| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
4. චතුත්‌ථපාටිදෙසනීයසික්‌ඛාපදවණ්‌ණනා
4. Catutthapāṭidesanīyasikkhāpadavaṇṇanā
570. චතුත්‌ථෙ – අවරුද්‌ධා හොන්‌තීති පටිවිරුද්‌ධා හොන්‌ති.
570. Catutthe – avaruddhā hontīti paṭiviruddhā honti.
573. පඤ්‌චන්‌නං පටිසංවිදිතන්‌ති පඤ්‌චසු සහධම්‌මිකෙසු යංකිඤ්‌චි පෙසෙත්‌වා ඛාදනීයං භොජනීයං ආහරිස්‌සාමාති පටිසංවිදිතං කතම්‌පි අප්‌පටිසංවිදිතමෙවාති අත්‌ථො. ආරාමං ආරාමූපචාරං ඨපෙත්‌වාති ආරඤ්‌ඤකසෙනාසනාරාමඤ්‌ච තස්‌ස උපචාරඤ්‌ච ඨපෙත්‌වා; උපචාරතො නික්‌ඛන්‌තං අන්‌තරාමග්‌ගෙ භික්‌ඛුං දිස්‌වා වා ගාමං ආගතස්‌ස වා පටිසංවිදිතං කතම්‌පි අප්‌පටිසංවිදිතමෙව හොතීති වෙදිතබ්‌බං. සචෙ සාසඞ්‌කං හොති සාසඞ්‌කන්‌ති ආචික්‌ඛිතබ්‌බන්‌ති කස්‌මා ආචික්‌ඛිතබ්‌බං? ආරාමෙ චොරෙ වසන්‌තෙ අම්‌හාකං නාරොචෙන්‌තීති වචනපටිමොචනත්‌ථං. චොරා වත්‌තබ්‌බා මනුස්‌සා ඉධූපචරන්‌තීති කස්‌මා වත්‌තබ්‌බං? අත්‌තනො උපට්‌ඨාකෙහි අම්‌හෙ ගණ්‌හාපෙන්‌තීති වචනපටිමොචනත්‌ථං.
573.Pañcannaṃ paṭisaṃviditanti pañcasu sahadhammikesu yaṃkiñci pesetvā khādanīyaṃ bhojanīyaṃ āharissāmāti paṭisaṃviditaṃ katampi appaṭisaṃviditamevāti attho. Ārāmaṃ ārāmūpacāraṃ ṭhapetvāti āraññakasenāsanārāmañca tassa upacārañca ṭhapetvā; upacārato nikkhantaṃ antarāmagge bhikkhuṃ disvā vā gāmaṃ āgatassa vā paṭisaṃviditaṃ katampi appaṭisaṃviditameva hotīti veditabbaṃ. Sace sāsaṅkaṃ hoti sāsaṅkanti ācikkhitabbanti kasmā ācikkhitabbaṃ? Ārāme core vasante amhākaṃ nārocentīti vacanapaṭimocanatthaṃ. Corā vattabbā manussā idhūpacarantīti kasmā vattabbaṃ? Attano upaṭṭhākehi amhe gaṇhāpentīti vacanapaṭimocanatthaṃ.
යාගුයා පටිසංවිදිතෙ තස්‌සා පරිවාරො ආහරිය්‍යතීති යාගුයා පටිසංවිදිතං කත්‌වා ‘‘කිං සුද්‌ධයාගුයා දින්‌නාය පූවභත්‌තාදීනිපි එතිස්‌සා යාගුයා පරිවාරං කත්‌වා දස්‌සාමා’’ති එවං යං කිඤ්‌චි ආහරන්‌ති, සබ්‌බං පටිසංවිදිතමෙව හොති. භත්‌තෙන පටිසංවිදිතෙතිආදීසුපි එසෙව නයො. අසුකං නාම කුලං පටිසංවිදිතං කත්‌වා ඛාදනීයාදීනි ගහෙත්‌වා ගච්‌ඡතීති සුත්‌වා අඤ්‌ඤානිපි තෙන සද්‌ධිං අත්‌තනො දෙය්‍යධම්‌මං ආහරන්‌ති, වට්‌ටති. යාගුයා පටිසංවිදිතං කත්‌වා පූවං වා භත්‌තං වා ආහරන්‌ති, එතම්‌පි වට්‌ටතීති කුරුන්‌දියං වුත්‌තං.
Yāguyā paṭisaṃvidite tassā parivāro āhariyyatīti yāguyā paṭisaṃviditaṃ katvā ‘‘kiṃ suddhayāguyā dinnāya pūvabhattādīnipi etissā yāguyā parivāraṃ katvā dassāmā’’ti evaṃ yaṃ kiñci āharanti, sabbaṃ paṭisaṃviditameva hoti. Bhattena paṭisaṃviditetiādīsupi eseva nayo. Asukaṃ nāma kulaṃ paṭisaṃviditaṃ katvā khādanīyādīni gahetvā gacchatīti sutvā aññānipi tena saddhiṃ attano deyyadhammaṃ āharanti, vaṭṭati. Yāguyā paṭisaṃviditaṃ katvā pūvaṃ vā bhattaṃ vā āharanti, etampi vaṭṭatīti kurundiyaṃ vuttaṃ.
