| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8. චතුත්‌ථපුබ්‌බාරාමසුත්‌තං
8. Catutthapubbārāmasuttaṃ
518. තංයෙව නිදානං. ‘‘කතිනං නු ඛො, භික්‌ඛවෙ, ඉන්‌ද්‍රියානං භාවිතත්‌තා බහුලීකතත්‌තා ඛීණාසවො භික්‌ඛු අඤ්‌ඤං බ්‍යාකරොති – ‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’ති පජානාමී’’ති? භගවංමූලකා නො, භන්‌තෙ, ධම්‌මා…පෙ.… ‘‘පඤ්‌චන්‌නං ඛො, භික්‌ඛවෙ, ඉන්‌ද්‍රියානං භාවිතත්‌තා බහුලීකතත්‌තා ඛීණාසවො භික්‌ඛු අඤ්‌ඤං බ්‍යාකරොති – ‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’ති පජානාමීති. කතමෙසං පඤ්‌චන්‌නං? සද්‌ධින්‌ද්‍රියස්‌ස , වීරියින්‌ද්‍රියස්‌ස, සතින්‌ද්‍රියස්‌ස, සමාධින්‌ද්‍රියස්‌ස, පඤ්‌ඤින්‌ද්‍රියස්‌ස – ඉමෙසං ඛො, භික්‌ඛවෙ, පඤ්‌චන්‌නං ඉන්‌ද්‍රියානං භාවිතත්‌තා බහුලීකතත්‌තා ඛීණාසවො භික්‌ඛු අඤ්‌ඤං බ්‍යාකරොති – ‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’ති පජානාමී’’ති. අට්‌ඨමං.
518. Taṃyeva nidānaṃ. ‘‘Katinaṃ nu kho, bhikkhave, indriyānaṃ bhāvitattā bahulīkatattā khīṇāsavo bhikkhu aññaṃ byākaroti – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāmī’’ti? Bhagavaṃmūlakā no, bhante, dhammā…pe… ‘‘pañcannaṃ kho, bhikkhave, indriyānaṃ bhāvitattā bahulīkatattā khīṇāsavo bhikkhu aññaṃ byākaroti – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāmīti. Katamesaṃ pañcannaṃ? Saddhindriyassa , vīriyindriyassa, satindriyassa, samādhindriyassa, paññindriyassa – imesaṃ kho, bhikkhave, pañcannaṃ indriyānaṃ bhāvitattā bahulīkatattā khīṇāsavo bhikkhu aññaṃ byākaroti – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāmī’’ti. Aṭṭhamaṃ.
