| Library / Tipiṭaka / তিপিটক • Tipiṭaka / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā |
৪. চতুত্থপারাজিকসিক্খাপদৰণ্ণনা
4. Catutthapārājikasikkhāpadavaṇṇanā
৬৭৫. চতুত্থে – অৰস্সুতাতি লোকস্সাদমিত্তসন্থৰৰসেন কাযসংসগ্গরাগেন অৰস্সুতা। দুতিযপদেপি এসেৰ নযো। পুরিসপুগ্গলস্স হত্থগ্গহণং ৰাতিআদীসু পন যং পুরিসপুগ্গলেন হত্থে গহণং কতং, তং পুরিসপুগ্গলস্স হত্থগ্গহণন্তি ৰুত্তং। এসেৰ নযো সঙ্ঘাটিকণ্ণগ্গহণেপি। হত্থগ্গহণন্তি এত্থ চ হত্থগ্গহণঞ্চ অঞ্ঞম্পি অপারাজিকক্খেত্তে গহণঞ্চ একজ্ঝং কত্ৰা হত্থগ্গহণন্তি ৰুত্তন্তি ৰেদিতব্বং। তেনেৰস্স পদভাজনে ‘‘হত্থগ্গহণং ৰা সাদিযেয্যাতি হত্থো নাম কপ্পরং উপাদায যাৰ অগ্গনখা, এতস্স অসদ্ধম্মস্স পটিসেৰনত্থায উব্ভক্খকং অধোজাণুমণ্ডলং গহণং সাদিযতি, আপত্তি থুল্লচ্চযস্সা’’তি ৰুত্তং। এত্থ চ অসদ্ধম্মোতি কাযসংসগ্গো ৰেদিতব্বো, ন মেথুনধম্মো। ন হি মেথুনস্স সামন্তা থুল্লচ্চযং হোতি। ‘‘ৰিঞ্ঞূ পটিবলো কাযসংসগ্গং সমাপজ্জিতুন্তি ৰচনম্পি চেত্থ সাধকং।
675. Catutthe – avassutāti lokassādamittasanthavavasena kāyasaṃsaggarāgena avassutā. Dutiyapadepi eseva nayo. Purisapuggalassa hatthaggahaṇaṃ vātiādīsu pana yaṃ purisapuggalena hatthe gahaṇaṃ kataṃ, taṃ purisapuggalassa hatthaggahaṇanti vuttaṃ. Eseva nayo saṅghāṭikaṇṇaggahaṇepi. Hatthaggahaṇanti ettha ca hatthaggahaṇañca aññampi apārājikakkhette gahaṇañca ekajjhaṃ katvā hatthaggahaṇanti vuttanti veditabbaṃ. Tenevassa padabhājane ‘‘hatthaggahaṇaṃ vā sādiyeyyāti hattho nāma kapparaṃ upādāya yāva agganakhā, etassa asaddhammassa paṭisevanatthāya ubbhakkhakaṃ adhojāṇumaṇḍalaṃ gahaṇaṃ sādiyati, āpatti thullaccayassā’’ti vuttaṃ. Ettha ca asaddhammoti kāyasaṃsaggo veditabbo, na methunadhammo. Na hi methunassa sāmantā thullaccayaṃ hoti. ‘‘Viññū paṭibalo kāyasaṃsaggaṃ samāpajjitunti vacanampi cettha sādhakaṃ.
