| Library / Tipiṭaka / තිපිටක • Tipiṭaka / සාරත්‌ථදීපනී-ටීකා • Sāratthadīpanī-ṭīkā |
4. චතුත්‌ථපාරාජිකසික්‌ඛාපදවණ්‌ණනා
4. Catutthapārājikasikkhāpadavaṇṇanā
675. චතුත්‌ථෙ ලොකස්‌සාදමිත්‌තසන්‌ථවවසෙනාති ලොකස්‌සාදසඞ්‌ඛාතස්‌ස මිත්‌තසන්‌ථවස්‌ස වසෙන. වුත්‌තමෙවත්‌ථං පරියායන්‌තරෙන විභාවෙතුං ‘‘කායසංසග්‌ගරාගෙනා’’ති වුත්‌තං.
675. Catutthe lokassādamittasanthavavasenāti lokassādasaṅkhātassa mittasanthavassa vasena. Vuttamevatthaṃ pariyāyantarena vibhāvetuṃ ‘‘kāyasaṃsaggarāgenā’’ti vuttaṃ.
තිස්‌සිත්‌ථියො මෙථුනං තං න සෙවෙති (පරි. අට්‌ඨ. 481) යා තිස්‌සො ඉත්‌ථියො වුත්‌තා, තාසුපි යං තං මෙථුනං නාම, තං න සෙවති. තයො පුරිසෙති තයො පුරිසෙපි උපගන්‌ත්‌වා මෙථුනං න සෙවති. තයො ච අනරියපණ්‌ඩකෙති උභතොබ්‍යඤ්‌ජනසඞ්‌ඛාතෙ තයො අනරියෙ, තයො ච පණ්‌ඩකෙති ඉමෙපි ඡ ජනෙ උපගන්‌ත්‌වා මෙථුනං න සෙවති. න චාචරෙ මෙථුනං බ්‍යඤ්‌ජනස්‌මින්‌ති අනුලොමපාරාජිකවසෙනපි අත්‌තනො නිමිත්‌තෙ මෙථුනං නාචරති. ඡෙජ්‌ජං සියා මෙථුනධම්‌මපච්‌චයාති සියා මෙථුනධම්‌මපච්‌චයා පාරාජිකන්‌ති අයං පඤ්‌හො අට්‌ඨවත්‌ථුකංව සන්‌ධාය වුත්‌තො. තස්‌සා හි මෙථුනධම්‌මස්‌ස පුබ්‌බභාගකායසංසග්‌ගං ආපජ්‌ජිතුං වායමන්‌තියා මෙථුනධම්‌මපච්‌චයා ඡෙජ්‌ජං හොති. ඡෙදොයෙව ඡෙජ්‌ජං.
Tissitthiyo methunaṃ taṃ na seveti (pari. aṭṭha. 481) yā tisso itthiyo vuttā, tāsupi yaṃ taṃ methunaṃ nāma, taṃ na sevati. Tayo puriseti tayo purisepi upagantvā methunaṃ na sevati. Tayo ca anariyapaṇḍaketi ubhatobyañjanasaṅkhāte tayo anariye, tayo ca paṇḍaketi imepi cha jane upagantvā methunaṃ na sevati. Na cācare methunaṃ byañjanasminti anulomapārājikavasenapi attano nimitte methunaṃ nācarati. Chejjaṃ siyā methunadhammapaccayāti siyā methunadhammapaccayā pārājikanti ayaṃ pañho aṭṭhavatthukaṃva sandhāya vutto. Tassā hi methunadhammassa pubbabhāgakāyasaṃsaggaṃ āpajjituṃ vāyamantiyā methunadhammapaccayā chejjaṃ hoti. Chedoyeva chejjaṃ.
මෙථුනධම්‌මස්‌ස පුබ්‌බභාගත්‌තාති ඉමිනා මෙථුනධම්‌මස්‌ස පුබ්‌බභාගභූතො කායසංසග්‌ගොයෙව තත්‌ථ මෙථුනධම්‌ම-සද්‌දෙන වුත්‌තො, න ද්‌වයංද්‌වයසමාපත්‌තීති දීපෙති. වණ්‌ණාවණ්‌ණොති ද්‌වීහි සුක්‌කවිස්‌සට්‌ඨි වුත්‌තා. ගමනුප්‌පාදනන්‌ති සඤ්‌චරිත්‌තං. සබ්‌බපදෙසූති ‘‘සඞ්‌ඝාටිකණ්‌ණග්‌ගහණං සාදියෙය්‍යා’’තිආදීසු. සෙසමෙත්‌ථ උත්‌තානමෙව. කායසංසග්‌ගරාගො, සඋස්‌සාහතා, අට්‌ඨමස්‌ස වත්‌ථුස්‌ස පූරණන්‌ති ඉමානි පනෙත්‌ථ තීණි අඞ්‌ගානි.
Methunadhammassa pubbabhāgattāti iminā methunadhammassa pubbabhāgabhūto kāyasaṃsaggoyeva tattha methunadhamma-saddena vutto, na dvayaṃdvayasamāpattīti dīpeti. Vaṇṇāvaṇṇoti dvīhi sukkavissaṭṭhi vuttā. Gamanuppādananti sañcarittaṃ. Sabbapadesūti ‘‘saṅghāṭikaṇṇaggahaṇaṃ sādiyeyyā’’tiādīsu. Sesamettha uttānameva. Kāyasaṃsaggarāgo, saussāhatā, aṭṭhamassa vatthussa pūraṇanti imāni panettha tīṇi aṅgāni.
චතුත්‌ථපාරාජිකසික්‌ඛාපදවණ්‌ණනා නිට්‌ඨිතා.
Catutthapārājikasikkhāpadavaṇṇanā niṭṭhitā.
භික්‌ඛුනීවිභඞ්‌ගෙ පාරාජිකකණ්‌ඩවණ්‌ණනා නිට්‌ඨිතා.
Bhikkhunīvibhaṅge pārājikakaṇḍavaṇṇanā niṭṭhitā.
පාරාජිකකණ්‌ඩං නිට්‌ඨිතං.
Pārājikakaṇḍaṃ niṭṭhitaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / භික්‌ඛුනීවිභඞ්‌ග • Bhikkhunīvibhaṅga / 4. චතුත්‌ථපාරාජිකං • 4. Catutthapārājikaṃ
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 4. චතුත්‌ථපාරාජිකසික්‌ඛාපදවණ්‌ණනා • 4. Catutthapārājikasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 4. චතුත්‌ථපාරාජිකසික්‌ඛාපදවණ්‌ණනා • 4. Catutthapārājikasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 4. අට්‌ඨවත්‌ථුකසික්‌ඛාපදවණ්‌ණනා • 4. Aṭṭhavatthukasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 4. චතුත්‌ථපාරාජිකසික්‌ඛාපදං • 4. Catutthapārājikasikkhāpadaṃ
