| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
4. சதுத்த²ஸங்கா⁴தி³ஸேஸஸிக்கா²பத³ங்
4. Catutthasaṅghādisesasikkhāpadaṃ
694. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன சண்ட³காளீ பி⁴க்கு²னீ ப⁴ண்ட³னகாரிகா ஹோதி கலஹகாரிகா விவாத³காரிகா ப⁴ஸ்ஸகாரிகா ஸங்கே⁴ அதி⁴கரணகாரிகா. து²ல்லனந்தா³ பி⁴க்கு²னீ தஸ்ஸா கம்மே கரீயமானே படிக்கோஸதி. தேன கோ² பன ஸமயேன து²ல்லனந்தா³ பி⁴க்கு²னீ கா³மகங் அக³மாஸி கேனசிதே³வ கரணீயேன. அத² கோ² பி⁴க்கு²னிஸங்கோ⁴ – ‘‘து²ல்லனந்தா³ பி⁴க்கு²னீ பக்கந்தா’’தி , சண்ட³காளிங் பி⁴க்கு²னிங் ஆபத்தியா அத³ஸ்ஸனே 1 உக்கி²பி. து²ல்லனந்தா³ பி⁴க்கு²னீ கா³மகே தங் கரணீயங் தீரெத்வா புனதே³வ ஸாவத்தி²ங் பச்சாக³ச்சி². சண்ட³காளீ பி⁴க்கு²னீ து²ல்லனந்தா³ய பி⁴க்கு²னியா ஆக³ச்ச²ந்தியா நேவ ஆஸனங் பஞ்ஞபேஸி ந பாதோ³த³கங் பாத³பீட²ங் பாத³கட²லிகங் உபனிக்கி²பி ந பச்சுக்³க³ந்த்வா பத்தசீவரங் படிக்³க³ஹேஸி ந பானீயேன ஆபுச்சி². து²ல்லனந்தா³ பி⁴க்கு²னீ சண்ட³காளிங் பி⁴க்கு²னிங் ஏதத³வோச – ‘‘கிஸ்ஸ த்வங், அய்யே, மயி ஆக³ச்ச²ந்தியா நேவ ஆஸனங் பஞ்ஞபேஸி ந பாதோ³த³கங் பாத³பீட²ங் பாத³கட²லிகங் உபனிக்கி²பி ந பச்சுக்³க³ந்த்வா பத்தசீவரங் படிக்³க³ஹேஸி ந பானீயேன ஆபுச்சீ²’’தி? ‘‘ஏவஞ்ஹேதங், அய்யே, ஹோதி யதா² தங் அனாதா²யா’’தி. ‘‘கிஸ்ஸ பன த்வங், அய்யே, அனாதா²’’தி? ‘‘இமா மங், அய்யே, பி⁴க்கு²னியோ – ‘‘அயங் அனாதா² அப்பஞ்ஞாதா, நத்தி² இமிஸ்ஸா காசி படிவத்தா’’தி, ஆபத்தியா அத³ஸ்ஸனே 2 உக்கி²பிங்ஸூ’’தி.
694. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena caṇḍakāḷī bhikkhunī bhaṇḍanakārikā hoti kalahakārikā vivādakārikā bhassakārikā saṅghe adhikaraṇakārikā. Thullanandā bhikkhunī tassā kamme karīyamāne paṭikkosati. Tena kho pana samayena thullanandā bhikkhunī gāmakaṃ agamāsi kenacideva karaṇīyena. Atha kho bhikkhunisaṅgho – ‘‘thullanandā bhikkhunī pakkantā’’ti , caṇḍakāḷiṃ bhikkhuniṃ āpattiyā adassane 3 ukkhipi. Thullanandā bhikkhunī gāmake taṃ karaṇīyaṃ tīretvā punadeva sāvatthiṃ paccāgacchi. Caṇḍakāḷī bhikkhunī thullanandāya bhikkhuniyā āgacchantiyā neva āsanaṃ paññapesi na pādodakaṃ pādapīṭhaṃ pādakaṭhalikaṃ upanikkhipi na paccuggantvā pattacīvaraṃ paṭiggahesi na pānīyena āpucchi. Thullanandā bhikkhunī caṇḍakāḷiṃ bhikkhuniṃ etadavoca – ‘‘kissa tvaṃ, ayye, mayi āgacchantiyā neva āsanaṃ paññapesi na pādodakaṃ pādapīṭhaṃ pādakaṭhalikaṃ upanikkhipi na paccuggantvā pattacīvaraṃ paṭiggahesi na pānīyena āpucchī’’ti? ‘‘Evañhetaṃ, ayye, hoti yathā taṃ anāthāyā’’ti. ‘‘Kissa pana tvaṃ, ayye, anāthā’’ti? ‘‘Imā maṃ, ayye, bhikkhuniyo – ‘‘ayaṃ anāthā appaññātā, natthi imissā kāci paṭivattā’’ti, āpattiyā adassane 4 ukkhipiṃsū’’ti.
