| Library / Tipiṭaka / ਤਿਪਿਟਕ • Tipiṭaka / ਪਟਿਸਮ੍ਭਿਦਾਮਗ੍ਗ-ਅਟ੍ਠਕਥਾ • Paṭisambhidāmagga-aṭṭhakathā |
੪. ਚਤੁਤ੍ਥਸੁਤ੍ਤਨ੍ਤਨਿਦ੍ਦੇਸવਣ੍ਣਨਾ
4. Catutthasuttantaniddesavaṇṇanā
੧੯੮. ਪੁਨ ਪਠਮਸੁਤ੍ਤਮੇવ ਨਿਕ੍ਖਿਪਿਤ੍વਾ ਅਪਰੇਨ ਆਕਾਰੇਨ ਇਨ੍ਦ੍ਰਿਯਾਨਿ ਨਿਦ੍ਦਿਸਤਿ। ਤਤ੍ਥ ਕਤਿਹਾਕਾਰੇਹਿ ਕੇਨਟ੍ਠੇਨ ਦਟ੍ਠਬ੍ਬਾਨੀਤਿ ਕਤਿਹਿ ਆਕਾਰੇਹਿ ਦਟ੍ਠਬ੍ਬਾਨਿ। ਕੇਨਟ੍ਠੇਨ ਦਟ੍ਠਬ੍ਬਾਨੀਤਿ ਦਟ੍ਠਬ੍ਬਾਕਾਰੇ ਚ ਦਟ੍ਠਬ੍ਬਟ੍ਠਞ੍ਚ ਪੁਚ੍ਛਤਿ। ਛਹਾਕਾਰੇਹਿ ਤੇਨਟ੍ਠੇਨ ਦਟ੍ਠਬ੍ਬਾਨੀਤਿ ਛਹਿ ਆਕਾਰੇਹਿ ਦਟ੍ਠਬ੍ਬਾਨਿ, ਤੇਨੇવ ਛਆਕਾਰਸਙ੍ਖਾਤੇਨਟ੍ਠੇਨ ਦਟ੍ਠਬ੍ਬਾਨਿ। ਆਧਿਪਤੇਯ੍ਯਟ੍ਠੇਨਾਤਿ ਅਧਿਪਤਿਭਾવਟ੍ਠੇਨ। ਆਦਿવਿਸੋਧਨਟ੍ਠੇਨਾਤਿ ਕੁਸਲਾਨਂ ਧਮ੍ਮਾਨਂ ਆਦਿਭੂਤਸ੍ਸ ਸੀਲਸ੍ਸ વਿਸੋਧਨਟ੍ਠੇਨ। ਅਧਿਮਤ੍ਤਟ੍ਠੇਨਾਤਿ ਬਲવਟ੍ਠੇਨ । ਬਲવਞ੍ਹਿ ਅਧਿਕਾ ਮਤ੍ਤਾ ਪਮਾਣਂ ਅਸ੍ਸਾਤਿ ਅਧਿਮਤ੍ਤਨ੍ਤਿ વੁਚ੍ਚਤਿ। ਅਧਿਟ੍ਠਾਨਟ੍ਠੇਨਾਤਿ ਪਤਿਟ੍ਠਾਨਟ੍ਠੇਨ। ਪਰਿਯਾਦਾਨਟ੍ਠੇਨਾਤਿ ਖੇਪਨਟ੍ਠੇਨ। ਪਤਿਟ੍ਠਾਪਕਟ੍ਠੇਨਾਤਿ ਪਤਿਟ੍ਠਾਪਨਟ੍ਠੇਨ।
198. Puna paṭhamasuttameva nikkhipitvā aparena ākārena indriyāni niddisati. Tattha katihākārehi kenaṭṭhena daṭṭhabbānīti katihi ākārehi daṭṭhabbāni. Kenaṭṭhena daṭṭhabbānīti daṭṭhabbākāre ca daṭṭhabbaṭṭhañca pucchati. Chahākārehi tenaṭṭhena daṭṭhabbānīti chahi ākārehi daṭṭhabbāni, teneva chaākārasaṅkhātenaṭṭhena daṭṭhabbāni. Ādhipateyyaṭṭhenāti adhipatibhāvaṭṭhena. Ādivisodhanaṭṭhenāti kusalānaṃ dhammānaṃ ādibhūtassa sīlassa visodhanaṭṭhena. Adhimattaṭṭhenāti balavaṭṭhena . Balavañhi adhikā mattā pamāṇaṃ assāti adhimattanti vuccati. Adhiṭṭhānaṭṭhenāti patiṭṭhānaṭṭhena. Pariyādānaṭṭhenāti khepanaṭṭhena. Patiṭṭhāpakaṭṭhenāti patiṭṭhāpanaṭṭhena.
