| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
4. சதுத்த²பாடிதே³ஸனீயஸிக்கா²பத³வண்ணனா
4. Catutthapāṭidesanīyasikkhāpadavaṇṇanā
570. சதுத்தே² – அவருத்³தா⁴ ஹொந்தீதி படிவிருத்³தா⁴ ஹொந்தி.
570. Catutthe – avaruddhā hontīti paṭiviruddhā honti.
573. பஞ்சன்னங் படிஸங்விதி³தந்தி பஞ்சஸு ஸஹத⁴ம்மிகேஸு யங்கிஞ்சி பேஸெத்வா கா²த³னீயங் போ⁴ஜனீயங் ஆஹரிஸ்ஸாமாதி படிஸங்விதி³தங் கதம்பி அப்படிஸங்விதி³தமேவாதி அத்தோ². ஆராமங் ஆராமூபசாரங் ட²பெத்வாதி ஆரஞ்ஞகஸேனாஸனாராமஞ்ச தஸ்ஸ உபசாரஞ்ச ட²பெத்வா; உபசாரதோ நிக்க²ந்தங் அந்தராமக்³கே³ பி⁴க்கு²ங் தி³ஸ்வா வா கா³மங் ஆக³தஸ்ஸ வா படிஸங்விதி³தங் கதம்பி அப்படிஸங்விதி³தமேவ ஹோதீதி வேதி³தப்³ப³ங். ஸசே ஸாஸங்கங் ஹோதி ஸாஸங்கந்தி ஆசிக்கி²தப்³ப³ந்தி கஸ்மா ஆசிக்கி²தப்³ப³ங்? ஆராமே சோரே வஸந்தே அம்ஹாகங் நாரோசெந்தீதி வசனபடிமோசனத்த²ங். சோரா வத்தப்³பா³ மனுஸ்ஸா இதூ⁴பசரந்தீதி கஸ்மா வத்தப்³ப³ங்? அத்தனோ உபட்டா²கேஹி அம்ஹே க³ண்ஹாபெந்தீதி வசனபடிமோசனத்த²ங்.
573.Pañcannaṃ paṭisaṃviditanti pañcasu sahadhammikesu yaṃkiñci pesetvā khādanīyaṃ bhojanīyaṃ āharissāmāti paṭisaṃviditaṃ katampi appaṭisaṃviditamevāti attho. Ārāmaṃ ārāmūpacāraṃ ṭhapetvāti āraññakasenāsanārāmañca tassa upacārañca ṭhapetvā; upacārato nikkhantaṃ antarāmagge bhikkhuṃ disvā vā gāmaṃ āgatassa vā paṭisaṃviditaṃ katampi appaṭisaṃviditameva hotīti veditabbaṃ. Sace sāsaṅkaṃ hoti sāsaṅkanti ācikkhitabbanti kasmā ācikkhitabbaṃ? Ārāme core vasante amhākaṃ nārocentīti vacanapaṭimocanatthaṃ. Corā vattabbā manussā idhūpacarantīti kasmā vattabbaṃ? Attano upaṭṭhākehi amhe gaṇhāpentīti vacanapaṭimocanatthaṃ.
யாகு³யா படிஸங்விதி³தே தஸ்ஸா பரிவாரோ ஆஹரிய்யதீதி யாகு³யா படிஸங்விதி³தங் கத்வா ‘‘கிங் ஸுத்³த⁴யாகு³யா தி³ன்னாய பூவப⁴த்தாதீ³னிபி ஏதிஸ்ஸா யாகு³யா பரிவாரங் கத்வா த³ஸ்ஸாமா’’தி ஏவங் யங் கிஞ்சி ஆஹரந்தி, ஸப்³ப³ங் படிஸங்விதி³தமேவ ஹோதி. ப⁴த்தேன படிஸங்விதி³தேதிஆதீ³ஸுபி ஏஸேவ நயோ. அஸுகங் நாம குலங் படிஸங்விதி³தங் கத்வா கா²த³னீயாதீ³னி க³ஹெத்வா க³ச்ச²தீதி ஸுத்வா அஞ்ஞானிபி தேன ஸத்³தி⁴ங் அத்தனோ தெ³ய்யத⁴ம்மங் ஆஹரந்தி, வட்டதி. யாகு³யா படிஸங்விதி³தங் கத்வா பூவங் வா ப⁴த்தங் வா ஆஹரந்தி, ஏதம்பி வட்டதீதி குருந்தி³யங் வுத்தங்.
Yāguyā paṭisaṃvidite tassā parivāro āhariyyatīti yāguyā paṭisaṃviditaṃ katvā ‘‘kiṃ suddhayāguyā dinnāya pūvabhattādīnipi etissā yāguyā parivāraṃ katvā dassāmā’’ti evaṃ yaṃ kiñci āharanti, sabbaṃ paṭisaṃviditameva hoti. Bhattena paṭisaṃviditetiādīsupi eseva nayo. Asukaṃ nāma kulaṃ paṭisaṃviditaṃ katvā khādanīyādīni gahetvā gacchatīti sutvā aññānipi tena saddhiṃ attano deyyadhammaṃ āharanti, vaṭṭati. Yāguyā paṭisaṃviditaṃ katvā pūvaṃ vā bhattaṃ vā āharanti, etampi vaṭṭatīti kurundiyaṃ vuttaṃ.
