| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
4. சதுத்த²பாராஜிகஸிக்கா²பத³ங்
4. Catutthapārājikasikkhāpadaṃ
675. சதுத்தே² மேது²னராகே³ன அவஸ்ஸுதா நாதி⁴ப்பேதா, காயஸங்ஸக்³க³ராகே³ன அவஸ்ஸுதாவாதி⁴ப்பேதாதி ஆஹ ‘‘காயஸங்ஸக்³க³ராகே³ன அவஸ்ஸுதா’’தி . ‘‘புரிஸபுக்³க³லஸ்ஸா’’திபத³ங் ந ஹத்த²ஸத்³தே³ன ஸம்ப³ந்தி⁴தப்³ப³ங், க³ஹணஸத்³தே³னேவ ஸம்ப³ந்தி⁴தப்³ப³ந்தி த³ஸ்ஸெந்தோ ஆஹ ‘‘யங் புரிஸபுக்³க³லேனா’’திஆதி³. தந்தி க³ஹணங், ‘‘ஹத்த²க்³க³ஹண’’ந்தி வுத்தவசனங் உபலக்க²ணமத்தமேவாதி ஆஹ ‘‘அஞ்ஞம்பீ’’திஆதி³. தத்த² ‘‘அஞ்ஞம்பீ’’தி ஹத்த²க³ஹணதோ இதரம்பி. அபாராஜிகக்கெ²த்தேதி உப்³ப⁴க்க²கே அதோ⁴ஜாணுமண்ட³லே. அஸ்ஸாதி ‘‘ஹத்த²க்³க³ஹண’’ந்திபத³ஸ்ஸ. எத்தா²தி ‘‘அஸத்³த⁴ம்மஸ்ஸ படிஸேவனத்தா²யா’’திபதே³. காயஸங்ஸக்³கோ³தி காயஸங்ஸக்³கோ³ ஏவ. தேன வுத்தங் ‘‘ந மேது²னத⁴ம்மோ’’தி. ஹீதி ஸச்சங், யஸ்மா வா. எத்தா²தி காயஸங்ஸக்³க³க³ஹணே. ஸாத⁴கந்தி ஞாபகங்.
675. Catutthe methunarāgena avassutā nādhippetā, kāyasaṃsaggarāgena avassutāvādhippetāti āha ‘‘kāyasaṃsaggarāgena avassutā’’ti . ‘‘Purisapuggalassā’’tipadaṃ na hatthasaddena sambandhitabbaṃ, gahaṇasaddeneva sambandhitabbanti dassento āha ‘‘yaṃ purisapuggalenā’’tiādi. Tanti gahaṇaṃ, ‘‘hatthaggahaṇa’’nti vuttavacanaṃ upalakkhaṇamattamevāti āha ‘‘aññampī’’tiādi. Tattha ‘‘aññampī’’ti hatthagahaṇato itarampi. Apārājikakkhetteti ubbhakkhake adhojāṇumaṇḍale. Assāti ‘‘hatthaggahaṇa’’ntipadassa. Etthāti ‘‘asaddhammassa paṭisevanatthāyā’’tipade. Kāyasaṃsaggoti kāyasaṃsaggo eva. Tena vuttaṃ ‘‘na methunadhammo’’ti. Hīti saccaṃ, yasmā vā. Etthāti kāyasaṃsaggagahaṇe. Sādhakanti ñāpakaṃ.
திஸ்ஸித்தி²யோதி பு⁴ம்மத்தே² சேதங் உபயோக³வசனங். தீஸு இத்தீ²ஸூதி ஹி அத்தோ², திஸ்ஸோ இத்தி²யோ உபக³ந்த்வாதி வா யோஜேதப்³போ³. ஏஸேவ நயோ பரதோபி. யங் மேது²னங் அத்தி², தங் ந ஸேவேதி யோஜனா. ந ஸேவேதி ச ந ஸேவதி. திகாரஸ்ஸ ஹி ஏகாரோ. தயோ புரிஸேதி தீஸு புரிஸேஸு, தே வா உபக³ந்த்வா. தயோ ச அனரியபண்ட³கேதி தீஸு அனரியஸங்கா²தேஸு உப⁴தொப்³யஞ்ஜனகேஸு ச பண்ட³கேஸு ச, தே வா உபக³ந்த்வாதி யோஜனா. ந சாசரே மேது²னங் ப்³யஞ்ஜனஸ்மிந்தி அத்தனோ நிமித்தஸ்மிங் மேது²னங் ந ச ஆசரதி. இத³ங் அனுலோமபாராஜிகங் ஸந்தா⁴ய வுத்தங். சே²ஜ்ஜங் ஸியா மேது²னத⁴ம்மபச்சயாதி மேது²னத⁴ம்மகாரணா சே²ஜ்ஜங் ஸியா, பாராஜிகங் ப⁴வெய்யாதி அத்தோ². குஸலேஹீதி பஞ்ஹாவிஸஜ்ஜனே சே²கேஹி, சே²ககாமேஹி வா. அயங் பஞ்ஹோ அட்ட²வத்து²கங் ஸந்தா⁴ய வுத்தோ.
