভাৰায অভব্বতায চ পারাজিকাৰ, তথা একাদস অভব্বপুগ্গলাপি হোন্তীতি অত্থো। একাদসাভব্বাতি মাতুঘাতকো, পিতুঘাতকো, অরহন্তঘাতকো, সঙ্ঘভেদকো, লোহিতুপ্পাদকো, পণ্ডকো, তিরচ্ছানগতো, উভতোব্যঞ্জনকো, থেয্যসংৰাসকো, ভিক্খুনিদূসকো, তিত্থিযপক্কন্তকোতি একাদস। সব্বেতে চতুৰীসতি এতে সব্বে চতুৰীসতি পুগ্গলা সমোধানতো ৰেদিতব্বাতি অধিপ্পাযো।
Tathāti yathā ime dassitā tena asaṃvāsārahatāya, bhikkhubhāvāya abhabbatāya ca pārājikāva, tathā ekādasa abhabbapuggalāpi hontīti attho. Ekādasābhabbāti mātughātako, pitughātako, arahantaghātako, saṅghabhedako, lohituppādako, paṇḍako, tiracchānagato, ubhatobyañjanako, theyyasaṃvāsako, bhikkhunidūsako, titthiyapakkantakoti ekādasa. Sabbete catuvīsati ete sabbe catuvīsati puggalā samodhānato veditabbāti adhippāyo.
৩২০. ইমে চতুৰীসতি পারাজিকা পুগ্গলা সীসচ্ছিন্নোৰ জীৰিতুং ইধ ভিক্খুভাৰায অভব্বাতি ৰুত্তাতি যোজনা।
320. Ime catuvīsati pārājikā puggalā sīsacchinnova jīvituṃ idha bhikkhubhāvāya abhabbāti vuttāti yojanā.
৩২১. ইমেসং একাদসন্নং অভব্বতায হেতুদস্সনত্থমাহ ‘‘পণ্ডকো চা’’তিআদি। পণ্ডকো চাতি আসিত্তপণ্ডকো, উসূযপণ্ডকো, পক্খপণ্ডকো, ওপক্কমিকপণ্ডকো, নপুংসকপণ্ডকোতি ৰুত্তো পঞ্চৰিধো পণ্ডকো চ। তিরচ্ছানোতি তিরিযং অঞ্ছতি গচ্ছতীতি ‘‘তিরচ্ছানো’’তি গহিতো নাগসুপণ্ণাদিকো সব্বতিরচ্ছানযোনিকো চ। যক্খাদযো সব্বে অমনুস্সাপি ইধ তিরচ্ছানেযেৰ সঙ্গহিতাতি ৰেদিতব্বা। উভতোব্যঞ্জনোপি চাতি ইত্থিপুরিসব্যঞ্জনসাধকেহি উভতো কম্মতো জাতানি থনাদিকানি ব্যঞ্জনানি যস্সাতি নিরুত্তো ইত্থিউভতোব্যঞ্জনো , পুরিসউভতোব্যঞ্জনোতি দুৰিধো উভতোব্যঞ্জনো চ। ৰত্থুৰিপন্নাতি তব্ভাৰভাৰিতায ভিক্খুভাৰো ৰসতি এত্থাতি ৰত্থু, পুগ্গলানং ভিক্খুভাৰারহতা, সা পন পব্বজ্জাক্খন্ধকাগতসব্বদোসৰিরহিতগুণসম্পযুত্ততা, তং ৰিপন্নং পণ্ডকভাৰাদিযোগেন যেসং তে ‘‘ৰত্থুৰিপন্না’’তি গহেতব্বা। হি-সদ্দো হেতুম্হি। যস্মা ৰত্থুৰিপন্না, তস্মা ইধ অত্তভাৰে পব্বজ্জায অভব্বাতি ৰুত্তং হোতি। ‘‘অহেতুপটিসন্ধিকা’’তি ৰচনেন ইমেসং ৰিপাকাৰরণযুত্তভাৰমাহ, ইমিনা এতেসং মগ্গাধিগমস্স ৰারিতভাৰো দস্সিতোতি ৰেদিতব্বং।