575. கி³லானஸ்ஸாதி அப்படிஸங்விதி³தேபி கி³லானஸ்ஸ அனாபத்தி. படிஸங்விதி³தே வா கி³லானஸ்ஸ வா ஸேஸகந்தி ஏகஸ்ஸத்தா²ய படிஸங்விதி³தங் கத்வா ஆஹடங், தஸ்ஸ ஸேஸகங் அஞ்ஞஸ்ஸாபி பு⁴ஞ்ஜிதுங் வட்டதி. சதுன்னங் பஞ்சன்னங் வா படிஸங்விதி³தங் கத்வா ப³ஹுங் ஆஹடங் ஹோதி, அஞ்ஞேஸம்பி தா³துங் இச்ச²ந்தி, ஏதம்பி படிஸங்விதி³தஸேஸகமேவ, ஸப்³பே³ஸம்பி வட்டதி. அத² அதி⁴கமேவ ஹோதி, ஸன்னிதி⁴ங் மோசெத்வா ட²பிதங் து³தியதி³வஸேபி வட்டதி. கி³லானஸ்ஸ ஆஹடாவஸேஸேபி ஏஸேவ நயோ. யங் பன அப்படிஸங்விதி³தமேவ கத்வா ஆப⁴தங், தங் ப³ஹிஆராமங் பேஸெத்வா படிஸங்விதி³தங் காரெத்வா ஆஹராபேதப்³ப³ங், பி⁴க்கூ²ஹி வா க³ந்த்வா அந்தராமக்³கே³ க³ஹேதப்³ப³ங். யம்பி விஹாரமஜ்ஜே²ன க³ச்ச²ந்தா வா வனசரகாத³யோ வா வனதோ ஆஹரித்வா தெ³ந்தி, புரிமனயேனேவ படிஸங்விதி³தங் காரேதப்³ப³ங். தத்த²ஜாதகந்தி ஆராமே ஜாதகமேவ; மூலகா²த³னீயாதி³ங் அஞ்ஞேன கப்பியங் கத்வா தி³ன்னங் பரிபு⁴ஞ்ஜதோ அனாபத்தி. ஸசே பன தங் கா³மங் ஹரித்வா பசித்வா ஆஹரந்தி, ந வட்டதி. படிஸங்விதி³தங் காரேதப்³ப³ங். ஸேஸமெத்த² உத்தானமேவ.
575.Gilānassāti appaṭisaṃviditepi gilānassa anāpatti. Paṭisaṃvidite vā gilānassa vā sesakanti ekassatthāya paṭisaṃviditaṃ katvā āhaṭaṃ, tassa sesakaṃ aññassāpi bhuñjituṃ vaṭṭati. Catunnaṃ pañcannaṃ vā paṭisaṃviditaṃ katvā bahuṃ āhaṭaṃ hoti, aññesampi dātuṃ icchanti, etampi paṭisaṃviditasesakameva, sabbesampi vaṭṭati. Atha adhikameva hoti, sannidhiṃ mocetvā ṭhapitaṃ dutiyadivasepi vaṭṭati. Gilānassa āhaṭāvasesepi eseva nayo. Yaṃ pana appaṭisaṃviditameva katvā ābhataṃ, taṃ bahiārāmaṃ pesetvā paṭisaṃviditaṃ kāretvā āharāpetabbaṃ, bhikkhūhi vā gantvā antarāmagge gahetabbaṃ. Yampi vihāramajjhena gacchantā vā vanacarakādayo vā vanato āharitvā denti, purimanayeneva paṭisaṃviditaṃ kāretabbaṃ. Tatthajātakanti ārāme jātakameva; mūlakhādanīyādiṃ aññena kappiyaṃ katvā dinnaṃ paribhuñjato anāpatti. Sace pana taṃ gāmaṃ haritvā pacitvā āharanti, na vaṭṭati. Paṭisaṃviditaṃ kāretabbaṃ. Sesamettha uttānameva.
கதி²னஸமுட்டா²னங் – கிரியாகிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங், வசீகம்மங், திசித்தங், திவேத³னந்தி.
Kathinasamuṭṭhānaṃ – kiriyākiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
சதுத்த²பாடிதே³ஸனீயங் .
Catutthapāṭidesanīyaṃ .
ஸமந்தபாஸாதி³காய வினயஸங்வண்ணனாய
Samantapāsādikāya vinayasaṃvaṇṇanāya
பாடிதே³ஸனீயவண்ணனா நிட்டி²தா.
Pāṭidesanīyavaṇṇanā niṭṭhitā.
பாடிதே³ஸனீயகண்ட³ங் நிட்டி²தங்.
Pāṭidesanīyakaṇḍaṃ niṭṭhitaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. சதுத்த²பாடிதே³ஸனீயஸிக்கா²பத³ங் • 4. Catutthapāṭidesanīyasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. து³தியபாடிதே³ஸனீயஸிக்கா²பத³வண்ணனா • 2. Dutiyapāṭidesanīyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மபாடிதே³ஸனீயஸிக்கா²பத³வண்ணனா • 1. Paṭhamapāṭidesanīyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. சதுத்த²பாடிதே³ஸனீயஸிக்கா²பத³ங் • 4. Catutthapāṭidesanīyasikkhāpadaṃ
