| Library / Tipiṭaka / တိပိဋက • Tipiṭaka / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā |
၄. စတုတ္ထပာဋိဒေသနီယသိက္ခာပဒဝဏ္ဏနာ
4. Catutthapāṭidesanīyasikkhāpadavaṇṇanā
၅၇၀. စတုတ္ထေ – အဝရုဒ္ဓာ ဟောန္တီတိ ပဋိဝိရုဒ္ဓာ ဟောန္တိ။
570. Catutthe – avaruddhā hontīti paṭiviruddhā honti.
၅၇၃. ပဉ္စန္နံ ပဋိသံဝိဒိတန္တိ ပဉ္စသု သဟဓမ္မိကေသု ယံကိဉ္စိ ပေသေတ္ဝာ ခာဒနီယံ ဘောဇနီယံ အာဟရိသ္သာမာတိ ပဋိသံဝိဒိတံ ကတမ္ပိ အပ္ပဋိသံဝိဒိတမေဝာတိ အတ္ထော။ အာရာမံ အာရာမူပစာရံ ဌပေတ္ဝာတိ အာရညကသေနာသနာရာမဉ္စ တသ္သ ဥပစာရဉ္စ ဌပေတ္ဝာ; ဥပစာရတော နိက္ခန္တံ အန္တရာမဂ္ဂေ ဘိက္ခုံ ဒိသ္ဝာ ဝာ ဂာမံ အာဂတသ္သ ဝာ ပဋိသံဝိဒိတံ ကတမ္ပိ အပ္ပဋိသံဝိဒိတမေဝ ဟောတီတိ ဝေဒိတဗ္ဗံ။ သစေ သာသင္ကံ ဟောတိ သာသင္ကန္တိ အာစိက္ခိတဗ္ဗန္တိ ကသ္မာ အာစိက္ခိတဗ္ဗံ? အာရာမေ စောရေ ဝသန္တေ အမ္ဟာကံ နာရောစေန္တီတိ ဝစနပဋိမောစနတ္ထံ။ စောရာ ဝတ္တဗ္ဗာ မနုသ္သာ ဣဓူပစရန္တီတိ ကသ္မာ ဝတ္တဗ္ဗံ? အတ္တနော ဥပဋ္ဌာကေဟိ အမ္ဟေ ဂဏ္ဟာပေန္တီတိ ဝစနပဋိမောစနတ္ထံ။
573.Pañcannaṃ paṭisaṃviditanti pañcasu sahadhammikesu yaṃkiñci pesetvā khādanīyaṃ bhojanīyaṃ āharissāmāti paṭisaṃviditaṃ katampi appaṭisaṃviditamevāti attho. Ārāmaṃ ārāmūpacāraṃ ṭhapetvāti āraññakasenāsanārāmañca tassa upacārañca ṭhapetvā; upacārato nikkhantaṃ antarāmagge bhikkhuṃ disvā vā gāmaṃ āgatassa vā paṭisaṃviditaṃ katampi appaṭisaṃviditameva hotīti veditabbaṃ. Sace sāsaṅkaṃ hoti sāsaṅkanti ācikkhitabbanti kasmā ācikkhitabbaṃ? Ārāme core vasante amhākaṃ nārocentīti vacanapaṭimocanatthaṃ. Corā vattabbā manussā idhūpacarantīti kasmā vattabbaṃ? Attano upaṭṭhākehi amhe gaṇhāpentīti vacanapaṭimocanatthaṃ.
