| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
6. චතුත්‌ථඋපොසථසුත්‌තං
6. Catutthauposathasuttaṃ
347. සාවත්‌ථිනිදානං. එකමන්‌තං නිසින්‌නො ඛො සො භික්‌ඛු භගවන්‌තං එතදවොච – ‘‘කො නු ඛො, භන්‌තෙ, හෙතු, කො පච්‌චයො, යෙන මිධෙකච්‌චෙ ඔපපාතිකා නාගා උපොසථං උපවසන්‌ති වොස්‌සට්‌ඨකායා ච භවන්‌තී’’ති?
347. Sāvatthinidānaṃ. Ekamantaṃ nisinno kho so bhikkhu bhagavantaṃ etadavoca – ‘‘ko nu kho, bhante, hetu, ko paccayo, yena midhekacce opapātikā nāgā uposathaṃ upavasanti vossaṭṭhakāyā ca bhavantī’’ti?
‘‘ඉධ, භික්‌ඛු, එකච්‌චානං ඔපපාතිකානං නාගානං එවං හොති – ‘මයං ඛො පුබ්‌බෙ කායෙන ද්‌වයකාරිනො අහුම්‌හ, වාචාය ද්‌වයකාරිනො, මනසා ද්‌වයකාරිනො. තෙ මයං කායෙන ද්‌වයකාරිනො, වාචාය ද්‌වයකාරිනො, මනසා ද්‌වයකාරිනො, කායස්‌ස භෙදා පරං මරණා ඔපපාතිකානං නාගානං සහබ්‍යතං උපපන්‌නා. සචජ්‌ජ මයං කායෙන සුචරිතං චරෙය්‍යාම , වාචාය… මනසා සුචරිතං චරෙය්‍යාම, එවං මයං කායස්‌ස භෙදා පරං මරණා සුගතිං සග්‌ගං ලොකං උපපජ්‌ජෙය්‍යාම. හන්‌ද, මයං එතරහි කායෙන සුචරිතං චරාම, වාචාය… මනසා සුචරිතං චරාමා’ති. අයං ඛො, භික්‌ඛු, හෙතු, අයං පච්‌චයො, යෙන මිධෙකච්‌චෙ ඔපපාතිකා නාගා උපොසථං උපවසන්‌ති වොස්‌සට්‌ඨකායා ච භවන්‌තී’’ති. ඡට්‌ඨං.
‘‘Idha, bhikkhu, ekaccānaṃ opapātikānaṃ nāgānaṃ evaṃ hoti – ‘mayaṃ kho pubbe kāyena dvayakārino ahumha, vācāya dvayakārino, manasā dvayakārino. Te mayaṃ kāyena dvayakārino, vācāya dvayakārino, manasā dvayakārino, kāyassa bhedā paraṃ maraṇā opapātikānaṃ nāgānaṃ sahabyataṃ upapannā. Sacajja mayaṃ kāyena sucaritaṃ careyyāma , vācāya… manasā sucaritaṃ careyyāma, evaṃ mayaṃ kāyassa bhedā paraṃ maraṇā sugatiṃ saggaṃ lokaṃ upapajjeyyāma. Handa, mayaṃ etarahi kāyena sucaritaṃ carāma, vācāya… manasā sucaritaṃ carāmā’ti. Ayaṃ kho, bhikkhu, hetu, ayaṃ paccayo, yena midhekacce opapātikā nāgā uposathaṃ upavasanti vossaṭṭhakāyā ca bhavantī’’ti. Chaṭṭhaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2-50. පණීතතරසුත්‌තාදිවණ්‌ණනා • 2-50. Paṇītatarasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2-50. පණීතතරසුත්‌තාදිවණ්‌ණනා • 2-50. Paṇītatarasuttādivaṇṇanā