321. Imesaṃ ekādasannaṃ abhabbatāya hetudassanatthamāha ‘‘paṇḍako cā’’tiādi. Paṇḍako cāti āsittapaṇḍako, usūyapaṇḍako, pakkhapaṇḍako, opakkamikapaṇḍako, napuṃsakapaṇḍakoti vutto pañcavidho paṇḍako ca. Tiracchānoti tiriyaṃ añchati gacchatīti ‘‘tiracchāno’’ti gahito nāgasupaṇṇādiko sabbatiracchānayoniko ca. Yakkhādayo sabbe amanussāpi idha tiracchāneyeva saṅgahitāti veditabbā. Ubhatobyañjanopi cāti itthipurisabyañjanasādhakehi ubhato kammato jātāni thanādikāni byañjanāni yassāti nirutto itthiubhatobyañjano , purisaubhatobyañjanoti duvidho ubhatobyañjano ca. Vatthuvipannāti tabbhāvabhāvitāya bhikkhubhāvo vasati etthāti vatthu, puggalānaṃ bhikkhubhāvārahatā, sā pana pabbajjākkhandhakāgatasabbadosavirahitaguṇasampayuttatā, taṃ vipannaṃ paṇḍakabhāvādiyogena yesaṃ te ‘‘vatthuvipannā’’ti gahetabbā. Hi-saddo hetumhi. Yasmā vatthuvipannā, tasmā idha attabhāve pabbajjāya abhabbāti vuttaṃ hoti. ‘‘Ahetupaṭisandhikā’’ti vacanena imesaṃ vipākāvaraṇayuttabhāvamāha, iminā etesaṃ maggādhigamassa vāritabhāvo dassitoti veditabbaṃ.
৩২২. পঞ্চানন্তরিকাতি কম্মাৰরণেন যুত্ততায সগ্গমোক্খসম্পত্তিতো পরিহাযিত্ৰা মরণানন্তরং অপাযপটিসন্ধিযং নিযতা মাতুঘাতকাদযো পঞ্চানন্তরিকা চ। থেয্যসংৰাসোপি চাতি লিঙ্গত্থেনকো, সংৰাসত্থেনকো, উভযত্থেনকোতি তিৰিধো থেয্যসংৰাসকো চ। দূসকোতি পকতত্তায ভিক্খুনিযা মেথুনং পটিসেৰিত্ৰা তস্সা দূসিতত্তা ভিক্খুনিং দূসেতীতি ‘‘ভিক্খুনিদূসকো’’তি ৰুত্তো চ। তিত্থিপক্কন্তকো চাতি তিত্থিযানং লদ্ধিং, ৰেসঞ্চ রোচেত্ৰা তং গহেত্ৰা তেসমন্তরং পৰিট্ঠো চ। ইতি অট্ঠ পন কিরিযানট্ঠাতি যোজনা। ইতীতি ইদমত্থত্তা ইমেতি ৰুত্তং হোতি। তে ইমেতি সম্বন্ধো। তে ইমে অট্ঠ পন মাতুৰধাদিকিরিযায ইহত্তভাৰে ভিক্খুভাৰায অনরহা হুত্ৰা নট্ঠাতি অত্থো। এত্তাৰতা একাদসঅভব্বানং অভব্বতায কারণং দস্সিতং হোতি।
322.Pañcānantarikāti kammāvaraṇena yuttatāya saggamokkhasampattito parihāyitvā maraṇānantaraṃ apāyapaṭisandhiyaṃ niyatā mātughātakādayo pañcānantarikā ca. Theyyasaṃvāsopi cāti liṅgatthenako, saṃvāsatthenako, ubhayatthenakoti tividho theyyasaṃvāsako ca. Dūsakoti pakatattāya bhikkhuniyā methunaṃ paṭisevitvā tassā dūsitattā bhikkhuniṃ dūsetīti ‘‘bhikkhunidūsako’’ti vutto ca. Titthipakkantako cāti titthiyānaṃ laddhiṃ, vesañca rocetvā taṃ gahetvā tesamantaraṃ paviṭṭho ca. Iti aṭṭha pana kiriyānaṭṭhāti yojanā. Itīti idamatthattā imeti vuttaṃ hoti. Te imeti sambandho. Te ime aṭṭha pana mātuvadhādikiriyāya ihattabhāve bhikkhubhāvāya anarahā hutvā naṭṭhāti attho. Ettāvatā ekādasaabhabbānaṃ abhabbatāya kāraṇaṃ dassitaṃ hoti.