து²ல்லனந்தா³ பி⁴க்கு²னீ – ‘‘பா³லா ஏதா அப்³யத்தா ஏதா, நேவ ஜானந்தி கம்மங் வா கம்மதோ³ஸங் வா கம்மவிபத்திங் வா கம்மஸம்பத்திங் வா. மயங் கோ² ஜானாம கம்மம்பி கம்மதோ³ஸம்பி கம்மவிபத்திம்பி கம்மஸம்பத்திம்பி. மயங் கோ² அகதங் வா கம்மங் காரெய்யாம கதங் வா கம்மங் கோபெய்யாமா’’தி, லஹுங் லஹுங் பி⁴க்கு²னிஸங்க⁴ங் ஸன்னிபாதெத்வா சண்ட³காளிங் பி⁴க்கு²னிங் ஓஸாரேஸி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா து²ல்லனந்தா³ ஸமக்³கே³ன ஸங்கே⁴ன உக்கி²த்தங் பி⁴க்கு²னிங் த⁴ம்மேன வினயேன ஸத்து²ஸாஸனேன அனபலோகெத்வா காரகஸங்க⁴ங் அனஞ்ஞாய க³ணஸ்ஸ ச²ந்த³ங் ஓஸாரெஸ்ஸதீ’’தி…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ ஸமக்³கே³ன ஸங்கே⁴ன உக்கி²த்தங் பி⁴க்கு²னிங் த⁴ம்மேன வினயேன ஸத்து²ஸாஸனேன அனபலோகெத்வா காரகஸங்க⁴ங் அனஞ்ஞாய க³ணஸ்ஸ ச²ந்த³ங் ஓஸாரேதீதி 5? ‘‘ஸச்சங் , ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ஸமக்³கே³ன ஸங்கே⁴ன உக்கி²த்தங் பி⁴க்கு²னிங் த⁴ம்மேன வினயேன ஸத்து²ஸாஸனேன அனபலோகெத்வா காரகஸங்க⁴ங் அனஞ்ஞாய க³ணஸ்ஸ ச²ந்த³ங் ஓஸாரெஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
Thullanandā bhikkhunī – ‘‘bālā etā abyattā etā, neva jānanti kammaṃ vā kammadosaṃ vā kammavipattiṃ vā kammasampattiṃ vā. Mayaṃ kho jānāma kammampi kammadosampi kammavipattimpi kammasampattimpi. Mayaṃ kho akataṃ vā kammaṃ kāreyyāma kataṃ vā kammaṃ kopeyyāmā’’ti, lahuṃ lahuṃ bhikkhunisaṅghaṃ sannipātetvā caṇḍakāḷiṃ bhikkhuniṃ osāresi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā samaggena saṅghena ukkhittaṃ bhikkhuniṃ dhammena vinayena satthusāsanena anapaloketvā kārakasaṅghaṃ anaññāya gaṇassa chandaṃ osāressatī’’ti…pe… saccaṃ kira, bhikkhave, thullanandā bhikkhunī samaggena saṅghena ukkhittaṃ bhikkhuniṃ dhammena vinayena satthusāsanena anapaloketvā kārakasaṅghaṃ anaññāya gaṇassa chandaṃ osāretīti 6? ‘‘Saccaṃ , bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī samaggena saṅghena ukkhittaṃ bhikkhuniṃ dhammena vinayena satthusāsanena anapaloketvā kārakasaṅghaṃ anaññāya gaṇassa chandaṃ osāressati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
695. ‘‘யா பன பி⁴க்கு²னீ ஸமக்³கே³ன ஸங்கே⁴ன உக்கி²த்தங் பி⁴க்கு²னிங் த⁴ம்மேன வினயேன ஸத்து²ஸாஸனேன அனபலோகெத்வா காரகஸங்க⁴ங் அனஞ்ஞாய க³ணஸ்ஸ ச²ந்த³ங் ஓஸாரெய்ய, அயம்பி பி⁴க்கு²னீ பட²மாபத்திகங் த⁴ம்மங் ஆபன்னா நிஸ்ஸாரணீயங் ஸங்கா⁴தி³ஸேஸ’’ந்தி.
695.‘‘Yā pana bhikkhunī samaggena saṅghena ukkhittaṃ bhikkhuniṃ dhammena vinayena satthusāsanena anapaloketvā kārakasaṅghaṃ anaññāya gaṇassa chandaṃ osāreyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
696. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
696.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ஸமக்³கோ³ நாம ஸங்கோ⁴ ஸமானஸங்வாஸகோ ஸமானஸீமாயங் டி²தோ.
Samaggo nāma saṅgho samānasaṃvāsako samānasīmāyaṃ ṭhito.
உக்கி²த்தா நாம ஆபத்தியா அத³ஸ்ஸனே வா அப்படிகம்மே வா அப்படினிஸ்ஸக்³கே³ வா 7 உக்கி²த்தா.
Ukkhittā nāma āpattiyā adassane vā appaṭikamme vā appaṭinissagge vā 8 ukkhittā.
த⁴ம்மேன வினயேனாதி யேன த⁴ம்மேன யேன வினயேன.
Dhammena vinayenāti yena dhammena yena vinayena.
ஸத்து²ஸாஸனேனாதி ஜினஸாஸனேன பு³த்³த⁴ஸாஸனேன.
