| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
4. சதுத்த²பாராஜிகவண்ணனா
4. Catutthapārājikavaṇṇanā
இதே⁴வ ஸங்க³ஹந்தி ‘‘இதி ஜானாமி, இதி பஸ்ஸாமீ’’தி பதே³ கத²ந்தி சே, ‘‘இதி ஜானாமீ’’திஆதி³மாஹ . கேவலங் ‘‘பாபிச்ச²தாயா’’தி (கங்கா²॰ அட்ட²॰ சதுத்த²பாராஜிகவண்ணனா) வசனதோ மந்த³த்தா மோமூஹத்தா ஸமுதா³சரந்தஸ்ஸ அனாபத்தீதி தீ³பிதங். ‘‘அதீதகாலே ஸோதாபன்னொம்ஹீ’’தி வத³ந்தோ பரியாயேன வத³தி, ‘‘யோ தே விஹாரே வஸதி, ஸோ பி⁴க்கு² அரஹா’’திஆதீ³ஸு (பரி॰ 165) விய ஸிக்கா²பதே³பி ‘‘இதி ஜானாமீ’’தி (பாரா॰ 195, 197) பச்சுப்பன்னமேவ வுத்தங்.
Idheva saṅgahanti ‘‘iti jānāmi, iti passāmī’’ti pade kathanti ce, ‘‘iti jānāmī’’tiādimāha . Kevalaṃ ‘‘pāpicchatāyā’’ti (kaṅkhā. aṭṭha. catutthapārājikavaṇṇanā) vacanato mandattā momūhattā samudācarantassa anāpattīti dīpitaṃ. ‘‘Atītakāle sotāpannomhī’’ti vadanto pariyāyena vadati, ‘‘yo te vihāre vasati, so bhikkhu arahā’’tiādīsu (pari. 165) viya sikkhāpadepi ‘‘iti jānāmī’’ti (pārā. 195, 197) paccuppannameva vuttaṃ.
சதுத்த²பாராஜிகவண்ணனா நிட்டி²தா.
Catutthapārājikavaṇṇanā niṭṭhitā.
மாதுகா⁴தகபிதுகா⁴தகஅரஹந்தகா⁴தகா ததியபாராஜிகங் ஆபன்னா, பி⁴க்கு²னிதூ³ஸகோ, லம்பீ³ஆத³யோ ச சத்தாரோ பட²மபாராஜிகங் ஆபன்னா ஏவாதி கத்வா குதோ சதுவீஸதீதி சே? ந, அதி⁴ப்பாயாஜானநதோ. மாதுகா⁴தகாத³யோ ஹி சத்தாரோ இதா⁴னுபஸம்பன்னா ஏவ அதி⁴ப்பேதா, லம்பீ³ஆத³யோ சத்தாரோ கிஞ்சாபி பட²மபாராஜிகேன ஸங்க³ஹிதா, யஸ்மா பன ஏகேன பரியாயேன மேது²னத⁴ம்மங் படிஸேவினோ ஹொந்தி, தஸ்மா விஸுங் வுத்தா. ந லப⁴தி பி⁴க்கூ²ஹீதி எத்த² ‘‘உபோஸதா²தி³பே⁴த³ங் ஸங்வாஸ’’ந்தி எத்தகங் வுத்தங். வினயட்ட²கதா²யங் ‘‘உபோஸத²ப்பவாரணாபாதிமொக்கு²த்³தே³ஸஸங்க⁴கம்மப்பபே⁴த³’’ந்தி வுத்தங். பாளியங் ‘‘ஸங்வாஸோ நாம ஏககம்மங் ஏகுத்³தே³ஸோ ஸமஸிக்க²தா’’தி (பாரா॰ 55, 92, 172, 198) வுத்தங். திவிதே⁴னாபி ஸங்க⁴கம்மங் காதுங் ந வட்டதீதி படிக்கி²த்தங். ‘‘ந, பி⁴க்க²வே, க³ஹட்டே²ன நிஸின்னபரிஸாய பாதிமொக்க²ங் உத்³தி³ஸிதப்³ப³’’ந்திஆதி³ (மஹாவ॰ 154) பாதிமொக்க²ப்பவாரணாஸு ஏவ ஆக³தங், அஞ்ஞேஸு ச ஏவரூபேஸு டா²னேஸு ஸேஸங் கம்மங் காதுங் நத்தி² படிக்கே²போ. ஆசரியாபி ‘‘ஸேஸங் கம்மங் காதுங் வட்டதி, நத்தி² ஆபத்தீ’’தி வத³ந்தி. ‘‘அந்திமவத்து² அஜ்ஜா²பன்னங் அமூலகேன பாராஜிகேன சோதெ³ந்தஸ்ஸ ஸங்கா⁴தி³ஸேஸோ, ஸங்கா⁴தி³ஸேஸேன சோதெ³ந்தஸ்ஸ பாசித்தியந்தி பி⁴க்கு²னோ விய வுத்தங், ந அனுபஸம்பன்னஸ்ஸ விய து³க்கடங். தஸ்மா தேன ஸஹஸெய்யா, தஸ்ஸ படிக்³க³ஹணஞ்ச பி⁴க்கு²ஸ்ஸ வட்டதீதி ஆசரியா வத³ந்தீ’’தி லிகி²தங். ‘‘யதா² புரே ததா² பச்சா²தி ‘ஏககம்மங் ஏகுத்³தே³ஸோ ஸமஸிக்க²தா’தி ஏவங் வுத்தஸங்வாஸஸ்ஸ அப⁴ப்³ப³தாமத்தங் ஸந்தா⁴ய வுத்த’’ந்தி வத³ந்தி, வீமங்ஸிதப்³ப³ங்.
Mātughātakapitughātakaarahantaghātakā tatiyapārājikaṃ āpannā, bhikkhunidūsako, lambīādayo ca cattāro paṭhamapārājikaṃ āpannā evāti katvā kuto catuvīsatīti ce? Na, adhippāyājānanato. Mātughātakādayo hi cattāro idhānupasampannā eva adhippetā, lambīādayo cattāro kiñcāpi paṭhamapārājikena saṅgahitā, yasmā pana ekena pariyāyena methunadhammaṃ paṭisevino honti, tasmā visuṃ vuttā. Na labhati bhikkhūhīti ettha ‘‘uposathādibhedaṃ saṃvāsa’’nti ettakaṃ vuttaṃ. Vinayaṭṭhakathāyaṃ ‘‘uposathappavāraṇāpātimokkhuddesasaṅghakammappabheda’’nti vuttaṃ. Pāḷiyaṃ ‘‘saṃvāso nāma ekakammaṃ ekuddeso samasikkhatā’’ti (pārā. 55, 92, 172, 198) vuttaṃ. Tividhenāpi saṅghakammaṃ kātuṃ na vaṭṭatīti paṭikkhittaṃ. ‘‘Na, bhikkhave, gahaṭṭhena nisinnaparisāya pātimokkhaṃ uddisitabba’’ntiādi (mahāva. 154) pātimokkhappavāraṇāsu eva āgataṃ, aññesu ca evarūpesu ṭhānesu sesaṃ kammaṃ kātuṃ natthi paṭikkhepo. Ācariyāpi ‘‘sesaṃ kammaṃ kātuṃ vaṭṭati, natthi āpattī’’ti vadanti. ‘‘Antimavatthu ajjhāpannaṃ amūlakena pārājikena codentassa saṅghādiseso, saṅghādisesena codentassa pācittiyanti bhikkhuno viya vuttaṃ, na anupasampannassa viya dukkaṭaṃ. Tasmā tena sahaseyyā, tassa paṭiggahaṇañca bhikkhussa vaṭṭatīti ācariyā vadantī’’ti likhitaṃ. ‘‘Yathā pure tathā pacchāti ‘ekakammaṃ ekuddeso samasikkhatā’ti evaṃ vuttasaṃvāsassa abhabbatāmattaṃ sandhāya vutta’’nti vadanti, vīmaṃsitabbaṃ.
