| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā |
4. சதுத்த²பாராஜிகஸிக்கா²பத³வண்ணனா
4. Catutthapārājikasikkhāpadavaṇṇanā
675. சதுத்தே² – அவஸ்ஸுதாதி லோகஸ்ஸாத³மித்தஸந்த²வவஸேன காயஸங்ஸக்³க³ராகே³ன அவஸ்ஸுதா. து³தியபதே³பி ஏஸேவ நயோ. புரிஸபுக்³க³லஸ்ஸ ஹத்த²க்³க³ஹணங் வாதிஆதீ³ஸு பன யங் புரிஸபுக்³க³லேன ஹத்தே² க³ஹணங் கதங், தங் புரிஸபுக்³க³லஸ்ஸ ஹத்த²க்³க³ஹணந்தி வுத்தங். ஏஸேவ நயோ ஸங்கா⁴டிகண்ணக்³க³ஹணேபி. ஹத்த²க்³க³ஹணந்தி எத்த² ச ஹத்த²க்³க³ஹணஞ்ச அஞ்ஞம்பி அபாராஜிகக்கெ²த்தே க³ஹணஞ்ச ஏகஜ்ஜ²ங் கத்வா ஹத்த²க்³க³ஹணந்தி வுத்தந்தி வேதி³தப்³ப³ங். தேனேவஸ்ஸ பத³பா⁴ஜனே ‘‘ஹத்த²க்³க³ஹணங் வா ஸாதி³யெய்யாதி ஹத்தோ² நாம கப்பரங் உபாதா³ய யாவ அக்³க³னகா², ஏதஸ்ஸ அஸத்³த⁴ம்மஸ்ஸ படிஸேவனத்தா²ய உப்³ப⁴க்க²கங் அதோ⁴ஜாணுமண்ட³லங் க³ஹணங் ஸாதி³யதி, ஆபத்தி து²ல்லச்சயஸ்ஸா’’தி வுத்தங். எத்த² ச அஸத்³த⁴ம்மோதி காயஸங்ஸக்³கோ³ வேதி³தப்³போ³, ந மேது²னத⁴ம்மோ. ந ஹி மேது²னஸ்ஸ ஸாமந்தா து²ல்லச்சயங் ஹோதி. ‘‘விஞ்ஞூ படிப³லோ காயஸங்ஸக்³க³ங் ஸமாபஜ்ஜிதுந்தி வசனம்பி செத்த² ஸாத⁴கங்.
675. Catutthe – avassutāti lokassādamittasanthavavasena kāyasaṃsaggarāgena avassutā. Dutiyapadepi eseva nayo. Purisapuggalassa hatthaggahaṇaṃ vātiādīsu pana yaṃ purisapuggalena hatthe gahaṇaṃ kataṃ, taṃ purisapuggalassa hatthaggahaṇanti vuttaṃ. Eseva nayo saṅghāṭikaṇṇaggahaṇepi. Hatthaggahaṇanti ettha ca hatthaggahaṇañca aññampi apārājikakkhette gahaṇañca ekajjhaṃ katvā hatthaggahaṇanti vuttanti veditabbaṃ. Tenevassa padabhājane ‘‘hatthaggahaṇaṃ vā sādiyeyyāti hattho nāma kapparaṃ upādāya yāva agganakhā, etassa asaddhammassa paṭisevanatthāya ubbhakkhakaṃ adhojāṇumaṇḍalaṃ gahaṇaṃ sādiyati, āpatti thullaccayassā’’ti vuttaṃ. Ettha ca asaddhammoti kāyasaṃsaggo veditabbo, na methunadhammo. Na hi methunassa sāmantā thullaccayaṃ hoti. ‘‘Viññū paṭibalo kāyasaṃsaggaṃ samāpajjitunti vacanampi cettha sādhakaṃ.
