| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༤. ཙཏུཏྠསིཀྑཱཔདཾ
4. Catutthasikkhāpadaṃ
༨༥༠. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཐུལླནནྡཱ བྷིཀྑུནཱི རཐིཀཱཡཔི བྱཱུཧེཔི སིངྒྷཱཊཀེཔི པུརིསེན སདྡྷིཾ ཨེཀེནེཀཱ སནྟིཊྛཏིཔི སལླཔཏིཔི ནིཀཎྞིཀམྤི ཛཔྤེཏི དུཏིཡིཀམྤི བྷིཀྑུནིཾ ཨུཡྻོཛེཏི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཡྻཱ ཐུལླནནྡཱ རཐིཀཱཡཔི བྱཱུཧེཔི སིངྒྷཱཊཀེཔི པུརིསེན སདྡྷིཾ ཨེཀེནེཀཱ སནྟིཊྛིསྶཏིཔི སལླཔིསྶཏིཔི ནིཀཎྞིཀམྤི ཛཔྤིསྶཏི དུཏིཡིཀམྤི བྷིཀྑུནིཾ ཨུཡྻོཛེསྶཏཱི’’ཏི…པེ॰… སཙྩཾ ཀིར, བྷིཀྑཝེ, ཐུལླནནྡཱ བྷིཀྑུནཱི རཐིཀཱཡཔི བྱཱུཧེཔི སིངྒྷཱཊཀེཔི པུརིསེན སདྡྷིཾ ཨེཀེནེཀཱ སནྟིཊྛཏིཔི སལླཔཏིཔི ནིཀཎྞིཀམྤི ཛཔྤེཏི དུཏིཡིཀམྤི བྷིཀྑུནིཾ ཨུཡྻོཛེཏཱིཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, ཐུལླནནྡཱ བྷིཀྑུནཱི རཐིཀཱཡཔི བྱཱུཧེཔི སིངྒྷཱཊཀེཔི པུརིསེན སདྡྷིཾ ཨེཀེནེཀཱ སནྟིཊྛིསྶཏིཔི སལླཔིསྶཏིཔི ནིཀཎྞིཀམྤི ཛཔྤིསྶཏི དུཏིཡིཀམྤི བྷིཀྑུནིཾ ཨུཡྻོཛེསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
850. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī rathikāyapi byūhepi siṅghāṭakepi purisena saddhiṃ ekenekā santiṭṭhatipi sallapatipi nikaṇṇikampi jappeti dutiyikampi bhikkhuniṃ uyyojeti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā rathikāyapi byūhepi siṅghāṭakepi purisena saddhiṃ ekenekā santiṭṭhissatipi sallapissatipi nikaṇṇikampi jappissati dutiyikampi bhikkhuniṃ uyyojessatī’’ti…pe… saccaṃ kira, bhikkhave, thullanandā bhikkhunī rathikāyapi byūhepi siṅghāṭakepi purisena saddhiṃ ekenekā santiṭṭhatipi sallapatipi nikaṇṇikampi jappeti dutiyikampi bhikkhuniṃ uyyojetīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī rathikāyapi byūhepi siṅghāṭakepi purisena saddhiṃ ekenekā santiṭṭhissatipi sallapissatipi nikaṇṇikampi jappissati dutiyikampi bhikkhuniṃ uyyojessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༨༥༡. ‘‘ཡཱ པན བྷིཀྑུནཱི རཐིཀཱཡ ཝཱ བྱཱུཧེ ཝཱ སིངྒྷཱཊཀེ ཝཱ པུརིསེན སདྡྷིཾ ཨེཀེནེཀཱ སནྟིཊྛེཡྻ ཝཱ སལླཔེཡྻ ཝཱ ནིཀཎྞིཀཾ ཝཱ ཛཔྤེཡྻ དུཏིཡིཀཾ ཝཱ བྷིཀྑུནིཾ ཨུཡྻོཛེཡྻ, པཱཙིཏྟིཡ’’ནྟི།
851.‘‘Yāpana bhikkhunī rathikāya vā byūhe vā siṅghāṭake vā purisena saddhiṃ ekenekā santiṭṭheyya vā sallapeyya vā nikaṇṇikaṃ vā jappeyya dutiyikaṃ vā bhikkhuniṃ uyyojeyya, pācittiya’’nti.
༨༥༢. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
852.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
རཐིཀཱ ནཱམ རཙྪཱ ཝུཙྩཏི། བྱཱུཧཾ ནཱམ ཡེནེཝ པཝིསནྟི ཏེནེཝ ནིཀྑམནྟི། སིངྒྷཱཊཀོ ནཱམ ཙཙྩརཾ ཝུཙྩཏི།
Rathikā nāma racchā vuccati. Byūhaṃ nāma yeneva pavisanti teneva nikkhamanti. Siṅghāṭako nāma caccaraṃ vuccati.
པུརིསོ ནཱམ མནུསྶཔུརིསོ ན ཡཀྑོ ན པེཏོ ན ཏིརཙྪཱནགཏོ ཝིཉྙཱུ པཊིབལོ སནྟིཊྛིཏུཾ སལླཔིཏུཾ།
Puriso nāma manussapuriso na yakkho na peto na tiracchānagato viññū paṭibalo santiṭṭhituṃ sallapituṃ.