575. ගිලානස්‌සාති අප්‌පටිසංවිදිතෙපි ගිලානස්‌ස අනාපත්‌ති. පටිසංවිදිතෙ වා ගිලානස්‌ස වා සෙසකන්‌ති එකස්‌සත්‌ථාය පටිසංවිදිතං කත්‌වා ආහටං, තස්‌ස සෙසකං අඤ්‌ඤස්‌සාපි භුඤ්‌ජිතුං වට්‌ටති. චතුන්‌නං පඤ්‌චන්‌නං වා පටිසංවිදිතං කත්‌වා බහුං ආහටං හොති, අඤ්‌ඤෙසම්‌පි දාතුං ඉච්‌ඡන්‌ති, එතම්‌පි පටිසංවිදිතසෙසකමෙව, සබ්‌බෙසම්‌පි වට්‌ටති. අථ අධිකමෙව හොති, සන්‌නිධිං මොචෙත්‌වා ඨපිතං දුතියදිවසෙපි වට්‌ටති. ගිලානස්‌ස ආහටාවසෙසෙපි එසෙව නයො. යං පන අප්‌පටිසංවිදිතමෙව කත්‌වා ආභතං, තං බහිආරාමං පෙසෙත්‌වා පටිසංවිදිතං කාරෙත්‌වා ආහරාපෙතබ්‌බං, භික්‌ඛූහි වා ගන්‌ත්‌වා අන්‌තරාමග්‌ගෙ ගහෙතබ්‌බං. යම්‌පි විහාරමජ්‌ඣෙන ගච්‌ඡන්‌තා වා වනචරකාදයො වා වනතො ආහරිත්‌වා දෙන්‌ති, පුරිමනයෙනෙව පටිසංවිදිතං කාරෙතබ්‌බං. තත්‌ථජාතකන්‌ති ආරාමෙ ජාතකමෙව; මූලඛාදනීයාදිං අඤ්‌ඤෙන කප්‌පියං කත්‌වා දින්‌නං පරිභුඤ්‌ජතො අනාපත්‌ති. සචෙ පන තං ගාමං හරිත්‌වා පචිත්‌වා ආහරන්‌ති, න වට්‌ටති. පටිසංවිදිතං කාරෙතබ්‌බං. සෙසමෙත්‌ථ උත්‌තානමෙව.
575.Gilānassāti appaṭisaṃviditepi gilānassa anāpatti. Paṭisaṃvidite vā gilānassa vā sesakanti ekassatthāya paṭisaṃviditaṃ katvā āhaṭaṃ, tassa sesakaṃ aññassāpi bhuñjituṃ vaṭṭati. Catunnaṃ pañcannaṃ vā paṭisaṃviditaṃ katvā bahuṃ āhaṭaṃ hoti, aññesampi dātuṃ icchanti, etampi paṭisaṃviditasesakameva, sabbesampi vaṭṭati. Atha adhikameva hoti, sannidhiṃ mocetvā ṭhapitaṃ dutiyadivasepi vaṭṭati. Gilānassa āhaṭāvasesepi eseva nayo. Yaṃ pana appaṭisaṃviditameva katvā ābhataṃ, taṃ bahiārāmaṃ pesetvā paṭisaṃviditaṃ kāretvā āharāpetabbaṃ, bhikkhūhi vā gantvā antarāmagge gahetabbaṃ. Yampi vihāramajjhena gacchantā vā vanacarakādayo vā vanato āharitvā denti, purimanayeneva paṭisaṃviditaṃ kāretabbaṃ. Tatthajātakanti ārāme jātakameva; mūlakhādanīyādiṃ aññena kappiyaṃ katvā dinnaṃ paribhuñjato anāpatti. Sace pana taṃ gāmaṃ haritvā pacitvā āharanti, na vaṭṭati. Paṭisaṃviditaṃ kāretabbaṃ. Sesamettha uttānameva.
කථිනසමුට්‌ඨානං – කිරියාකිරියං, නොසඤ්‌ඤාවිමොක්‌ඛං, අචිත්‌තකං, පණ්‌ණත්‌තිවජ්‌ජං, කායකම්‌මං, වචීකම්‌මං, තිචිත්‌තං, තිවෙදනන්‌ති.
Kathinasamuṭṭhānaṃ – kiriyākiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
චතුත්‌ථපාටිදෙසනීයං .
Catutthapāṭidesanīyaṃ .
සමන්‌තපාසාදිකාය විනයසංවණ්‌ණනාය
Samantapāsādikāya vinayasaṃvaṇṇanāya
පාටිදෙසනීයවණ්‌ණනා නිට්‌ඨිතා.
Pāṭidesanīyavaṇṇanā niṭṭhitā.
පාටිදෙසනීයකණ්‌ඩං නිට්‌ඨිතං.
Pāṭidesanīyakaṇḍaṃ niṭṭhitaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 4. චතුත්‌ථපාටිදෙසනීයසික්‌ඛාපදං • 4. Catutthapāṭidesanīyasikkhāpadaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 2. දුතියපාටිදෙසනීයසික්‌ඛාපදවණ්‌ණනා • 2. Dutiyapāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමපාටිදෙසනීයසික්‌ඛාපදවණ්‌ණනා • 1. Paṭhamapāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 4. චතුත්‌ථපාටිදෙසනීයසික්‌ඛාපදං • 4. Catutthapāṭidesanīyasikkhāpadaṃ