‘‘திஸ்ஸித்தி²யோ மேது²னங் தங் ந ஸேவே,
‘‘Tissitthiyo methunaṃ taṃ na seve,
தயோ புரிஸே தயோ ச அனரியபண்ட³கே;
Tayo purise tayo ca anariyapaṇḍake;
ந சாசரே மேது²னங் ப்³யஞ்ஜனஸ்மிங்,
Na cācare methunaṃ byañjanasmiṃ,
சே²ஜ்ஜா ஸியா மேது²னத⁴ம்மபச்சயா;
Chejjā siyā methunadhammapaccayā;
பஞ்ஹா மேஸா குஸலேஹி சிந்திதா’’தி. (பரி॰ 481);
Pañhā mesā kusalehi cintitā’’ti. (pari. 481);
இமாய பரிவாரே வுத்தாய ஸேத³மோசககா³தா²ய விருஜ்ஜ²தீதி சே? ந; மேது²னத⁴ம்மஸ்ஸ புப்³ப³பா⁴க³த்தா. பரிவாரேயேவ ஹி ‘‘மேது²னத⁴ம்மஸ்ஸ புப்³ப³பா⁴கோ³ ஜானிதப்³போ³’’தி ‘‘வண்ணாவண்ணோ காயஸங்ஸக்³கோ³ து³ட்டு²ல்லவாசா அத்தகாமபாரிசரியாக³மனுப்பாத³ன’’ந்தி ஏவங் ஸுக்கவிஸ்ஸட்டி²ஆதீ³னி பஞ்ச ஸிக்கா²பதா³னி மேது²னத⁴ம்மஸ்ஸ புப்³ப³பா⁴கோ³தி வுத்தானி. தஸ்மா காயஸங்ஸக்³கோ³ மேது²னத⁴ம்மஸ்ஸ புப்³ப³பா⁴க³த்தா பச்சயோ ஹோதி. இதி சே²ஜ்ஜா ஸியா மேது²னத⁴ம்மபச்சயாதி எத்த² இமினா பரியாயேன அத்தோ² வேதி³தப்³போ³. ஏதேனுபாயேன ஸப்³ப³பதே³ஸு வினிச்ச²யோ வேதி³தப்³போ³. அபிச ‘‘ஸங்கேதங் வா க³ச்செ²ய்யா’’தி ஏதஸ்ஸ பத³பா⁴ஜனே ‘‘இத்த²ன்னாமங் ஆக³ச்சா²’’தி. ஏவங்னாமகங் டா²னங் ஆக³ச்சா²தி அத்தோ².
Imāya parivāre vuttāya sedamocakagāthāya virujjhatīti ce? Na; methunadhammassa pubbabhāgattā. Parivāreyeva hi ‘‘methunadhammassa pubbabhāgo jānitabbo’’ti ‘‘vaṇṇāvaṇṇo kāyasaṃsaggo duṭṭhullavācā attakāmapāricariyāgamanuppādana’’nti evaṃ sukkavissaṭṭhiādīni pañca sikkhāpadāni methunadhammassa pubbabhāgoti vuttāni. Tasmā kāyasaṃsaggo methunadhammassa pubbabhāgattā paccayo hoti. Iti chejjā siyā methunadhammapaccayāti ettha iminā pariyāyena attho veditabbo. Etenupāyena sabbapadesu vinicchayo veditabbo. Apica ‘‘saṅketaṃ vā gaccheyyā’’ti etassa padabhājane ‘‘itthannāmaṃ āgacchā’’ti. Evaṃnāmakaṃ ṭhānaṃ āgacchāti attho.
676. அட்ட²மங் வத்து²ங் பரிபூரெந்தீ அஸ்ஸமணீ ஹோதீதி அனுலோமதோ வா படிலோமதோ வா ஏகந்தரிகாய வா யேன தேன நயேன அட்ட²மங் வத்து²ங் பரிபூரெந்தீயேவ அஸ்ஸமணீ ஹோதி. யா பன ஏகங் வா வத்து²ங் ஸத்த வா வத்தூ²னி ஸதக்க²த்தும்பி பூரேதி, நேவ அஸ்ஸமணீ ஹோதி. ஆபன்னா ஆபத்தியோ தே³ஸெத்வா முச்சதி. அபிசெத்த² க³ணனூபிகா ஆபத்தி வேதி³தப்³பா³. வுத்தஞ்ஹேதங் ‘‘அத்தா²பத்தி தே³ஸிதா க³ணனூபிகா, அத்தா²பத்தி தே³ஸிதா ந க³ணனூபிகா’’தி. தத்ராயங் வினிச்ச²யோ – இதா³னி நாபஜ்ஜிஸ்ஸாமீதி து⁴ரனிக்கே²பங் கத்வா தே³ஸிதா க³ணனூபிகா தே³ஸிதக³ணனங் உபேதி பாராஜிகஸ்ஸ அங்க³ங் ந ஹோதி. தஸ்மா யா ஏகங் ஆபன்னா து⁴ரனிக்கே²பங் கத்வா தே³ஸெத்வா புன கிலேஸவஸேன ஆபஜ்ஜதி, புன தே³ஸேதி, ஏவங் அட்ட² வத்தூ²னி பூரெந்தீபி பாராஜிகா ந ஹோதி. யா பன ஆபஜ்ஜித்வா புனபி அஞ்ஞங் வத்து²ங் ஆபஜ்ஜிஸ்ஸாமீதி ஸஉஸ்ஸாஹாவ தே³ஸேதி, தஸ்ஸா ஸா ஆபத்தி நக³ணனூபிகா, தே³ஸிதாபி அதே³ஸிதா ஹோதி, தே³ஸிதக³ணனங் ந க³ச்ச²தி, பாராஜிகஸ்ஸேவ அங்க³ங் ஹோதி. அட்ட²மே வத்து²ம்ஹி பரிபுண்ணமத்தே பாராஜிகா ஹோதி. ஸேஸங் உத்தானமேவாதி.