ਕ. ਆਧਿਪਤੇਯ੍ਯਟ੍ਠਨਿਦ੍ਦੇਸવਣ੍ਣਨਾ
Ka. ādhipateyyaṭṭhaniddesavaṇṇanā
੧੯੯. ਆਧਿਪਤੇਯ੍ਯਟ੍ਠਨਿਦ੍ਦੇਸੇ ਅਸ੍ਸਦ੍ਧਿਯਂ ਪਜਹਤੋਤਿਆਦਿ ਏਕੇਕਸ੍ਸੇવ ਇਨ੍ਦ੍ਰਿਯਸ੍ਸ ਪਟਿਪਕ੍ਖਪਜਹਨવਚਨਂ ਏਕਕ੍ਖਣੇਪਿ ਅਤ੍ਤਨੋ ਅਤ੍ਤਨੋ ਪਟਿਪਕ੍ਖਪਹਾਨਕਿਚ੍ਚਸਾਧਨੇ ਅਧਿਪਤਿਭਾવਸਾਧਨਤ੍ਥਂ વੁਤ੍ਤਂ। ਸੇਸਾਨਿ ਚਤ੍ਤਾਰਿ ਇਨ੍ਦ੍ਰਿਯਾਨਿ ਤਂਸਮ੍ਪਯੁਤ੍ਤਾਨੇવ વੁਤ੍ਤਾਨਿ। ਨਾਨਾਕ੍ਖਣੇਸੁ વਾ ਏਕੇਕਂ ਇਨ੍ਦ੍ਰਿਯਂ ਧੁਰਂ ਕਤ੍વਾ ਤਸ੍ਸ ਤਸ੍ਸ ਪਟਿਪਕ੍ਖਸ੍ਸ ਤਂ ਤਂ ਇਨ੍ਦ੍ਰਿਯਂ ਜੇਟ੍ਠਕਂ ਕਤ੍વਾ ਸੇਸਾਨਿ ਤਦਨ੍વਯਾਨਿ ਕਤ੍વਾ વੁਤ੍ਤਨ੍ਤਿਪਿ વੇਦਿਤਬ੍ਬਂ। ਕਾਮਚ੍ਛਨ੍ਦਂ ਪਜਹਤੋਤਿਆਦਿ ਪਨ ਏਕਕ੍ਖਣવਸੇਨੇવ વੁਤ੍ਤਂ।
199. Ādhipateyyaṭṭhaniddese assaddhiyaṃ pajahatotiādi ekekasseva indriyassa paṭipakkhapajahanavacanaṃ ekakkhaṇepi attano attano paṭipakkhapahānakiccasādhane adhipatibhāvasādhanatthaṃ vuttaṃ. Sesāni cattāri indriyāni taṃsampayuttāneva vuttāni. Nānākkhaṇesu vā ekekaṃ indriyaṃ dhuraṃ katvā tassa tassa paṭipakkhassa taṃ taṃ indriyaṃ jeṭṭhakaṃ katvā sesāni tadanvayāni katvā vuttantipi veditabbaṃ. Kāmacchandaṃ pajahatotiādi pana ekakkhaṇavaseneva vuttaṃ.
