| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
4. சதுத்த²பாடிதே³ஸனீயஸிக்கா²பத³வண்ணனா
4. Catutthapāṭidesanīyasikkhāpadavaṇṇanā
தஸ்ஸ பரிவாரங் கத்வா, அஞ்ஞங் வா தேன ஸத்³தி⁴ங் ப³ஹுகம்பீதி யாகு³யா படிஸங்விதி³தங் கத்வா ‘‘கிங் ஸுத்³தா⁴ய யாகு³யா தி³ன்னாய, பூவப⁴த்தாதீ³னிபி ஏதிஸ்ஸா யாகு³யா பரிவாரங் கத்வா, த³ஸ்ஸாமா’’திஆதி³னா தஸ்ஸ கா²த³னீயஸ்ஸ வா போ⁴ஜனீயஸ்ஸ வா பரிவாரங் கத்வா, அஞ்ஞங் வா யங் கிஞ்சி தேன ஸத்³தி⁴ங் ப³ஹுகம்பி ஆஹரீயது. கா²த³னீயந்தி நித³ஸ்ஸனமத்தங் ‘‘போ⁴ஜனீயங் வா’’திபி இச்சி²தப்³ப³த்தா. தேன ஸத்³தி⁴ங் ஆஹரந்தூதி தேன ஸத்³தி⁴ங் அத்தனோ தெ³ய்யத⁴ம்மங் ஆஹரந்து. ‘‘யாகு³யா படிஸங்விதி³தங் கத்வா பூவங் வா ப⁴த்தங் வா ஆஹரந்தி, ஏதம்பி வட்டதீ’’தி (பாசி॰ அட்ட²॰ 573) குருந்தி³யங் வுத்தங்.
Tassa parivāraṃ katvā, aññaṃ vā tena saddhiṃ bahukampīti yāguyā paṭisaṃviditaṃ katvā ‘‘kiṃ suddhāya yāguyā dinnāya, pūvabhattādīnipi etissā yāguyā parivāraṃ katvā, dassāmā’’tiādinā tassa khādanīyassa vā bhojanīyassa vā parivāraṃ katvā, aññaṃ vā yaṃ kiñci tena saddhiṃ bahukampi āharīyatu. Khādanīyanti nidassanamattaṃ ‘‘bhojanīyaṃ vā’’tipi icchitabbattā. Tena saddhiṃ āharantūti tena saddhiṃ attano deyyadhammaṃ āharantu. ‘‘Yāguyā paṭisaṃviditaṃ katvā pūvaṃ vā bhattaṃ vā āharanti, etampi vaṭṭatī’’ti (pāci. aṭṭha. 573) kurundiyaṃ vuttaṃ.
படிஸங்விதி³தகி³லானாவஸேஸகங் வாதி படிஸங்விதி³தஞ்ச கி³லானோ ச படிஸங்விதி³தகி³லானா, தேஸங் அவஸேஸகங், படிஸங்விதி³தஸ்ஸ ச கி³லானஸ்ஸ ச ஸேஸகந்தி அத்தோ². ஏகஸ்ஸத்தா²ய படிஸங்விதி³தங் கத்வா ஆஹடங், தஸ்ஸ ஸேஸகங் அஞ்ஞஸ்ஸாபி பரிபு⁴ஞ்ஜிதுங் வட்டதி. சதுன்னங் வா பஞ்சன்னங் வா படிஸங்விதி³தங் கத்வா ப³ஹூனங் ஆஹடங் ஹோதி, அஞ்ஞேஸம்பி தா³துங் இச்ச²ந்தி, ஏதம்பி படிஸங்விதி³தஸேஸகமேவ, ஸப்³பே³ஸம்பி வட்டதி. அத² அதி⁴கமேவ ஹோதி, ஸன்னிதி⁴ங் மோசெத்வா ட²பிதங் து³தியதி³வஸேபி வட்டதி. கி³லானஸ்ஸாஹடாவஸேஸேபி ஏஸேவ நயோ. யங் பன அப்படிஸங்விதி³தமேவ கத்வா ஆப⁴தங், தங் ப³ஹிஆராமங் பேஸெத்வா படிஸங்விதி³தங் காரெத்வா ஆஹராபேதப்³ப³ங், பி⁴க்கூ²ஹி வா க³ந்த்வா அந்தராமக்³கே³ க³ஹேதப்³ப³ங். யம்பி விஹாரமஜ்ஜே²ன க³ச்ச²ந்தோ வா வனசரகாத³யோ வா வனதோ ஆஹரித்வா தெ³ந்தி, புரிமனயேனேவ படிஸங்விதி³தங் காரேதப்³ப³ங். கத்த²சி பன பொத்த²கேஸு ‘‘படிஸங்விதி³தங் கத்வா ஆஹடங் வா கி³லானாவஸேஸகங் வா’’தி பாடோ² தி³ஸ்ஸதி, ஸோ ந க³ஹேதப்³போ³. தத்த²ஜாதகமேவ வாதி ஆராமே ஜாதகமேவ. மூலப²லாதி³ந்தி மூலப²லதசபத்தாதி³ங் அஞ்ஞேன கப்பியங் கத்வா தி³ன்னங் பரிபு⁴ஞ்ஜதோ அனாபத்தி. ஸசே பன தங் கா³மங் ஹரித்வா பசித்வா ஆஹரந்தி, ந வட்டதி. படிஸங்விதி³தங் காரேதப்³ப³ங்.
Paṭisaṃviditagilānāvasesakaṃ vāti paṭisaṃviditañca gilāno ca paṭisaṃviditagilānā, tesaṃ avasesakaṃ, paṭisaṃviditassa ca gilānassa ca sesakanti attho. Ekassatthāya paṭisaṃviditaṃ katvā āhaṭaṃ, tassa sesakaṃ aññassāpi paribhuñjituṃ vaṭṭati. Catunnaṃ vā pañcannaṃ vā paṭisaṃviditaṃ katvā bahūnaṃ āhaṭaṃ hoti, aññesampi dātuṃ icchanti, etampi paṭisaṃviditasesakameva, sabbesampi vaṭṭati. Atha adhikameva hoti, sannidhiṃ mocetvā ṭhapitaṃ dutiyadivasepi vaṭṭati. Gilānassāhaṭāvasesepi eseva nayo. Yaṃ pana appaṭisaṃviditameva katvā ābhataṃ, taṃ bahiārāmaṃ pesetvā paṭisaṃviditaṃ kāretvā āharāpetabbaṃ, bhikkhūhi vā gantvā antarāmagge gahetabbaṃ. Yampi vihāramajjhena gacchanto vā vanacarakādayo vā vanato āharitvā denti, purimanayeneva paṭisaṃviditaṃ kāretabbaṃ. Katthaci pana potthakesu ‘‘paṭisaṃviditaṃ katvā āhaṭaṃ vā gilānāvasesakaṃ vā’’ti pāṭho dissati, so na gahetabbo. Tatthajātakameva vāti ārāme jātakameva. Mūlaphalādinti mūlaphalatacapattādiṃ aññena kappiyaṃ katvā dinnaṃ paribhuñjato anāpatti. Sace pana taṃ gāmaṃ haritvā pacitvā āharanti, na vaṭṭati. Paṭisaṃviditaṃ kāretabbaṃ.
சதுத்த²பாடிதே³ஸனீயஸிக்கா²பத³வண்ணனா நிட்டி²தா.
Catutthapāṭidesanīyasikkhāpadavaṇṇanā niṭṭhitā.
இதி கங்கா²விதரணியா பாதிமொக்க²வண்ணனாய
Iti kaṅkhāvitaraṇiyā pātimokkhavaṇṇanāya
வினயத்த²மஞ்ஜூஸாயங் லீனத்த²ப்பகாஸனியங்
Vinayatthamañjūsāyaṃ līnatthappakāsaniyaṃ
பாடிதே³ஸனீயவண்ணனா நிட்டி²தா.
Pāṭidesanīyavaṇṇanā niṭṭhitā.
