| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
၄. စတုတ္ထပာရာဇိကသိက္ခာပဒဝဏ္ဏနာ
4. Catutthapārājikasikkhāpadavaṇṇanā
၆၇၅. စတုတ္ထေ လောကသ္သာဒမိတ္တသန္ထဝဝသေနာတိ လောကသ္သာဒသင္ခာတသ္သ မိတ္တသန္ထဝသ္သ ဝသေန။ ဝုတ္တမေဝတ္ထံ ပရိယာယန္တရေန ဝိဘာဝေတုံ ‘‘ကာယသံသဂ္ဂရာဂေနာ’’တိ ဝုတ္တံ။
675. Catutthe lokassādamittasanthavavasenāti lokassādasaṅkhātassa mittasanthavassa vasena. Vuttamevatthaṃ pariyāyantarena vibhāvetuṃ ‘‘kāyasaṃsaggarāgenā’’ti vuttaṃ.
တိသ္သိတ္ထိယော မေထုနံ တံ န သေဝေတိ (ပရိ. အဋ္ဌ. ၄၈၁) ယာ တိသ္သော ဣတ္ထိယော ဝုတ္တာ, တာသုပိ ယံ တံ မေထုနံ နာမ, တံ န သေဝတိ။ တယော ပုရိသေတိ တယော ပုရိသေပိ ဥပဂန္တ္ဝာ မေထုနံ န သေဝတိ။ တယော စ အနရိယပဏ္ဍကေတိ ဥဘတောဗ္ယဉ္ဇနသင္ခာတေ တယော အနရိယေ, တယော စ ပဏ္ဍကေတိ ဣမေပိ ဆ ဇနေ ဥပဂန္တ္ဝာ မေထုနံ န သေဝတိ။ န စာစရေ မေထုနံ ဗ္ယဉ္ဇနသ္မိန္တိ အနုလောမပာရာဇိကဝသေနပိ အတ္တနော နိမိတ္တေ မေထုနံ နာစရတိ။ ဆေဇ္ဇံ သိယာ မေထုနဓမ္မပစ္စယာတိ သိယာ မေထုနဓမ္မပစ္စယာ ပာရာဇိကန္တိ အယံ ပဉ္ဟော အဋ္ဌဝတ္ထုကံဝ သန္ဓာယ ဝုတ္တော။ တသ္သာ ဟိ မေထုနဓမ္မသ္သ ပုဗ္ဗဘာဂကာယသံသဂ္ဂံ အာပဇ္ဇိတုံ ဝာယမန္တိယာ မေထုနဓမ္မပစ္စယာ ဆေဇ္ဇံ ဟောတိ။ ဆေဒောယေဝ ဆေဇ္ဇံ။
Tissitthiyo methunaṃ taṃ na seveti (pari. aṭṭha. 481) yā tisso itthiyo vuttā, tāsupi yaṃ taṃ methunaṃ nāma, taṃ na sevati. Tayo puriseti tayo purisepi upagantvā methunaṃ na sevati. Tayo ca anariyapaṇḍaketi ubhatobyañjanasaṅkhāte tayo anariye, tayo ca paṇḍaketi imepi cha jane upagantvā methunaṃ na sevati. Na cācare methunaṃ byañjanasminti anulomapārājikavasenapi attano nimitte methunaṃ nācarati. Chejjaṃ siyā methunadhammapaccayāti siyā methunadhammapaccayā pārājikanti ayaṃ pañho aṭṭhavatthukaṃva sandhāya vutto. Tassā hi methunadhammassa pubbabhāgakāyasaṃsaggaṃ āpajjituṃ vāyamantiyā methunadhammapaccayā chejjaṃ hoti. Chedoyeva chejjaṃ.
မေထုနဓမ္မသ္သ ပုဗ္ဗဘာဂတ္တာတိ ဣမိနာ မေထုနဓမ္မသ္သ ပုဗ္ဗဘာဂဘူတော ကာယသံသဂ္ဂောယေဝ တတ္ထ မေထုနဓမ္မ-သဒ္ဒေန ဝုတ္တော, န ဒ္ဝယံဒ္ဝယသမာပတ္တီတိ ဒီပေတိ။ ဝဏ္ဏာဝဏ္ဏောတိ ဒ္ဝီဟိ သုက္ကဝိသ္သဋ္ဌိ ဝုတ္တာ။ ဂမနုပ္ပာဒနန္တိ သဉ္စရိတ္တံ။ သဗ္ဗပဒေသူတိ ‘‘သင္ဃာဋိကဏ္ဏဂ္ဂဟဏံ သာဒိယေယ္ယာ’’တိအာဒီသု။ သေသမေတ္ထ ဥတ္တာနမေဝ။ ကာယသံသဂ္ဂရာဂော, သဥသ္သာဟတာ, အဋ္ဌမသ္သ ဝတ္ထုသ္သ ပူရဏန္တိ ဣမာနိ ပနေတ္ထ တီဏိ အင္ဂာနိ။
Methunadhammassa pubbabhāgattāti iminā methunadhammassa pubbabhāgabhūto kāyasaṃsaggoyeva tattha methunadhamma-saddena vutto, na dvayaṃdvayasamāpattīti dīpeti. Vaṇṇāvaṇṇoti dvīhi sukkavissaṭṭhi vuttā. Gamanuppādananti sañcarittaṃ. Sabbapadesūti ‘‘saṅghāṭikaṇṇaggahaṇaṃ sādiyeyyā’’tiādīsu. Sesamettha uttānameva. Kāyasaṃsaggarāgo, saussāhatā, aṭṭhamassa vatthussa pūraṇanti imāni panettha tīṇi aṅgāni.
စတုတ္ထပာရာဇိကသိက္ခာပဒဝဏ္ဏနာ နိဋ္ဌိတာ။
Catutthapārājikasikkhāpadavaṇṇanā niṭṭhitā.
ဘိက္ခုနီဝိဘင္ဂေ ပာရာဇိကကဏ္ဍဝဏ္ဏနာ နိဋ္ဌိတာ။
Bhikkhunīvibhaṅge pārājikakaṇḍavaṇṇanā niṭṭhitā.
ပာရာဇိကကဏ္ဍံ နိဋ္ဌိတံ။
Pārājikakaṇḍaṃ niṭṭhitaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ဘိက္ခုနီဝိဘင္ဂ • Bhikkhunīvibhaṅga / ၄. စတုတ္ထပာရာဇိကံ • 4. Catutthapārājikaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā / ၄. စတုတ္ထပာရာဇိကသိက္ခာပဒဝဏ္ဏနာ • 4. Catutthapārājikasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၄. စတုတ္ထပာရာဇိကသိက္ခာပဒဝဏ္ဏနာ • 4. Catutthapārājikasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၄. အဋ္ဌဝတ္ထုကသိက္ခာပဒဝဏ္ဏနာ • 4. Aṭṭhavatthukasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၄. စတုတ္ထပာရာဇိကသိက္ခာပဒံ • 4. Catutthapārājikasikkhāpadaṃ
