| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
4. சதுத்த²ஸிக்கா²பத³ங்
4. Catutthasikkhāpadaṃ
850. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ரதி²காயபி ப்³யூஹேபி ஸிங்கா⁴டகேபி புரிஸேன ஸத்³தி⁴ங் ஏகேனேகா ஸந்திட்ட²திபி ஸல்லபதிபி நிகண்ணிகம்பி ஜப்பேதி து³தியிகம்பி பி⁴க்கு²னிங் உய்யோஜேதி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா து²ல்லனந்தா³ ரதி²காயபி ப்³யூஹேபி ஸிங்கா⁴டகேபி புரிஸேன ஸத்³தி⁴ங் ஏகேனேகா ஸந்திட்டி²ஸ்ஸதிபி ஸல்லபிஸ்ஸதிபி நிகண்ணிகம்பி ஜப்பிஸ்ஸதி து³தியிகம்பி பி⁴க்கு²னிங் உய்யோஜெஸ்ஸதீ’’தி…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ ரதி²காயபி ப்³யூஹேபி ஸிங்கா⁴டகேபி புரிஸேன ஸத்³தி⁴ங் ஏகேனேகா ஸந்திட்ட²திபி ஸல்லபதிபி நிகண்ணிகம்பி ஜப்பேதி து³தியிகம்பி பி⁴க்கு²னிங் உய்யோஜேதீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ரதி²காயபி ப்³யூஹேபி ஸிங்கா⁴டகேபி புரிஸேன ஸத்³தி⁴ங் ஏகேனேகா ஸந்திட்டி²ஸ்ஸதிபி ஸல்லபிஸ்ஸதிபி நிகண்ணிகம்பி ஜப்பிஸ்ஸதி து³தியிகம்பி பி⁴க்கு²னிங் உய்யோஜெஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
850. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī rathikāyapi byūhepi siṅghāṭakepi purisena saddhiṃ ekenekā santiṭṭhatipi sallapatipi nikaṇṇikampi jappeti dutiyikampi bhikkhuniṃ uyyojeti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā rathikāyapi byūhepi siṅghāṭakepi purisena saddhiṃ ekenekā santiṭṭhissatipi sallapissatipi nikaṇṇikampi jappissati dutiyikampi bhikkhuniṃ uyyojessatī’’ti…pe… saccaṃ kira, bhikkhave, thullanandā bhikkhunī rathikāyapi byūhepi siṅghāṭakepi purisena saddhiṃ ekenekā santiṭṭhatipi sallapatipi nikaṇṇikampi jappeti dutiyikampi bhikkhuniṃ uyyojetīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī rathikāyapi byūhepi siṅghāṭakepi purisena saddhiṃ ekenekā santiṭṭhissatipi sallapissatipi nikaṇṇikampi jappissati dutiyikampi bhikkhuniṃ uyyojessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
851. ‘‘யா பன பி⁴க்கு²னீ ரதி²காய வா ப்³யூஹே வா ஸிங்கா⁴டகே வா புரிஸேன ஸத்³தி⁴ங் ஏகேனேகா ஸந்திட்டெ²ய்ய வா ஸல்லபெய்ய வா நிகண்ணிகங் வா ஜப்பெய்ய து³தியிகங் வா பி⁴க்கு²னிங் உய்யோஜெய்ய, பாசித்திய’’ந்தி.
851.‘‘Yāpana bhikkhunī rathikāya vā byūhe vā siṅghāṭake vā purisena saddhiṃ ekenekā santiṭṭheyya vā sallapeyya vā nikaṇṇikaṃ vā jappeyya dutiyikaṃ vā bhikkhuniṃ uyyojeyya, pācittiya’’nti.
852. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
852.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ரதி²கா நாம ரச்சா² வுச்சதி. ப்³யூஹங் நாம யேனேவ பவிஸந்தி தேனேவ நிக்க²மந்தி. ஸிங்கா⁴டகோ நாம சச்சரங் வுச்சதி.
Rathikā nāma racchā vuccati. Byūhaṃ nāma yeneva pavisanti teneva nikkhamanti. Siṅghāṭako nāma caccaraṃ vuccati.
புரிஸோ நாம மனுஸ்ஸபுரிஸோ ந யக்கோ² ந பேதோ ந திரச்சா²னக³தோ விஞ்ஞூ படிப³லோ ஸந்திட்டி²துங் ஸல்லபிதுங்.