இதா³னி சதுன்னம்பி ஸாதா⁴ரணங் பகிண்ணகங் – மேது²னத⁴ம்மங் படிஸேவந்தோ அத்தி² கோசி பாராஜிகோ ஹோதி அஸங்வாஸோ, அத்தி² கோசி ந பாராஜிகோ ஹோதி அஸங்வாஸோ, அத்தி² கோசி ந பாராஜிகோ ஸங்வாஸோ து³க்கடவத்து²ஸ்மிங் வா து²ல்லச்சயவத்து²ஸ்மிங் வா படிஸேவந்தோ, அத்தி² கோசி ந பாராஜிகோ பக்க²பண்ட³கோ அபண்ட³கபக்கே² உபஸம்பன்னோ பண்ட³கபக்கே² மேது²னத⁴ம்மங் படிஸேவந்தோ. ஸோ ஆபத்திங் நாபஜ்ஜதீதி ந பாராஜிகோ நாம. ந ஹி அபி⁴க்கு²ஸ்ஸ ஆபத்தி நாம அத்தி². ஸோ அனாபத்திகத்தா அபண்ட³கபக்கே² ஆக³தோ கிங் அஸங்வாஸோ ஹோதி, ந ஹோதீதி? ஹோதி. ‘‘அப⁴ப்³போ³ தேன ஸரீரப³ந்த⁴னேனா’’தி (மஹாவ॰ 129) ஹி வுத்தங். ‘‘யோ பன பி⁴க்கு² பி⁴க்கூ²னங் ஸிக்கா²ஸாஜீவஸமாபன்னோ…பே॰… அஸங்வாஸோ’’தி (பாரா॰ 44) வுத்தத்தா யோ பி⁴க்கு²பா⁴வேன மேது²னங் த⁴ம்மங் படிஸேவதி, ஸோ ஏவ அப⁴ப்³போ³. நாயங் அபாராஜிகத்தாதி சே? ந, ‘‘ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³’’தி (மஹாவ॰ 126) வுத்தட்டா²னே யதா² அபி⁴க்கு²னா கம்மவாசாய ஸாவிதாயபி கம்மங் ருஹதி கம்மவிபத்தியா அஸம்ப⁴வதோ, ஏவங்ஸம்பத³மித³ங் த³ட்ட²ப்³ப³ங். தத்ராயங் விஸேஸோ – உபஸம்பன்னபுப்³போ³ ஏவங் சே கம்மவாசங் ஸாவேதி, ஸங்கோ⁴ ச தஸ்மிங் உபஸம்பன்னஸஞ்ஞீ ஏவ சே, கம்மங் ருஹதி, நாஞ்ஞதா²தி நோ க²ந்தீதி ஆசரியோ.
Idāni catunnampi sādhāraṇaṃ pakiṇṇakaṃ – methunadhammaṃ paṭisevanto atthi koci pārājiko hoti asaṃvāso, atthi koci na pārājiko hoti asaṃvāso, atthi koci na pārājiko saṃvāso dukkaṭavatthusmiṃ vā thullaccayavatthusmiṃ vā paṭisevanto, atthi koci na pārājiko pakkhapaṇḍako apaṇḍakapakkhe upasampanno paṇḍakapakkhe methunadhammaṃ paṭisevanto. So āpattiṃ nāpajjatīti na pārājiko nāma. Na hi abhikkhussa āpatti nāma atthi. So anāpattikattā apaṇḍakapakkhe āgato kiṃ asaṃvāso hoti, na hotīti? Hoti. ‘‘Abhabbo tena sarīrabandhanenā’’ti (mahāva. 129) hi vuttaṃ. ‘‘Yo pana bhikkhu bhikkhūnaṃ sikkhāsājīvasamāpanno…pe… asaṃvāso’’ti (pārā. 44) vuttattā yo bhikkhubhāvena methunaṃ dhammaṃ paṭisevati, so eva abhabbo. Nāyaṃ apārājikattāti ce? Na, ‘‘byattena bhikkhunā paṭibalena saṅgho ñāpetabbo’’ti (mahāva. 126) vuttaṭṭhāne yathā abhikkhunā kammavācāya sāvitāyapi kammaṃ ruhati kammavipattiyā asambhavato, evaṃsampadamidaṃ daṭṭhabbaṃ. Tatrāyaṃ viseso – upasampannapubbo evaṃ ce kammavācaṃ sāveti, saṅgho ca tasmiṃ upasampannasaññī eva ce, kammaṃ ruhati, nāññathāti no khantīti ācariyo.