སདྡྷིནྟི ཨེཀཏོ། ཨེཀེནེཀཱཏི པུརིསོ ཙེཝ ཧོཏི བྷིཀྑུནཱི ཙ།
Saddhinti ekato. Ekenekāti puriso ceva hoti bhikkhunī ca.
སནྟིཊྛེཡྻ ཝཱཏི པུརིསསྶ ཧཏྠཔཱསེ ཏིཊྛཏི, ཨཱཔཏྟི པཱཙིཏྟིཡསྶ།
Santiṭṭheyya vāti purisassa hatthapāse tiṭṭhati, āpatti pācittiyassa.
སལླཔེཡྻ ཝཱཏི པུརིསསྶ ཧཏྠཔཱསེ ཋིཏཱ སལླཔཏི, ཨཱཔཏྟི པཱཙིཏྟིཡསྶ།
Sallapeyya vāti purisassa hatthapāse ṭhitā sallapati, āpatti pācittiyassa.
ནིཀཎྞིཀཾ ཝཱ ཛཔྤེཡྻཱཏི པུརིསསྶ ཨུཔཀཎྞཀེ ཨཱརོཙེཏི , ཨཱཔཏྟི པཱཙིཏྟིཡསྶ།
Nikaṇṇikaṃ vā jappeyyāti purisassa upakaṇṇake āroceti , āpatti pācittiyassa.
དུཏིཡིཀཾ ཝཱ བྷིཀྑུནིཾ ཨུཡྻོཛེཡྻཱཏི ཨནཱཙཱརཾ ཨཱཙརིཏུཀཱམཱ དུཏིཡིཀམྤི བྷིཀྑུནིཾ ཨུཡྻོཛེཏི, ཨཱཔཏྟི དུཀྐཊསྶ། དསྶནཱུཔཙཱརཾ ཝཱ སཝནཱུཔཙཱརཾ ཝཱ ཝིཛཧནྟིཡཱ ཨཱཔཏྟི དུཀྐཊསྶ། ཝིཛཧིཏེ ཨཱཔཏྟི པཱཙིཏྟིཡསྶ།
Dutiyikaṃ vā bhikkhuniṃ uyyojeyyāti anācāraṃ ācaritukāmā dutiyikampi bhikkhuniṃ uyyojeti, āpatti dukkaṭassa. Dassanūpacāraṃ vā savanūpacāraṃ vā vijahantiyā āpatti dukkaṭassa. Vijahite āpatti pācittiyassa.
ཧཏྠཔཱསཾ ཝིཛཧིཏྭཱ སནྟིཊྛཏི ཝཱ སལླཔཏི ཝཱ ཨཱཔཏྟི དུཀྐཊསྶ། ཡཀྑེན ཝཱ པེཏེན ཝཱ པཎྜཀེན ཝཱ ཏིརཙྪཱནགཏམནུསྶཝིགྒཧེན ཝཱ སདྡྷིཾ སནྟིཊྛཏི ཝཱ སལླཔཏི ཝཱ, ཨཱཔཏྟི དུཀྐཊསྶ།
Hatthapāsaṃ vijahitvā santiṭṭhati vā sallapati vā āpatti dukkaṭassa. Yakkhena vā petena vā paṇḍakena vā tiracchānagatamanussaviggahena vā saddhiṃ santiṭṭhati vā sallapati vā, āpatti dukkaṭassa.
༨༥༣. ཨནཱཔཏྟི ཡོ ཀོཙི ཝིཉྙཱུ དུཏིཡོ ཧོཏི, ཨརཧོཔེཀྑཱ, ཨཉྙཝིཧིཏཱ སནྟིཊྛཏི ཝཱ སལླཔཏི ཝཱ, ན ཨནཱཙཱརཾ ཨཱཙརིཏུཀཱམཱ, སཏི ཀརཎཱིཡེ དུཏིཡིཀཾ བྷིཀྑུནིཾ ཨུཡྻོཛེཏི, ཨུམྨཏྟིཀཱཡ, ཨཱདིཀམྨིཀཱཡཱཏི།
853. Anāpatti yo koci viññū dutiyo hoti, arahopekkhā, aññavihitā santiṭṭhati vā sallapati vā, na anācāraṃ ācaritukāmā, sati karaṇīye dutiyikaṃ bhikkhuniṃ uyyojeti, ummattikāya, ādikammikāyāti.
ཙཏུཏྠསིཀྑཱཔདཾ ནིཊྛིཏཾ།
Catutthasikkhāpadaṃ niṭṭhitaṃ.
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༤. ཙཏུཏྠསིཀྑཱཔདཝཎྞནཱ • 4. Catutthasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༢-༣-༤. དུཏིཡཏཏིཡཙཏུཏྠསིཀྑཱཔདཝཎྞནཱ • 2-3-4. Dutiyatatiyacatutthasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམཱདིསིཀྑཱཔདཝཎྞནཱ • 1. Paṭhamādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༤. ཙཏུཏྠསིཀྑཱཔདཾ • 4. Catutthasikkhāpadaṃ