ਖ. ਆਦਿવਿਸੋਧਨਟ੍ਠਨਿਦ੍ਦੇਸવਣ੍ਣਨਾ
Kha. ādivisodhanaṭṭhaniddesavaṇṇanā
੨੦੦. ਆਦਿવਿਸੋਧਨਟ੍ਠਨਿਦ੍ਦੇਸੇ ਅਸ੍ਸਦ੍ਧਿਯਸਂવਰਟ੍ਠੇਨ ਸੀਲવਿਸੁਦ੍ਧੀਤਿ ਅਸ੍ਸਦ੍ਧਿਯਸ੍ਸ ਨਿવਾਰਣਟ੍ਠੇਨ વਿਰਤਿਅਤ੍ਥੇਨ ਸੀਲਮਲવਿਸੋਧਨਤੋ ਸੀਲવਿਸੁਦ੍ਧਿ ਨਾਮ। ਸਦ੍ਧਿਨ੍ਦ੍ਰਿਯਸ੍ਸ ਆਦਿવਿਸੋਧਨਾਤਿ ਸਦ੍ਧਿਨ੍ਦ੍ਰਿਯਸ੍ਸ ਉਪਨਿਸ੍ਸਯવਸੇਨ ਆਦਿਭੂਤਸ੍ਸ ਸੀਲਸ੍ਸ વਿਸੋਧਨਾ। ਇਮਿਨਾવ ਨਯੇਨ ਸੇਸਾਨਿਪਿ ਕਾਮਚ੍ਛਨ੍ਦਾਦਿਸਂવਰਣਮੂਲਕਾਨਿ ਚ ਇਨ੍ਦ੍ਰਿਯਾਨਿ વੇਦਿਤਬ੍ਬਾਨਿ।
200. Ādivisodhanaṭṭhaniddese assaddhiyasaṃvaraṭṭhena sīlavisuddhīti assaddhiyassa nivāraṇaṭṭhena viratiatthena sīlamalavisodhanato sīlavisuddhi nāma. Saddhindriyassa ādivisodhanāti saddhindriyassa upanissayavasena ādibhūtassa sīlassa visodhanā. Imināva nayena sesānipi kāmacchandādisaṃvaraṇamūlakāni ca indriyāni veditabbāni.
ਗ. ਅਧਿਮਤ੍ਤਟ੍ਠਨਿਦ੍ਦੇਸવਣ੍ਣਨਾ
Ga. adhimattaṭṭhaniddesavaṇṇanā
੨੦੧. ਅਧਿਮਤ੍ਤਟ੍ਠਨਿਦ੍ਦੇਸੇ ਸਦ੍ਧਿਨ੍ਦ੍ਰਿਯਸ੍ਸ ਭਾવਨਾਯ ਛਨ੍ਦੋ ਉਪ੍ਪਜ੍ਜਤੀਤਿ ਸਦ੍ਧਸ੍ਸ ਪੁਗ੍ਗਲਸ੍ਸ ਸਦ੍ਧਾਪਟਿਸਂਯੁਤ੍ਤਂ ਧਮ੍ਮਂ ਸੁਤ੍વਾ વਾ ਸਦ੍ਧਿਨ੍ਦ੍ਰਿਯਭਾવਨਾਯ ਅਸ੍ਸਾਦਂ ਦਿਸ੍વਾ વਾ ਸਦ੍ਧਿਨ੍ਦ੍ਰਿਯੇ ਕੁਸਲੋ ਧਮ੍ਮਚ੍ਛਨ੍ਦੋ ਜਾਯਤਿ। ਪਾਮੋਜ੍ਜਂ ਉਪ੍ਪਜ੍ਜਤੀਤਿ ਛਨ੍ਦਜਾਤਤ੍ਤਾ ਦੁਬ੍ਬਲਪੀਤਿ ਉਪ੍ਪਜ੍ਜਤਿ। ਪੀਤਿ ਉਪ੍ਪਜ੍ਜਤੀਤਿ ਪਮੁਦਿਤਤ੍ਤਾ ਬਲવਪੀਤਿ ਉਪ੍ਪਜ੍ਜਤਿ। ਪਸ੍ਸਦ੍ਧਿ ਉਪ੍ਪਜ੍ਜਤੀਤਿ ਪੀਤਿਯਾ ਪੀਣਿਤਤ੍ਤਾ ਕਾਯਚਿਤ੍ਤਪਸ੍ਸਦ੍ਧਿ ਉਪ੍ਪਜ੍ਜਤਿ। ਸੁਖਂ ਉਪ੍ਪਜ੍ਜਤੀਤਿ ਪਸ੍ਸਦ੍ਧਕਾਯਚਿਤ੍ਤਤ੍ਤਾ ਚੇਤਸਿਕਂ ਸੁਖਂ ਉਪ੍ਪਜ੍ਜਤਿ । ਓਭਾਸੋ ਉਪ੍ਪਜ੍ਜਤੀਤਿ ਸੁਖੇਨ ਅਭਿਸਨ੍ਨਤ੍ਤਾ ਞਾਣੋਭਾਸੋ ਉਪ੍ਪਜ੍ਜਤਿ। ਸਂવੇਗੋ ਉਪ੍ਪਜ੍ਜਤੀਤਿ ਞਾਣੋਭਾਸੇਨ વਿਦਿਤਸਙ੍ਖਾਰਾਦੀਨવਤ੍ਤਾ ਸਙ੍ਖਾਰਪવਤ੍ਤਿਯਂ ਸਂવੇਗੋ ਉਪ੍ਪਜ੍ਜਤਿ। ਸਂવੇਜੇਤ੍વਾ ਚਿਤ੍ਤਂ ਸਮਾਦਹਤੀਤਿ ਸਂવੇਗਂ ਉਪ੍ਪਾਦੇਤ੍વਾ ਤੇਨੇવ ਸਂવੇਗੇਨ ਚਿਤ੍ਤਂ ਸਮਾਹਿਤਂ ਕਰੋਤਿ। ਸਾਧੁਕਂ ਪਗ੍ਗਣ੍ਹਾਤੀਤਿ ਲੀਨੁਦ੍ਧਤਭਾવਂ ਮੋਚੇਤ੍વਾ ਸੁਟ੍ਠੁ ਪਗ੍ਗਣ੍ਹਾਤਿ। ਸਾਧੁਕਂ ਅਜ੍ਝੁਪੇਕ੍ਖਤੀਤਿ વੀਰਿਯਸ੍ਸ ਸਮਂ ਹੁਤ੍વਾ ਪવਤ੍ਤਤ੍ਤਾ ਪੁਨ વੀਰਿਯਸਮਤਾਨਿਯੋਜਨੇ ਬ੍ਯਾਪਾਰਂ ਅਕਰੋਨ੍ਤੋ ਤਤ੍ਰਮਜ੍ਝਤ੍ਤੁਪੇਕ੍ਖਾવਸੇਨ ਸਾਧੁਕਂ ਅਜ੍ਝੁਪੇਕ੍ਖਤਿ ਨਾਮ। ਉਪੇਕ੍ਖਾવਸੇਨਾਤਿ ਸਮવਾਹਿਤਲਕ੍ਖਣਾਯ ਤਤ੍ਰਮਜ੍ਝਤ੍ਤੁਪੇਕ੍ਖਾਯ વਸੇਨ। ਨਾਨਤ੍ਤਕਿਲੇਸੇਹੀਤਿ વਿਪਸ੍ਸਨਾਯ ਪਟਿਪਕ੍ਖਭੂਤੇਹਿ ਨਾਨਾਸਭਾવੇਹਿ ਕਿਲੇਸੇਹਿ। વਿਮੋਕ੍ਖવਸੇਨਾਤਿ ਭਙ੍ਗਾਨੁਪਸ੍ਸਨਤੋ ਪਟ੍ਠਾਯ ਨਾਨਤ੍ਤਕਿਲੇਸੇਹਿ વਿਮੁਚ੍ਚਨવਸੇਨ। વਿਮੁਤ੍ਤਤ੍ਤਾਤਿ ਨਾਨਤ੍ਤਕਿਲੇਸੇਹਿ વਿਮੁਤ੍ਤਤ੍ਤਾ।
201. Adhimattaṭṭhaniddese saddhindriyassa bhāvanāya chando uppajjatīti saddhassa puggalassa saddhāpaṭisaṃyuttaṃ dhammaṃ sutvā vā saddhindriyabhāvanāya assādaṃ disvā vā saddhindriye kusalo dhammacchando jāyati. Pāmojjaṃ uppajjatīti chandajātattā dubbalapīti uppajjati. Pīti uppajjatīti pamuditattā balavapīti uppajjati. Passaddhi uppajjatīti pītiyā pīṇitattā kāyacittapassaddhi uppajjati. Sukhaṃ uppajjatīti passaddhakāyacittattā cetasikaṃ sukhaṃ uppajjati . Obhāso uppajjatīti sukhena abhisannattā ñāṇobhāso uppajjati. Saṃvego uppajjatīti ñāṇobhāsena viditasaṅkhārādīnavattā saṅkhārapavattiyaṃ saṃvego uppajjati. Saṃvejetvā cittaṃ samādahatīti saṃvegaṃ uppādetvā teneva saṃvegena