| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
4. சதுத்த²பாடிதே³ஸனீயஸிக்கா²பத³ங்
4. Catutthapāṭidesanīyasikkhāpadaṃ
570. சதுத்தே² அவருத்³த⁴ஸத்³தோ³ பரிருத்³த⁴ஸத்³த³ஸ்ஸ பரியாயோதி ஆஹ ‘‘பரிருத்³தா⁴ ஹொந்தீ’’தி. ஆரஞ்ஞகஸ்ஸ ஸேனாஸனஸ்ஸ பரிஸமந்ததோ ருத்³தா⁴ ஆவுதா ஹொந்தீதி அத்தோ².
570. Catutthe avaruddhasaddo pariruddhasaddassa pariyāyoti āha ‘‘pariruddhā hontī’’ti. Āraññakassa senāsanassa parisamantato ruddhā āvutā hontīti attho.
573. ‘‘பஞ்சன்ன’’ந்தி நித்³தா⁴ரணே ஸாமிவசனபா⁴வஞ்ச ‘‘யங்கிஞ்சீ’’தி நித்³தா⁴ரணீயேன ஸம்ப³ந்தி⁴தப்³ப³பா⁴வஞ்ச த³ஸ்ஸேதுங் வுத்தங் ‘‘பஞ்சஸு ஸஹத⁴ம்மிகேஸு யங் கிஞ்சீ’’தி. ‘‘பேஸெத்வா கா²த³னீயங் போ⁴ஜனீயங் ஆஹரிஸ்ஸாமீ’’திஇமினா படிஸங்விதி³தாகாரத³ஸ்ஸனங். ‘‘ஆராம’’ந்தி ஸாமஞ்ஞதோ வுத்தேபி ஆரஞ்ஞகஸேனாஸனஸ்ஸ ஆராமோ ஏவ அதி⁴ப்பேதோதி ஆஹ ‘‘ஆரஞ்ஞகஸேனாஸனாராமஞ்சா’’தி. தஸ்ஸாதி ஆரஞ்ஞகஸேனாஸனாராமஸ்ஸ. ‘‘கஸ்மா’’தி புச்சா²ய ‘‘படிமோசனத்த²’’ந்தி விஸஜ்ஜனாய ஸமேதுங் ஸம்பதா³னத்தே² நிஸ்ஸக்கவசனங் காதப்³ப³ங். கிமத்த²ந்தி ஹி அத்தோ². படிமோசனத்த²ந்தி தத³த்தே² பச்சத்தவசனங். படிமோசனஸங்கா²தாய அத்தா²யாதி ஹி அத்தோ². அத்த²ஸத்³தோ³ ச பயோஜனவாசகோ. பயோஜனாயாதி ஹி அத்தோ². அத² வா ‘‘படிமோசனத்த²’’ந்தி விஸஜ்ஜனாயங். ‘‘கஸ்மா’’தி புச்சா²ய ஸமேதுங் நிஸ்ஸக்கத்தே² பச்சத்தவசனங் காதப்³ப³ங். படிமோசனஸங்கா²தா அத்தா²தி ஹி அத்தோ². அத்த²ஸத்³தோ³ ச காரணவாசகோ. காரணாதி ஹி அத்தோ². ஏவஞ்ஹி புச்சா²விஸஜ்ஜனானங் புப்³பா³பரஸமஸங்கா²தோ விசயோ ஹாரோ பரிபுண்ணோ ஹோதீதி த³ட்ட²ப்³ப³ங். அம்ஹாகந்தி கா²த³னீயபோ⁴ஜனீயபடிஹரந்தானங் அம்ஹாகங். அம்ஹேதி சோரஸங்கா²தே அம்ஹே.
573. ‘‘Pañcanna’’nti niddhāraṇe sāmivacanabhāvañca ‘‘yaṃkiñcī’’ti niddhāraṇīyena sambandhitabbabhāvañca dassetuṃ vuttaṃ ‘‘pañcasu sahadhammikesu yaṃ kiñcī’’ti. ‘‘Pesetvā khādanīyaṃ bhojanīyaṃ āharissāmī’’tiiminā paṭisaṃviditākāradassanaṃ. ‘‘Ārāma’’nti sāmaññato vuttepi āraññakasenāsanassa ārāmo eva adhippetoti āha ‘‘āraññakasenāsanārāmañcā’’ti. Tassāti āraññakasenāsanārāmassa. ‘‘Kasmā’’ti pucchāya ‘‘paṭimocanattha’’nti visajjanāya sametuṃ sampadānatthe nissakkavacanaṃ kātabbaṃ. Kimatthanti hi attho. Paṭimocanatthanti tadatthe paccattavacanaṃ. Paṭimocanasaṅkhātāya atthāyāti hi attho. Atthasaddo ca payojanavācako. Payojanāyāti hi attho. Atha vā ‘‘paṭimocanattha’’nti visajjanāyaṃ. ‘‘Kasmā’’ti pucchāya sametuṃ nissakkatthe paccattavacanaṃ kātabbaṃ. Paṭimocanasaṅkhātā atthāti hi attho. Atthasaddo ca kāraṇavācako. Kāraṇāti hi attho. Evañhi pucchāvisajjanānaṃ pubbāparasamasaṅkhāto vicayo hāro paripuṇṇo hotīti daṭṭhabbaṃ. Amhākanti khādanīyabhojanīyapaṭiharantānaṃ amhākaṃ. Amheti corasaṅkhāte amhe.
