| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
4. சதுத்த²ஸிக்கா²பத³ங்
4. Catutthasikkhāpadaṃ
748. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ கி³லானா ஹோதி. அத² கோ² அஞ்ஞதரோ உபாஸகோ யேன து²ல்லனந்தா³ பி⁴க்கு²னீ தேனுபஸங்கமி; உபஸங்கமித்வா து²ல்லனந்த³ங் பி⁴க்கு²னிங் ஏதத³வோச – ‘‘கிங் தே, அய்யே, அபா²ஸு, கிங் ஆஹரீயதூ’’தி? ‘‘ஸப்பினா மே, ஆவுஸோ, அத்தோ²’’தி. அத² கோ² ஸோ உபாஸகோ அஞ்ஞதரஸ்ஸ ஆபணிகஸ்ஸ க⁴ரா கஹாபணஸ்ஸ ஸப்பிங் ஆஹரித்வா து²ல்லனந்தா³ய பி⁴க்கு²னியா அதா³ஸி. து²ல்லனந்தா³ பி⁴க்கு²னீ ஏவமாஹ – ‘‘ந மே, ஆவுஸோ, ஸப்பினா அத்தோ²; தேலேன மே அத்தோ²’’தி. அத² கோ² ஸோ உபாஸகோ யேன ஸோ ஆபணிகோ தேனுபஸங்கமி; உபஸங்கமித்வா தங் ஆபணிகங் ஏதத³வோச – ‘‘ந கிராய்யோ அய்யாய ஸப்பினா அத்தோ², தேலேன அத்தோ². ஹந்த³ தே ஸப்பிங், தேலங் மே தே³ஹீ’’தி. ‘‘ஸசே மயங் அய்யோ விக்கீதங் ப⁴ண்ட³ங் புன ஆதி³யிஸ்ஸாம 1, கதா³ அம்ஹாகங் ப⁴ண்ட³ங் விக்காயிஸ்ஸதி 2; ஸப்பிஸ்ஸ கயேன ஸப்பி ஹடங், தேலஸ்ஸ கயங் ஆஹர, தேலங் ஹரிஸ்ஸஸீ’’தி. அத² கோ² ஸோ உபாஸகோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம அய்யா து²ல்லனந்தா³ அஞ்ஞங் விஞ்ஞாபெத்வா அஞ்ஞங் விஞ்ஞாபெஸ்ஸதீ’’தி! அஸ்ஸோஸுங் கோ² பி⁴க்கு²னியோ தஸ்ஸ உபாஸகஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசெந்தஸ்ஸ. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி…பே॰… அத² கோ² தா பி⁴க்கு²னியோ பி⁴க்கூ²னங் ஏதமத்த²ங் ஆரோசேஸுங். பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ அஞ்ஞங் விஞ்ஞாபெத்வா அஞ்ஞங் விஞ்ஞாபேதீதி 3? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா …பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ அஞ்ஞங் விஞ்ஞாபெத்வா அஞ்ஞங் விஞ்ஞாபெஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
748. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī gilānā hoti. Atha kho aññataro upāsako yena thullanandā bhikkhunī tenupasaṅkami; upasaṅkamitvā thullanandaṃ bhikkhuniṃ etadavoca – ‘‘kiṃ te, ayye, aphāsu, kiṃ āharīyatū’’ti? ‘‘Sappinā me, āvuso, attho’’ti. Atha kho so upāsako aññatarassa āpaṇikassa gharā kahāpaṇassa sappiṃ āharitvā thullanandāya bhikkhuniyā adāsi. Thullanandā bhikkhunī evamāha – ‘‘na me, āvuso, sappinā attho; telena me attho’’ti. Atha kho so upāsako yena so āpaṇiko tenupasaṅkami; upasaṅkamitvā taṃ āpaṇikaṃ etadavoca – ‘‘na kirāyyo ayyāya sappinā attho, telena attho. Handa te sappiṃ, telaṃ me dehī’’ti. ‘‘Sace mayaṃ ayyo vikkītaṃ bhaṇḍaṃ puna ādiyissāma 4, kadā amhākaṃ bhaṇḍaṃ vikkāyissati 5; sappissa kayena sappi haṭaṃ, telassa kayaṃ āhara, telaṃ harissasī’’ti. Atha kho so upāsako ujjhāyati khiyyati vipāceti – ‘‘kathañhi nāma ayyā thullanandā aññaṃ viññāpetvā aññaṃ viññāpessatī’’ti! Assosuṃ kho bhikkhuniyo tassa upāsakassa ujjhāyantassa khiyyantassa vipācentassa. Yā tā bhikkhuniyo appicchā…pe… tā ujjhāyanti khiyyanti vipācenti…pe… atha kho tā bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ…pe… saccaṃ kira, bhikkhave, thullanandā bhikkhunī aññaṃ viññāpetvā aññaṃ viññāpetīti 6? ‘‘Saccaṃ, bhagavā’’ti. Vigarahi buddho bhagavā …pe… kathañhi nāma, bhikkhave, thullanandā bhikkhunī aññaṃ viññāpetvā aññaṃ viññāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
749. ‘‘யா பன பி⁴க்கு²னீ அஞ்ஞங் விஞ்ஞாபெத்வா அஞ்ஞங் விஞ்ஞாபெய்ய, நிஸ்ஸக்³கி³யங் பாசித்திய’’ந்தி.