க³ஹட்டோ² வா தித்தி²யோ வா பண்ட³கோ வா கம்மவாசங் ஸாவேதி, ஸங்கே⁴ன கம்மவாசா ந வுத்தா ஹோதி. ‘‘ஸங்கோ⁴ உபஸம்பாதெ³ய்ய ஸங்கோ⁴ உபஸம்பாதே³தி, உபஸம்பன்னோ ஸங்கே⁴னா’’தி (மஹாவ॰ 127) ஹி வசனதோ ஸங்கே⁴ன கம்மவாசாய வத்தப்³ப³தாய ஸங்க⁴பரியாபன்னேன, ஸங்க⁴பரியாபன்னஸஞ்ஞிதேன வா ஏகேன வுத்தாய ஸங்கே⁴ன வுத்தா ஹோதீதி வேதி³தப்³போ³, ந க³ஹட்ட²தித்தி²யபண்ட³காதீ³ஸு அஞ்ஞதரேன. அயமேவ ஸப்³ப³கம்மேஸு யுத்தி த³ட்ட²ப்³பா³.
Gahaṭṭho vā titthiyo vā paṇḍako vā kammavācaṃ sāveti, saṅghena kammavācā na vuttā hoti. ‘‘Saṅgho upasampādeyya saṅgho upasampādeti, upasampanno saṅghenā’’ti (mahāva. 127) hi vacanato saṅghena kammavācāya vattabbatāya saṅghapariyāpannena, saṅghapariyāpannasaññitena vā ekena vuttāya saṅghena vuttā hotīti veditabbo, na gahaṭṭhatitthiyapaṇḍakādīsu aññatarena. Ayameva sabbakammesu yutti daṭṭhabbā.
ததா² அத்தி² மேது²னங் த⁴ம்மங் படிஸேவந்தோ கோசி நாஸேதப்³போ³, ‘‘யோ பி⁴க்கு²னிதூ³ஸகோ, அயங் நாஸேதப்³போ³’’தி (மஹாவ॰ 114-115 அத்த²தோ ஸமானங்) வுத்தத்தா தேன ஏவ ஸோ அனுபஸம்பன்னோவ ஸஹஸெய்யாபத்திங் வா அஞ்ஞங் வா தாதி³ஸங் ஜனேதி, தஸ்ஸ ஓமஸனே ச து³க்கடங் ஹோதி. அபி⁴க்கு²னியா மேது²னத⁴ம்மங் படிஸேவந்தோ ந நாஸேதப்³போ³, ‘‘அந்திமவத்து²ங் அஜ்ஜா²பன்னோ, பி⁴க்க²வே, அனுபஸம்பன்னோ ந உபஸம்பாதே³தப்³போ³’’தி பாளியா அபா⁴வதோ, தேனேவ ஸோ உபஸம்பன்னஸங்க²ங் க³ச்ச²தி, ஸஹஸெய்யாபத்திஆதி³ங் ந ஜனேதி, கேவலங் அஸங்வாஸோதி கத்வா க³ணபூரகோ ந ஹோதி. ஏககம்மஏகுத்³தே³ஸோ ஹி ஸங்வாஸோதி வுத்தோ, ஸமஸிக்க²தாபி ஸங்வாஸோதி கத்வா ஸோ தேன ஸத்³தி⁴ங் நத்தீ²தி. பத³ஸோத⁴ம்மாபத்திங் பன ஜனேதீதி காரணச்சா²யா தி³ஸ்ஸதீதி. யதா² பி⁴க்கு²னியா ஸத்³தி⁴ங் பி⁴க்கு²ஸங்க⁴ஸ்ஸ ஏககம்மாதி³னோ ஸங்வாஸஸ்ஸ அபா⁴வா பி⁴க்கு²னீ அஸங்வாஸா பி⁴க்கு²ஸ்ஸ, ததா² பி⁴க்கு² ச பி⁴க்கு²னியா, பத³ஸோத⁴ம்மாபத்திங் பன ந