| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
4. චතුත්‌ථපාරාජිකං
4. Catutthapārājikaṃ
674. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ඡබ්‌බග්‌ගියා භික්‌ඛුනියො අවස්‌සුතා අවස්‌සුතස්‌ස පුරිසපුග්‌ගලස්‌ස හත්‌ථග්‌ගහණම්‌පි සාදියන්‌ති, සඞ්‌ඝාටිකණ්‌ණග්‌ගහණම්‌පි සාදියන්‌ති, සන්‌තිට්‌ඨන්‌තිපි, සල්‌ලපන්‌තිපි, සඞ්‌කෙතම්‌පි ගච්‌ඡන්‌ති, පුරිසස්‌සපි අබ්‌භාගමනං සාදියන්‌ති, ඡන්‌නම්‌පි අනුපවිසන්‌ති, කායම්‌පි තදත්‌ථාය උපසංහරන්‌ති එතස්‌ස අසද්‌ධම්‌මස්‌ස පටිසෙවනත්‌ථාය. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ඡබ්‌බග්‌ගියා භික්‌ඛුනියො අවස්‌සුතා අවස්‌සුතස්‌ස පුරිසපුග්‌ගලස්‌ස හත්‌ථග්‌ගහණම්‌පි සාදියිස්‌සන්‌ති, සඞ්‌ඝාටිකණ්‌ණග්‌ගහණම්‌පි සාදියිස්‌සන්‌ති, සන්‌තිට්‌ඨිස්‌සන්‌තිපි, සල්‌ලපිස්‌සන්‌තිපි, සඞ්‌කෙතම්‌පි ගච්‌ඡිස්‌සන්‌ති, පුරිසස්‌සපි අබ්‌භාගමනං සාදියිස්‌සන්‌ති, ඡන්‌නම්‌පි අනුපවිසිස්‌සන්‌ති, කායම්‌පි තදත්‌ථාය උපසංහරිස්‌සන්‌ති එතස්‌ස අසද්‌ධම්‌මස්‌ස පටිසෙවනත්‌ථායා’’ති…පෙ.… සච්‌චං කිර, භික්‌ඛවෙ, ඡබ්‌බග්‌ගියා භික්‌ඛුනියො අවස්‌සුතා අවස්‌සුතස්‌ස පුරිසපුග්‌ගලස්‌ස හත්‌ථග්‌ගහණම්‌පි සාදියන්‌ති, සඞ්‌ඝාටිකණ්‌ණග්‌ගහණම්‌පි සාදියන්‌ති, සන්‌තිට්‌ඨන්‌තිපි, සල්‌ලපන්‌තිපි, සඞ්‌කෙතම්‌පි ගච්‌ඡන්‌ති, පුරිසස්‌සපි අබ්‌භාගමනං සාදියන්‌ති, ඡන්‌නම්‌පි අනුපවිසන්‌ති, කායම්‌පි තදත්‌ථාය උපසංහරන්‌ති එතස්‌ස අසද්‌ධම්‌මස්‌ස පටිසෙවනත්‌ථායාති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ඡබ්‌බග්‌ගියා භික්‌ඛුනියො අවස්‌සුතා අවස්‌සුතස්‌ස පුරිසපුග්‌ගලස්‌ස හත්‌ථග්‌ගහණම්‌පි සාදියිස්‌සන්‌ති, සඞ්‌ඝාටිකණ්‌ණග්‌ගහණම්‌පි සාදියිස්‌සන්‌ති, සන්‌තිට්‌ඨිස්‌සන්‌තිපි, සල්‌ලපිස්‌සන්‌තිපි, සඞ්‌කෙතම්‌පි ගච්‌ඡිස්‌සන්‌ති, පුරිසස්‌සපි අබ්‌භාගමනං සාදියිස්‌සන්‌ති, ඡන්‌නම්‌පි අනුපවිසිස්‌සන්‌ති, කායම්‌පි තදත්‌ථාය උපසංහරිස්‌සන්‌ති එතස්‌ස අසද්‌ධම්‌මස්‌ස පටිසෙවනත්‌ථාය! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
674. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhuniyo avassutā avassutassa purisapuggalassa hatthaggahaṇampi sādiyanti, saṅghāṭikaṇṇaggahaṇampi sādiyanti, santiṭṭhantipi, sallapantipi, saṅketampi gacchanti, purisassapi abbhāgamanaṃ sādiyanti, channampi anupavisanti, kāyampi tadatthāya upasaṃharanti etassa asaddhammassa paṭisevanatthāya. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo avassutā avassutassa purisapuggalassa hatthaggahaṇampi sādiyissanti, saṅghāṭikaṇṇaggahaṇampi sādiyissanti, santiṭṭhissantipi, sallapissantipi, saṅketampi gacchissanti, purisassapi abbhāgamanaṃ sādiyissanti, channampi anupavisissanti, kāyampi tadatthāya upasaṃharissanti etassa asaddhammassa paṭisevanatthāyā’’ti…pe… saccaṃ kira, bhikkhave, chabbaggiyā bhikkhuniyo avassutā avassutassa purisapuggalassa hatthaggahaṇampi sādiyanti, saṅghāṭikaṇṇaggahaṇampi sādiyanti, santiṭṭhantipi, sallapantipi, saṅketampi gacchanti, purisassapi abbhāgamanaṃ sādiyanti, channampi anupavisanti, kāyampi tadatthāya upasaṃharanti etassa asaddhammassa paṭisevanatthāyāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo avassutā avassutassa purisapuggalassa hatthaggahaṇampi sādiyissanti, saṅghāṭikaṇṇaggahaṇampi sādiyissanti, santiṭṭhissantipi, sallapissantipi, saṅketampi gacchissanti, purisassapi abbhāgamanaṃ sādiyissanti, channampi anupavisissanti, kāyampi tadatthāya upasaṃharissanti etassa asaddhammassa paṭisevanatthāya! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
675. ‘‘යා පන භික්‌ඛුනී අවස්‌සුතා අවස්‌සුතස්‌ස පුරිසපුග්‌ගලස්‌ස හත්‌ථග්‌ගහණං වා සාදියෙය්‍ය, සඞ්‌ඝාටිකණ්‌ණග්‌ගහණං වා සාදියෙය්‍ය, සන්‌තිට්‌ඨෙය්‍ය වා, සල්‌ලපෙය්‍ය වා, සඞ්‌කෙතං වා ගච්‌ඡෙය්‍ය , පුරිසස්‌ස වා අබ්‌භාගමනං සාදියෙය්‍ය, ඡන්‌නං වා අනුපවිසෙය්‍ය, කායං වා තදත්‌ථාය උපසංහරෙය්‍ය එතස්‌ස අසද්‌ධම්‌මස්‌ස පටිසෙවනත්‌ථාය, අයම්‌පි පාරාජිකා හොති අසංවාසා අට්‌ඨවත්‌ථුකා’’ති.
675.‘‘Yā pana bhikkhunī avassutā avassutassa purisapuggalassa hatthaggahaṇaṃ vā sādiyeyya, saṅghāṭikaṇṇaggahaṇaṃ vā sādiyeyya, santiṭṭheyya vā, sallapeyya vā, saṅketaṃ vāgaccheyya, purisassa vā abbhāgamanaṃ sādiyeyya, channaṃ vā anupaviseyya, kāyaṃ vā tadatthāya upasaṃhareyya etassa asaddhammassa paṭisevanatthāya, ayampi pārājikā hoti asaṃvāsā aṭṭhavatthukā’’ti.
676. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
676.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
අවස්‌සුතා නාම සාරත්‌තා අපෙක්‌ඛවතී පටිබද්‌ධචිත්‌තා.
Avassutā nāma sārattā apekkhavatī paṭibaddhacittā.
අවස්‌සුතො නාම සාරත්‌තො අපෙක්‌ඛවා පටිබද්‌ධචිත්‌තො.
Avassuto nāma sāratto apekkhavā paṭibaddhacitto.
පුරිසපුග්‌ගලො නාම මනුස්‌සපුරිසො, න යක්‌ඛො න පෙතො න තිරච්‌ඡානගතො විඤ්‌ඤූ පටිබලො කායසංසග්‌ගං සමාපජ්‌ජිතුං.
Purisapuggalo nāma manussapuriso, na yakkho na peto na tiracchānagato viññū paṭibalo kāyasaṃsaggaṃ samāpajjituṃ.
හත්‌ථග්‌ගහණං වා සාදියෙය්‍යාති හත්‌ථො නාම කප්‌පරං උපාදාය යාව අග්‌ගනඛා. එතස්‌ස අසද්‌ධම්‌මස්‌ස පටිසෙවනත්‌ථාය උබ්‌භක්‌ඛකං අධොජාණුමණ්‌ඩලං ගහණං සාදියති, ආපත්‌ති ථුල්‌ලච්‌චයස්‌ස.
Hatthaggahaṇaṃvā sādiyeyyāti hattho nāma kapparaṃ upādāya yāva agganakhā. Etassa asaddhammassa paṭisevanatthāya ubbhakkhakaṃ adhojāṇumaṇḍalaṃ gahaṇaṃ sādiyati, āpatti thullaccayassa.
