| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৪. চতুত্থপাটিদেসনীযসিক্খাপদৰণ্ণনা
4. Catutthapāṭidesanīyasikkhāpadavaṇṇanā
৫৭০. চতুত্থে – অৰরুদ্ধা হোন্তীতি পটিৰিরুদ্ধা হোন্তি।
570. Catutthe – avaruddhā hontīti paṭiviruddhā honti.
৫৭৩. পঞ্চন্নং পটিসংৰিদিতন্তি পঞ্চসু সহধম্মিকেসু যংকিঞ্চি পেসেত্ৰা খাদনীযং ভোজনীযং আহরিস্সামাতি পটিসংৰিদিতং কতম্পি অপ্পটিসংৰিদিতমেৰাতি অত্থো। আরামং আরামূপচারং ঠপেত্ৰাতি আরঞ্ঞকসেনাসনারামঞ্চ তস্স উপচারঞ্চ ঠপেত্ৰা; উপচারতো নিক্খন্তং অন্তরামগ্গে ভিক্খুং দিস্ৰা ৰা গামং আগতস্স ৰা পটিসংৰিদিতং কতম্পি অপ্পটিসংৰিদিতমেৰ হোতীতি ৰেদিতব্বং। সচে সাসঙ্কং হোতি সাসঙ্কন্তি আচিক্খিতব্বন্তি কস্মা আচিক্খিতব্বং? আরামে চোরে ৰসন্তে অম্হাকং নারোচেন্তীতি ৰচনপটিমোচনত্থং। চোরা ৰত্তব্বা মনুস্সা ইধূপচরন্তীতি কস্মা ৰত্তব্বং? অত্তনো উপট্ঠাকেহি অম্হে গণ্হাপেন্তীতি ৰচনপটিমোচনত্থং।
573.Pañcannaṃ paṭisaṃviditanti pañcasu sahadhammikesu yaṃkiñci pesetvā khādanīyaṃ bhojanīyaṃ āharissāmāti paṭisaṃviditaṃ katampi appaṭisaṃviditamevāti attho. Ārāmaṃ ārāmūpacāraṃ ṭhapetvāti āraññakasenāsanārāmañca tassa upacārañca ṭhapetvā; upacārato nikkhantaṃ antarāmagge bhikkhuṃ disvā vā gāmaṃ āgatassa vā paṭisaṃviditaṃ katampi appaṭisaṃviditameva hotīti veditabbaṃ. Sace sāsaṅkaṃ hoti sāsaṅkanti ācikkhitabbanti kasmā ācikkhitabbaṃ? Ārāme core vasante amhākaṃ nārocentīti vacanapaṭimocanatthaṃ. Corā vattabbā manussā idhūpacarantīti kasmā vattabbaṃ? Attano upaṭṭhākehi amhe gaṇhāpentīti vacanapaṭimocanatthaṃ.
যাগুযা পটিসংৰিদিতে তস্সা পরিৰারো আহরিয্যতীতি যাগুযা পটিসংৰিদিতং কত্ৰা ‘‘কিং সুদ্ধযাগুযা দিন্নায পূৰভত্তাদীনিপি এতিস্সা যাগুযা পরিৰারং কত্ৰা দস্সামা’’তি এৰং যং কিঞ্চি আহরন্তি, সব্বং পটিসংৰিদিতমেৰ হোতি। ভত্তেন পটিসংৰিদিতেতিআদীসুপি এসেৰ নযো। অসুকং নাম কুলং পটিসংৰিদিতং কত্ৰা খাদনীযাদীনি গহেত্ৰা গচ্ছতীতি সুত্ৰা অঞ্ঞানিপি তেন সদ্ধিং অত্তনো দেয্যধম্মং আহরন্তি, ৰট্টতি। যাগুযা পটিসংৰিদিতং কত্ৰা পূৰং ৰা ভত্তং ৰা আহরন্তি, এতম্পি ৰট্টতীতি কুরুন্দিযং ৰুত্তং।
Yāguyā paṭisaṃvidite tassā parivāro āhariyyatīti yāguyā paṭisaṃviditaṃ katvā ‘‘kiṃ suddhayāguyā dinnāya pūvabhattādīnipi etissā yāguyā parivāraṃ katvā dassāmā’’ti evaṃ yaṃ kiñci āharanti, sabbaṃ paṭisaṃviditameva hoti. Bhattena paṭisaṃviditetiādīsupi eseva nayo. Asukaṃ nāma kulaṃ paṭisaṃviditaṃ katvā khādanīyādīni gahetvā gacchatīti sutvā aññānipi tena saddhiṃ attano deyyadhammaṃ āharanti, vaṭṭati. Yāguyā paṭisaṃviditaṃ katvā pūvaṃ vā bhattaṃ vā āharanti, etampi vaṭṭatīti kurundiyaṃ vuttaṃ.