ஜனேதி. ததா² அந்திமவத்து²ங் அஜ்ஜா²பன்னோபி ஏகேச்சோ ‘‘யோ நாஸேதப்³போ³தி வுத்தோ’’தி இமினா நித³ஸ்ஸனேன ஸகாரணச்சா²யா அஜ்ஜு²பெக்கி²தா ஹோதீதி ந க³ஹணங் க³ச்ச²தி. அபிச ‘‘உபோ⁴ நாஸேதப்³பா³, தூ³ஸகோ நாஸேதப்³போ³’’தி (பாரா॰ 66) வசனதோ, ‘‘மெத்தியங் பி⁴க்கு²னிங் நாஸேதா²’’தி (பாரா॰ 384) வசனதோ ச யோ ஸங்க⁴மஜ்ஜ²ங் பவிஸித்வா அனுவிஜ்ஜகேன அனுவிஜ்ஜியமானோ பராஜிதோ, ஸோபி அனுபஸம்பன்னோவ, ந ஓமஸவாத³பாசித்தியங் ஜனேதீதி வேதி³தப்³போ³.
Tathā atthi methunaṃ dhammaṃ paṭisevanto koci nāsetabbo, ‘‘yo bhikkhunidūsako, ayaṃ nāsetabbo’’ti (mahāva. 114-115 atthato samānaṃ) vuttattā tena eva so anupasampannova sahaseyyāpattiṃ vā aññaṃ vā tādisaṃ janeti, tassa omasane ca dukkaṭaṃ hoti. Abhikkhuniyā methunadhammaṃ paṭisevanto na nāsetabbo, ‘‘antimavatthuṃ ajjhāpanno, bhikkhave, anupasampanno na upasampādetabbo’’ti pāḷiyā abhāvato, teneva so upasampannasaṅkhaṃ gacchati, sahaseyyāpattiādiṃ na janeti, kevalaṃ asaṃvāsoti katvā gaṇapūrako na hoti. Ekakammaekuddeso hi saṃvāsoti vutto, samasikkhatāpi saṃvāsoti katvā so tena saddhiṃ natthīti. Padasodhammāpattiṃ pana janetīti kāraṇacchāyā dissatīti. Yathā bhikkhuniyā saddhiṃ bhikkhusaṅghassa ekakammādino saṃvāsassa abhāvā bhikkhunī asaṃvāsā bhikkhussa, tathā bhikkhu ca bhikkhuniyā, padasodhammāpattiṃ pana na janeti. Tathā antimavatthuṃ ajjhāpannopi ekecco ‘‘yo nāsetabboti vutto’’ti iminā nidassanena sakāraṇacchāyā ajjhupekkhitā hotīti na gahaṇaṃ gacchati. Apica ‘‘ubho nāsetabbā, dūsako nāsetabbo’’ti (pārā. 66) vacanato, ‘‘mettiyaṃ bhikkhuniṃ nāsethā’’ti (pārā. 384) vacanato ca yo saṅghamajjhaṃ pavisitvā anuvijjakena anuvijjiyamāno parājito, sopi anupasampannova, na omasavādapācittiyaṃ janetīti veditabbo.
