| Library / Tipiṭaka / තිපිටක • Tipiṭaka / වජිරබුද්‌ධි-ටීකා • Vajirabuddhi-ṭīkā |
4. චතුත්‌ථසික්‌ඛාපදවණ්‌ණනා
4. Catutthasikkhāpadavaṇṇanā
1038. නිමන්‌තිතා වා පවාරිතා වාති එත්‌ථ පොරාණගණ්‌ඨිපදෙ තාව එවං වුත්‌තං ‘‘පවාරිතාපි යාගුං පාතුං ලභති, භොජ්‌ජයාගුං න ලභති. යාගු පනෙත්‌ථ ඛාදනීයභොජනීයසඞ්‌ඛ්‍යං න ගච්‌ඡති. නිමන්‌තිතා භික්‌ඛුනී පිණ්‌ඩාය චරිත්‌වා භුඤ්‌ජිතුකාමා සාමිකෙ අපලොකෙත්‌වාව භුඤ්‌ජිතුං ලභති. පරම්‌පරභොජනාපත්‌ති භික්‌ඛුනීනං නත්‌ථි. නිමන්‌තිතා තං භත්‌තං භුඤ්‌ජිත්‌වා වා අභුඤ්‌ජිත්‌වා වා පවාරිතා කප්‌පියං කාරාපෙත්‌වා භුඤ්‌ජිතුං න ලභති, අකප්‌පියනිමන්‌තනෙන නිමන්‌තියමානා ද්‌වෙ නිමන්‌තනානි සම්‌පටිච්‌ඡිතුඤ්‌ච න ලභතී’’ති. තත්‌ථ ‘‘පවාරිතාපි යාගුං පාතුං ලභතී’’ති වුත්‌තං පාළියං, අට්‌ඨකථායඤ්‌ච අනුඤ්‌ඤාතත්‌තා. ‘‘නිමන්‌තිතා අප්‌පවාරිතා යාගුං පිවතී’’ති හි පාළියං වුත්‌තං. තත්‍රිදං සික්‌ඛාපදවණ්‌ණනාපුබ්‌බඞ්‌ගමසන්‌නිට්‌ඨානං – නිමන්‌තිතා වා පවාරිතා වාති එත්‌ථ වාසද්‌දෙන අකප්‌පියනිමන්‌තනෙන නිමන්‌තිතා අප්‌පවාරිතා ඨපෙත්‌වා යාගුං අඤ්‌ඤං ඛාදනීයං වා භොජනීයං වා ඛාදෙය්‍ය වා භුඤ්‌ජෙය්‍ය වා, පාචිත්‌තියං අඤ්‌ඤත්‍ර සාමිකානං අපලොකනා. පරම්‌පරභොජනාභාවෙන භික්‌ඛුනීනං කො ගුණො ජාතොති? න එතාසං ගුණලාභො, කෙවලං පාකටතරං ජාතං. භික්‌ඛූපි විකප්‌පෙත්‌වා මිස්‌සෙත්‌වාව භුඤ්‌ජිතුං ලභන්‌ති. සමයෙ යථාසුඛං ලභන්‌ති. ඉමිනා අපලොකනෙන කින්‌ති? පවාරිතා වා අනිමන්‌තිතා වා න කිඤ්‌චි කප්‌පියං කාරාපෙත්‌වා ගිලානාතිරිත්‌තම්‌පි ලභන්‌ති, නිමන්‌තිතා ච පවාරිතා ච යාගුම්‌පි න ලභන්‌ති, අපලොකෙත්‌වාපි න ලභන්‌තීති.
1038.Nimantitā vā pavāritā vāti ettha porāṇagaṇṭhipade tāva evaṃ vuttaṃ ‘‘pavāritāpi yāguṃ pātuṃ labhati, bhojjayāguṃ na labhati. Yāgu panettha khādanīyabhojanīyasaṅkhyaṃ na gacchati. Nimantitā bhikkhunī piṇḍāya caritvā bhuñjitukāmā sāmike apaloketvāva bhuñjituṃ labhati. Paramparabhojanāpatti bhikkhunīnaṃ natthi. Nimantitā taṃ bhattaṃ bhuñjitvā vā abhuñjitvā vā pavāritā kappiyaṃ kārāpetvā bhuñjituṃ na labhati, akappiyanimantanena nimantiyamānā dve nimantanāni sampaṭicchituñca na labhatī’’ti. Tattha ‘‘pavāritāpi yāguṃ pātuṃ labhatī’’ti vuttaṃ pāḷiyaṃ, aṭṭhakathāyañca anuññātattā. ‘‘Nimantitā appavāritā yāguṃ pivatī’’ti hi pāḷiyaṃ vuttaṃ. Tatridaṃ sikkhāpadavaṇṇanāpubbaṅgamasanniṭṭhānaṃ – nimantitā vā pavāritā vāti ettha vāsaddena akappiyanimantanena nimantitā appavāritā ṭhapetvā yāguṃ aññaṃ khādanīyaṃ vā bhojanīyaṃ vā khādeyya vā bhuñjeyya vā, pācittiyaṃ aññatra sāmikānaṃ apalokanā. Paramparabhojanābhāvena bhikkhunīnaṃ ko guṇo jātoti? Na etāsaṃ guṇalābho, kevalaṃ pākaṭataraṃ jātaṃ. Bhikkhūpi vikappetvā missetvāva bhuñjituṃ labhanti. Samaye yathāsukhaṃ labhanti. Iminā apalokanena kinti? Pavāritā vā animantitā vā na kiñci kappiyaṃ kārāpetvā gilānātirittampi labhanti, nimantitā ca pavāritā ca yāgumpi na labhanti, apaloketvāpi na labhantīti.
චතුත්‌ථසික්‌ඛාපදවණ්‌ණනා නිට්‌ඨිතා.
Catutthasikkhāpadavaṇṇanā niṭṭhitā.
ආරාමවග්‌ගවණ්‌ණනා නිට්‌ඨිතා.
Ārāmavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / භික්‌ඛුනීවිභඞ්‌ග • Bhikkhunīvibhaṅga / 4. චතුත්‌ථසික්‌ඛාපදං • 4. Catutthasikkhāpadaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමාදිසික්‌ඛාපදවණ්‌ණනා • 1. Paṭhamādisikkhāpadavaṇṇanā