ယာဂုယာ ပဋိသံဝိဒိတေ တသ္သာ ပရိဝာရော အာဟရိယ္ယတီတိ ယာဂုယာ ပဋိသံဝိဒိတံ ကတ္ဝာ ‘‘ကိံ သုဒ္ဓယာဂုယာ ဒိန္နာယ ပူဝဘတ္တာဒီနိပိ ဧတိသ္သာ ယာဂုယာ ပရိဝာရံ ကတ္ဝာ ဒသ္သာမာ’’တိ ဧဝံ ယံ ကိဉ္စိ အာဟရန္တိ, သဗ္ဗံ ပဋိသံဝိဒိတမေဝ ဟောတိ။ ဘတ္တေန ပဋိသံဝိဒိတေတိအာဒီသုပိ ဧသေဝ နယော။ အသုကံ နာမ ကုလံ ပဋိသံဝိဒိတံ ကတ္ဝာ ခာဒနီယာဒီနိ ဂဟေတ္ဝာ ဂစ္ဆတီတိ သုတ္ဝာ အညာနိပိ တေန သဒ္ဓိံ အတ္တနော ဒေယ္ယဓမ္မံ အာဟရန္တိ, ဝဋ္ဋတိ။ ယာဂုယာ ပဋိသံဝိဒိတံ ကတ္ဝာ ပူဝံ ဝာ ဘတ္တံ ဝာ အာဟရန္တိ, ဧတမ္ပိ ဝဋ္ဋတီတိ ကုရုန္ဒိယံ ဝုတ္တံ။
Yāguyā paṭisaṃvidite tassā parivāro āhariyyatīti yāguyā paṭisaṃviditaṃ katvā ‘‘kiṃ suddhayāguyā dinnāya pūvabhattādīnipi etissā yāguyā parivāraṃ katvā dassāmā’’ti evaṃ yaṃ kiñci āharanti, sabbaṃ paṭisaṃviditameva hoti. Bhattena paṭisaṃviditetiādīsupi eseva nayo. Asukaṃ nāma kulaṃ paṭisaṃviditaṃ katvā khādanīyādīni gahetvā gacchatīti sutvā aññānipi tena saddhiṃ attano deyyadhammaṃ āharanti, vaṭṭati. Yāguyā paṭisaṃviditaṃ katvā pūvaṃ vā bhattaṃ vā āharanti, etampi vaṭṭatīti kurundiyaṃ vuttaṃ.
၅၇၅. ဂိလာနသ္သာတိ အပ္ပဋိသံဝိဒိတေပိ ဂိလာနသ္သ အနာပတ္တိ။ ပဋိသံဝိဒိတေ ဝာ ဂိလာနသ္သ ဝာ သေသကန္တိ ဧကသ္သတ္ထာယ ပဋိသံဝိဒိတံ ကတ္ဝာ အာဟဋံ, တသ္သ သေသကံ အညသ္သာပိ ဘုဉ္ဇိတုံ ဝဋ္ဋတိ။ စတုန္နံ ပဉ္စန္နံ ဝာ ပဋိသံဝိဒိတံ ကတ္ဝာ ဗဟုံ အာဟဋံ ဟောတိ, အညေသမ္ပိ ဒာတုံ ဣစ္ဆန္တိ, ဧတမ္ပိ ပဋိသံဝိဒိတသေသကမေဝ, သဗ္ဗေသမ္ပိ ဝဋ္ဋတိ။ အထ အဓိကမေဝ ဟောတိ, သန္နိဓိံ မောစေတ္ဝာ ဌပိတံ ဒုတိယဒိဝသေပိ ဝဋ္ဋတိ။ ဂိလာနသ္သ အာဟဋာဝသေသေပိ ဧသေဝ နယော။ ယံ ပန အပ္ပဋိသံဝိဒိတမေဝ ကတ္ဝာ အာဘတံ, တံ ဗဟိအာရာမံ ပေသေတ္ဝာ ပဋိသံဝိဒိတံ ကာရေတ္ဝာ အာဟရာပေတဗ္ဗံ, ဘိက္ခူဟိ ဝာ ဂန္တ္ဝာ အန္တရာမဂ္ဂေ ဂဟေတဗ္ဗံ။ ယမ္ပိ ဝိဟာရမဇ္ဈေန ဂစ္ဆန္တာ ဝာ ဝနစရကာဒယော ဝာ ဝနတော အာဟရိတ္ဝာ ဒေန္တိ, ပုရိမနယေနေဝ ပဋိသံဝိဒိတံ ကာရေတဗ္ဗံ။ တတ္ထဇာတကန္တိ အာရာမေ ဇာတကမေဝ; မူလခာဒနီယာဒိံ အညေန ကပ္ပိယံ ကတ္ဝာ ဒိန္နံ ပရိဘုဉ္ဇတော အနာပတ္တိ။ သစေ ပန တံ ဂာမံ ဟရိတ္ဝာ ပစိတ္ဝာ အာဟရန္တိ, န ဝဋ္ဋတိ။ ပဋိသံဝိဒိတံ ကာရေတဗ္ဗံ။ သေသမေတ္ထ ဥတ္တာနမေဝ။