அபிசெத்த² ஸிக்கா²பச்சக்கா²தகசதுக்கங் வேதி³தப்³ப³ங். அத்தி² ஹி புக்³க³லோ ஸிக்கா²பச்சக்கா²தகோ ந ஸிக்கா²ஸாஜீவஸமாபன்னோ, அத்தி² புக்³க³லோ ந ஸிக்கா²பச்சக்கா²தகோ ஸிக்கா²ஸாஜீவஸமாபன்னோ, அத்தி² புக்³க³லோ ஸிக்கா²பச்சக்கா²தகோ சேவ ஸிக்கா²ஸாஜீவஸமாபன்னோ ச, அத்தி² புக்³க³லோ நேவ ஸிக்கா²பச்சக்கா²தகோ ந ஸிக்கா²ஸாஜீவஸமாபன்னோ. தத்த² ததியோ பி⁴க்கு²னீ ஸிக்கா²பச்சக்கா²தகா வேதி³தப்³பா³. ஸா ஹி யாவ ந லிங்க³ங் பரிச்சஜதி, காஸாவேஸு ஸஉஸ்ஸாஹாவ ஸமானா ஸாமஞ்ஞா சவிதுகாமா ஸிக்க²ங் பச்சக்க²ந்தீபி பி⁴க்கு²னீ ஏவ ஸிக்கா²ஸாஜீவஸமாபன்னாவ. வுத்தஞ்ஹி ப⁴க³வதா ‘‘நத்தி², பி⁴க்க²வே, பி⁴க்கு²னியா ஸிக்கா²பச்சக்கா²ன’’ந்தி. கதா³ பன ஸா அபி⁴க்கு²னீ ஹோதீதி? யதா³ ஸா விப்³ப⁴ந்தாதி ஸங்க²ங் க³ச்ச²தி. வுத்தஞ்ஹி ப⁴க³வதா ‘‘யதே³வ ஸா விப்³ப⁴ந்தா, ததே³வ ஸா அபி⁴க்கு²னீ’’தி (சூளவ॰ 434). கித்தாவதா பன விப்³ப⁴ந்தா ஹோதீதி? ஸாமஞ்ஞா சவிதுகாமா காஸாவேஸு அனாலயா காஸாவங் வா அபனேதி, நக்³கா³ வா க³ச்ச²தி, திணபண்ணாதி³னா வா படிச்சா²தெ³த்வா க³ச்ச²தி, காஸாவங்யேவ வா கி³ஹினிவாஸனாகாரேன நிவாஸேதி, ஓதா³தங் வா வத்த²ங் நிவாஸேதி, லிங்கே³னேவ வா ஸத்³தி⁴ங் தித்தி²யேஸு பவிஸித்வா கேஸலுஞ்சனாதி³வதங் ஸமாதி³யதி, தித்தி²யலிங்க³ங் வா ஸமாதி³யதி, ததா³ விப்³ப⁴ந்தா நாம ஹோதி. தத்த² யா ஸலிங்கே³ டி²தாவ தித்தி²யவதங் ஸமாதி³யதி, ஸா தித்தி²யபக்கந்தபி⁴க்கு² விய பச்சா² பப்³ப³ஜ்ஜம்பி ந லப⁴தி. ஸேஸா பப்³ப³ஜ்ஜமேவ லப⁴தி, ந உபஸம்பத³ங். பாளியங் கிஞ்சாபி ‘‘யா, பி⁴க்க²வே, பி⁴க்கு²னீ ஸகாவாஸா தித்தா²யதனங் ஸங்கந்தா, ஸா ஆக³தா ந உபஸம்பாதே³தப்³பா³’’தி (சூளவ॰ 434) வசனதோ யா பட²மங் விப்³ப⁴மித்வா பச்சா² தித்தா²யதனங் ஸங்கந்தா, ஸா ஆக³தா உபஸம்பாதே³தப்³பா³தி அனுஞ்ஞாதங் விய தி³ஸ்ஸதி. ஸங்கீ³திஆசரியேஹி பன ‘‘சதுவீஸதி பாராஜிகானீ’’தி (பாரா॰ அட்ட²॰ 2.233) வுத்தத்தா ந புன ஸா உபஸம்பாதே³தப்³பா³. தஸ்மா ஏவ ஸிக்கா²பச்சக்கா²னங் நானுஞ்ஞாதங் ப⁴க³வதா. அந்திமவத்து²ங் அஜ்ஜா²பன்னா பன பி⁴க்கு²னீ ஏவ. பக்க²பண்ட³கீபி பி⁴க்கு²னீ ஏவ. இமங் நயங் சதூஸுபி யோஜெத்வா யதா²ரஹங் கதே²தப்³ப³ங்.