Tissitthiyoti bhummatthe cetaṃ upayogavacanaṃ. Tīsu itthīsūti hi attho, tisso itthiyo upagantvāti vā yojetabbo. Eseva nayo paratopi. Yaṃ methunaṃ atthi, taṃ na seveti yojanā. Na seveti ca na sevati. Tikārassa hi ekāro. Tayo puriseti tīsu purisesu, te vā upagantvā. Tayo ca anariyapaṇḍaketi tīsu anariyasaṅkhātesu ubhatobyañjanakesu ca paṇḍakesu ca, te vā upagantvāti yojanā. Na cācare methunaṃ byañjanasminti attano nimittasmiṃ methunaṃ na ca ācarati. Idaṃ anulomapārājikaṃ sandhāya vuttaṃ. Chejjaṃ siyā methunadhammapaccayāti methunadhammakāraṇā chejjaṃ siyā, pārājikaṃ bhaveyyāti attho. Kusalehīti pañhāvisajjane chekehi, chekakāmehi vā. Ayaṃ pañho aṭṭhavatthukaṃ sandhāya vutto.
பஞ்ஹாவிஸஜ்ஜனத்தா²ய சிந்தெந்தானங் ஸேத³மோசனகாரணத்தா ‘‘ஸேத³மோசனகா³தா²’’தி வுத்தா. விருஜ்ஜ²தீதி ‘‘ந மேது²னத⁴ம்மோ’’தி வசனேன ‘‘சே²ஜ்ஜங் ஸியா மேது²னத⁴ம்மபச்சயா’’தி வசனங் விருஜ்ஜ²தி, ந ஸமேதீதி அத்தோ². இதி சே வதெ³ய்ய, ந விருஜ்ஜ²தி. கஸ்மா? மேது²னத⁴ம்மஸ்ஸ புப்³ப³பா⁴க³த்தாதி யோஜனா. இமினா மேது²னத⁴ம்மஸ்ஸ புப்³ப³பா⁴க³பூ⁴தோ காயஸங்ஸக்³கோ³வ உபசாரேன தத்த² மேது²னத⁴ம்மஸத்³தே³ன வுத்தோ, ந த்³வயங்த்³வயஸமாபத்தீதி தீ³பேதி. ஹிஸத்³தோ³ வித்தா²ரஜோதகோ. பரிவாரேயேவ வுத்தானீதி ஸம்ப³ந்தோ⁴. வண்ணாவண்ணோதி ஸுக்கவிஸட்டி². த⁴னமனுப்பாதா³னந்தி ஸஞ்சரித்தங் . ‘‘இமினா பரியாயேனா’’தி இமினா லேஸேன ஸமீபூபசாரேனாதி அத்தோ². ஏதேனுபாயேனாதி ‘‘ஹத்த²க்³க³ஹணங் ஸாதி³யெய்யா’’திபதே³ வுத்தஉபாயேன. ஸப்³ப³பதே³ஸூதி ஸப்³பே³ஸு ‘‘ஸங்கா⁴டிகண்ணக்³க³ஹணங் ஸாதி³யெய்யா’’திஆதீ³ஸு பதே³ஸு. அபி சாதி ஏகங்ஸேன, விஸேஸங் வக்கா²மீதி அதி⁴ப்பாயோ. ‘‘ஏவங்னாமகங் டா²ன’’ந்தி இமினா ‘‘இத்த²ங்னாமங் இமஸ்ஸ டா²னஸ்ஸா’’தி வசனத்த²ங் தீ³பேதி.