৫৭৫. গিলানস্সাতি অপ্পটিসংৰিদিতেপি গিলানস্স অনাপত্তি। পটিসংৰিদিতে ৰা গিলানস্স ৰা সেসকন্তি একস্সত্থায পটিসংৰিদিতং কত্ৰা আহটং, তস্স সেসকং অঞ্ঞস্সাপি ভুঞ্জিতুং ৰট্টতি। চতুন্নং পঞ্চন্নং ৰা পটিসংৰিদিতং কত্ৰা বহুং আহটং হোতি, অঞ্ঞেসম্পি দাতুং ইচ্ছন্তি, এতম্পি পটিসংৰিদিতসেসকমেৰ, সব্বেসম্পি ৰট্টতি। অথ অধিকমেৰ হোতি, সন্নিধিং মোচেত্ৰা ঠপিতং দুতিযদিৰসেপি ৰট্টতি। গিলানস্স আহটাৰসেসেপি এসেৰ নযো। যং পন অপ্পটিসংৰিদিতমেৰ কত্ৰা আভতং, তং বহিআরামং পেসেত্ৰা পটিসংৰিদিতং কারেত্ৰা আহরাপেতব্বং, ভিক্খূহি ৰা গন্ত্ৰা অন্তরামগ্গে গহেতব্বং। যম্পি ৰিহারমজ্ঝেন গচ্ছন্তা ৰা ৰনচরকাদযো ৰা ৰনতো আহরিত্ৰা দেন্তি, পুরিমনযেনেৰ পটিসংৰিদিতং কারেতব্বং। তত্থজাতকন্তি আরামে জাতকমেৰ; মূলখাদনীযাদিং অঞ্ঞেন কপ্পিযং কত্ৰা দিন্নং পরিভুঞ্জতো অনাপত্তি। সচে পন তং গামং হরিত্ৰা পচিত্ৰা আহরন্তি, ন ৰট্টতি। পটিসংৰিদিতং কারেতব্বং। সেসমেত্থ উত্তানমেৰ।
575.Gilānassāti appaṭisaṃviditepi gilānassa anāpatti. Paṭisaṃvidite vā gilānassa vā sesakanti ekassatthāya paṭisaṃviditaṃ katvā āhaṭaṃ, tassa sesakaṃ aññassāpi bhuñjituṃ vaṭṭati. Catunnaṃ pañcannaṃ vā paṭisaṃviditaṃ katvā bahuṃ āhaṭaṃ hoti, aññesampi dātuṃ icchanti, etampi paṭisaṃviditasesakameva, sabbesampi vaṭṭati. Atha adhikameva hoti, sannidhiṃ mocetvā ṭhapitaṃ dutiyadivasepi vaṭṭati. Gilānassa āhaṭāvasesepi eseva nayo. Yaṃ pana appaṭisaṃviditameva katvā ābhataṃ, taṃ bahiārāmaṃ pesetvā paṭisaṃviditaṃ kāretvā āharāpetabbaṃ, bhikkhūhi vā gantvā antarāmagge gahetabbaṃ. Yampi vihāramajjhena gacchantā vā vanacarakādayo vā vanato āharitvā denti, purimanayeneva paṭisaṃviditaṃ kāretabbaṃ. Tatthajātakanti ārāme jātakameva; mūlakhādanīyādiṃ aññena kappiyaṃ katvā dinnaṃ paribhuñjato anāpatti. Sace pana taṃ gāmaṃ haritvā pacitvā āharanti, na vaṭṭati. Paṭisaṃviditaṃ kāretabbaṃ. Sesamettha uttānameva.
কথিনসমুট্ঠানং – কিরিযাকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি।
Kathinasamuṭṭhānaṃ – kiriyākiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
চতুত্থপাটিদেসনীযং ।
Catutthapāṭidesanīyaṃ .
সমন্তপাসাদিকায ৰিনযসংৰণ্ণনায
Samantapāsādikāya vinayasaṃvaṇṇanāya
পাটিদেসনীযৰণ্ণনা নিট্ঠিতা।
Pāṭidesanīyavaṇṇanā niṭṭhitā.
পাটিদেসনীযকণ্ডং নিট্ঠিতং।
Pāṭidesanīyakaṇḍaṃ niṭṭhitaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৪. চতুত্থপাটিদেসনীযসিক্খাপদং • 4. Catutthapāṭidesanīyasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ২. দুতিযপাটিদেসনীযসিক্খাপদৰণ্ণনা • 2. Dutiyapāṭidesanīyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পঠমপাটিদেসনীযসিক্খাপদৰণ্ণনা • 1. Paṭhamapāṭidesanīyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৪. চতুত্থপাটিদেসনীযসিক্খাপদং • 4. Catutthapāṭidesanīyasikkhāpadaṃ