Apicettha sikkhāpaccakkhātakacatukkaṃ veditabbaṃ. Atthi hi puggalo sikkhāpaccakkhātako na sikkhāsājīvasamāpanno, atthi puggalo na sikkhāpaccakkhātako sikkhāsājīvasamāpanno, atthi puggalo sikkhāpaccakkhātako ceva sikkhāsājīvasamāpanno ca, atthi puggalo neva sikkhāpaccakkhātako na sikkhāsājīvasamāpanno. Tattha tatiyo bhikkhunī sikkhāpaccakkhātakā veditabbā. Sā hi yāva na liṅgaṃ pariccajati, kāsāvesu saussāhāva samānā sāmaññā cavitukāmā sikkhaṃ paccakkhantīpi bhikkhunī eva sikkhāsājīvasamāpannāva. Vuttañhi bhagavatā ‘‘natthi, bhikkhave, bhikkhuniyā sikkhāpaccakkhāna’’nti. Kadā pana sā abhikkhunī hotīti? Yadā sā vibbhantāti saṅkhaṃ gacchati. Vuttañhi bhagavatā ‘‘yadeva sā vibbhantā, tadeva sā abhikkhunī’’ti (cūḷava. 434). Kittāvatā pana vibbhantā hotīti? Sāmaññā cavitukāmā kāsāvesu anālayā kāsāvaṃ vā apaneti, naggā vā gacchati, tiṇapaṇṇādinā vā paṭicchādetvā gacchati, kāsāvaṃyeva vā gihinivāsanākārena nivāseti, odātaṃ vā vatthaṃ nivāseti, liṅgeneva vā saddhiṃ titthiyesu pavisitvā kesaluñcanādivataṃ samādiyati, titthiyaliṅgaṃ vā samādiyati, tadā vibbhantā nāma hoti. Tattha yā saliṅge ṭhitāva titthiyavataṃ samādiyati, sā titthiyapakkantabhikkhu viya pacchā pabbajjampi na labhati. Sesā pabbajjameva labhati, na upasampadaṃ. Pāḷiyaṃ kiñcāpi ‘‘yā, bhikkhave, bhikkhunī sakāvāsā titthāyatanaṃ saṅkantā, sā āgatā na upasampādetabbā’’ti (cūḷava. 434) vacanato yā paṭhamaṃ vibbhamitvā pacchā titthāyatanaṃ saṅkantā, sā āgatā upasampādetabbāti anuññātaṃ viya dissati. Saṅgītiācariyehi pana ‘‘catuvīsati pārājikānī’’ti (pārā. aṭṭha. 2.233) vuttattā na puna sā upasampādetabbā. Tasmā eva sikkhāpaccakkhānaṃ nānuññātaṃ bhagavatā. Antimavatthuṃ ajjhāpannā pana bhikkhunī eva. Pakkhapaṇḍakīpi bhikkhunī eva. Imaṃ nayaṃ catūsupi yojetvā yathārahaṃ kathetabbaṃ.
பாராஜிகவண்ணனா நிட்டி²தா.
Pārājikavaṇṇanā niṭṭhitā.