Pañhāvisajjanatthāya cintentānaṃ sedamocanakāraṇattā ‘‘sedamocanagāthā’’ti vuttā. Virujjhatīti ‘‘na methunadhammo’’ti vacanena ‘‘chejjaṃ siyā methunadhammapaccayā’’ti vacanaṃ virujjhati, na sametīti attho. Iti ce vadeyya, na virujjhati. Kasmā? Methunadhammassa pubbabhāgattāti yojanā. Iminā methunadhammassa pubbabhāgabhūto kāyasaṃsaggova upacārena tattha methunadhammasaddena vutto, na dvayaṃdvayasamāpattīti dīpeti. Hisaddo vitthārajotako. Parivāreyeva vuttānīti sambandho. Vaṇṇāvaṇṇoti sukkavisaṭṭhi. Dhanamanuppādānanti sañcarittaṃ . ‘‘Iminā pariyāyenā’’ti iminā lesena samīpūpacārenāti attho. Etenupāyenāti ‘‘hatthaggahaṇaṃ sādiyeyyā’’tipade vuttaupāyena. Sabbapadesūti sabbesu ‘‘saṅghāṭikaṇṇaggahaṇaṃ sādiyeyyā’’tiādīsu padesu. Api cāti ekaṃsena, visesaṃ vakkhāmīti adhippāyo. ‘‘Evaṃnāmakaṃ ṭhāna’’nti iminā ‘‘itthaṃnāmaṃ imassa ṭhānassā’’ti vacanatthaṃ dīpeti.
676. ஏகந்தரிகாய வாதி எத்த² வாஸத்³தே³ன த்³வந்தரிகாதீ³னிபி ஸங்க³ய்ஹந்தி. யேன தேனாதி யேன வா தேன வா. த்³விதிசதுப்பஞ்சச²வத்தூ²னி பெய்யாலவஸேன வா வாஸத்³தே³ன வா க³ஹேதப்³பா³னி. அபி சாதி கிஞ்ச பி⁴ய்யோ, வத்தப்³ப³விஸேஸங் வக்கா²மீதி அதி⁴ப்பாயோ. எத்தா²தி ‘‘ஆபத்தியோ தே³ஸெத்வா’’தி வசனே. ஹீதி ஸச்சங். வுத்தந்தி பரிவாரே வுத்தங். தத்ராதி புரிமவசனாபெக்க²ங். தே³ஸிதா ஆபத்தி க³ணனூபிகாதி யோஜனா. ஏகங் வத்து²ங் ஆபன்னா யா பி⁴க்கு²னீதி யோஜனா. து⁴ரனிக்கே²பங் கத்வாதி ‘‘இமஞ்ச வத்து²ங், அஞ்ஞம்பி ச வத்து²ங் நாபஜ்ஜிஸ்ஸாமீ’’தி து⁴ரனிக்கே²பங் கத்வா. யா பன ஸஉஸ்ஸாஹாவ தே³ஸேதீதி யோஜனாதி. சதுத்த²ங்.
676.Ekantarikāya vāti ettha vāsaddena dvantarikādīnipi saṅgayhanti. Yena tenāti yena vā tena vā. Dviticatuppañcachavatthūni peyyālavasena vā vāsaddena vā gahetabbāni. Api cāti kiñca bhiyyo, vattabbavisesaṃ vakkhāmīti adhippāyo. Etthāti ‘‘āpattiyo desetvā’’ti vacane. Hīti saccaṃ. Vuttanti parivāre vuttaṃ. Tatrāti purimavacanāpekkhaṃ. Desitā āpatti gaṇanūpikāti yojanā. Ekaṃ vatthuṃ āpannā yā bhikkhunīti yojanā. Dhuranikkhepaṃ katvāti ‘‘imañca vatthuṃ, aññampi ca vatthuṃ nāpajjissāmī’’ti dhuranikkhepaṃ katvā. Yā pana saussāhāva desetīti yojanāti. Catutthaṃ.
ஸாதா⁴ரணாதி பி⁴க்கு²னீஹி ஸாதா⁴ரணா. எத்தா²தி ‘‘உத்³தி³ட்டா² கோ² அய்யாயோ’’திஆதி³வசனே.
Sādhāraṇāti bhikkhunīhi sādhāraṇā. Etthāti ‘‘uddiṭṭhā kho ayyāyo’’tiādivacane.
இதி ஸமந்தபாஸாதி³காய வினயஸங்வண்ணனாய
Iti samantapāsādikāya vinayasaṃvaṇṇanāya
பி⁴க்கு²னிவிப⁴ங்கே³ பாராஜிககண்ட³வண்ணனாய யோஜனா ஸமத்தா.
Bhikkhunivibhaṅge pārājikakaṇḍavaṇṇanāya yojanā samattā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 4. சதுத்த²பாராஜிகங் • 4. Catutthapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 4. சதுத்த²பாராஜிகஸிக்கா²பத³வண்ணனா • 4. Catutthapārājikasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. சதுத்த²பாராஜிகஸிக்கா²பத³வண்ணனா • 4. Catutthapārājikasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. சதுத்த²பாராஜிகஸிக்கா²பத³வண்ணனா • 4. Catutthapārājikasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. அட்ட²வத்து²கஸிக்கா²பத³வண்ணனா • 4. Aṭṭhavatthukasikkhāpadavaṇṇanā