575.Gilānassāti appaṭisaṃviditepi gilānassa anāpatti. Paṭisaṃvidite vā gilānassa vā sesakanti ekassatthāya paṭisaṃviditaṃ katvā āhaṭaṃ, tassa sesakaṃ aññassāpi bhuñjituṃ vaṭṭati. Catunnaṃ pañcannaṃ vā paṭisaṃviditaṃ katvā bahuṃ āhaṭaṃ hoti, aññesampi dātuṃ icchanti, etampi paṭisaṃviditasesakameva, sabbesampi vaṭṭati. Atha adhikameva hoti, sannidhiṃ mocetvā ṭhapitaṃ dutiyadivasepi vaṭṭati. Gilānassa āhaṭāvasesepi eseva nayo. Yaṃ pana appaṭisaṃviditameva katvā ābhataṃ, taṃ bahiārāmaṃ pesetvā paṭisaṃviditaṃ kāretvā āharāpetabbaṃ, bhikkhūhi vā gantvā antarāmagge gahetabbaṃ. Yampi vihāramajjhena gacchantā vā vanacarakādayo vā vanato āharitvā denti, purimanayeneva paṭisaṃviditaṃ kāretabbaṃ. Tatthajātakanti ārāme jātakameva; mūlakhādanīyādiṃ aññena kappiyaṃ katvā dinnaṃ paribhuñjato anāpatti. Sace pana taṃ gāmaṃ haritvā pacitvā āharanti, na vaṭṭati. Paṭisaṃviditaṃ kāretabbaṃ. Sesamettha uttānameva.
ကထိနသမုဋ္ဌာနံ – ကိရိယာကိရိယံ, နောသညာဝိမောက္ခံ, အစိတ္တကံ, ပဏ္ဏတ္တိဝဇ္ဇံ, ကာယကမ္မံ, ဝစီကမ္မံ, တိစိတ္တံ, တိဝေဒနန္တိ။
Kathinasamuṭṭhānaṃ – kiriyākiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
စတုတ္ထပာဋိဒေသနီယံ ။
Catutthapāṭidesanīyaṃ .
သမန္တပာသာဒိကာယ ဝိနယသံဝဏ္ဏနာယ
Samantapāsādikāya vinayasaṃvaṇṇanāya
ပာဋိဒေသနီယဝဏ္ဏနာ နိဋ္ဌိတာ။
Pāṭidesanīyavaṇṇanā niṭṭhitā.
ပာဋိဒေသနီယကဏ္ဍံ နိဋ္ဌိတံ။
Pāṭidesanīyakaṇḍaṃ niṭṭhitaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၄. စတုတ္ထပာဋိဒေသနီယသိက္ခာပဒံ • 4. Catutthapāṭidesanīyasikkhāpadaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၂. ဒုတိယပာဋိဒေသနီယသိက္ခာပဒဝဏ္ဏနာ • 2. Dutiyapāṭidesanīyasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၁. ပဌမပာဋိဒေသနီယသိက္ခာပဒဝဏ္ဏနာ • 1. Paṭhamapāṭidesanīyasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၄. စတုတ္ထပာဋိဒေသနီယသိက္ခာပဒံ • 4. Catutthapāṭidesanīyasikkhāpadaṃ