cittaṃ samāhitaṃ karoti. Sādhukaṃ paggaṇhātīti līnuddhatabhāvaṃ mocetvā suṭṭhu paggaṇhāti. Sādhukaṃ ajjhupekkhatīti vīriyassa samaṃ hutvā pavattattā puna vīriyasamatāniyojane byāpāraṃ akaronto tatramajjhattupekkhāvasena sādhukaṃ ajjhupekkhati nāma. Upekkhāvasenāti samavāhitalakkhaṇāya tatramajjhattupekkhāya vasena. Nānattakilesehīti vipassanāya paṭipakkhabhūtehi nānāsabhāvehi kilesehi. Vimokkhavasenāti bhaṅgānupassanato paṭṭhāya nānattakilesehi vimuccanavasena. Vimuttattāti nānattakilesehi vimuttattā.
ਤੇ ਧਮ੍ਮਾਤਿ ਛਨ੍ਦਾਦਯੋ ਧਮ੍ਮਾ। ਏਕਰਸਾ ਹੋਨ੍ਤੀਤਿ વਿਮੁਤ੍ਤਿਰਸੇਨ ਏਕਰਸਾ ਹੋਨ੍ਤਿ। ਭਾવਨਾવਸੇਨਾਤਿ ਏਕਰਸਭਾવਨਾવਸੇਨ। ਤਤੋ ਪਣੀਤਤਰੇ વਿવਟ੍ਟਨ੍ਤੀਤਿ ਤੇਨ ਕਾਰਣੇਨ વਿਪਸ੍ਸਨਾਰਮ੍ਮਣਤੋ ਪਣੀਤਤਰੇ ਨਿਬ੍ਬਾਨਾਰਮ੍ਮਣੇ વਿવਟ੍ਟਨਾਨੁਪਸ੍ਸਨਾਸਙ੍ਖਾਤੇਨ ਗੋਤ੍ਰਭੁਞਾਣੇਨ ਛਨ੍ਦਾਦਯੋ ਧਮ੍ਮਾ ਨਿવਤ੍ਤਨ੍ਤਿ, ਸਙ੍ਖਾਰਾਰਮ੍ਮਣਤੋ ਅਪਗਨ੍ਤ੍વਾ ਨਿਬ੍ਬਾਨਾਰਮ੍ਮਣੇ ਪવਤ੍ਤਨ੍ਤੀਤਿ ਅਤ੍ਥੋ। વਿવਟ੍ਟਨਾવਸੇਨਾਤਿ ਏવਂ ਗੋਤ੍ਰਭੁਖਣੇ ਸਙ੍ਖਾਰਾਰਮ੍ਮਣਤੋ વਿવਟ੍ਟਨવਸੇਨ। વਿવਟ੍ਟਿਤਤ੍ਤਾ ਤਤੋ વੋਸਜ੍ਜਤੀਤਿ ਮਗ੍ਗਸਮਙ੍ਗਿਪੁਗ੍ਗਲੋ ਮਗ੍ਗਸ੍ਸ ਉਪ੍ਪਾਦਕ੍ਖਣੇਯੇવ ਦੁਭਤੋવੁਟ੍ਠਾਨવਸੇਨ વਿવਟ੍ਟਿਤਤ੍ਤਾ ਤੇਨੇવ ਕਾਰਣੇਨ ਕਿਲੇਸੇ ਚ ਖਨ੍ਧੇ ਚ વੋਸਜ੍ਜਤਿ। વੋਸਜ੍ਜਿਤਤ੍ਤਾ ਤਤੋ ਨਿਰੁਜ੍ਝਨ੍ਤੀਤਿ ਮਗ੍ਗਸ੍ਸ ਉਪ੍ਪਾਦਕ੍ਖਣੇਯੇવ ਕਿਲੇਸੇ ਚ ਖਨ੍ਧੇ ਚ વੋਸਜ੍ਜਿਤਤ੍ਤਾ ਤੇਨੇવ ਕਾਰਣੇਨ ਕਿਲੇਸਾ ਚ ਖਨ੍ਧਾ ਚ ਅਨੁਪ੍ਪਤ੍ਤਿਨਿਰੋਧવਸੇਨ ਨਿਰੁਜ੍ਝਨ੍ਤਿ। વੋਸਜ੍ਜਿਤਤ੍ਤਾਤਿ ਚ ਆਸਂਸਾਯਂ ਭੂਤવਚਨਂ ਕਤਂ। ਕਿਲੇਸਨਿਰੋਧੇ ਸਤਿ ਖਨ੍ਧਨਿਰੋਧਸਬ੍ਭਾવਤੋ ਚ ਖਨ੍ਧਨਿਰੋਧੋ વੁਤ੍ਤੋ। ਨਿਰੋਧવਸੇਨਾਤਿ ਯਥਾવੁਤ੍ਤਨਿਰੋਧવਸੇਨ। ਤਸ੍ਸੇવ ਮਗ੍ਗਸ੍ਸ ਉਪ੍ਪਾਦਕ੍ਖਣੇ ਦ੍વੇ વੋਸਗ੍ਗੇ ਦਸ੍ਸੇਤੁਕਾਮੋ ਨਿਰੋਧવਸੇਨ ਦ੍વੇ વੋਸਗ੍ਗਾਤਿਆਦਿਮਾਹ। ਦ੍વੇਪਿ ਹੇਟ੍ਠਾ વੁਤ੍ਤਤ੍ਥਾ ਏવ। ਅਸ੍ਸਦ੍ਧਿਯਸ੍ਸ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤੀਤਿਆਦੀਸੁਪਿ ਇਮਿਨਾવ ਨਯੇਨ વਿਤ੍ਥਾਰਤੋ ਅਤ੍ਥੋ વੇਦਿਤਬ੍ਬੋ। વੀਰਿਯਿਨ੍ਦ੍ਰਿਯਾਦਿਮੂਲਕੇਸੁਪਿ વਾਰੇਸੁ ਏਸੇવ ਨਯੋ। ਇਮਿਨਾવ ਨਯੇਨ ਅਧਿਟ੍ਠਾਨਟ੍ਠਨਿਦ੍ਦੇਸੋਪਿ વਿਤ੍ਥਾਰਤੋ વੇਦਿਤਬ੍ਬੋ। ਕੇવਲਞ੍ਹੇਤ੍ਥ ਅਧਿਟ੍ਠਾਤੀਤਿ વਿਸੇਸੋ, ਪਤਿਟ੍ਠਾਤੀਤਿ ਅਤ੍ਥੋ।
Te dhammāti chandādayo dhammā. Ekarasā hontīti vimuttirasena ekarasā honti. Bhāvanāvasenāti ekarasabhāvanāvasena. Tato paṇītatare vivaṭṭantīti tena kāraṇena vipassanārammaṇato paṇītatare nibbānārammaṇe vivaṭṭanānupassanāsaṅkhātena gotrabhuñāṇena chandādayo dhammā nivattanti, saṅkhārārammaṇato apagantvā nibbānārammaṇe pavattantīti attho. Vivaṭṭanāvasenāti evaṃ gotrabhukhaṇe saṅkhārārammaṇato vivaṭṭanavasena. Vivaṭṭitattā tato vosajjatīti maggasamaṅgipuggalo maggassa uppādakkhaṇeyeva dubhatovuṭṭhānavasena vivaṭṭitattā teneva kāraṇena kilese ca khandhe ca vosajjati. Vosajjitattā tato nirujjhantīti maggassa uppādakkhaṇeyeva kilese ca khandhe ca vosajjitattā teneva kāraṇena kilesā ca khandhā ca anuppattinirodhavasena nirujjhanti. Vosajjitattāti ca āsaṃsāyaṃ bhūtavacanaṃ kataṃ. Kilesanirodhe sati khandhanirodhasabbhāvato