749.‘‘Yā pana bhikkhunī aññaṃ viññāpetvā aññaṃ viññāpeyya, nissaggiyaṃ pācittiya’’nti.
750. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
750.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
அஞ்ஞங் விஞ்ஞாபெத்வாதி யங் கிஞ்சி விஞ்ஞாபெத்வா.
Aññaṃviññāpetvāti yaṃ kiñci viññāpetvā.
அஞ்ஞங் விஞ்ஞாபெய்யாதி தங் ட²பெத்வா அஞ்ஞங் விஞ்ஞாபேதி, பயோகே³ து³க்கடங். படிலாபே⁴ன நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங்…பே॰… ‘‘இத³ங் மே அய்யே அஞ்ஞங் விஞ்ஞாபெத்வா அஞ்ஞங் விஞ்ஞாபிதங் நிஸ்ஸக்³கி³யங், இமாஹங் ஸங்க⁴ஸ்ஸ நிஸ்ஸஜ்ஜாமீதி…பே॰… த³தெ³ய்யாதி…பே॰… த³தெ³ய்யுந்தி…பே॰… அய்யாய த³ம்மீ’’தி.
Aññaṃ viññāpeyyāti taṃ ṭhapetvā aññaṃ viññāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbaṃ…pe… ‘‘idaṃ me ayye aññaṃ viññāpetvā aññaṃ viññāpitaṃ nissaggiyaṃ, imāhaṃ saṅghassa nissajjāmīti…pe… dadeyyāti…pe… dadeyyunti…pe… ayyāya dammī’’ti.
751. அஞ்ஞே அஞ்ஞஸஞ்ஞா அஞ்ஞங் விஞ்ஞாபேதி, நிஸ்ஸக்³கி³யங் பாசித்தியங். அஞ்ஞே வேமதிகா அஞ்ஞங் விஞ்ஞாபேதி, நிஸ்ஸக்³கி³யங் பாசித்தியங். அஞ்ஞே அனஞ்ஞஸஞ்ஞா அஞ்ஞங் விஞ்ஞாபேதி, நிஸ்ஸக்³கி³யங் பாசித்தியங்.
751. Aññe aññasaññā aññaṃ viññāpeti, nissaggiyaṃ pācittiyaṃ. Aññe vematikā aññaṃ viññāpeti, nissaggiyaṃ pācittiyaṃ. Aññe anaññasaññā aññaṃ viññāpeti, nissaggiyaṃ pācittiyaṃ.
அனஞ்ஞே அஞ்ஞஸஞ்ஞா அனஞ்ஞங் விஞ்ஞாபேதி, ஆபத்தி து³க்கடஸ்ஸ. அனஞ்ஞே வேமதிகா அனஞ்ஞங் விஞ்ஞாபேதி, ஆபத்தி து³க்கடஸ்ஸ. அனஞ்ஞே அனஞ்ஞஸஞ்ஞா, அனாபத்தி.
Anaññe aññasaññā anaññaṃ viññāpeti, āpatti dukkaṭassa. Anaññe vematikā anaññaṃ viññāpeti, āpatti dukkaṭassa. Anaññe anaññasaññā, anāpatti.
752. அனாபத்தி தஞ்ஞேவ 7 விஞ்ஞாபேதி, அஞ்ஞஞ்ச விஞ்ஞாபேதி, ஆனிஸங்ஸங் த³ஸ்ஸெத்வா விஞ்ஞாபேதி, உம்மத்திகாய, ஆதி³கம்மிகாயாதி.
752. Anāpatti taññeva 8 viññāpeti, aññañca viññāpeti, ānisaṃsaṃ dassetvā viññāpeti, ummattikāya, ādikammikāyāti.
சதுத்த²ஸிக்கா²பத³ங் நிட்டி²தங்.
Catutthasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / சதுத்த²னிஸ்ஸக்³கி³யபாசித்தியஸிக்கா²பத³வண்ணனா • Catutthanissaggiyapācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. நிஸ்ஸக்³கி³யகண்ட³ங் (பி⁴க்கு²னீவிப⁴ங்க³வண்ணனா) • 3. Nissaggiyakaṇḍaṃ (bhikkhunīvibhaṅgavaṇṇanā)
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. சதுத்த²னிஸ்ஸக்³கி³யபாசித்தியஸிக்கா²பத³வண்ணனா • 4. Catutthanissaggiyapācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. து³தியனிஸ்ஸக்³கி³யாதி³பாசித்தியஸிக்கா²பத³வண்ணனா • 2. Dutiyanissaggiyādipācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. சதுத்த²னிஸ்ஸக்³கி³யபாசித்தியஸிக்கா²பத³ங் • 4. Catutthanissaggiyapācittiyasikkhāpadaṃ