‘‘তিস্সিত্থিযো মেথুনং তং ন সেৰে,
‘‘Tissitthiyo methunaṃ taṃ na seve,
তযো পুরিসে তযো চ অনরিযপণ্ডকে।
Tayo purise tayo ca anariyapaṇḍake;
ন চাচরে মেথুনং ব্যঞ্জনস্মিং,
Na cācare methunaṃ byañjanasmiṃ,
ছেজ্জা সিযা মেথুনধম্মপচ্চযা।
Chejjā siyā methunadhammapaccayā;
পঞ্হা মেসা কুসলেহি চিন্তিতা’’তি॥ (পরি॰ ৪৮১)।
Pañhā mesā kusalehi cintitā’’ti. (pari. 481);
ইমায পরিৰারে ৰুত্তায সেদমোচকগাথায ৰিরুজ্ঝতীতি চে? ন; মেথুনধম্মস্স পুব্বভাগত্তা। পরিৰারেযেৰ হি ‘‘মেথুনধম্মস্স পুব্বভাগো জানিতব্বো’’তি ‘‘ৰণ্ণাৰণ্ণো কাযসংসগ্গো দুট্ঠুল্লৰাচা অত্তকামপারিচরিযাগমনুপ্পাদন’’ন্তি এৰং সুক্কৰিস্সট্ঠিআদীনি পঞ্চ সিক্খাপদানি মেথুনধম্মস্স পুব্বভাগোতি ৰুত্তানি। তস্মা কাযসংসগ্গো মেথুনধম্মস্স পুব্বভাগত্তা পচ্চযো হোতি। ইতি ছেজ্জা সিযা মেথুনধম্মপচ্চযাতি এত্থ ইমিনা পরিযাযেন অত্থো ৰেদিতব্বো। এতেনুপাযেন সব্বপদেসু ৰিনিচ্ছযো ৰেদিতব্বো। অপিচ ‘‘সঙ্কেতং ৰা গচ্ছেয্যা’’তি এতস্স পদভাজনে ‘‘ইত্থন্নামং আগচ্ছা’’তি। এৰংনামকং ঠানং আগচ্ছাতি অত্থো।
Imāya parivāre vuttāya sedamocakagāthāya virujjhatīti ce? Na; methunadhammassa pubbabhāgattā. Parivāreyeva hi ‘‘methunadhammassa pubbabhāgo jānitabbo’’ti ‘‘vaṇṇāvaṇṇo kāyasaṃsaggo duṭṭhullavācā attakāmapāricariyāgamanuppādana’’nti evaṃ sukkavissaṭṭhiādīni pañca sikkhāpadāni methunadhammassa pubbabhāgoti vuttāni. Tasmā kāyasaṃsaggo methunadhammassa pubbabhāgattā paccayo hoti. Iti chejjā siyā methunadhammapaccayāti ettha iminā pariyāyena attho veditabbo. Etenupāyena sabbapadesu vinicchayo veditabbo. Apica ‘‘saṅketaṃ vā gaccheyyā’’ti etassa padabhājane ‘‘itthannāmaṃ āgacchā’’ti. Evaṃnāmakaṃ ṭhānaṃ āgacchāti attho.
৬৭৬. অট্ঠমং ৰত্থুং পরিপূরেন্তী অস্সমণী হোতীতি অনুলোমতো ৰা পটিলোমতো ৰা একন্তরিকায ৰা যেন তেন নযেন অট্ঠমং ৰত্থুং পরিপূরেন্তীযেৰ অস্সমণী হোতি। যা পন একং ৰা ৰত্থুং সত্ত ৰা ৰত্থূনি সতক্খত্তুম্পি পূরেতি, নেৰ অস্সমণী হোতি। আপন্না আপত্তিযো দেসেত্ৰা মুচ্চতি। অপিচেত্থ গণনূপিকা আপত্তি ৰেদিতব্বা। ৰুত্তঞ্হেতং ‘‘অত্থাপত্তি দেসিতা গণনূপিকা, অত্থাপত্তি দেসিতা ন গণনূপিকা’’তি। তত্রাযং ৰিনিচ্ছযো – ইদানি নাপজ্জিস্সামীতি ধুরনিক্খেপং কত্ৰা দেসিতা গণনূপিকা দেসিতগণনং উপেতি পারাজিকস্স অঙ্গং ন হোতি। তস্মা যা একং আপন্না ধুরনিক্খেপং কত্ৰা দেসেত্ৰা পুন কিলেসৰসেন আপজ্জতি, পুন দেসেতি, এৰং অট্ঠ ৰত্থূনি পূরেন্তীপি পারাজিকা ন হোতি। যা পন আপজ্জিত্ৰা পুনপি অঞ্ঞং ৰত্থুং আপজ্জিস্সামীতি সউস্সাহাৰ দেসেতি, তস্সা সা আপত্তি নগণনূপিকা, দেসিতাপি অদেসিতা হোতি, দেসিতগণনং ন গচ্ছতি, পারাজিকস্সেৰ অঙ্গং হোতি। অট্ঠমে ৰত্থুম্হি পরিপুণ্ণমত্তে পারাজিকা হোতি। সেসং উত্তানমেৰাতি।