ca khandhanirodho vutto. Nirodhavasenāti yathāvuttanirodhavasena. Tasseva maggassa uppādakkhaṇe dve vosagge dassetukāmo nirodhavasena dve vosaggātiādimāha. Dvepi heṭṭhā vuttatthā eva. Assaddhiyassa pahānāya chando uppajjatītiādīsupi imināva nayena vitthārato attho veditabbo. Vīriyindriyādimūlakesupi vāresu eseva nayo. Imināva nayena adhiṭṭhānaṭṭhaniddesopi vitthārato veditabbo. Kevalañhettha adhiṭṭhātīti viseso, patiṭṭhātīti attho.
ਘ-ਙ. ਪਰਿਯਾਦਾਨਟ੍ਠਪਤਿਟ੍ਠਾਪਕਟ੍ਠਨਿਦ੍ਦੇਸવਣ੍ਣਨਾ
Gha-ṅa. pariyādānaṭṭhapatiṭṭhāpakaṭṭhaniddesavaṇṇanā
੨੦੨-੨੦੩. ਪਰਿਯਾਦਾਨਟ੍ਠਨਿਦ੍ਦੇਸੇ ਪਰਿਯਾਦਿਯਤੀਤਿ ਖੇਪੇਤਿ। ਪਤਿਟ੍ਠਾਪਕਟ੍ਠਨਿਦ੍ਦੇਸੇ ਸਦ੍ਧੋ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖੇ ਪਤਿਟ੍ਠਾਪੇਤੀਤਿ ਸਦ੍ਧਾਸਮ੍ਪਨ੍ਨੋ ‘‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾ’’ਤਿ ਅਧਿਮੁਚ੍ਚਨ੍ਤੋ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖੇ ਪਤਿਟ੍ਠਾਪੇਤਿ। ਇਮਿਨਾ ਪੁਗ੍ਗਲવਿਸੇਸੇਨ ਇਨ੍ਦ੍ਰਿਯਭਾવਨਾવਿਸੇਸੋ ਨਿਦ੍ਦਿਟ੍ਠੋ। ਸਦ੍ਧਸ੍ਸ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖੇ ਪਤਿਟ੍ਠਾਪੇਤੀਤਿ ਸਦ੍ਧਾਸਮ੍ਪਨ੍ਨਸ੍ਸ ਪੁਗ੍ਗਲਸ੍ਸ ਸਦ੍ਧਿਨ੍ਦ੍ਰਿਯਂ ਤਂਯੇવ ਸਦ੍ਧਂ ਪਤਿਟ੍ਠਾਪੇਤਿ। ਤਥਾ ਅਧਿਮੁਚ੍ਚਨ੍ਤਂ ਅਧਿਮੋਕ੍ਖੇ ਪਤਿਟ੍ਠਾਪੇਤੀਤਿ। ਇਮਿਨਾ ਇਨ੍ਦ੍ਰਿਯਭਾવਨਾવਿਸੇਸੇਨ ਪੁਗ੍ਗਲવਿਸੇਸੋ ਨਿਦ੍ਦਿਟ੍ਠੋ। ਏવਂ ਚਿਤ੍ਤਂ ਪਗ੍ਗਣ੍ਹਨ੍ਤੋ ਪਗ੍ਗਹੇ ਪਤਿਟ੍ਠਾਪੇਤਿ, ਸਤਿਂ ਉਪਟ੍ਠਾਪੇਨ੍ਤੋ ਉਪਟ੍ਠਾਨੇ ਪਤਿਟ੍ਠਾਪੇਤਿ, ਚਿਤ੍ਤਂ ਸਮਾਦਹਨ੍ਤੋ ਅવਿਕ੍ਖੇਪੇ ਪਤਿਟ੍ਠਾਪੇਤਿ, ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਪਸ੍ਸਨ੍ਤੋ ਦਸ੍ਸਨੇ ਪਤਿਟ੍ਠਾਪੇਤੀਤਿ ਸੇਸੇਸੁਪਿ ਯੋਜਨਾ વੇਦਿਤਬ੍ਬਾ। ਯੋਗਾવਚਰੋਤਿ ਸਮਥਯੋਗੇ, વਿਪਸ੍ਸਨਾਯੋਗੇ વਾ ਅવਚਰਤੀਤਿ ਯੋਗਾવਚਰੋ। ਅવਚਰਤੀਤਿ ਪવਿਸਿਤ੍વਾ ਚਰਤੀਤਿ।
202-203. Pariyādānaṭṭhaniddese pariyādiyatīti khepeti. Patiṭṭhāpakaṭṭhaniddese saddho saddhindriyaṃ adhimokkhe patiṭṭhāpetīti saddhāsampanno ‘‘sabbe saṅkhārā aniccā dukkhā anattā’’ti adhimuccanto saddhindriyaṃ adhimokkhe patiṭṭhāpeti. Iminā puggalavisesena indriyabhāvanāviseso niddiṭṭho. Saddhassa saddhindriyaṃ adhimokkhe patiṭṭhāpetīti saddhāsampannassa puggalassa saddhindriyaṃ taṃyeva saddhaṃ patiṭṭhāpeti. Tathā adhimuccantaṃ adhimokkhe patiṭṭhāpetīti. Iminā indriyabhāvanāvisesena puggalaviseso niddiṭṭho. Evaṃ cittaṃ paggaṇhanto paggahe patiṭṭhāpeti, satiṃ upaṭṭhāpento upaṭṭhāne patiṭṭhāpeti, cittaṃ samādahanto avikkhepe patiṭṭhāpeti, aniccaṃ dukkhaṃ anattāti passanto dassane patiṭṭhāpetīti sesesupi yojanā veditabbā. Yogāvacaroti samathayoge, vipassanāyoge vā avacaratīti yogāvacaro. Avacaratīti pavisitvā caratīti.
ਚਤੁਤ੍ਥਸੁਤ੍ਤਨ੍ਤਨਿਦ੍ਦੇਸવਣ੍ਣਨਾ ਨਿਟ੍ਠਿਤਾ।
Catutthasuttantaniddesavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਪਟਿਸਮ੍ਭਿਦਾਮਗ੍ਗਪਾਲ਼ਿ • Paṭisambhidāmaggapāḷi / ੪. ਚਤੁਤ੍ਥਸੁਤ੍ਤਨ੍ਤਨਿਦ੍ਦੇਸੋ • 4. Catutthasuttantaniddeso