Puriso nāma manussapuriso na yakkho na peto na tiracchānagato viññū paṭibalo santiṭṭhituṃ sallapituṃ.
ஸத்³தி⁴ந்தி ஏகதோ. ஏகேனேகாதி புரிஸோ சேவ ஹோதி பி⁴க்கு²னீ ச.
Saddhinti ekato. Ekenekāti puriso ceva hoti bhikkhunī ca.
ஸந்திட்டெ²ய்ய வாதி புரிஸஸ்ஸ ஹத்த²பாஸே திட்ட²தி, ஆபத்தி பாசித்தியஸ்ஸ.
Santiṭṭheyya vāti purisassa hatthapāse tiṭṭhati, āpatti pācittiyassa.
ஸல்லபெய்ய வாதி புரிஸஸ்ஸ ஹத்த²பாஸே டி²தா ஸல்லபதி, ஆபத்தி பாசித்தியஸ்ஸ.
Sallapeyya vāti purisassa hatthapāse ṭhitā sallapati, āpatti pācittiyassa.
நிகண்ணிகங் வா ஜப்பெய்யாதி புரிஸஸ்ஸ உபகண்ணகே ஆரோசேதி , ஆபத்தி பாசித்தியஸ்ஸ.
Nikaṇṇikaṃ vā jappeyyāti purisassa upakaṇṇake āroceti , āpatti pācittiyassa.
து³தியிகங் வா பி⁴க்கு²னிங் உய்யோஜெய்யாதி அனாசாரங் ஆசரிதுகாமா து³தியிகம்பி பி⁴க்கு²னிங் உய்யோஜேதி, ஆபத்தி து³க்கடஸ்ஸ. த³ஸ்ஸனூபசாரங் வா ஸவனூபசாரங் வா விஜஹந்தியா ஆபத்தி து³க்கடஸ்ஸ. விஜஹிதே ஆபத்தி பாசித்தியஸ்ஸ.
Dutiyikaṃ vā bhikkhuniṃ uyyojeyyāti anācāraṃ ācaritukāmā dutiyikampi bhikkhuniṃ uyyojeti, āpatti dukkaṭassa. Dassanūpacāraṃ vā savanūpacāraṃ vā vijahantiyā āpatti dukkaṭassa. Vijahite āpatti pācittiyassa.
ஹத்த²பாஸங் விஜஹித்வா ஸந்திட்ட²தி வா ஸல்லபதி வா ஆபத்தி து³க்கடஸ்ஸ. யக்கே²ன வா பேதேன வா பண்ட³கேன வா திரச்சா²னக³தமனுஸ்ஸவிக்³க³ஹேன வா ஸத்³தி⁴ங் ஸந்திட்ட²தி வா ஸல்லபதி வா, ஆபத்தி து³க்கடஸ்ஸ.
Hatthapāsaṃ vijahitvā santiṭṭhati vā sallapati vā āpatti dukkaṭassa. Yakkhena vā petena vā paṇḍakena vā tiracchānagatamanussaviggahena vā saddhiṃ santiṭṭhati vā sallapati vā, āpatti dukkaṭassa.
853. அனாபத்தி யோ கோசி விஞ்ஞூ து³தியோ ஹோதி, அரஹோபெக்கா², அஞ்ஞவிஹிதா ஸந்திட்ட²தி வா ஸல்லபதி வா, ந அனாசாரங் ஆசரிதுகாமா, ஸதி கரணீயே து³தியிகங் பி⁴க்கு²னிங் உய்யோஜேதி, உம்மத்திகாய, ஆதி³கம்மிகாயாதி.
853. Anāpatti yo koci viññū dutiyo hoti, arahopekkhā, aññavihitā santiṭṭhati vā sallapati vā, na anācāraṃ ācaritukāmā, sati karaṇīye dutiyikaṃ bhikkhuniṃ uyyojeti, ummattikāya, ādikammikāyāti.
சதுத்த²ஸிக்கா²பத³ங் நிட்டி²தங்.
Catutthasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 4. சதுத்த²ஸிக்கா²பத³வண்ணனா • 4. Catutthasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2-3-4. து³தியததியசதுத்த²ஸிக்கா²பத³வண்ணனா • 2-3-4. Dutiyatatiyacatutthasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மாதி³ஸிக்கா²பத³வண்ணனா • 1. Paṭhamādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. சதுத்த²ஸிக்கா²பத³ங் • 4. Catutthasikkhāpadaṃ