‘‘தஸ்ஸா’’தி பத³ஸ்ஸத்த²ங் த³ஸ்ஸேதுங் வுத்தங் ‘‘ஏதிஸ்ஸா யாகு³யா’’தி. அஞ்ஞானிபீதி படிஸங்விதி³தகுலதோ அஞ்ஞானிபி குலானி. தேனாதி படிஸங்விதி³தகுலேன. குருந்தி³வாதே³ யாகு³யா படிஸங்விதி³தங் கத்வா யாகு³ங் அக்³க³ஹெத்வா பூவாதீ³னி ஆஹரந்தி, வட்டதீதி அதி⁴ப்பாயோ.
‘‘Tassā’’ti padassatthaṃ dassetuṃ vuttaṃ ‘‘etissā yāguyā’’ti. Aññānipīti paṭisaṃviditakulato aññānipi kulāni. Tenāti paṭisaṃviditakulena. Kurundivāde yāguyā paṭisaṃviditaṃ katvā yāguṃ aggahetvā pūvādīni āharanti, vaṭṭatīti adhippāyo.
575. ஏகஸ்ஸாதி பி⁴க்கு²ஸ்ஸ. தஸ்ஸாதி படிஸங்விதி³தபி⁴க்கு²ஸ்ஸ, சதுன்னங் வா பஞ்சன்னங் வா பி⁴க்கூ²னங் அத்தா²யாதி யோஜனா. அஞ்ஞேஸம்பீதி சதுபஞ்சபி⁴க்கு²தோ அஞ்ஞேஸம்பி. அதி⁴கமேவாதி பரிபு⁴த்ததோ அதிரேகமேவ. யங் பனாதி கா²த³னீயபோ⁴ஜனீயங் பன, யம்பி கா²த³னீயபோ⁴ஜனீயங் வனதோ ஆஹரித்வா தெ³ந்தீதி யோஜனா. ‘‘தத்த²ஜாதக’’ந்தி எத்த² தஸத்³த³ஸ்ஸ விஸயங் த³ஸ்ஸேதுங் வுத்தங் ‘‘ஆராமே’’தி. அஞ்ஞேன தி³ன்னந்தி ஸம்ப³ந்தோ⁴. நந்தி மூலகா²த³னீயாதி³ங். படிஸங்விதி³தந்தி படிகச்சேவ ஸுட்டு² ஜானாபிதந்தி அத்தோ²தி. சதுத்த²ங்.
575.Ekassāti bhikkhussa. Tassāti paṭisaṃviditabhikkhussa, catunnaṃ vā pañcannaṃ vā bhikkhūnaṃ atthāyāti yojanā. Aññesampīti catupañcabhikkhuto aññesampi. Adhikamevāti paribhuttato atirekameva. Yaṃ panāti khādanīyabhojanīyaṃ pana, yampi khādanīyabhojanīyaṃ vanato āharitvā dentīti yojanā. ‘‘Tatthajātaka’’nti ettha tasaddassa visayaṃ dassetuṃ vuttaṃ ‘‘ārāme’’ti. Aññena dinnanti sambandho. Nanti mūlakhādanīyādiṃ. Paṭisaṃviditanti paṭikacceva suṭṭhu jānāpitanti atthoti. Catutthaṃ.
இதி ஸமந்தபாஸாதி³காய வினயஸங்வண்ணனாய
Iti samantapāsādikāya vinayasaṃvaṇṇanāya
பாடிதே³ஸனீயவண்ணனாய
Pāṭidesanīyavaṇṇanāya
யோஜனா ஸமத்தா.
Yojanā samattā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. சதுத்த²பாடிதே³ஸனீயஸிக்கா²பத³ங் • 4. Catutthapāṭidesanīyasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. சதுத்த²பாடிதே³ஸனீயஸிக்கா²பத³வண்ணனா • 4. Catutthapāṭidesanīyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. து³தியபாடிதே³ஸனீயஸிக்கா²பத³வண்ணனா • 2. Dutiyapāṭidesanīyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மபாடிதே³ஸனீயஸிக்கா²பத³வண்ணனா • 1. Paṭhamapāṭidesanīyasikkhāpadavaṇṇanā