සඞ්‌ඝාටිකණ්‌ණග්‌ගහණං වා සාදියෙය්‍යාති එතස්‌ස අසද්‌ධම්‌මස්‌ස පටිසෙවනත්‌ථාය නිවත්‌ථං වා පාරුතං වා ගහණං සාදියති, ආපත්‌ති ථුල්‌ලච්‌චයස්‌ස.
Saṅghāṭikaṇṇaggahaṇaṃ vā sādiyeyyāti etassa asaddhammassa paṭisevanatthāya nivatthaṃ vā pārutaṃ vā gahaṇaṃ sādiyati, āpatti thullaccayassa.
සන්‌තිට්‌ඨෙය්‍ය වාති එතස්‌ස අසද්‌ධම්‌මස්‌ස පටිසෙවනත්‌ථාය පුරිසස්‌ස හත්‌ථපාසෙ තිට්‌ඨති, ආපත්‌ති ථුල්‌ලච්‌චයස්‌ස.
Santiṭṭheyya vāti etassa asaddhammassa paṭisevanatthāya purisassa hatthapāse tiṭṭhati, āpatti thullaccayassa.
සල්‌ලපෙය්‍ය වාති එතස්‌ස අසද්‌ධම්‌මස්‌ස පටිසෙවනත්‌ථාය පුරිසස්‌ස හත්‌ථපාසෙ ඨිතා සල්‌ලපති, ආපත්‌ති ථුල්‌ලච්‌චයස්‌ස.
Sallapeyya vāti etassa asaddhammassa paṭisevanatthāya purisassa hatthapāse ṭhitā sallapati, āpatti thullaccayassa.
සඞ්‌කෙතං වා ගච්‌ඡෙය්‍යාති එතස්‌ස අසද්‌ධම්‌මස්‌ස පටිසෙවනත්‌ථාය පුරිසෙන – ‘‘ඉත්‌ථන්‌නාමං ඔකාසං 1 ආගච්‌ඡා’’ති – වුත්‌තා ගච්‌ඡති. පදෙ පදෙ ආපත්‌ති දුක්‌කටස්‌ස. පුරිසස්‌ස හත්‌ථපාසං ඔක්‌කන්‌තමත්‌තෙ ආපත්‌ති ථුල්‌ලච්‌චයස්‌ස.
Saṅketaṃ vā gaccheyyāti etassa asaddhammassa paṭisevanatthāya purisena – ‘‘itthannāmaṃ okāsaṃ 2 āgacchā’’ti – vuttā gacchati. Pade pade āpatti dukkaṭassa. Purisassa hatthapāsaṃ okkantamatte āpatti thullaccayassa.
පුරිසස්‌ස වා අබ්‌භාගමනං සාදියෙය්‍යාති එතස්‌ස අසද්‌ධම්‌මස්‌ස පටිසෙවනත්‌ථාය පුරිසස්‌ස අබ්‌භාගමනං සාදියති, ආපත්‌ති දුක්‌කටස්‌ස. හත්‌ථපාසං ඔක්‌කන්‌තමත්‌තෙ ආපත්‌ති ථුල්‌ලච්‌චයස්‌ස.
Purisassavā abbhāgamanaṃ sādiyeyyāti etassa asaddhammassa paṭisevanatthāya purisassa abbhāgamanaṃ sādiyati, āpatti dukkaṭassa. Hatthapāsaṃ okkantamatte āpatti thullaccayassa.
ඡන්‌නං වා අනුපවිසෙය්‍යාති එතස්‌ස අසද්‌ධම්‌මස්‌ස පටිසෙවනත්‌ථාය යෙන කෙනචි පටිච්‌ඡන්‌නං ඔකාසං පවිට්‌ඨමත්‌තෙ ආපත්‌ති ථුල්‌ලච්‌චයස්‌ස.
Channaṃ vā anupaviseyyāti etassa asaddhammassa paṭisevanatthāya yena kenaci paṭicchannaṃ okāsaṃ paviṭṭhamatte āpatti thullaccayassa.
කායං වා තදත්‌ථාය උපසංහරෙය්‍යාති එතස්‌ස අසද්‌ධම්‌මස්‌ස පටිසෙවනත්‌ථාය පුරිසස්‌ස හත්‌ථපාසෙ ඨිතා කායං උපසංහරති, ආපත්‌ති ථුල්‌ලච්‌චයස්‌ස.
Kāyaṃ vā tadatthāya upasaṃhareyyāti etassa asaddhammassa paṭisevanatthāya purisassa hatthapāse ṭhitā kāyaṃ upasaṃharati, āpatti thullaccayassa.
