| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
4. சதுத்த²ஸிக்கா²பத³வண்ணனா
4. Catutthasikkhāpadavaṇṇanā
1038. நிமந்திதா வா பவாரிதா வாதி எத்த² போராணக³ண்டி²பதே³ தாவ ஏவங் வுத்தங் ‘‘பவாரிதாபி யாகு³ங் பாதுங் லப⁴தி, போ⁴ஜ்ஜயாகு³ங் ந லப⁴தி. யாகு³ பனெத்த² கா²த³னீயபோ⁴ஜனீயஸங்க்²யங் ந க³ச்ச²தி. நிமந்திதா பி⁴க்கு²னீ பிண்டா³ய சரித்வா பு⁴ஞ்ஜிதுகாமா ஸாமிகே அபலோகெத்வாவ பு⁴ஞ்ஜிதுங் லப⁴தி. பரம்பரபோ⁴ஜனாபத்தி பி⁴க்கு²னீனங் நத்தி². நிமந்திதா தங் ப⁴த்தங் பு⁴ஞ்ஜித்வா வா அபு⁴ஞ்ஜித்வா வா பவாரிதா கப்பியங் காராபெத்வா பு⁴ஞ்ஜிதுங் ந லப⁴தி, அகப்பியனிமந்தனேன நிமந்தியமானா த்³வே நிமந்தனானி ஸம்படிச்சி²துஞ்ச ந லப⁴தீ’’தி. தத்த² ‘‘பவாரிதாபி யாகு³ங் பாதுங் லப⁴தீ’’தி வுத்தங் பாளியங், அட்ட²கதா²யஞ்ச அனுஞ்ஞாதத்தா. ‘‘நிமந்திதா அப்பவாரிதா யாகு³ங் பிவதீ’’தி ஹி பாளியங் வுத்தங். தத்ரித³ங் ஸிக்கா²பத³வண்ணனாபுப்³ப³ங்க³மஸன்னிட்டா²னங் – நிமந்திதா வா பவாரிதா வாதி எத்த² வாஸத்³தே³ன அகப்பியனிமந்தனேன நிமந்திதா அப்பவாரிதா ட²பெத்வா யாகு³ங் அஞ்ஞங் கா²த³னீயங் வா போ⁴ஜனீயங் வா கா²தெ³ய்ய வா பு⁴ஞ்ஜெய்ய வா, பாசித்தியங் அஞ்ஞத்ர ஸாமிகானங் அபலோகனா. பரம்பரபோ⁴ஜனாபா⁴வேன பி⁴க்கு²னீனங் கோ கு³ணோ ஜாதோதி? ந ஏதாஸங் கு³ணலாபோ⁴, கேவலங் பாகடதரங் ஜாதங். பி⁴க்கூ²பி விகப்பெத்வா மிஸ்ஸெத்வாவ பு⁴ஞ்ஜிதுங் லப⁴ந்தி. ஸமயே யதா²ஸுக²ங் லப⁴ந்தி. இமினா அபலோகனேன கிந்தி? பவாரிதா வா அனிமந்திதா வா ந கிஞ்சி கப்பியங் காராபெத்வா கி³லானாதிரித்தம்பி லப⁴ந்தி, நிமந்திதா ச பவாரிதா ச யாகு³ம்பி ந லப⁴ந்தி, அபலோகெத்வாபி ந லப⁴ந்தீதி.
1038.Nimantitā vā pavāritā vāti ettha porāṇagaṇṭhipade tāva evaṃ vuttaṃ ‘‘pavāritāpi yāguṃ pātuṃ labhati, bhojjayāguṃ na labhati. Yāgu panettha khādanīyabhojanīyasaṅkhyaṃ na gacchati. Nimantitā bhikkhunī piṇḍāya caritvā bhuñjitukāmā sāmike apaloketvāva bhuñjituṃ labhati. Paramparabhojanāpatti bhikkhunīnaṃ natthi. Nimantitā taṃ bhattaṃ bhuñjitvā vā abhuñjitvā vā pavāritā kappiyaṃ kārāpetvā bhuñjituṃ na labhati, akappiyanimantanena nimantiyamānā dve nimantanāni sampaṭicchituñca na labhatī’’ti. Tattha ‘‘pavāritāpi yāguṃ pātuṃ labhatī’’ti vuttaṃ pāḷiyaṃ, aṭṭhakathāyañca anuññātattā. ‘‘Nimantitā appavāritā yāguṃ pivatī’’ti hi pāḷiyaṃ vuttaṃ. Tatridaṃ sikkhāpadavaṇṇanāpubbaṅgamasanniṭṭhānaṃ – nimantitā vā pavāritā vāti ettha vāsaddena akappiyanimantanena nimantitā appavāritā ṭhapetvā yāguṃ aññaṃ khādanīyaṃ vā bhojanīyaṃ vā khādeyya vā bhuñjeyya vā, pācittiyaṃ aññatra sāmikānaṃ apalokanā. Paramparabhojanābhāvena bhikkhunīnaṃ ko guṇo jātoti? Na etāsaṃ guṇalābho, kevalaṃ pākaṭataraṃ jātaṃ. Bhikkhūpi vikappetvā missetvāva bhuñjituṃ labhanti. Samaye yathāsukhaṃ labhanti. Iminā apalokanena kinti? Pavāritā vā animantitā vā na kiñci kappiyaṃ kārāpetvā gilānātirittampi labhanti, nimantitā ca pavāritā ca yāgumpi na labhanti, apaloketvāpi na labhantīti.
சதுத்த²ஸிக்கா²பத³வண்ணனா நிட்டி²தா.
Catutthasikkhāpadavaṇṇanā niṭṭhitā.
ஆராமவக்³க³வண்ணனா நிட்டி²தா.
Ārāmavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 4. சதுத்த²ஸிக்கா²பத³ங் • 4. Catutthasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மாதி³ஸிக்கா²பத³வண்ணனா • 1. Paṭhamādisikkhāpadavaṇṇanā