৩২৩. মযা পারাজিকানং সারভূতো যো অযং ৰিনিচ্ছযো ৰুত্তো, তস্স ৰিনিচ্ছযস্স অনুসারেন অনুগমনেন সেসোপি ৰিনিচ্ছযো বুধেন পণ্ডিতেন অসেসতোৰ ৰিঞ্ঞাতুং সক্কাতি যোজনা।
323. Mayā pārājikānaṃ sārabhūto yo ayaṃ vinicchayo vutto, tassa vinicchayassa anusārena anugamanena sesopi vinicchayo budhena paṇḍitena asesatova viññātuṃ sakkāti yojanā.
৩২৪. পটুভাৰকরে পরমে ৰিৰিধেহি নযেহি যুত্তে ৰিনযপিটকে পরমত্থনযং অভিপত্থযতা অযং সততং পরিযাপুণিতব্বোতি যোজনা। তত্থ ৰিৰিধেহি নানপ্পকারেহি। নযেহীতি নীযন্তি ৰুত্তানুসারেন উদীরিযন্তীতি ‘‘নযা’’তি ৰুত্তেহি চক্কপেয্যালাদীহি নযেহি। পরমত্থনযন্তি পরমো চ সো অত্থো চাতি পরমত্থো, পরমো ৰা ৰিসেসেন নিচ্ছিতব্বো অত্থো পরমত্থো, সোযেৰ ৰিনিচ্ছযত্থিকানং বুদ্ধিযা নেতব্বোতি পরমত্থনযো, ৰিনিচ্ছযূপাযো নীযতি এতেনাতি কত্ৰা ‘‘পরমত্থনযো’’তি ৰুচ্চতি, তং পরমত্থনযং। অভিপত্থযতাতি ৰিনযপিটকে ৰিনিচ্ছযং ৰা তদুপাযং ৰা পত্থযতা, ইচ্ছন্তেনাতি অত্থো। ‘‘পরিযাপুণিতব্বো অয’’ন্তি পদচ্ছেদো। ম-কারো আগমসন্ধিজো, ও-কারস্স অ-কারাদেসো। পরিযাপুণিতব্বোতি পঠিতব্বো, সোতব্বো চিন্তেতব্বো ধারেতব্বোতি ৰুত্তং হোতি। অযন্তি ৰিনযৰিনিচ্ছযো।
324. Paṭubhāvakare parame vividhehi nayehi yutte vinayapiṭake paramatthanayaṃ abhipatthayatā ayaṃ satataṃ pariyāpuṇitabboti yojanā. Tattha vividhehi nānappakārehi. Nayehīti nīyanti vuttānusārena udīriyantīti ‘‘nayā’’ti vuttehi cakkapeyyālādīhi nayehi. Paramatthanayanti paramo ca so attho cāti paramattho, paramo vā visesena nicchitabbo attho paramattho, soyeva vinicchayatthikānaṃ buddhiyā netabboti paramatthanayo, vinicchayūpāyo nīyati etenāti katvā ‘‘paramatthanayo’’ti vuccati, taṃ paramatthanayaṃ. Abhipatthayatāti vinayapiṭake vinicchayaṃ vā tadupāyaṃ vā patthayatā, icchantenāti attho. ‘‘Pariyāpuṇitabbo aya’’nti padacchedo. Ma-kāro āgamasandhijo, o-kārassa a-kārādeso. Pariyāpuṇitabboti paṭhitabbo, sotabbo cintetabbo dhāretabboti vuttaṃ hoti. Ayanti vinayavinicchayo.
ইতি ৰিনযত্থসারসন্দীপনিযা
Iti vinayatthasārasandīpaniyā
ৰিনযৰিনিচ্ছযৰণ্ণনায
Vinayavinicchayavaṇṇanāya
চতুত্থপারাজিককথাৰণ্ণনা নিট্ঠিতা।
Catutthapārājikakathāvaṇṇanā niṭṭhitā.
