| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
༤. ཙཏུཏྠཔཱརཱཛིཀསིཀྑཱཔདཝཎྞནཱ
4. Catutthapārājikasikkhāpadavaṇṇanā
༦༧༥. ཙཏུཏྠེ ལོཀསྶཱདམིཏྟསནྠཝཝསེནཱཏི ལོཀསྶཱདསངྑཱཏསྶ མིཏྟསནྠཝསྶ ཝསེན། ཝུཏྟམེཝཏྠཾ པརིཡཱཡནྟརེན ཝིབྷཱཝེཏུཾ ‘‘ཀཱཡསཾསགྒརཱགེནཱ’’ཏི ཝུཏྟཾ།
675. Catutthe lokassādamittasanthavavasenāti lokassādasaṅkhātassa mittasanthavassa vasena. Vuttamevatthaṃ pariyāyantarena vibhāvetuṃ ‘‘kāyasaṃsaggarāgenā’’ti vuttaṃ.
ཏིསྶིཏྠིཡོ མེཐུནཾ ཏཾ ན སེཝེཏི (པརི॰ ཨཊྛ॰ ༤༨༡) ཡཱ ཏིསྶོ ཨིཏྠིཡོ ཝུཏྟཱ, ཏཱསུཔི ཡཾ ཏཾ མེཐུནཾ ནཱམ, ཏཾ ན སེཝཏི། ཏཡོ པུརིསེཏི ཏཡོ པུརིསེཔི ཨུཔགནྟྭཱ མེཐུནཾ ན སེཝཏི། ཏཡོ ཙ ཨནརིཡཔཎྜཀེཏི ཨུབྷཏོབྱཉྫནསངྑཱཏེ ཏཡོ ཨནརིཡེ, ཏཡོ ཙ པཎྜཀེཏི ཨིམེཔི ཚ ཛནེ ཨུཔགནྟྭཱ མེཐུནཾ ན སེཝཏི། ན ཙཱཙརེ མེཐུནཾ བྱཉྫནསྨིནྟི ཨནུལོམཔཱརཱཛིཀཝསེནཔི ཨཏྟནོ ནིམིཏྟེ མེཐུནཾ ནཱཙརཏི། ཚེཛྫཾ སིཡཱ མེཐུནདྷམྨཔཙྩཡཱཏི སིཡཱ མེཐུནདྷམྨཔཙྩཡཱ པཱརཱཛིཀནྟི ཨཡཾ པཉྷོ ཨཊྛཝཏྠུཀཾཝ སནྡྷཱཡ ཝུཏྟོ། ཏསྶཱ ཧི མེཐུནདྷམྨསྶ པུབྦབྷཱགཀཱཡསཾསགྒཾ ཨཱཔཛྫིཏུཾ ཝཱཡམནྟིཡཱ མེཐུནདྷམྨཔཙྩཡཱ ཚེཛྫཾ ཧོཏི། ཚེདོཡེཝ ཚེཛྫཾ།
Tissitthiyo methunaṃ taṃ na seveti (pari. aṭṭha. 481) yā tisso itthiyo vuttā, tāsupi yaṃ taṃ methunaṃ nāma, taṃ na sevati. Tayo puriseti tayo purisepi upagantvā methunaṃ na sevati. Tayo ca anariyapaṇḍaketi ubhatobyañjanasaṅkhāte tayo anariye, tayo ca paṇḍaketi imepi cha jane upagantvā methunaṃ na sevati. Na cācare methunaṃ byañjanasminti anulomapārājikavasenapi attano nimitte methunaṃ nācarati. Chejjaṃ siyā methunadhammapaccayāti siyā methunadhammapaccayā pārājikanti ayaṃ pañho aṭṭhavatthukaṃva sandhāya vutto. Tassā hi methunadhammassa pubbabhāgakāyasaṃsaggaṃ āpajjituṃ vāyamantiyā methunadhammapaccayā chejjaṃ hoti. Chedoyeva chejjaṃ.
མེཐུནདྷམྨསྶ པུབྦབྷཱགཏྟཱཏི ཨིམིནཱ མེཐུནདྷམྨསྶ པུབྦབྷཱགབྷཱུཏོ ཀཱཡསཾསགྒོཡེཝ ཏཏྠ མེཐུནདྷམྨ-སདྡེན ཝུཏྟོ, ན དྭཡཾདྭཡསམཱཔཏྟཱིཏི དཱིཔེཏི། ཝཎྞཱཝཎྞོཏི དྭཱིཧི སུཀྐཝིསྶཊྛི ཝུཏྟཱ། གམནུཔྤཱདནནྟི སཉྩརིཏྟཾ། སབྦཔདེསཱུཏི ‘‘སངྒྷཱཊིཀཎྞགྒཧཎཾ སཱདིཡེཡྻཱ’’ཏིཨཱདཱིསུ། སེསམེཏྠ ཨུཏྟཱནམེཝ། ཀཱཡསཾསགྒརཱགོ, སཨུསྶཱཧཏཱ, ཨཊྛམསྶ ཝཏྠུསྶ པཱུརཎནྟི ཨིམཱནི པནེཏྠ ཏཱིཎི ཨངྒཱནི།
Methunadhammassa pubbabhāgattāti iminā methunadhammassa pubbabhāgabhūto kāyasaṃsaggoyeva tattha methunadhamma-saddena vutto, na dvayaṃdvayasamāpattīti dīpeti. Vaṇṇāvaṇṇoti dvīhi sukkavissaṭṭhi vuttā. Gamanuppādananti sañcarittaṃ. Sabbapadesūti ‘‘saṅghāṭikaṇṇaggahaṇaṃ sādiyeyyā’’tiādīsu. Sesamettha uttānameva. Kāyasaṃsaggarāgo, saussāhatā, aṭṭhamassa vatthussa pūraṇanti imāni panettha tīṇi aṅgāni.
ཙཏུཏྠཔཱརཱཛིཀསིཀྑཱཔདཝཎྞནཱ ནིཊྛིཏཱ།
Catutthapārājikasikkhāpadavaṇṇanā niṭṭhitā.
བྷིཀྑུནཱིཝིབྷངྒེ པཱརཱཛིཀཀཎྜཝཎྞནཱ ནིཊྛིཏཱ།
Bhikkhunīvibhaṅge pārājikakaṇḍavaṇṇanā niṭṭhitā.
པཱརཱཛིཀཀཎྜཾ ནིཊྛིཏཾ།
Pārājikakaṇḍaṃ niṭṭhitaṃ.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / བྷིཀྑུནཱིཝིབྷངྒ • Bhikkhunīvibhaṅga / ༤. ཙཏུཏྠཔཱརཱཛིཀཾ • 4. Catutthapārājikaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༤. ཙཏུཏྠཔཱརཱཛིཀསིཀྑཱཔདཝཎྞནཱ • 4. Catutthapārājikasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༤. ཙཏུཏྠཔཱརཱཛིཀསིཀྑཱཔདཝཎྞནཱ • 4. Catutthapārājikasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༤. ཨཊྛཝཏྠུཀསིཀྑཱཔདཝཎྞནཱ • 4. Aṭṭhavatthukasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༤. ཙཏུཏྠཔཱརཱཛིཀསིཀྑཱཔདཾ • 4. Catutthapārājikasikkhāpadaṃ