676.Aṭṭhamaṃ vatthuṃ paripūrentī assamaṇī hotīti anulomato vā paṭilomato vā ekantarikāya vā yena tena nayena aṭṭhamaṃ vatthuṃ paripūrentīyeva assamaṇī hoti. Yā pana ekaṃ vā vatthuṃ satta vā vatthūni satakkhattumpi pūreti, neva assamaṇī hoti. Āpannā āpattiyo desetvā muccati. Apicettha gaṇanūpikā āpatti veditabbā. Vuttañhetaṃ ‘‘atthāpatti desitā gaṇanūpikā, atthāpatti desitā na gaṇanūpikā’’ti. Tatrāyaṃ vinicchayo – idāni nāpajjissāmīti dhuranikkhepaṃ katvā desitā gaṇanūpikā desitagaṇanaṃ upeti pārājikassa aṅgaṃ na hoti. Tasmā yā ekaṃ āpannā dhuranikkhepaṃ katvā desetvā puna kilesavasena āpajjati, puna deseti, evaṃ aṭṭha vatthūni pūrentīpi pārājikā na hoti. Yā pana āpajjitvā punapi aññaṃ vatthuṃ āpajjissāmīti saussāhāva deseti, tassā sā āpatti nagaṇanūpikā, desitāpi adesitā hoti, desitagaṇanaṃ na gacchati, pārājikasseva aṅgaṃ hoti. Aṭṭhame vatthumhi paripuṇṇamatte pārājikā hoti. Sesaṃ uttānamevāti.
ধুরনিক্খেপসমুট্ঠানং – কাযৰাচাচিত্ততো সমুট্ঠাতি, কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দ্ৰিৰেদনন্তি।
Dhuranikkhepasamuṭṭhānaṃ – kāyavācācittato samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dvivedananti.
চতুত্থপারাজিকং।
Catutthapārājikaṃ.
উদ্দিট্ঠা খো অয্যাযো অট্ঠ পারাজিকা ধম্মাতি ভিক্খূ আরব্ভ পঞ্ঞত্তা সাধারণা চত্তারো ইমে চ চত্তারোতি এৰং পাতিমোক্খুদ্দেসমগ্গেন উদ্দিট্ঠা খো অয্যাযো অট্ঠ পারাজিকা ধম্মাতি এৰমেত্থ অত্থো দট্ঠব্বো। সেসং মহাৰিভঙ্গে ৰুত্তনযমেৰাতি।
Uddiṭṭhākho ayyāyo aṭṭha pārājikā dhammāti bhikkhū ārabbha paññattā sādhāraṇā cattāro ime ca cattāroti evaṃ pātimokkhuddesamaggena uddiṭṭhā kho ayyāyo aṭṭha pārājikā dhammāti evamettha attho daṭṭhabbo. Sesaṃ mahāvibhaṅge vuttanayamevāti.
সমন্তপাসাদিকায ৰিনযসংৰণ্ণনায ভিক্খুনীৰিভঙ্গে
Samantapāsādikāya vinayasaṃvaṇṇanāya bhikkhunīvibhaṅge
পারাজিককণ্ডৰণ্ণনা নিট্ঠিতা।
Pārājikakaṇḍavaṇṇanā niṭṭhitā.
পারাজিককণ্ডং নিট্ঠিতং।
Pārājikakaṇḍaṃ niṭṭhitaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / ভিক্খুনীৰিভঙ্গ • Bhikkhunīvibhaṅga / ৪. চতুত্থপারাজিকং • 4. Catutthapārājikaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৪. চতুত্থপারাজিকসিক্খাপদৰণ্ণনা • 4. Catutthapārājikasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৪. চতুত্থপারাজিকসিক্খাপদৰণ্ণনা • 4. Catutthapārājikasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৪. অট্ঠৰত্থুকসিক্খাপদৰণ্ণনা • 4. Aṭṭhavatthukasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৪. চতুত্থপারাজিকসিক্খাপদং • 4. Catutthapārājikasikkhāpadaṃ