676.Aṭṭhamaṃ vatthuṃ paripūrentī assamaṇī hotīti anulomato vā paṭilomato vā ekantarikāya vā yena tena nayena aṭṭhamaṃ vatthuṃ paripūrentīyeva assamaṇī hoti. Yā pana ekaṃ vā vatthuṃ satta vā vatthūni satakkhattumpi pūreti, neva assamaṇī hoti. Āpannā āpattiyo desetvā muccati. Apicettha gaṇanūpikā āpatti veditabbā. Vuttañhetaṃ ‘‘atthāpatti desitā gaṇanūpikā, atthāpatti desitā na gaṇanūpikā’’ti. Tatrāyaṃ vinicchayo – idāni nāpajjissāmīti dhuranikkhepaṃ katvā desitā gaṇanūpikā desitagaṇanaṃ upeti pārājikassa aṅgaṃ na hoti. Tasmā yā ekaṃ āpannā dhuranikkhepaṃ katvā desetvā puna kilesavasena āpajjati, puna deseti, evaṃ aṭṭha vatthūni pūrentīpi pārājikā na hoti. Yā pana āpajjitvā punapi aññaṃ vatthuṃ āpajjissāmīti saussāhāva deseti, tassā sā āpatti nagaṇanūpikā, desitāpi adesitā hoti, desitagaṇanaṃ na gacchati, pārājikasseva aṅgaṃ hoti. Aṭṭhame vatthumhi paripuṇṇamatte pārājikā hoti. Sesaṃ uttānamevāti.
து⁴ரனிக்கே²பஸமுட்டா²னங் – காயவாசாசித்ததோ ஸமுட்டா²தி, கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், த்³விவேத³னந்தி.
Dhuranikkhepasamuṭṭhānaṃ – kāyavācācittato samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dvivedananti.
சதுத்த²பாராஜிகங்.
Catutthapārājikaṃ.
உத்³தி³ட்டா² கோ² அய்யாயோ அட்ட² பாராஜிகா த⁴ம்மாதி பி⁴க்கூ² ஆரப்³ப⁴ பஞ்ஞத்தா ஸாதா⁴ரணா சத்தாரோ இமே ச சத்தாரோதி ஏவங் பாதிமொக்கு²த்³தே³ஸமக்³கே³ன உத்³தி³ட்டா² கோ² அய்யாயோ அட்ட² பாராஜிகா த⁴ம்மாதி ஏவமெத்த² அத்தோ² த³ட்ட²ப்³போ³. ஸேஸங் மஹாவிப⁴ங்கே³ வுத்தனயமேவாதி.
Uddiṭṭhākho ayyāyo aṭṭha pārājikā dhammāti bhikkhū ārabbha paññattā sādhāraṇā cattāro ime ca cattāroti evaṃ pātimokkhuddesamaggena uddiṭṭhā kho ayyāyo aṭṭha pārājikā dhammāti evamettha attho daṭṭhabbo. Sesaṃ mahāvibhaṅge vuttanayamevāti.
ஸமந்தபாஸாதி³காய வினயஸங்வண்ணனாய பி⁴க்கு²னீவிப⁴ங்கே³
Samantapāsādikāya vinayasaṃvaṇṇanāya bhikkhunīvibhaṅge
பாராஜிககண்ட³வண்ணனா நிட்டி²தா.
Pārājikakaṇḍavaṇṇanā niṭṭhitā.
பாராஜிககண்ட³ங் நிட்டி²தங்.
Pārājikakaṇḍaṃ niṭṭhitaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 4. சதுத்த²பாராஜிகங் • 4. Catutthapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. சதுத்த²பாராஜிகஸிக்கா²பத³வண்ணனா • 4. Catutthapārājikasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. சதுத்த²பாராஜிகஸிக்கா²பத³வண்ணனா • 4. Catutthapārājikasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. அட்ட²வத்து²கஸிக்கா²பத³வண்ணனா • 4. Aṭṭhavatthukasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. சதுத்த²பாராஜிகஸிக்கா²பத³ங் • 4. Catutthapārājikasikkhāpadaṃ
