| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
৪. চতুত্থসিক্খাপদং
4. Catutthasikkhāpadaṃ
৭৪৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দা ভিক্খুনী গিলানা হোতি। অথ খো অঞ্ঞতরো উপাসকো যেন থুল্লনন্দা ভিক্খুনী তেনুপসঙ্কমি; উপসঙ্কমিত্ৰা থুল্লনন্দং ভিক্খুনিং এতদৰোচ – ‘‘কিং তে, অয্যে, অফাসু, কিং আহরীযতূ’’তি? ‘‘সপ্পিনা মে, আৰুসো, অত্থো’’তি। অথ খো সো উপাসকো অঞ্ঞতরস্স আপণিকস্স ঘরা কহাপণস্স সপ্পিং আহরিত্ৰা থুল্লনন্দায ভিক্খুনিযা অদাসি। থুল্লনন্দা ভিক্খুনী এৰমাহ – ‘‘ন মে, আৰুসো, সপ্পিনা অত্থো; তেলেন মে অত্থো’’তি। অথ খো সো উপাসকো যেন সো আপণিকো তেনুপসঙ্কমি; উপসঙ্কমিত্ৰা তং আপণিকং এতদৰোচ – ‘‘ন কিরায্যো অয্যায সপ্পিনা অত্থো, তেলেন অত্থো। হন্দ তে সপ্পিং, তেলং মে দেহী’’তি। ‘‘সচে মযং অয্যো ৰিক্কীতং ভণ্ডং পুন আদিযিস্সাম 1, কদা অম্হাকং ভণ্ডং ৰিক্কাযিস্সতি 2; সপ্পিস্স কযেন সপ্পি হটং, তেলস্স কযং আহর, তেলং হরিস্সসী’’তি। অথ খো সো উপাসকো উজ্ঝাযতি খিয্যতি ৰিপাচেতি – ‘‘কথঞ্হি নাম অয্যা থুল্লনন্দা অঞ্ঞং ৰিঞ্ঞাপেত্ৰা অঞ্ঞং ৰিঞ্ঞাপেস্সতী’’তি! অস্সোসুং খো ভিক্খুনিযো তস্স উপাসকস্স উজ্ঝাযন্তস্স খিয্যন্তস্স ৰিপাচেন্তস্স। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি…পে॰… অথ খো তা ভিক্খুনিযো ভিক্খূনং এতমত্থং আরোচেসুং। ভিক্খূ ভগৰতো এতমত্থং আরোচেসুং…পে॰… সচ্চং কির, ভিক্খৰে, থুল্লনন্দা ভিক্খুনী অঞ্ঞং ৰিঞ্ঞাপেত্ৰা অঞ্ঞং ৰিঞ্ঞাপেতীতি 3? ‘‘সচ্চং, ভগৰা’’তি। ৰিগরহি বুদ্ধো ভগৰা …পে॰… কথঞ্হি নাম, ভিক্খৰে, থুল্লনন্দা ভিক্খুনী অঞ্ঞং ৰিঞ্ঞাপেত্ৰা অঞ্ঞং ৰিঞ্ঞাপেস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
748. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī gilānā hoti. Atha kho aññataro upāsako yena thullanandā bhikkhunī tenupasaṅkami; upasaṅkamitvā thullanandaṃ bhikkhuniṃ etadavoca – ‘‘kiṃ te, ayye, aphāsu, kiṃ āharīyatū’’ti? ‘‘Sappinā me, āvuso, attho’’ti. Atha kho so upāsako aññatarassa āpaṇikassa gharā kahāpaṇassa sappiṃ āharitvā thullanandāya bhikkhuniyā adāsi. Thullanandā bhikkhunī evamāha – ‘‘na me, āvuso, sappinā attho; telena me attho’’ti. Atha kho so upāsako yena so āpaṇiko tenupasaṅkami; upasaṅkamitvā taṃ āpaṇikaṃ etadavoca – ‘‘na kirāyyo ayyāya sappinā attho, telena attho. Handa te sappiṃ, telaṃ me dehī’’ti. ‘‘Sace mayaṃ ayyo vikkītaṃ bhaṇḍaṃ puna ādiyissāma 4, kadā amhākaṃ bhaṇḍaṃ vikkāyissati 5; sappissa kayena sappi haṭaṃ, telassa kayaṃ āhara, telaṃ harissasī’’ti. Atha kho so upāsako ujjhāyati khiyyati vipāceti – ‘‘kathañhi nāma ayyā thullanandā aññaṃ viññāpetvā aññaṃ viññāpessatī’’ti! Assosuṃ kho bhikkhuniyo tassa upāsakassa ujjhāyantassa khiyyantassa vipācentassa. Yā tā bhikkhuniyo appicchā…pe… tā ujjhāyanti khiyyanti vipācenti…pe… atha kho tā bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ…pe… saccaṃ kira, bhikkhave, thullanandā bhikkhunī aññaṃ viññāpetvā aññaṃ viññāpetīti 6? ‘‘Saccaṃ, bhagavā’’ti. Vigarahi buddho bhagavā …pe… kathañhi nāma, bhikkhave, thullanandā bhikkhunī aññaṃ viññāpetvā aññaṃ viññāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
৭৪৯. ‘‘যা পন ভিক্খুনী অঞ্ঞং ৰিঞ্ঞাপেত্ৰা অঞ্ঞং ৰিঞ্ঞাপেয্য, নিস্সগ্গিযং পাচিত্তিয’’ন্তি।
749.‘‘Yā pana bhikkhunī aññaṃ viññāpetvā aññaṃ viññāpeyya, nissaggiyaṃ pācittiya’’nti.
৭৫০. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি।
750.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
অঞ্ঞং ৰিঞ্ঞাপেত্ৰাতি যং কিঞ্চি ৰিঞ্ঞাপেত্ৰা।
Aññaṃviññāpetvāti yaṃ kiñci viññāpetvā.
অঞ্ঞং ৰিঞ্ঞাপেয্যাতি তং ঠপেত্ৰা অঞ্ঞং ৰিঞ্ঞাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ‘‘ইদং মে অয্যে অঞ্ঞং ৰিঞ্ঞাপেত্ৰা অঞ্ঞং ৰিঞ্ঞাপিতং নিস্সগ্গিযং, ইমাহং সঙ্ঘস্স নিস্সজ্জামীতি…পে॰… দদেয্যাতি…পে॰… দদেয্যুন্তি…পে॰… অয্যায দম্মী’’তি।
Aññaṃ viññāpeyyāti taṃ ṭhapetvā aññaṃ viññāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbaṃ…pe… ‘‘idaṃ me ayye aññaṃ viññāpetvā aññaṃ viññāpitaṃ nissaggiyaṃ, imāhaṃ saṅghassa nissajjāmīti…pe… dadeyyāti…pe… dadeyyunti…pe… ayyāya dammī’’ti.
৭৫১. অঞ্ঞে অঞ্ঞসঞ্ঞা অঞ্ঞং ৰিঞ্ঞাপেতি, নিস্সগ্গিযং পাচিত্তিযং। অঞ্ঞে ৰেমতিকা অঞ্ঞং ৰিঞ্ঞাপেতি, নিস্সগ্গিযং পাচিত্তিযং। অঞ্ঞে অনঞ্ঞসঞ্ঞা অঞ্ঞং ৰিঞ্ঞাপেতি, নিস্সগ্গিযং পাচিত্তিযং।
751. Aññe aññasaññā aññaṃ viññāpeti, nissaggiyaṃ pācittiyaṃ. Aññe vematikā aññaṃ viññāpeti, nissaggiyaṃ pācittiyaṃ. Aññe anaññasaññā aññaṃ viññāpeti, nissaggiyaṃ pācittiyaṃ.
অনঞ্ঞে অঞ্ঞসঞ্ঞা অনঞ্ঞং ৰিঞ্ঞাপেতি, আপত্তি দুক্কটস্স। অনঞ্ঞে ৰেমতিকা অনঞ্ঞং ৰিঞ্ঞাপেতি, আপত্তি দুক্কটস্স। অনঞ্ঞে অনঞ্ঞসঞ্ঞা, অনাপত্তি।
Anaññe aññasaññā anaññaṃ viññāpeti, āpatti dukkaṭassa. Anaññe vematikā anaññaṃ viññāpeti, āpatti dukkaṭassa. Anaññe anaññasaññā, anāpatti.
৭৫২. অনাপত্তি তঞ্ঞেৰ 7 ৰিঞ্ঞাপেতি, অঞ্ঞঞ্চ ৰিঞ্ঞাপেতি, আনিসংসং দস্সেত্ৰা ৰিঞ্ঞাপেতি, উম্মত্তিকায, আদিকম্মিকাযাতি।
752. Anāpatti taññeva 8 viññāpeti, aññañca viññāpeti, ānisaṃsaṃ dassetvā viññāpeti, ummattikāya, ādikammikāyāti.
চতুত্থসিক্খাপদং নিট্ঠিতং।
Catutthasikkhāpadaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / চতুত্থনিস্সগ্গিযপাচিত্তিযসিক্খাপদৰণ্ণনা • Catutthanissaggiyapācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৩. নিস্সগ্গিযকণ্ডং (ভিক্খুনীৰিভঙ্গৰণ্ণনা) • 3. Nissaggiyakaṇḍaṃ (bhikkhunīvibhaṅgavaṇṇanā)
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৪. চতুত্থনিস্সগ্গিযপাচিত্তিযসিক্খাপদৰণ্ণনা • 4. Catutthanissaggiyapācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. দুতিযনিস্সগ্গিযাদিপাচিত্তিযসিক্খাপদৰণ্ণনা • 2. Dutiyanissaggiyādipācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৪. চতুত্থনিস্সগ্গিযপাচিত্তিযসিক্খাপদং • 4. Catutthanissaggiyapācittiyasikkhāpadaṃ