Satthusāsanenāti jinasāsanena buddhasāsanena.
அனபலோகெத்வா காரகஸங்க⁴ந்தி கம்மகாரகஸங்க⁴ங் அனாபுச்சா².
Anapaloketvākārakasaṅghanti kammakārakasaṅghaṃ anāpucchā.
அனஞ்ஞாய க³ணஸ்ஸ ச²ந்த³ந்தி க³ணஸ்ஸ ச²ந்த³ங் அஜானித்வா.
Anaññāya gaṇassa chandanti gaṇassa chandaṃ ajānitvā.
‘‘ஓஸாரெஸ்ஸாமீ’’தி க³ணங் வா பரியேஸதி, ஸீமங் வா ஸம்மன்னதி , ஆபத்தி து³க்கடஸ்ஸ. ஞத்தியா து³க்கடங், த்³வீஹி கம்மவாசாஹி து²ல்லச்சயா, கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.
‘‘Osāressāmī’’ti gaṇaṃ vā pariyesati, sīmaṃ vā sammannati , āpatti dukkaṭassa. Ñattiyā dukkaṭaṃ, dvīhi kammavācāhi thullaccayā, kammavācāpariyosāne āpatti saṅghādisesassa.
அயம்பீதி புரிமாயோ உபாதா³ய வுச்சதி.
Ayampīti purimāyo upādāya vuccati.
பட²மாபத்திகந்தி ஸஹ வத்து²ஜ்ஜா²சாரா ஆபஜ்ஜதி அஸமனுபா⁴ஸனாய.
Paṭhamāpattikanti saha vatthujjhācārā āpajjati asamanubhāsanāya.
நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.
Nissāraṇīyanti saṅghamhā nissārīyati.
ஸங்கா⁴தி³ஸேஸோதி…பே॰… தேனபி வுச்சதி ஸங்கா⁴தி³ஸேஸோதி.
Saṅghādisesoti…pe… tenapi vuccati saṅghādisesoti.
697. த⁴ம்மகம்மே த⁴ம்மகம்மஸஞ்ஞா ஓஸாரேதி, ஆபத்தி ஸங்கா⁴தி³ஸேஸஸ்ஸ. த⁴ம்மகம்மே வேமதிகா ஓஸாரேதி ஆபத்தி ஸங்கா⁴தி³ஸேஸஸ்ஸ. த⁴ம்மகம்மே அத⁴ம்மகம்மஸஞ்ஞா ஓஸாரேதி, ஆபத்தி ஸங்கா⁴தி³ஸேஸஸ்ஸ.
697. Dhammakamme dhammakammasaññā osāreti, āpatti saṅghādisesassa. Dhammakamme vematikā osāreti āpatti saṅghādisesassa. Dhammakamme adhammakammasaññā osāreti, āpatti saṅghādisesassa.
அத⁴ம்மகம்மே த⁴ம்மகம்மஸஞ்ஞா, ஆபத்தி து³க்கடஸ்ஸ. அத⁴ம்மகம்மே வேமதிகா, ஆபத்தி து³க்கடஸ்ஸ. அத⁴ம்மகம்மே அத⁴ம்மகம்மஸஞ்ஞா, ஆபத்தி து³க்கடஸ்ஸ.
Adhammakamme dhammakammasaññā, āpatti dukkaṭassa. Adhammakamme vematikā, āpatti dukkaṭassa. Adhammakamme adhammakammasaññā, āpatti dukkaṭassa.
698. அனாபத்தி கம்மகாரகஸங்க⁴ங் அபலோகெத்வா ஓஸாரேதி, க³ணஸ்ஸ ச²ந்த³ங் ஜானித்வா ஓஸாரேதி, வத்தே வத்தந்திங் ஓஸாரேதி, அஸந்தே கம்மகாரகஸங்கே⁴ ஓஸாரேதி, உம்மத்திகாய, ஆதி³கம்மிகாயாதி.
698. Anāpatti kammakārakasaṅghaṃ apaloketvā osāreti, gaṇassa chandaṃ jānitvā osāreti, vatte vattantiṃ osāreti, asante kammakārakasaṅghe osāreti, ummattikāya, ādikammikāyāti.
சதுத்த²ஸங்கா⁴தி³ஸேஸஸிக்கா²பத³ங் நிட்டி²தங்.
Catutthasaṅghādisesasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 4. சதுத்த²ஸங்கா⁴தி³ஸேஸஸிக்கா²பத³வண்ணனா • 4. Catutthasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. சதுத்த²ஸங்கா⁴தி³ஸேஸஸிக்கா²பத³வண்ணனா • 4. Catutthasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. சதுத்த²ஸங்கா⁴தி³ஸேஸஸிக்கா²பத³வண்ணனா • 4. Catutthasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. சதுத்த²ஸங்கா⁴தி³ஸேஸஸிக்கா²பத³வண்ணனா • 4. Catutthasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. சதுத்த²ஸங்கா⁴தி³ஸேஸஸிக்கா²பத³ங் • 4. Catutthasaṅghādisesasikkhāpadaṃ
