| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
4. சதுத்த²ஸிக்கா²பத³ங்
4. Catutthasikkhāpadaṃ
897. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ பி⁴க்கு²னீனங் ஹத்தே² சீவரங் நிக்கி²பித்வா ஸந்தருத்தரேன ஜனபத³சாரிகங் பக்கமந்தி. தானி சீவரானி சிரங் நிக்கி²த்தானி கண்ணகிதானி ஹொந்தி. தானி பி⁴க்கு²னியோ ஓதாபெந்தி. பி⁴க்கு²னியோ தா பி⁴க்கு²னியோ ஏதத³வோசுங் – ‘‘கஸ்ஸிமானி , அய்யே, சீவரானி கண்ணகிதானீ’’தி? அத² கோ² தா பி⁴க்கு²னியோ பி⁴க்கு²னீனங் ஏதமத்த²ங் ஆரோசேஸுங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ பி⁴க்கு²னீனங் ஹத்தே² சீவரங் நிக்கி²பித்வா ஸந்தருத்தரேன ஜனபத³சாரிகங் பக்கமிஸ்ஸந்தீ’’தி…பே॰… ஸச்சங் கிர, பி⁴க்க²வே, பி⁴க்கு²னியோ பி⁴க்கு²னீனங் ஹத்தே² சீவரங் நிக்கி²பித்வா ஸந்தருத்தரேன ஜனபத³சாரிகங் பக்கமந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னியோ பி⁴க்கு²னீனங் ஹத்தே² சீவரங் நிக்கி²பித்வா ஸந்தருத்தரேன ஜனபத³சாரிகங் பக்கமிஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
897. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo bhikkhunīnaṃ hatthe cīvaraṃ nikkhipitvā santaruttarena janapadacārikaṃ pakkamanti. Tāni cīvarāni ciraṃ nikkhittāni kaṇṇakitāni honti. Tāni bhikkhuniyo otāpenti. Bhikkhuniyo tā bhikkhuniyo etadavocuṃ – ‘‘kassimāni , ayye, cīvarāni kaṇṇakitānī’’ti? Atha kho tā bhikkhuniyo bhikkhunīnaṃ etamatthaṃ ārocesuṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo bhikkhunīnaṃ hatthe cīvaraṃ nikkhipitvā santaruttarena janapadacārikaṃ pakkamissantī’’ti…pe… saccaṃ kira, bhikkhave, bhikkhuniyo bhikkhunīnaṃ hatthe cīvaraṃ nikkhipitvā santaruttarena janapadacārikaṃ pakkamantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo bhikkhunīnaṃ hatthe cīvaraṃ nikkhipitvā santaruttarena janapadacārikaṃ pakkamissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
898. ‘‘யா பன பி⁴க்கு²னீ பஞ்சாஹிகங் ஸங்கா⁴டிசாரங் 1 அதிக்காமெய்ய, பாசித்திய’’ந்தி.
898.‘‘Yā panabhikkhunī pañcāhikaṃ saṅghāṭicāraṃ2atikkāmeyya, pācittiya’’nti.
899. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
899.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
பஞ்சாஹிகங் ஸங்கா⁴டிசாரங் அதிக்காமெய்யாதி பஞ்சமங் தி³வஸங் பஞ்ச சீவரானி நேவ நிவாஸேதி ந பாருபதி ந ஓதாபேதி, பஞ்சமங் தி³வஸங் அதிக்காமேதி, ஆபத்தி பாசித்தியஸ்ஸ.
Pañcāhikaṃ saṅghāṭicāraṃ atikkāmeyyāti pañcamaṃ divasaṃ pañca cīvarāni neva nivāseti na pārupati na otāpeti, pañcamaṃ divasaṃ atikkāmeti, āpatti pācittiyassa.
900. பஞ்சாஹாதிக்கந்தே அதிக்கந்தஸஞ்ஞா, ஆபத்தி பாசித்தியஸ்ஸ. பஞ்சாஹாதிக்கந்தே வேமதிகா, ஆபத்தி பாசித்தியஸ்ஸ. பஞ்சாஹாதிக்கந்தே அனதிக்கந்தஸஞ்ஞா , ஆபத்தி பாசித்தியஸ்ஸ.
900. Pañcāhātikkante atikkantasaññā, āpatti pācittiyassa. Pañcāhātikkante vematikā, āpatti pācittiyassa. Pañcāhātikkante anatikkantasaññā , āpatti pācittiyassa.
பஞ்சாஹானதிக்கந்தே அதிக்கந்தஸஞ்ஞா, ஆபத்தி து³க்கடஸ்ஸ. பஞ்சாஹானதிக்கந்தே வேமதிகா, ஆபத்தி து³க்கடஸ்ஸ. பஞ்சாஹானதிக்கந்தே அனதிக்கந்தஸஞ்ஞா, அனாபத்தி.
Pañcāhānatikkante atikkantasaññā, āpatti dukkaṭassa. Pañcāhānatikkante vematikā, āpatti dukkaṭassa. Pañcāhānatikkante anatikkantasaññā, anāpatti.
901. அனாபத்தி பஞ்சமங் தி³வஸங் பஞ்ச சீவரானி நிவாஸேதி வா பாருபதி வா ஓதாபேதி வா, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.
901. Anāpatti pañcamaṃ divasaṃ pañca cīvarāni nivāseti vā pārupati vā otāpeti vā, gilānāya, āpadāsu, ummattikāya, ādikammikāyāti.
சதுத்த²ஸிக்கா²பத³ங் நிட்டி²தங்.
Catutthasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 4. சதுத்த²ஸிக்கா²பத³வண்ணனா • 4. Catutthasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. நக்³க³வக்³க³வண்ணனா • 3. Naggavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. சதுத்த²ஸிக்கா²பத³வண்ணனா • 4. Catutthasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மாதி³ஸிக்கா²பத³வண்ணனா • 1. Paṭhamādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. சதுத்த²ஸிக்கா²பத³ங் • 4. Catutthasikkhāpadaṃ