අයම්‌පීති පුරිමායො උපාදාය වුච්‌චති.
Ayampīti purimāyo upādāya vuccati.
පාරාජිකා හොතීති සෙය්‍යථාපි නාම තාලො මත්‌ථකච්‌ඡින්‌නො අභබ්‌බො පුන විරුළ්‌හියා එවමෙව භික්‌ඛුනී අට්‌ඨමං වත්‌ථුං පරිපූරෙන්‌තී අස්‌සමණී හොති අසක්‍යධීතා. තෙන වුච්‌චති පාරාජිකා හොතීති.
Pārājikā hotīti seyyathāpi nāma tālo matthakacchinno abhabbo puna viruḷhiyā evameva bhikkhunī aṭṭhamaṃ vatthuṃ paripūrentī assamaṇī hoti asakyadhītā. Tena vuccati pārājikā hotīti.
අසංවාසාති සංවාසො නාම එකකම්‌මං එකුද්‌දෙසො සමසික්‌ඛතා. එසො සංවාසො නාම. සො තාය සද්‌ධිං නත්‌ථි. තෙන වුච්‌චති අසංවාසාති.
Asaṃvāsāti saṃvāso nāma ekakammaṃ ekuddeso samasikkhatā. Eso saṃvāso nāma. So tāya saddhiṃ natthi. Tena vuccati asaṃvāsāti.
677. අනාපත්‌ති අසඤ්‌චිච්‌ච, අස්‌සතියා, අජානන්‌තියා, අසාදියන්‌තියා, උම්‌මත්‌තිකාය, ඛිත්‌තචිත්‌තාය, වෙදනාට්‌ටාය, ආදිකම්‌මිකායාති.
677. Anāpatti asañcicca, assatiyā, ajānantiyā, asādiyantiyā, ummattikāya, khittacittāya, vedanāṭṭāya, ādikammikāyāti.
චතුත්‌ථපාරාජිකං සමත්‌තං.
Catutthapārājikaṃ samattaṃ.
උද්‌දිට්‌ඨා ඛො, අය්‍යායො, අට්‌ඨ පාරාජිකා ධම්‌මා. යෙසං භික්‌ඛුනී අඤ්‌ඤතරං වා අඤ්‌ඤතරං වා ආපජ්‌ජිත්‌වා න ලභති භික්‌ඛුනීහි සද්‌ධිං සංවාසං, යථා පුරෙ තථා පච්‌ඡා, පාරාජිකා හොති අසංවාසා. තත්‌ථාය්‍යායො පුච්‌ඡාමි – ‘‘කච්‌චිත්‌ථ පරිසුද්‌ධා’’? දුතියම්‌පි පුච්‌ඡාමි – ‘‘කච්‌චිත්‌ථ පරිසුද්‌ධා’’? තතියම්‌පි පුච්‌ඡාමි – ‘‘කච්‌චිත්‌ථ පරිසුද්‌ධා’’? පරිසුද්‌ධෙත්‌ථාය්‍යායො, තස්‌මා තුණ්‌හී, එවමෙතං ධාරයාමීති.
Uddiṭṭhā kho, ayyāyo, aṭṭha pārājikā dhammā. Yesaṃ bhikkhunī aññataraṃ vā aññataraṃ vā āpajjitvā na labhati bhikkhunīhi saddhiṃ saṃvāsaṃ, yathā pure tathā pacchā, pārājikā hoti asaṃvāsā. Tatthāyyāyo pucchāmi – ‘‘kaccittha parisuddhā’’? Dutiyampi pucchāmi – ‘‘kaccittha parisuddhā’’? Tatiyampi pucchāmi – ‘‘kaccittha parisuddhā’’? Parisuddhetthāyyāyo, tasmā tuṇhī, evametaṃ dhārayāmīti.
භික්‌ඛුනිවිභඞ්‌ගෙ පාරාජිකකණ්‌ඩං නිට්‌ඨිතං.
Bhikkhunivibhaṅge pārājikakaṇḍaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 4. චතුත්‌ථපාරාජිකසික්‌ඛාපදවණ්‌ණනා • 4. Catutthapārājikasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 4. චතුත්‌ථපාරාජිකසික්‌ඛාපදවණ්‌ණනා • 4. Catutthapārājikasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 4. චතුත්‌ථපාරාජිකසික්‌ඛාපදවණ්‌ණනා • 4. Catutthapārājikasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 4. අට්‌ඨවත්‌ථුකසික්‌ඛාපදවණ්‌ණනා • 4. Aṭṭhavatthukasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 4. චතුත්‌ථපාරාජිකසික්‌ඛාපදං • 4. Catutthapārājikasikkhāpadaṃ
