| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
4. චතුත්‌ථසික්‌ඛාපදං
4. Catutthasikkhāpadaṃ
946. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ථුල්‌ලනන්‌දා භික්‌ඛුනී දුක්‌ඛිතං සහජීවිනිං නෙව උපට්‌ඨෙති න උපට්‌ඨාපනාය උස්‌සුක්‌කං කරොති. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා ථුල්‌ලනන්‌දා දුක්‌ඛිතං සහජීවිනිං නෙව උපට්‌ඨෙස්‌සති න උපට්‌ඨාපනාය උස්‌සුක්‌කං කරිස්‌සතී’’ති…පෙ.… සච්‌චං කිර, භික්‌ඛවෙ, ථුල්‌ලනන්‌දා භික්‌ඛුනී දුක්‌ඛිතං සහජීවිනිං නෙව උපට්‌ඨෙති න උපට්‌ඨාපනාය උස්‌සුක්‌කං කරොතීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ථුල්‌ලනන්‌දා භික්‌ඛුනී දුක්‌ඛිතං සහජීවිනිං නෙව උපට්‌ඨෙස්‌සති න උපට්‌ඨාපනාය උස්‌සුක්‌කං කරිස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
946. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī dukkhitaṃ sahajīviniṃ neva upaṭṭheti na upaṭṭhāpanāya ussukkaṃ karoti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā dukkhitaṃ sahajīviniṃ neva upaṭṭhessati na upaṭṭhāpanāya ussukkaṃ karissatī’’ti…pe… saccaṃ kira, bhikkhave, thullanandā bhikkhunī dukkhitaṃ sahajīviniṃ neva upaṭṭheti na upaṭṭhāpanāya ussukkaṃ karotīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī dukkhitaṃ sahajīviniṃ neva upaṭṭhessati na upaṭṭhāpanāya ussukkaṃ karissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
947. ‘‘යා පන භික්‌ඛුනී දුක්‌ඛිතං සහජීවිනිං නෙව උපට්‌ඨෙය්‍ය න උපට්‌ඨාපනාය උස්‌සුක්‌කං කරෙය්‍ය, පාචිත්‌තිය’’න්‌ති.
947.‘‘Yā pana bhikkhunī dukkhitaṃ sahajīviniṃ neva upaṭṭheyya na upaṭṭhāpanāya ussukkaṃ kareyya, pācittiya’’nti.
948. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
948.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
දුක්‌ඛිතා නාම ගිලානා වුච්‌චති.
Dukkhitā nāma gilānā vuccati.
සහජීවිනී නාම සද්‌ධිවිහාරිනී වුච්‌චති.
Sahajīvinī nāma saddhivihārinī vuccati.
නෙව උපට්‌ඨෙය්‍යාති න සයං උපට්‌ඨෙය්‍ය.
Neva upaṭṭheyyāti na sayaṃ upaṭṭheyya.
න උපට්‌ඨාපනාය උස්‌සුක්‌කං කරෙය්‍යාති න අඤ්‌ඤං ආණාපෙය්‍ය .
Na upaṭṭhāpanāya ussukkaṃ kareyyāti na aññaṃ āṇāpeyya .
‘‘නෙව උපට්‌ඨෙස්‌සාමි, න උපට්‌ඨාපනාය උස්‌සුක්‌කං කරිස්‌සාමී’’ති ධුරං නික්‌ඛිත්‌තමත්‌තෙ ආපත්‌ති පාචිත්‌තියස්‌ස. අන්‌තෙවාසිනිං වා අනුපසම්‌පන්‌නං වා නෙව උපට්‌ඨෙති, න උපට්‌ඨාපනාය උස්‌සුක්‌කං කරොති, ආපත්‌ති දුක්‌කටස්‌ස.
‘‘Neva upaṭṭhessāmi, na upaṭṭhāpanāya ussukkaṃ karissāmī’’ti dhuraṃ nikkhittamatte āpatti pācittiyassa. Antevāsiniṃ vā anupasampannaṃ vā neva upaṭṭheti, na upaṭṭhāpanāya ussukkaṃ karoti, āpatti dukkaṭassa.
949. අනාපත්‌ති සති අන්‌තරායෙ, පරියෙසිත්‌වා න ලභති, ගිලානාය, ආපදාසු, උම්‌මත්‌තිකාය, ආදිකම්‌මිකායාති.
949. Anāpatti sati antarāye, pariyesitvā na labhati, gilānāya, āpadāsu, ummattikāya, ādikammikāyāti.
චතුත්‌ථසික්‌ඛාපදං නිට්‌ඨිතං.
Catutthasikkhāpadaṃ niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 4. චතුත්‌ථසික්‌ඛාපදවණ්‌ණනා • 4. Catutthasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 3. තතියසික්‌ඛාපදවණ්‌ණනා • 3. Tatiyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 4. චතුත්‌ථසික්‌ඛාපදං • 4. Catutthasikkhāpadaṃ
